មូលនិធិជនពិការ (PwDF)

កំពង់ចាម៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី២៨ ខែសីហា ឆ្នាំ២០២៦ សាខាម.ជ.ព.ខេត្តកំពង់ចាម និងមជ្ឈមណ្ឌលស្តារលទ្ធភាពពលកម្មកាយសម្បទាខេត្ត បានទទួលប្រតិភូអង្គការ Oxfarm និងសម្ព័ន្ធអង្គការដៃគូ សរុបចំនួន ១១នាក់ អញ្ជើញមកទស្សនកិច្ចសិក្សាស្វែងយល់ ដកស្រង់បទពិសោធន៍ពីសេវាកម្មរបស់មជ្ឈមណ្ឌលស្តារខេត្តកំពង់ចាម ផ្តល់ជូនជនមានពិការភាពក្នុងខេត្ត និងខេត្តជុំវិញ។ ក្នុងដំណើរទស្សនកិច្ចនេះ ក្រុមប្រតិភូបានសាកសួរពីបទពិសោធន៍ល្អៗ ដែលកម្ពុជាបានអនុវត្តកន្លងមក និងវាយតម្លៃខ្ពស់ចំពោះការផ្តល់សេវារបស់មជ្ឈមណ្ឌល ជូនជនមានពិការភាព ប្រកបដោយការទទួលខុសត្រូវ និងយកចិត្តទុកដាក់ខ្ពស់របស់មន្រ្តីមជ្ឈមណ្ឌលស្តារ។ ក្រុមប្រតិភូក៏បានចែករំលែកបទពិសោធន៍ពីសេវាកម្មរបស់មជ្ឈមណ្ឌលស្តាររបស់ប្រទេសដទៃបានអនុវត្ត ជាមួយគ្នានេះក្រុមប្រតិភូនឹងជួយផ្សព្វផ្សាយពីសេវាកម្មរបស់មជ្ឈមណ្ឌលស្តារ និងជួយស្វែងរកមូលនិធិនានា ដើម្បីជួយឧបត្ថម្ភគាំទ្រមជ្ឈមណ្ឌលតាមលទ្ធភាព។