ادبیات سئونلر

اوشاق ادبیاتی بو ایلده مکتب لر آچیدی منیم آنا دیلیم ائوده قالدی...

اوشاق ادبیاتی بالاجا قارا بالیق۶ یازار:«صمد بهرنگی» چئویرن: منیژه جم‌نژاد بالاجا بالیق دوشوندو کی ایندیجه اره بالیغی اونو پارچالایاجاق، تئز ترپشیب سویون او٘زونه چیخدی، بیر آزدان، گئنه سویون آلتینا دنیزین تکینی گؤر مه یه گئتدی. یولون آراسیندا بیر سو٘رو بالیغا راستلادی، مینلر مین بالیق! بیریندن سوروشدو: "یولداش، من یادام، اوزاقدان گلیرم، بورا هارادی؟" بالیق، یولداشلارین سسله دی: " باخین! بیری داها..." سونرا قارابالیغا دئدی: " یولداش، دنیزه خوش گلمیسن!" بالیقلارین بیری دئدی:" چایلارین بولاقلارین هامیسی بورایا تؤکولر، البتده نئچه سی ده باتلاغا باتار." بیری دئدی:" هرزامان سئوسن بیزیم دسته میزه قوشولا بیلرسن. " بالاجا قارا بالیق دنیزه چاتماسینا سئوینیردی. دئدی:" اونجه بیر دولانسام سونرا سیزین دسته نیزه قاتیلسام یاخجی اولار. بو سفر بالیقچی نین تورونو آپاراندا سیزین له اولماق ایستیرم." بالیقلارین بیری دئدی:" بو تئزلییه آرزونا یئتیشرسن، ایندی گئت دولان، آما سویون او٘زونه چیخارسان بالیق اودان دان گؤز اول، بو گو٘نلر کیمسه دن چکینمیر، گو٘نده دورد بئش بالیق توتمایینجا بیزدن ال چکمیر." قارا بالیق دنیز بالیقلاریندان آیریلیب اؤزو او٘زمه یه دوام ائتدی. بیر آزدان دنیزین او٘زونه چیخدی، ایستی گونش ایشیلداییردی. بالاجا قارا بالیق گونشین یاندیران ایسی سینی دالیندا دویور، لذت آلیردی. دینج، خوش سویون اوزونده او٘زوردو اؤز- اؤزونه دئییردی: " اؤلوم ایندی چوخ راحات منی سارا بیلر، آما من باشاردیقجا گرک اؤلومون پئشوازینا گئتمه‌یم. البتده بیر زامان اؤلومله او٘ز به او٘ز اولسام- کی اولاجاغام - اؤنملی دئییل، اؤنملی منیم یاشامیم یوخسا اؤلوموم باشقالارین یاشامیندا نه ایز سالماسیدی..." بالاجا قارا بالیق بوندان آرتیق خیالین یاشایا بیلمه دی. بالیق اودان گلیب اونو گؤتوروب آپاردی. بالاجا بالیق، بالیق اودانین دیمدییینین آراسیندا چابالیردی، آما قورتولا بیلمیردی. بالیق اودان بئلیندن ائله برک توتموشدو آز قالا جانی چیخیردی! آخی، بالاجا بیر بالیق نه قدر سودان ائشیکده قالا بیلردی؟ بالیق دو٘شونوردو کئشگه بالیق اودان ائله ایندی اونو اودسون، ان آز اونون قارنینین یاشی نئچه دقیقه اؤلومونون قاباغین آلسین دئیه. بو دو٘شونجه ایله بالیق اودانا دئدی: " نیه منی دیری - دیری اودمورسان؟ من او بالیقلاردانام کی اؤلندن سونرا بدنلری زهرلنر." بالیق اودان بیر سؤز دئمه دی، دو٘شوندو:" آی حوققا باز! نه کلکین وار؟ اولمیا منی دانیشدیریب اکیلمک ایستیرسن؟" اوزاقدان قورولوق گؤرونور، گئت به گئت ده یاخینلاشیردی. قارا بالیق دوشوندو:" قورولوغا چاتساق دا قورتولدو." اونا گؤره دئدی:" بیلیرم منی بالاوا آپاریرسان، آما من قورولوغا یئتیشینجه اؤلموشم، بدنیم زهرلنیب، بالالارینا نیه رحمین گلمیر؟" بالیق اودان دو٘شوندو:" ساقینماق یاخجی ایش دی! سنی اؤزوم یئیه رم، بالالاریما دا آیری بالیق توتارام... قوی گؤروم... کلک اولمیا؟ یوخ هئچ ایش گؤره بیلمسن!" بالیق اودان بو دو٘شونجه ده یدی، گؤردو قارابالیغین جانی بوش، حرکتسیز قالدی. اؤز - اؤزونه دئدی:" یانی اولدی؟ دا ایندی اؤزومده یئیه بیلمرم. بئله بیر یوپ یومشاق بالیغی یئرسیزجه هدر ائلدیم!" ایسته دی قارابالیغی سسله ییب سوروشا:" آی بالاجا! هله ده یاریم جانین قالیب سنی یئیم؟" آما سؤزونو قورتارا بیلمدی. دیمدیین آچینجا، قارابالیق آتیلیب آشاغی دو٘شدو. بالیق اودان باشینا بتر بورک کئچدیینی گؤردو، قارابالیغین دالیسیجا دو٘شدو. بالیق ایشیق کیمی هاوادا شیرجه ووروردو، دنیزین سویونون شووقونا اؤزوندن چیخیب، قوروموش آغزینی دنیزین شئه یئلینه تاپشیرمیشدی. آما سویا دو٘شوب نفس آلینجا، بالیق اودان گئنه یئتیریب بو سفر ائله سرعت له بالیغی توتوب اوددو کی بالیق هله بیر آز باشینا نه بلا گلدیینی آنلامادی، یالنیز هر یئرین قارانلیق، شئه اولدوغونو، بیر یول اولمادیغینی، آغلاماق سسینی حس ائدیردی. گؤزلری قارانلیغا اؤیرنینجه، چوخ نارین بیر بالیق گؤردو، بیر بوجاقدا بو٘زوشوب آغلیر، ننه سینی ایستیردی. قارا بالیق یاخینلاشیب دئدی:" بالاجا! دور بیر چاره قیل، آغلییب ننه نی ایستمک دن نه چیخار؟" نارین بالیق دئدی:" سن ده... کیمسن؟... مگر گؤرمورسن...آرادان گئدیر...گئدیرم...؟ اوهو...اوهو...اوهو...ننه... من.... من داها گلیب سنین له بالیقچینین تورونو دنیرین تکینه آپارا بیلمرم...اوهو...اوهو.!" قارابالیق دئدی:" بسدی بابا، سن هرنه بالیق وار پاک آبریسینی آپاردین!" آردی وار... https://t.me/Adabiyyatsevanlar

