Najmiddin Turon

Қалдирғочни топмай гирён ғоз қолди, Бар-и-чин қолмади ёлғон боз қолди, Дунё, бойчиборни оввора қилма, Яшалмаган умрим жуда оз қолди. апрел, 2026 @NajmiddinTURON

Сўров Ҳайронман,  ким кимга отаяпти ўқ, На ўқни тўхтатдим,  на бўлдим қалқон. Кеча ўрасидан чиқмаган аскар, Бугун тирикман деб бўлса қаҳрамон... Ҳайронман,  не учун Ҳақ демас тилим, Ёки ўчирдимми дилдаги чўғни? Нега кўнаяпман ҳақсизликка жим, Менга бир қаранглар,  ўлганим йўқми? Нажмиддин ЭРМАТОВ

Kitobga yo‘l bering: Javlon Jovliyev bilan adabiy kecha! 📚 23-aprel – Butunjahon kitob va mualliflik huquqi kuni munosabati bilan barchangizni o‘zgacha adabiy tadbirga taklif etamiz! Taniqli yozuvchi, "Oltin qalam" mukofoti sohibi Javlon Jovliyev va uning shov-shuvlarga sabab bo‘layotgan, yaqin kunlarda nashrdan chiqishi kutilayotgan, yangi "Katta qizlar" romani bilan yaqindan tanishish imkoniyatini qo‘ldan boy bermang. Bu shunchaki taqdimot emas, bu adabiyot va san’at uyg‘unlashgan jonli ijro bo‘ladi! Dasturda Sizni nimalar kutmoqda? 🎤Samimiy suhbat: O'lmas Temurning Javlon Jovliyev bilan "Katta qizlar" romanining yozilish tarixi, undagi mavzular hamda yetti nafar qahramon qizning taqdiri haqidagi qiziqarli suhbatidan bahramand bo‘ling. 🎭 Sahna ko‘rinishlari: Yosh aktyorlar ijrosida asardan saralangan eng hayajonli lavhalar jonlanadi. Fotima, Maya va boshqa qahramonlarning kechinmalarini sahna ko‘rinishlari orqali his eting. 💬 Erkin muloqot: Tadbir so‘ngida yozuvchi bilan bevosita muloqot qilish, o‘zingizni qiziqtirgan savollarga javob olish va asar haqida fikr almashish imkoniga ega bo‘ling. 📅 23-aprel, 15:00-17:00 📍 Amir Temur ko'chasi 42, O'zbekistondagi Gyote-Instituti kutubxonasi Tadbirda ishtirok etish bepul! Kitob sehrini va so‘z qudratini biz bilan birga his qiling! Barchangizni kutib qolamiz! 📖🎭

Унгача чидайвер, бовурим, Симобдай ютилса ҳаволар. Унгача яғриндан яғирин Тулпорлар оларда даволаб. Унгача, куюклим, суюклинг Аёзда кўз ёши музласа, Чидайвер, чидайсан бу юкнинг Ипини баҳорлар узмаса. Унгача қушларнинг ортидан Дарахтлар учади олланиб. Қақшаган дарёлар юртида Оғочдай қоларсан зорланиб. Отанг ҳам чидаган, сиқилма, Эгатга эш билиб бошини. Остонанг бошига тиғ илма, Ўғрига едиргин ошингни. Бахтидай ёрилиб товони Орзуси кулук бу оналар Унгача чидатиб дунёни Туғади сендайин болалар. Чидайвер ғурбатда меҳнатдан Нон топган ҳеч кимса ўлмас-а? Бу чидоқ қон сурар, албатта, Боланг ҳам чидайди ўлмаса. Чидовга ўргатгин барчани Ғойибдан келгувчи кунгача. Чидайвер, минг йиллик арчанинг Умри ҳам тугайди унгача. Қисматинг қуяди қулоққа: “Ҳислат бу, эмасдур иллатинг!” Чидаш-ла борурсан узоққа, Унгача бормайди миллатинг... Унгача чидайвер, бовурим. https://t.me/Najmiddin_Ermatov

Najmiddin Turon ijodida davr ruhi tahlili Oʻzbeklarning boshiga tushgan fojialar, ziyolilar taqdiri, umuman, tarixning ogʻir zarbalariga dosh bergan oʻzbek xalqi bundan buyon farovon hayot va yuksak taraqqiyotga munosib, degan dunyoqarash bilan yashayapti ular. Najmiddin Ermatov esa tengdoshlarining bunday oʻy-xayollarini bir vakil sifatida yozishga va yoyishga harakat qilyapti. Batafsil: https://oyina.uz/uz/article/4598 Rasmiy sahifalarimiz👇 Telegram | Instagram | X | YouTube

