Muhammad Sameh

أنا حياتي كلها متوقفة على شهر ١١ وبالتحديد البلاك فرايداي، اشتراكاتي كلها بدفعها في نفس الوقت بحكم العروض الي بتبقى موجودة فالاشتراكات السنوية كلها بتبقى في نفس الوقت. ببقى عارف ان هييجي الشهر ده وهتخيط شوية بس في المجمل بوفر، بس السنادي هتخيط بجد، ومش لوحدي كلنا هنتخيط، فحبيت أعرفك عشان تلحق تحوش من دلوقتي😂

مؤخرًا أنا بقيت شخص مهووس بالأرقام! بحب أتتبع كل حاجة في حياتي، بقيس وزني كل يوم، بدون كل جنيه صرفته، وحتى بحسب أكلي وكمية المياة الي بشربها، لأني مؤمن بمقولة "ما لا يقاس لا يدار". *️⃣ وده بيساعدني افهم حاجات اكتر عن نفسي، الأرقام والبيانات بتكشفك انماط انت عمرك ما كنت انك هتاخد بالك منها، خصوصًا لو اديت البيانات دي لذكاء اصطناعي يحللها. *️⃣ بس دايمًا كانت بتواجهني مشكلة مع الفلوس والمصاريف، كل الأدوات الي بتنظملك مصاريفك بيكون ناقصها حاجة، وانا بالفعل جربت عشرات الأدوات. *️⃣ فيه تطبيقات تصميمها سئ جدًا وصعبة الاستخدام، وحاجات تانية بتحتاج انك تضيف كل عملية بنفسك وده مش عملي خالص لأنك هتنسى تضيفها، او حاجات تانية مش بتدعم اصلًا اللغة العربية ومش موجهة للمستخدم العربي. *️⃣ لحد ما من كام شهر اكتشفت بالصدفة تطبيق مصري جديد اسمه MoneyLoop ، وبعد استخدام أكتر من شهرين أقدر أقول إنه أقرب تطبيق لقيته لحد دلوقتي للي كنت بدور عليه *️⃣ اول حاجة التطبيق ده تصميمه وواجهة المستخدم فيه ممتازة جدًا، كل حاجة بسيطة وموجودة في مكانها الصح وكنت مستغرب من مستوى الـ UI لدرجة إني حسيت إن اللي عامل التطبيق لازم يكون Designer في الأساس. *️⃣ العمليات كلها بتنضاف بشكل تلقائي عن طريق Shortcut بيقرأ الرسايل بتاعت البنك، وينظم العمليات وحتى بيشوف مين التاجر ويضيفلك اللوجو بتاعه جنب العملية، ودي حاجة قمة في الروعة! *️⃣ تقدر تضيف برضه العمليات بشكل يدوي وعند طريق صوتك زي مثلًا تقول"أنا اشتريت ب٥٠ جنيه فول من الشبراوي" *️⃣ وكمان تقدر تضيف و تتابع كل اشتراكات الابلكيشنز بتاعتك من خلال المدفوعات المتكررة وده حللي مشكلة كبيرة لاني مشترك في حاجات كتيرة وانا أصلا معرفهاش. *️⃣ وكمية تحليلات ومميزات كتيرة أنا لو قعدت احكي عليها مش هخلص، بس ده بالنسبالي كله كوم والدعم الفني بتاعهم كوم تاني. *️⃣ عاملين مجتمع على التليجرام تقدر تستفسر وتطلب فيتشر، وتقريبًا بيردوا في نفس الدقيقة وعندهم اهتمام غير طبيعي بالدعم الفني، ودي حاجة أنا عمري ماشوفتها في اي تطبيق تاني وبالنسبالب ميزة اكتر من كافية. *️⃣ بالمناسبة أنا بستخدم التطبيق بقالي اكتر من شهرين، ومرضتش اتكلم عنه غير لما اجربه بشكل كافي، تقدر تستخدم الابلكيشن بشكل مجاني او انك تشترك في الخطة المدفوعة الي تقريبًا بـ 58 جنيه في الشهر. *️⃣ وبرضه أنا تواصلت مع فريقهم وطلبت منهم كود خصم للناس اللي هتيجي من طرفي، وادوني خصم 200 جنيه على الاشتراك السنوي باستخدام الكود:

