EOTC Books ⛪️

ሊቁ መምህራችን ተሞሽሯል እንኳን ደስ አለህ 🙏 በእውቀቱ የቤተ ክርስቲያንን ስም ከፍ ያደረገ ቅድስት ቤተ ክርስቲያን በኹሉም የተማረ ሰው እንዳላት ምሳሌ የሆነ ተመራማሪው ሊቅ መጋቤ ሐዲስ ዶክተር ሮዳስ ታደሰ ከወይዘሪት ሳምራዊት መልአኩ ጋር ተሞሽሯል እግዚአብሔር ትዳሩን በርኮ መልካም ፍሬ እንዲሰጠው ፈቃዱ ይሁን።

✍️ ተቀጸል ጽጌና ተአምረ ማርያም ✍️ 1ኛ በጼዴንያ ለምትገኝ ማርታ የተደረገ ተአምር ​በጼዴንያ ለነበረች ማርታ የተደረገው የእመቤታችን ቅድስት ድንግል ማርያም ተአምር፣ እግዚአብሔር በቅዱሳኑ ላይ ድንቅና ተአምር አድራጊ አምላክ መሆኑን የሚያሳይ ታላቅ ታሪክ ነው። ይህ ታሪክ የእግዚአብሔር የማዳን ኃይል በቅዱሳኑ አማካኝነት እንዴት እንደሚገለጥ፣ እንዲሁም የሥዕለ አድኅኖ (የድነት ሥዕል) ክብርና ኃይል ምን ያህል እንደሆነ ያስረዳናል። ✍️​እግዚአብሔር በቅዱሳኑ የሚያድንበት መንገድ ​መጽሐፍ ቅዱስ የእግዚአብሔር ማዳን በቅዱሳን አማካኝነት እንዴት እንደሚደረግ በግልጽ ያስረዳል። የሐዋርያት ሥራ መጽሐፍ፣ ሐዋርያት በጥላቸውና በልብሳቸው ጭምር ድንቅ ተአምራትን ያደርጉ እንደነበር ይናገራል። “ስለዚህም የሕሙማንን ሁሉ ወደ አደባባይ አውጥተው፣ ጴጥሮስ ሲያልፍ ጥላውም ቢሆን ከእነርሱ አንዱን እንዲጋርድ በዐልጋና በምንጣፍ ላይ ያኖሩ ነበር” (የሐዋርያት ሥራ 5÷15)። እንዲሁም “እግዚአብሔርም በጳውሎስ እጅ ልዩ ልዩ ተአምራትን ያደርግ ነበር፤ ስለዚህም የመሐረባቸውን ወይም የጨርቃቸውን ከሰውነት ላይ ወደ ሕሙማን ሲወስዱአቸው ደዌአቸው ይርቃቸዋል ክፉዎችም መናፍስት ይወጡባቸዋል” (የሐዋርያት ሥራ 19÷11-12)። ​ይህ የሚያሳየው፣ የእግዚአብሔር ኃይል የሚገለጥበት መንገድ ገደብ የለሽ መሆኑን ነው። ቅዱሳኑ በሕይወት እያሉ ብቻ ሳይሆን፣ ከእነርሱ ጋር በተያያዙ ነገሮችም አማካኝነት ጸጋውና በረከቱ ይፈሳል። ይህ የሆነበት ምክንያት ኃይሉ የነገሩ ወይም የሰዎቹ ሳይሆን፣ በእነርሱ ውስጥ የሚሠራው የአምላክ የማዳን ሥራ ነው። የድንግል ማርያም ሥዕል ተአምር የምታደርገውም ሥዕሉ ከእንጨት ወይም ከቀለም የተሠራ በመሆኑ ሳይሆን፣ በእርሷ አማካኝነት ጸጋውን የሚገልጠው እግዚአብሔር ስለሆነ ነው። ✍️​ከታሪኩ የምንማራቸው አራት አንኳር ነገሮች✍️ ​በጼዴንያ ለነበረችው ማርታ ከተደረገው ተአምር እኛም ብዙ ትምህርቶችን መቅሰም እንችላለን። ከእነዚህም መካከል ዋነኞቹ አራት ነገሮች የሚከተሉት ናቸው። ➡️​እውነተኛ ፍቅርና የእምነት ፍሬ ማርታ ድንግል ማርያምን በልቧ ፍጹም