TUMO Parents Corner

Սիրելի ծնողներ, հունիսի 1-ին բոլոր Թումոներում դաս կա ☀️ Իսկ թե ինչ գործ ունի այստեղ պաղպաղակը, դեռ չենք ասի 😉

Ալավերդիի, Շնողի և Օձունի թումոցիներ և ծնողներ, տեղեկացնում ենք, որ անվտանգության նկատառումներով և ճանապարհների անանցելիությամբ պայմանավորված` ձեր Թումո տուփերի դասերը ժամանակավորապես չեղարկվում են: Դասերի վերսկսման մասին հավելյալ կտեղեկացնենք, իսկ բաց թողնված դասերը կլրացվեն հնարավորինս սեղմ ժամկետներում: Մտքով ձեզ հետ ենք և սպասում ենք կրկին հանդիպելուն։ Իսկ Կողբի և Դիլիջանի կենտրոններում դասերը շարունակվում են՝ չնայած հոսանքի և ջրամատակարարման խափանումներին։

Իսկ Կողբի Թումոյում օրերն այսպես են անցնում 🤍 Ի դեպ, հունիսի 22-ին նշում ենք Թումո Կողբի պաշտոնական բացումը, և դուք հրավիրված եք: Պարզապես ամրագրե՛ք ձեր տեղը այստեղ ու միացե՛ք միջոցառմանը:

Իսկ այս ուրբաթ դիտելու ենք Սպայկ Ջոնսի «Այնտեղ, որտեղ ապրում են հրեշները» ֆիլմը։ «Ոսկե գլոբուս»-ի և այլ կինոմրցանակների հավակնորդ այս ֆիլմի գլխավոր հերոսի՝ Մաքսի դերի համար դերասանի փնտրտուքը տևել է ամիսներ և քասթինգին մասնակցել են տարբեր երկրներից հազարավոր պատանիներ։ Ի վերջո դերը հասել է Մաքս Ռեքորդսին: Եկեք միասին ծանոթանանք Մաքսին և հրեշներին 📌 Թումո Գյումրի (Շչորսի 1) 18:00, 📌 Թումո Դիլիջան (Մյասնիկյան 63) 18:00: Տևողությունը 101 րոպե, լեզուն անգլերեն ռուսերեն ենթագրերով։ Մուտքն ազատ է:

Գյումրիի և Դիլիջանի ծնողներ, այս ուրբաթ դիտում ենք Անտուան դը Սենտ Էքզյուպերիի «Փոքրիկ Իշխանը» գրքի հիման վրա նկարահանված անիմացիոն ֆիլմը: Տևողությունը` 110 րոպե, Լեզուն անգլերեն ռուսերեն ենթագրերով, Մուտքը՝ ազատ: Սպասում ենք ձեզ Գյումրիի և Դիլիջանի Թումոների կինոդահլիճներում ուրբաթ օրը ժամը 18:00-ին:

Գյումրիի և Դիլիջանի ծնողներ, ձեր պատանիների հետ եկեք Թումո ֆիլմեր դիտելու 🍿 Այո՜, թումոյական կինոուրբաթները վերադառնում են։ Այսօր դիտում ենք Գաբոր Չուփոյի «Կամուրջ դեպի Տերաբիթիա» ֆիլմը 10-ամյա Ջեսսի մասին, ով ընկղմված է իր պատանեկան աշխարհի մեջ և ում միակ ուրախությունը նկարչությունն է: Ջեսսի և Լեսլիի հետ կհայտնվեք իրենց ստեղծած հեքիաթային աշխարհում Տերաբիթիայում։ Կսպասենք բոլորիդ Գյումրիի և Դիլիջանի կենտրոններում 18:00: Ֆիլմի տևողությունը 1 ժամ 36 րոպե։ Ֆիլմը կցուցադրվի անգլերեն՝ ռուսերեն ենթագրերով։ Հաջորդիվ կդիտենք 📽️ 10.05 «Փոքրիկ իշխանը» 📽️ 17.05 «Այնտեղ, որտեղ ապրում են հրեշները» 📽️ 24.05 «Իմ հարևան Տոտորոն» 📽️ 31.05 «Հնդկացին պահարանում» Բոլոր կինոուրբաթների մուտքն ազատ է։

Փոքրիկ կասկած ունենք, որ այս հարցը ոչ թե ծնող է ուղարկել, այլ ձեր թումոցիներից մեկը 😉 Ամեն դեպքում, ուրախ ենք տեղեկացնել, որ Apple Vision Pro-ով առաջին աշխատարանի գրանցումն արդեն բաց է: Հայաստանում AR/VR տեխնոլոգիաների առաջատար Arloopa ընկերության մասնագետները մայիսի 16-ից հունիսի 7-ը Թումո Երևանում կվարեն աշխատարան, որի ընթացքում ձեր թումոցիները ուսումնասիրեն Vision OS-ը և կսովորեն ստեղծել իրականությանը մոտ փորձառություններ և միջավայրեր: Կաշխատեն նաև Unity XR Management ծրագրով և կսովորեն ստեղծել AR և VR խաղեր: Անպայման հուշեք ձեր թումոցիներին, որ գրանցվեն այս աշխատարանին. շատ հետաքրքիր է լինելու:

Սիրելի ծնողներ, տեղեկացնում ենք, որ վաղը՝ ապրիլի 24-ին Թումոյում դասեր չկան:

Թումոյի տնօրենը ծնող է կանչում 😊 Այո, Թումոյի համահիմնադիր և կրթական ծրագրի համահեղինակ Մարի Լու Փափազյանը Երևանի թումոցիների ծնողներին և ընտանիքի անդամներին ապրիլի 19-ին, ժ. 19:30-ին սպասում է Թումո Երևանում՝ ծնողական շաբաթվա շրջանակում: Բաց մի՛ թողեք Մարի Լուի հետ անմիջական շփման այս հնարավորությունը։