SAMEH001

وبأكد تاني ده مش إعلان مدفوع، وأنا اللي طلبت منهم الكود بعد ما استخدمت التطبيق وعجبني فعلًا تقدر تحمل التطبيق من اللينك ده : https://abr.ge/0kkaa8n وده لينك مجتمعهم على التليجرام: https://t.me/MoneyloopCommunity

ده ارخص Smart Switch ممكن تشتريه، وبصراحة عرض ممتاز. دي فيشة من LDNIO بتستخدمها عشان تحول اي جهاز عندك يكون سمارت واشغله من عن طريق الموبايل من خلال تطبيق Tuya. https://link.amazon/B0515KQ7F بيتحمل حتى 10 أمبير وبيجي بتصميم بيدعم الفيش الثنائية والثلاثية.

لسه واصل حالًا من برا مصر، ومن كتر ما أنا متحمس قولت أفرجكم عليه على طول 🥳 والأحلى كمان انه بيدعم Matter، ودي معلومة اول مرة اعرفها دلوقتي!

تقدر تشتري ايه بثمن الـ iPhone Duo الجديد؟

اخيرًا، كروت تيلدا اشتغلت على انستاباي 🥳🥳

وكمان لو انت وصاحبك معاكم تيلدا تقدروا تحولوا لبعض فلوس من خلاص ابلكيشن تيلدا نفسه من غير اي رسوم تحويل، وكدا كدا الفلوس برضه هتبقى موجودة على انستاباي 🤓

دلوقتي اخيرًا تقدر كارت Telda بانستاباي! ابلكيشن تيلدا يعتبر من الأفضل في السوق، وكان ناقصه انه يتربط بانستاباي عشان يبقى ابلكيشن شبه متكامل، فدي خطوة كويسة جدًا. طبعًا عشان تقدر تربطه هتختار بنك القاهرة، لأن تيلدا متعاقدين معاهم ومفيش بنك اسمه تيلدا أصلا هو مجرد ابلكيشن.

من الحاجات الي اكتشفتها مؤخرًا أنك لما تتعلم أكتر في مجال ما، هتكتشف قد ايه ان علمك ده ضئيل ومحتاج تتعلم أكتر. تبدأ تقلق لما تتغر في نفسك وتشوف انك خلاص بقيت جامد ومفيش زيك، ساعتها دي هتبقى بداية النهاية، احساس الخطر هو المُحرك الأساسي للتطور، تبقى قلقان عشان انت عارف ان العلم الي عندك ضئيل مقارنةً بناس تانية وشايف ان شغلك مش افضل حاجة وفيه احسن بكتير من كدا، طول ما انت بتحس بكدا فأنت تمام.

*️⃣ لما بتاخذ شاور دماغك بتفكر في الفطار مش في سريان الماء الي بينعشك. *️⃣ لما بتاكل الفطار انت بتفكر في الشغل مش في ريحة الاكل الجميلة والقهوة. *️⃣ لما بتشتغل انت بتفكر في الوقت الي هتخلص فيه، ومش بتحمد ربنا على نعمة الشغل. *️⃣ وانت راجع من الشغل بتفكر في البيت بس مش بتحمل ربنا على المناظر الطبيعية وشكل الغروب. *️⃣ ولما ترجع البيت بتفكر هتعمل ايه بكرة ومش بتحمد ربنا على نعمة الأمان واهلك الي حواليك. امتى فعلًا هتبدأ تعيش، دايمًا دماغك مشغولة بالمستقبل وبتخليك تنسى تستمتع باللحظة والنعم الي محاوطاك في كل حتة، أدي نفسك فرصة تتدبر في نعم الله، مش جايز تبقى اخر فرصة تستمتع بيهم؟

There’s two types of people.

