ERA ኢትዮጵያ መንገዶች አስተዳደር

የቀላፎ ተገጣጣሚ የብረት ድልድይ ጥገና ተጠናቀቀ አዲስ አበባ፣ 29፣ 2018 (ኢ መ አ):- በሶማሌ ክልል 60 ሜትር ርዝመት ያለው እና ጉዳት ደርሶበት የነበረው የቀላፎ ተገጣጣሚ የብረት ድልድይ መልሶ ግንባታ ተጠናቅቋል። ለረጅም ጊዜ ብቸኛ አማራጭ ሆኖ የሸበሌ ወንዝን አቋርጦ ለኅብረተሰቡ አገልግሎት ሲሰጥ የነበረው ይህ ድልድይ ከፍተኛ ክብደት በጫነ ተሽከርካሪ ጉዳት የደረሰበት መኾኑን ጠቅሰን የድልድዩ መልሶ ግንባታ ሥራ በመጠናቀቅ ላይ መኾኑን በቅርቡ መግለጻችን ይታወቃል። አሁን ላይ የተገጣጣሚ የብረት ድልድዩን ወደ ቀደመ አገልግሎቱ ለመመለስ በተደረገው ከፍተኛ ጥረት የመልሶ ግንባታ ሥራው የተጠናቀቀ ሲኾን፥ በቀጣይ ቀናቶች ውስጥ ለተሽከርካሪ አገልግሎት ክፍት የሚደረግ ይኾናል። በኢ መ አ የጎዴ መንገድ ጥገና ዲስትሪክት እንዲሁም የድልድይ እና ስትራክቸር ዳይሮክቶሬት በመልሶ ግንባታ ሥራው ላይ ተሳትፈዋል። ይህ የቀላፎ ድልድይ እስከ 20 ቶን (200 ኩንታል) ድረስ የመሸከም አቅም ያለው በመኾኑ አሽከርካሪዎች በከፍተኛ ኅላፊነት እንዲገለገሉ ኢመአ ያሳስባል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የኦሞ-ሳይ እና ሌፍት ካናል ብሪጅ መንገድ ግንባታ አፈጻጸም 49 ነጥብ 24 በመቶ ደረሰ አዲስ አበባ፣ ጥቅምት 28፣ 2018 (ኢ መ አ):- በምዕራብ ኦሞ ዞን የኦሞ ብሔራዊ ፓርክ መዳረሻ የኾናው የኦሞ-ሳይ እና ሌፍት ካናል ብሪጅ መንገድ ግንባታ አጠቃላይ አፈጻጸም 49 ነጥብ 24 በመቶ ደርሷል። የመንገድ ፕሮጀክቱ 64 ኪሎሜትር የሚሸፍን ሲኾን፥ የኦሞ ብሔራዊ ፓርክ አማራጭ መዳረሻ በመኾን የቱሪዝም ኢንዱስትሪውን ከማነቃቃቱም ባሻገር በርካታ የማኅበረሰብ ክፍሎችን የሚያስተሳስር ነው። አሁን ላይ የዲዛይን፣ የለውጥ መንገድ፣ የአፈር ጠረጋ፣ ቆረጣ እና ሙሌት፣ የፍሳሽ ማስወገጃ፣ የስትራክቸር እንዲሁም የሰብቤዝ እና የቤዝኮርስ ጠጠር ማምረት ሥራዎች በመከናወን ላይ ይገኛሉ። አሁን ላይ የተመዘገበውን አበረታች አፈጻጸም በማጠናከር በዚህ ዓመት አስፋልት የማንጠፍ ሥራ ለመጀመር ዕቅድ ተይዟል። ሀገር በቀሉ ዮቴክ ኮንስትራክሽን ግንባታውን በማከናወን ላይ ሲኾን፥ ዳና እና አሶሼት ምህንድስና አማካሪዎች ፕሮጀክቱን የማማከር እና የመቆጣጠር ሥራ ያከናውናል። ለግንባታው 1 ነጥብ 8 ቢሊዮን ብር ከፌደራል መንግስት በጀት ተይዞለታል። በአካባቢው በተለያየ ምክንያት የሚነሱ የጸጥታ ችግሮች በተደጋጋሚ ለግንባታው መቋረጥ ምክንያት መኾን፤ የሥራ ተቋራጩ የግንባታ ማሽነሪዎችን በወቅቱ አለማቅረቡ፤ የግንባታው ሂደት ላይ አሉታዊ ተጽዕኖ አሳድሯል። የጸጥታ ችግሮችን ለመቅረፍ የኢ መ አ የጂንካ አካባቢ ግንባታ ማስተባበሪያ ጽ/ቤት ከየአካባቢው የመስተዳድር አካላት ጋር በቅርበት እየሠራ ይገኛል። የፕሮጀክቱ መነሻ ኦሞ ወንዝ የሚያቋርጥበት ከመሆኑ ጋር ተያይዞ ወንዙን ተንተርሰው የሚመረቱ የግብርና ምርት ውጤቶችን በስፋት ወደ የተለያዩ የገበያ ማዕከሎች ለማድረስ ያስችላል። በተለይም በአካባቢው ለተገነቡ ግዙፍ የስኳር ፋብሪካዎች የማምረቻ ግብዓቶችን እንዲሁም የስኳር ምርት በቤንች ማጂ በኩል ወደ ተለያዪ የሀገራችን ከተሞች በተሻለ ፍጥነት ለማድረስ ከፍተኛ ጥቅም ይኖረዋል፡፡ በተጨማሪም የሀገር ውስጥና የውጭ ሀገር ጎብኝዎች በአካባቢው ወደ ሚገኘው የኦሞ ብሔራዊ ፓርክ የሚያደርጉትን ጉዞ በማቀላጠፍ የአካባቢውን የቱሪስት ፍሰት ይጨምራል።  የዚህ ፕሮጀክት አካል የኾነው ከሳይ ማጂ ያለው መንገድ ከዚህ ቀደም ግንባታው ተጠናቅቆ ለትራፊክ አገልግሎት ክፍት መደረጉ ይታወቃል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

በክልሉ በተለያዩ ምክንያቶች የግንባታ ሂደታቸው የተጓተቱ ፕሮጀክቶችን ለማስቀጠል እየተሰራ ነው አሶሳ፣ ጥቅምት 18 ቀን 2018 ዓ.ም (ኢመአ): በቤኒሻንጉል ጉሙዝ ክልል በተለያዩ ምክንያቶች የግንባታ ሂደታቸው የተጓተቱ ፕሮጀክቶችን ማስቀጠል ላይ ትኩረት ያደረገ የመስክ ምልከታ ተካሄደ። በአሶሳ ፕሮጀክት ማስተባበሪያ ፅ/ቤት ስር ከሚገኙት የመንገድ ኘሮጀክቶች መካከል የአሶሳ - ዳለቲ - ባሮዳ (ሎት አንድ ) እና የሆሞሻ - ህዳሴ ፕሮጀክቶች ይገኙባቸዋል፡፡ ግንባታው ቀደም ሲል ተጀምሮ የነበረው የአሶሳ - ዳለቲ ባሩዳ (ሎት አንድ) ሰላሳ ስድሰት ኪሎ ሚትር(36 ኪ.ሜ) የሚሸፍን ሲሆን፤ የግንባታው አፈጻጸሙ ሰባ በመቶ መድረሱ የሚታወስ ነው ፡፡ ግንባታውን እያከናወነ የሚገኘው የስራ ተቋራጭ ሰናን ኮንስራክሽን ኃ.የተ.የግል ማህበር ሲሆን በአካባቢው በነበረው የፀጥታ ችግር እና የስራ ተቋራጩ አፈፃፀም ደካማ መሆን ለፕሮጀክቱ በተያዘለት ጊዜ አለመጠናቀቅ ምክንያት ሆኗል፡፡ ይህን ችግር ለመፍታት የኢትዮጵያ መንገዶች አስተዳደር ከፍተኛ የሥራ ሃላፊዎች ከክልሉ መንግስት ጋር በመነጋገር ችግሮችን ለመቅረፍና ፕሮጀክቶቹን ወደ ስራ ለማስገባት ከፍተኛ ጥረት በማድረግ ላይ ይገኛል፡፡  በሥፍራው በመገኘት በተደረገው ውይይት በሥራ ተቋራጩ በኩል ያሉ ውስንነቶችን በመቅረፍ የመንገድ ስራው ላይ የሚያስፈልጉ የኮንስትራክሽን ግብዓት  እና የነዳጅ አቅርቦት በተገቢው ጊዜ ቀርቦ ወደ ስራ  እንዲገቡ ፣ አስፋልት ለማንጠፍ የሚያስችሉ  የሰብቤዝ እና የቤዝኮርስ ጠጠሮችን አምርቶ ፕሮጀክቱን ለማፋጠን አስቻይ ሁኔታዎች ለመፍጠር ይቻል ዘንድ ስምምነት ላይ ተደርሷል፡፡ በተመሳሳይ የሆሞሻ - ህዳሴ (ሎት አንድ)  መንገድ ፕሮጀክት በሀገር - በቀሉ እንይ ኮንስትራክሽን ሲከናወን ቆይቶ ከጸጥታ እና ከወሰን ማስከበር ጋር በተያያዘ ችግር ተቋርጦ ቆይቷል። አሁን ላይ በተደረጉ ጥረቶች ፕሮጀክቱ ወደ ግንባታ እየተመለሰ ሲሆን፤ በቅድመ-ዝግጅት ሂደት ላይ ይገኛል። ከዚሁ ጎን ለጎን የትራንስፖርት እንቅስቃሴው   መስተጓጎል እንዳይገጥመው  የጥገና ሥራ ማከናወን እንደሚያስፈልግና ሥራው እንዲቀጥል የኢትዮጵያ መንገዶች አስተዳደር  ዋና ዳይሬክተር ኢንጂነር መሀመድ አብዱራህማን በቦታው ባደረጉት የመስክ ቅኝት ላይ  አቅጣጫ ሰጥተዋል ። ይህ ፕሮጀክት ወረዳዎችን ከቀበሌዎች በማስተሳሰር ማኅበራዊ እና ምጣኔ ሀብታዊ መስተጋብር የሚያጠናክር ከመሆኑ በተጨማሪ ለታላቁ ህዳሴ ግድብ እንደ አማራጭ መንገድ ሆኖ ያገለግላል ፡፡ በክልሉ የሚገኙ ሌሎች የመንገድ ፕሮጀክቶችንም በፍጥነት ለማጠናቀቅ እየተሠራ ነው። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የጎዴ ቀላፎ የብረት ድልድይ ጥገና በመጠናቀቅ ላይ ነው አዲስ አበባ፣ ጥቅምት 17 ቀን 2018 ዓም(ኢመአ)፦ በሶማሌ ክልል ጉዳት አጋጥሞት የነበረው የጎዴ ከተማን ከቀላፎ ወረዳ የሚያገናኘው የብረት ድልድይ የመልሶ ግንባታ ስራ በመጠናቀቅ ላይ ይገኛል። ለረጅም ጊዜ ብቸኛ አማራጭ ሆኖ የሸበሌ ወንዝን አቋርጦ ለህብረተሰቡ አገልግሎት ሲሰጥ የነበረው ይህ ድልድይ ከፍተኛ ክብደት በጫነ ተሽከርካሪ ተሰብሮ ከጥቅም ውጪ ሆኖ ተገቢውን አገልግሎት ሳይሰጥ መቆየቱ የሚታወስ ነው ። ድልድዩ ከፍተኛ ርዝመት ያለው ሲሆን፤ ሁለቱን ከተሞች በብቸኝነት ሲያገናኝ የቆየ እንደሆነና ነሃሴ 21 ቀን 2017 ዓ.ም. በገጠመው የመሰበር አደጋ ለበርካታ ጊዜያት ለነዋሪዎቹ ተግዳሮት ሆኖ ቆይቷል። በዚህም ማህበረሰቡ ላይ እየደረሰ ያለውን መንገላታት ለመግታት በተደረገው ርብርብ ተገጣጣሚ የብረት ድልድይ ገንብቶ በማጠናቀቅ ላይ ሲሆን በቅርብ ጊዜ አገልግሎት መስጠት ይጀምራል ተብሎ ይጠበቃል ። ቀሪ የድልድይ ስራ ማለትም ለውንቺንግ ኖዝ የመፍታት እና የድልድዩን ወለል የማንጠፍ ስራ እየተሰራ ይገኛል ። ይህ የቀላፎ ተገጣጣሚ ብረት ድልድዩ ያለምሰሶ ተሸካሚ 60.96 ሜትር ሆኖ የተሰራ በመሆኑ ከፍተኛ ጥንቃቄ ሊደረግለት ይገባል። በመሆኑም ከ20ቶን (ከ200 ኩንታል) በላይ በድልድዩ ላይ ማሳለፍ እንዲሁም ድልድዩን እንዲያቋርጡ የሚፈቀድላቸው ተሽከርካሪዎች የፍጥነት ገደባቸውን ቀንሰው መጓዝ እንዲችሉ ኢ.