اوشاق ادبیاتی «سحر_خیاوی» هؤوشَنه(یئنی یئتمه‌لر اوچون) یوخ، داها یقین ائتدیک کی بو قَدَر شیققیلتی، فیکیر- خیال دئییل، حتمن دهلیزیمیزه اوغرو گیرمیشدی!! باجیم ایله قورخودان خیسین-خیسین دانیشا- دانیشا اوتاق قاپیسی‌نین جفته‌سینی سالدیق. سونرا ایسه ائوین، قاپیدان اوزاق، باش کونجونه سیخیلدیق. اوغرو قاب- قاجاقی تاققیلدادیردی. نه ایسه اورادا یئربه‌یئر ائدیردی. بیزیم ایسه گؤزلریمیز وحشتدن آچیلا قالمیشدی. هر بیر چیققیلتی داها وحشتیمیزی آرتیریردی، بعضن اللریمیز، نفسلریمیز بیربیرینه توخوندوغوندا توکلریمیز اؤرپنیردی. بیربیریمیزی قورخویا سبب اولدوغوموز اوچون دومسوکله‌ییردیک. پنجره‌دن گؤرونَن کولَک‌ده اَسَن آغاجلاریمیز بئله بیزی قورخودوردو. بالاجا اوره‌کلریمیز  سئرچه اوره‌یی کیمی چیرپینیردی. اوغرو تپیک‌ ایله قاپینی سیندیریب، ایچری گیرسه‌یدی، بیز ایکی ابتدایی صینیف اوشاقی، او هئیوره هئیکلین قاباقیندا نه ائده‌جک‌‌دیک؟! او حتمن بیزیم ال- قولوموزو باغلاییب، یوخسا اؤلدوروب، آنامین صاندیقچاسینی آچیب، عطیرلی پارچالارینی، یادیگارلیق و چوخ عزیز اشیاءسینی، گوموش، قیزیل‌لارینی آپاراجاقدی!! بو سوزلری باجیم ایله دانیشدیقجا قورخوموز داها آرتیردی. آشکارا دیشلریمیزین بیربیرینه دَیدییینی ائشیدیردیک. فیکیرلشیب، بیر چاره تاپمالی ایدیق. کاغاذ- قلم گتیریب ماجرانی یازدیق: " آنا جان، آتام ایله، سن حوضور یئرینه گئدندن سونرا، تاسوفله ائویمیزه اوغرو دوشدو، ایلک اؤنجه دهلیزده تاققیلتی سالدی، سونرا ایسه تپیک‌له قاپینی سیندیریب، بیزی اؤلدوردو، داها ائودن نه گؤتوردو، گؤتورمه‌دی بیز گؤرمه‌دیک، چون کی اؤلموشدوک! بو آز موددت عؤمروموزده سیزی چوخ اینجیتمیشیک‌سه باغیشلایین، اوشاقلیق و نادانلیق حئسابینا قویون. بیر ده گئجه‌‌یاریسی بالالارینیزی ائوده یالقیز بوراخمایین. گئتمه‌یینیز واجیب‌دیر سه، هئچ اولماسا اونلاری بیر بؤیوک یاشلی یاخین آداما تاپشیرین". مکتوبوموزون آرتیق ائتکی بوراخماسی  اوچون مکتوبون سونوندا دا، قارا قلم‌له گؤز شکیلی چکدیک، قیرمیزی قلم ایله ده نئچه داملا گؤزدن قان- یاش آخیتدیق. سونوندا دا "سیزی سئون: بالالارینیز"،- یازدیق. مکتوبو گؤز اؤنونه آینانین چرچیوه‌سینه سالدیق. یئنه ائوین باشدا کی کونجونه سیخیلدیق. اوغرو ائله دهلیزده تاققیلتی سالمیشدی،  آمما تپیک ایله قاپینی سیندیریب ایچری گیرمیردی! بلکه، آتا- آنانیزین موبایلینا زنگ آچایدینیز دئیه‌سینیز، آمما او زامان ایندیکی تکنولوژی‌دن زاددان خبر یوخ ایدی. آزی ساعات یاریم، ایکی ساعاتی هؤوشنه ایچینده کئچیرتدیک، او حئین‌ده حیاط قاپیمیزین کلید آچماق سسی گلدی، آتام گیل بلکه یوخولایاق دییه، اؤزلری ایله کلید گؤتورموشدولر. اوره‌کله‌ندیک آمما یئنه قاپی‌نین جفته‌سینی آچمادیق. آتام ایله آنام دهلیزه کئچرکن، آنامین هارایی قوپدو:" پاه آتاونان پیشیک، نئجه اوستومه آتیلدی‌سا، اوره‌ییم ایچیمه تؤکولدو". سونرا آتام ایله شاققیلداییب، گولوشدولر. اوتاق قاپیسینی آچاندا، جفته‌سی‌نین سالینماسینی دویوب، قاپینی دؤیدولر. باجیم ایله اوره‌کله‌نیب قاپینی آچدیق، سونرا ایسه اؤزوموزو آغلایارکن، آتا- آنامیزین قوجاقینا آتدیق. قورخو ماجرامیزی دئدیک، وصیت نامه‌میزی اونلارا گؤستردیک، بو قورخولارا سبب اولان حیطیمیزده کی "قارا پیشیک" اولدوغونا، اوکی وار گولدوک. هله ده باجیم ایله او خاطیره‌نی یادا سالاندا گولوروک. البته پیشیک ده بوش یئره تاققیلتی سالمامیشدی، آنام قُوورولو اَت ساخلادیغی ساخسی بارداغی آشیریب، دادلی- دوزلو، یاغلی-بوغلو اَتدن خئیلک یئمیشدی. آنام نه واختدان خسته قوهوموموزون، لاپدان اؤلوم خبرینی ائشیتدیک‌ده، آتام ایله هؤوله‌سک ائودن چیخیب، دهلیز قاپیمیزی آچیق قویموشدولار و.... https://t.me/Adabiyyatsevanlar

اوشاق ادبیاتی کیتاب تانیتیمی به مدرسه دیر رسیدم یازان:«دیوید کالی» رسام:«بنجامین جاد» چئویرن:«رضی هیرمندی»

اوشاق ادبیاتی سایه مقدسی :شعریمیزین سولان چیچگی . --شعر:سایه مقدسی به هر چه باور دارید قسم می دهم از من سه تار بسازید نه تفنگ! و این آخرین درخواست درخت توت همسایه بود که دیروز تبر باران شد! ........... ترجمه : بهروز صدیقی نه يه اینامینیز وار آند ایچیرم من مندن "سه تار" دوزلدین توفنگ یوخ و بو قونشونون توت آغاجی نین سون ایسته ییدی اعدامنان اؤنجه. https://t.me/Adabiyyatsevanlar

اوشاق ادبیاتی «مرتضی مجدفر» 🔺یئل و یارپاق‌لارین اویونو🔺 کوفولتو سسی قالخدی هر یئردن یئل هارای چکدی تاپیلدی بیردن. یارپاق‌لارا او سلاملار وئردی اویناماق اوچون چوخ سوُزلر دئدی: "گلین اوینایاق اوچا- اوچا بیز پوفله‌ییم سیزی اوُنده گئدین سیز. گیزلن‌ قاچدیر، بو اویونون آدی یادلاردا قالار اویناماق دادی." یارپاق‌لار قاچیب اوردان گئتدیلر اوزاقلاشیبان - گوُزدن ایتدیلر. یئل یولا دوشدو اونلارا ساری بیر چوخ گئدیبن یول اولدو یاری. یئل گوُرنمه‌دی هئچ یئرده یارپاق هر یئر بوش ایدی رنگ‌سیز، آغ - آپباق. یئل بیردن آنجاق دویدو بیر سسی چالیشدی تاپسین یارادان کسی. خیشیلتی سسی گولدوردو اونو چاتمیشدی داها اویونون سونو. چیخدی یارپاق‌لار گیزلنن یئردن قالخدی هاوایا شن سس‌لر بیردن. کوفولدادی یئل گوُزلردن ایتدی یئل‌له یارپاغین ناغیلی بیتدی.        پاییز ۱۴۰۱ https://t.me/Adabiyyatsevanlar

اوشاق ادبیاتی شعر: ویدا حشمتی رسیم: لیدا حشمتی 🍁پاییز تؤکور بولودلار یاغیش پاییز گلیب اوشاقلار یاپراقلار خیشیلداییر قیزاریب‌دیر یاناقلار  ساری-قیرمیز بویانیب، قارا داغین مئشه‌سی آذربایجان باشاباش، سانکی جنت گوشه‌سی پاییز یولدان گلینجه، کؤچورلر قارانقوشلار ألوان-ألوان بویانیر، داغلار، ائنیش-یوخوشلار گؤزل‌دیر قاریش-قاریش، یوردوم، یووام، مسکنیم هر فصیلی قشنگ‌دیر آنا یوردوم، وطنیم

اوشاق ادبیاتی ‍ اوچورتماسی اؤزوندن داها بؤیوک اوشاق «ایلقار_موذن_زاده» #اوچورتما رؤیالار اویونو ایدی. یارپاق قوینوندا اوچوب، بولودلار اوستونده آددیملاماق. رؤیالاری اوچورتمادا جورلاییردیم؛ عکاسخانامیزدا. توکاندان کؤهنه بیر قزئته‌ تاپیردیم، بیراز سیریش آلیردیم #کؤهنه_بازاردان. حه‌یطیمیزده‌کی گینانار آغاجیندان نَزیک دال قوپاریب، محلله باشیندا مش تقی‌دن بئش دنه عاشیق ساپی گؤتوروردوم. هالین اورتاسیندا جورلاییردیم. قزئته‌نی اوچ بوجاق ائدیردیم. دالی هیلال کیمی قاواریب، کاغیذ اوزه‌رینه یاپیشدیریردیم. سونرا اوزون قانادلارینی اوچ بوجاقدان ساللاییردیم. اورتانی اوزون قیراقلاری ایسه گوده. عاشیق ساپلارینی کمپوت کنسروینه دولاییب، داما چیخیردیم. گؤیه میلله‌نیردی. بعضا مایاللاق ووروب یئره دوشوردو. #صاحب_الزمان محلله‌سیندن یوخاری قالخیب، شبئه‌مئیدانینین گؤیونه کیمی گئدیردی. سونرالار شبئه اوشاقلاری‌نین ریزینداشلا اوچورتمامی ووروب سالماق چاباسینی ائشیدیردیم. بولودلارین یاخینلیغینا کیمی گؤزدن محو اولماسینی گؤروردوم. او لحظه‌نین لذذتینی هئچ نه ایله ده‌ییشمزدیم. #قوشلارین اوچورتماما یاخینلاشماسینی. سونرا ایپیم قیریلماسایدی توپلاییب یئره ائندیرمه‌ییمی. قوش کیمی قاناد چالماق، اوجالارا یئتیشیب رؤیالاری یاشاتماق یاشانیردی اوشاقلیقدا. آرزولارا یئتیشمه‌مکله، گله‌جک گؤیلری تسخیر ائده بیلمه‌مه‌یی، اوشاقلیق رؤیاسینی اونوتدوغوموزدان اولماسینی دوشونوردوم بؤیودوکجه. بلکه اوچورتماسی اؤزوندن داها بؤیوک اولان اوشاق کیمی، اوچورتمامیزدان مؤحکم یاپیشمیش اولسایدیق، گؤیلری اوچوب یئنی‌دن قاییدیب ساغلامجا یئره قونا بیلردیک. ‌🗓️⁩۱۴۰۲/۰۶/۲۷ #خاطیره #کؤشه_یازی https://t.me/Adabiyyatsevanlar

