ادبیات سئونلر

اوشاق ادبیاتی اوچونجو بؤلوم هانانین یئنی دوستو ویدا حشمتی هانا سئحیرلی باغی محو اولماقدان قورتاردیقدان سونرا، باغین رنگلری داها پارلاق اولدو. گوللرین بویالاری ایله گؤی اوزو آراسیندا، سئحیر و حیات ال-اله گزیردی. اما هانانین اوره‌یینده بوش قالان بیر یئر وار ایدی. او دوشوندو: -کاش بو باغ‌دا، منیم کیمی خیالچی بیر دوستوم اولایدی..‌ نئچه گون سونرا، مدرسه‌یه یئنی بیر اؤیرنجی گلدی. قیوریم ساچلی، گؤزلوک‌لو، ساکیت و دقّت‌لی بیر اوغلان.  آدینا باریش دئییردیلر. او، سؤزلرینی یاواش و دوشونجه‌لی سؤیله‌ییردی. گؤزلری همیشه گؤی اوزونده یا کتابلارین ایچینده گزیردی. معلیم دانیشماق تاپیشیریغی وئردیکده، باریش سؤز آلدی و دئدی: -من بولودلار ایچینده شکیل‌لر گؤرمه‌یی و حیکایه یازماغی چوخ سئویرم. هانا بیلمزدن گولومسه‌دی. باریش‌ین سؤزلری اونون اورگینه توخوندو. تفریح زنگی وورولان کیمی، هانا هیجان‌لا نقاشی دفترینی آچیب، باریشا گؤستردی. باریش تعجب و سئوگی ایله دئدی: -بو نقاشی دییل، بو بیر دونیادیر. سن باغ یارادیبسان، خیاللارین باغینی. هانا یاواشجا دئدی: -منیم بیر سئحیرلی باغیم وار... دانیشان حیوانلار، بویاسی دگیشن چیچکلر... بیلمیرم، بلکه اینانمازسان. باریش‌ین گؤزلری پاریلدادی: -اینانیرام! چونکی منیم ده گیزلی بیر مئشه‌لیگیم وار، خیاللاریمین ایچینده... او گئجه، هانا باریشین الینی محکم توتوب، سئحیرلی‌باغین قوجامان آغاجین یانینداکی قاپیسینا آپاردی. قاپی آچیلار-آچیلماز، باغ بام-باشقا بیر حالا کئچدی. یئنی شکیل‌لر، یئنی رنگلر، یئنی بیر یول..‌. او یول تکجه، خیال قوردوغو زامان آچیلیردی. «گئجه‌یاریسی» بؤیوک‌دانیشان‌بایقوش، اوچاراق یاخینلاشیب دئدی: -هانا!.. باغی قورتاردین... ایندی ایسه یولداشلیغین‌لا باغا گؤزللیک قاتدین. خیالا گوونن اورک‌لر، باغی داها سئحیرلی ائده‌جک. بو ماجرادان سونرا، هانا و باریش، هر هفته‌ باغا گئدیردیلر. بیرلیکده نقاشی چکیردیلر و یئنی ماجرالار یاشاییب، هر گلیش‌ده، باغا یئنی بیر جان، یئنی بیر سس قاتیردیلار. هانا، او گون یئنی حیوانلار یاراتدی: اولدوزلار کیمی پاریلدایان تولکو، گله‌جک‌دن دانیشان، دانیشدیقدا سؤزلرینی نغمه کیمی اوخویان بیر قوش... https://t.me/Adabiyyatsevanlar