—Келишинг дардимга даъвоми? —Келишим дардингнинг давоми. —Сочсангчи тунимга зиёни! —Бу зиё кунингнинг зиёни. —Бетартиб умримни туз ахир! —Бўларман ярангга туз ахир. —Фироғинг жонимни қийнади! —Жонингга кўзларим қиймади. —Маҳрам бўл, келдим, деб айт майин! —Малҳам бўл, шу сўзни айтмайин. апрел, 2026 @NajmiddinTURON

Олтой туркумидан – Олтойнинг ой қизи, куйлагин қўшиқ, – Тошлардан сўрагин, тили бор. – Ҳаттоки, қайинзор шовуллар жўшиб, – Уларнинг миллионлаб эли бор. – Не учун кўнглингни очмассан менга? – Қўлимда кишан бор, кўрмассан. – Йўл кўрсат, то абад эргашай сенга, – Тўнғизнинг изи бор, юрмассан. – Тоғларда борми ҳур кийиклар, кўрсат? – Уларни ҳуркитдик, қайтмаслар. – Бобонгдан қолгандир битиклар, ўргат? – Мозори қаерда, айтмаслар. – Қўшиқ бор тилингда Тангрига етгай, – Оҳида ёғийнинг тиғи бор. – Дарёдай куйласанг оғриғинг кетгай, – Бўғзимда музлаган йиғи бор. – Жон берай, ёноғинг оллансин бир бор, – Кун туғса, тонгдайин отгайман! – Мен сенинг қошингга қайтгайман такрор, – Олтойда ой чиқса кутгайман! https://t.me/Najmiddin_Ermatov

Bugun o’zbekning buyuk yozuvchisi – Abdulla Qodiriy tug’ilgan kun! Qodiriyning orzusidagi Vatan va millatni qurish bizning avlodga nasib qilsin, ilohim. Ushbu videoni Kumushlardan yashirib, Ra’nolarga yuborib qo’yinglar:)) @mehrinoz_abbos

“MUTOLAA”DA SHE’RIYAT davom etadi! Oʻzbekiston Yoshlar ishlari agentligi “Mutolaa” loyihasi hamda O‘zbekiston Milliy kutubxonasi hamkorligida Amir TEMUR tavalludiga bagʻishlangan “Ishq - adolatdadur” nomli teatrlashtirilgan nazm kechasini taqdim etadi. • Dastur qahramonlari: Shahriyor Shavkat, Nozima Habibullayeva • Mehmon: shoir va aktyor Erkin BOZOROV hamda Oʻlmas TEMUR 📝 Soʻz va adabiyot muxlislarini 9-aprel kuni soat 18:00 da O‘zbekiston Milliy kutubxonasida kutib qolamiz. 👇Ro’yxatdan o’tish uchun ushbu soʻrovnomani to’ldiring: https://forms.gle/UtZ9vG7RxZ7hV2Ay8 Mutolaa ilovasini yuklab oling

Бу кунлар ёмғирнинг жилваси, Соғинчнинг аксидир, ўйласам. Бу кунлар—эртанинг эркаси, Юпатар ўзгадир йиғласа... Бу кунлар баҳорнинг ёдини Боғлардан ўмарган қароқчи. Бу кунлар кўп кўрган тотиниб, Жонимни қайтадан олмоқчи. Бу кунлар кун эмас, Кунсулув мен ила қолдирган хотири. Бу кунлар тутса ҳам ўзни ёв, Отса ҳам чиқарман отилиб. Кунсулув пеш қилиб қадарни, Умрини эртага атади. Тўхтатдим мен бундай сафарни, Бу кунлар қиёмат қадардир... https://t.me/Najmiddin_Ermatov