صاحبی اونون اوچون هر شئی ائله‌ییر، اونو ساخلایان اوشاق. بو فلسفهدیر‌. اونا گؤره اونو وئریبلر ۱۵، ۱۶، ۱۷ یاشلی اوشاقلارا و من همین گؤروشده اونو دانیشدیم. اینانیرسیز، او یاشدا اوشاقلار تام ساکیتلیک‌له اونو دینله‌دیلر. اثرده او اویونجاغین قلبینده سئوگی یارانما پروسه‌سی گئدیر. نه جور یارانیر و سونلارا یاخین او آرتیق سئویر. نوبتی صاحبینی، خسته قیزی او سئویر. دئمه‌لی، بیز اوشاقلارا نه‌یی وئرمه‌لی‌ییک، نئجه سئومک اولار، وطنی نئجه سئومک اولار، آنانی نئجه سئومک اولار.  لاپ ائله یانیندا اوتوران قیزی نئجه سئومک اولار؟ اوشاق بیلمه‌لی‌دیر. قشم نجفزاد: شهلا خانیم  اوشاغا نئجه اؤیرتمک اولار کی، آنانی نئجه سئومک اولار؟ سئوینج نوروقیزی: من دئییم نئجه. «سم ماک براتنی» وار  ایرلند یازیچیسی‌دیر. وئرین اینترنتده اونو آختاریشا، جمعی ۲ حئکایه‌سی چیخیب اونون. حئکایه‌سی‌نین بیری اودور کی، «من سنی چوخ، چوخ، چوخ سئویرم» اینانین او حئکایه‌ بیر دنه روماندیر. او حئکایه‌دن بوتون دونیا دانیشیر. بالا دووشان آنا دووشانا سئوگیسینی اظهار ائله‌ییر، باشلاییر «آی آنا، بیلیرسن من سنی نه بویدا سئویرم؟ دئییر نه بویدا؟ دئییر کی  باخ بو آغاج بویدا. آناسی دئییر کی، آمّا من سنی آغاجین ان یوکسک بوداغی بویدا سئویرم. دئییر کی، یووخ  آنا، من سنی او داغ بویدا سئویرم. آنا جاواب وئریر کی، آمّا من سنی او داغین اوستونه چیخان گونش بویدا سئویرم.  نه بویدا، نه بویدا، نه بویدا، آخیردا دئییر کی، آنا من سنی باخ بوردان او چایا قدر سئویرم» و بو آرادا آنا اونو او قدر سیغاللاییر کی، بالا یاتیر. او یاتاندان سونرا آنا دئییر «من سنی بوردان چایا و چایدان بورا قدر سئویرم». یئنه ده سئوگی ایضاح اولوندو دا. اونو باشقا نه جور وئرمک اولار اوشاغا؟ بیز یازا بیلمیریک. هئچ اولماسا ترجمه ائدک، وئرک. هئچ اولماسا اؤیره‌نک. مثلا، من ایندی بیر شعر اوخویاجام سیزه. من اورادا وطنین اوجالیغینی تصویر ائده‌جم. بلکه منیم اؤزومه خوش گلیر اونو تصویر ائله‌مک. دئییر: بولور یاغیشلار یاغیر، چیق، چیق، چیق یاغیشدان ایچیب لاله لر آچیب‌ نغمه سؤیله‌ییر یئنه ناوالچا چا-چا-چا، چا-چا-چا دونیادا نه وار وطندن اوجا؟   کپه‌نکلرین قانادی ظریف، کوله‌یی ایلیق، مهریبان، خفیف دالغالار سالیر ساحله ناخیش، آیاقلار آلتدا خزل خیش، خیش، خیش‌ گونشدن ایچیب چمن دویونجا دونیادا نه وار وطندن اوجا‌‍؟   شئه پاریلداییر بوداقدا پار-پار قیپ-قیرمیزی‌دیر باغچالاردا نار. قارانقوشلارلا گلر ایلک باهار جوجه‌رر زمی، بوی وئرر یونجا دونیادا نه وار وطندن اوجا؟ ائلناره- کیمووا: ایندی سئوینج خانیم  بو جور گؤزل شعردن نئچه نفرین، نئچه اوشاغین خبری وار؟ سئوینج نوروقیزی: پروبلئم ده بوندادی دا. ائلناره آکیمووا: شهلا خانیم خبرسیزلییه گؤره کیم گوناهکاردیر؟ توتاق کی  آذربایجاندا هانسی اوشاق ژورناللاری چیخیر «گونش»،  «گؤیرچین»، «گؤی قورشاغی» و س.  او رئداکتورلار زحمت چکمه‌لیدیر، یاخشی مولفلری، آختارمالیدی. ژورنالین یازی حیاتینا جلب ائله‌مه‌لی‌دیر. نئجه اولور آذر معلّیم یاخشی مولفلره زنگ ائله‌ییر، آراییر، یازیلارینی آلیر. آیدا، ایکی آیدا بیر دفعه‌ چیخان ژورناللاری یوکسک سويّه‌ده حاضرلاماق بو قدر چتین ایشدیرمی؟ مثلا «گونش» ژورنالینی من اؤتن ایل ادبيّات انستیتوسوندا علمی-یارادیجیلیق مشاوره‌سینه حاضرلاشاندا دقتله نظردن کئچیرمیشدیم. اینانیرسیز، چاپ اولونان شعر نمونه‌لری‌نین اکثريّتی‌نین اوشاق پسیخولوگییاسینا قطعی عایدیّتی یوخ ایدی. یعنی دئمه‌ییم اودور کی، رئداکتورلارین ایچینده ده بیر یانغی،  وطنداشلیق دویغوسو، معیار اولمالی‌دیر.  منیم اوغلوما هر دفعه‌ مکتبدن وئریرلر «گؤیرچین»ژورنالی آلیب گتیریر. باخیرام کی، رافیق یوسف اوغلو ماکسیموم شکیلده ژورنالین یاخشی چیخماسینا چابا گؤستریر.  شهلا قمبرووا: بو دقیقه اوشاق ژورناللاری‌نین اکثريّتی آنجاق آد گونلرینی تبریک ائله‌مک‌له مشغولدورلار. فیلان کسین اوشاغی‌نین بیر شکلی قویولور. ننه‌سی، باباسی، دده‌سی نسلی-کؤکو تبریکائله‌ییر. هامیسی رئکلاملا مشغولدور. ائلناره آکیمووا: کوممئرسییا(تجاری) ماراقلاری ملّی ماراقلاری اوسته‌له‌ینده، بئله حاللار باش وئریر. سونرا دا دئییریک ماليّه‌، ماليّه‌. آیریلیر دا، زحمت چک، ویجدانلا یاناش ایشینه. آذر توران: بونون چاره سینی تاپماق چتین دئییل کی. بیزیم ده قوصوروموزدور کی، او فاکتلاری گونده‌مده ساخلامیریق. آچیق تنقیدلر یازیلمیر. شهلا قمبرووا: بیلیرسینیز، هانسیلار کی، اؤزه‌لدیلر، اونلارا مداخله ائتمک اولمور.  گلین بئله ائله‌یک. من سیزی نئجه ییغا بیله‌رم؟ بیزیم کیتاب‌خانانین ناظرلیک طرفیندن تصدیق اولونموش علمی شوراسی وار. زاهید معلّیم، سئوینج خانیم، اوشاق یازیچیلاری‌نین چوخو او شورانین عضوودورلر... آردی وار https://t.me/Adabiyyatsevanlar

