ERA ኢትዮጵያ መንገዶች አስተዳደር

የሶዶ - አረካ መገንጠያ እና የሶዶ ከተማ - ዎሊ መንገድ ግንባታ 78.02 በመቶ ደረሰ   አዲስ አበባ፣ ህዳር 1 /2019 ዓ.ም (ኢመአ):- በደቡብ ኢትዮጵያ ክልል ወላይታ ዞን የሶዶ - ታርጫ መንገድ ፕሮጀክት አካል የሆነው የሶዶ - አረካ መገንጠያ እና የሶዶ ከተማ - ዎሊ ምዕራፍ-3 መንገድ ግንባታ 78.02 በመቶ ደረሰ። የከተማ መንገዱ 12 ነጥብ 39 ኪሎ ሜትር የሚሸፍን ሲሆን፣የመንገድ ግንባታ ፕሮጀክቱ በሁለት ሎት ተከፍሎ እየተሰራ ሲሆን  ሎት 1 ከሌዊ እስከ ሶዶ ግብርና ኮሌጅ(7.14) ኪሎ ሜትር ፣ ሎት 2 ከጦና አደባባይ እስከ አረካመውጫ መገንጠያ ድረስ (5.25) ኪ.ሜትር  የሚዘልቅ ነው።   በእስካሁኑ  የስራ ሂደት 12.39 ኪ.ሜ የመንገድ ጠረጋ ፣ የአፈር ቆረጣና ሙሌት፣ የ1.2 ኪ.ሜ የካፕንግ፣ የ7.15 ኪ.ሜ የሰብ ቤዝ፣ የ4.3. ኪ.ሜ የቤዝ ኮርስ እንዲሁም የ3.15 ኪ.ሜ አስፋልት ስራ የተጠናቀቀ ሲሆን ከዚህ በተጨማሪ 2 ቦክስ ካልቨርቶች፣ 5 ስላብ ካልቨርት እና 7.15 ኪ.ሜ  የውሃ ማፋሰሻ ቱቦዎች ግንባታ እና በ4.84ኪ.ሜ የዉሃ ማፍሰሻ ዲች እንዲሁም በርካታ የስትራክቸር ስራዎች በመሰራት ላይ ይገኛል፡፡ ለፕሮጀክቱ ግንባታ የሚሆን ሁለት ቢሊዮን ስድስት መቶ ሃያ ሚሊዮን አስር ሺህ ሰባት መቶ ስምንት ብር ከአርባ ስድስት ሳንቲም (2,620,010,708.46)በሆነ  ወጪ በፌደራል መንግስት ሙሉ በሙሉ ተሸፍኗል።     ግንባታውን የሚያከናውነው ዓለም-አቀፉ ቻይና ፈርስት ሀይዌይ እንጂነሪንግ ኮ. ሊሚትድ ሲሆን የጥራት እና ቁጥጥር ሥራውን ደግሞ  በሀገር-በቀሎቹ ጂ እና ዋይ ኢንጅነሪንግ ከደውል ኮንሰልቲንግ ኢንጅነርስ ጋር በጋራ እያከናወኑት ይገኛል።   ይህ የመንገድ ፕሮጅክት ግንባታ ከሚሰጠው ማህበራዊና ኢኮኖሚያዊ ጠቀሜታ አንጻር በአስፋልት ኮንክሪት እየተገባ ይገኛል።   የመንገድ ፕሮጀክቱ ተገንብቶ ሲጠናቀቅ በአካባቢው ለረጅም ጊዜ የነበረውን የሶዶ ከተማ ትራፊክ ፍሰት መጨናነቅ በመቅረፍ የከተማ ዉስጥ ለዉስጥ እንቅስቃሴ እና ከከተማ ለመዉጣትም ሆነ ወደ ከተማ ለመግባት ያለውን የጉዞ ጊዜ የሚያሳጥር ይሆናል። በወላይታ ዞን እና አጎራባች ዞኖች በስፋት የሚመረቱትን እንደ ቡና፣ ለውዝ፣ በቆሎ፣ ስንዴ፣ ጤፍ እና ቅቤ ያሉ የግብርና ምርቶችን በቀላሉ ወደ መሃል ገበያ ለማቅረብ የጎላ ሚና ይጫወታል። ከዚህም በተጨማሪ መንገዱ አጎራባች ላይ ላሉ የአርባምንጭ፤ ደቡብ ኦሞ እንዲሁም ለአጆራ ፏፏቴ የቱሪዝም መዳረሻ በመሆን ለሀገር ውስጥ ገቢ ትልቅ አቅምን  ይፈጥራል። የፕሮጀክቱ የጎን ስፋት በከተማ 34.0 ሜትር ሲሆን  በቀበሌ 13.80 ሜትር ስፋት እንዲኖረው ተደርጎ እየተገነባ ይገኛል ። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads

የዓለም የጥራት ቀን

የሚኤሶ - ሒርና መንገድ ከባድ ጥገና እየተደረገለት ነው አዲስ አበባ፣ ጥቅምት 27/2019 (ኢመአ)፦ የኢትዮ-ጅቡቲ ትራንስፖርት ኮሪደር አካል ለሆነው የሚኤሶ - ሒርና 69 ኪሎ ሜትር መንገድ፣ የመስመሩን ከፍተኛ የትራፊክ ፍሰት በብቃት ማስተናገድ እንዲያስችል የከባድ ጥገና ሥራ እየተከናወነለት ይገኛል። ይህ የትራንስፖርት መስመር የወጪና ገቢ ንግድ በከፍተኛ ሁኔታ የሚከናወንበት እና የከባድ ጭነት ተሽከርካሪዎች በብዛት የሚመላለሱበት በመሆኑ፣ ከቀላል እስከ ከፍተኛ ደረጃ የሚደርስ ጉዳት አስተናግዶ ቆይቷል። ይህንን ችግር በዘላቂነት ለመቅረፍ የተጀመረውን የከባድ ጥገና ፕሮጀክት ሀገር በቀሉ "ዮንአብ ኮንስትራክሽን" እያከናወነው ሲሆን፣ የጥራት ቁጥጥርና የማማከር ሥራውን ደግሞ "ሃይዌይ ኢንጅነርስ ኤንድ ኮንሰልታንትስ" በመሥራት ላይ ይገኛል። የጥገና ፕሮጀክቱ የተጎዱ የመንገድ ክፍሎችን ለይቶ መቁረጥና በአስፋልት የመደረብ፣ የአነስተኛና ከፍተኛ ከልቨርቶች (የውኃ ማፋሰሻ ቱቦዎች) እንዲሁም የድልድዮች ግንባታ ሥራዎችን ያካተተ ነው። ከዚሁ ጎን ለጎን በአሁኑ ወቅት በጭሮ ከተማ ውስጥ የአፈር ቆረጣና ሙሌት፣ የመፋሰሻ ቱቦ ዝርጋታ፣ የመንገድ ማስፋት፣ የእግረኛ መንገድ ግንባታ እንዲሁም አጠቃላይ የከተማዋን ውበት የሚያሳድጉ ሥራዎች እየተሠሩ ይገኛሉ። የመንገዱ መጠገን የአሽከርካሪዎችን የጉዞ ጊዜ በከፍተኛ ሁኔታ ከመቀነሱና እንግልትን ከመቅረፉ ባለፈ፣ የሀገሪቱን የወጪና ገቢ ንግድ ፍሰት በከፍተኛ ደረጃ ያቀላጥፋል። ይህ የኮሪደሩ የከባድ ጥገና ሥራ በተመሳሳይ መልኩ እስከ ቁልቢ - ደንገጎ እና ድሬዳዋ ድረስ በተለያዩ ክፍሎች ተከፋፍሎ የሚቀጥል ይሆናል። በሌላ በኩል፣ ቀጠናው ያለውን ከፍተኛ የትራፊክ ፍሰት በዘላቂነት ለመፍታት የሚያስችል የፍጥነት መንገድ ግንባታ ከአዳማ እስከ ድሬዳዋ ባለው መስመር በመከናወን ላይ ይገኛል። ከነዚህም መካከል የአዳማ - አዋሽ ምዕራፍ አንድ (ከአዳማ እስከ 60 ኪሎ ሜትር) የፍጥነት መንገድ ግንባታ በአሁኑ ወቅት በጥሩ አፈጻጸም ላይ የሚገኝ ሲሆን፣ የዚሁ ፕሮጀክት ቀጣይ ክፍል የሆነውን የመልካጅሎ - አዋሽ 67 ኪሎ ሜትር ፍጥነት መንገድ ግንባታ ለማስጀመር የሚያስችለው የፋይናንስ ምንጭ ከአፍሪካ ልማት ባንክ መገኘቱ ይታወሳል። በተጨማሪም የዚሁ መስመር አካል የሆነው የ144 ነጥብ 5 ኪሎ ሜትሩ የሚኤሶ - ድሬዳዋ ፍጥነት መንገድ ግንባታ በቅርቡ መጀመሩ ይታወቃል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads

የባሕር ዳር  ዓባይ ወንዝ ድልድይ መዳረሻ መንገድ ግንባታ ሥራ 95 በመቶ ተጠናቀቀ አዲስ አበባ፣ ጥቅምት 24/2019 (ኢ መ አ):- በሀገራችን በዓይነቱ እና በዘመናዊነቱ የመጀመሪያ የኾነው የአዲሱ የባሕር ዳር ዓባይ ወንዝ ድልድይ መዳረሻ መንገድ ግንባታ ሥራ 95 በመቶው የተጠናቀቀ ሲኾን፥ ቀሪ ውስን ሥራዎችን በአጭር ጊዜ ውስጥ ለማጠናቀቅ በትኩረት እየተሠራ ነው። ዋናው የመዳረሻ መንገድ መነሻውን ከሄኒ ጋርደን መገንጠያ አድርጎ እስከ ጎንደር ዘንዘልማ መውጫ ድረስ የሚዘልቅ ሲኾን፥ በአጠቃላይ 4 ነጥብ 72 ኪሎ ሜትር ይረዝማል። መንገዱ የአውቶቡስ እና የታክሲ መቆሚያዎችን ጨምሮ 59 ሜትር የጎን ስፋት ያለው ሲኾን፥ በግራና በቀኝ 3 ተሽከርካሪዎችን በተመሳሳይ ጊዜ (በአጠቃላይ 6 ተሽከርካሪዎችን) የማስተናገድ አቅም አለው። ከዚህም ባለፈ የመኪና ማቆሚያ ቦታ፣ የእግረኛ መንገድ፣ የመንገድ ዳር ምልክቶች እና መብራቶች እንዲሁም የመሐል አካፋይ እና የመንገድ ዳር አረንጓዴ ሥፍራዎችን አካትቶል። እስከ አሁን ባለው የግንባታ ሥራ ከአፈር ቆረጣ እና ሙሌት፣ የመፋሰሻ ቱቦዎች ዝርጋታ፣ የሰብቤዝ እና ቤዝኮርስ ማንጠፍ፣ ሁለት ደረጃ የአስፓልት ንጣፍ፣ የቀለም፣ የእግረኛ መንገድ ጋር የተያያዙ ዋና ዋና ሥራዎች ተጠናቅቀዋል። ከዚህም ባለፈ 800 ሜትር የሚረዝመው እና 4 መኪና ጎን ለጎን ማስተናገድ የሚያስችለው የቤዛዊት መንገድ እና መወጣጫ ድልድዮች ግንባታ ሥራ ሙሉ በሙሉ በሚባል ደረጃ ተጠናቅቋል። አሁን ላይ የፕሮጀክቱ ቀሪ ሥራዎች የጎንደር ዘንዘልማ መገንጠያ መንገድ መጋጠሚያ፣ ውስን የአስፓልት ድራቢዎች፣ የመንገድ ዳር መብራት እንዲሁም ትናንሽ የመገንጠያ መንገዶች ግንባታ በመከናወን ላይ ናቸው፡፡ የመንገድ ፕሮጀክቱን ሀፍኮን ኮንስትራክሽን ከክሮስላንድ ኮንስትራክሽን ጋር በጥምረት እያከናወኑ ሲኾን፥ ስታዲያ ኢንጅነሪንግ የማማከር እና የቁጥጥር ሥራውን በማከናወን ላይ ይገኛል። ለፕሮጀክቱ ማስፈጸሚያ የሚኾን 825 ሚሊዮን ብር በፌደራል መንግሥት ተመድቧል። መዳረሻ መንገዱ የኢትዮ ሱዳን ዋና መስመር የሆነው የአዲስ አበባ - ባህርዳር - ጎንደር-መተማ  መንገድ አንዱ ክፍል ነው፡፡ ከጥቂት ዓመታት በፊት በይፋ ተመርቆ አገልግሎት መስጠት የጀመረውን አዲሱንና ዘመናዊውን የዓባይ ወንዝ ድልድይ ከዋናው አውራ ጎዳና ጋር በቀጥታ የሚያገናኝ በመሆኑ ከፍተኛ የኢኮኖሚ ጠቀሜታ አለው። ከዚህም ባሻገር በአገልግሎት ብዛት የተጎዳውን  ነባር  የባህር ዳር ዓባይ ወንዝ ድልድይ የትራፊክ ጫና ሙሉ ለሙሉ በሚባል ደረጃ ያስተነፍሳል ተብሎ ይጠበቃል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads

