ИБРАТЛЫ СӨЗЛЕР...

Қәйин ене  <АНА> бола алама?  Келин енеге <Қыз> бола алама? Келген келин ийилип түскен жеринде  ийбели болып, ата- енесин ҳүрмет етип, өз орнына қойып, ата - анасындай көрип сыйласа,  қәйинбийкесин әжапасындай,  бийкешлерин сиңлисиндей,  қәйнисин инисиндей, қайнағасын - ағасындай, абысынын - апасындай көрсе Бир - бирине  ҳүрмет иззети күшли болса,  онда келин де сол үйдиң қызындай  болады.  Келини енесининиң айтқанын еки қылмаса енесиде келинин  қызындай көреди. Жаңа үйге бейимлесиўде аңсат емес. Соның ушын енесиде  Келинине билмегенин үйретип, қойған затларының қай жерде турғанын көрсетип,  қәте - кемшиликлерин   әсте,  бақырмай  айтып барса, Келини де енесинен билмегенин сораса, енеси әлбетте  ақыл айтып, кеңесин береди. Келинде енесин анасынан кем көрмей, жақсы көрип, ҳәм  анам, ҳәм енем. Мен енемдм анамдай көремен. Ол мениң өмирлик жолдасымның анасы. Ол маған сондай  көркем, ақыллы,  билимли, ийманлы   жигитти  дүньяға келтирип,  Аллатаалам маған қосып қойыпты. Мен сондай қуўанышлыман.  Мен жолдасымды қалай жақсы көрсем енемди де сондай жақсы көремен. Себеби ол да мениң  анамдай уллы  "Ана" деп келини енесин анасынан кем көрмейди. Бирақ базыбир енелер "келин" ҳеш қашан қызыңдай  болалмайды.  Сени тыңлап отырып, бәрибир өз билгенин ислейди, - дейди. Келин болса, енем мениң анамның орнын баса алмайды дейди. Бундай келинлерде табылады. Бирақ сен сол жерге ийилип түскен ўактыңда, сол үйдиң ашшы- душшысына, барына - жоғына көнип,  қуўанған да - қуўанып, қыйланғанда - қыйланып, сол үйде өмириңниң ақырына дейин жасайман  деп келген болсаң, енеңди "анаң" дай көрип сыйлаўың керек. Егер енеси менен келини Бир - бирин түсинип жасаса, онда әлбетте енеси келинине "Ана" бола алады. Ал, келини енесине "Қыз" бола алады. Баскалардың, сизлердиң пикириңизди   билмедимдә, бул мениң жеке пикирим.   ✍  Гүлбәҳәр Қарабаева. 19.02. 2026. https://t.me/ibratli_sozler

Сыңғырлап сес берип өңир моншағың Бурымда желкилдеп гилтли шашағың Мийманға кел дейсең ашып қушағың Көрки хүрге қыяс Қəрекем қызы... Тулымшақ ийрелип шеке мушынан Қəдемлери сезилмес аяқ ушынан Хүрмет-ийбе менен кесе усынған Ары ерге мегзес Қəрекем қызы... Көк көйлекке сəўкелең дым жарасып Жегдең нағысынан көзлер қамасып Не батырлар излеп келген қыр асып Сулыўлықта теңи жоқ Қəрекем қызы Бармағың тыңламай кетип дуў-сыйды Дуўтарды шерткенде əлем уйыйды Сулыў сыңғырлысы қуртып уйыз-ийди Хүрлиманның избасары Қəрекем қызы Дигирман тартқанда , кели түйгенде Жаўың зир титрейди қабақ үйгенде Гейде ақылың озық алпыс бийден де Қумар ананың əўлады Қəрекем қызы. Тəрийпиңе тилим жетпес мақтасам Сиздей гөззал көрмедим мен бақласам Сөздиң шынын айтып қатар тақласам Дейип сөз туўарар Қəрекең қызы.. Юсупова М. 17.02.2026. https://t.me/ibratli_sozler

