Azattyq - Азаттық

🇺🇸 АҚШ Сенаты Джей Клейтонды Ұлттық барлау директоры қызметіне бекітті 🆕 Джей Клейтонды Ұлттық барлау (DNI) директоры қызметіне бекітуді 51 сенатор қолдап, 47 сенатор қарсы дауыс берді. ⭐️ Клейтон өткен айда қызметінен кеткен Тулси Габбардтың орнына келді. Бұған дейін Габбард күйеуіне қатерлі ісік диагнозы қойылғаннан кейін отставкаға кетуді ұйғарған деп хабарланған. 🔖 Дауыс беру қорытындысынан кейін президент Дональд Трамп Клейтонды Truth Social желісінде құттықтап, оның жаңа қызметті "өте жақсы атқаратынына" сенім білдірді. Клейтонның барлау саласындағы тәжірибесі шектеулі болғанымен, ол директор міндетін уақытша атқарған Билл Пултеге қарағанда қолайлы кандидат ретінде қарастырылды. Пулте қызметкерлерді жаппай қысқартқаны үшін Конгрестегі екі партияның да сынына ұшыраған.

"Үйімді сағындым". Әскери бөлім іздеу салған сарбаз Өскемен маңынан табылған Шығыс Қазақстан облысы орталығындағы №27943 әскери бөлімде мерзімді әскери қызмет атқарып жүріп хабар-ошарсыз кеткен 22 жастағы Айқын Мархан бірнеше күннен кейін Өскеменнен 20 шақырымдай жерден табылған. Мұны 29 шілде күні әскери полиция хабарлады.

"Алдын ала мәлімет бойынша, сарбаз үйін сағынып, қызмет орнын өз бетінше тастап кеткен. Тексеру барысында әскери қызметші командирлер және бірге қызмет атқаратын әскери қызметшілер тарапынан жарғыға қарсы келетін қарым-қатынас пен лауазымдық өкілеттіктерді асыра пайдалану фактілері болмағанын мәлімдеді" делінген әскери полиция instagram-парағында жариялаған ақпаратта.

Онда сондай-ақ Марханның өмірі мен денсаулығына ешқандай қауіп жоғы да айтылған. Ресми дерек бойынша, 23 шілде күні №27943 әскери бөлімнің зымыран-артиллериялық қару-жарақ және оқ-дәрі сақталатын қоймасын күзетуге кезекке шыққан Айқын Мархан таңертеңгі сағат 6:30 шамасында ізім-қайым жоғалып кеткен. Әскери бөлім басшылығы сарбаз қызмет орнын тастап, өз бетімен кетіп қалған, қолында қару болмаған деп хабарлап, оған іздеу жариялаған еді.

⚡Қазақстан шпага құрамасы командалық жарыста әлем чемпионы атанды Cемсерлесудің шпага түрінен Қазақстан ерлер құрамасы (Руслан Курбанов, Ерлік Сертай, Кирилл Проходов және Вадим Шарламов) командалық жарыста әлем чемпионы атанды. Қазақстан құрамасы Гонконгта өтіп жатқан әлем біріншілігінің финалында Украинаны жеңді – 45:40. Қазақстан 1/16 финалда Финляндияны (45:39), 1/8 финалда Өзбекстанды (28:27), ширек финалда Данияны (45:36), жартылай финалда Египеттен (41:32) басым түсті. Қазақстан шпага құрамасы алғаш рет әлем чемпионы атанып отыр. Былтырғы әлем біріншілігінде қола медаль алған еді.