መ.አ. በቦታው ተገቢውን የትራፊክ ምልክቶች አስተክሎ ጥቅም ላይ እንዲውል አድርጓል ። በተጨማሪም የመስተዳድር አካላት ለድልድዩ ተገቢውን ጥበቃ እና ኬላ እንዲያቋቁሙ ከመግባባት ላይ ተደርሷል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የመቂ - ባቱ የፍጥነት መንገድ የ ITS ቴክኖሎጂ ዝርጋታን አስመልክቶ የመስክ ቅኝት ተካሄደ ሞጆ፣ ጥቅምት 14፣ 2018 (ኢ መ አ) ፡-  በሞጆ - ሐዋሳ ክፍል 2 የመቂ - ባቱ የፍጥነት መንገድ ዘመናዊ የመንገድ ላይ ደኅንነት መጠበቂያ ቴክኖሎጂ (ITS) ዝርጋታን አስመልክቶ የመስክ ቅኝት የተካሄደ ሲሆን፤ እያጋጠሙ ያሉ ችግሮችን አስመልክቶም ከባለድርሻ አካላት ጋር ውይይት ተካሂዷል ። በዚህ የውይይት መድረክ ላይ የ ITS ኘሮጀክትን አስመልክቶ እንደተገለፀው፤ ይህን ቴክኖሎጂ በመጠቀም የአገራችንን  የመንገድ ላይ ደኅንነት ለማስጠበቅ የላቀ ውጤት እንደሚያስገኝ ታምኖበት በአፋጣኝ ተጠናቆ ወደ ስራ እንዲገባ ታቅዶ ሲሰራ ቆይቷል። ነገር ግን ፕሮጀክቱ ከተጀመረ 1 ዓመት ከ6 ወራት ቢያስቆጥርም ተጠናቆ ወደ ትግበራ እንዳይገባ የሚያደርጉ ችግሮች በተደጋጋሚ እያጋጠሙ መሆኑ ታውቋል። ይህንን ችግር በዘላቂነት ለመፍታት ከስራ ተቋራጭ ፣ ከፀጥታ አካላት እንዲሁም  ከሚመለከታቸው ሌሎች ባለድርሻ አካላት ጋር በጋራ መስራት እንደሚገባ ፣ በየአካባቢው የጥበቃ ማማ ተሰርቶ  ጥበቃ ማድረግ እንደሚያስፈልግ ፣   በህገወጥ ተግባር ላይ በተሰማሩ ግለሰቦች ላይም አስተማሪ የሆነ እርምጃ እንዲወሰድ እንዲሁም ሃላፊነቱን ያልተወጣ አካል እንዲጠየቅ ማድረግ እንደሚገባ ተገልጿል ፡፡ በመጨረሻም የኢመአ የኮንስትራክሽን ፕሮጀክቶች ማኔጅመንት ምክትል ዋና ዳይሬክተር ኢንጂነር ብርሃኑ ተስፋዬ  የፕሮጀክቱን ሂደት ለማሳካት ፕሮጀክቱ በሚተገበርባቸው አካባቢዎች ለሚገኙ የማህበረሰብ አባላት አፋጣኝ የግንዛቤ ማስጨበጫ ስራ እንዲከናወን ፣ በአሰራር ሂደት ወቅት ያሉ ክፍተቶችን በጥልቀት ማጥናት እንደሚያስፈልግ እና ዘላቂ  መፍትሔ መስጠት እንደሚገባ አሳስበዋል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

