ایمگه‌‌لَر️

⭕️ آنا دیلیم   ✍️ شاعر: #دکتر_سیدمجید_جوادی (زیوه)   اؤلدۆرورلر هر سس کی، سینه‌نین زیندانیندان آیاق چؤله قوْیا سسلر حبسیده! نفسلر دایانیب! سس‌سیز! دایانین سس......    سیز...... گؤزه‌تچی، قوْرخموش بو قیشقیریقدان هردن قوْرخولو آددیملاری سکوتون سوْیوق و قارانلیق حاصارین اوچوردور هردن باشین قینینا سوْخور تابوتداکی لئش کیمین اؤز نئیبت باخیشین  هردن باجانین کؤهنه چاتلاغیندان منه تیکیر چوْخ حیله ایلن و تعجّب ایلن منی آراشدیریر آرزیلارین کینه‌لرین، اومودلرین ایچینده گؤزلرین، دوْداقلارین ایچینده سکوت دینجه‌لیر.... سکوت دینجه‌لیر..... و دوْلانیر یادی‌نین قوشو منیم خزان وئرمیشم خاطیریمده! نه اتک وار کی، گؤز یاشلاریمین شؤقۆن افشان ائله‌ییم نه گۆلوشلرین ماهنیسی چؤل یوْخ، اتک یوْخ، ائو یوْخ!! گؤڲـده‌کی قالارغی عشقین آرزیلاری دئییل کی، آیاغیما بند اوْلوبلار نه پیچیلتیلار گئجه‌ده نه پرچمین دالغاسی گؤیه باش چاتدیران داغین باشیندا نه قیشقیرتی، نه پیچیلتی، نه پرچمین دالغاسی، هیهات، هیهات!.... خاطیره‌لرین ایچینده یوخونون جادوسون اوْغورلاییر یوْرغون کیپریک‌لری بیربیرینه قوْیورام گؤزده باخیشیم قورویور کی، اوزاقدان اوزاغا، او لحظه‌دن نشانسیز آرزیلاری یوخولاردا گؤرم گؤزلرین آراسیندا، دوْادقلارین آراسیندا   گلین گلین منیم غیرتلی اولادلاریم یوْلوزا ایپک سریب، اولدوز دؤشه‌ییب، چیچک دویغو قوْشما سریمیشم گلین گلین ووقارلی گلین آنادیلی‌نین باغینا من آنادیلی‌نین قیرمیزی دوْن گلینی‌یم، آیی‌یام، گۆنویم گئنه باش اوجالدیب معراجدا سیزی سسله‌یه‌جَـڲم هئی دؤنه دؤنه باشقالانیرام باشی قارا باشقا دیل‌لره باش منم رئالیست ساغیمدا سوررئالیست سوْلومدا قاناد چالیرلار قوجاق قوجاق سیزه نرگیز گتیرمیشم لالا گتیرمیشم اولدوز گتیرمیشم شاباشلاریمدا آی سپه‌جم، گۆن سپه‌جم من آنادیلی‌یم...   @SancaqDergisi https://t.me/Sancaq_media/8453

⭕️ آنا دیلیم   ✍️ شاعر: #دکتر_سیدمجید_جوادی (زیوه)   من آنادیلی‌نین تزه آغ دوْنلو گلینی‌یم من بخت آیناسییام من خان بَـڲین قیرمیزی آلماسییام عاشیق‌لارین قوْپوزو و زورناسییام شادلیقلارین تیرینگه‌سی‌یم قارا بولودلارین یاغیشی شاهلارین تاجییام، من آنا دیلی‌یم گؤڲ‌لرین ایلدیرمی، گۆرولتوسو تندیرلرین مقدس آلوْوسو خلقتین بهانه‌سی ملک‌لرین قباله‌سی آللّهین آیدین موبارک حواله‌سی من سیزین آنازام سۆدوم حلال قوْچاق ایگیدلریمه حلال حلال سۆدومده قوْشما وار، گرایلی