Muhammad Sameh

There’s two types of people.

ايدك واجعاك دايمًا من مسكة الماوس صح؟ عندك التهاب في الأعصاب، ومش قادر تشتغل لفترات طويلة. *️⃣ من فترة كبيرة طلع نوع جديد من الماوسات اسمه Ergonomic Mouse او بمعنى تاني Vertical Mouse وده بيعالج مشاكل الماوس التقليدي، بس للاسف الماوس ده مش مشهور عندنا اوي. *️⃣ شوف، لما تحط إيدك على ماوس عادي، بتضطر تلف الساعد للداخل عشان كف إيدك يبقى مواجه للمكتب. الحركة دي اسمها Pronation، وبتعمل مشاكل على المدى الطويل. *️⃣ تصميم الڤيرتكال ماوس حل المشكلة دي وبدل ما كف ايدك يبقى لتحت بيخلي كف الايد للجنب بزاوية ٧٠ درجة وده هيخلي عظمتين الساعد في وضعهم الطبيعي ومش ضاغطتين على بعض، وده بيقلل الألم. *️⃣ هشرحلك بطريقة ابسط، جرب دلوقتي تحط ايدك أكنك هتستعمل ماوس بعد كدا غير وضعية ايدك اكنك هتسلم على حد وهتحس بالفرق في ذراعك كله وبالذات في كتفك وكف ايدك. *️⃣ اشهر الماوسات الي بالشكل دي هي Logitech Mx Vertical بس انصحك قبل ما تفتكر تستثمر في ماوس بالسعر ده انك تجرب حاجة رخيصة الاول وتشوف هترتاح في النوعية دي ولا لأ، ولحسن الحظ فيه ماوس ناسخ نفس التصميم بتاع Mx Vertical اسمه RAPOO EV310M وحاليًا عليه عرض وسعره 888ج https://link.amazon/B0ferwyuf هو ماوس متواضع ويفي بالغرض انصح انك تجرّبه الاول فترة وتشوف هترتاح ولا لا مع النوعية دي من الماوسات قبل ما تستثمر في اللوچيتيك. وده لينك الـMX Vertical عامل ٥٠٠٠ ج في شرق اسيا، اظن لو دورت ممكن تلاقيه بسعر افضل: https://www.eastasiaeg.com/en/logitechr-mx-vertical-advanced-ergonomic-mouse-graphite.html

شوية دردشة مع اخواتي مفيهاش فايدة، عشان متضيعش وقتك. زمان من اكتر من ٣ سنين كنت بعاني من مشكلة اني لما اعرف معلومة جديدة او اوصل لاكتشاف جديد كنت ببقى مبسوط جدًا، لكن لما اشارك ده مع أصحابي والدائرة القريية مني مكنتش بلاقيهم متحمسين زي ما أنا متحمس، مكانتش عينهم بتلمع زي ما عيني بتعمل، ونوعًا ما ده كان بيسببلي احباط. أنا كنت شخص بيحب المشاركة، كنت بتبسط لما أشوف حد عينه بتلمع لما اقوله حاجة مبهرة أنا مهتم بيها، عشان كدا توجهت اني اشارك الحاجات دي على السوشيال ميديا، مش مهم العدد والريتش على قد ان حد ينبهر زيي لما يعرف المعلومة دي. وعشان كدا اخترت مجتمع زي تليجرام، مفيهوش ريتش، مفيهوش الجوريزم، بس فيه ناس مهتمة بنفس الحاجات الي أنا مهتم بيها. على مدار سنتين حاولت ابني الدايرة القريبة مني الي عندها نفس اهتماماتي، بس مع الوقت انشغلت ومبقتش اقدر اشارك نفس الحاجات الي أنا مهتم بيها، بل مبقتش فاضي اني اعمل الحاجة الي بحبها، ومع الوقت الواحد اهتمامته بتختلف والحياة بتسحبه اكتر. بس بعدها أدركت ان الحياة بقى لونها رمادي، والحاجات كنت بتفرغ فيها طاقتك وبتحسن بيها شغفك مبقتش موجودة. عشان كدا قررت ارجع، ولو مش بنفس الشكل والشغف الي كان موجود في الاول، بس احاول استرد الطاقة ده من تاني. ويظل نفس الهدف موجود عندي، اني لما اشارك حاجة مع حد أشوف شغفه وعينه وهي بتلمع. بعد كل الدردشة دي أنا محتار في حاجة وعاوز اخد رأيكم فيها. بفكر اني اغير شكل المحتوى بتاعي بما ان اهتماماتي اختلفت. هدف القناة الأساسي والي أغلبكم دخل عشانه هي التريكات والأدوات الي بتزود الإنتاجية. حاليًا أنا مهتم برضه بمراجعات الهاردوير، موبايلات كاميرات واي حاجة ملموسة، هل ادمج المحتوى ده في نفس القناة ولا اعمل له قناة منفصلة عشان محدش ينزعج ؟

