سبيل الأطباء

الحقيقة كل شىء في دنيانا له وجهان بل وأكثر فالطعام الصحى قد يكون غير صحى لغيرك والدواء الذي يعالجك قد يكون مضر لغيرك وفلان ذو الأخلاق العاليه قد يكون أدنى الخلق مع غيرك والجميل قبيح لغيرك والقبيح جميل لغيرك ومن يذاكر كثيرا قد يرسب ومن يذاكر قليلا قد يتفوق حتى الحقائق العلمية والتى هى قرآنا للأطباء والعلماء كلما تعمقت وجدت فيها عوار واضح فالبحث العلمى الممول من شركات الأدوية الضخمة لن يفيده أن يصرف أموالا على بحوث الزعتر وحبة البركة حتى يبيع عم على العطار أكثر ولكن العامة لا يحبون أوجه الريبة والشك إنهم يحبون المشروع الذي استثماره "ميه في الميه" ولا يوجد به خطورة يحبون العلاج "اللي بيجيب من الآخر" كما يسمونه وليس له مضاعفات يحبون ويتبعون نظام الطيبات لأن صاحبه أجزم بنفعه لكل الناس والطبيب فلان والذي تحتاج إلى شهور فقط لتحجز ميعاد لتراه والسمكري العلاني والسباك الترتاني اللي بيلبس البدلة السموكن وذلك لأن كلهم "بيجيبوا من الآخر" ولكن الحقيقة أن كل حقيقة دنيوية تحتمل أكثر من احتمال وأقصى ما يمكن أن نفعله أن نأخذ بالأسباب دون مبالغة ولا نعطى الدنيا أكبر من حجمها وذلك لأن الدنيا في حد ذاتها ليست حقيقية فهى اختبار، لو تدبرت حياتك لوجدت أن يومك مجموعه من الاختبارات والتى وضعت لك انت فقط ولا لأحد غيرك كل مكالمة تليفون كل موقف في الطريق كل واحد هتقابله في شغلك كلها اختبارات لقياس مستوى كبرك وغرورك وصبرك وحكمتك وشهوتك تعامل الإنسان مع الدنيا على أنها شىء حقيقي يخذله ويورث في قلبه الحسرة، إنه يتعامل معها على أنها معادلة حسابية وأن ما عليه إلا أن يبذل مجهودا معيناً ليحصل على نتائج معينه، وحينما لا يحدث ما يتوقعه فإنه يلوم كل من حوله إلا نفسه.. كم أنت واهم أيها الإنسان وتظل في الدنيا حقيقة واحده أنها غير حقيقية وأن الحقيقة الحق هى الآخرة { وَمَا هَـٰذِهِ ٱلۡحَیَوٰةُ ٱلدُّنۡیَاۤ إِلَّا لَهۡوࣱ وَلَعِبࣱۚ وَإِنَّ ٱلدَّارَ ٱلۡـَٔاخِرَةَ لَهِیَ ٱلۡحَیَوَانُۚ لَوۡ كَانُوا۟ یَعۡلَمُونَ }

الاستغفار لو قاعد في المواصلات او قبل ما تنام او وانت منتظر حد وربنا هداك وقررت تستغفر .. خد بالك من النقط دي بلاش تحط في مخك رقم معين عايز توصله .. ده هيشتت تفكيرك عن صلب الموضوع .. انت في حالة استغفار وليس في حالة عداد للاستغفار مش شرط تقول استغفر الله العظيم باللفظ .. افتكر سيئاتك وغلطاتك وقول يا رب سامحنى وساعدني مكررهاش لو معتقد ان ملكش غلطات او غلطاتك قليلة تبقى انت حاجه من اتنين اما جاهل عن غلطاتك واما متكبر استغفر عن كل وقت ضيعته وانت مش في حالة استغفار .. كل وقت ضيعته ع الفيس او مع التلفزيون او مع الماتش او مع الفيلم او مع اصحابك في هزار ولعب استغفر عن تكبرك وغرورك لو افتكرت انك احسن من حد كمستوى علمي او اخلاقي او ديني .. انت مش احسن ولا حاجه انت ربنا اللي وصلك لكده وهو يمكن اما وقته مجاش او اما مخدش كمية الفرص اللي انت خدتها اللي يمكن لو كانت جاتله كان بقى احسن منك استغفر عن كلمة اشمعنا وكلمة ليه يا رب وكلمة لو استغفر عن نرفزتك في اى موقف حتى لو كنت انت على حق لأن الرفزة في حد ذاتها استسلام لنزغة الشيطان لك استغفر عن تعلقك بالدنيا وتقديسها وتقديرها .. عن حب الظهور والاعجاب بالنفس استغفر عن كل بوست حطيته ع الفيس فيه حب ظهور واعجاب بالنفس استغفر عن كل واحد اديته نصيحه بزعيق او نرفزة استغفر عن كل ذنب انت لا تعلمه استغفر عن جهلك استغفر عن نيتك اللي مش سليمه ميه في المية هناك معلومات لا نعرفها ولن نعرفها وعلينا ان نتقبلها ثقة في الله لا تركز في العدد فكما قال احد الصالحين إن استغفارنا يحتاج إلى استغفار استغفر الله العظيم