የኢትዮጵያ መንገዶች አስተዳደር የ75ኛ ዓመት የአልማዝ ኢዮቤልዩ በዓል በዓለምገና መንገድ ጥገና ዲስትሪክት ተከበረ ዓለምገና፣ ጥቅምት 21 ቀን 2019 ዓ.ም (ኢመአ)፦ የኢትዮጵያ መንገዶች አስተዳደር የተመሠረተበትን 75ኛ ዓመት የአልማዝ ኢዮቤልዩ በዓል የዓለምገና መንገድ ጥገና ዲስትሪክት እና የመንገድ አውታር የሥራ ኃላፊዎች፣ ሠራተኞች እንዲሁም ተጋባዥ እንግዶች በተገኙበት በዓለምገና ከተማ በድምቀት አከበረ። በክብረ በዓሉ ላይ የዓለምገና መንገድ ጥገና ዲስትሪክት ሥራ አስኪያጅ ኢንጂነር ተመስገን አለማየሁ ባደረጉት ንግግር፤ የኢትዮጵያ መንገዶች አስተዳደር ለሀገራችን ብዙ ውለታ የዋለ ታላቅ ተቋም መሆኑን ገለጹ። የሚመሩት ዲስትሪክትም ሀገሪቱን በመንገድ ኔትዎርክ ለማስተሳሰር ከፍተኛ አስተዋፅኦ ማበርከቱን አብራሩ። አክለውም ዲስትሪክቱ በተለያዩ ክልሎች፣ ዞኖች፣ ወረዳዎችና ከተማዎች ከ4 ሺህ 400 ኪሎ ሜትር በላይ የሆኑ የጠጠርና የአስፋልት መንገዶችን፣ ከ4 ሺህ 300 በላይ ድልድዮችና ፉካዎችን የመጠገን፣ የመልሶ ግንባታና የማስተዳደር ኃላፊነት ተሸክሞ በትጋት እየሠራ እንደሚገኝ አስታወቁ። በዚሁ ክብረ በዓል ወቅት የዓለምገና መንገድ አውታር አስተዳደር ዳይሬክተር ኢንጂነር ፍፁም ነብዩ በበኩላቸው "ዛሬ የምናከብረው በዓል ያለፉትን ዓመታት የምናስታውስበት ብቻ ሳይሆን ለወደፊት የሚጠበቅብንን ኃላፊነት በአግባቡ ለመወጣት ቃል የምንገባበትም ቀን ነው" ብለዋል። የገላን ጉዳ ክፍለ ከተማ አስተዳደርን ወክለው የተገኙት አቶ አበበ  አመንሲሳ የኢትዮጵያ መንገዶች አስተዳደር ሠራተኞች በርካታ ፈተናዎችን በጽናት በማለፍ አሻራቸውን በማሳረፋቸው ያላቸውን አድናቆት ገልጸዋል። በኢትዮጵያ መንገዶች አስተዳደር የመንገድ ጥገና ዳይሬክተር ኢንጂነር ጌትነት ዘለቀ በበኩላቸው ይህን በዓል ስናከብር የቀድሞ ባለሙያዎች፣ መሐንዲሶች፣ ቴክኒሻኖች፣ የኦፕሬሽን ባለሙያዎች፣ የመንገድ ጥገና ሠራተኞችና ሌሎች የተቋሙ ሠራተኞች ያሳዩትን ትጋትና የከፈሉትን መስዋዕትነት በአክብሮት ማስታወስ ይገባል ብለዋል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads

የኢትዮጵያ መንገዶች አስተዳደር 75ኛ ዓመት የአልማዝ ኢዮቤልዩ በዓል በጎዴ ከተማ ተከበረ ጎዴ፣ ጥቅምት 11/2019 (ኢመአ)፦ የኢትዮጵያ መንገዶች አስተዳደር የተመሠረተበትን 75ኛ ዓመት የአልማዝ ኢዮቤልዩ በዓል፤ የጎዴ መንገድ ጥገና ዲስትሪክት፣ የመንገድ ኔትወርክና የመንገድ ፕሮጀክት ማኔጅመንት ጽሕፈት ቤት የሥራ ኃላፊዎችና ሠራተኞች እንዲሁም