تریفه

شەهیدی دیدەیی مەخمووری شۆخێکم منی شەیدا لە خاکی مەشهەدم نەزدیکە بڕوێ نێرگسی شەهلا بە مەحزی ئیمتحان دەستم بنێنە باخەڵت یەک دەم لە بندا بیبڕن ڕازیم ئەگەر نەمبوو یەدی بەیزا بە ئوممێدی وەفای گوڵ کۆششی بولبول چ سوودی بوو بەڵایە، ڕامی عاشق کەی دەبێ مەعشووقی بێ پەروا بە فیکری مووشکاف ئەمشەو قیاسم کرد لەڕووی زوڵفت بە تاریشی بە توولیشی بەقەد تاری نەبوو یەلدا لە پەستی بۆ دەکێشن زاهیدی غافڵ چلەی خەڵوەت بچن عاشق بە باڵا بن بچن بۆ مەرتەبەی باڵا حەدیسی نەنگ و نامم زوو شوکور مەشهووری عالەم بوو لە حەرفی موددەعی ناکەس نییە باکم منی ڕیسوا لە کاری هائیل و سەعبا گورێزە چارەیی مەردوم وەلێکین سالمی یەکدڵ لە عیشقا ماوە پابەرجا @Honrave #سالم

خەیاڵی شەو، سەحەر کوشتی درۆ بوو گوڵی هیوا نەپشکوت هەر چرۆ بوو چلۆن بێژم بە دڵ پاییزە لێیدا کە عەشقی هەر لە تاسەی کۆچی تۆ بوو @Honrave #شیوا_ئەمینی

هەر سەحەر دێنێتە یادم کۆیی تۆ موڵکی خەتا نەفحەها دێنێ لە موشکین زوڵفی تۆ بادی سەبا نەهری ئەشک ئەمشەو لە دیدەم وا بەخوڕ دەڕژایە ڕوو دڵ لە سینەم تا سەحەر، سەنگاسیائاسا گەڕا بەسکی هەرجا کوشتەیی تیغی مەحەببەت کەوتوون کۆی دڵارامم لە خوێنا بوو بە دەشتی نەینەوا چەسپە هەرجا ڕیشەیی جەرگم لەگەڵ ڕیشەی خەدەنگ چەند بە چوستی تیری موژگانت لەناو دڵما ڕووا نامنوێنێ بێ بەسەرما گەر موسیبەتهایی چەرخ تا لەسەر سەرمە لە سایەی زوڵفی تۆ باڵی هوما بێت و سەیری چینی زوڵفت کا لەدەوری عاریزت هەر کەسێ نەیدیوە تاریکی لەبەر شەوقی چرا من دەمێکە خۆ لە خووی یاری قەدیمم شارەزام دوشمنی یارانی دێرینە و بە دوشمن ئاشنا غەرقی بەحری عیشقە سالم دەست و پای جەهدی نییە قەت شەنا ناکا لە دەریادا کەسی بێ دەست و پا @Honrave #سالم

خەفەت پیم دادەکا باوەش، برامە و ناکرێ لۆمەی بە جێم بێڵن، مەپرسن لێم ، مەدەن تینم، مەهێنن مەی مەگەر ئەو ساتە وا پڕژا بە سەرما گەردی گیان دەرچوون یەخەی چاری ڕەشم بەردەم، لە گیانی خۆم بڵێم ئۆخەی @Honrave #ئیسماعیل_موختاری

ڕۆژ و شەو گریانە چاوم چاو لە چاوانم بکە چی بوو تەخسیرم کە ڕۆشتی باسی تاوانم بکە تا گوناهێ شک نەبەی لێم چۆن دەڕۆی بێ بیانوو تۆ هەڵدە زێنێکم چ بووبێ و تەرکی جێژوانم بکە من کە نەمزانی چ سودی بۆت هەیە ئازاری من دوای تۆ بێزارم لە ژینم ها قەستی گیانم بکە ئاگری سینەم چ باکی خەنجەر و شمشێر نییە تۆ سڵامەت بەو بە نەزری ڕۆژی قوربانم بکە هەر لەبۆ قوربانی باشم شێوە مردو دیارە لەش خۆت و ئیمانت بەڵام بەس بە ئێش و ژانم بکە ساڵەهایە من تەمەننای هاودەمێ وەک خۆت ئەکەم بێرە لام هاوژینی یەک بین جا تەمای گیانم بکە شەرت ئەبەستم من لەگەڵ تۆ گەر نەمردم بۆت گوڵم مافی خۆتە و بێ نەوەستان خانە وێرانم بکە ئاسەواریشم نەمێنی گەر شکا پەیمانی من بگرە دەستی سارد و سۆڵم یاری پەیمانم بکە @Honrave #خەمبار_سەردەشت ‎