اوشاق ادبیاتی    دونیا اوشاق کلاسیک‌لری، روس خالق حِئکایه‌لری    اؤزگور اؤزیورَک، دورلیون یایینلاری، تورکیه، مارت، 2022    چئویرن: مجید تیموری‌فر (م. صفا)      کندلی و آیی...    کندلی‌ایله، بیر آیی دوست اولدولار. اونلار بیرلیکده شالغام (یئرآلماسی کیمی، توپراغین آلتیندا بیتن و سویو چوخ دادلی اولان بیتکی) اکمک قرارینا گلدیلر. حیله‌گر کندلی، آیی‌‌یه دئدی: "شالغام بؤیویَنده، من یئرده قالانی گؤتوررم، سن ده یوخاریداکی‌لاری"  آیی، بو راضیلاشمانی قبول ائتدی.    شالغام یئتیشَنده بیرلیک‌ده ییغدیلار. کندلی کؤکلری، یعنی شالغاملاری گؤتوردویو حالدا، یازیق آیی‌یه، یالنیز یارپاقلاری، یعنی یارارسیز حیسّه‌لری قالیبدیر. آیی کندلی‌نین حیله‌سینی باشا دوشدو، اما آرتیق گئج ایدی.   کندلی: «ایسته‌سه‌نیز، بو ایل ده، بیرلیک‌ده نَسَه اکه بیله‌ریک» دئدی.  آیی: «یاخشی،» دئدی، «امّا بو ایل تورپاغین اوست قاتینی گؤتوروب، کؤکلری منه تاپشیریرسینیز» کندلی سئوینجک « راضیلاشدیق، آیی قارداش» دئدی و ال سیخدیلار. کندلی ایکی کیسه بوغدا توخومو گتیردی. بیرلیک‌ده اکدیلر. چوخلو محصول ییغدیقدان سونرا، کندلی اوّلجه‌دن راضیلاشدیقلاری کیمی، تورپاغین اوست قاتینی، یعنی تاخیلین سونبول‌لرینی گؤتوردو. زاواللی آیی‌یه ‌ده، یالنیز یارارسیز کؤکلر قال‌دی. کندلی، آیی‌یه گولومسه‌یه‌رک سوروشدو کی، گلَن ایل نه اکک؟  یئنیدن آلدادیلدیغینا عصبیله‌شن آیی، او حیله‌گر کندلی ایله بیر داها ایش‌بیرلیگی آپارماق ایسته‌مه‌دی. https://t.me/Adabiyyatsevanlar

اوشاق ادبیاتی اوشاق ادبیاتی هر هفته پنجشنبه گونو ادبیات سئونلر کانالیندا . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

خبر قرارداد اسکو چیچ سرمربی تیم فوتبال تراکتور تبریز دوسال دیگر تمدید شد. https://t.me/Adabiyyatsevanlar

بوگون آذربایجانین سئویملی صنعتکاری «ناصر سهند (تفضلی- اشکریز)»ین جنازه‌سی آلمانیانین برلین شهرینده تورپاغا تاپشیریلدی. ۱۳۳۶-جی ایلین خرداد آییندا تبریز شهرینده دونیایا گؤز آچان صنعتکار، اوزون ایللر غربت دیاریندا یاشادیقدان سونرا، آنا وطن حسرتی ایله آرامیزدان آیریلدی. عزیز خاطیره‌سینه عشق اولسون. ایشیق

اوستاد" نقابی" نین گوندریگی تاریخی بیر شکیلی تقدیم ائدیریک. https://t.me/Adabiyyatsevanlar

✅✅✅سایین کانالداشلار چرشنبه گونلری ادبیات سئونلر قروپوندا یالنیز نثر یازیلارین پایلاشیریق . https://t.me/Adabiyyatsevanlar