التعليم الطبي .. الخدعة الكبرى اوعى تاخد اى حاجه مخلقهاش ربنا مباشرة كده على انها مسلمات فمثلا كثير من الطلبه متخيل ان النظام التعليمي المحطوط للدكتور ده قرآن ومسلم بيه فانت عشان تكون دكتور شاطر لازم تدرس خمس سنين طب ما بين محاضرات وسكاشن وراوندات وامتحانات شفوي وعملي ثم تلف لفة كده على كل الاقسام في سنتين امتياز ثم تقعد تتعلم التخصص في خمس سن سنين كمان وياريت كده وبس ده كتير من الناس معتقد انه لو ساب محاضرة او راوند هيبفى دكتور فاشل النظام التعليمي ده احنا استوردناه من الخارج باكدج كده زى ما هو لا وياريت حتى مشينا وراهم بعد كده .. هما طوروا فيه خمسين مره واحنا خدناه على قديمه يعني مثلا في انجلترا هتلاقي الطلبه اولى وتانيه فقط نظري ومن سنة تالته مرمي في المستشفى بيحضر عيادات وعمليات ومرور ومفيش كمية الحفظ الرهيبه اللي بتحصل عندنا دي ومعلومات كتير ملهاش اى تلاته لازمه من كمية المعلومات اللي واحد خدها على مدار حياته في كليه وامتياز ونيابه وماجستير وزمالة اكاد اجزم ان اللي الواحد سغال بيه حاليا من معلومات ميحصلش ٢ في الميه والباقي كله اتنسى الموضوع اوفر ريتد جداً .. لو انا هحط نظام تعليم طبي هخلي الكلية سنتين سنة مواد بيزيك وسنه تانيه مواد كلينيكال والامتياز سنتين توزيعهم حسب اللي اختيار التخصص والتخصص تلت سنين .. بس كده وهحط سنتين تعليم قرآن وتفسير وربطه بحياة البشر ويكون مجموعهم اجباري القرآن هو اللي هيعلمك الصبر والحكمة والتأني وحب الغير وعدم الاعجاب بالنفس وعدم التكبر وعدم حب الظهور لو فكرت هتلاقي ان العلم الدنيوي لا يورث في القلب شىء يعني مثلا الدكتور اللي اتعلم في كامبردج لو حد زنق عليه بالعربيه هيشتم ويتخانق ويتنرفز زيه زى سواق التوكتوك عادي والدكتورة اللي مخلصة الدكتوراه هتغير من بنت خالتها اللي معاها دبلوم عشان اخلى منها في الشكل وهتجزع من تربية العيال وجوزها زيها زى بنت عمتها اللي معاها كلية تربيه واداب لا وكمان هتتغر بعلمها وتقرفما فيديوهات اعجاب بالنفس وكبر وحب ظهور فيا أيها الطبيب خليك فاهم انك بتزاكر في الكليه والنيابه عشان الامتحان مش عشان تكون دكتور شاطر فمتخرقش بنزين في الفاضي انجح وزاكر على قد طاقتك والباقي قرآن القرآن محتاج مجهود .. محتاج مزاكرة مش حفظ ولكت تدبر تقرا وتسمع التفسير ودروس وتربط ده بحياتك .. كده هتكون دكتور شاطر حقيقة لا يدركها إلا القليل اللهم انر بصيرتنا

