هۆنراوە و پەخشانی کوردی چەم و چیا

سڵاو لەوانەی ماندووییەتی ڕووحی ئێمەیان دیت و بەجێیان نەهێشتین و لە جاران مەحکەمتر دەستیان گرتین. @chamochya

ئەی قیبلەیی مورادم، داخۆ بە ڕۆزگاران پرسیوتە قەت لە هیچ کەس حاڵی غەریبی تاران بەو سوێندەکەی کە خواردت من هەر ئەوەم کە دیومت حاشا بکەم فەرامۆش میساق و عەهدی جاران تا نەقشی خاترم بێ خوڕڕەم بەهاری حوسنت دەتکێ لە هەوری چاوم پەیوەستە تاوی باران شەو تا سەحەر لە هیجرت بۆ من حەرامە خۆ خەو هەر دێ سەدایی گریەم وەک ڕەعدی نەوبەهاران لاکین لە ئەسڵی کارا ناسیومە حاڵەتی تۆ سەنگینە گوێی سەماعت بۆ دادی دەردەداران تۆ هەر ئەوەی کە چاوت، جەرگی بڕیم بە ئیما من هەر ئەوەم کە عیشقت، کردوومی وێڵی شاران «سالم» لە جەوری دڵبەر، کۆتا کە شەرحی دەفتەر تۆ بێخودی لەتاو ئەو، ئەو بێخەبەر لە یاران #سالم @chamochya

بۆ پاراستنی فەرهەنگ و فێربوونی زانست پێویستمان بە پاڵپشتی ئێوەی ئازیزە.

بە گوێچکەی یاد ئەرێ نابیەی؟ سەدای هاوار و ناڵینم بە چاوی تاسە نابینی دڵۆپەی ئەشکی خوێنینم؟ برا ئاخۆ بە بیرتا دێتەوە ئەم یاریی دێرینەت؟ بڵێی باسم نەکەی جارجار بە لێو و گفتی شیرینت برالە پیم بڵێ ئێستاش وەکوو جاران بە عود و نەی؟ لە دڵتانا هەڵئەقوڵێ نەغمەیی پڕ سۆز و پڕ ئۆخەی وەکوو جارانە باوی سەرچنار و بەزمی ئێواران؟ بشۆن بەو ئاوە ساردە چی هەیە جەور و جەفای دەوران؟ کە ڕۆژ پرشنگی ڕۆژئاوا، شەویش هی مانگ و ئەستێرە: چەو و زیخی بنی ئەکسەر ئەڵێی مروارییە و زێڕە دڵم کەوتۆتە گێژاوی شەپۆلی بەحری دووریتان بە چاوو دڵ ئەڵێمئاخۆ خوا ئەیدا سەبووریتان مەگەر ئەو سێبەرەی بن دارەکەی لای ئاوەکەی «سەرسیر» بشۆرن ئەم خەم و دەردەم وە یا بەزمێکی «باخی میر» وە یا خۆ هاژەیی تاڤگەی «زەڵم» کاتێکی هاوینان پرۆشەی وردی پڕ نەشئەی بکا دەردی دڵم دەرمان وە یا ڕابواردنی سەر ئاوەکەی لای گردەکەی یارە؟ کە ئەڕوانێتە پشت گردەکەی سەیوانی لێ دیارە دڵۆپی ئەشکی خوێنینی لە پێڵودا قەتیس ماوم لەگەڵ ناسۆری زامانی دڵی دووریم بکەن چارە 🔘ئەخۆل @chamochya

هەتا ڕۆژی ئەبەد قوربان لە سەر عەهدی قەدیمی تۆم بەهەشتم لێ حەرام بێ، گەر بە بێ ڕووی تۆ تەمەننا کەم ئەمن شاییم بە تۆ بوو،چونکە شاهی غەمڕەوێنم تۆی کە من شاییم لە دڵ دەرچوو، ئیدی من دڵ بە کێ شا کەم 🔘وەفایی @ChamoChya