Алматы облысында белсенді Гүлзипа Жәукерованың жазасы өтті 29 шілде күні Алматы облысы Талғар ауданында азаматтық белсенді Гүлзипа Жәукерованы туыстары мен серіктері ақтық сапарға шығарып салды. Ол бір күн бұрын 58 жасында ауыр дерттен қайтыс болған. Белсендіні танитын серіктері мен құқық қорғаушылар марқұмды "қиындықтар мен қысымға қарамастан әділдік үшін күрескен, саясатты терең түсінетін және ауыр сырқатына қарамастан болашаққа үмітпен қараған жан еді" деп еске алды. Жәукерова 2019 жылы көпбалалы аналардың әлеуметтік наразылық акциялары кезінде танылды. Ол үкіметтен көмекке мұқтаж аналарға әлеуметтік қолдауды күшейтуді және тұрғын үй мәселесін шешуді талап еткен шерулерге қатысты. Кейін оппозициялық қозғалыстарды қолдайтынын ашық мәлімдеген. 2019 жылы Жәукерова Қазақстанда тыйым салынған "Қазақстанның демократиялық таңдауы" қозғалысының қызметіне қатысты деген айыппен жауапқа тартылды. Тергеу изоляторында төрт айдан астам уақыт болып, өзіне тағылған айыпқа қарсылық ретінде аштық жариялаған. 2019 жылғы қарашада Алматының Алмалы аудандық соты Гүлзипа Жәукерованы аталған бап бойынша кінәлі деп танып, бір жылға бас бостандығын шектеу және 100 сағат қоғамдық жұмысқа тарту туралы үкім шығарды. Қазақстандық құқық қорғаушылар Жәукерованы 2019 жылы саяси тұтқындар тізіміне енгізген. Қазақстан билігі елде саяси тұтқындар жоқ екенін және ешкімнің саяси көзқарасы үшін қудаланбайтынын мәлімдеп келеді.

🎮Астанада «Болашақ ойындары» басталады Бүгін, 29 шілдеде Астанада «Болашақ ойындары – 2026» басталады. Жарыстың ашылу салтанатына Қазақстан президенті Қасым-Жомарт Тоқаев, Өзбекстан президенті Шавкат Мирзияев, Қырғызстан Президенті Садыр Жапаров және Тәжікстан Президенті Эмомали Рахмон қатысады. Жарысқа 34 елден 800 спортшы қатыспақ. 🔹Бұл қандай жарыс? «Болашақ ойындары» 2024 жылы Ресейдің бастамасымен өткен. Мәскеу Украинаға соғыс ашқан соң ресейлік спортшылар ірі халықаралық жарыстардан шеттетілген еді. Осыдан соң Ресей өзінің турнирлерін ұйымдастыруды бастаған. «Болашақ ойындары» сол бастамалардың бірі әрі алғашқы ойындар 2024 жылы Қазан қаласында өткен еді. 2025 жылғы турнир Абу-Дабиде болған. Ресейдің бастамасымен құрылған бұл жарысқа көбіне Мәскеумен тығыз байланыстағы я бейтарап ұстанымдағы елдер қатысады. 🔹Ережесі қандай? Жарысқа қатысушылар негізінен компьютер ойындарынан және физикалық спорт түрлерінен бірге жарысады. Мәселен, спортшылар алдымен футболды компьютерде ойнап, кейін алаңға шығады. Астанадағы жарыс 9 тамызда аяқталады.

❤️ Ормуз дағдарысы Орталық Азияның Иран жөніндегі саясатын қалай өзгертті? Кен Мориасумен сұхбат АҚШ пен Иран арасындағы әскери қақтығыс әзірге бәсеңдегендей көрінгенімен, оның геосаяси салдары енді ғана айқындала бастады. Ормуз бұғазы мен аймақтағы қауіпсіздіктің болашағы бұлыңғырлана түсіп, Орталық Азия елдері сауда, көлік дәліздері және әлемдік нарықтарға шығу жөніндегі ондаған жыл бойы қалыптасқан стратегиялық ұстанымдарын үнсіз қайта қарастырып жатыр.

☄️ Медиа: Шабуылдан көз ашпаған Wildberries Қазақстаннан қоймалар қарап жатыр 💥 29 шілдеге қараған түні украин дрондары Ресейдің Рязань облысындағы мұнай өңдеу зауыты мен Wildberries компаниясының сұрыптау қоймасына шабуыл жасады. 📝 Astra мәліметінше, Рязань ауданындағы Wildberries кешені нысанаға алынған. Компания қызметкерлердің эвакуацияланғанын мәлімдеді. Алдын ала бағалауға сәйкес, қоймадағы шығын миллиардтаған рубльге жетуі мүмкін. 🔥 18 шілдеден бері Мәскеу өңірінде, Тамбов, Ленинград, Воронеж, Краснодар мен Ставрополь аймақтарында, Санкт-Петербург, Симферополь және Екатеринбургте Wildberries нысандарына дрон шабуылдары жасалды. Кейінгі аптада Ресей аумағындағы өзге нысандар мұнша жиі шабуылға ұшырамаған дейді "Агентство". 🔈 "Коммерсантъ" басылымы Wildberries-ке иелік ететін RWB тобы логистикалық қуаттарының бір бөлігін Қазақстанға көшіру мүмкіндігін қарастырып жатыр деп жазды. Дереккөздердің айтуынша, компания аумағы 100 мың шаршы метрге дейін жететін қойманы жалға алуға бейіл. 📎 RWB бұл мәліметке қатысты өздері жұмыс істейтін барлық елде логистика желісін жоспарлы түрде кеңейтіп жатқанын мәлімдеді. Қазір компания Алматы мен Астанада жалпы көлемі 260 мың шаршы метрден асатын екі ірі логистикалық кешен салып жатыр.