"م. نقابی" شایا رئالیست(حقیقتچی)بیر شاعر و دوغرودان دوغرویا وطنپرست بیر شاعر ایدی، شاعراحمد شایا(الاو) نین چاپ اولموش اثرلری: آیسیز گئجه لر ۱۶۳ص،دومانلی گونلر ۱۲۶ص،حیدر بابادان شهریارا مکتوب و بابک منظومه سی ۸۱ص،گونشلی سحر ۱۰۴ص،رستنی های درمانی در پزشکی معاصر(ترجمه فارس دیلینده) ۲۱۶ص نشر اورین(داغ) چاپ اولمامیش اثرلری محمد نصرالدین طوسی(ترجمه فارس دیلینده)۱۰۸ص ،آذربایجان -ارمنستانمحاربه سی حاققیندا دوشونجه اریم ۲۳۸ص،آذزبایجان دیلینین خلاصه نحوی؟ آذربآیجان دیلینین فونیتیکاسی،کوچورمه(آقا موسی آخوندوو) ادبی تنقیدی اراشدیرمالار ۲جلد ۷۱۴ص،افست اولموشدور. بررسی های ادبی تنقیدی فارسجا ۱۷۹ص،افست اولموشدور ازجبهه به جبهه فارسی ترجمه ۲۹۵ص شبهای مهتابی فارسی ترجمه ۸۸ص پایاننامه مصلوبین مشهور از صدر اسلام تا زمان مشروطیت ۱۰۴ص مقاله لر ۴۰۰ ص. ۷ نوع لغتنامه ایشله میشدیر. لغتنامه لر: ۱-فارسجا-آذربایجانجا  ۴۳۰۰ ص،۸۰۵۰۰ باش  سوز. ۲-آذربایجانجا- فادسجا بویوک حجملی  ۲۵۰۰۰ لغت حدودیندا. ۳- ائلئکترو تخنیکا تئرمینلری لغتی،آذربایجانجا-فارسجا ۲۵۰ ص(فنّی اصطلاحاار) ۴-انگلیسجه-آذربایجانجا -فارسجا نجوم تئرمینلدی لغتی ۹۰۰ تئرمبن. ۵-لاتینجا-فارسجا-آذربایجانجا بیتگی لغتی،بعضی لغتلرین فارسجا معادلی اَله گلمه دیگی اوچون،اثر ناقص قالمیشدیر. ۶-معاصر آذربایجان دیلی نین او•مونیملر لغتی ۲۱۶ص(کوچورمه) مختلف معنالی سو~زلر. ۷-آذربایجان دیلی نین سینونیم لغتی- قورتولمامیشدیر. مترادف-آدداش. آلاودان، یازیرام: عشقه صادق عاشقم من، آیریلمارام نیگار سندن داغ باشینی دومان آلسا، کور اوغلی تک‌ قورخمارام چندن شعریم قاینار بولاق کیمی، ابهام آلاندا وطندن قیزیل سونبول زمی لردن، باعدان،بوستاندان یازیرام. ........................................................ انسان-گوزللیک-شعر انسانا باغلیدیر،هر درین معنا انساندیر خلقتین،قدری-قیمتی. ان هوندور داغلارین عظمتیندن یوکسک دیر انسانین،شانی،شوهرتی. ............................................ قوشما: اوءز گولو می دره دره گناهسیز دوشمیشم شره ظلم ایله ایکی یئره بولونموش بیر اوره گم من. علی اصغر اوغلی احمد اوردوخانی(سونرالار اورتانی)آدربایجان مفتونو و انسانلیق وورغونو. مخمر نجمی(ایشیق)۱۳۳۰ ش ،ده شایا ایله مشترک حیات قورموشدی،او ،۱۷ بهمن ۱۴۰۳ ده کرج شه هه رینده دونیادان کو`چدو،۱۳۱۱ دوغوملو ایدی،شعر اثری(منیم دویغولاریم) آدلیدیر.