ትወድ ነበር። የሥዕሏን ነገር እንደሰማችም ልቧን በመንፈስ ቅዱስ ፍቅር ስለነካው፣ ማንኛውንም ዋጋ ከፍላ ሥዕሏን ለማግኘት ተነሳች። የእርሷ የልብ ፍቅርና የመውደድ ምኞት፣ የሥዕሏን ተአምራት እንድታይና የእግዚአብሔርን ታላቅነት እንድታውቅ አደረጋት። ይህ የሚያስተምረን፣ እግዚአብሔርን የምንወድ ከሆነ፣ እርሱ በፍቅራችን መጠን ለፍላጎታችን ምላሽ እንደሚሰጥ ነው። ➡️​የክብር አሳቢነትና የፈቃድ መገዛት መነኩሴው ቴዎድሮስ የሥዕሏን ተአምራት ሲመለከት፣ የራሱን ጥቅም ለማሰብና ሥዕሏን ወደ ሀገሩ ለመውሰድ ፈለገ። ይህ የሰው ልጅ ተፈጥሮአዊ ድክመት ነው። ነገር ግን የእግዚአብሔር ፈቃድ ሌላ ነበር። ምንም እንኳን መንገዱን ቀይሮ ሊሄድ ቢሞክርም፣ ታላቅ ነፋስ ከቦታው ሳይሆን ወደ ማርታ ቤት መለሰው። ይህ የሚያሳየን የእግዚአብሔር ፈቃድ የቱን ያህል ጥንካሬ እንዳለውና ከእርሱ ፈቃድ ውጪ ምንም ነገር እንደማይሆን ነው። የእኛ ፍላጎት ከእግዚአብሔር ፈቃድ በታች መሆን እንዳለበትም ያስገነዝበናል። ➡️​የቅዱሳን በረከት ቅድስት ማርታ የድንግል ማርያምን ሥዕል ከተቀበለች በኋላ በከፍተኛ ክብርና ፍቅር አኖረቻት። ከሥዕሏም ወዝና እንባ ይወጣ ነበር። ይህ ቅባት ደግሞ ለብዙ ሕሙማን ፈውስ ሆኗል። ይህ የሚያስረዳን ቅዱሳን ከሞቱም በኋላ እንኳ በረከታቸውና ጸሎታቸው እንደማይቋረጥ ነው። ከእነርሱ ጋር በተያያዙ ነገሮችም ላይ የእግዚአብሔር ኃይል ይገለጣልና። “እግዚአብሔርን ለሚፈሩት ግን ጽድቅ ለብሳ፣ እውነተኛውን የሕይወት መንገድ ታሳያቸዋለች” (ምሳሌ 11÷19)። የቅዱሳኑ ጸሎትና አማላጅነት የኃጢአታችንን ይቅርታ ብቻ ሳይሆን፣ የሥጋ ደዌያችንንም ይፈውሳል። ➡️​ከገንዘብ በላይ ያለው የሥዕል ክብር: መነኩሴው ሥዕሏን በገንዘብ እንደገዛትና የራሱ አድርጎ ሊወስዳት እንደሞከረ አስቦ ነበር። ነገር ግን ሥዕሏ ራሷን ወደ ፈለገችው ቦታ ሄደች። ይህ የሚያሳየን የእግዚአብሔር ቅዱሳንና ሥዕላቶቻቸው በገንዘብ ሊገዙ እንደማይችሉ ነው። እነርሱ ከዚህ ዓለም ንዋይና የንግድ ዕቃዎች በላይ ክቡር ስፍራ ያላቸው ናቸው። ​➡️ ለምሳሌ አንድ ሰው የተወደደ ዘመዱ የሰጠውን የቆየ ሸሚዝ ወይም የእጅ ሰዓት እንደ ውድ ሀብት ሊቆጥረው ይችላል። ሸሚዙን ወይም ሰዓቱን ውድ የሚያደርገው የእቃው ዋጋ ሳይሆን፣ ከወደደው ሰው የተሰጠ የመታሰቢያ ነገር በመሆኑ ነው። ከጊዜ በኋላ እቃው ቢበላሽም፣ አሁንም ድረስ ለእሱ ትልቅ ዋጋ ይኖረዋል። ​የቅዱሳን ሥዕላትና ቅርሶችም እንደዚህ ናቸው። ዋጋቸው ከሚሠሩበት ቁስ በላይ ነው። እኛ ለእነሱ የምንሰግደው ለእነሱ ሳይሆን፣ በእነሱ ውስጥ ላለው የጸጋና የበረከት ስፍራ እንዲሁም በሥዕሉ ለተገለጸው ቅዱስ ነው። ልክ ለእኛ ውድ የሆነ ሰው የሰጠን መታሰቢያ ነገሮች ከገንዘባቸው በላይ ውድ እንደሆኑ ሁሉ፣ የቅዱሳን ሥዕላትም ከሥጋዊ ዋጋቸው በላይ ትልቅ መንፈሳዊ ትርጉም አላቸው። ​ይህ ታሪክ እምነታችንን እንድንመረምርና ቅዱሳንን በልባችን እንድናከብር ያስተምረናል። የእግዚአብሔር ኃይል የሚገለጠው በፍፁም እምነት ስንጠይቅና ልባችንን ስንሰጥ ነው። ➡️የእመቤታችን የወላዲተ አምላክ በረከት ረድኤት አይለየን⬅️ ✍️የአበባው ክብረ በዓል ተቀጸል ጽጌ 2ኛ ​“ተቀጸል ጽጌ” ማለት “አበባን ተቀዳጅ” ወይም “አበባን ተጎናጸፍ” ማለት ሲሆን፣ በኢትዮጵያ ኦርቶዶክስ ተዋሕዶ ቤተ ክርስቲያን ዘንድ ታላቅ ቦታ የሚሰጠው በዓል ነው። ይህ በዓል ከጥንት የኢትዮጵያ ታሪክና ሃይማኖት ጋር የተቆራኘ ነው። ከዚህ በታች ያለው ጽሑፍ የዚህን በዓል ታሪካዊ ዳራ፣ አውዳዊ ፍች፣ በኢትዮጵያ የሚከበርበትን ምክንያት እና ከበዓሉ የምናገኘውን መንፈሳዊ በረከት ይዳስሳል። ✍️​ታሪካዊ ዳራ እና አውዳዊ ፍች ​“ተቀጸል ጽጌ” የሚለው ዜማ የተመሰረተው በ፮ኛው መቶ ክፍለ ዘመን በኢትዮጵያዊው ሊቅ ቅዱስ ያሬድ ነው። በዚያን ጊዜ ኢትዮጵያን ያስተዳድሩ የነበሩት ንጉሥ ዐፄ ገብረ መስቀል ነበሩ። ቅዱስ ያሬድ፣ ክረምቱ አብቅቶ የመጸው (የአበባ) ወቅት ሲጀምር፣ መስከረም ፳፭ ቀን ወደ ንጉሡ ዙፋን ቀርቦ “ተቀጸል ጽጌ ገብረ መስቀል ዐጼጌ” ማለትም “ንጉሡ ገብረ መስቀል ሆይ፣ ክረምቱ አልፎልሃልና አበባን ተቀዳጅ” በማለት ያወድሳቸው ነበር። ይህም የበዓል ትውፊት እስከ ፲፭ኛው መቶ ክፍለ ዘመን ድረስ ተላልፎ ቆይቷል። ​በኋላም በ ዐፄ ዳዊት ዘመነ መንግሥት፣ የጌታችን ኢየሱስ ክርስቶስ የተሰቀለበት ግማደ መስቀሉ ከኢየሩሳሌም ወደ ኢትዮጵያ ገባ። መስቀሉ ወደ ኢትዮጵያ የገባው መስከረም ፲ ቀን ነው። በዚህም ምክንያት፣ የቀድሞው የአበባ በዓል (ተቀጸል ጽጌ) እና የግማደ መስቀሉ መምጣት በአንድነት እንዲከበር ተወሰነ። ስለዚህም፣ ከመስከረም ፳፭ ወደ መስከረም ፲ ተዛውሮ፣ “ተቀጸል ጽጌ” እና “ዐፄ መስቀል” ተብሎ በታላቅ ሥርዓት መከበር ጀመረ። ✍️​መስከረም ፲ ለምን በሊቃነ ጳጳሳት ይከበራል? ​ይህ በዓል በቅዱሳን ፓትርያርኮችና በብፁዓን ሊቃነ ጳጳሳት የሚከበርበት ዋነኛው ምክንያት ታሪካዊና ሃይማኖታዊ ነው። ✍️​ታሪካዊ ምክንያት በዐፄ ዳዊት ዘመን ግማደ መስቀሉ ወደ ኢትዮጵያ መግባቱ የመላዋን ሀገር ሕዝብ ያስደሰተ ታላቅ ክስተት ነበር። በዓሉን