ايدك واجعاك دايمًا من مسكة الماوس صح؟ عندك التهاب في الأعصاب، ومش قادر تشتغل لفترات طويلة. *️⃣ من فترة كبيرة طلع نوع جديد من الماوسات اسمه Ergonomic Mouse او بمعنى تاني Vertical Mouse وده بيعالج مشاكل الماوس التقليدي، بس للاسف الماوس ده مش مشهور عندنا اوي. *️⃣ شوف، لما تحط إيدك على ماوس عادي، بتضطر تلف الساعد للداخل عشان كف إيدك يبقى مواجه للمكتب. الحركة دي اسمها Pronation، وبتعمل مشاكل على المدى الطويل. *️⃣ تصميم الڤيرتكال ماوس حل المشكلة دي وبدل ما كف ايدك يبقى لتحت بيخلي كف الايد للجنب بزاوية ٧٠ درجة وده هيخلي عظمتين الساعد في وضعهم الطبيعي ومش ضاغطتين على بعض، وده بيقلل الألم. *️⃣ هشرحلك بطريقة ابسط، جرب دلوقتي تحط ايدك أكنك هتستعمل ماوس بعد كدا غير وضعية ايدك اكنك هتسلم على حد وهتحس بالفرق في ذراعك كله وبالذات في كتفك وكف ايدك. *️⃣ اشهر الماوسات الي بالشكل دي هي Logitech Mx Vertical بس انصحك قبل ما تفتكر تستثمر في ماوس بالسعر ده انك تجرب حاجة رخيصة الاول وتشوف هترتاح في النوعية دي ولا لأ، ولحسن الحظ فيه ماوس ناسخ نفس التصميم بتاع Mx Vertical اسمه RAPOO EV310M وحاليًا عليه عرض وسعره 888ج https://link.amazon/B0ferwyuf هو ماوس متواضع ويفي بالغرض انصح انك تجرّبه الاول فترة وتشوف هترتاح ولا لا مع النوعية دي من الماوسات قبل ما تستثمر في اللوچيتيك. وده لينك الـMX Vertical عامل ٥٠٠٠ ج في شرق اسيا، اظن لو دورت ممكن تلاقيه بسعر افضل: https://www.eastasiaeg.com/en/logitechr-mx-vertical-advanced-ergonomic-mouse-graphite.html

شوية دردشة مع اخواتي مفيهاش فايدة، عشان متضيعش وقتك. زمان من اكتر من ٣ سنين كنت بعاني من مشكلة اني لما اعرف معلومة جديدة او اوصل لاكتشاف جديد كنت ببقى مبسوط جدًا، لكن لما اشارك ده مع أصحابي والدائرة القريية مني مكنتش بلاقيهم متحمسين زي ما أنا متحمس، مكانتش عينهم بتلمع زي ما عيني بتعمل، ونوعًا ما ده كان بيسببلي احباط. أنا كنت شخص بيحب المشاركة، كنت بتبسط لما أشوف حد عينه بتلمع لما اقوله حاجة مبهرة أنا مهتم بيها، عشان كدا توجهت اني اشارك الحاجات دي على السوشيال ميديا، مش مهم العدد والريتش على قد ان حد ينبهر زيي لما يعرف المعلومة دي. وعشان كدا اخترت مجتمع زي تليجرام، مفيهوش ريتش، مفيهوش الجوريزم، بس فيه ناس مهتمة بنفس الحاجات الي أنا مهتم بيها. على مدار سنتين حاولت ابني الدايرة القريبة مني الي عندها نفس اهتماماتي، بس مع الوقت انشغلت ومبقتش اقدر اشارك نفس الحاجات الي أنا مهتم بيها، بل مبقتش فاضي اني اعمل الحاجة الي بحبها، ومع الوقت الواحد اهتمامته بتختلف والحياة بتسحبه اكتر. بس بعدها أدركت ان الحياة بقى لونها رمادي، والحاجات كنت بتفرغ فيها طاقتك وبتحسن بيها شغفك مبقتش موجودة. عشان كدا قررت ارجع، ولو مش بنفس الشكل والشغف الي كان موجود في الاول، بس احاول استرد الطاقة ده من تاني. ويظل نفس الهدف موجود عندي، اني لما اشارك حاجة مع حد أشوف شغفه وعينه وهي بتلمع. بعد كل الدردشة دي أنا محتار في حاجة وعاوز اخد رأيكم فيها. بفكر اني اغير شكل المحتوى بتاعي بما ان اهتماماتي اختلفت. هدف القناة الأساسي والي أغلبكم دخل عشانه هي التريكات والأدوات الي بتزود الإنتاجية. حاليًا أنا مهتم برضه بمراجعات الهاردوير، موبايلات كاميرات واي حاجة ملموسة، هل ادمج المحتوى ده في نفس القناة ولا اعمل له قناة منفصلة عشان محدش ينزعج ؟