Сизге бир гəп айтайынба? Рамазан айында бир инсанға Жəннеттиң Рəйян атлы есигинен кириуди тиледим, табың ол ким екен? 😊 Қызықсаңыз ... Кəəбаның👇 устин басып көриң! 🕋🕋🕋🕋🕋🕋🕋🕋🕋 🕋🕋🕋🕋🕋🕋🕋🕋🕋 https://t.me/ibratli_sozler

Таза ай келди Жақын, жақсыларға баўрыңыз ийип, Шексиз мийрим менен, қушақлаң сүйип, Қәнәәт қорғанын салыңлар бийик, Сабырды сүйиўши, таза ай келди. Шүкир әйлеп, алған ҳәр бир нәпеске, Тәниң түспей турып, тап-тар қәпеске. Өткенлерди ядлап, алыңлар еске, Сабырды сүйиўши, таза ай келди. Көп қыйнамаң жанды жәннетти излеп, Артықша жан қыйнап дүнья-мал гизнеп, Ҳүрмет ет атаңды, анаңды сизлеп, Сабырды сүйиўши таза ай келди. Тыйыўды үйретип нәпси бәлесин, Ессиз бенделердиң, жөнсиз дәмесин. Өтсин ысырапсыз, ҳәр бир мәресим, Ақылды сүйиўши таза ай келди. Раўаж Отарбаев. https://t.me/ibratli_sozler

Хорезм республикасында жасаўшы халықлар миллий составы бойынша түрлише болып, басқарыў жумыслары ленинлик миллет саясатына енгизледи. Хорезм республикасының территориясында қырық бес мың шамалас қарақалпақ жасайтуғын еди. Сонлықтан усы халықтан өсип шыққан қайраткер сыпатында Ораз Ерманов Хорезм Совет Социалистлик Республикасында бир қанша басшы орынларға сайланды. О. Ерманов 1921—1924-жылларда Хорезмниң дахлия назири (ишки ислер министр) болып иследи. Усының менен бирге ол республиканың экономикалық кеңесиниң баслығы ўазыйпасын қоса атқарды. Ораз Ерманов қарақалпақ мийнеткешлеринен шыққан биринши министр болып, ол Хорезм республикасының экономикасы менен мәдениятын раўажландырыўға салмақлы үлес қосады. Хорезм республикасының Орайлық Атқарыў Комитети 1921-жылы «Мийнет» орденин шығарды. Хорезм революциясының жеңисин тәмийинлеўде ҳәм беккемлеўде актив гүрескен ушын 1922-жылы 1-майында Ораз Ерманов «Мийнет» орденин алыўға миясар болды. Даўамы бар.. «Мағлыўматты топлаған автор ийеси Филология илимлериниң докторы Қырықбай Байниязов «Елим деп еңиреген ерлер"   (Илимий-биографиялық очерклер)» китабынан алынды» Каналымыз:https://t.me/Tariyxqa_nazer https://t.me/ibratli_sozler