የማክበሩ ሥርዓት በንጉሡና በቤተ ክርስቲያን አባቶች መካከል የነበረውን ጥምረት ያሳያል። የቤተ ክርስቲያን መሪዎች በንጉሡ ዙፋን ፊት ቀርበው ዜማውን ይዘምሩ ነበር። በዚህ ሥርዓት፣ የሀገሪቱ መንፈሳዊ መሪዎች ንጉሦቹንና ሕዝቡን ባርከዋል፤ ለሀገሩ ሰላምና አንድነት ጸልየዋል። ✍️​ሃይማኖታዊ ምክንያት በዓሉ ከግማደ መስቀሉ መምጣት ጋር የተያያዘ በመሆኑ፣ የቤተ ክርስቲያኒቱ አባቶች የአዳኝነቱን መገለጫና ምልክት የሆነውን መስቀል ክብሩንና ኃይሉን ለማውሳት በዓሉን በታላቅ ሥርዓት ያከብራሉ። መስቀል ለክርስቲያኖች የድል አርማ ነው። ጌታችን በእርሱ ላይ ሞቶ ዓለምን ስለማዳኑ የምናስብበት ነው። ስለዚህም፣ ይህ በዓል ከክርስቶስ መስቀልና በረከት ጋር የተያያዘ በመሆኑ ሊቃነ ጳጳሳትና ፓትርያርኮች በክብር ያከብሩታል። ✍️​በማክበር የምናገኘው በረከት ​የተቀጸል ጽጌ በዓልን ስናከብር የምናገኛቸው በርካታ መንፈሳዊና ማኅበራዊ በረከቶች አሉ። ➡️​መንፈሳዊ ዕድገት በዓሉ ክረምቱ እንዳለፈና የመጸው ወራት እንደመጣ የሚያመለክት ነው። ይህ እንደ ምሳሌ፣ የሰው ልጅ ከኃጢአት ክረምት ወጥቶ ወደ ንስሐና አበባ ወደሚያፈራ ሕይወት መሸጋገሩን ያመለክታል። የአበባው መሰጣጠትም በመንፈሳዊ ሕይወታችን መልካም ፍሬ ማፍራታችንን ያሳያል። ➡️​የፍቅር እና የአንድነት መገለጫ በበዓሉ ወቅት የአበባ መሰጣጠት ሥርዓት አለ። ይህም የፍቅርና የመከባበር ምልክት ነው። ይህ ከእግዚአብሔር እና ከሰዎች ጋር ፍቅርን እና ሰላምን መመሥረት እንዳለብን ያስታውሰናል። ✍️​የሃይማኖትና የባህል ትውፊትን ማክበር በዓሉ ከጥንት ኢትዮጵያዊ ባህል እና ሃይማኖት ጋር የተያያዘ በመሆኑ፣ ማክበሩ የሀገራችንንና የቤተ ክርስቲያናችንን ታሪክ፣ ማንነትና ትውፊት እንድንጠብቅና ለትውልድ እንድናስተላልፍ ይረዳናል። ➡️​የመስቀልን በረከት ማሰብ በዓሉ የግማደ መስቀሉን መምጣት ስለሚያስብ፣ የጌታን መስቀል ታላቅነት እና የመስቀሉን ኃይል እንድናስታውስ ያደርገናል። በረከቱንም የምናገኝበት አጋጣሚ ነው። ​በአጠቃላይ፣ “ተቀጸል ጽጌ” የሃይማኖታዊ እሴቶችን፣ የሀገር ታሪክን እና የባህል ትውፊቶችን የሚያስተሳስር ታላቅ በዓል ነው። ​የቅዱሳን አምላክ እግዚአብሔር በረከቱን ያድለን ​✍️​ ​“ለግሪክ ሰዎችና ላልተማሩም፥ ለጥበበኞችና ለማያስተውሉም ዕዳ አለብኝ፤” በወንጌል አላፍርምና፤ አስቀድሞ ለአይሁዳዊ ደግሞም ለግሪክ ሰው፥ ለሚያምኑ ሁሉ የእግዚአብሔር ኃይል ለማዳን ጻድቅ በእምነት ይኖራል ተብሎ እንደ ተጻፈ የእግዚአብሔር ጽድቅ ከእምነት ወደ እምነት