ERA ኢትዮጵያ መንገዶች አስተዳደር

ለሀገራችን የመሠረተ ልማት ማንሰራራት በሥነ ምግባር የታነጹ እና በቴክኖሎጂ የታገዙ ማሀንዲሶች ሚና ወሳኝ ነው:- አቶ ዛዲግ አብርሃ አዲስ አባባ፣ ሐምሌ 13፣ 2017 (ኢ መ አ):- ለሀገራችን የመሠረተ ልማት ማንሰራራት በሥነ ምግባር የታነጹ እና በቴክኖሎጂ የታገዙ ማሀንዲሶች ሚና ወሳኝ መኾኑን የአፍሪካ አመራር ልህቀት አካዳሚ ፕሬዝዳንት አቶ ዛዲግ አብርሃ ተናግረዋል። አቶ ዛዲግ ' መንገድ እና የኢትዮጵያ ማንሰራራት' በሚል ርዕስ ለኢትዮጵያ መንገዶች አስተዳደር ከፍተኛ አመራሮች እና ማሀንዲሶች ሥልጠና እየሰጡ ይገኛሉ። ፕሬዝዳንቱ በወቅቱ እንደገለጹት፤ መሀንዲሶች መንገድ የመሠረት ልማቶች ሁሉ አውራ መኾኑን በመገንዘብ ለሀገራዊ የመንገድ ፕሮግራም ስኬት መትጋት፣ የመንገድ ፕሮጀክቶች በተቀመጠላቸው የጥራት ደረጃ፣ የዋጋ መጠን እና የጊዜ ገደብ እንዲጠናቀቁ በማድረግ በኩል ሀገራዊ ኃላፊነታቸውን ሊወጡ ይገባል። ለሀገራዊ ትልም መሳካት መሀንዲሶች ቁልፍ ሚና እንዳላቸው የገለጹት አቶ ዛዲግ፥ ማኅበራዊ እና ኢኮኖሚያዊ ስንክሳሮችን የሚፈታ ድልድይ እየገነቡ መኾናቸውን መሀንዲሶች መረዳት ይኖርባቸዋል ብለዋል። መሀንዲሶች ሀገር ሲያቀኑ ህፃናት ወደ ትምህርት ቤት ይሄዳሉ፣ ምርት ለገበያ ይቀርባል፣ እናቶች ወደ ሆስፒታል ያመራሉ፣ ግንኙነት ይሳለጣል በድምሩ የብሄረ መንግስት እና የሀገረ መንግስት ግንባታ እውን እንደሚሆን አብራርተዋል። ለአራት ቀናት የሚቆየው ሥልጠናው፣ በሚቀጥሉት ቀናትም የሚካሄድ ይሆናል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

በናዳ ምክንያት ዝግ ኾኖ የቆየው የሳውላ - ላስካ - ሳላይሽ መንገድ ለትራፊክ አገልግሎት ክፍት ኾነ አዲስ አበባ፣ ሐምሌ 13፣ 2017 (ኢ መ አ):- በደቡብ ኢትዮጵያ ክልል በጎፋ ዞን ገዜ ጎፋ ወረዳ በናዳ ምክንያት ዝግ ኾኖ የቆየው የሳውላ - ላስካ - ሳላይሽ መንገድ ለትራፊክ አገልግሎት ክፍት ኾኗል። መንገዱ አካባቢው ላይ በጣለው ከባድ ዝናብ ተከትሎ በተከሰተ ናዳ ለ3 ቀናት ለትራፊክ አገልግሎት ዝግ ኾኖ ቆይቷል። አሁን ላይ በኢትዮጵያ መንገዶች አስተዳደር የሶዶ መንገድ ጥገና ዲስትሪክት ባደረገው ከፍተኛ ርብርብ ጊዜያዊ የተለዋጭ መንገድ በመገንባት መንገዱን ዳግም ለትራፊክ እንቅስቃሴ ክፍት ማድረግ ተችሏል። በሌላ በኩል ዋናውን መንገድ በአጭር ጊዜ ውስጥ ከናዳ ነጻ ለማድረግ እና ለትራፊክ እንቅስቃሴ ክፍት ለማድረግ ዲስትሪክቱ ከፍተኛ ጥረት በማድረግ ላይ ይገኛል። ጎን ለጎንም