تعجبني أنا الجليتشات بتاعت تليجرام 😂 كاتب اني معايا 2 مليار ستار، حد يعرف دول يساووا كام دولار؟ 💵

فيه حاجات من كتر ماهي صغيرة وعملية بتشيلها معاك طول الوقت عشان متعرفش امتى هتحتاجها زي الـMini Work Light دي، من اروش الحاجات الي اشتريتها الفترة الي فاتت حجمها صغير جدًا، فممكن تحطها في شنطتك، تعلقها في ميدالية المفاتيح، وتفضل معاك طول الوقت. ورغم حجمها، خامتها محترمة جدًا لأنها معمولة من المعدن. عندك 5 مودات إضاءة، وبتتحكم فيهم كلهم من الزرار اللي على الجنب، سطوعها بيوصل لحد ٤٢٠ لونين، بتتشحن Type-C، والبطارية بتقعد حوالي ساعتين استخدام متواصل. بس اللي عجبني إنهم استغلوا تقريبًا كل جزء فيها من ورا عندك مفك عادة ومفك صليبة، لو احتجتهم في أي موقف سريع. فيها مغناطيس قوي، فممكن تلزقها في أي سطح معدن وتسيب إيدك فاضية وإنت شغال. ومن تحت كمان فيها مكان للـTripod، لو محتاج تثبت الإضاءة في زاوية معينة. وحتى فيها جزء تقدر تستخدمه كفتّاحة كانز. كل ده بسعر 250 جنيه بس! ده اللينك بتاع الاضاءة: https://link.amazon/B0b2MabHj وده لينك فيديو مراجعة أنا عملته للمنتج لو عاوز تتفرج عليه

الاكستنشن الي فاتت طلع صاحبها صهيوني فمسحتها، نبقى نشوف غيرها بقى 🫡

ايه رأيك تحول المتصفح بتاعك لمخزون تغذية بصرية مبيخلصش؟ من افيد الإضافات الي تحطها على المتصفح الخاص بيك هي Color Tab, ميزتها انها بتستبدل الواجهة الي بتظهرلك لما تعمل New Tab وبتديك Color Palette عشوائية. لما بتقف على لون من الألوان بيطلعلك الكود بتاعه وبمجرد ضغطه عليه هيتاخد كوبي. لو عجبتك الباليت بتدوس على اللوجو الي بيبقى موجود فوق على اليمين ومن خلاله ممكن تعمل Like للباليت وتحفظها عشان ترجعلها في وقت تاني او انك تحفظ الصورة الي فيها الألوان وكمان ممكن تعمل للباليت شير عن طريق لينك بتديه لأي حد. تقدر تحملها من هنا وبالمناسبة بتشتغل على جوجل كروم واي متصفح بييجي بنواه "كروميم" زي Edge و Brave و Opera.

عودة للمحتوى المرئي يا أصدقاء، ونسأل الله الثبات والتوفيق. ❤️ ده لينك حساب انستجرام بتاعي لو حابب تتابع النوع ده من المحتوى: https://www.instagram.com/_muhammadsameh وده لينك حساب تيكتوك: https://www.tiktok.com/@muhammadsaico

تغيير في التايبوجرافي الخاص بإنستجرام.

من أكتر الحاجات اللي ممكن تدمرك حرفيًا هي القلق، وبالذات القلق الزائد والتفكير الكتير. لو أنت قلقان من شئ هيحصل فالقلق ده هيخلي معاناتك مضاعفة، فلو الموضوع طلع من ايدك، فلازم يطلع من دماغك برضه. القلق الزائد ده بيخليك تفكر في اسوأ سيناريو ممكن يحصل، وانا عاوز افاجئك أن السيناريو ده في أكثر الحالات مش بيحصل! وبعدين حتى لو حصل فأنت مفيش حاجة في ايدك تعملها عشان تتجنبه، طيب ليه القلق؟