رفاهية الإختيار انك تسيب تخصص في مكان ممكن تتعلمه كويس فقط عشان مش حاسه او مش حابه رفاهيه هتندم عليها بعدين افتكر انك في مصر مش في المانيا .. رفاهية اختيار التخصصات بالحب والكره اصبحت عبثيه في ظل الهبل اللي احنا عايشينه شخصيا كل اختياراتي اللي اخترتها عن حب ندمت عليها وكل اختياراتي اللي اخترتها عن اقتناع عقلي دون مشاعر نفعت تأقلم

الظلم العدل هو أول خطوة في بناء المجتمعات والأمم القويه مش التعليم مش الصحه مش الاقتصاد الظلم يقهر الإنسان ويمرضه ويخليه يشتغل ب ١٠ ف المية من طاقته يعنى الإنسان المظلوم ٩٠ في المية من طاقته مهدرة والظلم مش بس ظلم الحكومات ظلم الحكومات ده نتيجة مش سبب نتيجة لإن كل واحد مننا بيتعرض للظلم في بيته وشغله وحتى مع صحابك وقرايبك البنت بتتظلم من امها واختها والولد بيظلمه ابوه واخواته السينيور بيظلم الجونيور المدير بيظلم الموظفين اللي سايق بيظلم اللي سايق جنبه الظلم الإجتماعي هو اساس كل فساد ولو مجتمع عايز ينتفض يبقى لازم العدل والعدل يبدأ في العيلة طب ليه الاب ممكن يظلم ابنه والام تظلم بنتها؟ في سيناريوهين اما باطل وباطل واما حق وباطل مفيش حق مع حق يعني ايه الكلام ده؟ باطل وباطل يعني الطرفين فقدوا البصيرة والحكمه وبيتخانقوا خناقه عبثيه على شىء دنيوي مالوش اى لازمه وده اغلب الحالات ولو انت مظلوم في حالة زى دي فانت تستحق الظلم لأنك ارتبطت بشىء دنيوي .. اه ممكن يكون في تفاصيل الموقف انت على حق والشىء الدنيوي ده من حقك .. ولكن ربنا بيحبك وعايزك ترتقي فاستجيب وحق وباطل يعني طرف عاوز اخره فقط بيتظلم من طرف تاني يعتقد ان فيه حاجه اسمها دنيا واخره مع بعض الطرف الحق المظلوم هنا في التلاء شديد .. مجتاج حكمه كبيره وصبر الظلم ظلمات اوعى تظلم نفسك بحب اى شىء دنيوي اوعى تظلم طرف عايز اخرة فقط