አካባቢው ለናዳ የተጋለጠ ከመሆኑ ጋር በተያያዘ አስፈላጊውን የቅድመ-ጥንቃቄ ሥራዎችን በየጊዜው ያከናውናል። በዚህ አጋጣሚ አሽከርካሪዎች መንገዱ ክፍት እስኪኾን ድረስ ላሳዩት ትዕግስት የኢትዮጵያ መንገዶች አስተዳደር እያመሰገነ፣ ወቅቱ ክረምት እንደመኾኑ አስፈላጊውን ጥንቃቄ እንዲያደርጉ ያሳስባል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የመንገድ መሠረተ ልማት ሁሉንም የሀገሪቱ አካባቢዎች በማስተሳሰር እና በማዋሀድ የብሔራዊ ኩራት ምንጭ ሊሆን ይገባል:- አቶ ዛዲግ አብርሃ አዲስ አበባ፣ ሐምሌ 13፣ 2017 (ኢ መ አ):- የመንገድ መሠረተ ልማት ሁሉንም የሀገሪቱ አካባቢዎች በማስተሳሰር እና በማዋሀድ የብሔራዊ ኩራት ምንጭ ሊሆን ይገባል ሲሉ የአፍሪካ አመራር ልህቀት አካዳሚ ፕሬዝዳንት አቶ ዛዲግ አብርሃ ተናገሩ። "መንገድ እና የኢትዮጵያ ማንሰራራት" በሚል ርዕስ በኢትዮጵያ መንገዶች አስተዳደር ዋና መሥሪያ ቤት የመሰብሰቢያ አዳራሽ ሥልጠና እየተሰጠ ይገኛል። በሥልጠናው ላይ የተቋሙ ከፍተኛ አመራሮች፣ የመንገድ ጥገና ዲስትሪክት አመራር እና ባለሞያዎች ተሳታፊ ናቸው። ሥልጠናውን እየሰጡ የሚገኙት የአካዳሚው ፕሬዝዳንት አቶ ዛዲግ፤ መንገድ ልብዙ ነገሮች ድልድይ ኾኖ ያስተሳስራል፤ የሀገራትን ዕድገትም ከመንገድ ውጪ ማሰብ አይቻልም ብለዋል። መንገድ የአንድ ሀገር ርዕይ ምልክት ነው፤ የሀገሪቷን መዳረሻ ለማወቅ የገነባቻቸውን መንገዶች መመልከት በቂ ነው ሲሉም ጨምረው ተናግረዋል። በመኾኑም አመራር እና ባለሞያዎች መንገድን ከመገንባት ባሻገር፤ መንገድ ስትራቴጂካዊ የአገር ግንባታ መሣሪያ መሆኑን እና በአንድ ሀገር ኢኮኖሚ፥ ማኅበራዊ፥ ፖለቲካዊ እንዲሁም አስተዳደራዊ ጉዳዮች ላይ ዘርፈ ብዙ ሚና የሚጫወት መሆኑን ከግንዛቤ ውስጥ በማስገባት ተገቢውን አገልግሎት እንዲሰጥ አድርገው መገንባት ይኖርባቸዋል ብለዋል። የኢትዮጵያ መንገዶች አስተዳደር ዋና ዳይሬክተር መሐመድ አብዱራህማን (ኢንጅነር)፤ ሥልጠናው ለተቋሙ ከፍተኛ አመራር እና ባለሞያዎች ከፍተኛ አቅም የሚፈጥር መኾኑን አስረድተዋል። ለአካዳሚው ፕሬዝዳንት አቶ ዛዲግ አብርሃም በወቅቱ ምስጋናቸውን አቅርበዋል። ሥልጠናው በመላው ሀገሪቱ ለሚገኙ የአስተዳደሩ ከፍተኛ አመራሮች እና ባለሙያዎች ለአራት ተከታታይ ቀናት በአካል እና በበይነ-መረብ እንደሚሰጥም ተመላክቷል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

