ادبیات سئونلر

غلامحسین فرنود وصمد بهرنگی ...

فخرالدوله دوختر مظفردین شاه قاجار بنیان گذار تاکسی رانی در ایران

زرین رزندی"طناز" آیری-سئچگین لیکدن گوُزوم قاماشیر حسرت داشیر اورکده دیلک کیمی وئردیک عوُمرو باشا ظالیم لریله ظالیمه چوُنمیشیک،بیز فلک کیمی گوجوم یئتسه،دنیانی یوخ ائیلرم عذابیندان اوُز پایین چوخ ائیلرم آج گوُزلری تورپاقلا توخ ائیلرم دوُیوشَرَم دمیر قول بیلک کیمی. گوجوم یئتسه قورال لاری پوزارام پاسلی یاسالاری،سوُکوب قازارام ارکک-دیشی،برابردیر یازارام اَیری-دوزو اَله رم،اَلَک کیمی. شیمشک لر اوُلکه مه چاخان،لحظه ده بالتاچی بالتاسین تاخان،لحظه ده اینسانلاردان هارای قالخان،لحظه ده یاندیریب یاخارام سرت کولک کیمی. بَی لیکدن ائندیرسم بَیی،یاپیشار آغزینا دولدورسام زَیی،یاپیشار یوخدان زَهلَم گئدیر،هَیی،یاپیشار گور با گور اوُلویه،تَر تَرَک کیمی.

رسول جوادی- پارسا آباد مغان هله لیک واریمدی تُن تُن اگر ایسته سن اریک هله لیک باغیمدا؛ گَل آپار ائیله سلام علیک هله لیک بئش اون گون عومره گورا سالما حورمتی آیاغا ماشین - ماشین، داشی تورش آلچا ، زالزالیک هله لیک سووورما خرمنین اوستونده چوخ سامان باشیوا بو باغ و بستان آرا هر نه واردی دیک هله لیک سنیندی؛  گل آپار آنجاق محبتین کسمه گل ائیله تانریا دوزگونلو بنده لیک هله لیک گل ایندی یوز دنه قارپیز کسیم سنه قوربان بو سن، بو بوستانیمیز، چارداغیندا تیک هله لیک دلی بئیینله گزیب کوهنه یئرلر اختارما بیزیم  بو مئیخانادا ائیله مستلیک هله لیک باشیمدا مین دنه چینگیلتی، قاب - قازان سسی وار گولوشله سسله منه، نازنین، موزیک هله لیک سنین محببتینی من اورکده بسله میشم یاناخدا قیرمزی آلمانی، اورگانیک هله لیک نه سم، نه کود، ندیر آفت گوزللیک عالمینه اورکدن آنجاق ایچیبدیر سو، گونده لیک هله لیک گه دَر، یئتیشدی، دَرَر روزگارین آفت الی نه دیل بیلیر نه دیلنمک،  نده بیلیک هله لیک باهار عومرومه بیر جام ، عشق سپ دیریلیم اورک دویونتوسو چالسین کی سنفونیک هله لیک جوادی عشقه نه چوخ اعتبار ائدیر اوره یین سوموکلرینده ده طغیان ائدیر، ایلیک، هله لیک https://t.me/Adabiyyatsevanlar

