BVMMTB.UZ | Rasmiy kanal

#Rasmiy_munosabat Ijtimoiy tarmoqlarda Buxoro shahridagi 25-sonli davlat maktabgacha ta’lim tashkilotining achinarli holatda ekani, shuningdek, 30-sonli davlat maktabgacha ta’lim tashkiloti faoliyati vaqtincha to‘xtatilgani yuzasidan murojaat e’lon qilindi. Mazkur murojaat yuzasidan quyidagilarni ma’lum qilamiz. Bugungi kunda Buxoro viloyati maktabgacha va maktab ta’limi boshqarmasi tasarrufidagi davlat maktabgacha ta’lim tashkilotlarining moddiy-texnik bazasini mustahkamlash, binolar holatini yaxshilash hamda tarbiyalanuvchilar uchun munosib shart-sharoitlar yaratishga alohida e’tibor qaratilmoqda. Ma’lumot uchun, 2026 yilda viloyatdagi 151 ta maktab va 85 ta maktabgacha ta’lim tashkiloti, jami 236 ta ta’lim muassasasida qurilish-ta’mirlash ishlarini amalga oshirish rejalashtirilgan. Jumladan, Buxoro shahridagi 15 ta davlat maktabgacha ta’lim tashkilotida ham qurilish-ta’mirlash ishlari amalga oshiriladi. Bu shahardagi maktabgacha ta’lim tashkilotlarining umumiy soniga nisbatan salmoqli ko‘rsatkichni tashkil etadi. Ta’lim muassasalarini ta’mirlash va rekonstruksiya qilish ishlari ob’yektlarning texnik va jismoniy holati, mavjud muammolarning dolzarbligi hamda belgilangan mezonlar asosida shakllantiriladigan davlat dasturlari doirasida amalga oshiriladi. Bu jarayonda ob’yektlarning holati ishchi guruhlar tomonidan o‘rganilib, eng og‘ir va ta’mirtalab muassasalarni bosqichma-bosqich dasturlarga kiritish bo‘yicha takliflar shakllantiriladi. Shu nuqtai nazardan, ijtimoiy tarmoqlarda tilga olingan Buxoro shahridagi 25-sonli davlat maktabgacha ta’lim tashkiloti ham 2027 yilda amalga oshiriladigan davlat dasturlariga kiritish bo‘yicha takliflar ro‘yxatiga kiritilgan. Dastlabki hisob-kitoblarga ko‘ra, mazkur ob’yektda ta’mirlash ishlarini amalga oshirish uchun 3,2 mlrd so‘m mablag‘ ajratilishi ko‘zda tutilgan. Shuningdek, murojaatda ta’mirlash dasturlarini shakllantirishda turli sub’yektiv yondashuvlar, jumladan, «tanish-bilishchilik» mavjudligi haqida iddaolar bildirilgan. Qayd etish lozimki, respublikada ijtimoiy soha ob’yektlarini ta’mirlash, rekonstruksiya qilish va yangidan qurish ishlari belgilangan davlat dasturlari hamda ularni shakllantirishga qo‘yilgan talablar asosida amalga oshiriladi. Ob’yektlarni dasturlarga kiritishda belgilangan tartib-taomillarga amal qilinishi ta’minlanadi. Buxoro viloyati maktabgacha va maktab ta’limi boshqarmasi ta’lim muassasalarining holatini yaxshilash, mavjud muammolarni bosqichma-bosqich bartaraf etish hamda bolalar uchun xavfsiz va munosib ta’lim-tarbiya muhitini yaratishni ustuvor vazifalardan biri sifatida belgilagan. Murojaatda ko‘tarilgan yana bir masala — Buxoro shahridagi 30-sonli davlat maktabgacha ta’lim tashkiloti faoliyatining vaqtincha to‘xtatilgani bilan bog‘liq. Mazkur muassasa binosining texnik holatida o‘zgarishlar kuzatilgani sababli, avvalo, tarbiyalanuvchilar xavfsizligini ta’minlash maqsadida uning faoliyati vaqtincha to‘xtatilgan. Ayni vaqtda binoning texnik holati bo‘yicha xulosa olish ishlari amalga oshirilmoqda. Texnik xulosa natijalaridan kelib chiqib, ob’yektda zarur ta’mirlash ishlarini amalga oshirish masalasi belgilangan tartibda hal etiladi. Ta’kidlash joizki, maktabgacha ta’lim tashkilotlarida ta’mirlash ishlarini amalga oshirishdan asosiy maqsad faqat binolarni yangilash emas, balki bolalar uchun xavfsiz, zamonaviy va munosib sharoit yaratishdan iborat. ✅Buxoro viloyati maktabgacha va maktab ta’limi boshqarmasi Axborot xizmati