وار، غزل وار سۆدومده آزادلیق، غیرت قایناییر شاه اسماعیل‌ین کسرلی قیلینجی ایلقارییام من ستارخان‌ین، باقیرخان‌ین ایتیلمیش پارلاق قیلینجییام شهریارین حیدرباباسی باشی طوفانلی سهندی نسیمی‌نین گۆموشدن یارانمیش شعری‌یم بولودون دۆشمنلر بوْغان نعره‌سی‌یم   آنا باغی‌نین پۆسته‌سی، بادامی آلماسی، هئیواسی، ناری رشیدی، شأنی شؤکتی ساوالانین غیرتلی اوجا قاری شاه اسماعیل‌ین کسرلی قیلینجی ایلقارییام خالخالین زیوه‌لی، آسلان‌لی، قافلانلی‌یام، یاشیل مئشه‌سی‌یم آذربایجانین قیپ‌قیرمیزی بایراغییام من آنا تۆرکون گؤڲ‌لرده یارانمیش آغ دوْنلو گلینی‌یم خان چوبان منم کوْراوغلو نازلی نیگار منم ایلک باهارین عطیرلی چیچڲی ایلک سحرین ایشیغی قیزیل قیزلارین قیزیلچی ائلچی‌سی‌یم من آنا دیلی‌یم هئی هئی  هئی   آما بوگۆن خسته‌یم پریشان، خسته، یوخولو قدیمکی قارانلیقدان اۆره‌ڲیم یاواش – یاواش یئریندن قالخیر یاواش – یاواش اؤز یوواسیندان چیخیر کی، اؤز طیلیسم سردابیندا یاندیرا عاشیق‌لرین آیاغی باغلی نغمه‌سی‌نین دالغالارین و او کئچمیش اوْجاغین غوغالارین   سوْیوق طیلیسم تؤکه قفسده‌کی اوْیاق اۆرک‌لرین چاتلاغینا اؤز قانادین آچا یاواش – یاواش قاپی‌یا باجایا های بیدیریغین اۆره‌ڲین، سماجتیلن سیخا ایشیق کیمین سۆرونور اۆزلره، دیری و آییق گؤزلرده یاواش – یاواش اوْنلار اۆچون لالایی اوْخویا   گلین گلین منیم غیرتلی اولادلاریم پریشان گئدیر چتینلیک چکن کیشی‌نین اومودلو دوْداغلاری‌نین آلتیندا چوْبالاییر زندگانلیق‌لارین عشقلرین یادیلا کارخانانین یادیلا، بوغدا زمی‌لری‌نین، بوْستانین یادیلا دۆڲو اکن کیشی‌نین دوْداغیندا تیرینگه‌سی قورویور دردلی یارالی سسلرین دالغالاریندا اوْینور یارالارین سیزیلتیسینا  ناله‌لری چکسین عشوه ایلن سۆزولور قانلی دیرناخلارین آلتینا او جیسمده‌کی قامچی‌یلا قارالیب، آغریدان اؤزۆنه دوْلاشیر اونوتماغین سوْیوق نفسین، دویغونون یوْرغون قولاغینا تؤکه کی، دردلرین یانیغی دوزلانمیش یارانین ائویندن قاچا قارانلیق سس‌سیز صبرلی یوْلا آیاق قوْیا آوارا جیسمین اوْیانا – بویانا چکیر هریانا گئدیر شئحلی داخمادا بیر نفر چیغیرتیلان اؤزۆنه دوْلاشیر و اوْینور یاواش – یاواش بو شنلیکده‌کی دردلر بئله قوروبلار اوْنون قیری دوْداقلارا شادلیق گتیریر سکوتون قوْرخولو لزگیسیندن سکوت اوْندا قارانلیغین آیاغینا گلیر آنلین آستانایا سۆرتور کی، بیزیم گئجه‌نین سولطانی وارلیق‌لارین اؤلۆم قارا – قوْرخولو آتێنا مینیب، قارالیقلارین قارانقولوق دنیزین اۆزونده تله‌سیک، برک چاپیریق #دوامی_آشاغیـدا...👇     @SancaqDergisi https://t.me/Sancaq_media/8453