Украина дрондары Ресейдің Рязань облысындағы бірден екі ірі нысанға соққы жасады. Шабуылдан кейін мұнай өңдеу зауытының аумағында өрт шығып, қойма қызметкерлері эвакуацияланды. Соққыға Wildberries қоймасы да ұшырады. Ресей Қорғаныс министрлігі бір түнде 295 украиналық дронның жойылғанын хабарлады.

🤺Қазақстан семсерлесу құрамасы әлем чемпионатының финалына шықты Семсерлесуден әлем чемпионатында Қазақстан шпага құрамасы командалық жарыста финалға шықты. Руслан Курбанов, Ерлік Сертай, Кирилл Проходов және Вадим Шарламов жартылай финалда Египет құрамасынан басым түсті - 41:32. Ал 1/16 финалда Финляндияны (45:39), 1/8 финалда Өзбекстанды (28:27), ширек финалда Данияны (45:36) ұтты. Осылайша шпагадан Қазақстаннын ерлер құрамасы алғаш рет әлем чемпионатының финалына шығып отыр. Финалда Қазақстан құрамасы Украина не Израиль құрамасының бірімен алтын медальға таласады.

🗣 Бұрынғы топ-менеджер Абылай Мырзахметов мерзімінен бұрын бостандыққа шықты 📝 Ірі көлемде алаяқтық жасаған деген айыппен бес жылға сотталған «Атамекен» ұлттық кәсіпкерлер палатасының бұрынғы басқарма төрағасы Абылай Мырзахметовтің сот кескен жаза мерзімінің өтелмеген бөлігі бостандығын шектеу жазасына ауыстырылып, ол бостандыққа шықты. Павлодар облыстық қылмыстық атқару жүйесі департаменті Мырзахметов пробация қызметінің есебіне қойылғанын, оған сот белгілеген барлық шектеулерді сақтау міндеттеліп, Қазақстаннан шығуына тыйым салынғанын хабарлаған. 2024 жылы Абылай Мырзахметов аса ірі мөлшерде алаяқтық жасаған деген айыппен бес жылға бостандығынан айырылған. Сот оған алдағы 10 жылда жергілікті өзін-өзі басқару органдары мен квазимемлекеттік секторда қызмет атқаруға тыйым салған. Тергеу нұсқасына сәйкес, ол бір кәсіпкерден қамаудағы туысын босатуға көмектесемін деген уәдемен 30 млн доллар талап еткен. Сот материалдарында Мырзахметов жәбірленушінің 13,9 млрд теңгесін алаяқтық жолмен иемденіп кеткені айтылған. Үкім шығарған кезде сот Мырзахметовтің өз кінәсін мойындап, өкінгенін, тергеуге көмектескенін және кәмелетке толмаған баласы барын жазаны жеңілдететін жайт ретінде ескерген. Абылай Мырзахметов 2013-2022 жылдары "Атамекен" ұлттық кәсіпкерлер палатасының басқарма төрағасы болды. Оған дейін Қазақстанның көлік және коммуникация министрі, "Қазақстан темір жолы" ұлттық компаниясының президенті қызметтерін атқарған.