العجب كان فيه دكتور جراح كبد انجليزي كان كل ما يخلص حاله تاخده الجلاله اوى ويعجب بنفسه ويقوم بالدياثريمى كاتب ال initials بتاعته على الكبد ال initials اللي هما حرفين .. اول حرف من اسمه واول واول حرف من اسم عيلته المهم الدكتور عمل القصه دي كزا مره فالتمريض اشتكاه وال gmc لغت الريجيستريشن بتاعه امبارح كنت مع جراح كبد صديقي مصري وهو شغل ايد حلو وقاللي الكلمه اللي للأسف بيقولها اغلب الجراحين الكبار الايام دي خدت ال orgasm بتاع الحالة وهى حالة من النشوة تصيب الجراح بعد العمليات الكبيرة مزيج من الاعجاب بالنفس والغرور والغرتقاء الشيطاني بالإنسان لدرجة لا يعلمها إلا الله طبعا للأسف مفيش gmc مصري ولا انجليزي هيحاسبك على مشاعرك انما فيه gmc إلهي يقول الله تبارك وتعالى { لَقَدۡ نَصَرَكُمُ ٱللَّهُ فِی مَوَاطِنَ كَثِیرَةࣲ وَیَوۡمَ حُنَیۡنٍ إِذۡ أَعۡجَبَتۡكُمۡ كَثۡرَتُكُمۡ فَلَمۡ تُغۡنِ عَنكُمۡ شَیۡـࣰٔا وَضَاقَتۡ عَلَیۡكُمُ ٱلۡأَرۡضُ بِمَا رَحُبَتۡ ثُمَّ وَلَّیۡتُم مُّدۡبِرِینَ } في غزوة حنين كان عدد المسلمين حوالي عشرتلاف وكان بقى الكلام ده بعد فتح مكه يعنى عز الانتصار النفسي والمادي ويوم حنين المسلمين بصوا للجيش بتاعهم وقالوا لن نغلب اليوم عن قلة وكان العقاب الإلهي فوري العقاب الإلهي نازل علينا من كل حته وفي الطب صوره سوء تعليم وسوء إدارة وانهيار تام لجميع المؤسسات رغم ان الصورة تبان مبهرة من مباني واجهزة وامكانيات إلا ان الوقع كلما عارفينه وحاسينه الإعجاب بالنفس سببه عدم ادراك المعجب بنفسه ان كل ما أوتيه ليس بشطارته ولكن من الله يعني انت ايها الجراح صحتك اللي بتشتغل بيها من ربنا مخك اللي بتاخد بيه قرارات خلقة ربنا الظروف المحيطه بيك اللي ربنا ادهالك عشان تخش طب من والد ووالده وبيت وفلوس من ربنا ظروف التعليم اللى انت وصلتلها عشان تتعلم ولم تتاح لزميلك مش من شطارتك ولكن بتوفيق ربنا ولو كنت انت بشطارتك نطيت بالتعليم على زميلك فانت خدت حق مش حقك وهتتحاسب عليه وعلى كل نتايجه يوم القيامه مخك اللي حفظ العمليه وايديك اللي نفذت العمليه والكتاب اللي قريت منه العمليه وعنيك اللي عماله تبص يمين وشمال جوة العمليه من ربنا الفضل كله لله وربنا لو اتاح نفس الظروف اللي انت خدتها للبواب بتاعك كان ممكن يكون احسن منك ولكن ليبلوكم فيما آتاكم الإعجاب بالنفس هو الباب الوحيد للكبر والكبر هو أول ذنب ارتكب في تاريخ الخلق حين تكبر ابليس وقال أنا خير منه يقولون الفضل يرجع لله ثم لفلان ألا أن الفضل كله لله تواضعوا

الحياة بدون ألم إما غفلة وإما أن موعد ألمك يحن بعد فانت اما في حالة صبر او اما في حالة استعداد للصبر وما صبرك إلا بالله

تأقلم في ظل العبث الكوني التي تعيشه البشرية في العصور الحاليه البعد عن تخصص يحتاج إلى فتح عيادة هو قمة الحكمة

الظلم مش موضوع جديد واصبح عادي كل يوم نسمع عن نايب بيتظلم من سنايره او بالبلدي زى ما بيقولوا .. بيتقري فاتحته كلمنى واحد زميلكوا امبارح مقري فاتحته والظاهر كان ليه معزه خاصة فكل القسم قرا فاتحته بما فيهم رئيس القسم قعدت افكر كده ايه مدى الحرم اللي ممكن يرتكبه نايب جديد لسه مستلم نيابته عشان يتشتم ويتهزأ ويتكالبوا عليه بالشكل ده ده لو كان قتل عيل من عيالهم يا جدع ومجاش في بالي غير مثل مصري اصيل اللي مقدرش ع الحمار بيقدر ع البردعه البوست ليس الهدف منه توصيل اى معلومه ولكنه فضفضة وحسره حسرة على عصور الظلم والقهر لما دكاترة جامعه بيعملوا كده امال سبنا ايه للعامة وعلى رأى أيمن صديقي .. اللي احنا فيه الآن كتير علينا بمعدل الظلم والقهر ده من المفترض ان حالنا يكون اسوأ من كده بكتير بس سبحانه ممشيها ببركته فاعبدوا الله ولا تعبدوا الطب