ТАРИЙХҚА_НӘЗЕР: #Тарийх #Уллы_тулғалар_өмири ЕЛ НАМЫСЫН ШЕККЕН ОРАЗ 1-бөлим Биз бул мийнетимизде Хорезм ойпатында революциялық гүресте, елимизди ишки ҳәм сыртқы душпанлардан мәртлерше қорғауға қатнасқан Хорезм Совет Социалистлик ҳәм Қарақалпақстан Автономиялы Совет Социалистлик Республикаларының экономикасы менен мәдениятын раўажландырыўға салмақлы үлес қосқан гүресшилердиң бири Ораз Ерманов туралы сөз етемиз.      О. Ерманов 1874-жылы Қоңырат қаласына жақын жердеги Қыпшақ ауылында дийхан семьясында туўылды. Ораз дәслеп ауыллық мектепте, соннан Қоңырат қаласындағы мешитлердиң биринде оқып, саўатын ашады. Қоңырат қаласы Хийўа ханлығының административлик, саўда ҳәм мәдений орайларының бири болып, ол Аральск, Оренбург арқылы Россия менен, Үргенч, Хийўа арқылы Орта Азияның ири қалалары менен тығыз байланыс жасайды. Үргенчли бай саўдагер Жаббарберген Қылышов Қоңырат қаласынан дуканлар ашады ҳәм ол зейинли Оразды қызметкер етип алады. Енди ол өзиниң бай хожайыны менен бирге өтимли затлар излеп, орайлық қалаларға жийи барып туратуғын болады. Ел гезип Ораз ушын турмысты үйрениў мектеби болып атқарады. Бул жағдай Ермановтың класслық көз қарасының ертерек қәлиплесиўине себепши болды.     О.Ерманов өз заманының алдыңғы қатар адамлары менен тығыз байланыста болды. Мәселен, ол 1910-жылларда болажақ өзбек совет әдебияты баслаўшыларының бири, патша ҳүкимети тәрепинен қууғынға ушыраған шайыр Мухаммедшәрип Суфызада менен Хожели қаласында гезлеседи. Ораз Суфызаданың саўатлы алым ҳәм талантлы шайыр екенин билип, оны Қоңыратқа ертип келеди. Усы дәўирде белгили татар революционери Ахмедзаки Бакиров та Қоңыратқа келеди. Уллы Октябрь революциясы шекем Қоңырат қаласында бир әскерий казарма болып, онда рус солдатлары туратыўғын еди. Ораз усы казарманың завхозына жәрдемши болып жумысқа орналасады ҳәм рус тиллин үйренеди. Солдатлардың арасындағы революциялық кейиптеги гүресшилер жергиликти миллет ўәкиллериниң класслық көз қарасының қәлиплесиўине унамлы тәсирин тийгизеди. Қоңырат қаласы — «елдиң шети, жаўды келер бети» болғанлықтан, ол жерде жаңа турмысты орнатыў ушын кескин саўашлар алып барылады.       ХХ әсирдиң биринши шерегинде Қоңырат мийнеткешлери Өтеш батыр, Ескене батыр, Ернияз батыр, Нуржан батыр, Марқабай батырлар менен халқымыздың тарийхында өшпес из қалдырды. Ораз Ерманов усындай халық батырлары менен бирликте елдин тынышлығы, бахты, азатлығы ушын аянбай гүрести. О. Ерманов Октябрь революциясына шекем-ақ демократикалық-халықлық көз қараслары, ағартыўшылық ҳаракетлери менен Қоңырат мийнеткешлери арасында сүйинишликке ийе болды. Қарақалпақ халық шайыры Аяпберген Мусаев Ораз Ермановты усындай айрықша сипатларын өз уақтында дұрыс байқады ҳәм оны көпшиликке үлги етип, былайынша тәрийпледи: Жайылған, майқы бий — түпки сағамыз, Жаман-жақсы ҳаслымызға бағамыз, Ел намысын шеккен Ораз ағамыз, Уллы журттан хабар тута баслады. Уллы журт — Россиядағы революциялық ўақыялардан ертерек хабардар болған Ораз Ерманов жаңа турмысты орнатыўшы гүресшилердиң ең алдыңғы қатарында болды. 1920-жылдың бәҳаринде Қоңырат қала- сында орнатылды ҳәм ол округлик кәмбағаллар кәмитетиниң жуўаплы секретары болып сайланды. Кәмбағаллар комитети, мийнеткешлер массасы, әсиресе жарлы дийханлар арасында Коммунистлик партия менен Совет ҳүкиметиниң тийкарғы таянышы болды. О. Ерманов жарлы дийханлар менен рабочийлар класының бирлигин беккемлеў, орта дийханлар менен аўқамласып, оларды Совет ҳүкиметиниң тәрепине тартыў, ески байлар, хәмелдарлар менен дин ийелерине қарсы маўасасыз гүресиў ислерине актив қатнасты. Мәселен, 1920—1921-жылларда Қоңырат округине баспашылар бир неше мәртебе топалыс жасайды. Усының салдарынан бул жерде партия шөлкеми тарқатылады. 1921-жылы атақлы партиялық ҳәм мәмлекетлик қайраткер Аллаяр Досназаров Қоңыратқа келип, округлик пәртия шөлкемин қайтадан дүзеди. Мийнеткешлерди пәртия әтырапына тығыз жәмлеўде кәмбағаллар комитетиниң жуўаплы секретары О. Ерманов, округлик әскерий революциялық кеңестин секретары шайыр С. Мәжитовлар тийисли қызмет атқарады.

