Taskin Kitoblar 📚 Taskin Books

Ularga xavf yo‘qdir va ular mahzun ham bo‘lmaslar...

Qur’oni karimda ushbu mavzuda kelgan 13 oyat 1. "Ogoh bo‘lingkim, Allohning do‘stlariga xavf yo‘qdir va ular mahzun ham bo‘lmaslar", Yunus surasi, 62-oyat. 2. "Albatta, «Robbimiz Allohdir», degan, so‘ngra mustaqim turganlarga xavf yo‘qdir va ular mahzun ham bo‘lmaslar", Ahqof surasi, 13-oyat. 3. "Albatta, iymon keltirgan, solih amallarni qilgan, namozni to‘kis ado etib, zakotni berganlarning ajrlari Robblari huzuridadir. Ularga xavf yo‘q va ular mahzun ham bo‘lmaslar", Baqara surasi, 277-oyat. 4. "Ey Odam bolalari! Agar sizlarga oyatlarimni qissa qilib beradigan o‘zingizdan bo‘lgan rasullar kelsa, bas, kim taqvo qilsa va isloh qilsa, ularga xavf yo‘q va ular mahzun ham bo‘lmaslar", A’rof surasi, 35-oyat. 5. "Mollarini kechasiyu kunduzi yashirin va oshkora nafaqa qiladiganlarning ajrlari Robblari huzuridadir. Ularga xavf yo‘q va ular mahzun ham bo‘lmaslar", Baqara surasi, 274-oyat. 6. "Albatta, iymon keltirganlar, yahudiy bo‘lganlar, sobiiylar va nasorolardan kimki Allohga va oxirat kuniga iymon keltirsa va solih amal qilsa, ularga xavf yo‘q va ular mahzun ham bo‘lmaslar", Moyida surasi, 69-oyat. 7. "Rasullarni faqat xushxabar beruvchi va ogohlantiruvchi qilib yuborurmiz. Kim iymon keltirib, isloh qilsa, ularga xavf yo‘q va ular mahzun ham bo‘lmaslar", An’om surasi, 48-oyat. 8. "Yo‘q! Kimki yaxshilik qiluvchi bo‘lgan holida yuzini Allohga taslim qilsa, unga Robbi huzurida ajr bordir. Hamda ularga xavf yo‘q va ular mahzun ham bo‘lmaslar", Baqara surasi, 112-oyat. 9. "Allohning yo‘lida mollarini sarflab, so‘ngra sarflari ketidan minnat qilmaydigan va ozor bermaydiganlarning ajrlari Robblari huzuridadir. Ularga xavf yo‘q va ular mahzun ham bo‘lmaslar", Baqara surasi, 262-oyat. 10. "Alloh taqvo qilganlarga yutuqlari tufayli najot berur. Ularga yomonlik yetmas va ular mahzun ham bo‘lmaslar", Zumar surasi, 61-oyat. 11. "Alloh ularni rahmatiga olmas», deb qasam ichganingiz anavilarmi?! «Jannatga kiringlar! Sizga xavf yo‘q va siz mahzun ham bo‘lmassiz!", A’rof surasi, 49-oyat. 12. "...Ular Alloh O‘z fazlidan bergan narsalardan xursandlar va hali ortlaridan ularga qo‘shilmagan birodarlariga ularga xavf yo‘qligining hamda ular mahzun ham bo‘lmasliklarining xushxabarini bermoqdalar", Oli Imron surasi, 169-170-oyatlar. 13. "Biz: «Undan hammangiz tushing. Bas, agar Mendan sizga hidoyat kelsa­yu, o‘shanda kim Mening hidoyatimga ergashsa, ularga xavf yo‘q va ular mahzun ham bo‘lmaslar», – dedik", Baqara surasi, 38-oyat. Izoh: «Ularga xavf yo‘qdir» — ular uchun kelajakda, ya’ni qabrda, mahshar maydonida va oxirat so‘roq-savolida hech qanday qo‘rquv bo‘lmaydi. Ular o‘zlari borayotgan manzilning xayrli ekanini bilishadi. «Ular mahzun ham bo‘lmaslar» — ular o‘tmishda, ya’ni bu dunyoda qoldirib ketgan narsalari (mol-mulklari, farzandlari, yaqinlari) uchun afsuslanmaydilar va xafa bo‘lmaydilar. Chunki Alloh ularning ortidan qolgan yaqinlarini O‘z panohiga oladi, mo‘minlarning o‘zlariga esa jannatda bu dunyodagidan ming chandon go‘zalroq ne’matlarni beradi. https://t.me/Taskinkitoblar/2372 📦 Buyurtma berish: @TaskinKitob 📞 +998935231233 📍 Manzil: Yunusobod, Shahriston metro, Chinobod ko‘chasi 2-uy 🌿 @TaskinKitoblar | Qalbingizga taskin beruvchi kitoblar