اى مريض بيشتكي فهو مريض اسوأ حاجه ممكن تعملها كدكتور انك تتفه من شكوى العيان اللي قدامك انت كده بتقتله .. مهما كان اللي هتفولهوله بعد كده من علاج او فحصوات هتطلبها فهو لن يستجيب لك وهيشوف حد غيرك وهيشتم في الدكاترة وفي الطب كله المشكلة بتحصل ان الطب بالنسبة للدكتور كل حياته ولكن المشكلة بالنسبه للمريض هى مشكلة طارئة انت كدكتور على مدار عمرك بتشوف بلاوي سرطانات منتشرة حوادث عيوب خلقيه فشل كلوي وقلبي وكبدي الخ الخ الخ فلما هيجيلك العيان اللي عنده فسفوسع ف دراعه او اللي عنده التهابات معده او التهابات ع الرئة هتنظر له شذرا وهتقوله عبارة سخيفه من عينة انت معندكش حاجة يا عم الحج قوم كده واتنطط او لا لا لا انا مش بعترف بجرثومة المعده انا بقالي ١٥ سنه بلبس نضارة .. ومن غيرها مش بعرف اسوق بالليل .. ورغم ان نظري ناقص نص فقط الا انه مأثر على حاجه مهمه في حياتي المهم نضارتي اتكسرت فرةحت اعمل كشف نضارة وكان دكتور شاب صغير وهو بيعملي المشف مصمم ان انا معنديش حاجه وان التقص البسيط اللي عندي مش مستاهل نضارة وطبعا مكنش مهتم وطلع المقاس غلط والنضارة اللي عملتها ولا ليها اى لازمه ايوة يا سيده انت راجل كبير وبتعمل عمليات ميه زرقا وبيضا وتشيل العين وتركبها تاني ده ميمنعش انك تهتم بالحاجات الصغيره فيا ايها الطبيب قل قولا سديدا ولا تستخف بشكوى المريض ولا تستخف دمك لأن شكوته هى كل حياته بغض النظر عن رأيك فيها { یَـٰۤأَیُّهَا ٱلَّذِینَ ءَامَنُوا۟ ٱتَّقُوا۟ ٱللَّهَ وَقُولُوا۟ قَوۡلࣰا سَدِیدࣰا (٧٠) یُصۡلِحۡ لَكُمۡ أَعۡمَـٰلَكُمۡ وَیَغۡفِرۡ لَكُمۡ ذُنُوبَكُمۡۗ وَمَن یُطِعِ ٱللَّهَ وَرَسُولَهُۥ فَقَدۡ فَازَ فَوۡزًا عَظِیمًا (٧١) }

الأسباب الأسباب التى تتخذها في السعى كلها من الله لا وجود لأسباب في ذاتها فعقلك الذي تفكر به خلقه الله والأفكار التى تتوارد عليه حتى تأخذ قرارات في حياتك فمن الله وجسمك الذي تتحرك به لتنفيذ قرارات أفكارك كله خلق الله وحوله وقوته من الله الناس اللي هتقابلهم وتتكلم معاهم وانت بتنفذ ما تريد هم خلق الله وتحت ارادة الله العلاج اللي هتاخده عشان يشفيك ابتكره انسان الإنسان ده خلق الله استخدم مواد كيميائية من الطبيعة التى خلقها الله وركبها وصنعها بحول الله الدكتور اللي هتروحله هو خلق الله .. وتوفيقك لاختيار الدكتور المناسب تهيأ بقدرة الله .. فهو اللي خلى صاحبك يدلك عليه او خلاك تعرف تدور لحد ما تلاقيه الأسباب من الله والمسبب هو الله حتى تأخذ بالأسباب فانت محتاج قوة وتوفيق انت لا تمتلك منهم شىء فلا حول ولا قوة ولا توفيق ولا تسديد إلا بالله ومن عند الله

دكاترة السوشيال بصراحه فيديوهات الدكاترة ع السوشيال ميديا مقززة ومستفزة جداً الموضوع مش بس دعاية شخصية رخيصة ولكن معلومات غلط وكبر غرور وتفاخر وحاجه تقرف اللي من الدكاترة ومحتاج يعمل فيديوهات فهولكوا على مجموعة مواضيع مهمه هى اللي تستاهل الدكاترة تشتغل عليها .. هتعملك دعايه وفي نفس الوقت تكون مفيده للمجتمع الفاسد الجاهل اللي احنا عايشين فيه ١. خطورة المضادات الحيوية وليه لازم يتك تحجيم استعمالها ٢. المضاعفات بعد العمليات وان المريض يكون عارف ان فيه مضاعفات ممكن تحصل وليست بسبب اهمال او جهل الدكتور ٣ . العلاقة بين الدكتور والمريض وانها تكون بروفيشينال دون تعالى من الدكتور او تنازل منه ٤ . الاكل الاكل الاكل .. كل دكتور لازم يكون عنده معلومات عن الاكل ولو الاساسيات ويتكلم كل شويه عشان ميجيش نظام طيبات جديد يحتل عقول البشر ٥. الكشف المبكر للأورام ومين العيانين الأكثر عرضه للأورام حسب كل ورم ٦. خطورة الزبالة اللي في الشوارع .. الناس لازم يتشرحلها ليه الزبالة خطر عشان تقتنع ٧ . البصق في الشوارع وقد ايه ده بيهدد البيئة والصحه العامه ٨ . ادمان السكر وازاى انه اقوى على الانسان من ادمان المخدرات ٩. النظافه الشخصيه وخطورتها على العلاقات الاجتماعيه ١٠. شرح الابتكارات العلميه الجديدة في الطب باسلوب شيق يحبب الناس في العلم ١١. خطورة المسكنات بالذات ال NSAID وايه البدايل بتاعتها ١٢. الفرق ما بين الفيرس والبكتيريا والفطريات ١٣ . ليه مينفعش التشخيص والعلاج ع الواتس ١٤. مشكلة الطبيب مع اهل العيان كل ما يحصل موقف بينك وبين عيان او اهله هتلاقي موضوع يستاهل تتكلم فيه