پەچەیی پەرچەمی و، پرچی سیا هەر دەڵێی مانگە شەوە کوڵمی تیا لادە دەسرۆکەیی هەوری لە جەبین دەرکەوێ شەمس و قەمەر، نوور و زیا لێوی تۆ ئاوی بەقا، من خزرم فەیزی تۆ ڕەحمەت و، من سەوزە گیا فەرشی کەففی بەری پێتە نەرگس سەری داخستووە وەک چاوی حەیا مەمخەرە هاوییەیی هەولی فیراق دەستی من دامەنی تۆ ڕۆژی قیا «گێل» ئەگەر تورکی، تَعال ئەر عەرەبی «بێ» ئەگەر کوردی، ئەگەر فورسی بیا! سەری فەرهادم و، دەندووکی قوڵنگ دەستی مەجنوونم و، دامێنی چیا خاتری زاهیدی خاڵی، خاڵی نییە، ئەڵبەتە، لە بێنێکی ڕیا دوور لە تۆ ئیدی مەپرسە، قوربان حاڵی نالی کە نە مرد و نە ژیا @Honrave #نالی

بنازم پەرچەمت زللەی لە کەللەی عوود و عەنبەر دا سەفای ڕوخسارەکەت تەعنەی لە ئاوێنەی سکەندەر دا شەڕ ئەفرۆشێ بە عالەم بێ سەبەب ئەو چاوە مەستانە هەچی هاتە تەماشای چاوی تۆ سینەی لە خەنجەر دا بەڵێ عومری خزر قیسمەتمە گەرچی عومر کۆتا بێ کەسێ نەقدی حەیاتی خۆی بە یاری شۆخ و ئەسمەر دا لە تەعریفی قەدی مەوزوونی، شاعیر کەوتە وریایی هەموو دێرێکی ئەفکاری خەیاڵاتی لە میستەر دا کە زاهید هاتە سەیری قەوسی ئەبرۆی تۆ بە ناچاری فڕێی دا سەبحە و سەججادە سەد لەققەی لە مینبەر دا دەمی تۆ خونچەیی نەشکوفتەیە، یا نوقتەیی مەوهووم بە خەندە دوڕ بەسەر لەعلا و لەعلیشی لە شەککەردا بەرامبەر حەلقەیی پەرچەم خەدەنگی چاوی مەخموورت بعەینە وەک جیهانبەخشە لەگەڵ تیری لە ئەژدەر دا بە مەرهەم زەحمەتە زەخمی دڵی بێچارە ناگیرێ بە تەحریکی برۆ ئەو شۆخە دەردێکی بەزێوەر دا @Honrave #زیوەر

ئەتۆ ڕۆیشتی و تەنیا ئەمن ماوم لەگەڵ وێنەت... ئەمن چرکە بە چرکە پیرتر... کزتر... ئەتۆ ئەمما هەر ئەو کیژەی... کە بسکی خاوی ئاڵۆزت.... لەسەر شانان پەرێشانە... تەمەن دەشکێنێ باڵای من... ئەتۆش هەر لێو بە خەندەی چواردە ساڵانە... @honrave #ئیسماعیل_موختاری

تالعم نەحسە دەترسم کە بە ئازاری فیراق بمرم و ڕۆژێ نەبێ دەوڵەتی وەسڵم بە نەسیب چاوی فەتتانی تۆ ئەو ساحیرە جادووگەرەیە کە بە یەک عیشوە ئەدا عابیدی سەد ساڵە فەریب @Honrave #شێخ_ڕە‌زا