💢💢💢 پاییز ایله من 🍂🍁 منیم ده ساچلاریم بوْیالی سن تک منیم ده شاخامدان قارانقوش کؤچۆب من ده سنین کیمی خَزَل‌لنمیشم منیم ده قوشلاریم باشیمدان اوچوب توتولور هاوام دا یامان دال‌بادال بۆرویور چَن، دومان اۆره‌ییم گؤیۆن پیرتلاشیق کَلَف تک هئی قیوریلیرام مین بارماق آچانمیر حالیمدان دۆیون ایندی من قالمیشام، سوْیوق پنجره‌ تؤکۆلور خزللر، سوْلور چیچک‌لر داها بوْش سۆفره‌لی کیچیک باغچاما قوْناق گلمه‌ییرلر ناز کَپه‌نک‌لر قدم قوی بو گئجه یالقیز اوْداما صۆبحه‌دک دردلشک، چوْخلو چایلاشاق دئییرلر: بؤلۆشسن دردی یۆنگولَر اوندا گَل سنین‌له دردی پایلاشاق قوْیوم قاباغینا آلما، قوْز، اۆزوم بوْیاقلی ساچینا اینجی‌لر دۆزوم دئییم خوْش گلمیسن آی منیم اؤزۆم گَل گۆلوم سنین‌له ائکیز تایلاشاق اۆز - گؤزۆن غملی‌دیر، اللرین یالین سازاقدان گئیمیسن اَگـنینی قالین نه یاخشی بیلیرسن دوْستلوغون یوْلون قوْینونا آل منی بیر قوجاقلاشاق صاباح دا گئده‌ریک خیاوچایینا باخاریق طبیعت قیزی بوْیونا قوْشوللوق ائلیمین شنلیک، توْیونا ال - اله، قوْل - قوْلا گَل سیجاقلاشاق یئریییب خزلده سئودالی، مَلَنگ باغلاریق چؤللرین گۆلوندن چَلَنگ ییغیشسین دۆنیادان هر نه توْپ - تۆفنگ غریبسن؟ عیبی یوْخ، یالقوزاقلاشاق! ✍ #سحر_خیاوی #ایمگه‌لر_کانالی ✔️✔️✔️ 👇👇👇 https://telegram.me/imgalar

💢💢💢 گۆزۆن ایلک گۆنۆ اسکی آجیلاریم سیزیلداماغا باشلار بۆتۆن اوشاقلار اؤز دیلینده اوْخویوب یازماغا باشلارکن ائلیمین اوشاقلاری اؤز دیلیندن اوزاقلاشاراق گئدر اوْخولا گۆزۆن ایلک گۆنۆ آجیلاریم سیزیلدار دیلیم یانار دیلیم یانار دیلیم ... ** گۆز /güz/: پاییز ایلک /ilk/: اوّل اسکی /əski/: کهنه آجی /acı/: درد اوْخول /oxul/: مدرسه ✍#جلیل_یاری #ایمگه‌لر_کانالی ✔️✔️✔️ 👇👇👇 @imgalar

💢💢💢 🔷 قوْرخو بَله‌یینه بوکولن ایمگه دیزلریمدن بیر آز آشاغانی دویان بیر آز سیلپک‌لره توْخونان خالچا ناخیشلی بیر ایمگه سیزه دانیشیم می؟ قارین وئرمیش دووارلار یوْخلوغوندان بئلیمده‌کی آلا - بولا بیر پیشیک حوزونوندن؟ گؤوده‌سی گیزلی بیر دیمدیک‌دن؟ تمل‌سیز بیر یوخونو ایفاده ائتمک آیریلماقلا قوْووشماغی دؤنۆش نؤقطه‌سینه یئرلشدیرن کیمی‌دیر بولوتلار ذیروه‌لری سیغاللایان چاغ قارتالا اینتحار یاساقلانیر توْرپاق سوْیوقلوغونا سۆرتولن قانلی دیزلرله ال اوْرتاسیلا قاچا - قاچا قاپسانمیش جیریقلارا باخا - باخا بیر «دور» سؤزجۆیو دوردوراجاق چاتلاق بیر غرورلا اونودولاجاق تۆربه‌لردن بیر اینیلتی باغیران کیمی کیمی درد... کیمی کدر... کیمی زهر.... "وِ اِنّ یَکاد "ینا گؤز ده‌یمه‌سین دئیه میناره‌لریندن قارا جیندیر سپه‌لندی یئر بطنیندن ایکی مرتبه آشاغادا اؤلۆلر توْپلومو وار «ماری جووانا» تئشنه‌سی اؤزگه‌لر یئنه دووارلارینی اؤپۆشدورن دؤنگه‌لر گئجه قوشونو کؤکسۆنده بئجرده‌جک و بیر سحر، قوْرخو بَله‌یینه بوکولن ایمگه گئجه قارانلیغینی گونش اوْخویلا یاراجاق یارالاناجاق گئجه باغیراجاق ایشیق قارالاجاق اومود بلکه ده سیناجاق بو سکوت!... ✍ #سعید_صادقی‌فر #ایمگه‌لر_کانالی ✔️✔️✔️ 👇👇👇 https://telegram.me/imgalar

💢💢💢 🔷 یاشاسین حکومت ✍️ یازار: #عزیز_نسین 🔶 تۆرکجه‌یه چئویرن: #ماحمود_دالغا کیشی بیر بالیق توتوب تئز اؤز قادینی‌نین یانینا گئتدی، او ایسته‌دی بو بالیق چوْخ تئز قیزارسین، آما قادین دئدی: - باغیشلایین، چونکی یاغ یوخودور. کیشی دئدی: - یاخشی، اوْندا بالیغی کاباب ائله‌ییک! گینه قادین دئدی: - باغیشلایین، کاباب ائله‌مک  اۆچون آراج یوْخوموزدور! کیشی بیر آز فیکر ائله‌دی، سوْنرا دئدی: - گل اوْنو پیشیرک. بو دفعه قادین حیرصلنیب دئدی: -  بیزیم کی، گاز یوْخوموزدور! کیشی بالیغی گؤتۆرۆب، دنیزه گلدی، اوْنو سالدی دنیزین سویونا. بالیق باغیریب دئدی: - یاشاسین حکومت! @bizimdil #ایمگه‌لر_کانالی ✔️✔️✔️ 👇👇👇 @imgalar

⭕️ «سوْنای» سئوگیلی‌لر گۆنو ✍ یازان: #تانسو_خیاوی 🔷 كۆلتوروموزده «گونش» و «آی» سئوگيلی‌ديلر. بو سئوگيلی‌لر هئچ زامان بيربيرينه چاتمازلار! آما سئوگیلری اۆرکلريندن سيلينمز. بوگۆن سئوگییه، عشقه تعبیر اوْلوب، بیر سئوگی کی سوْنو یوْخدور. 🔷 زومار(شهریور) آیێ‌نین سوْن گئجه‌سی «سوْنای» آدلانێب. بوگۆن آذربایجاندا سئوگیلی‌لر گۆنو سایێلیر. بو گۆنده افسانه سئوگیلی‌لر «آی و گۆنش» گۆن‌باتاندا بیر بیرلریله گؤرۆشۆرلر (افق‌دا 180 درجه زاویه‌ده قرار تاپێـرلار) و بو قێسا گؤرۆشده آی و گۆنشین بیر ایللیك اؤزلمی سوْنا چاتێر و بو ایكی سئوگیلی بیر آن اوْلسون بئله قوْووشورلار. بو اوْلایدا سَمبولیك اوْلاراق آذربایجاندا سئوگیلی‌لر گۆنو آدلانێب و عزیز سایێلیبدی. 🔷 گئچمیشده بو گۆنده اؤزل تؤر‌ه‌نلر گئچیریلردی. كندلرده هركس اؤزل بیر سسلرله كی اوْنا "اواوا" دئییردیلر، بیر بیرلرینی سسله‌ییب، كندین میدانێـنا یێغیشاردیلار. اوْردا یئمكلر پیشیریلیب، اوْیونلار اوْیناناردێ. سئوگیلی‌لر بیر بیرلرینه هدیه وئرردیلر. باشقا آیرێنتیلار (جزئیات) اۆچون «ناصر منظوری‌»نین "اواوا" كتابین اوْخوماق اوْلار. 