تعجبني أنا الجليتشات بتاعت تليجرام 😂 كاتب اني معايا 2 مليار ستار، حد يعرف دول يساووا كام دولار؟ 💵

فيه حاجات من كتر ماهي صغيرة وعملية بتشيلها معاك طول الوقت عشان متعرفش امتى هتحتاجها زي الـMini Work Light دي، من اروش الحاجات الي اشتريتها الفترة الي فاتت حجمها صغير جدًا، فممكن تحطها في شنطتك، تعلقها في ميدالية المفاتيح، وتفضل معاك طول الوقت. ورغم حجمها، خامتها محترمة جدًا لأنها معمولة من المعدن. عندك 5 مودات إضاءة، وبتتحكم فيهم كلهم من الزرار اللي على الجنب، سطوعها بيوصل لحد ٤٢٠ لونين، بتتشحن Type-C، والبطارية بتقعد حوالي ساعتين استخدام متواصل. بس اللي عجبني إنهم استغلوا تقريبًا كل جزء فيها من ورا عندك مفك عادة ومفك صليبة، لو احتجتهم في أي موقف سريع. فيها مغناطيس قوي، فممكن تلزقها في أي سطح معدن وتسيب إيدك فاضية وإنت شغال. ومن تحت كمان فيها مكان للـTripod، لو محتاج تثبت الإضاءة في زاوية معينة. وحتى فيها جزء تقدر تستخدمه كفتّاحة كانز. كل ده بسعر 250 جنيه بس! ده اللينك بتاع الاضاءة: https://link.amazon/B0b2MabHj وده لينك فيديو مراجعة أنا عملته للمنتج لو عاوز تتفرج عليه

الاكستنشن الي فاتت طلع صاحبها صهيوني فمسحتها، نبقى نشوف غيرها بقى 🫡

ايه رأيك تحول المتصفح بتاعك لمخزون تغذية بصرية مبيخلصش؟ من افيد الإضافات الي تحطها على المتصفح الخاص بيك هي Color Tab, ميزتها انها بتستبدل الواجهة الي بتظهرلك لما تعمل New Tab وبتديك Color Palette عشوائية. لما بتقف على لون من الألوان بيطلعلك الكود بتاعه وبمجرد ضغطه عليه هيتاخد كوبي. لو عجبتك الباليت بتدوس على اللوجو الي بيبقى موجود فوق على اليمين ومن خلاله ممكن تعمل Like للباليت وتحفظها عشان ترجعلها في وقت تاني او انك تحفظ الصورة الي فيها الألوان وكمان ممكن تعمل للباليت شير عن طريق لينك بتديه لأي حد. تقدر تحملها من هنا وبالمناسبة بتشتغل على جوجل كروم واي متصفح بييجي بنواه "كروميم" زي Edge و Brave و Opera.