سونرا کئچک تئلئویزییالارا. تئلئویزییادا زاهید خلیل‌ین «چیراق»  وئریلیشی وار ایدی. هانی او؟ میکاییل رضاقولوزاده‌نین «کیتاب ائوی» وئریلیشی وار ایدی. هانی؟ تئلئویزییا قارلی قیش گونونده ده ائولره گیریر. آمّا او کیتابی اورا آپاریب چاتدیرماق اولمور آخی. هامی تئلئویزییایا باخیر دا. سئریاللارا باخیرلار، آمّا بیر اوشاق وئریلیشی اولسا، همین اوشاق وئریلیشینه دئیک کی، زاهید خلیلی دعوت ائله‌سه‌لر  کیتابینی گؤسترسه‌لر، هر آی ۵ شاعر، ۵ کیتاب.  اونسوز دا چیخیر بو، تئلئویزییا بؤیوک رول اوینایا بیلر. بو علاقه‌‌لر قیریلیب، مکانیزملر ایتیب. ایندی شهلا خانیم چوخ ساغ اولسون. بؤیوک ایشلر گؤرور.  کیتابلاری گؤنده‌ریر. آنجاق بو اوخوجو آرزولارینی، اوخوجو آجلیغینی قارشیلامیر. آذر توران: سیزین ده مسئولیّت‌ینیز بؤیوکدور. یازیچیلار بیرلییی‌نین اوشاق ادبيّاتی شعبه‌سی‌نین رهبری کیمی. قشم نجف‌زاد: بلی، یازیچیلار بیرلییی‌نین اوشاق ادبيّاتی شعبه‌سی‌نین رهبرییم. من دفعه‌لرله دئمیشم، لاپ رهبرلییه قدر دئمیشم. آنار معلّیم ده بیلیر. یاخود گؤتورک اورتا مکتبلری،اونیوئرسیتئتلری.  زاهید خلیل‌ین دئیک کی، ۳-جو صینیفده بیر شعری کئچیریلیر. سنی مکتب دعوت ائله‌یه بیلر کی، زاهید معلّیم، بو شعری گل اؤزون کئچ. زاهید معلّیم گئدیب او شعری اؤزو کئچسه، داها کئیفيّتلی اولار. و یا هانسی‌سا باشقا بیر شاعریمیز. ائلناره آکیمووا: من ایسته‌یردیم بو گون بیز داها چوخ اوشاق ادبيّاتی‌نین یارادیجیلیق پروبلئملریندن دانیشاق.  یعنی بو گون یازیلان متنلرین سويّه‌سی،  بوشلوقلار بارده... زاهید خلیل: من ده ائله اونو دوشونورم.  چونکی «ادبيّات قزئتی» اولاراق بورادا اونون یارادیجیلیق پروبلئملری داها چوخ ایشیقلاندیریلمالی‌دیر. بیلیرسینیز، بایاق صحبت گئتدی، دوغرودان دئییرم. مثلا  من قطعی بئله یولداشلاردان اینجیییرم کی، بیز بیر-بیریمیزین اثرینی اوخوموروق. اینانین کی، هئچ کس آخیرا قدر بیر-بیری‌نین اثرینی اوخوماییب. باخ «جیرتدان»دان دانیشیریق. منیم جیرتدانیم بو بویدا بیر اوشاقدیر، باخ بو بویدا. او جیرتدان دئییل. بونون حاقیندا ۴ مونوقرافییا یازیلیب، هله او یازان آدام بیلمیر کی، بو جیرتدان نه بویدادیر؟ و بو نییه بو بویدادیر؟ بونون فلسفه‌سی نه‌دیر؟ «زدراوستووی دژیرتدان»  کیتابی‌نین آخیریندا بئله بیر جومله‌‌ یازمیشام. دئییرم «جیرتدان  سن چوخ بالاجاسان ائی، بو بالاجالیقلا نه ائده‌جکسن؟» او دئییر کی، بالاجا آچارلا بؤیوک قاپیلار آچماق اولار، بالاجا قیغیلجیملا بؤیوک تونقاللار یاندیرماق اولار. من ده دئییرم کی «جیرتدان، من سنه بیلیرسن نییه بالاجا دئمیشم؟  چونکی بالاجا اوشاق گؤزویله ده بوتون دونیانی گؤرمک اولار» بو بیزیم یارادیجیلیق پروبلئمیمیزینباشلانغیجیدیر. یعنی بیز بالاجا اوشاق گؤزویله ده بوتون دونیانی گؤره بیلریک و من، دوغرودان تأسف ائدیرم کی، ایندی باشقالاری اوخومایا بیلر ده، یولداشیق‌دا، آ کیشی، سن منیم حاقیمدا مونوقرافییا یازیرسان، بونو بیر آچ اوخو، سونرا یاز دا. نییه بئله بو قدر ازبر سؤزلر دئییرسینیز؟ آیگون خانیم، او واخت سن منله دانیشدین. بیر آیری قیز گلدی یانیما. من ده بو زامان اوتوروب اؤز حیکایه‌لریمی تزه دن اوخویوردوم. اورادا بیر حیکایه‌ وار «هئچ نه‌دن یارانمیش آدام» دئییر کی، «بیری وار ایدی، بیری یوخ ایدی، بیر آدام وار ایدی، او هئچ نه‌دن یارانمیشدی. باشی دا هئچ نه‌دن ایدی. آمّا پالتارلاری اصل پالتار ایدی.‌..» اؤز-اؤزومه اوخویورام بونو، فیکیرلشیرم. بونو من کیم اوچون یازمیشام، هانسی یاش اوچون؟ و ایندی سیزین سوالینیزا جاواب وئریرم کی،  باخ ۱۳-۸ یاش آراسی اوشاق اونون آرخاسینداکی فلسفه‌نی گرک دویا بیلسین. سئوینج نوروقیزی: منی کیتاب‌خانایا قوناق چاغیرمیشدیلار. بؤیوک اوشاقلارلا، من فیکیرلشدیم کی، آی الله،  من اونلارلا ایشله‌مه‌میشم. گؤتوردوم اینترنتی ورقله‌دیم کی، نه‌دن دانیشا بیله‌رم کی، اونلاری مشغول ائله‌ییم.  کیتاب‌خانانین «گؤی قورشاغی»  ژورنالی چیخیر. من ده اونون رئداکتورویام. اوردا کئیت دئ کامئللونون «ائدواردین غیری عادی سرگذشتلری»نی ترجمه ائدیرم. هر سایدا بیری وئریلیر. من باخدیم کی، ۱۵, ۶، ۱۷ یاشلی اوشاقلار اوچون وئریلن اثرلر سییاهی‌سیندا هانسینی کی،  بونلار اوخومالیدیرلار «کولک‌له سوورولانلار» وار ایدی. «آج اویونلار» وار ایدی. محتشم اثرلردیر. باخدیم کی، «ائدواردین غیری عادی سرگذشتلری» یعنی من اونو توتاق کی، ۴-جو, ۳-جو صینیفلر اوچون وئریرم. نه‌یه گؤره سالیبلار؟ فلسفه‌سی وار اثرین. بیر دنه چینی اویونجاقدی.  دووشان اویونجاغی‌دیر، آنجاق قولاقلاری دووشان دریسیندن‌دیر. آیاقلاری پارچاداندیر، بدنی چینی‌دیر. بو اویونجاق نه‌یه گؤره فرقله‌نیر، نه‌یی ایله فرقله‌نیر؟ نییه اثرین قهرمانی اولوب؟  اونا گؤره کی، بو اویونجاغین قلبینده سئوگی یوخدور. او سئوه بیلمیر... آردی وار https://t.me/Adabiyyatsevanlar