🔷 سوْنای آذربایجان خلقینه عایید اوْلان بیر عنعنه اوْلاراق بیزیم كۆلتوروموزون زنگین‌لیڲین گؤرسه‌دیر و بونا گؤره ده داها چوْخ اۆركلره یاتیر. ولینتاین باتێ ‌ایله مسیحیت سیمگه‌سی اوْلدوغو اۆچون بیزه چوْخ اوزاق اوْلاراق یابانجی گلیر. اؤزللیكله تۆرك كیشی‌لر كی، دویغوسال قوْنولاردا چوْخ آغێرباشلێ‌دیرلار، بئله‌نچی بیر قوْنولاردا داها تپكی‌لی اوْلورلار و اوْنو خوْش قارشێلامیرلار. ولینتاین چوْخ آنلاملی اوْلسا بیله بیزیم كۆلتوروموز دڲیل. هله سوْنای كیمین درین آنلاملێ و زنگین بیر تاریخی عنعنه‌سی اوْلان بیر خلقه ولینتاینین هئچ ضرورتی یوْخدور. 🔷 سوْنای آذربایجانین اسكی دَبلریندن اوْلاراق هر كسین ماراقلا ایلگیسین چكیر. من اۆره‌ڲینده سئوگی گؤزللیکلری اؤلمه‌میش بیر قادێن اوْلاراق، سوْنای گئجه‌سی اۆچون نئچه اؤنریم (پیشنهاد) وار؛ «بیزیم آذربایجان كۆلتوروموز اوْ قدر گئنیش، گؤزل، درین و زنگین‌دیر كی، بیز اوْنو داها چوْخ ماراقلا آراشدێریب، اؤڲرنمه‌لی‌ییك. سوْنای أن گؤزل دبلرین بیریدیر. سوْنای عشق سیمگه‌سی‌دیر. بیز ده سینه‌میزده بیر اۆرك اوْلدوغونو و اوْ اۆره‌ڲین ایچینده بیر سئوگیلیمیز اوْلدوغونو اونوتمایاق. اونوتمایێن صاباح اوْلمایا بیله‌ریك. سوْنای سئوگیلیمیزه اوْنو نه قدر چوْخ سئودیگیمیزی گؤرستمک اۆچون گؤزل و آنلاملێ بیر گئجه‌دیر. «سوْنای گئجه‌سی» بۆتون سئویب، سئویلن‌لره موبارك اوْلسون. 🌻🪸 ۳۱ زومار آیێ ۱۴۰۲ - خیاو شهری @SancaqDergisi https://t.me/Sancaq_media/8451

💢💢💢 🔷 #آنا_دیلیم آنا دیلیم، سن منیم ایلک سسیم‌سن، سون سسیم ده سن اولاجاقسان. مکتبین قاپی‌سی دیلیمه باغلانسادا، سن منیم ایچیمده بوی آتیرسان. کیتاب‌لار سنی تانیماسا دا، اۆرک‌لر سنی یاددا ساخلار. هر گئجه ننه‌مین لای‌لای‌سیندا سن بیر اولدوز کیمی پارلادین. هر سحر آتام‌ین دۇاسین‌دا سن بیر نفس کیمی قالدین. مدنیتیمیز، کولتوروموز سنینله سطر-سطر یازیلدی: موغامدا، بایاتی‌دا، ناغیلدا، توی نغمه‌سینده. سن اولماسایدین، آدیمیز یاریم، تاریخیمیز یاریم، گله‌جگیمیز یاریم اولاردی. کولتوروموز بیر اوجاق ایدی، سن اونون اودی. سن سؤننده، اوجاق سؤنر، آدلار اونودولار، ناغیل‌لار یاریم قالار. آنا دیلیم، سنی قاداغان ائدنلر بیلمه‌دیلر کی، دیل ایشلَدیب آتیلان بیر وسیله دئییل، دیل بیر ائو دیر. بو ائوین تمللری اوشاقلار‌دیر، اینانیرام آنا دیلینده دانیشان اوشاقلار بو اوجاغی آیاقدا ساخلایاجاقلار همیشه. #لیلا_قلیزاده #ایمگه‌لر_کانالی ✔️✔️✔️ 👇👇👇 https://telegram.me/imgalar