عودة للمحتوى المرئي يا أصدقاء، ونسأل الله الثبات والتوفيق. ❤️ ده لينك حساب انستجرام بتاعي لو حابب تتابع النوع ده من المحتوى: https://www.instagram.com/_muhammadsameh وده لينك حساب تيكتوك: https://www.tiktok.com/@muhammadsaico

تغيير في التايبوجرافي الخاص بإنستجرام.

من أكتر الحاجات اللي ممكن تدمرك حرفيًا هي القلق، وبالذات القلق الزائد والتفكير الكتير. لو أنت قلقان من شئ هيحصل فالقلق ده هيخلي معاناتك مضاعفة، فلو الموضوع طلع من ايدك، فلازم يطلع من دماغك برضه. القلق الزائد ده بيخليك تفكر في اسوأ سيناريو ممكن يحصل، وانا عاوز افاجئك أن السيناريو ده في أكثر الحالات مش بيحصل! وبعدين حتى لو حصل فأنت مفيش حاجة في ايدك تعملها عشان تتجنبه، طيب ليه القلق؟

حاليًا ادوبي شغاله في حملة اغلاقات كبيرة للحسابات سواءًا كانت من تجار او حسابات رسمية من ادوبي نفسها. ودي مش حاجة جديدة من ادوبي، تقريبًا بيعملوا حملة كل سنة ويقفلولهم كام الف اكونت، والدنيا بترجع تهدى شوية لحد السنة الي بعدها لما يعملوا حملة جديدة، اسم بقى الكلمتين دول بتركيز عشان انا جايب لك الخلاصة. *️⃣ أغلب التجار ان مكانوش كلهم بيكونوا عاملين اشتراكات Workspaces وبيدخلك بحسابك الشخصي جواها، بس المشكلة ان الاشتراكات دي بتكون مخصصة للشركات مش للاستخدام التجاري، فأول ما ادوبي بتاخد بالها من ده بتقفل الحساب كله. الجديد المرادي ان فيه ناس حاسبتها اتقفلت وهي مشتركة مع ادوبي مباشر، ليه بقى المرادي؟ *️⃣ الي داير حاليًا انك بتعمل حساب واحد وتقسمه انت وصاحبك بما ان كل حساب بيشتغل على جهازين، بس الفكرة ان ادوبي بتقولك ان الحساب (شخصي) بيشتغل على جهازين، مثلًا لو معاك لابتوب وكمبيوتر، بس انت تبقى *المالك* للجهازين دول ، فلما ادوبي تاخد بالها ان فيه حركات تسجيل دخول وخروج من الحساب كتير، او ان الأيبيهات بتاعت الاجهزة بتختلف هي بتاخد بالها ان الجهاز ده اكثر من شخص بيستخدموه ، فتقوم قافله الحساب Suspicious Activity. انا مش بدافع عن الشركة، كلنا عارفين ان ادوبي شركة حقيرة من زمان، بس للاسف المنتج بتاعها احتكاري واحنا محتاجين ليه لحد ما يطلع بديل مناسب نعتمد عليه. فعشان تتفادى ان شغلك يتعطل وحسابك يتقفل حاول تعمل الآتي: 1- بلاش ارجوك اي حسابات من اي تجار حتى لو اسعارها مغرية، ولو مضطر اعمل اشترك بحساب جديد خالص يكون بعيد عن بيهانس بتاعك واعمل حسابك ان ده حساب مش مضمون وممكن يطير في أي وقت. 2- لو هتشترك بشكل مباشر مع ادوبي، ممكن تعمل حساب طلبة عادي، بس الأضمن انه يكون اشتراك عادي، وتعمل حسابك ان الاكونت ده يبقى شخصي ليك ومتشاركهوش مع حد تاني حتى لو بيشتغل على جهازين، بأي حال اشتراك الطلبة عامل 500 جنيه في الشهر واشتراك الافراد ب 1500، واحنا بقينا بندفع الارقام دي عادي في ادوات الذكاء الاصطناعي فمتستخسرهاش في ادوبي. *️⃣ ده لو هتشترك بشكل شرعي، لو عاوز بقى بشكل غير شرعي شوف حد يفتيلك الفتوة دي انا مليش دعوة. وفي النهاية اتمنى ربنا يرزقنا ونشتري جاموستين ونبعد كلنا عن الشغلانة الفقر دي ❤️