ተጋባዥ እንግዶች በተገኙበት በጎዴ ከተማ በድምቀት አክብሯል። በክብረ በዓሉ ላይ ንግግር ያደረጉት የጎዴ መንገድ ጥገና ዲስትሪክት ሥራ አስኪያጅ ኢንጂነር ሌሊሳ ጌቱ እንደገለጹት፤ የኢትዮጵያ መንገዶች አስተዳደር ባለፉት በርካታ ዓመታት በብዙ ፈተናዎችና ውጣ-ውረዶች ውስጥ አልፎ በክልሉ የገነባቸው የመንገድ መሠረተ-ልማቶች ለክልሉ ኢኮኖሚያዊና ማኅበራዊ ዕድገት ቁልፍ ሚና ተጫውተዋል። ተቋሙ የክልሉን ፍትሐዊ የመንገድ ተጠቃሚነት ይበልጥ ለማረጋገጥ በአሁኑ ወቅት በርካታ የመንገድ ግንባታ ፕሮጀክቶችን እያካሄደ መሆኑን ኢንጂነር ሌሊሳ ጠቅሰዋል። የክልሉን የመንገድ መሠረተ-ልማት መስፋፋትና ሁለንተናዊ ዕድገት ታሳቢ በማድረግ፣ ተቋሙ 11ኛ ዲስትሪክቱን በጎዴ ከተማ ማቋቋሙ ከፍተኛ ጠቀሜታ እንዳለውም አስረድተዋል። የጎዴ ከተማ አስተዳደር ሥራ አስኪያጅና የከንቲባ ተወካይ ኢንጂነር ሹክሪ ሑሴን በበኩላቸው፤ የኢትዮጵያ መንገዶች አስተዳደር በአገሪቱ ታሪክ አንጋፋና ግዙፍ ተቋም መሆኑን ጠቅሰዋል። ተቋሙ ለክልሉ ብሎም ለጎዴ ከተማ የዋለው ውለታ ምንጊዜም ከሕዝብ ልብ የሚጠፋ እንዳልሆነ ገልጸው፣ በቀጣይ ለሚከናወኑ ሥራዎች የከተማ አስተዳደሩ አስፈላጊውን ድጋፍ እንደሚያደርግ አረጋግጠዋል። የኢትዮጵያ መንገዶች አስተዳደር በመላው ኢትዮጵያ ከሚገኙ ዲስትሪክቶች ውስጥ 11ኛው በመሆን በ2015 ዓ.ም የተቋቋመው የጎዴ መንገድ ጥገና ዲስትሪክት፤ በሶማሌ ክልልና በአካባቢው የሚገኙ መንገዶችን የመጠገንና የመንከባከብ ከፍተኛ ኃላፊነት ተጥሎበታል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads

የኢትዮጵያ መንገዶች አስተዳደር የድሬዳዋ የመንገዶች ጥገና ዲስትሪክት፣ የመንገድ ኔትወርክ እና የመንገድ ፕሮጀክት ማኔጅመንት ጽ/ቤት የተቋሙን 75ኛ ዓመት የአልማዝ እዮቤልዩ በዓል በጋራ አከበሩ ድሬዳዋ፣ ጥቅምት 12 ቀን 2019 ዓ.ም (ኢመአ)፦ የኢትዮጵያ መንገዶች አስተዳደር የተመሰረተበት 75ኛ ዓመት የአልማዝ እዮቤልዩ በዓል በድሬዳዋ መንገድ ጥገና ዲስትሪክት፣ በመንገድ አውታር (ኔትወርክ) አስተዳደር ቅርንጫፍ ጽሕፈት ቤት እና በፕሮጀክት ማኔጅመንት ጽሕፈት ቤቶች በጋራ አዘጋጅነት በደማቅ ሥነ-ሥርዓት ተከበረ። በጋራ በተሰናዳው በዚህ ታሪካዊ የክብረ-በዓል መድረክ ላይ የድሬዳዋ ከተማ አስተዳደር ከፍተኛ የመንግሥት የሥራ ኃላፊዎች፣ የዲስትሪክቱ ሠራተኞች፣ የድሬዳዋ መንገድ አውታር አስተዳደር ቅርንጫፍ ጽሕፈት ቤት፣ የድሬዳዋ፣ የጅግጅጋ እና የጎዴ ግንባታ ፕሮጀክቶች ማስተባበሪያ ጽሕፈት ቤቶች የሥራ ኃላፊዎችና ባለሙያዎች እንዲሁም ጥሪ የተደረገላቸው አጋር አካላት ታድመዋል። በዕለቱ በክብር እንግድነት ተገኝተው ንግግር ያደረጉት የድሬዳዋ ከተማ ከንቲባ ጽሕፈት ቤት እና የካቢኔ ጉዳዮች ኃላፊ አቶ ሙስጠፋ መሐመድ፤ ድሬዳዋ የወጪና ገቢ ንግድ የሚከናወንበት ዋና መሥመር እንዲሁም የነጻ ገበያ ቀጠና መገኛ መሆኗን አስታወቁ። በመሆኑም ዲስትሪክቱ፣ የመንገድ አውታሩና የፕሮጀክት ጽሕፈት ቤቱ በጋራ በመሆን የአካባቢው የንግድና የትራንስፖርት እንቅስቃሴ ላፍታም እንዳይቋረጥ በማድረግ ረገድ የማይተካ ሚና እየተጫወቱ እንደሚገኙ ገለጹ። የከተማ አስተዳደሩ ከእነዚህ የልማት መዋቅሮች ጋር ያለው አጋርነት ተጠናክሮ እንደሚቀጥል ያረጋገጡት አቶ ሙስጠፋ፤ የአካባቢውን ሆነ የሀገሪቱን የልማት ውጥኖች ዕውን ለማድረግ ወደፊትም አስፈላጊውን ድጋፍ ሁሉ ያደርጋሉ፤ ለመላው የተቋሙ ሠራተኞችና መሐንዲሶችም ለሀገር ውለታቸው የላቀ ምስጋና አቅርበዋል። የድሬዳዋ መንገድ ጥገና ዲስትሪክት ሥራ አስኪያጅ ኢንጅነር ሙሉቀን ዘርጋው በበኩላቸው፤ የኢትዮጵያ መንገዶች አስተዳደር ሲቋቋም ከነበረበት ውስን የመንገድ ሽፋን ተነስቶ ዛሬ ላይ ሰፊና ዘመናዊ የመንገድ አውታር መዘርጋት መቻሉን አብራሩ። በዚህ ሂደት ውስጥ የድሬዳዋ ዲስትሪክት የሀገሪቱ የኢኮኖሚ ጀርባ አጥንት የሆኑትን እንደ አዋሽ-ድሬዳዋ እና አዋሽ-ሚሌ ያሉ የኢትዮ-ጂቡቲ የመንገድ ኮሪደሮች ሳይዘጉ በትጋትና በንቃት ዘብ እየጠበቀ እንደሚገኝ አስገነዘቡ። አያይዘውም በከፍተኛ የሀገር ሀብት የተገነቡ መንገዶችን በጥራት መጠበቅ፣ የመንገድ ደኅንነትን ማስከበር እና የሕዝብ ሀብትን በኃላፊነት በመጠቀም ለቀጣዩ ትውልድ ማስተላለፍ የሁሉም የጋራ ኃላፊነት ሊሆን እንደሚገባ ኢንጅነር ሙሉቀን መልዕክት አስተላልፈዋል። የድሬዳዋ መንገድ ጥገና ዲስትሪክት በአምስት ክልሎች እና ከተማ አስተዳደሮች ሥር የሚገኙ ማኅበረሰቦችን የሚያስተሳስር ሰፊ የመንገድ አውታር ያስተዳድራል። ተቋሙ በደንገጎ፣ በሂርና፣ በአዋሽ እና በጅጅጋ/ቀብሪደሃር ሴክሽኖቹ አማካኝነት ድንገተኛ የጎርፍ እና የመሬት መንሸራተት አደጋዎች ሲከሰቱ በራስ-ኃይል ፈጣን ምላሽ በመስጠት የትራንስፖርት ፍሰቱ እንዳይስተጓጎል በቁርጠኝነት ይሠራል። በተጨማሪ › አጭር መልዕክት 8561 › ፖስታ ሳጥን ቁጥር 1770 › ድህረገጽ www.era.gov.et › ፊስቡክ https://www.facebook.com/www.era.gov.et › ቴሌግራም https://t.me/ethioroads › ትዊተር https://twitter.com/EthiopiaRoadsAd › ኢንስታግራም https://www.instagram.com/ethioroads › ኢሜል communication@era.gov.et › ዩቲዮብ www.youtube.com/@ethioroads