Mandalay Police CDM Fighter

မြန်မာစစ်တပ်က သူတို့ အလိုရှိနေသူများ ထိုင်းနိုင်ငံတွင် နေထိုင်နေမှုအပေါ်  အရေးယူဆောင်ရွက်နိုင်ရေး နေပြည်တော်လျှို့ဝှက်လာရောက်သော ထိုင်းအစိုးရ ကိုယ်စားလှယ်အဖွဲ့ထံသို့ တောင်းဆို၊ ဒုစစ်ခေါင်းဆောင်ဟောင်း စိုးဝင်းနှင့် ဒုဗိုလ်ချုပ်ကြီးညွန့်ဝင်းဆွေ အပါအဝင် မြန်မာစစ်တပ်အရာရှိများကို ထိုင်းကိုယ်စားလှယ်အဖွဲ့ တွေ့ဆုံ ရန်ကုန်၊ ဇူလိုင် ၂၇ မြန်မာစစ်တပ်က သူတို့ အလိုရှိနေသူများ ထိုင်းနိုင်ငံတွင် နေထိုင်နေမှုအပေါ်  အရေးယူဆောင်ရွက်နိုင်ရေး နေပြည်တော်လျှို့ဝှက်လာရောက်သော ထိုင်းအစိုးရ ကိုယ်စားလှယ်အဖွဲ့ထံသို့ တောင်းဆိုခဲ့ကြောင်း နေပြည်တော်စစ်ဘက်သတင်းရင်းမြစ်ထံမှ သိရှိရသည်။ ဇူလိုင်လ ၂၅ ရက်နေ့  ထိုင်းဘုရင့်အတိုင်ပင်ခံကောင်စီဝင် ဒုဝန်ကြီးချုပ်ဟောင်း ဗိုလ်ချုပ်ကြီး General Paiboon Koomchayaနှင့်ထိုင်းဒုတိယရဲချုပ်တို့ နေပြည်တော်သို့ လျှို့ဝှက်ခရီးစဉ်အဖြစ် နေ့ချင်းပြန်လာရောက်ခဲ့ကြပြီး မြန်မာစစ်တပ်က ယင်းသတင်းကို ထုတ်ပြန်ခြင်းမရှိဘဲ လျှို့ဝှက်ထားခဲ့ပြီး ထိုင်းသတင်းဌာနတချို့ကမူ သတင်းဖော်ပြခဲ့ကြသည်။ "နေပြည်တော်ပြည်ထဲရေးဝန်ကြီးက သူတို့ အလိုရှိနေတဲ့သူတွေကို ထိုင်းဘက်က ပေးနိုင်မလားဆိုတာမျိုးတောင်းတယ်။ ထိုင်းဘက်တော့ အဲဒါကို ဘာမှ မတုံ့ပြန်ဘူး။ ထိုင်းဘက်က လာရောက်တာနဲ့ သူတို့တောင်းဆိုတာက  မူးယစ်ဆေးဝါး၊ ကျားဖြန့်နဲ့ နယ်စပ်ဖြတ်ကျော် ရာဇဝတ်မှုတွေကို တိုက်ဖျက်ရေး ပူးပေါင်းဆောင်ရွက်ဖိုပ လာဆွေးနွေးတာ " ဟု နေပြည်တော်စစ်ဘက်သတင်းရင်းမြစ်က ပြောဆိုသည်။ ထိုင်းအခြေစိုက် Khaosod သတင်းဌာန၏ ဖော်ပြချက်အရ  ထိုင်းအစိုးရကိုယ်စားလှယ်အဖွဲ့နှင့် စစ်ကောင်စီတို့ မူးယစ်ဆေးဝါးတိုက်ဖျက်ရေး ပူးပေါင်းဆောင်ရွက်မှု ဆွေးနွေးခဲ့ပြိး  မြန်မာတွင် ခိုအောင်းနေသော မူးယစ်တရားခံများကို ဖမ်းဆီးလွှဲပြောင်းပေးရန် ထိုင်းက တောင်းဆိုကြောင်း ဖော်ပြထားသည်။ ဇူလိုင် ၂၅ ရက်နေ့ ထိုင်းနိုင်ငံမှ လုံခြုံရေးနှင့် မူးယစ်ဆေးဝါးတိုက်ဖျက်ရေး တာဝန်ရှိသူများကိုယ်စားလှယ်အဖွဲ့သည် နေပြည်တော်သို့ သွားရောက်ကာ စစ်ကောင်စီတာဝန်ရှိသူများနှင့် တွေ့ဆုံ၍ နယ်စပ်ဖြတ်ကျော် မူးယစ်ဆေးဝါးကွန်ရက်များကို နှိမ်နင်းရေးနှင့် ဒေသတွင်း မူးယစ်ဆေးဝါးပြဿနာ ဖြေရှင်းရေးဆိုင်ရာ ပူးပေါင်းဆောင်ရွက်မှုများကို ဆွေးနွေးခဲ့ကြောင်း ထိုင်းသတင်းဌာန Khaosod က ဖော်ပြသည်။ ထိုင်းကိုယ်စားလှယ်အဖွဲ့ကို ဒုတိယဝန်ကြီးချုပ်ဟောင်း ဗိုလ်ချုပ်ကြီး ပိုင်ဘွန်း ခွမ်ချာယာ၊ တရားရေးဝန်ကြီး၊ ထိုင်းအမျိုးသားရဲတပ်ဖွဲ့ ဒုတိယရဲချုပ်၊ မူးယစ်ဆေးဝါးနှိမ်နင်းရေးဗျူရို အကြီးအကဲများနှင့် မူးယစ်ဆေးဝါးထိန်းချုပ်ရေးအဖွဲ့ (ONCB) တာဝန်ရှိသူများက ဦးဆောင်ခဲ့ကြောင်း သိရသည်။ ထိုင်းကိုယ်စားလှယ်အဖွဲ့က ဇူလိုင်လ ၂၅ ရက်နေ့ နံနက်ပိုင်းတွင် စစ်ကောင်စီ ပြည်ထဲရေးဝန်ကြီး ဒုတိယဗိုလ်ချုပ်ကြီး ညွန့်ဝင်းဆွေ၊ ပြည်ထဲရေးဒုတိယဝန်ကြီး၊ စစ်ကောင်စီရဲတပ်ဖွဲ့ ဒုတိယရဲချုပ်နှင့် မူးယစ်ဆေးဝါးဆိုင်ရာ တာဝန်ရှိသူများကို တွေ့ဆုံခဲ့ပြီး၊ မွန်းလွဲပိုင်းတွင်လည်း ဒုစစ်ခေါင်းဆောင်ဟောင်း  ပြည်ထောင်စုအတိုင်ပင်ခံကောင်စီ ဥက္ကဋ္ဌ  စိုးဝင်းနှင့် ကောင်စီအဖွဲ့ဝင်များကို ထပ်မံတွေ့ဆုံခဲ့ကြောင်း သိရှိရသည်။ အဆိုပါ ဆွေးနွေးပွဲတွင် ထိုင်းဘက်က မြန်မာနိုင်ငံအတွင်း ထွက်ပြေးတိမ်းရှောင်နေသည့် ထိုင်းနိုင်ငံ၏ အရေးကြီး မူးယစ်ဆေးဝါးအမှု တရားခံပြေးများကို လိုက်လံဖမ်းဆီးပေးရန်၊ ထိုင်းနိုင်ငံမှ တင်ပို့သည့် မူးယစ်ဆေးဝါးထုတ်လုပ်ရာတွင် အသုံးပြုနိုင်သည့် ဓာတုကုန်ကြမ်းများကို စက်မှုလုပ်ငန်းများတွင် မှန်ကန်စွာ အသုံးပြုနေခြင်း ရှိ၊ မရှိ စစ်ဆေးပေးရန်နှင့် နယ်စပ်လမ်းကြောင်းများမှတစ်ဆင့် ဓာတုကုန်ကြမ်းများကို မူးယစ်ဆေးဝါးထုတ်လုပ်ရန် တရားမဝင် သယ်ဆောင်မှုများကို တားဆီးပေးရန် တောင်းဆိုခဲ့ကြောင်း သိရသည်။ စစ်ကောင်စီဘက်ကလည်း ထိုင်းနိုင်ငံ၏ တောင်းဆိုချက်များကို ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့ပြီး၊ မြန်မာဘက်မှ မူးယစ်ဆေးဝါးတိုက်ဖျက်ရေး ဝန်ထမ်းများကို လေ့ကျင့်သင်ကြားပေးရန်၊ စစ်ဆေးရေးဆိုင်ရာ နိုင်ငံတကာအဆင့်မီ ကိရိယာများ ထောက်ပံ့ပေးရန် ထိုင်းဘက်သို့ ပြန်လည်တောင်းဆိုခဲ့ကြောင်း ဖော်ပြထားသည်။ နှစ်ဖက်တာဝန်ရှိသူများသည် ရှေ့ဆက်၍ အနီးကပ်ဆက်သွယ်ညှိနှိုင်းနိုင်ရန် ဆက်သွယ်ရေးတာဝန်ခံများ သတ်မှတ်ကာ သတင်းအချက်အလက်များ အပြန်အလှန်ဖလှယ်သွားမည်ဟုလည်း သဘောတူခဲ့ကြောင်း သိရသည်။ ထိုင်းအမျိုးသားရဲတပ်ဖွဲ့ ဒုတိယရဲချုပ် ရဲချုပ်ကြီး ဆမ်ရန် နွမ်မာက ယခုတွေ့ဆုံဆွေးနွေးမှုသည် နှစ်နိုင်ငံ လုံခြုံရေးအဖွဲ့အစည်းများအကြား ဒေသတွင်း မူးယစ်ဆေးဝါးနှိမ်နင်းရေးကို အလေးအနက် ပူးပေါင်းဆောင်ရွက်သည့် အရေးပါသော ခြေလှမ်းတစ်ရပ်ဖြစ်ကြောင်း၊ ယင်းပူးပေါင်းဆောင်ရွက်မှုကြောင့် အနာဂတ်တွင် ထိုင်းနိုင်ငံမှ ဓာတုကုန်ကြမ်းများကို မူးယစ်ဆေးဝါးထုတ်လုပ်ရန် တရားမဝင် သယ်ဆောင်နိုင်မှုများကို ထိရောက်စွာ တားဆီးနိုင်မည်ဖြစ်သလို အရေးကြီး မူးယစ်တရားခံများကိုလည်း ဖမ်းဆီးအရေးယူနိုင်မည်ဟု ယုံကြည်ကြောင်း ပြောကြားကြောင်း သိရှိရသည်။ Telegram Link https://t.me/MCPFighter Mandalay Police CDM Fighter