اجيب كرسي كويس منين؟

أخيرًا لقيت الماوس باد اللي على شكل سجادة أمي وأمك وأمة لا إله إلا الله! 😂 بصراحة شكلها مختلف جدًا وبتدي لمسة حلوة ومميزة للسيتب، ومقاسها حوالي 73×35 سم. كان نفسي ألاقي منها مقاس أكبر شوية، 90×40 مثلًا، بس للأسف مش متوفر. عمومًا بسعر 171 جنيه، شايف إنها ممتازة جدًا وبتقضي الغرض وزيادة. https://link.amazon/B0fNVIVWJ ودي اللون الفاتح منها: https://link.amazon/B03pEOteh ولقيت نفس المنتج متوفر برضه على موقع عرب هاردوير بس للأسف بـ280 جنيه: https://ahw.store/products/bohemian-large-gaming-mouse-pad-31-5x11-8

بالمناسبة أنا اشتريت الـFitbit Air من صديق القناة حسام، من فترة أنا نزلت سؤال هنا على التليجرام اني بدور عليها من فترة وللأسف كل التجار بيبيعوها بضعف السعر! حسام عرفني على الستور بتاعه Venso Store ووفرهالي يأحسن سعر في مصر. والجميل ڤينسو ستور يقدر يوفرلك اي منتج انت محتاج تشتريه من برا مصر، فبالنسبالي ده لقطة، وقريب هتشوفوا مراجعات لمنتجات كتير كنت عاوز اجيبها ومش عارف بسبب انها مش بتتباع فمصر🫡

وأخيرًا… وبعد طول انتظار، ألفيت بيت Air وصلت! حرفيًا بقالي حوالي شهرين بدور عليها ومستنيها تنزل مصر بسعر منطقي، وأول ما وصلت جبتها على طول. كشخص طبيعة شغله مكتبيه ومفيهاش حركة كتير ، كنت محتاج جهاز يتابع صحتي. وطبعًا أغلب الساعات الذكية بتعمل ده، لكن بالنسبة لي كان فيها 3 مشاكل أساسية. 1️⃣أول حاجة: الاستايل. بمجرد ما تلبس سمارت واتش، بتبقى ملتزم بشكل معين. ولو بتحب الساعات الكلاسيك، هتفتقد الإحساس ده. آه، ممكن تركب ستراب جلد او ميتال ويبقى شكلها أحسن شوية، لكن صدقني… مش هتبقى نفس إحساس الساعة الكلاسيك. واسأل مجرب. 2️⃣ تاني حاجة: التشتت. إحنا أصلًا بقينا عايشين وسط شاشات طول اليوم… موبايل، لابتوب، وتلفزيون. فآخر حاجة محتاجها إن الساعة كمان تفضل ترميلي إشعارات كل شوية. وده من أكتر الحاجات اللي عجبتني في ألفيت بيت Air. لأنها من غير شاشة أصلًا، فمفيش إشعارات تشتتك، وكمان مش هتفضل قلقان عليها من أي خبطة أو خربوش، لأن مفيش شاشة تتكسر أو تتخدش. 3️⃣تالت حاجة: البطارية. معظم الساعات الذكية زي Apple Watch وGalaxy Watch بطاريتها بتقعد يومين أو تلاتة بالكتير، فبتلاقي نفسك داخل في دوامة الشحن كل شوية، ودي حاجة مرهقة جدًا. وده اللي شدني في ألفيت بيت Air. هي عبارة عن ستراب خفيف جدًا، بطاريته بتوصل لحوالي 7 أيام، ومن غير أي اشتراك سنوي بيبدأ من 200$ زي Whoop، وبسعر أقل بكتير. وزي ما أنتم شايفين، أنا مستنتش… لبستها على طول، لأنها محتاجة حوالي 7 أيام تعمل Calibration، وتتعلم بيانات جسمك، وبعدها تبدأ تديك قراءات أدق. فاستنوا الريفيو الكامل بعد ما الأسبوع يخلص، وساعتها هقولكم كل اللي عجبني، وكل اللي معجبنيش.