الحكم على الناس مهما حاولت تمنع نفسك هتحكم على من حولك هتفضل عايش تقول عمرك تبص للناس حواليك وتقول فلان شراني فلان محترم جدا فلان ذكي فلان مخه ضيق ف شغلك هتقول المدير مغرور والغفير ماكر وفلان مالوش لازمه وفلان بيتكسف وفي عيلتك وعيلة مراتك وحتى وانت ماشي في الشارع فلان سايق مستعجل وفلان متهور وفلان مقرف والواحد لما بجى يتجوز يحكم على الواحده دي طلباتها كتير دي تافهة دي انانيه دي غلبانه والعكس صحيح الواحده تقول ده متدين وبيصلي ده بخيل ده كريم ده لسانه حلو طول منتا ماشي انت مكنة تقييم للبشر ومع كل النصايح بتاعت اوعى تحكم على حد وخليك ف نفسك لن تستطيع أن تمنع نفسك من الحكم على من حواليك وان كان لابد من الحكم فاعرف بقى بعض القواعد يمكن تعترف بجهلك اولا كلنا بلا ضغط حلوين وجميلين وكيوت يعني لو حد من قرايبك عازمك في بيته ضحك ولعب واكل وهزار وهتقول ده احسن واحد بس انت متعرفش لو حصل معاك ازمه ماديه او صحيه الأحسن واحد ده هبعمل ايه .. غالبا هيعمل من بنها ثانيا ومن الناس من يعجبك قوله فيه ناس بتتكلم حلو اوى .. سواء هيتكلم بالدين او بالعلم او بالانجليزي المعووج انت مشفتوش وهو بيزعق ويشتم ومتنرفز ثالثاً فلان اللي حكمت عليه بصفه سلبيه انت برضه مشفتوش وهو واقف وقفة جدعنه مع اخوه او صاحبه رابعاً .. المعيار معيار الحكم الحقيقي شىء واحد هو فلان ده راجل عايز دنيا ولا اخرة؟ وعلى هذا المعيار كلنا في الهوا سوا يا صاحبي كلنا عايزين نتفسح وناكل ونشرب ونتفاخر بكلامنا اللي كله حكمه وعلم ان كان هو عايز دنيا نساء ومال انت عايز دنيا تفاخر .. مفرقتش كتير يمكن هو ضرره اقل منك خامساً لو كان من الحكم بد فتعرف على صفات الإنسان من خلال تصرفاته تدبر صفات العجلة والجهل والظلم واليأس والكنود والضعف تدبر المبذرين وكيف آخو الشيطان وتدبؤ المتكبرين وكيف أكثروا الجدال ساعتها هتؤمن ان القرآن حق لا تحكم على الأشخاص واحكم على تصرفاتهم وحاول ان تتفاداها في نفسك واولادك لو فعلت هتلاقي موضوع حكمك على الأشخاص مش هيكرهك فيمن حولك بل هتشفق عليهم وده هيقلل غيظك ونرفزتك وحنقك على المجتمع مجتمع غارق في حب الدنيا وعمال يشدنا معاه