نەمردم من ئەگەر ئەمجارە بێ تۆ نەچم، شەرت بێ، هەتا ئەم خوارە بێ تۆ دەروونم خاڵییە، وەک نەی دەناڵێ هەوارێکی چ پڕ هاوارە بێ تۆ! بیناییم کوێرە، هەڵنایێ بە ڕووی کەس موژەم یەک یەک دەڵێی بزمارە بێ تۆ هەموو ئەعزایی ناڵینم دەناڵێ سەراپام میسلی مۆسیقارە بێ تۆ قەسەم بەو شەربەتی دیداری پاکەت شەرابم عەینی ژەهری مارە بێ تۆ لەکن تۆ خار و خەس گوڵزارە بێ من لەکن من خەرمەنی گوڵ خارە بێ تۆ لەکن من با وجوودی ناس و ئەجناس کەسی تێدا نییە ئەم شارە بێ تۆ هەتا تۆم ئاشنا بووی، ئاشنام بوون ئەمێستا موو بە مووم ئەغیارە بێ تۆ هەموو ڕۆژێ لەتاو هیجرانی ئەمساڵ تەمەننای مردنی پێرارە بێ تۆ لە حەسرەت سەروی قەددت چاوی نالی دوو جۆگە، بەڵکوو دوو ڕووبارە بێ تۆ 🔘نالی @ChamoChya

تۆ ئەو ساتە دار هەرمێیەکی سپی بوویت ئەڕۆیشتیت و شاڵێکت دابوو بە شانتا شاڵ پڕی بوو لە پۆلە وێنەی باڵندە. وەختێ گەیشتیتە ماڵێ و شاڵت داگرت باڵندەکان هەڵفڕین و ئەمجارەیان تەماشام کرد لە ئاسماندا بوون بە پۆلێ لە قەسیدەی دەم بە خەندە! 🔘شێرکۆ بێکەس @ChamoChya

ڕەحمت لە دڵا بێت و نیگاھێ بەسە بۆ من گاھێ بەغەڵەت تۆ خەبەرێ بگرە لە حاڵم 🔘عەبدوڵڵا زێوەر @ChamoChya

بۆ سەردەشتی خوێناویی... 7ی پووشپەڕ ساڵڕۆژی کیمیابارانی سەردەشتی سەر بەرز😔 لە ناخی دڵمانەوە هاودەردی و پرسە و سەرەخۆشی ئاراستەی گشت خەڵک بە تایبەت خەڵکی شاری سەردەشت ئەکەین و ئاواتی چاکبوونەوەمان هەیە بۆ زامدارانی ئەو کارەساتە دڵتەزێنە. هیوادارین هەرگیزا وهەرگیز ڕۆژی وەها تاڵ نەبینینەوە🙏🌺 شێعر: مامۆستا نەبەز خوێندنەوە: ئاسۆ سولەیمان نژاد دەرهێنەر: حسەین فاتمی @chamochya

ڕەنگی زەردم قەت بەهانەی پاییز و زستان نییە سەد ئەوەندش زەرد و سیس بم هۆیەکەی زریان نییە هێندە دیومە هاڕ و گیفی بای زریانی پاییزی بۆیە زۆر باش لێی دەزانم، تا ئەبەد هەرمان نییە گەر گەڵای دارێ وەری ڕۆیی بە دەم زریانەوە دێتە دەر چەندین گەڵای تر هۆیەکەی فەوتان نییە هەرچی سەختی پێوە بێ ئەم پاییزە هێشتا دەڵێم سوورە گوڵ باکی بەسەرما و باڕن و بۆران نییە بای شەماڵی خاکەلێوم دێتە ڕەقسین ڕۆژی خۆی باڕن و بەفر و شڵێوە تاقەتیان بۆ مان نییە گەر ژیانیش هەر بەهار بێ و پاییزی تێدا نەبێ سوورە گوڵ ،لاو لاو و نێرگس قەت لە لامان جوان نییە گەر دەبینی ژینی ئەمڕۆ پڕ لە ناڵە و شیوەنە ژینی کوردیش تا هەمیشە ماتەم و گریان نییە ڕۆژێ دێ گەر خاکەلێوەی ئەم وڵاتم گوڵ بکا تێبگا سەرما و شڵێوە کاتی خۆ بادان نییە سۆزی دڵ بۆ خاک بنووسە کاوە خاکت گەوهەرە هیچ وڵاتێک لای دڵی من خاکی کوردستان نییە 🔸کاوە داشبەندی @chamochya