"የአንድ ሀገር እስትንፋስ የመንገድ መሰረተ ልማት ነው" ዛዲግ አብርሃ አዲስ አበባ ፣ ሐምሌ 12 ቀን 2017 ዓ.ም (አፍሌክስ):- የአንድ ሀገር እስትንፋስ የመንገድ መሰረተ ልማት እንደሆነና መንገድ የተገለጠም ያልተገለጠም ኃይል እንዳለው የአፍሌክስ ፕሬዝዳንት አቶ ዛዲግ አብርሃ ተናገሩ:: ፕሬዝዳንቱ ለኢትዮጵያ መንገዶች አስተዳደር ከፍተኛ አመራሮች ፣ የዲስትሪክት ዳይሬክተሮች እና ባለሙያዎች 'መንገድ እና የኢትዮጵያ ማንሰራራት' በሚል ርዕስ ላይ በሰጡት ስልጠና የአስተዳደሩ ዋና ዳይሬክተር ኢንጅነር መሐመድ አብዱራህማን ተገኝተው የመክፈቻ ንግግር ያደረጉ ሲሆን ፣ አቶ ዛዲግ አብርሃ ከተጣበበ ጊዜያቸው ላይ ቀንሰው ለተቋማቸው አመራሮች ስልጠና ለመስጠት በመምጣታቸው አመስግነው፣ ስልጠናው በአዲሱ በጀት መጀመሪያ ላይ መሰጠቱ ለተቋሙ አመራር እና ባለሙያ ከፍተኛ አቅም እንደሚሆን ተናግረዋል:: ስልጠናው በመላው ሀገሪቱ ለሚገኙ የአስተዳደሩ ከፍተኛ አመራሮች እና ባለሙያዎች ለአራት ተከታታይ ቀናት በአካል እና በበይነ-መረብ እንደሚሰጥም ዋና ዳይሬክተሩ ጨምረው ገልጸዋል:: አቶ ዛዲግ መንገድ የአንድ ሀገር እስትንፋስ እና ለቀጣዩ ትውልድ የሚተላለፍ ቋሚ አሻራ ሊሆን የሚችልባቸውን አውዶች በዝርዝር ያቀረቡ ሲሆን ፣ መንገድ ብሔራዊ አንድነትን እያጠናከረ የመንግስትን ቅቡልነት የሚያረጋግጥ የአስተዳደር መሳሪያ እንደሆነ አብነቶችን ጠቅሰው አስረድተዋል:: 'የአንድ ሀገር ዜጎች ነን ብለን እንድናስብ ከሚያደርጉን አዕማዶች ውስጥ መንገድ አንዱ ነው' የሚሉት አቶ ዛዲግ ፣ የመንገድ መሰረተ ልማት የተዘነጉ እና የተረሱ አካባቢዎችን በማስተሳሰርና በማዋሀድ የብሔራዊ ኩራት ምንጭ እየሆነ እንደመጣና የጋራ ዕጣ-ፈንታን የሚያደምቅ የሚታይ ኃይል እንዳለው ተናግረዋል:: አንዳንድ መንገዶች ማንነትን የመገንባት ፣ ትውልድን የማስተሳሰርና ሰላምን የማስፈን ዕድልን እንደሚፈጥሩ ያስታወሱት አቶ ዛዲግ ፣ ሰዎች በሽማግሌ ብቻ ሳይሆን በመንገድም እርቅ እንደሚያወርዱ ከዓለም አቀፍ ተሞክሮዎችና ከህይወት ልምዳቸው በመነሳት አካፍለዋል:: የስልጠናው ተሳታፊዎች ላነሷቸው ጥያቄዎች እና አስተያየቶች በቂ ምላሽ እና ማብራሪያ ተሰጥቶባቸዋል:: ስልጠናው ለአራት ተከታታይ ቀናት በአካል እና በበይነ-መረብ እንደሚቀጥልም የተገኘው መረጃ ያመለክታል:: ምንጭ https://www.facebook.com/share/1BFqAj9kCz/