دوشوندوروجو بیر سوال: ادبیاتیمیزدا"سلبریتیزم"فئنومنی فرصت می یوخسا تهدید!؟ ائلدار موغانلی معاصر دونیادا، سلبریتیزم فئنومئنی مرکب و چوخ شاخه‌لی بیر مسئله اولا‌راق اینکیشاف ائتمکده‌دیر. جمعیتین اجتماعی و تئخنولوژی ده‌ییشیک‌لیک‌لریندن تأثیرلنه‌رک، بو فئنومئن مدنی و اجتماعی ساحه‌لرده داها چوخ گؤرونمکده‌دیر. بیر طرفدن، تئخنولوژی اینکیشاف‌لار و اجتماعی شبکه‌لرین یارانماسی، (مثلا: اینستاگرام، توییتر، فیسبوک، تلگرام، واتساپ و سایر پلاتفورما‌لار) بو فئنومئنین یارانماسیندا و یاییلماسیندا چوخ اؤنملی رول اوینامیشدیر؛ دیگر طرفدن ایسه، اجتماعی ده‌ییشیک‌لیک‌لر بو فئنومئنین اینکیشافیندا تاثیرسیز قالمامیشدیر. نتیجه اعتباریله، اجتماعی شبکه‌لر و ده‌ییشیک‌لیک‌لر یئنی شؤهرت و سلبریتیزم فورما‌لارینی یاراتمیش، فردی‌لییه و اؤزونو ایفاده ائتمه‌یه اولان ماراق داها دا آرتمیش، اینسان‌لار حیات طرزلرینی، خاریجی گؤرونوشلرینی و گونده‌لیک فعالیت‌لرینی آچیق شکیلده تقدیم ائتمه‌یه داها چوخ مئیل ائتمیش و بو ده‌ییشیک‌لیک‌لر نتیجه‌سینده مدنی ده‌یرلر کئچیجی شؤهرت قارشیسیندا کؤلگه‌ده قالمیشدیر. سون ایللرده ادبیاتیمیزدا باش قالدیران و گونو-گوندن ده گئنیشلنمکده اولان «ادبی سلبریتیزم» فئنومئنی دقته لاییق بیر مسئله حالینا گلیب چیخیبدیر. بو فئنومئن بدیعی و ادبی اثرلرین کئیفیتیندن و ائستئتیک گوجوندن داها چوخ، شؤهرت و اجتماعی شبکه‌لرده‌کی پوپولیارلیغا اساسلانان موضوعلاری میدانا آتیبدیر. باشقا بیر سؤزله، «ادبی سلبریتیزم» ائله بیر حادثه‌یه چئوریلمکده‌دیر کی، بورادا بیر سیرا یازیچی، شاعرلر و ادبیات ایشچیلری کیمی اؤزلرینی تقدیم ائدن اینسان‌لار، اثرلری‌نین کئیفیتی و درین‌لیگی ایله دئییل، اجتماعی شبکه‌لرده قازاندیق‌لاری شؤهرت و جلب ائدیجی‌لیک سایه‌سینده مشهورلاشیر و ادبی مرجع‌لره چئوریلیرلر. بو پروسئسده بدیعی و ادبی معیارلار گئت- گئده اؤز یئرینی اجتماعی شبکه‌لرده ایزله‌ییجی سایی، به‌ینمه(لایک) اعتباری و گوندمده قالما باجاریغی کیمی گؤستریجی‌لره وئریر. بو مسئله‌یه دقت ائتمک اونا گؤره اهمیتلی‌دیر کی، «ادبی سلبریتیزم» یالنیز حقیقی ادبی معیارلارینی سوال آلتینا آلماقلا کیفایتلنمیر، هم ده مدنی کیم‌لییینی هله ده فورما‌لاشدیرماقدا اولان بیر جمعیتده بیر سیرا منفی نتیجه‌لر ده دوغورا بیلیر. بئله کی بو فئنومئن، ادبی اثرلرین کئیفیتی‌نین آشاغی دوشمه‌سینه، سطحی‌لییین یاییلماسینا، ادبی تنقیدین ضعیفلنمه‌سینه، مدنی مصرفچیلییین آرتماسینا، استعدادلی قلم صاحیبلرینین کؤلگه‌ده قالماسینا و داها چوخ شوو کاراکتئرلی اثرلرین تبلیغ اولونماسینا و مطالعه‌نین، ادبی تدقیقین آزالماسینا مساعد شراییط یارادیر. بوتون بونلار میللی مدنیت کیم‌لییینه، ائله‌جه‌ده ادبی یارادیجیلیغین گله‌جه‌یینه اوزون مدتلی منفی تاثیرلر قویا بیلر. تاسف دوغوران اودور کی، بو پروسئس تکجه پوپولیار ادبیات ایشچی‌لریله محدودلاشمیر و سون واقتلار بعضی حقیقی ادبیات نوماینده‌لرینی ده سلبریتیزم داورانیشلارینا مئیل گؤسترمه‌یه یؤنلتمکده‌دیر… قارشیدا دوران دوشوندوروجو سوآل بودور: ادبیاتیمیزدا «سلبریتیزم» فئنومئنی فرصت‌می، یوخسا تهدید!؟ خرداد ۱۴۰۴ قایناق: ایشیق سایتی https://t.me/Adabiyyatsevanlar