{ إِنَّا عَرَضۡنَا ٱلۡأَمَانَةَ عَلَى ٱلسَّمَـٰوَ ٰ⁠تِ وَٱلۡأَرۡضِ وَٱلۡجِبَالِ فَأَبَیۡنَ أَن یَحۡمِلۡنَهَا وَأَشۡفَقۡنَ مِنۡهَا وَحَمَلَهَا ٱلۡإِنسَـٰنُۖ إِنَّهُۥ كَانَ ظَلُومࣰا جَهُولࣰا } خد بالك كده ربنا عرض الأمانة على مين السماوات الأرض الجبال وحتى لما عرض الأمانه عليهم اداهم حرية الإختيار ودخل الإنسان في الموضوع مع إن الأمانه لم تكن معروضه عليه في الأصل الإنسان كان بيتفرج على عرض الأمانة وقام اغتر بنفسه وقال انا هشيل يا عم تشيل ايه لا دنا تمام وفاهم كل حاجه وهشيل جاهل فعلاً .. ظلم نفسه وظلم غيره انت من قبل ما تتولد اخترت ان يكون ليك قوة عقليه تفوق غيرك انت اخترت تكون قدوة ومعلم وحكيم اخترت تحمل علم ولكن لما دخلت ف القصه بجد تفاخرت بعلمك .. اغترت بيه .. افتكرت نفسك ان انت اشطر دكتور واوعى دكتور اتريقت ع اللي اقل منك .. شتمت في الجهلة والبسطاء اللي انت اتعلمت عشان تعلمهم او تستحملهم مسكت سيف غرورك وقطعت بيه يمين وشمال ولما الحياة كسرتك اعترفت انك مش قدها .. وعرفت اد ايه انك كنت ظلوم جهول يا من طلبت الامانه دون ان تعرض عليك شيل على قد ما تقدر

قواعد حياتيه للتردد لن تستقيم حياتك الا بوجود قواعد معينه تحطها لنفسك وتمشي عليها طول عمرك من الأشياء المتعبه للإنسان التردد والحيره وتعالى نقسم المواقف اللي فيها تردد وحيره الى تلت حاجات واحد .. حاجه اعملها دلوقتي ولا استنى اتنين .. حاجه أعملها ولا معملهاش تلاته .. حاجتين قدامي اعمل ايه فيهم اول نوع لو قدامك حاجه من النفترض تعملها حط قاعده انك تعملها حالا دون انتظار حتى لو كان ممكن الانتظار انت متعرفش لما تنتظر ايه ممكن يحصل .. جايز صحتك متساعدكش .. جايز الظروف تتغير ومتعرفش تعملها بعدين .. التردد هنا كسل غير مبرر وعواقبه لن تكون في صالحك تاني نوع حاجه اعملها ولا معملهاش ... الاجابه تعملها .. ولكن اجمع كل المعلومات اللازمه عن القصه دي .. اول ما تحس انك تعبت وزهقت من جمع المعلومات يبقى انت كده عملت اللي عليك وتوقف جمع معلومات احرص ان الحاجه دي متكونش مخالفة لله والأعراف الاجتماعيه والمنطق اسأل حد اكبر منك تثق فيه .. في زماننا هذا اصبح صعب لأن الناس آرائها بتلغبطك ولكن اعتبر السؤال نوع من جمع المعلومات صلي استخارة .. لازم تصلي استخاره في الأوقات المحبب فيها الاستخارة توكل واعملها فوراً .. اجابة الاستخارة ام لو مفيهاش خير ليك ربنا هيوقفهالك تالت نوع الحيره بين طريقين ده اصعب نوع ولكن غالبا انت محتار بين طريقين عشان معندكش معلومات كافيه .. راجع معلوماتك واتعب شويه لان مفيش طريقين متساويين في كل شىء لازم واحد كفته ترجح عن التاني طب افرض جمعت كل المعلومات وتعبت ولسه محتار .. اسأل حد تثق فيه طب افرض سألت ولسه محتار .. مستحيل مفيش حاجه فيهم اقرب الى قلبك .. كان رسول الله صلى الله عليه وسلم اذا خير بين شيئين اختار ايسرهما اختار طريق وصلي استخارة وامشي فيه فورا لا تجعل الشيطان يلعب بيك ويضيع عليك وقتك .. كلها أصلا تردد في أمور دنيوية مش هتخسر حاجه حتى لو الطريق غلط ف ده مقصود عشان تتعلم طالما عملت اللي عليك توكل على الله والآخرة خير وابقى