РАМАЗАН АЙЫҢ МҮБӘРЕК БОЛСЫН! Келди мине жыл өткерип арадан, Қабыл болғай отыз күнлик оразаң. Нәпсимизди жылаўлаўға жараған, Рамазан айың мүбәрек болсын! Бул айда ҳеш кимниң жықпай райын, Ийман менен толғай кеўил сарайың. Райяан сыйлағай Қәдир қудайым, Ораза айыңыз мүбәрек болсын! Нийетимиз пәклениўди гөзлеген, Тилимизди тыйып насақ сөзлерден. Нәпсини жылаўлап ибрат излеген, Рамазан айы мүбәрек болсын! Кеўиллер пәкленип қайта туўылғай, Жан дүньяңыз инсап пенен жуўылғай. Жер бетинен ала аўызлық қуўылғай, Қутлы ораза ай мүбәрек болсын! Бес ўақ намаз бенен пәклеп кеўилди, Шүкирликке суўсынлаған пейилди. Өрнек болған әўладларға кейинги, Рамазан айы мүбәрек болсын! Өтип кеткен соң да қутлы айымыз, Пәкликке жуўылғай жан сарайымыз. Мүриўбетке толғай жүрген жайымыз, Рамазан айың мүбәрек болсын! Гүлнара НУРЛЕПЕСОВА     👉https://t.me/gulnara_nurlepesova

#Ҳикмет 📜 САЛАЎАТ Он сегиз мың әлемге, Сәрўар болған Муҳаммад, Отыз үш мың әсҳабқа, Сәрдар болған Муҳаммад. Жоқшылық пенен қайғыға Қанаатшыл Муҳаммад, Гүнәлы болған үмметке Шәпәәтшыл Муҳаммад. Кирпик қақпай мүлгимей, Сабыр табар Муҳаммад, Жетим, мискин ғәрипти Жарылқаған Муҳаммад Үлес берген бендеге, Туўра жолдан Муҳаммад, Азап шеккен адамға, Пана болған Муҳаммад. Әбужәҳил залымға, Шыдам берген Муҳаммад, Жалахордың ҳақ жолға, Өзин салған Муҳаммад. Жалғаншының қайғысын Умыттырған Муҳаммад, Зикир айтып руўҳын Нурландырған Муҳаммад. Малғун лағин шайтанға, Урыс ашқан Муҳаммад, Шәриятқа үмметин, Нәсиятлаған Муҳаммад. Тариқатқа жол басшы, Жаны ҳасыл Муҳаммад, Ҳақыйқатты бәршеге Табыстырған Муҳаммад. Жаманлыққа жақсылық, Бағышлаған Муҳаммад, Таўфиҳ  тилеп залымға, Кеширимли Муҳаммад. Сәждеге қойып маңлайын, Сабыр еткен Муҳаммад, Қабыл болып дуўасы - Таң аттырған Муҳаммад. Залымлардың бәлесин, Ҳарап қылған Муҳаммад, Бир Алланың дийдарын, Талап қылған Муҳаммад. Бес ўақыт намаз болғанда, Имам болған Муҳаммад, Миражға барып  көргени, Дийдар болған Муҳаммад. Аршы, Күрси базарын, Ийелеген Муҳаммад, Сегиз бейиш төрине, Жарасықлы Муҳаммад. Мискин Аҳмет қулына, Мийрас қылған Муҳаммад, Жетимлерге жүрегин, Шыра қылған Муҳаммад. 📖✍  Хожа Ахмет Яссаўий https://t.me/ibratli_sozler

🍃  Ҳеш қашан "жаман жасап атырман ", демең . Алла таала гәпиңизди еситип қалып, сен жаман жасаўдың қандай екенлигин билмейсең еле деп он есе жаман тәғдирге дусластырыўы мүмкин...... Шүкир етиң әзизлер!!! ҚАЙЫРЛЫ ТҮН  әзизлерим!!! Түннен тынышлық тилеймен, Таңның қайырлысын тилеймен. ☀️☀️☀️☀️☀️☀️☀️☀️☀️ https://t.me/ibratli_sozler