Абдулкарим Баҳриддин (Карим Баҳриев) Наҳот бағринг тилинган эмас, Элнинг дарди билинган эмас, Ҳақорат гар шул мамлакатда Шеърларинг ман қилинган эмас. Қора рўйхат боқсалар эди, Қўлга кишан тақсалар эди. Ҳеч бўлмаса ёзганларингни Гулханларда ёқсалар эди. Ким бойиди, ким амалда – шод. Ким отилди, ким қамалди –дод. Эл-улус сукутда, улкан сабрда, Мардлар ё қафасда ва ё қабрда... Уялармиз – биз тирик, озод. *** УЯТ Бу юртда чинорлар кўкка чўзилган, Ҳаттоки юлинган ғўзалар тикка. Узилган, Ичимда недир узилган – Барибир, кўз тикдим мен юксакликка. Бу заҳил тупроққа бир чўп қадасанг, Осмонга талпинар, тик ўсар яккаш. Дарахтлар аскардай тик турган юртда Инсонга уятдир эгилиб яшаш. Далалар бепоён, саҳролар сўнгсиз, Адоқсиз, хадсиздир бу ер, бу борлиқ. Бу чексиз оламда, бу кенг дунёда Уят - дили танглик, юраги торлик. Чўққилар азалий, турар жойида, Турар салобатли тоғлар минг йиллик. Вазмин, оғир чўккан тоғлар пойида Уят - ҳовлиқмалик, уят - енгиллик. Уятдир эзилиб минг йилки шундоқ Далада тупроқдай сарғайган, ҳайрон Халқ кўзига боқиб ёлғон сўзламоқ... Ҳеч ким билмаса ҳам, уятдир ёлғон. Бир дон эксанг, униб ёзади япроқ, Гулларнинг атридан булбуллар сайроқ. Тош ҳам гуллаб ўзин англатган юртда Уятдир зулм кўриб, сассиз яшамоқ... https://t.me/NajmiddinTURON

Assalomu alaykum. Adabiy davra qaytmoqda!   Bu gal yozuvchi Erkin Aʼzamning qizg‘in muhokamalarga sabab bo‘layotgan yangi asari – “Momaqaldiroq ostida sayr” romani haqida suhbatlashamiz. Tadbirda muallifning o‘zi va adabiyotshunoslar ham qatnashadi.   Vaqt: 3-aprel soat 19:00. Manzil: Tez kunda eʼlon qilinadi. To‘lov: 100 ming so‘m (bir martalik).   To‘lovni https://www.tirikchilik.uz/adabiydavra sayti orqali ism-familiyangizni kiritgan holda o‘tkazib, @adabiy_club_bot manziliga yuboring va ro‘yxatdan o‘ting.   ❗️Eslatma: kirish faqat ro‘yxat asosida. Joy cheklangan. @adabiy_klub

МУСТАҚИЛЛИК ДЕКЛАРАЦИЯСИ 1990 йил. 20 июнь. Яна куз келмоқда. Дарёлар тинди. Шилдир-шилдир оқди покиза сувлар. Ургут боғларига сукунат қўнди, Хазонларни секин шамоллар қувлар. Ота элим, энди севингин, шодлан, Истиқлолинг келиб чертди дарвозанг. Олис манзилларга шу тонгда отлан, Йўқолиб кетмагай энди овозанг... Нега қувонмайсан, тошмайсан жўшиб, Ахир, мустақиллик келди ўлкангга?! Ўрис амалдори елкангдан тушиб, Ўз амалдоринг... минди елкангга. Нечун бахтдан яйраб, шод яшамайсан, Нечун бошинг эгик, ўзинг оввора?! Энди сен Московга пул ташимайсан, Энди сен ... Тошкентга ташийсан пора. Сен яйдоқ далангда ишлагин куйиб, Пахтангни ҳокимга топширу қувон – Пойтахт заводлари турибди қуйиб, Кўксингга шақирлаб тақарсан унвон! Ҳасратинг кўп – ичда, лек зўр – савлатинг, Шод бўл, деб мен ўзим бўлолмасман шод. Мана, озод бўлди буюк давлатинг... Бечора халқинг ҳам бўлсайди озод. *** ҚАБРТОШГА ЁЗУВЛАР 1. Яна баҳорлар келар, Жамбил исли ҳавони Симиради кўк савсан. Қари толнинг товонин Қитиқлайди ёш майса, Гуллар босар дунёни… Сен ўрнингдан турмайсан – Минг афсуски, ўлгансан, Минг афсуски, кўрмайсан. 2. Яна баҳорлар келар, Тушар оғир кўйлаклар. Дилга қутқу тўлади – Кимнингдир шод кулгуси Боғни нурга белади. Сен севган ойдай дилбар Бегонага кулади – Сен ўрнингдан турмайсан… Яхшиямки, ўлгансан, Яхшиямки, кўрмайсан. ©Карим Баҳриев