لە شاییدا لە وەختی هەڵپەڕینا لە خۆشیدا لە کاتی پێکەنینا لە کۆڕی ماتەم و گریان و شینا ئەمن ئەی نیشتمان تۆم هەر لەبیرە بە شەو تاکوو بەسەرما زاڵ دەبێ خەو بە ڕۆژ تاکوو دووبارە دێتەوە شەو لە کاتێکدا کە دەدوێنم ئەم و ئەو ئەمن ئەی نیشتمان تۆم هەر لەبیرە زەمانێکی کە دەچمە سەیری گوڵزار لەگەڵ پۆلی ڕەفیقانی وەفادار تەنانەت وەختی دەسبازی لەگەڵ یار ئەمن ئەی نیشتمان تۆم هەر لەبیرە لە کوێستانێ دەمی ڕاو و شکارێ لە مەزرایە کە خۆم هەڵکرد لە کارێ لە جێژوانێ کە دەکوشم مەمکی یارێ ئەمن ئەی نیشتمان تۆم هەر لەبیرە دەکەم تەرخان لە ڕێی تۆدا ژیانم لە سەنگەردا بەرەوڕووی دوژمنانم بە خاکی تۆ دمی ئاویلکەدانم ئەمن ئەی نیشتمان تۆم هەر لەبیرە @Honrave #هێمن

نەخۆش و مەستی دوو چاوی کاڵم حەقم بە دەستە ئەگەر بناڵم بە غەمزەی چاوت بە خەندەی زارت بردیان بە غارەت خەو و خەیاڵم فەرمووت: چلۆنی؟ چ بڵێم عەزیزم؟ دوور لە زولفی تۆ - کافر بە حاڵم بە یادی چاوت چوومە خەرابات لە ڕەهنی مەی دان خەرقە و بەرماڵم من مورغی قودسی لە لامەکان بووم ئیلاهی ڕوحمێ شکستە باڵم شەوێکە تاریک، ڕێیێکە باریک هەر بە ئومێدی چرای جەماڵم بە تیری نازت بڕاوە جەرگم بۆ چاوی بازت نەماوە حاڵم وەک من بە چاوت یەخسیری زولفم کەس وا نەگیرێ بە داوی زاڵم! خۆش بەو دەمانە گوڵ گوڵ دەپشکووت شەکر دەباری پرسی لە حاڵم سەبا دەخیلم هەر تاکوو ماوم بڵێ بە زاری، بە ڕوو بە خاڵم دەمێکی بابێ دەوای دڵم کا بە چاوەکانی گەلێ بێ حاڵم وەفایی چی دیت لەسەر بگێڕێ؟ نەما لەسەر تۆ نە سەر نە ماڵم @Honrave #وەفایی

لە شۆعلەی ڕووی کەمەر چین زێڕ و زێوان چ زەهرەی زوهرە و کەیوان کە بێ وان شوعاعی میهر و مەهـ لاچوو لە نێوان لە دوگمەی سوخمە دوێنێ نوێژی شێوان بەیانی دا سپیدەی باغی سێوان لەبەر ئەبرۆی کەوان و تیری سەر ژێت هیلال ئەوشۆ بەخۆی گوت تەنگ ئەبێ جێت خزی ڕووبەند و کاتێ کەوتە بەر پێت لە خەوفی تەلعەتت ڕۆژ هەر وەکوو شێت بە ڕووزەردیی هەڵات و کەوتە کێوان شەمیمی عەتری زولفت عەینی شەوبۆ شکاندی پشتی گوڵ خونچەی دەمی تۆ نیگارم وەک گۆڵە هەم ڕەنگە هەم بۆ مەکەن مەنعی پەشێوی دڵ کە ئەمشۆ پەشێواوە لەبەر پەرچەم پەشێوان دوو زولفی عەنبەرینی نافەمیشکن دوو چاوی مەستی بیمار و پزیشکن لەچاو من جۆیبار و جۆگە ویشکن دوو چاوی من کەوا کەیلی سریشکن دەپێون ئاوی بەحری خوێ بە پێوان بە ئوممێدی قەدی نەوڕەس نیهالی قەسەمخۆرە حەقیقی بۆ ویسالی کە بەو دوو نەرگیسی چاوی خەزالی شەڕابی لەعلی رۆممانی لە نالی حەرامە بێ مەزەی ماچێکی لێوان @Honrave #حه‌قیقی تەخمیسی غەزەلی #نالی