ለኢትዮጵያ መንገዶች አስተዳደር ምክትል ዋና ዳይሬክተር ተሾመ !! ኢንጅነር ገላና ኮራ በኢትዮጵያ መንገዶች አስተዳደር በምክትል ዋና ዳይሬክተር ማዕረግ የልዩ ኮንስትራክሽን ፕሮጀክቶች አስተዳደር ፕሮግራም አስተባባሪ ኾነው በጠቅላይ ሚንስትር ዐቢይ አሕመድ (ዶ/ር) ከጥቅምት 12 ቀን 2018 ጀምሮ ተሹመዋል። ኢንጅነር ገላና ኮራ ተቋማችን ከመንግስት የተሰጠውን ሃገራዊ ተልዕኮ በተሻለ ብቃት እና ቁርጠኝነት በመከወን የዘርፉን ራዕይ ይበልጥ እንደሚያሳኩ በመተማመን በከፍተኛ አመራርነት እንኳን ወደ ተቋማችን ተቀላቀሉ በማለት መልካም የሥራ ዘመን እንዲሆንላቸው እንመኛለን! የኢትዮጵያ መንገዶች አስተዳደር

የባሕርዳር - ጢስ እሳት መንገድ ግንባታ አፈጻጸም ለማሻሻል እየተሠራ ነው አዲስ አበባ፣ ጥቅምት 14፣ 2018 (ኢ መ አ):- የጢስ ዓባይ ፏፏቴ መዳረሻ የኾነው የባሕርዳር - ጢስ እሳት መንገድ ግንባታ አፈጻጸም ለማሻሻል እየተሠራ ነው። በመንገድ ፕሮጀክቱ የገጠሙ ከወሰን ማስከበር ጋር በተያያዘ ችግር፣ የጸጥታ ስጋት እና የሥራ ተቋራጩ የአፈጻጸም ውስንነት በፕሮጀክቱ አፈጻጸም ላይ አሉታዊ ተጽዕኖ አሳድረዋል። የመንገድ ፕሮጀክቱ የሚገኝበትን የአፈጻጻም ደረጃ ለማሻሻል የባሕርዳር አካባቢ ግንባታ ፕሮጀክቶች ማስተባበሪያ ጽ/ቤት የባለድርሻ አካላትን ያሳተፈ ጥረት እያደረገ ይገኛል። ከወሰን ማስከበር ጋር በተያያዘ ያሉ ችግሮች አሁን ላይ በአብዛኛው የተቀረፉ ሲኾን፣ በሥራ ተቋራጩ በኩል ያሉ ውስንነቶችን ለመፍታት ተደጋጋሚ ውይይቶች እና የእርምት ርምጃዎች ተወስደዋል። በቀጣይም የቅርብ ድጋፍ እና ክትትሉ ተጠናክሮ የሚቀጥል ይሆናል። አሁን ላይ የፕሮጀክቱ አጠቃላይ አፈጻጸም 48 ነጥብ 33 የደረሰ ሲኾን፣ አስፋልት ለማንጠፍ የሚያስችሉ የቤዝኮርስ ጠጠር ማምረት እንዲሁም የውኃ መፋሰሻ ግንባታ ሥራዎች በመከናወን ላይ ናቸው። በአሁኑ ወቅት በተደረጉ ጥረቶች ፕሮጀክቱን ለማፋጠን አስቻይ ሁኔታዎች በመፈጠራቸው በዚህ ዓመት የፕሮጀክቱን አፈጻጸም እስከ 80 በመቶ ለማድረስ ዕቅድ ተቀምጧል። የመንገድ ፕሮጀክቱ 21 ነጥብ 2 ኪሎሜትር የሚሸፍን ሲኾን፣ ሀገር በቀሉ መልኮን ኮንስትራክሽን በማከናወን ላይ ይገኛል። ጎንድዋና ኢንጅነሪንግ የማማከር እና የቁጥጥር ሥራውን ያከናውናል። ለመንገድ ግንባታው 975 ሚሊዮን ብር በፌደራል መንግስት በጀት ተይዞለታል። የመንገድ ግንባታው ሲጠናቀቅ ወደ ጢስ ዓባይ ፏፋቴ ለሚመጡ ጎብኚዎች ምቹ ሁኔታን ይፈጥራል። በአካባቢው የሚመረቱ የተለያዩ የግብርና ምርቶች በቀላሉ ወደ ማእከላዊ ገበያ ለማድረስ ያስችላል። ወደ ባሕርዳር ከተማ የሚደረገውን የትራንስፖርት ምልልስ ያሳልጣል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የጎሬ - ማሻ - ቴፒ መንገድ ፕሮጀክት ወደ ግንባታ ለመመለስ የሚያስችሉ ጉዳዮች እየታዩ ነው አዲስ አበባ፣ ጥቅምት 13፣ 2018 (ኢ መ አ) ፡- በተለያዩ ምክንያቶች ለጊዜው ተቋርጦ የቆየውን የጎሬ - ማሻ - ቴፒ መንገድ ፕሮጀክት ወደ ግንባታ ለመመለስ የሚያስችሉ ጉዳዮች እየታዩ ነው፡፡ 141 ኪሎ ሜትር የሚሸፍነው የጎሬ - ማሻ - ቴፒ መንገድ ፕሮጀክት በዓለም-አቀፉ የሥራ ተቋራጭ ሃይንዳይ ዴቨሎፕመንት ካምፓኒ 1 ነጥብ 4 ቢሊዮን ብር በጀት ተይዞለት ግንባታው ሲከናወን እንደቆየ ይታወቃል፡፡ ኾኖም የግንባታው አጠቃላይ አፈጻጸም 62 በመቶ ከደረሰ በኋላ ከወሰን ማስከበር ጋር የተያያዙ ችግሮች በወቅቱ አለመቀረፋቸውን እንዲሁም የግንባታ ውል ዝርዝር ጉዳዮች ላይ የነበሩ አለመግባባቶችን በምክንያትነት በማንሳት የሥራ ተቋራጩ ግንባታውን ለጊዜው አቋርጧል፡፡ የመንገድ ፕሮጀክቱን በፋይናንስ የሚደግፈው የኮሪያው ኤግዚም ባንክ ከፍተኛ አመራሮች በቀጣይ ቀናት አዲስ አበባ የሚገቡ ሲኾን፤ ግንባታው ዳግም በሚመለስበት ሁኔታ ላይ ከኢትዮጵያ መንገዶች አስተዳደር ከፍተኛ አመራሮች ጋር የሚመክሩ ይሆናል፡፡ ከዚሁ ጎን ለጎን የትራንስፖርት እንቅስቃሴው እንዳይስተጓጎል አስፈላጊ የጥገና ሥራ በመከናወን ላይ ይገኛል፡፡ የመንገድ ግንባታው ዳግም እስኪጀመር ድረስም የጥገና ሥራው የሚቀጥል ይሆናል። ይህ የመንገድ ፕሮጀክት ኦሮሚያን እና ጋምቤላን በኢሉ አባቦር በኩል እና ደቡብ ምዕራብ ኢትዮጵያን በሸካ ዞን በኩል በቅርበት በማስተሳሰር ከፍተኛ ጠቀሜታ የሚያበረክት ነው፡፡ ከዚህም ባሻገር ስድስት ወረዳዎች እና ከ15 በላይ ቀበሌዎችን በቅርበት በማገናኘት ማኅበራዊ እና ምጣኔ ሀብታዊ ትስስር የሚያጠናክር ነው፡፡ በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et\

ለኢትዮጵያ መንገዶች አስተዳደር ሁለት ምክትል ዋና ዳይሬክተሮች ተሾሙ !! ኢንጂነር ብርሃኑ ተስፋዬ በግንባታ ፕሮጀክቶች ማኔጅመንት ምክትል ዋና ዳይሬክተርነት እንዲሁም አቶ አለማየሁ ተረፈ በኮርፖሬት አገልግሎት ምክትል ዋና ዳይሬክተርነት ከጥቅምት 06 ቀን 2018 ዓ.ም ጀምሮ ተቋማችንን እንዲያገለግሉ በክቡር ጠቅላይ ሚኒስትር ዐቢይ አህመድ (ዶ/ር) ተሾመዋል። ሁለቱ አመራሮች ተቋማችን ከመንግስት የተሰጠውን አገራዊ ተልዕኮ በተሻለ ብቃት እና በቁርጠኝነት በመከወን የዘርፉን ራዕይ ይበልጥ እንደሚያሳኩ በመተማመን በከፍተኛ አመራርነት እንኳን ወደ ተቋማችን ተቀላቀላችሁ በማለት መልካም የሥራ ዘመን እንዲሆንላቸው እንመኛለን! የኢትዮጵያ መንገዶች አስተዳደር