🇯🇵 Жапониядағы жер сілкінісінен қаза тапқандар саны 13 адамға жетті Жапон премьері Санаэ Такаитидің мәлімдеуінше, елдің оңтүстігінде болған қуатты жер сілкінісі салдарынан кемінде 13 адам қаза тапқан. 28 шілдеде жергілікті уақытпен 16:27 кезінде Кюсю аралында жер сілкініп, Кумамото префектурасында шамамен 10 мың адам эвакуацияланып, 37 мыңға жуық үй жарықсыз қалған, кейбір ғимараттар, жолдар мен көпірлер зақымданған. Кумамотода жер сілкінісі салдарынан сауда орталығы құлап, кемінде екі адам қаза тапқан. Билік сауда орталығынан сегіз адам құтқарылғанын хабарлады. Қазір хабарсыз кеткендер мен ғимарат ішінде қалып қойғандар жайлы ақпарат нақтыланып жатыр. Табиғи апат болған аймақта құтқару жұмыстары жалғасып жатыр. Келген шығын көлемі әзірге белгісіз.

🇺🇸🇺🇦 Зеленский Ақ үйдегі Трамппен кездесуін "жақсы өтті" деп бағалады Украина президенті Владимир Зеленский 28 шілдеде Вашингтонда АҚШ президенті Дональд Трамппен кездесуі "жақсы" өткенін айтып, талқыланған негізгі тақырыптар америкалық Patriot әуе қорғанысы жүйесіне арналған зымырандарды Украинада лицензиямен өндіру және Ресеймен бейбіт келіссөзді жандандыруды мәселесі жайлы болғанын мәлімдеді. БАҚ өкілдерінен жабық өткен Ақ үйдегі кездесу шамамен бір сағатқа созылды. Екі тарап келіссөз алдында да, одан кейін де журналистерге мәлімдеме жасамады. Ақ үйдің баспасөз хатшысы Кэролайн Левитт Трамптың Зеленскиймен және Израиль премьер-министрі Биньямин Нетаньяхумен кездесулері "оң әрі нәтижелі" өткенін хабарлады. Зеленский келіссөз қорытындысында қолдау білдіргені үшін АҚШ-қа алғыс айтып, жуырда қайтыс болған сенатор Линдси Грэмді "Украинаның шынайы досы" деп атады. Кейін үш елдің басшылары Грэмді ақтық сапарға шығарып салу рәсіміне қатысты.

🇮🇷 Иранда қаңтардағы наразылыққа қатысқан тағы екі адам дарға тартылды ⚠️ Иранда қаңтардағы жаппай наразылықтарға байланысты тағы екі адам дарға тартылды. Мұны 28 шілдеде Иранның мемлекеттік басылымдары хабарлады. Осылайша өлім жазасы орындалған адам саны төрт кісіге жетті. 🗣️ Қаңтардағы наразылықтарға қатысты барлығы 12 адам өлім жазасына кесілген, олардың сот процестері әділ сот талқылауының халықаралық талаптарына сай өтпеген дейді адам құқығын қорғаушылар. 🔥 Қаңтарда Иранда билік саясатына қарсы жаппай халық наразылығын билік күшпен басып-жаншыған. Қақтығыстар кезінде демонстранттар да, қауіпсіздік күштерінің өкілдері де қаза тапқан. ⚠️ Билік наразылықтарға қатысқан ондаған адамға өлім жазасын кескен. БҰҰ дерегінше, осы уақытқа дейін олардың шамамен 20-сының үкімі орындалған. 🔈 Құқық қорғау ұйымдарының мәліметіне сәйкес, Иранда жыл басынан бері түрлі істер бойынша 300-ден астам адам дарға тартылған.

Жапонияда күшті жер сілкінісінен мыңдаған үй жарықсыз қалып, жолдар бүлінді 28 шілде күні Жапонияның оңтүстігіндегі Кумамото префектурасында болған күшті жер сілкінісі салдарынан мыңдаған үй жарықсыз қалып, жолдар бүлінген, кемінде 50 адам жарақат алған. Жер сілкінісі жергілікті уақытпен сағат 16:27-де Кюсю аралында тіркелген. 150 мыңнан астам адамға эвакуация пункттеріне бару жөнінде нұсқау берілген. Цунами қаупі туралы ескерту жарияланып, бір сағаттан кейін ол күшін жойды. АҚШ Геологиялық қызметі жер сілкінісінің магнитудасын бастапқыда 7,1-ге тең деп хабарлаған, кейін 6,8-ге дейін төмендетті. Жапония премьер-министрі Санаэ Такаичи адам шығыны мен материалдық залалдың нақты көлемі әлі анықталып жатқанын мәлімдеді. Ол бірқатар ауданда жарық өшіп, өрт шыққанын айтты. Кей тұста жолдар мен көпірлер зақымданып, кейбір ғимараттар қираған. Билік құтқару және залалды бағалау жұмыстары түні бойы жалғасатынын хабарлады.