خامە بۆ تەسویری ئەبرۆت پەیرەوی مانی دەکا شانە بۆ زنجیری زوڵفت عەنبەر ئەفشانی دەکا قوتی ڕۆحە لێوەکەت یاقووت وەها ئاودار نییە مەنعی بازاڕی عەقیق و لەعلی ڕوومانی دەکا خاڵی سەر لێوت نگین و خاتەمی نادر زوهوور موهری دەستی ئاسافە حوکمی سولەیمانی دەکا دڵ لە نەشئەی عەکسی مەستی چاوەکەت لا یوعقەلە بۆ کەبابی جەرگی من لێوت نمەک دانی دەکا بەرگی سەرتاپام پەڵاس بێت گەر بە شەرتێ تۆم ببی تاری ئەو بەرگە لەلای من سەد شاڵی کرمانی دەکا سەد هەزار جارت دەخیلم حەرفی بەدکار مەشنەوە هەرچی دەربارەم بڵێ بێ پێزە شەیتانی دەکا گەر لە پەردەی نازەوە ئاوازی تۆ بگرێتە گوێ بولبولی شیرین زوبان مەیلی غەزەل خوانی دەکا کەس نییە ئەو شۆخە حاڵی کا لە سۆزی ئاتەشیم وا "ڕەزا" دیسان لە عیشقی هەر غەزەل خوانی دەکا @Honrave #شێخ_ڕەزا_تاڵەبانی

ئەی گوڵی لاولاوی شۆڕ ئەی قامەتت سەروی بوڵەند ئەی کچی تاقی سەدە ئەی خانمی سالاری مەند تۆ وەکوو ڕووبار و کانیت لەم هەوارە وشکەڵە تاڤگەیە بسکت عەزیزم دوو برۆت داو و کەمەند تەنگی ئێوارێ مەچۆرە ناو شەقامی شارەوە زۆر ئەترسم عالەمێ وەک من بکەیتە شێت و پەند من بە شێعرێ چۆن بکەم وەسفت ئەوە بێعارییە بۆت ئەنووسم پڕ بە دیوانێ وشەی شیرین و قەند کاغەزی بێ گیان کە بینی ناوی تۆ کەوتە دڵی هەڵفڕی باڵی دەرێنا بوو بە بولبول نۆتی ژەند تاسەباری دووری تۆم و چاوەڕێی ژوانێ ئەکەم بەحری شینی چاوەکانم گاهێ تۆفان گاهێ مەند @Honrave #ئەلف_ن_خەمبار

دڵبەرم دیسان دەڕێژێ خوێن لە جەرگم بێ حیساب جارێ لانابا حیجاب تا دەرکەوێ بۆم ئافتاب کردمی ڕیسوا کە پۆشی زولفەکەی کوڵمەی گوڵی بۆیێ پیشەم ناڵە ناڵە هەر وەکوو نای و ڕەباب ئاگری دووری لە یارم وا سوتاندی جیسم و جان نەک ئەوە جەرگ و دڵیشم بوونە بریان و کەباب سا ئەگەر دەنگ و سەدای ناڵەم بگاتە ئاسمان یان هەموو دونیا بە هاوار پڕ بکەم مەگرن عیتاب ئاگری گەرمی عیشق هەم حەسرەتی دووری لە یار زیاد دەکەن لەحزە بە لەحزە ڕۆژ و شەو دەرد و عەزاب هەرکەسێ تۆزێ لە تاڵیی عیشقبازی چێشتبێ ئەو دەزانی چۆنە دەردی عیشق و تاڵی ئەو شەڕاب حاڵەتی عاشق بە دائیم هەر وەکوو تینووی لە دەشت ڕا ئەکا بۆ ئاو لە کاتێ بێتە بەرچاوی سەراب با وەکوو بولبول هەمیشە دێ چریکەی تا سەحەر نەغمە خوانە تا بنۆشی بۆ شیفای دەردی گوڵاب «عاجزا» لەم بەحرە دەرچوون زەحمەتە بەسیە ئیتر ڕوو لە مەولاکە لە مەولا مونعیم و ساحێب عیقاب @Honrave #عاجز

مەرگ دەرمانی دەردانە خودایە ژیان چواردەوری  زیندانە خودایە لە کاروانی عەزیزانم بە جێ مام وەکی تەیرم بە بێ لانە خودایە حەجەب بەزمێکە سەیری مان و مردن بەشی من شین و گریانە خودایە لە نێو گێژاوی بەحری بەستەڵەک دام چ زامارێکی پڕ ژانە خودایە لە ئەو ڕۆژەی کە چاوم کەوتە دونیا خەمم جیران و میوانە خودایە سەراپا بەندی تەخسیرم لە ملدا وجودم سست و بێزمانە خودایە شەوم تاریک و ڕێگەم دڕک و داڵە هەناسەم سواری زیخانە خودایە لەبن بارانی بێ بەختی شەڵاڵ بووم دڵم سەرگەرمی لێدانە خودایە @Honrave #دڵبەخوێن