Инсон, шоир, журналист, таржимон Абдулкарим БАҲРИДДИН (Карим БАҲРИЕВ) вафот этди. Охирати обод бўлсин. ЎЗБЕКЛАРГА Музлар эриб битди. Уйғонмадинг сен. Баҳор ўтиб кетди. Ухлайвердинг донг. Ёз нури найзадек елкангдан ўтди – Турмадинг. Куз келди. Жигарим, уйғон. Булутлар ортидан кўринди тулпор, Уйғонди тупроқнинг тагида илон. Ваҳимага тушиб оғзин очди ғор, Бўрилар уйғонди. Кел, сен ҳам уйғон. Бир парча нон учун, қултум сув учун Дилдираб шукрона айтасан нолон – Қулни ҳам боққайлар иш берсин дея. Эслагин. Ўйлагин. Бехосдан уйғон. Кимга овоз бердинг – ўзинг бўлиб гунг, Ким сенинг номингдан сўзлаюр ёлғон?! Агар ухлайверсанг – тугамас бу тун, Қачон сен уйғонсанг – отажакдир тонг. Уйғонмоғинг учун не қилай, айтгин, Йиғлайин, кулайин – нима қилайин?! Майли, керак бўлса, мен берайин жон, Уйғон. Уйғонганинг кўриб ўлайин...

Ҳижрон ҳақида қўшиқ —Ўргимчак тўрига илинган шуъла, Неларни ўйладинг кунботар пайти? —Агарки фурсатинг бир умр бўлса, Кутганинг ҳеч қачон келмайди қайтиб. —Қара, уфқ қизарди, ниҳоя яқин, Ўргимчак ютмасдан кўзларимга қўн. —Менинг умрим битта, асралмоқ не наф, Ахир тонгга қадар минг умрлик йўл?.. —Ўргимчак тўрига илинмоқ нечун, Юрсанг бўлмасмиди ул шамсни қучиб? —Қисматим шу экан, ахир қуёшни, Топганим билмасдим айрилмай туриб. —Мана шам ёқяпман, оқшомдан аввал, Менинг ҳам ҳижроним ҳижронингга тенг. —Агар тонгга қадар фурсатинг бўлса, Кечада яшамоқ азобини енг. —Висол тонг бўлса гар, қисматимиз бир, Умримдан кечалар кўтармайди бош. —Бундан ҳам дахшати — шу тунда ўлсам, Менинг кутганимни билмайди қуёш. Ўргимчак тўрига илинди шуъла... февраль, 2020 https://t.me/Najmiddin_Ermatov

21 март-Ўзбекнинг буюк шоири Абдулла Орипов туғилган кун! ВАТАНИМ Ҳар бир уйда айғоқчи, Ҳар қадамда искович, Одамни кўрса қочар, Бедовларинг ҳуркович. Ошингга заҳар солди, Ғанимларинг бир ҳовуч, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Нон бермайди ва лекин Нон еганни ўлдирар, Ўсиб турган ниҳолни Аёз каби сўлдирар. Бозор бормай қўйнингни Пуч ёнғоққа тўлдирар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ҳар кўчада минг миршаб, Ҳар гўшада авахта, Ҳақ деганнинг оғзи берк, Қон ютар лахта-лахта. Ўзи-ку пахта эккан, Ёстиғи бўлди тахта, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Илму ирфон жаҳолат Ғорига кириб кетди, Ўлик тирикдан ўтди, Тирик ўликдан ўтди. Адолат истаб борсанг Ёлғон тиршайиб кутди, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қайларгадир йўқолди Меҳр билан муҳаббат, Қўлида ханжар ушлаб, Адоват қолди фақат. Ёмон гап арзон-гаров, Яхши гап бўлди қаҳат, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Тўғригўйлар бир четда, Эъзоздадир иғвогар, Қайтдик ўрта асрга, Одам пуллар савдогар. Минг йиллик хазинангни Талаб ётар ўғри, ғар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ўлиб ҳам бўлмай қолди, Ювғич урар кафандан, Кимлардандир юққан кир Кетмас сира бадандан. Қуруқ ҳашаклар қолди Гуллаб турган чамандан, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қувган ҳам халқим дейди, Халқим дейди қочган ҳам, Лекин халқнинг аҳволин Ўйламас бирор одам. Жаллод ҳам халқ номидан Ўқир фармонни у дам, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Турфа хил замонларни Кўрган битта инсонман, Гоҳ фахр этсам, гоҳо Баридан пушаймонман. Нетайки мен на Хорун, На ёки Сулаймонман, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Барчасига сабабдир Асли нафснинг балоси, Меҳнаткаш халқнинг эса Ечилмас муддаоси, Иншооллоҳ, бандага Боққай бир кун Худоси, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. https://t.me/Najmiddin_Ermatov