بل تؤثرون الحياة الدنيا أى مشاعر سلبية تصيب الإنسان سببها أنه آثر الحياة الدنيا فلو حاسس انك محبط بعد امتحان فده عشان انت كنت تفضل انك تجيب اعلى الدرجات فتتفاخر وتفرح في الدنيا ولو حاسس ان المرض مسببلك احباط ويأس فانت تتحسر على لحظات الفرحة والراحه التى تفقدها في الحياة الدنيا ولو حاسس ان الدنيا سوده ومتقفله فانت تتحسر على لحظات نشوة دنيويه اما ضاعت او هتضيع منك اى احساس سلبي زى يأس حزن غضب جزع بيضيع عليك لحظات كان ممكن تحمد فيها او تستغفر او تصلي او تعمل عمل صالح تكسب بيه اخرة ولكننا نؤثر الحياة الدنيا فصدق الله العظيم حين قال والآخرة خير وابقى

يا دكاترة .. حد شغال جهاز هضمي ؟ محتاج استشارة ضروري

سبحان الله التسبيح هو تنزيه الله عن كل عيب ونقص وسوء يعني لما تقول سبحان الله انت بتكفر عن الكزا مرة اللي انت قلت فيها ليه يا رب عملت فيا، ليه يا رب خلقتنى في البلد دي، ليه يا رب ادتني الوظيفة دي، ليه يا رب بلتني بالزوجه دي .. قولك سبحان الله ان ربنا ادرى و ان انا معرفش الحكمة لما تقول سبحان الله انت بتكفر عن كل الظنون اللي ظننتها بالله لما شفت الحروب والدم والقتل وكل الوساوس اللي جتلك بتقولك ليه ربنا سمح بكل ده وبتعترف بلا تكبر ولا جدال ان يا رب انا جاهل معرفش وانت ادرى لما تقول سبحان الله انت بتكفر عن كل الفلسفه الفارغه اللي جت في بالك في تحليل اسباب خلق الكون والإنسان والملائكة والشياطين وبتعترف بجهلك وتقوله يا رب انت ادرى وانا معرفش لما تقول سبحان الله بتتواضع عن كل فكرة وكل سؤال وكل خاطرة وكل ظن ظننته بالله وتعترف انك جاهل ظالم لا تعلم لما تقول سبحان الله انت تعترف بعظمة لا يعلوها عظمه وبقوة لا يعلوها قوة وحكمة لا يعلوها حكمة وعزة لا يعلوها عزة حتى لو جزء من مخك ووساوسك مازال متشكك كثرة التسبيح باللسان ستؤدي حتما إلى نتيجة وهو التسبيح بالقلب والاعتراف بأن الله له العلم والحكمة ونحن لا نعلم سبحان الله وبحمده سبحان الله العظيم

بابا وماما ناس كتير بتبقى قلقانه وخايفه وصعبان عليها المصاريف اللي اتصرفت عليهم في الدراسه من ابوهم وامهم ابوك وامك مش هيستفادوا حاجه بخوفك وقلقك .. هما صرفوا عليك كل ده وتعب الاعب ده كله عشان تنجح ف حياتك خوفك وقلقك من الشيطان .. الشيطان يعدكم الفقر خوفك وقلقك هيخليهم يتحسروا عليك اكتر لانك حتى لو نجحت ماديا الخوف والقلق هياكلك نفسيا ويحولك الى مسخ رد الجميل لابوك وامك انهم يشوفوك ذو نفس مطمئنه، هادي، مش متلخبط، عارف انت بتعمل ايه حتى لو تقديراتك ضعيفه الخوف والقلق مش حله انك تكتر المزاكرة .. هتنسى اللي هتزاكره الخوف والقلق حله انك تكتر من الذكر والصلاة والنوافل وقيام الليل ده اللي هيبعد عنك افكار الخوف والقلق والشيطان ويستبدلها بافكار هينه لطيفه من عينة ان شاء الله خير .. ان شاء الله هلاقي فرص تعليم وسفر وجواز وشغل وفلوس الشيطان يعدكم الفقر الشيطان يخوف أوليائه { وَمَن یَعۡشُ عَن ذِكۡرِ ٱلرَّحۡمَـٰنِ نُقَیِّضۡ لَهُۥ شَیۡطَـٰنࣰا فَهُوَ لَهُۥ قَرِینࣱ }