سئوینج نوروقیزی: ساغ اولسونلار بو قیزلار. کئچن ایل چوخ اذيّت چکدیلر. آیگون باغیرلی: من مشاهده ائدیرم بایاقدان. چوخ ماراقلیدیر کی، اوشاق یازارلاری‌نین اؤزلری ده بو گون اوشاق ادبيّاتی‌نین دوروموندان ناراضیدیرلار.  یعنی سیز ده سئوینج خانیم  زاهید معلّیم، بیز اساس سیزی اوشاق یازاری کیمی تانیییریق. آمّا سیز ده شیکایت‌لنیرسیز کی، اوشاق ادبيّاتی یوخدور. اولانلارین دا سويّه‌سی هامینی اولدوغو کیمی سیزی ده قانع ائله‌میر. بو یازیلان اثرلرین سويّه‌سی باشقا بیر موضوع‌دور. یعنی بیز بوردا یازیچیلارا درس کئچمک نيّتینده دئییلیک. ساده‌جه  من دوشونورم کی، اساس پروبلئم نه‌دیر؟ بو گون واحد بیر مکانیزم یوخدور. یازیلان اوشاق ادبيّاتی‌نین سئچیلمه‌سی  نشری و بونون پایلانماسی. مثلا توتاق کی، هانسی‌سا بیر استعدادلی یازیچیمیز وار، اثر یازیب. توتاق کی، او اثری یوز تیراژلا چاپ ائله‌یبیلر. بو هانسی اوشاغا بس ائله‌یه‌جک. من دوشونمورم سووئت دؤورونده اوشاق ادبيّاتی توتاق کی، ایندیکیندن گوجلو ایدی، یاخشی یازیلیردی. آمّا او واخت یاخشی یازیلان اثر گئدیب اوجقار کندده اولان اوشاغا دا چاتا بیلیردی. مثلا «پیونئر» ژورنالی وار ایدی. «گؤیرچین» ژورنالی وار ایدی. بونلار یوکسک تیراژلا چاپ اولونوردو. بوتون ائولره، اوشاقلارا پایلانیردی. بوتون اوشاقلار بو اثرلرله تانیش اولوردو. آمّا بو گون توتاق کی، هانسی‌سا بیر یاخشی اثر، شعر یازیلیر. او اوشاغا گئدیب چاتیرمی؟ یوخ. سیز بیلیرسیز ده ۲۰۱۵-جی ایلده نظامی آدینا ادبيّات انستیتوسوندا اوشاق ادبيّاتی‌نین پروبلئملری ایله باغلی مشاوره کئچیریلدی‌. باخ، او مشاوره‌دن قازانجیمیز نه اولدو؟ اوشاق یازارلاری ایله تنقیدچیلرین آراسیندا ائله بیل کی، بیر اونسيّت یاراندی اوندان سونرا. مثلا  سئوینج خانیمدیر. رافیق یوسف‌ اوغلودور، ریحان یوسف‌قیزی‌دیر. چاپ اولونان اثرلر حاقیندا، یئنی نایلیّتلر حاقیندا دایم بیزله اونسيّت یارادیرلار.  علاقه‌‌ ساخلاییب دئییرلر کی،  نه‌ییمیز چیخیب. بو،یاخشیدیر، ادبيّات‌شوناسلارلا اوشاق یازارلاری‌نین سیخ اونسيّتی اولمالیدیر. آمّا مثلا، توتاق کی، رافیق یوسف اوغلونون اثرلری چاپ اولونور یوز تیراژلا، او گئدیب اوشاقلارا چاتمیر.  او اؤز محدود دایره‌سینده کیمه وئره بیلیرسه، اوشاق آنجاق او اثرله تانیش اولا بیلیر. منه ائله گلیر، ان اساس پروبلئم واحد ممانیزمین اولماماسیدیر. شهلا قمبرووا: رافیق یوسف اوغلونون اثرلری هئچ واخت یوز تیراژلا چاپ اولونماییب. آیگون باغیرلی: من مثل اوچون دئییرم. شهلا قمبرووا: اولسا دا، بیرینجی‌سی  اونلار کیتابلارین‌ین تقدیماتینی بیزیم کیتاب‌خانادا ائله‌ییرلر. بیز چالیشیریق کی، کیتابلارین سایینی چوخ گؤتورک. آیگون باغیرلی: سیزین تقدیماتا نئچه نفر گله بیلیر شهلا خانیم؟ شهلا قمبرووا: آیگون،خانیم  من سیزه بیر شئیی دئییم. بیزیم کیتاب‌خانا تکجه کیتاب‌خانا اولاراق فعالیّت گؤسترمیر کی... آیگون باغیرلی: سیزین کیتاب‌خانادان رئسپوبلیکادا بیر دنه‌دیر. من اوجقار کنددن دانیشیرام. شهلا قمبرووا: بیزیم کیتاب‌خانا علمی -مئتودیک مرکزدیر. یعنی اوجقار کندلره ده ادبيّات بیزیم کیتاب‌خانا واسطه‌‌سیله گئدیب چاتیر. یئترینجه او ادبيّاتدان منیم کیتاب‌خانامدا اولمالیدیر کی، من رایون کندلرینه او کیتابدان پایلاییم. هر ایل من رایون، کند کیتاب‌خانالارینا یوزلرله کیتاب گؤنده‌ریرم. مئتودیک وسایطلر گؤنده‌ریرم. من مولف دئییلم، هم ده ادبيّاتچی دئییلم. قشم معلّیمین آنتولوگییاسی وارسا، اونو گؤنده‌ریرم.  زاهید معلّیمین کیتابلاری وارسا، اونو گؤنده‌ریرم. زاهید خلیل: بیلیرم. ایندی آیگون خانیم دا دئییر کی، سیزین او گؤنده‌ردییینیز سووئت دؤورونده‌کی تیراژدا دئییل. شهلا قمبرووا: طبیعی کی، او تیراژدا دا اولا بیلمز. او تیراژا گلمه‌یین ائله یازانلاری ۵۰۰ ه قالدیراق. او تیراژین اون مینه قالخماغینا چوخ وار هله. آذر توران: بو کفایت قدر پرینسیپیال(مدیریت) مسئله‌دیر. آمئریکادا ۱۹۲۷-جی ایلده اوشاق و گنجلر اوچون ۳۱ میلیون نسخه کیتاب نشر اولونموشدو. اساساً ده «مارک تواین» «تام سایئرین ماجرالاری».   قشم نجف‌زاد: من بایاق ایکی پروبلئم دئدیم. بیر یازیچی‌نین یارادیجیلیق پروبلئمی دئدیم، بیر ده ایکینجی مسئله‌ده همین سیز دئین پروبلئم ایدی. بورادا بایاق دئدینیز کی، نئجه ائله‌یک کی، اوشاق ادبيّاتی اینکیشاف ائله‌سین. بؤیوک مسابقه‌لر تشکیل اولونمالیدیر. کئچن ایل تحصیل ناظرلییی مسابقه‌ اعلان ائله‌دی. نتیجه‌سی نه اولدو؟ جمعی ۱۵ گون اعلانی سایتلارینا قویدولار. سونرا دا سایتدان چیخارتدیلار. اونو نه مطبوعاتا وئردیلر، نه بیر شئی ائله‌دیلر.  اورادا معيّن قالیبلر اولدو. بس نتیجه نه اولدو؟ اونلارین قالیب گلدییی اثری من هارادان تاپیم؟ نییه چاپ ائله‌مه‌دیلر.  هئچ اونو قابارتمادیلار دا.