በእርሱ ይገለጣልና። ሮሜ 1÷14 እግዚአብሔር ሆይ የሚሳንህ ነገር የለምና የራቀውን አቅርበህ የረቀቀውን አጉልተህ እየሰማነው ካለነው መርዶና ሰቀቀን ዕረፍተ ሥጋንና ዕረፍተ ነፍስን አትንሣን ጸልዩ በእንተ ሰላም ስለ ሰላም እንጸልይ ስለ ሀገራችን እንጸልይ ስለ ቅድስት ቤተ ክርስቲያን እንጸልይ በጭንቅ በመከራ ስላሉት እንጸልይ በረሀብ በስደት ስላሉት እንጸልይ በጽኑ ሕመም ተይዘው ስለሚሰቃዩት እንጸልይ ስለ ሃይማኖት መሪዎች አባቶቻችን እንጸልይ ስለ ሀገር መሪዎች እንጸልይ የሰላም የምህረት የቸርነት ባለቤት እግዚአብሔር ሰላሙን ምህረቱን ቸርነቱን አይንሳን አባ አትናቴዎስ ወልደ ጎርጎርዮስ ዘዝዋይ ገዳም መስከረም /1/2018 ✍️ ⛪️⛪️⛪️⛪️⛪️⛪️⛪️

ምዕመናን መልእክቱን በደንብ አጢኑት። ተማሩበት ራሳችሁንም ገንቡ አርሙ አስተካክሉ። ( በየኔታ ገብረ መድኅን እንየው) ◈"ትልቁ በሽታችን ተከታይነት ነው!! ◈የማፍያ ባሕታዊ ተከታይ፤ ◈የማፍያ አጥማቂ ተከታይ፤ ◈የግለሰብ ዝነኛ ሰባኪ ተከታይ፤ ◈የሆነ ድርጅት ተከታይ፤ ◈የእንተና አባት ተከታይ፤ ◈የማፍያ ነቢያት ተከታይ፤ ◈የሰፈር የመንደር ተከታይ፤ ◈የሥሁት ሥርዓት ተከታይ፤ ◈የቋንቋ ተከታይ፤ ...ተከታይ ብቻ፣ ◈መቸ፣ማን?ለምን? ማለት የማይችል ተከታይ ብቻ፤ ◈ዘመናዊ ፊት ኋላ ቀር ልብ የሆነ ተከታይ ትውልድ፤ ◈ቤተ ክርስቲያን ስትነካ የማይጨንቀው ቲፎዞው ሲነካ እንደ ባለዛር የሚርገፈገፍ ተከታይ፤ ◈የምእመናንን፣የገዳማትን፣የአድባራት፣የአብነት ደቀ መዛሙርትን፣የሀገር..ዕረፍት አልባ መከራ ጉዳዩ ያልሆነ ተከታይ፤ ◈መሠረተ ሃይማኖት፤ ◈መሠረተ ትውፊት፤ ◈መሠረተ ታሪክ፤ ◈መሠረተ ቀኖና፤ ◈መሠረተ ባህል፤..የሌለው ተከታይ፤ ◈መሸወድ መታለል የማይሰለቸው ተከታይ፤ ◈ያልተመሠረቱ መሥራቾች፤ ◈ያልታነጹ አናጮች፤ ◈ያልገባቸው ግራ አጋቢዎች፤ ◈ያልተለወጡ ለዋጮች፤ ◈ያልተማሩ አስተማሪዎች፤ ◈ያልመነኑ አስመናኞች፤ ◈ያልከረሰተኑ አከርስታኞች፤ ◈ይልተጠመቁ አጥማቂዎች፤..ፊቱን ጸፍተው አፉን ከፍተው ሲያነሆልሉት ዝም ብሎ አሜን ብሎ የሚጓዝ ነሁላላ ተከታይ፤ ◈ተከታዮች ሆይ ከቤተ ክርስቲያን ክብርና ህልውና በላይ የሚሆን ግለሰብ እና ምድራዊ ድርጅት አለ እንዴ? ◈ኦርቶዶክሳዊ ውግንና የሌለው ክርስቲያን በግለሰባዊ ውግንና ጊዜውን ያባክናል ወይ? ◈ኦርቶዶክሳዊ ውግንና ሌሎች የማይገፋ የራሱንም የማያስጠፋ ርቱዕ ፍትሀዊ ሀሳብ አይደለም እንዴ? ◈እኛ፦ክርስቲያኖች ሐዋርያዊት፣ቅድስት፣አንዲት፣ርትዕት ለሆነች አስተምሮ እና ክርስቶስ ራስ ለሆናት ለአንዲት ኦርቶዶክሳዊት ጉባኤ ማኅበርተኞች ነን እንጂ ዘመን የወለደውን ሹም የወደደውን፣ሆዱ የሞላውን ፊቱ የወዛውን፣ዓለም የተስማማውን ብለን የምንከተል ትሉላን ነን ወይ?