‼️ Халықаралық ұйымдар Toplum TV журналистеріне Баку соты шығарған үкімін айыптады ▶️ Халықаралық журналистік ұйымдар Әзербайжандағы Toplum TV тәуелсіз арнасына қатысты іс бойынша айып тағылған тоғыз адамды ұзақ мерзімге соттауды айыптады. 📣 Еуропалық журналистер федерациясы (EFJ) мен Халықаралық журналистер федерациясы (IFJ) сот процесінің саяси астары бар, журналистер кәсіби қызметі үшін қудалауға түскен деп мәлімдеп, оларды дереу босатуға шақырды. 27 шілдеде Баку соты Toplum TV ісі бойынша тоғыз журналист пен қоғамдық белсендіні 12 жылдан 15 жылға дейінгі мерзімге бостандығынан айырды. Олар тағылған айыпты жоққа шығарып, істі саяси астары бар қудалау деп атады. Toplum TV Әзербайжандағы жемқорлық, цензура және әлеуметтік мәселелерді зерттейтін тәуелсіз медиа ретінде белгілі. 2024 жылдың наурызында құқық қорғау органдары редакция кеңсесіне тінту жүргізіп, қызметкерлерінің басым бөлігін қамауға алған. Әзербайжан билігі журналистерге контрабанда, заңсыз кәсіпкерлік, салықтан жалтару және өзге де қаржы қылмыстары бойынша айып таққан. Ал халықаралық құқық қорғау және журналистік ұйымдар бұл істі елдегі тәуелсіз БАҚ пен сыншыл пікірлерге қысым көрсету науқанының көрінісі деп бағалайды.

🔥Дастан Сәтпаев «Челси» сапындағы алғашқы ойынында гол салды Лондонның «Челси» командасы Австралия-Азия турнесі аясында Сиднейдің "Вестерн Сидней Уондерерс" клубымен жолдастық матч өткізіп, 6:4 есебімен жеңіске жетті. Бұл ойында «Челсидің» алғашқы голын қазақстандық 17 жастағы Дастан Сәтпаев салды. Бұл – Сәтпаевтың «Челси» сапындағы бірінші ойыны. Матчтың 7-минутында командаласы Райан Кавума-Маккуиннан пас алған Сәтпаев екі қорғаушыдан сытылып өтіп, қарсылас қақпасына гол соқты. ВВС Sport сайты Сәтпаевтың «көктер сапындағы алғашқы матчы және алғашқы голы. Қазақ футболшысы үшін ғажап старт» деп жазды.

‼️ Президент Зеленский АҚШ-қа барды Украина президенті Владимир Зеленский 28 шілде күні АҚШ-қа барды. Ол Вашингтонда АҚШ президенті Дональд Трамппен, сондай-ақ Капитолийде АҚШ сенаторлармен кездеседі деп жоспарланған. The Hill басылымы кездесуге Сенаттың 100 мүшесі түгел шақырылған деп жазды. Ақ үйдің хабарлауынша, Трамп пен Зеленский келіссөзінің негізгі тақырыбы Ресей мен Украина арасындағы соғысты тоқтату мәселесіне арналмақ. "Соғысты аяқтайтын уақыт келді" деген Ақ үй өкілі. Оның айтуынша, Вашингтондағы келіссөздердің басты басымдығы – Украинаның баллистикалық зымырандарға қарсы қорғанысын күшейту және АҚШ-пен стратегиялық ынтымақтастықты дамыту. The Hill мәліметінше, Сенаттағы кездесуде Ресейге қарсы санкциялар туралы заң жобасы талқылануы мүмкін. Құжат авторларының бірі марқұм Линдси Грэм еді. Зеленский осы сапарында марқұм сенатормен қоштасу рәсіміне де қатысады. Кейінгі кезде АҚШ пен Украина өкілдері "әуе бітімі" жайлы ұсынысты талқылаған деп жазды БАҚ. Reuters дереккөздерінің мәліметінше, бұл бастама Ресейге жаңа бейбіт келіссөздер аясында ұсынылуы мүмкін. Ал Кремль мұндай жоспар туралы ешқандай мәліметі жоғын мәлімдеді.