شهلا قمبرووا: من کیتاب‌خانادا سورغو کئچیردیرم. اوشاقلارین داها چوخ هانسی کیتابا احتیاجی وار؟ کئچن ایل درسلیکده واری ایدی ج. جاببارلی‌نین روس بؤلمه‌سی اوچون «دیلاره»اثری  حتی ناظرلیکدن  ووردولار کی، او کیتاب لازیمدی بیزه، اینانین کیتاب‌خانادا بیز او کیتابی تاپمادیق. چونکی روس دیلینده دیر. تکرار نشر اولونماییب. آمّا درسلیکده وار. منتخبات‌دا دا بونا احتیاج وار. بو کلاسسیک‌لریمیزه هردن مراجعت ائله‌مک لازیمدیر. سونرا باخدیم س.س. آخوندووون «قورخولو ناغیللار» «نورالدین»«عباس و ملکه» و س. بونلار دا یوخدور. تصوّر ائله‌یین رئسپوبلیکا اوشاق کیتاب‌خاناسی بیزیم تشکیلاتدیرسا بورادا بیرجه نسخه وارسا، بو رئسپوبلیکانین استاتیستیک حسابلامالارا گؤره ۲ میلیون یاریمدان چوخ اوشاغی وار. ۹ میلیون اهالی‌نین ۵۲ میلیونو اوشاقدیر. بونون هئچ اولماسا ۱ میلیونو مکتبه گئدیر. بلکه ده چوخ. دوزدورمو؟ دئمه‌لی  بیر کیتابی ۱ میلیون آراسیندا نئجه بؤلمک اولار؟  ممکن اولان شئی دئییل. من کیتاب کلوبا زنگ ووردوم. اورادا ئلچین معلّیم وار. دئدیم کی ائلچین معلّیم  بئله بیر شئی وار. یعنی درسلیکلرده احتیاج وار. آمّا ساتیشدا باهادیر. بیرجه «قانون» نشریّاتی چیخاردیر. او دا ۱۴ ماناتدیر‌  آخی هر آدامین دا گوجو چاتماز ۱۴ ماناتی گئدیب کیتابا وئرسین. دئدی کی، شهلا خانیم  سیز ناراحات اولمایین‌  متن‌لری سیز تاپین وئرین منه، ایلک نشرلری، بیز اونون اوستونده رئداکته ائله‌یریک، ایشله‌یریک. نه ایسه، اونلار مندن ماليّه‌ دسته‌یی ایسته‌مه‌دیلر. من ده اونلاردان ماليّه‌ دسته‌یی، هئچ نه ایسته‌مه‌دیم.  قارشیلیقلی اونسيّت قوردوق، او کیتابی بوراخدیلار. گرک من او کیتابی گتیره‌ردیم. یادیمدان چیخدی. مکتب پروقرامینا کمک ائله‌دیک بیز. تیتولوره قینده ده یازیلیب کی  بو کیتاب ف. کؤچرلی آدینا رئسپوبلیکا اوشاق کیتاب‌خاناسی‌نین سفاریشی اساسیندا چاپ اولونوب. اونلار بیزه ۵۰ دنه کیتاب وئردیلر. ۴ ماناتدان دا ساتیشا بوراخیلیب. هئچ بیر پروبلئمی ده یوخ ایدی. چوخ کئیفيّتلی، چوخ قشنگ. ایندی بیز ظاهره خانیملا کئچن ایل ایشله‌دیک «مکتب پروقرامینا کمک». هانسی کلاسسیکلریمیزین اثرلرینی بیز ییغا بیله‌ریک. هانسیلار کی، آرتیق یوخدور کیتاب‌خانالاردا، بیز اونو ایشله‌میشیک.  سییاهینی توتموشوق. ایندی هر نشریّات اونا گئتمیر. دئییریک ماليّه‌ دسته‌یی یوخدور. بوراخما اون مین دنه، بوراخ اوچ مین دنه. ائلناره آکیمووا: اکثر متنلر ساده‌لشدیریلیر یقین... شهلا قمبرووا: طبیعی کی «برپا» نشری  ایشله‌دیک بیز.  ائلناره خانیم  سیز بیلیرسیز، «برپا» نشر  نئجه لایحه‌دیر، دئمه‌لی بیزیم اوشاقلار میکاییل رضاقولوزاده‌نی تانیمامالی‌دیرلار. بیزیم اوشاقلار رشید بی افندی‌زاده‌نی تانیمامالی‌دیرلار. ائلناره آکیمووا: اونلار چوخ نفیس ترتیبات‌لار ایدی. متنلریندن توتموش ایللوستراسییالارینا قدر. شهلا قمبرووا: بلی آمّا بیز نئجه ساخلادیق «برپا» نشری؟ تصوّر ائدین  ائله کیتاب وار کی ، ۱ عصر یاشی وار.  ۱ عصر یاشیندا کیتاب هانسی الفبا ایله یازیلمالیدیر؟ طبیعی کی چوخو کیریل الفباسی، تاتار الفباسی، کؤهنه لاتینلا. بیز اونو رئداکته ائله‌دیک. کوررئکته ائله‌دیک. بیز ائله‌دیک. یعنی هئچ بیر مطبوع اورقانا وئرمه‌دیک. سونرا اعلاءالدین معلّیم «رئزونانس»  نشریّاتیندا باخدیلار اونلارا. بیر ده رئداکته ائله‌دیلر. بیز اونو اورژینالی ديیشمه‌مک شرطی‌له، آمّا لاتین قرافیکاسینا کئچیردیک کی، یعنی اوشاقلار ان آزیندان خبردار اولسونلار.  میثال اوچون اورادا اوکراینا خالق حئکایه‌لری وار؛ «الجک» اثری سونرا روس خالق ناغیللارینا مراجعت ائله‌دیک. بیز چوخ ایشله‌دیک، آمّا ایندی جاوانلاری چاغیریرسان دئییرسن بیز مسابقه‌ کئچیرمک ایسته‌ییریک، یازین وارسا، بیز سیزه دستک اولا بیله‌ریک و یاخود دا هانسی‌سا بیر مطبوعاتا چیخا بیلمیرسیزسه، بیز کیتاب‌خانا اولاراق سیزین آرانیزدا واسطه‌‌چی اولا بیله‌ریک،  او دقیقه قاییدیب دئییر کی، من اورادان نه قدر پول آلاجاغام؟ سنین هله بیر یازینی بینسینلر، اورتالیغا چیخارت. آذر توران: بایاق زاهید معلّیم حاقلی دئدی کی، مستقل‌لییه قدر بیزیم اوشاق ادبيّاتیمیز چوخ قاباقدا گئدن بیر ادبيّات ایدی و اونا خصوصی حؤرمت ائدیردیلر.  اونا گؤره ده بیزده میرمهدی سیّدزاده‌نین، میکاییل رضاقولوزاده‌نین،  زینال جاببارزاده‌نین، تیمور ائلچین‌ین یئری گؤرونور. ائلناره آکیمووا: ایسته‌ردیم آیگون باغیرلی دا دانیشسین. آیگون خانیم بیزیم ادبيّات اینستیتوسوندا سون دؤور اوشاق ادبيّاتی ایله باغلی سلسله آراشدیرمالار آپاریر.