የቡልቡላ - አላጌ - መንገድ ግንባታ 94 በመቶ ተጠናቀቀ ቡልቡላ፣ ጥቅምት 08፣ 208 (ኢ መ አ):- የቡልቡላ - አላጌ ዋናው መንገድ ግንባታ 94 በመቶው የተጠናቀቀ ሲኾን፣ ቀሪ ውስን የማጠናቀቂያ ሥራዎች በመከናወን ላይ ናቸው። በተመሳሳይ የዚሁ ፕሮጀክት አካል የኾነው ከባራ - ሚቶ ያለው የ9 ነጥብ 2 ኪሎሜትር አገናኝ መንገድ ግንባታ 34 በመቶ የተጠናቀቀ ሲኾን፣ የአፈር ቆረጣ እና ሙሌት፣ የስትራክቸር እንዲሁም የሰብቤዝ ሥራዎች በመከናወን ላይ ናቸው። የመንገድ ግንባታው ወደ ባራ - ሚቶ የሚወስደውን አገናኝ መንገድ ጨምሮ አጠቃላይ 38 ነጥብ 823 ኪሎሜትር ይሸፍናል። የጸጥታ ስጋት፣ በወቅቱ ያልተነሱ በመንገድ ወሰን ክልል የሚገኙ ንብረቶች በግንባታው ሂደት ላይ አሉታዊ ተጽዕኖ አሳድረዋል። ችግሮቹን ለመቅረፍ በኢትዮጵያ መንገዶች አስተዳደር የቡታጅራ አካባቢ ግንባታ ፕሮጀክቶች ማስተባበሪያ ጽ/ቤት ባደረገው የተቀናጀ ጥረት አዎንታዊ ውጤቶች ተመዝግበዋል። በመኾኑም በፕሮጀክቱ የተመዘገበውን አበረታች ውጤት በማስቀጠል ግንባታውን በአጭር ጊዜ ውስጥ ለማጠናቀቅ በትኩረት እየተሠራ ይገኛል። የመንገድ ግንባታውን ሀገር-በቀሉ ኪቢሽ ኮንስትራክሽን በማከናወን ላይ ይገኛል። ዩናይትድ ኮንሰልቲንግ ኢንጅነርስ የማማከር እና የቁጥጥር ሥራውን በመሥራት ላይ ይገኛል። ለፕሮጀክቱ ማስፈጸሚያ 878 ሚሊዮን ብር በፌደራል መንግስት ተመድቧል። የመንገድ ፕሮጀክቱ ዕውን መኾን የምሥራቅ ሸዋ፣ የስልጤ እና የሀላባ ዞኖችን ጨምሮ በርካታ ከተሞችን በማገናኘት ማኅበራዊ እና ምጣኔ ሀብታዊ ትስስሩን ያጠናክራል። የጤና፣ የትምሕርት እና መሰል ማኅበራዊ ተቋማት ተደራሽነት በእጅጉ ይጨምራል። የአላጌ የግብርና እና ቴክኒክ ና ሙያ ኮሌጅ መዳረሻውን ምቹ በማደርግ ከፍተኛ አስተዋጽዖ ያበረክታል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

Enjoy our content? Advertise on this channel and reach a highly engaged audience! 👉🏻 It's easy with Telega.io. As the leading platform for native ads and integrations on Telegram, it provides user-friendly and efficient tools for quick and automated ad launches. ⚡️ Place your ad here in three simple steps: 1 Sign up 2 Top up the balance in a convenient way 3 Create your advertising post If your ad aligns with our content, we’ll gladly publish it. Start your promotion journey now!