⚡Дастан Сәтпаев «Челси» сапындағы алғашқы матчын өткізбек Қазақстандық 17 жастағы футболшы Дастан Сәтпаев бүгін, 28 шілдеде Лондонның «Челси» сапындағы алғашқы ойынына шығады. Маусым алдында Австралияда жаттығу өткізіп жатқан «Челси» Сиднейдің «Вестерн Сидней Уондерерс» клубымен жолдастық матч өткізеді. Бұл «Челсидің» жаңа бапкері испаниялық Хаби Алонсо үшін де алғашқы матч болмақ. Бұған дейін Испанияның «Реал Мадрид» клубын жаттықтырған Хаби Алонсо бұл клубпен Чемпиондар лигасы аясында Алматыға келіп, «Қайратқа» қарсы ойын өткізген еді. 🔹Сәтпаев «Челсиге» қашан ауысып еді? Дастан Сәтпаев – Англия клубтарында ойнайтын алғашқы қазақстандық футболшы. 2025 жылы «Челси» Сәтпаевты «Қайраттан» 4,3 млн еуроға сатып алған еді. Бірақ футболшы кәмелет жасына толмағандықтан «Қайратта» ойнап, биыл маусым айында ғана «Челсиге» аттанды. Бірнеше халықаралық футбол басылымдары Сәтпаевты болашағынан үлкен үміт күттіретін жас футболшылардың тізіміне қосқан еді.

📝 Сот журналист Азамат Омаровты тергеу абақтысында қалдырды ❗️ Астананың тергеу соты "араздық қоздыру" бабымен қозғалған іс аясында абақтыда қамауда отырған "Ахуал сегодня" YouTube-арнасының авторы Азамат Омаровтың бұлтартпау шарасын өзгертпеді. Журналисті қорғаушылар соттан бұлтартпау шарасын жеңілірек түріне ауыстыруды сұраған еді. Омаровтың зайыбы Венера Мұстафинаның айтуынша, ол тергеу абақтысында отырған күйеуімен кездескен. Журналист оған бес орындық камерада төрт адаммен бірге отырғанын, ал сенбі күні душта су қысымы болмағандықтан жуына алмағанын және оларды серуенге де шығармағанын айтқан. 18 шілдеде Астанада полиция Азамат Омаровтың үйіне тінту жүргізген соң оны компьютерлері, қатқыл дискілері мен телефондарымен бірге алып кеткен. Кейін Астана соты оны екі айға қамауға санкция берген. Адвокатының сөзінше, тергеу орындары Омаровтың желіде жариялаған сатиралық мазмұндағы материалдарында Қазақстанның президенті, үкіметі мен мемлекеттің әлеуметтік-экономикалық саясаты жайлы айтқан сөздері жұртта билікке деген теріс көзқарас қалыптастырады деп санайды. Ал журналист бұл айыпқа келіспей, жарияланымдарды кәдімгі сатира мен әзіл жанрына жатқызады. "Шекарасыз тілшілер" халықаралық ұйымы Азамат Омаровтың қамауға алынғанын айыптаған. Бұған дейін құқық қорғау ұйымдары Қазақстан Қылмыстық кодексінің 174-бабы тым кең ауқымда қолданылатынын айтып, сөз еркіндігін шектеуге байланысты істерде осы бап жиі қолданылатынын бірнеше рет сынға алған. Қазақстан билігі елде цензураға тыйым салынған, ешкім ой-пікіріне я саяси ұстанымына бола қудаланбайды дейді.

Батыс Қазақстан өңірінде орман өртеніп жатыр Батыс Қазақстан облысында Орал орман шаруашылығы аумағында өрт сөндіру жұмыстары жалғасып жатыр. Төтенше жағдайлар министрлігінің мәліметінше, орман өртін сөндіру үшін әуеден 68 тонна су төгілген. ТЖМ өртті сөндіру жұмыстарына қатты жел кедергі келтіріп жатқанын айтады. Өртті сөндіруге Төтенше жағдайлар министрлігінің бөлімшелері, орман шаруашылығы қызметкерлері, жергілікті атқарушы органдар және 20982-әскери бөлімінің құтқару батальоны жұмылдырылған. Қазір ол жерде 80-ге жуық маман, 10 техника құралы мен екі тікұшақ жұмыс істеп жатыр. ТЖМ жағдайды бақылауда ұстап отырғанын айтты.