 م.صفا  قارمون ایفاچیلیق صنعتینین اونجوللری...     رحمان اسدالهی    سليمان اوغلو رحمان اسدالهی 1330 ـ جو گونش ايل نوروز بايراميی نين ايلكين گونو تهران شهرينده كؤچري اولاراق ياشايان بير آذربايجانلی موسيقيی چی عایله‌سينده دوغولموشدور. آتاسی اردبيل‌ين «نيار»، آناسي ايسه اوچ توكانلی آدلانان محلّه‌لريندن‌دير.                                           رحمانين دده‌سی اوستاد «عبدالرحيم» ـ ين قارمون ايفالاری و قارمون ييغما ايشلری، همده «مميش» آدلي دايي‌سي ـ نين قارمون و قاوال چالمالاري، بالاجا رحمانين آذربايجان موسيقي‌سينه وورغون اولماسيندا درين تأثيرلره سبب اولموشدور.      دئييلنه‌ گؤره قوجامان عبدالرّحيم ايرانا ايلكين قارمون‌لاري گتيريب ـ چالانلاردان بيريسي‌دير، او هم ده، بير نئچه دگرلي قارمون ايفاچي‌لاري يئتيشديرميشدير. میثال اوچون: كئچميشده ياشايان «شازدا» آدلي ماهير قارمونچو، اونون طلبه‌لريندن ساييلير. رحمان اسدالهي 1347 ـ جي ايلدن، اؤنجه قاوال چالماق، سونرالار ايسه قارمون آلتي‌نين سسلنديرمك يول‌لارين «مميش» بيگ‌دن اؤيرنميشدير.    1350 ـ جي ايل بير قيسا مودّت «علي‌اكبر افتحي» آدلانان اوستادين اينجه صنعت خوصوصوندا گؤستريش‌لريندن فايدالانيب، لاكين اؤز جوهرينده اولان يوكسك استعداد و چاليشقانليق اؤزلليكلره سؤيكه‌نرك، توم چتين‌ليكلره سينه گريب و بوگون بير پارلاق اولدوز تك قارمون ايفاچيليق صنعتينده دگرله نير.    رحمان 1352 ـ جي ايل كيچيك قارداشي وحيد[1] ايله بيرليكده «علي سليمي» ـ يه عایید اوركئستر قروپوندا ایشتیراك ائديبدير. 1355 ـ جي ايل تبريز راديوسوندا، ماهير آپاريجي منوچهر عزيزي‌نين تشبّوث و همّتي ايله يارانميش «آذر شو» آدلي بير موسيقي پروقراميندا، قارمون ايفاچيسي كيمي ایشتیراك ائتميشدير. بو اوركئستر قروپونون باشچي‌سي علي سليمي اولاراق، او دؤورون آدلیم صنعتچي‌لري و اوجومله‌دن: (علي دادستانپور، علي فرشباف، آذرمنش، وحيد اسدالهي، هوشنگ آذراوغلو، حميد عبادي، اباذر، و واردوش- خانیم ايله راحيله) آدلي خانيم‌لار ـ دا ایشتیراكچي‌لاردان اولموشلار. قروپون دگرلي ايفالاريندان بير نئچه لئنت يازي‌لاري ياديگار قالميشدير.    1356 ـ دان سونرا رحمان اسدالهي، باجاریقلی بسته‌كار و تارزن علي سليمي‌ايله بيرليكده تهران شهرينه قاييداراق، اورادا توي ـ دويون شنليكلرينده گؤزل ايفالارلا آذربايجان موسيقيسي نين قوللوغوندا دايانميشلار.    1363 ـ جو ايلدن ايسه آمريكايا كؤچرك، اورادا ساكن اولموشدور.    استاد رحمان اسدالهي‌نين ايفالاريندا هر زامان بير اؤزلليكلر شاهيدي اولوروق، دئمك اونون چالغي‌لاريندا تئكنيكالي گزيشمه‌لر و اورك‌لره اوخشايان مئلودي‌لر و شيرين ميضراب‌لارایله، باشقا گؤزلليك لر، هم ده، يئرلي خوصوصيّت‌لر آنلاشيلير، صنعتكارين موغام ايفالاري، خوصوصي ايله «بايات شيراز» و «سه‌گاه» شؤعبه و گوشه‌لرينده سانكي قارمون ديل آچيب، سيزلاياراق دينله‌ييجي‌لرين اورك‌ تئل‌لريني تيتره‌ده‌رك، خاطيره‌لي- آنلارين، گؤزلر اؤنونده جانلانماسينا سبب اولور. ......................... 1 ـ استاد وحيد اسدالهي، ضربي آلت‌لرينين ماهير ايفاچيسي، چوخلو اركئسترلر و دگرلي ايفالاردا ایشتیراك ائديب، همده باجاريقلي طلبه‌لر يئتيشديرميشدير. https://t.me/Adabiyyatsevanlar

