أوَّابَة.

أنا ساكن في الدور التانى. وده طبعًا ميعتبرش ارتفاع عالي، ومع ذلك لو قلت لي نط من الدور الثاني، مستحيل هوافق لانه ارتفاع كفيل بإنه يتسبب لي في كسور. لما بقف في الدور التاسع مثلًا، بحس انه ارتفاع شاهق، ولما برمي حاجة من فوق، بتوصل الأرض في ٣ ثواني. متخيل ان في ٣ ثواني بتجيب من أعلى البناية لقاعدتها؟ طيب لو علينا شوية بالمستوى وقلنا برج خليفة مثلًا، لو رميت حاجة من فوقه هتوصل الأرض امتى؟ حوالي ١٧ ثانية. يعني مكملتش ربع دقيقة حتى. طيب تيجوا نعلى بالمستوى عالأخر؟ أعلى سطح على وجه الأرض هو قمة افرست. لو رميت حاجة من فوقه وتخيلت مفيش عوائق في الطريق، ومع حساب مقاومة الهواء، الحاجة ديه هتوصل الأرض بعد دقيقتين و٤٠ ثانية. ده أعلى سقوط على وجه الأرض. طيب ما بالك ب ٧٠ سنة؟ عارف ايه اللي عمقه ٧٠ سنة؟ جهنم، أعوذ بالله منها. لو رميت حجر ضخم وانت في قمتها، مش هيوصل للقاع غير بعد ٧٠ سنة. متخيل عمق جهنم قد ايه؟ طيب يا ترى انت فاكر ان المنافقين اللي في الدرك الأسفل من النار هيوصلوا للقاع على طول؟ لا، ده هيتعذبوا في مستوياتها كلها لحد ما يستقروا في القاع. وده بقى مش سقوط حر بلا انقطاع، تخيل هيقعدوا كام ألف سنة في النار لحد ما يوصلوا لوجهتهم؟ لسة بتستصغر جهنم في نفسك؟ لسة بتستهين بشدة عذابها؟ لو كان العقاب بسيط كنا قولنا ماشي. لكن المسألة يا جنة يا نار. احسبها صح. -منقول