ایللوستراتورلاری(تصویرگر) تاپماق لازیمدیر. آذر توران: یئری گلمیشکن، دانیمارکالی رسام خئرلوف بیدستروپ خصوصی اولاراق اوشاقلار اوچون چکمیردی. او، اثررینی تاماشاچییا اوشاغا و بؤیویه عینی زاماندا تقدیم ائدیردی. هر کس ده بو رسملره اؤز تصوّر مقیاسی ایله نظر یئتیریردی. اوشاق اونو اوشاق نقطه‌ی نظری ایله، بؤیوک ایسه بؤیوک نظری ایله باخیردی. یعنی خئرلوف بیدستروپون رسملرینه اوشاق دا، بؤیوک ده ماراقلا باخیردی. اونون «دونیا رسامین گؤزو ایله» کیتابی یئددیدن یئتمیشه نوه‌دن-بابایا قدر هامی‌نین سئویملی کیتابی‌ ایدی. شهلا قمبرووا: بیزده عاریف معلّمین عذر ایسته‌ییرم ۷۰-۷۵ یاشی وار. خالق ناغیللاری‌نین ایللوستراتورودور. او همیشه چکه بیلمز آخی. آرتیرماق لازیمدیر بونلاری. آذر توران: بونون یولو نه‌دیر؟ سئوینج نوروقیزی: یولو اودور کی  بیرلشمک لازیمدیر. قشم نجف‌زاد: یولو قونوراردیر.(حق تالیف) سئوینج‌ نوروقیزی: هر شئیی قونوراردان باشلاماق اولماز. آذر توران: بیلیرسیز نئجه‌دیر، قشم معلّم «یای سحری» شعرینی یازاندا عباس صحّت «تیق-تیق خانیم»ین یازاری عبدولله شایق «قاراجا قیز»ین مولیفی سلیمان ثانی آخوندوو فیکیرلشیردی‌می قونورار باره‌ده؟ بؤیوک ادبيّاتین یولو قونوراردان کئچمیر. قشم نجف‌زاد: بیلیرسینیز، او دؤورون طلبلری باشقا ایدی. سئوینج نوروقیزی: قشم معلّیم  من سیزله راضی دئییلم. اوّلجه یازا بیلسین،  سونرا قونوراری وئریلر ده‌. قشم نجف‌زاد: اجازه وئرین فیکریمی دئییم. من فاکتلا دانیشماق ایسته‌ییرم. ایسته‌ییرم کی، هامیمیز فاکتلا دانیشاق. «آلتون»نشریّاتی‌نین ۱-جی صینیف اوچون آذربایجان دیلی درسلییی بوراخیلیب. اوراداکی شعرلره باخدیم.  چوخ معناسیز شعرلردیر. حتی اوراداکی مؤلف‌لری اینترنت‌ده آختاریشا وئردیم کی، گؤروم بو شعرلرین مؤلفلری کیمدیر،  من تانیمیرام. باخدیم کی، بیری کوررئکتوردو همین نشریّاتدا. بیری رئداکتوردو، بیری ایشچیدیر، بیری کاتیبه‌دیر نه‌دیر. هامیسی اؤزلری شعر یازیب قویوبلار اورا. شعرین بیری‌نین مضمونونو دئییم: «دووشان قاچیر، برک قاچیر، قاچیر. آیی سوروشور کی، سن نییه برک قاچیرسان؟ دئییر سنین ده مشقچین تولکو اولسایدی، سن مندن ده برک قاچاردین» یاخشی، بیزیم اولمپیاد شامپیونلاریمیزین مشقچی‌سی تولکودورمو؟ بونونلا اوشاغا نه اؤیره‌دیرسن. آی «آلتون» نشریّاتی؟ سن اوشاغا نه وئریرسن؟ سئوینج نوروقیزی: من ده باخمیشام او درسلییه. هله دئییم کی «آلتون» نشریّاتی ان یاخشی نشریّاتلاردان بیری‌دیر. رافیق معلّیمین اؤزو ده چوخ ساوادلی آدامدیر.  من اونون کیتابلارینی کئچن ایل آلمیشام. یئنی یئتمه‌لر اوچون. دوزدور  کیتابلار وار، آمّا هامیسی ترجمه‌دیر. «زامانی نئجه قاباقلامالی»  یئنی‌یئتمه اوشاقلار اوچوندور. «نئجه اعلاچی اولمالی» «لیاقتلی نئجه اولمالی»  «عدالتلی نئجه اولمالی» «غیرتلی نئجه اولمالی» بو سئرییا کیتابلاردیر. آمّا بیری ده بیزیم یئرلی محصول دئییل. هامیسی ترجمه‌دیر. مثلا «تئاس پرئسس» «اوچ آلما» نشریّاتی اعلا ایشله‌ییبلر. کیتابین ایشله‌مه‌سینه سؤز یوخدور. آمّا هامیسی ترجمه‌دیر. قشم نجف‌زاد: «اوچ آلما» نشریّاتی ایله منیم علاقه‌‌لریم وار. مندن ده سییاهی ایسته‌ییبلر هانسی شاعرلرین اثرلری‌نین چاپ اولونماسینی ایسته‌ییرسینیز؟ بیر ده نظامی آدینا ادبيّات انستیتونون دیرئکتورو ملّت وکیلی عیسی حبیب‌بیلی ده سییاهی تقدیم ائدیب اورا. بیزیم سون دؤورده معاصر ادبيّاتیمیزی اونلار تدقیق ائله‌ییب و سییاهی دا وئریبلر. ایندییه قدر چاپ ائله‌دیکلری خارجی اؤلکه یازیچیلاری‌نین اثرلری اولوبدور،  چوخونو دا من رئداکته ائله‌میشم. ایندی آذربایجان سئرییاسینا دا باشلایاجاقلار. بایاق دئدیییم مسئله‌یه گلیرم. بو ساعت اوشاق ادبيّاتی‌نین سولغون وضعيّتده اولماغی، حتی کیتاب جهت‌دن و معنا جهت‌دن بئله سولغون وضعيّتده اولماغی‌نین باشیندا ماليّه‌ مسئله‌لری دایانیر. مثلا، خارجی اؤلکه‌لرده بلدیّه‌لر پول بوراخیرلار ادبيّاتا. غیری حؤکومت تشکیلاتلاری وار. ایندی هر شئیی دؤلتین اوستونه آتماق اولماز. دؤلت کفایت قدر ائله‌دییینی ائله‌ییر. بلدیّه‌لردیر آیری-آیری ایش آداملاریدیر. یعنی اوشاق ادبيّاتینا ماليّه‌ وسایطی آییرمالیدیرلار کی، اونون رسامی دا، اونون رئداکتورو دا، او مؤلفین اؤزو ده چوخ کئیفيّتلی بیر شکیلده کیتاب بوراخسینلار‌. بونلارین هامیسی‌نین باشیندا ماليّه‌ دایانیر. شهلا قمبرووا: من سیزه دئییم، قشم معلّیم، هر زامان ماليّه‌نی فیکیرلشمک اولماز. بیز هر شئیده ماليّه‌نی فیکیرلشسک، اوندا اوچوروما گئده‌جه‌ییک. سئوینج نوروقیزی: یوخ،  بیز او یازاری تاپاق، اوندان سونرا اونا پول وئرک. یازار یوخدو آخی.

اوشاق ادبیاتی اوشاق ادبيّاتی‌نین پروبلئ «ادبيّات قزئت»نین موذاکیره‌سی کوچورن:«ویدا حشمتی» حاضیرلایان:«ادبیات سئونلر» ایکینجی بولوم بو کیتابین اوستونده بو مئدال وار،  خصوصی ائمبلئم(علامت و نماد) وار. اونو اوشاغینا آلیر. بیزیم والدین نه‌ائله‌ییر؟! بیزیم والدین گیریر ماغازایا  کیتابی ورقله‌ییر، دئییر «آ.. نه قشنگ شکیللری وار، نه باهالی کیتابدی». آلدی آپاردی اوشاغینا. آمّا اصلینده او کیتابین ایچینده او اوشاغی محو ائله‌یه بیله‌جک نه‌لرسه وار. ائلناره آکیمووا: بو یاخینلاردا «کولیس آز» سایتیندا دا بئله بیر پروبلئم آکتوال(واقعی-حقیقی)لانمیشدی. اوشاق ائنسیکلوپئدییاسی‌نین(دایره‌المعارف) ایچی، دینی موتیولی(درون مایه) یؤنله‌ندیرمه‌لرله زنگین ایدی‌. سیز دئدییینیز کیمی، بر-بزه‌یی، ایللوستراسییاسی(تصویر) فیلانی یئرینده، آمّا اوشاغی معاریف‌چیلیک‌دن یوز مئتر کنار ساخلایان موهومات توخومونو گوجله‌ندیرن متنلر. بئله کیتابلارا نظارت ائدن یوخدورمو؟ شهلا قمبرووا: نییه یوخدور کی؟ ائلناره آکیمووا: بس او زامان بو کیتابلار چاپا نئجه یول تاپیر؟ شهلا قمبرووا: عمومیّتله من سیزه دئییم کی ۹۰-جی ایللره قدر بیزده «کیتاب پالاتاسی» دئییلن بیر قوروم وار ایدی. بئله دئیک ده، کیتابلارین سئنزورادان کئچدییی بیر قوروم ایدی. «قلاولیت» ایدی. یعنی هر کس ایسته‌دییی ادبيّاتی نشر ائتدیره بیلمزدی. زاهید معلّم یاخشی بیلیر اونو. زاهید خلیل: بلی شهلا قمبرووا: چونکی مذاکره اولونوردو. کیتابا قیمت وئریلیردی. ایندی او یوخدور. کیتاب پالاتاسی دئمک اولار کی، داغیدیلدی. حال حاضردا اونون معيّن بیر حیصّه‌‌سینی ملّی کیتاب‌خانا یئرینه یئتیریر. آمّا او دا بوتونلوکده چاتدیرا بیلمز. اصلینده بایاق زاهید معلّیم دئدی، من اونونلا راضییام. اوشاق ادبيّاتینی بؤیوک ادبيّاتدان سئچمک اولماز. اوشاق ادبيّاتی ادبيّاتین بیر نوعودور، ژانریدیر. بیز اوشاق ادبيّاتی دئینده ائله او ایللرده ده، ایندی ده هامی ائله بیلیر کی، آنجاق ۵-۶, ۱۰ یاشا قدر اولان اوشاغا شعر و حئکایه‌ یازماق اولار. آمّا من سیزه دئییم کی، حال حاضردا یئنی‌یئتمه اوشاقلار اوچون بیر دنه ده اولسون نه نثر اثری وار، نه شعر. ائلناره آکیمووا: شهلا خانیم داها چوخ هانسی یاش آراسی اوشاقلار اوچون متن کاسادلیغی وار؟ شهلا قمبرووا: من سیزه دئییم بو دقیقه. بیزیم کیتاب‌خانا اؤزونوز ده آدیندان گؤرورسونوز کی فریدون بی کؤچرلی‌نین آدینی داشیییر. ایلک دفعه‌ اوشاق فولکلور آنتولوگییاسینی یارادان بؤیوک کلاسیکیمیزدیر. بؤیوک متفکّردیر، ادبيّات‌شوناسدیر، عالیمدیر. آذربایجان ادبيّات تاریخی‌نین ایلک یازارلارینداندیر.  بو ائله بئله دئییل. آمّا اوشاق دئیه‌نده نییه بیز هر دفعه‌ باغچادان، گولدن، قورباغادان، چیچکدن یازیریق؟ ۵ یاشیندا اوشاغی نظرده توتوروق. بس ۱۳ یاشیندا اوشاق نه‌یی اوخومالی‌دیر؟ منه بو چاتمیر. بیز کیتاب‌خانا اولاراق صفردن ۱۸ یاشا قدر اوشاقلارا خدمت ائدیریک. یعنی اینستیتونون لاپ ۱-جی کورسونا کیمی. یعنی اونا گؤره ده آنتولوگییامیز وار. ائنسیکلوپئدییالاریمیز وار. خدمت ائله‌ییریک، آمّا ۱۵ یاشیندا اوشاق گلیر ادبيّات ایسته‌ییر. من اونا نه وئریم؟ باخ  چوخ ماراقلیدیر. چوخ آزدیر، ادبيّات یوخدور. خارجی ادبيّات وار، ترجمه‌لر وار، روس ادبيّاتیندان چئوریلمه‌لر وار والسالام. ائلناره آکیمووا: داها چوخ هانسی یاش دورونه عایددیر بو ماتئریاللار؟ شهلا قمبرووا: بیزده ادبيّات، آذربایجان اوشاق ادبيّاتیندان صحبت گئدیر، دونیا ادبيّاتیندان گئتمیر. ۱۰ یاشا قدر اولان ادبيّاتیمیز چوخ سایدادیر. آمّا ۱۰ یاشیندان ۱۸ یاش دورونه، یئنی‌یئتمه‌لیک دورونه عاید، دئمک اولار کی، ادبيّات آزدیر. ائلناره آکیمووا: ملّی متن‌لردن صحبت گئدیر ده؟ شهلا قمبرووا: ملّی متن‌لردن صحبت گئدیر. قشم نجف‌زاد: اوستونده ترجمه‌سی یوخدورمو؟ شهلا قمبرووا: معاصر ادبيّاتین ترجمه‌سی یوخدور. کئچن ایل سئرگئی میخالکووون یولداشی بیزه اؤز شخصی فوندوندان یئنی‌یئتمه‌لر اوچون بؤیوک سئرییادا ادبيّاتلار وئردی. بو روس بؤلمه‌سی‌نین اوشاقلاری اوچوندور. بس آذربایجان بؤلمه‌سی، آذربایجان دیلی بیزیم ملّی دولت دیلیمیزدیر. آذر توران: بیزده کیم وئرسین اونو؟ شهلا قمبرووا: بس اونا گؤره نئچه واختدیر دئییرم کی، من ییغا بیلمیرم،  نئچه دفعه‌ مراجعت ده ائله‌میشم. گلین پئداقوژی اونیوئرسیتئتین باکی دولت اونیوئرسیتئتی‌نین فیلولوگییا فاکولته‌سی‌نین طلبه‌‌لری وار. یاخشی اوخویان اوشاقلار وار. اولا بیلر کی،  یازیلاری وار. آمّا اوزه چیخاردا بیلمیرلر. اوتانیرلار، سیخینتی ایچه‌ریسینده‌دیرلر  زاهید معلّمی گؤره‌نده، طبیعی کی، او اسه‌جک. قشم معلّیمی گؤرنده، البته‌‌ کی اوتاناجاق. آمّا آرتیق اونلارا دا یول آچماق لازیمدیر کی، اؤز سفئرالاری چرچیوه‌سینده یاواش-یاواش گئتسینلر.  همچینین رساملیق آکادمیاسیندان اونلارین اثرلرینه اویغون شکیل چکن اوشاقلاری،