የአፍሌክስ ፕሬዝዳንት አቶ ዛዲግ አብርሃ ስለ መንገድ መሰረተ ልማት ምን አሉ? ለኢትዮጵያ መንገዶች አስተዳደር ከፍተኛ አመራሮች ፣ የዲስትሪክት ዳይሬክተሮች እና ባለሙያዎች 'መንገድ እና የኢትዮጵያ ማንሰራራት' በሚል ርዕስ ላይ በሰጡት ስልጠና ስለ መንገድ መሰረተ ልማት ምን አሉ? 🛣️ መንገድ የአንድ ሀገር የደም ዝውውር እና እስትንፋስ ነው ፣ 🛣️ መንገድ የተገለጠም ያልተገለጠም ኃይል ያለው የአንድ ማህበረሰብ ትስስር ማሳያ ነው ፣ 🛣️ መንገድ ስትራቴጂያዊ የሆነ የሀገር የትራንስፎርሜሽን መሳሪያ ነው ፣ 🛣️ መንገድ ካርታ ላይ የተመሰረተ መስመር ብቻ አይደለም:: ይልቁንም የጋራ ማንነትን የሚበይን መሰረተ ልማት ነው ፣ 🛣️ መንገድ የአንድ ሀገር ርዕይ ምልክት ነው:: የሀገሪቷን መዳረሻ ለማወቅ የገነባቻቸውን መንገዶች መመልከት በቂ ነው ፣ 🛣️ መንገድ የሀገራት የኢኮኖሚ መወዳደሪያ ፣ የአቅም ማሳያ መለኪያ እየሆነ ነው ፣ 🛣️ መንገድ ለብዙ ነገሮች ድልድይ ሆኖ ያስተሳስራል:: የሀገራትን ዕድገት ከመንገድ ውጭ ማሰብ አይቻልም ፣ 🛣️ መንገድ ለአንዲት ሀገር ተስፋም ቃልኪዳንም ነው:: ፖሊሲ እና ኢኮኖሚን ያስማማል:: በመንገድ ላይ ያልተመሰረተ ኢኮኖሚ ፈራሽ ነው ፣ 🛣️ መንገድ እና ነፃነት የአንድ ሳንቲም ሁለት ገፅታዎች ናቸው:: መንገድ የሌለው ነፃነት የለውም ፣ 🛣️ መንገድ ማን ይምጣ ፣ ማን ይመለስ ፣ ማን ይቅር ፣ ማን በተወለደበት አርጅቶ ይሙት የሚለውን ይበይናል ፣ 🛣️ መንገድ የገበያ ተደራሽነትን ይጨምራል ፣ የትራንስፖርት ወጭን ይቀንሳል ፣ ኢንዱስትሪን ያስፋፋል ፣ የስራ ዕድልን ይፈጥራል ፣ 🛣️ መንገድ ብሔራዊ አንድነትን ያጠናክራል ፣ ቅቡልነት ያለው መንግስት እንዲኖር ያደርጋል ፣ 🛣️ መንገድ የተረጋጋ እና የዳበረ ዴሞክራሲ እንዲኖር ያደርጋል 🛣️ መንገድ ፍትሕ እንዲሳለጥ ፣ ማህበራዊ ችግሮች እንዲፈቱ ፣ አስተዳደራዊ ጉዳዮች እንዲሰምሩ ያደርጋል ፣ 🛣️ መንገድ የደህንነት እና የሰላም መሳሪያ ነው:: የድህረ ቀውስ መፍቻም ነው ፣ ምንጭ https://www.facebook.com/100064912051411/posts/1213789137461477/?mibextid=rS40aB7S9Ucbxw6v

የደብረ ማርቆስ መንገድ ጥገና ዲስትሪክት በሁሉም የጥገና ዓይነቶች  ስራዎችን እያከናወነ ይገኛል አዲስ አበባ፣ ሐምሌ 11 ፣ 2017 (ኢ መ አ):- የደብረ ማርቆስ መንገድ ጥገና ዲስትሪክት በስሩ በሚገኙ አራት የጥገና ሴክሽኖች አማካኝነት በሁሉም የጥገና ዓይነቶች ስራዎችን እያከናወነ ይገኛል፡፡ በበጀት ዓመቱ 389 ኪሎ ሜትር ርዝመት  ያለው የመንገድ ሽፋን ለመጠገን የተቻለ ሲሆን የአዲስአበባ-ጎንደር (A3) ዋና መንገድ አካል በሆነው በደጀን - ባሕርዳር የመንገድ ክፍል ውስጥ መጠነ ስፊ የአስፋልት