አይደለንም። ◈የሰው ፈቃድ ባልሠራት፣ቅድምና ባላት፣ባልተለዋወጠች፣ከባለቤቱ በተቀበልናት፣በምንጠብቃትና በምናስረክባት ሃይማኖተ ተዋሕዶ የሚያምን ሰው፤ ◈አንዲት፣ቅድስት፣ኲላዊት፣ሐዋርያዊት የሆነች የቅድስት ቤተ ክርስቲያን አባል እና አካል የሆነ ሰው፤ ◈ከቅድስት ማየ ገቦ ተወልዶ በቅዱስ ሜሮን የታተመ፣በአንድ የክርስቶስ ደም የከበረ፣በአንድ የክርስቶስ መስቀል የተሰቀለ ሰው፤ ◈ቅዱሳን መላክት፣ቅዱሳን ነቢያት፣ቅዱሳን ሐዋርያት፣ቅዱሳን ሰማዕታት፣ቅዱሳን መነኮሳት፣ቅዱሳን ሊቃውንት፣ቅዱሳን ሥውራን፣ቅዱሳን ምእመናን ወምእመናት አንድ ለሆኑለት ሰማያዊ ማኅበር እና ዘለዓለማዊ ዓላማ የተጠራ ሰው፤ ◈የቅድስት ኦርቶዶክሳዊት ቤተ ክርስቲያንን፦ሐዋርያዊ፣ኅብረታዊ፣ቅብብሎሻዊ፣ደቀ መዝሙራዊ፣መስቀላዊ፣ምሥክራዊ፣..አረዳድን የያዘ ሰው፣ ◈በቅዱሳን አባቶቻችን በኩል ከመንፈስ ቅዱስ የተቀበልናቸው ቅዱሳት መጻሕፍትን የሕይወት መመሪያዎች ያደረገ ሰው፣ ◈ህልፈተ ሰማይ ወምድር፣ፍትሀ እግዚአብሔርን፣ሞት እና ትንሣኤ ሙታን እንዳለ የማያምን...ክርስቶስንና አካሉ የሆነች ቤተ ክርስቲያን.. በእርጥብ ሥጋ ለተጠቀቀለለ ሰው እንዴት ተከታይ ይሆናል? ◈የጸኑትን እስክናገኝ ድረስ በያለንበት መጽናት ያስፈልጋል። ◈ክርስታያን ከሆንህ አትልመጥመጥ የምትከተለውን ለይ!! ◈ተከታዮች ሆይ!!፦ "እስከ መቼ ድረስ በሁለት አሳብ ታነክሳላችሁ? እግዚአብሔር አምላክ ቢሆን እርሱን ተከተሉ፤ በኣል ግን አምላክ ቢሆን እርሱን ተከተሉ፤"፩.ነገ.፲፰፥፳፩ የኔታ ©ገብረ መድኅን እንየው።

Old Ethiopian Manuscripts available here 📌📌 https://ye-buna.com/product_landing?product=6a2541c0e530c_ethioyared

የብራና ሰዋስወ ግእዝ ➾ በውስጡ ያካተታቸው ልሳነ ግእዝ አገባብ ፡ ርባ ቅምር : ባሕረ ሀሳብ እና ሌሎችም። https://ye-buna.com/ethioyared?ref=product_detail&product=6a0bf611b1f89_ethioyared

አምስቱ አእማደ ምስጢር አንድምታ ለምትፈልጉ https://ye-buna.com/ethioyared?ref=product_detail&product=6a0976a96a03f_ethioyared

ቅዱስ ማርቆስ ኢትዮጵያዊ ነው ፤ የተዋሕዶ አንበሳም መድኃኔዓለም ኢየሱስ ክርስቶስ ነው። አባ ተስፋ ሥላሴ ሞገስ።