سیز آللاه سیز دئیین، عؤمرونوزده بئله بیر ماتی‌میخاناسی گؤروب‌سونوز؟! یاخشی بیلمیرم «ماتی‌میخاناسی» ایله «شهر هئرت»ین فرقی نه‌دیر، آما بونو بیلیرم دونیانین هئچ یئرینده نه بئله ماتی‌میخاناسی وار، نه ده بو شلخته‌لیک‌ده شهر هئرت.‌‌.. هر گون انناس- خنناس خبردیر کی، یئردن-گؤیدن یاغیر. بیرگون یوخودان دوروسان گؤروسن اوچ‌ جوت بیر تک خیاوانی باغلاییب‌لار حجابدان اؤتور اؤزولرینی ییرتیرلار، صباحی‌سی بیر نفر خالقین پولو ایله جهنم دوزدیر، جهنمی ائله آچیقلاییر سانکی نامرد اوغلو اوتوز ایل جهنمه مأموروموش. بونلار بیرطرفه مئشه‌حسین‌ ده بیر طرفه کیشی‌نین اوغلو قیرخ ایلدیر هر اون‌بئش‌دن بیر، تنگه هرمزو باغلاییر دونیا دَییر بیر بیرینه، گمی‌لر قالیر صف‌ده، نفت مین دولاری آشیر، آمریکا ال-آیاغا دوشور، اوروپا یالوار-یاخارا، اوبیری‌لر پوخ یئه‌دیگیمه. تزه‌لیک‌ده بیر عده تاپیلیب کوچه‌دن کئچه‌نین یا حجابیندان اس ام اس ایله تشککور ائدیر یا حجابی‌نا  اخطار وئریر. بیر عده‌نین ده چؤره‌یی آمریکایا، روسیه‌یه، چینه یامان دئمک‌دن چیخیر، بئش-آلتی نفر ده آت-قاتیری یوکله‌ییب‌ گئدیرلر قاراداغ‌دا امامزادا دوزتسین‌لر... هله بئش-آلتی گوندو بیری تاپیلییب، دئییر فاحشه‌خانا آختارانلار دای تایلنده گئتمه‌سین دئیین عربستانا گئت‌سینلر. میلت یئمه‌یه چؤرک تاپمیر طرف قیرخ‌بئش دفه حجّه گئدیب عربستاندان ناراضی‌دیر. عوذور ایسته‌ییرم، ناهاردان قاباق اسراییلی، گون‌اورتادان سونرا آمریکانی محو ائدنلردن. حقیقتن سؤز چوخ اوزاندی سیزه بوندان آرتیق پرداخت ائده بیلمه‌دیم، باغیشلایین بویورون سیز ایشینیزده اولون. سیز آللاه سیز دئیین عؤمرونوزده بئله بیر ماتی‌میخاناسی گؤروب‌سونوز؟! https://t.me/Adabiyyatsevanlar

چوخ تاسفله، آذربایجانین سئویملی صنعتکاری خواننده «ناصر سهند (تفضلی- اشکریز)» بوگون یاشادیغی آلمانیانین برلین شهرینده اوره‌ک انفارکتی نتیجه‌سینده حیات‌لا وداعلاشدی. ۱۳۳۶-جی ایلین خرداد آییندا تبریز شهرینده دونیایا گؤز آچان صنعتکار، اوزون ایللر غربت دیاریندا یاشادیقدان سونرا، آنا وطن حسرتی ایله آرامیزدان آیریلدی. دوغما تبریزین صداقتلی ائولادی‌نین ایتگیسی ایله باغلی درین کدر ایچینده‌ییک. بو موناسیبتله «ایشیق سایتی» امکداشلاری آدیندان حؤرمتلی تفضلی- اشکریز عائله‌سینه، آذربایجانین صنعت اجتماعیاتینا، صنعتکارین دوستلارینا و یاخینلارینا، خصوصیله ده قارداشی حؤرمتلی صنعتکار دوستوموز اوستاد «ابراهیم تفضلی- اشکریز» جنابلارینا صمیمی باش‌ساغلیغی وئریر، سئویملی صنعتکاریمیز «ناصر سهند»ین عزیز خاطره‌سینی حؤرمتله یاد ائدیریک. ایشیق – آذربایجان ادبیات و اینجه صنعت سایتی ۵/۳/۱۴۰۴