پروفسور علی اکبر ترابی (حاللاج اوغلو)                 شاعیر اوره گی منده چیرپینیر انسان اوره گی، قوللاریمدادیر انسان بیله گی، اوره گیمده دیر انسان دیله گی، بیر داملایام من بویوک دنیزدن،        دنیز یارانیر دونیادا بیزدن. گوزلریمده دیر انسان باخیشی، باخیشیمدادیر انسان آخیشی، به به گیمده دیر انسان ناخیشی،    ائل کئشیگینده، ائل دالیسیندا بوی_ آلقاجیق بیز ائل خالیسیندا. اللریمده دیر زحمت قونچا (غنچه) سی، ائللریمده دیر علمین شامچا (شمع چه) سی، یوردوموزدادیر هنر خونچا (خوانچه) سی،     زحمت له باغلی صنعت بیزده دیر،      همت له باغلی قسمت بیزده دیر. آیاغیمدادیر داغ _ داش باشماغی، سئوه رم آنجاق داغلار آشماغی، ائل سئلی اولوب جوشوب_ داشماغی،    قایناماق بیزیم، داشماق بیزیم دیر،   داغ دره دن یول، آچماق بیزیم دیر. دئمک ان گوزه ل گرچک بوردادیر، ائل دنیزینده قطره دریادیر، بیرلیک هاردادیر گئرچک اوردادیر،   محبت بیزده حورمت بیزده دیر،     صلابت بیزده قدرت بیزده دیر. من کیمم؟ _ بو ائل، بو ائل کیمدیر؟_ من، حق سنگرینده سن منسن، من سن، یوللار آیدیندیر گله جک دیر شن،    گله جک ائلین حیات ائلین دیر،     اوجا اوچماغا قانات ائلین دیر. #حاللاجین سوزو ائلین سوزودو، حقیقت گوزو ائلین گوزودور، صنعت یارادان، ائلین اوزودور،      ئلین قدرتی بیله گیمده دیر،     ائل محبتی اوره گیمده دیر. https://t.me/Adabiyyatsevanlar

رقیه عبدیلی(سازاق) قلم‌لریم الیمده اللریم تیتره‌ییردی اوستادیمین باخیشی چک طرحی‌نی دئییردی آغ کاغاذا گؤزلریم تیکیلمیشدی باخیردی اوره‌ییمده سؤکولن ایضطیرابا آخیردی رحلریم رح قابیندا آغلار گولر کیمیدی قیرمیزی قانادیردی گولله‌لر بیر تیم‌ایدی دوسلاریمین سسی‌نی گؤی اوزوندن ائشیتدیم بالاجا اللریمی آغ کاغاذا یئریتدیم بویالاری قاتمادان سرحدلری گؤتوردوم صولح اولدو رسمین آدی گولله‌لری ایتیردیم https://t.me/Adabiyyatsevanlar

علی رشتبری"قاییب" دلیبازدیر  بو عاغیللی دونیامیز، یازیق کیم کی باشا دوشور سؤز قانیر. آلوو قالخیر سومویوندن اونون کی، عدالتی، ترازونو دوز قانیر. هر کیمین کی قلبی درده دؤیونمور، یاز لیباسی پاییز دونو گئیینمیر. مین حاقسیزلیق گؤرور بیر یول دئیینمیر، نئجه دئییم بوز آنلاییر کؤز قانیر. حقیقتدیر  بو دونیانین تملی، هارایلاییر هر انسانی عملی. بیر باخیشین مین سؤزو وار دئمه لی، هر کیمه کی گؤز آنلاییر گؤز قانیر. کیمه قایا کسک اولور لاغ اولور، کیمه کسک قایا اولور داغ اولور. قیرخ یاشیندا ساققالی دا آغ اولور، کیم کی کیملیک قانیر کیم کی اؤز قانیر. بخته‌وردیر کیم کی هئچ نه دویماییب، حق اوستونده اورگینی اوْیماییب. یازیق او کی بو دونیادا آی قاییب، چؤرک بیلیر، تیکه بیلیر دوز قانیر.

ویداحشمتی ادبیات سئونلر تبریزده «ائل ائوی» مؤسسه‌سینده «قوردلارلا قاچان قادینلار» کیتابینین تانیتیم و اینجه‌لمه توپلانتی‌سیندان گزارش «قوردلارلا قاچان قادینلار» کیتابینین تانیتیم و اینجه‌لمه توپلانتی‌سی، تهران‌دان گلن قوناقلارین ایشتیراکی ایله، صمیمی و مدنی بیر اورتامدا، «قادین اثرلری کیتابخاناسی»نین قوروچوسو خانم فرانک فریدین اهتمامی ایله «ائل ائوی» مؤسسه‌سینده کئچیریلدی. برنامه خانم سلطانی‌نین «شهریاردان اینشتین‌ه پیام» شعیرینی اوخوماغی ایله باشلاندی و سونرا پروگرامین آردی خانم مهدیه آهنی‌نین آپاریجیلیغی ایله داوام ائتدی. پروگرامین ایلک دانیشانی، «قوردلارلا قاچان قادینلار» کیتابی‌نین مترجمی خانم سیمین موحد اولدو. او، کیتابین ترجمه سوره‌جی، فارسجا نسخه‌‌سینین نشر تاریخی و اوخوجولار طرفیندن گؤردویو بؤیوک ماراق باره‌ده دانیشدی. هابئله بیلدیردی کی، اثرین فارسجا ترجمه‌سی، اصلی نسخه‌نین نشریندن چوخ آز بیر مدت سونرا چاپ اولونوب و سونرادان بیر نسخه‌سی یازار، کلاریسا پینکولا استسه چاتدیریلیب. اؤز دئدیگینه گؤره، خانم استس فارسجا ترجمه‌نی و ایرانلی اوخوجولارین بو اثری بؤیوک استقباللا قارشیلادیغینی گؤردوگونده، چوخ سئوینیب و سئوینجدن رقص ائدیب. بو خاطره حاضر اولانلارین دا گولوش و ماراغی ایله قارشیلاندي. خانم موحد، بئله بیر اثرین ترجمه‌سی‌نین چتینلیک‌لریندن سؤز آچدی؛ روان‌شناسی، اساطیر، فولکلور و ادبیاتین بیر-بیرینه قاریشلیغی بئله بیر کیتابین مفهوملارینی فارسی دیلینه، دوغرو و ظریف بیر شکلده کؤچورتمه‌نین راحات اولمادیغینی و بؤیوک دقت ایستدیگینی وورغولادی. سونرا خانم دکتر رابعه موحدی، اساطیره، روان‌شناختی باخیشلا یاناشاراق، کؤهنه روایت‌لرین و نمادلارین انسان روحونون گیزلی قاتلارینی آنلاماقداکی رولوندان سؤز آچدی. او، روان‌شناسی و تحلیلی‌ باخیشی ایله اساطیرین بوگونکو حیاتداکی یئرینی تحلیل ائتدی. پروگرامین سونراکی دانیشانی خانم ویدا حشمتی اولدو. او، «تورک اساطیر و حماسه‌لرینده قادینین یئری» موضوعوسوندا دانیشاراق، تورک اساطیر، حماسه و فولکلوروندا یئر آلان قادین سیمالارینی تانیتدی. اومای‍آنا، آغ‌آنا، آسئنا، دده‌م قورقود داستانلاریندا یئر آلان قادینلار و آل‌آروادی کیمی شخصیت‌لره توخوناراق، تورکلرین اساطیری دوشونجه‌سینده قادینین یئری و اهمیتینی آچیقلاماغا چالیشدی. دانیشیغین سون بؤلومونده ایسه، «قوردلارلا قاچان قادینلار» کیتابیندان الهام آلاراق، بیزیم زنگین اساطیر و فولکلوروموزون دا گله‌جکده روان‌شناختی آراشدیرمالارا و یئنی اوخونوشلارا الهام وئره بیله‌جه‌ئی فیکری مطرح اولوندو. قیسا بیر آرا و پذیرایی‌دان سونرا، خانم سیمین موحدین قاتیلدیغی سورغو-جواب بؤلومو باشلاندی. ایشتیراکچیلار ترجمه سوره‌جی، یازارین باخیشی، مختلف فرهنگ‌لرده اساطیرین یئری و بو اثرین ایرانلی اوخوجولارا تأثیری باره‌ده ماراقلی سؤاللار وئردیلر و مترجمین جاوابلاری صمیمی و ثمره‌لی بیر صحبت اورتایا چیخاردی. پروگرام، شام یئدیکدن سونرا، صمیمی بیر اورتامدا سونا چاتدی. ادبیات، اساطیر، فولکلور و روان‌شناسی آلانلارینا ماراغی اولانلار اوچون یارارلی بیر گؤروش و فیکیر اولان بو توپلانتی، ایشتیراکچیلارین بؤیوک استقبالینی قازاندی. https://t.me/Adabiyyatsevanlar

گزارشی از نشست نقد و بررسی کتاب «زنانی که با گرگ‌ها می‌دوند» در موسسه‌ی «ائل ائوی» تبریز از راست به چپ :مهدیه آهنی، افسون سلطانی. https://t.me/Adabiyyatsevanlar