ده انضف وأقيم كاتر أنا استعملته في حياتي! الكاتر مصنوع بالكامل من الاستانليس ستيل، ووزنه حوالي 120 جرام مش خفيف خالص، Foldable تقدر تتنيه وتحطه في جيبك. هيبقى مفيد جدًا لو بتعمل Unboxing كتير، او بتحب تقتنى الحاجات عالية الجودة زي حالاتي😁 الكاتر سعره ١٢١ جنيه، تقدر تشتريه من اللينك ده: https://link.amazon/B0fq1wEy7 وخلي بالك ان مش بييجي معاه شفرات، هتضطر تشتريها لوحدها.

اكيد كلنا حسينا بالزلزال الي حصل من شوية، لو معاك أندرويد فالموبايل جابلك تحذير قبلها بكام ثانية صح؟ دي فرصة حلوة نشرح ازاي الموبايل بقدر يتنبأ بالزلازل، في الحقيقة مفيش حاجة فعليًا اسمها تنبأ بالزلازل حتى الان، الي جالك على الموبايل ده اسمه إنذار مبكر بالزلزال او Earthquake Early Warning وبيحصل كالاتي: *️⃣الزلزال بيكون بدأ بالفعل تحت الأرض. *️⃣ أجهزة الاستشعار القريبة بتلقط أول موجات حصلت في الزلزال *️⃣النظام يحسب مكان الزلزال وقوته خلال أجزاء من الثانية. *️⃣بعدها بيبعت تحذير للمناطق الأبعد قبل وصول الموجات الأقوى. ولأن إشارات الإنترنت والاتصالات بتبقى من انتقال الموجات الزلزالية في الأرض، ممكن يوصلك التحذير قبل الاهتزاز القوي بكام ثانية او في حالتنا كانت دقيقة. الخلاصة الموبايل متوقعش الزلزال، هو بس رصد بدايته في مكان تاني وحذرك قبل ما الموجات توصلك عشان تحتمي تحت السفرة او تبعد اي زجاج.

اول مرة احس بزلزال بالقوة دي، يارب احفظنا

من فترة بدأت تظهر أخبار عن نية أوبر الاستحواذ على شركة Delivery Hero، ومؤخرًا أعلنت أوبر رسميًا عن عرض استحواذ بقيمة 14.8 مليار دولار. لو متعرفش Delivery Hero فهي شركة المانية وتعتبر وحش في خدمات توصيل الطعام بتملك شركات زي talabat و Glovo الي كانت في مصر وخرجت من فترة وكمان HungerStation ومؤخرًا InstaShop وغيرهم كتير. الصفقة هتتم بمبلغ 14.8 مليار دولار، ولو حصلت اوبر هتكون بتمتلك كل الشركات دي. المثير للاهتمام Uber عندها خدمة توصيل طعام خاصة بيها اسمها Uber Eats لكن فشلت في مصر وخرجت من كام سنة، وعشان كده، مش مستبعد إن أوبر ترجع تنافس في مصر مرة تانية، لكن المرة دي بشكل غير مباشر من خلال طلبات بدل ما ترجع باسم Uber Eats.

سؤال شخصي عشان دايخ بقالي فترة حد يعرف اجيب Fitbit Air منين في مصر بسعر منطقي؟