اوشاق ادبیاتی اوشاق ادبیاتی هرهفته پنجشنبه گونو ادبیات سئونلر کانالیندا  . اوشاق ادبیاتینا دایر یازیلارینیزی بیزه گوندرین . https://t.me/Adabiyyatsevanlar

- سنین اوغلون وار آنا‌، اؤزوم ایشلیه‌رم. من سنه هر آی پول گؤندره‌جم. آناسی ایشدن چیخدی. ایکی- اوچ طلبه‌سی وار ایدی. موسیقی نظریه‌سیندن اونلاری کالجه قبول اولونمالارینا حاضیرلاییردی. رائوفون هئچ واخت آغلینا گلمزدی کی بو هوتئلده او خاتینی گؤره‌جک. خاتین 201ینجی اوتاقدا، گئجه‌له‌ین بیر مشهور سرمایه‌دارین یانینا گلمیشدی. هله سحر آچیلمامیش خاتین بیرینجی مرتبه‌یه دوشَنده تؤشویه- تؤشویه اطرافا باخیردی. آشاغی پیلله‌لره چاتاندا چانتاسی آچیلدی، اورادان بیر باغلاما دوشدو. رائوف باغلامانی گؤتوروب اونون آرخاسینجا قاچدی. آنجاق خاتین اونو گؤزله‌ین تاکسی‌یه مینیب گؤزدن ایتدی. رائوف باغلامانی آچدی، سان کی گؤزلری دؤرد اولدو. ظرفین اوستونده-" 10مین دلار" و " اوره‌ییم" سؤزلری یازیلمیشدی. ایلک اؤنجه رائوف فیکیرلشدی کی، اوچ گون گؤزله‌یه‌جک، اگر یاخین گلمه‌سه، اوندا پولو اؤزونه گؤتوره‌جک و وارلی آداملار یاشایان کیمی یاشایاجاق. آناسینا تزه پالتو، ژاکت، آیاق‌قابی، کوفتا(اوست پالتاری)، اؤزونه ایسه اوچ دست کاستیوم، کؤینک، آیاق قابی، مارکت‌دن ان باهالی ارزاقلار و ان نهایت ،" گرید" عطری آلاجاق. بو عطری چوخ خوشلامیشدی. خاتین‌دان خبر چیخمادی. گؤرونور بئله پوللاری او چوخ گؤروب. خاتین گئدندن سونرا تاجر کیشی ده هوتئلی ترک ائتدی. خادیمه قیز اونون اوتاغیندان " گرید" عطری گتیردی. - گؤر نه گؤزل دیر! - گؤتور ده، سن گؤتور. - منه هئچ کسین آرتیقی لازیم دئییل. توللا گئتسین. سونرا رائوف ائله بیل یوخودان آییلدی. -" یوخ بو پول هارینلامیش کیشی‌نین، هارینلامیش فاحشه‌یه وئردییی پولدور. بو پول تمیزلنمه‌لی دیر. بو پول قانی ایله تورپاغیمیزی وطن ائله‌ین غازی‌یه وئریلمه‌لی دیر. گنجه‌ده قاپی- بیر قونشوسو اولان غازی علی‌یه وئریلمه‌لی دیر‌ اوچ گوندور کی، غازی علی باکی‌دا، رائوفون یاتاق‌خاناسیندا قالدیغی اوتاقدا قوناق ایدی. اوچ گوندور اؤز علیل آراباسی ایله موافق اداره‌لرین قاباغیندا، لَلؤیون اولموشدو. رائوف سحر ایشدن چیخیب یاتاق‌خانایا یوللانمیشدی. غازی علی آرتیق آیاغا قالخمیشدی، یئنه هانسی‌سا اداره‌یه گئتمه‌یه حاضیرلاشیردی. یاشادیغی ائوین دام اورتویو سؤکولوب داغیلمیشدی. یاغیش، قار یاغاندا ائوه سو دامیردی. یولداشی آیگون و گلینی تامام ائوه دامان یاغیشین آلتینا لگن، وئدره قویماقدان یورولوردولار. - هارا گئدیرسن؟،- رائوف سوروشدو. - یئنه گئدیرم، بلکه بو مامورلار اینصافا گلدی. - هئچ یئره گئتمه. من سنه خئیلک پول گتیردیم کی ائوینی تعمیر ائده‌سن. نقشه ده چکدیر عمللی- باشلی تعمیر ائله، اوشاقلارین بؤیویور، قوی نرمال شرایط‌ده یاشاسینلار. رائوف ظرفین اوزرینده یازیلمیش" 10مین دلار" -" اوره‌ییم" سوزلرینی سیلیب، باغلامانی غازی علی‌یه اوزاتدی. کیشی‌نی حئیرت بورودو. - بو هاردان دیر؟ - تاپمیشام. سنین قیسمتین دیر. - به اؤزون؟ - اؤزومه هئچ نه لازیم دئییل. - چوخ ساغ اول، آغرین آلیم. حقوقومدان آز- آز قایتارارام. - بو بورج دئییل. بو سنه اولان بخشش دیر. حالالین اولسون. رائوف غازی علی‌نی تاکسی‌یه میندیریب ایستگاها آپاردی. اوردان دا بیر تاکسی توتوب، اونو گنجه‌یه یولا سالدی. قلبینده بیر راحاتلیق وار ایدی. اوره‌یینده" چوخ شوکور آللاها"- دئدی. https://t.me/Adabiyyatsevanlar