ጥገና ስራዎችን  መስራት ተችሏል፡፡ ከዚህም በተጨማሪ የድንገተኛ ጥገና ስራዎች በዋናነት በዓባይ ግድብ መዳረሻ እና በጢቅ ፈለገ ብርሃን የመንገድ ክፍሎች የተከናወኑ ሲሆን የድልድይ እና ከልቨርት ጥገና እና ማሻሻል ስራዎች በተለይ በሦስቱ  ሴክሽኖች (በደጀን፣ በቡሬ፣ እና በባህር ዳር) በማከናወን የትራፊክ እንቅስቃሴውን ያለምንም ችግር ማሳለጥ ተችሏል፡፡ ከዚህም ባሻገር ለረዥም ጊዜ ተበላሽቶ የቆየውን በማንኩሳ- ብርሸለቆ የመንገድ ክፍል የሚገኘውን የብርሸለቆ ማሰልጠኛ መዳረሻ ድልድይ እና  የዘማ ወንዝ ድልድይን ከድልድይና እና ስትራክቸር ቡድን ጋር በጋራ በመሆን በአጭር ጊዜ ወደ  ብረት ድልድይ (Bailey Bridge) የመቀየር ስራ ተሰርቷል፡፡ ከትራፊክ ደህንነት ጋር በተየያዘም በሁሉም ሴክሽኖች ሥራዎች የተሰሩ ሲሆን በተለይም በደጀን ሴክሽን ከዚህ በፊት ከነበረው በበለጠ መልኩ  ሰፊ ስራዎችን ማከናወን ተችሏል፡፡ በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et

የሀይቅ - ቢስቲማ - ጭፍራ መንገድ ግንባታ ለማፋጠን እየተሠራ ነው  አዲስ አበባ፣ ሐምሌ 09፣ 2017 (ኢ መ አ):- የአፋር እና የአማራ ክልሎችን የሚያገናኘው የሀይቅ - ቢስቲማ - ጭፍራ መንገድ ግንባታ ለማፋጠን እየተሠራ ነው። የመንገድ ፕሮጀክቱ 74 ነጥብ 3 ኪሎሜትር የሚሸፍን ኾኖ በአስፋልት ኮንክሪት ደረጃ በመገንባት ላይ ይገኛል። አሁን ላይ የግንባታው አጠቃላይ አፈጻጸም 40 ነጥብ 95 በመቶ ደርሷል። የአፈጻጸም ሂደቱን ይበልጥ አጠናክሮ ለማስቀጠል በትኩረት እየተሠራ ይገኛል። በእስካሁኑ የግንባታ ሥራዎች መካከል የጠረጋ፣ የአፈር ቁፋሮ፣ የአፈር ሙሌት፣ የማፋሰሻ ቱቦ፣ የተላያዩ የተፋሰስ ሥራዎች በመከናወን ላይ ናቸው። የ2 ድልድይ እንዲሁም የአነስተኛ እና ከፍተኛ ከልቨርቶች ሥራም የግንባታው አካል ነው። በተጨማሪም የአስፋልት ንጣፍ ሥራ ለማስጀመር የሚረዱ አስፈላጊ ጥረቶች በመደረግ ላይ ናቸው። አሁንም ድረስ ያልተፈቱ የወሰን ማስከበር ሥራዎች፣ አልፎ አልፎ የሚከሰቱ የጸጥታ ችግሮች እና የግብአት እጥረቶች የፕሮጀክቱ ፈተና ናቸው። ያጋጠሙ ችግሮች በሚፈቱበት ሁኔታ ላይ የተቀናጀ ጥረት እየተደረገ ይገኛል። የመንገድ ግንባታውን ሀገር በቀሎቹ ፓወርኮን ኮንስትራክሽን ከአሰር ኮንስትራክሽን ጋር በመተባበር ያከናውኑታል። የፕሮጀክቱን ጥራት እና ቁጥጥር ኮር ኮንሰልቲንግ ያከናውናል። ለፕሮጀክቱ 2 ነጥብ 1 ቢሊዮን ብር የተመደበ ሲኾን፥ ወጪው በፌደራል መንግስት በጀት ይሸፈናል። ነባሩ መንገድ ከ4 - 7 ሜትር ያልበለጠ የጎን ስፋት የነበረው እና በአገልግሎት ብዛት የተጎዳ በመኾኑ ለተጠቃሚው ምቹ አልነበረም። አሁን ላይ ግንባታው ደረጃውን ጠብቆ እየተከናወነ ሲኾን፣ ሲጠናቀቅ ከሀይቅ ተነስቶ ጭፍራ ከተማ ለመጓዝ ቀድሞ ይፈጅ የነበረውን 3 ሰዓት የጉዞ ጊዜ ወደ 1 ሰዓት ያሳጥረዋል። በፕሮጀክቱ ክልል የሚገኙ በርካታ ከተሞችን በማስተሳሰር ማኅበራዊ እና ምጣኔ ሀብታዊ ዕድገትን ያጠናክራል። በአካባቢው የሚበቅሉትን የማሽላ፣ ጫት እና የተለያዩ የፍራፍሬ ምርት ውጤቶች በቀላሉ በማጓጓዝ የንግድ እንቅስቃሴውን ያቀላጥፋል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የኤረር ጉዳ ወንዝ የብረት ድልድይ ግንባታ በአንድ ወር ጊዜ ውስጥ ለማጠናቀቅ እየተሠራ ነው ሐረር፣ ሐምሌ 07፣ 2017 (ኢ መ አ):- የአዲስ አበባ - ድሬዳዋ - ሐረር - ጅግጅጋ መንገድ የኤረር ጉዳ ወንዝ ጊዚያዊ የብረት ድልድይ ግንባታ በአንድ ወር ጊዜ ውስጥ አጠናቅቆ ለአገልግሎት ክፍት ለማድረግ እየተሠራ ነው። ከሐረር ከተማ በ12 ኪሎሜትር ርቀት ላይ የሚገኘው እና 45 ሜትር የሚረዝመው ነባሩ የኮንክሪት ድልድይ ባጋጠመው ከፍተኛ ጎርፍ የመካከለኛው ቋሚ (pier) ምሰሶዎች ተሸርሽረው ድልድዩ ሙሉ በሙሉ መፍረሱ ይታወቃል። በወቅቱ ሙሉ በሙሉ ከፈረሰው ድልድይ ትዩዩ የሚገኘው እና ለአገልግሎት ዝግ ተደርጎ የቆየው ሌላኛውን የኮንክሪት ድልድይ በድሬደዋ መንገድ ጥገና ዲስትሪክት በኩል አፋጣኝ ጥገና ተደርጎለት የትራፊክ እንቅስቃሴው እንዳይስተጓጎል ማድረግ ተችሏል። ነገር ግን በእርጅና ምክንያት ዝግ ተደርጎ የቆየው ይኸው ድልድይም ቢሆን የሚፈለገውን ጊዜ ያህል አገልግሎት መስጠት እንደማይችል ስለሚታወቅ ለአጭር ጊዜ ዕቅድ በሁለቱ ነባር ድልድዩች መካከል የብረት ድልድይ (Bailey bridge) መገንባት በማስፈለጉ ግንባታው እየተከናወነ ይገኛል። ይህ የብረት ድልድይ ጠቅላላ ርዝመቱ አርባ ሁለት (42) ሜትር እና አራት (4) ሜትር የጎን ስፋት ያለው ሲኾን፣ በአንድ ጊዜ በአንድ አቅጣጫ አንድ ተሽከርካሪ ማስተናገድ የሚያስችል ነው። ግንባታውን በኢትዮጵያ መንገዶች አስተዳደር የድሬዳዋ መንገድ ጥገና ዲስትሪክት እንዲሁም የድልድይና ስትራክቸር ዳይሬክቶሬት በጋራ እያከናወኑ ይገኛሉ። ከድልድዩ ዝርጋታ ጎን ለጎን በሁለቱም አቅጣጫ (በሐረር እና ባቢሌ) በኩል የመዳረሻ መንገዶች አፈር ሙሌት፣ የድጋፍ ግንብ ግንባታ እና ከአስፓልቱ ጋር የማመሳሰል ሥራዎች በመከናወን ላይ ናቸው። የሐረሪ፣ የኦሮሚያ እና የሶማሌ ክልሎችን የሚያስተሳስረው ይኸው ድልድይ በቋሚነት በኮንክሪት ለመገንባት የዲዛይን ሥራው ተጠናቅቆ የሥራ ተቋራጭ የተመረጠ ሲኾን፥ ሥራው በቀጣይ ዓመት ይጀመራል ተብሎ ይጠበቃል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads

የስራ ማስታወቂያ

ከ18 ማዞሪያ - አሸዋ ሜዳ - ኬላ መንገድ ፕሮጀክት በመፋጠን ላይ ነው አዲስ አበባ፣ ሰኔ 24፣ 2017 (ኢ መ አ):- ከ18 ማዞሪያ - አሸዋ ሜዳ - ኬላ ድረስ በመገንባት ላይ የሚገኘው የመንገድ ፕሮጀክት በመፋጠን ላይ ነው። 14 ነጥብ 72 ኪሎሜትር የሚሸፍነው የመንገድ ግንባታው፥ የአዲስ አበባ - አምቦ - ነቀምት መስመር አካል ሲሆን፥ መነሻውን በኮልፌ 18 ማዞሪያ አድርጎ ሸገር ከተማ አሸዋ ሜዳ በኩል ኬላ ድረስ ይዘልቃል። መንገዱ በከተማ መውጫ የሚፈጠሩ የትራፊክ መጨናነቆችን ለመቅረፍ ታልሞ ነው በመገንባት ላይ የሚገኘው። ነባሩ መንገድ ከ8 ሜትር ያልበለጠ እና ለአደጋ የተጋለጠ የነበረ ሲኾን፣ አሁን ላይ የመንገድ ፕሮጀክቱ የእግረኛና የብስክሌተኞች መንገድ እንዲሁም የመሮጫ መም (ትራክ)ን እና የመንገድ አካፋይን ጨምሮ አጠቃላይ 66 ሜትር የጎን ስፋት ይኖረዋል። ይህም የትራንስፖርት ፍሰቱን በማሳለጥ ማኅበራዊ እና ምጣኔ ሀብታዊ ትስስሩን የሚያጠናክር ነው። ከዚህም ባለፈ የከተሞችን ሁለንተናዊ ዕድገት በእጅጉ የሚያፋጥን ነው። የመንገድ ግንባታው በሁለት ሴክሽኖች ተከፍሎ የመጀመሪያው ክፍል በሀገር በቀሉ ብሪጅ ኮንስትራክሽን ሲሆን ሁሉተኛው ክፍል በኢትዮጵያ መንገዶች አስተዳደር የዓለምገና መንገድ ጥገና ዲስትሪክት በራስ ኃይል ግንባታው እየተከናውነ ይገኛል። ኢትዮ - ኢንጅነሪንግ ኮርፖሬት የቁጥጥር እና የማማከር ሥራውን ያከናውናል። በአሁኑ ሰዓት የዲዛይን፣ የአፈር ቆረጣ እና ሙሌት እንዲሁም የሰብቤዝ ሥራዎችን ጨምሮ በርካታ የተለያዩ የግንባታ ሥራዎች በመከናወን ላይ ናቸው። አጠቃላይ አፈጻጸሙም አሁን ላይ 20 በመቶ ደርሷል። በዚህ ዓመት መጨረሻ የአስፋልት ንጣፍ ሥራ ለመጀመር አስቻይ ሁኔታዎች በመከናወን ላይ ናቸው። ይህ ሀገራዊ ፕሮጀክት በተያዘለት ጊዜ እና ጥራት እንዲጠናቀቅ የየአካባቢው ማኅበረሰብ እና የመስተዳድር አካላት አስፈላጊውን ድጋፍ እና ትብብር እንዲያደርጉ የኢትዮጵያ መንገዶች አስተዳደር ይጠይቃል። በተጨማሪም › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢሜል communication@era.gov.et › ዩቲዮብ www.youtube.com/@ethioroads