💢💢💢 سلام حؤرمتلی آخاق اۆیه‌لری. آخشاموز خیرلی اوْلسون. 🔷 منیم آماجیم (هدفیم) «آیلا امیدی»نین یازدیغی متن و سسلندیردیگی «حیدر بابایا سلام» شعریندن، آخاقدا حضورلاری اوْلان سئوگیلی گنج آتا - آنالار، مهربان بؤیۆک آنا و آتالارین پایلاشدیغیمی گؤروب، نوه‌لرین، عزیز بالالارین #آنادیلیمیزی یازماغا، اوْخوماغا تشویق ائتمه‌لریدیر. 🔷 اوماریم بو ایشی گؤروب، یازدیقلاری - ازبرله‌دیگی شعرلری بیزه گؤندره‌سیز تا اؤز عکس‌لریله بیرلیکده «مونجوق صفحه‌سینده) چاپ اوْلونسون. ✍ حؤرمتله: #تانسو_خیاوی‌ #ایمگه‌لر_کانالی ✔️✔️✔️ 👇👇👇 @imgalar

⭕️ شاعر «شهریار» اۆچون   ✍️ یازان: #آیلا_امیدی – اون یاشیندا – اردبیل شهریندن   سلام مونجوق صفحه‌سینی اوْخویان عزیز دوْستلارێـم. من ایلک دفعه «شهریار»ین شعرلرینی بابام، من اۆچون آلدێـغی کتابدا گـؤردۆم. و شهریاری تانێـدیم. بابام منه دئدی: - شهریار اوّلده تهران شهرینده دانشگاهدا (پزشکی رشته‌سینده) درس اوْخویورموش. اما بعضی اتّفاق‌لار اوْنون زندگی‌سینده اوْلوب، او درسین دوام وئرمییب.   شهریار هر بیر شعرینده حیاتیندان سؤزلر یازمێش. ائله اونون «خان‌ننه» و «حیدر بابابا سلام» شعری کلاً اوْنون یاشاییشی‌دی. اوْنون شعرلرین اوْخوماق منه افتخاردێ. هم منه گۆوه‌ن وئریر، هم منه سؤز اؤڲـره‌دیر. آرزێ ائلییرم کی، هر بیر شعرین حفظ ائلییه‌نده، روحی شاد اولسون.   بو ایل سیز دوْستلارێما «حیدربابایا سلام» شعریندن حفظ ائله‌دیڲیم بندلری اوْخویاجییام.   ****   🔷 «حیدربابایا سلام» ✍️ شاعر: #شهریار حیدربابا، ایلدیریملار شاخاندا سئللر، سولار شاققیلدییوب آخاندا قیزلار اوْنا صف باغلییوب باخاندا سلام اوْلسون شؤکتۆزه، ائلوزه منیم ده بیر آدیم گلسین دیلوزه حیدربابا، کهلیک‌لرون اوچاندا کوْل دیبیننن دوْشان قالخیب، قاچاندا باخچالارون چیچکله‌نیب، آچاندا بیزدن ده بیر مۆمکون اوْلسا یاد ائله آچیلمییان اۆرک‌لرى شاد ائله بایرام یئلى چارداخلارى ییخاندا نوْروز گۆلى، قارچیچـڲى چیخاندا آغ بولوت‌لار کؤینکلرین سیخاندا بیزدن ده بیر یاد ائله‌ین ساغ اوْلسون دردلریمیز قوْى دیکلسین، داغ اوْلسون حیدربابا، گوْن دالیوى داغلاسین  اۆزون گۆلسون، بولاخلارون آغلاسین اوشاخلارون بیر دسته گۆل باغلاسین یئل گلنده، وئر گتیرسین بویانا بلکه منیم یاتمیش بختیم اوْیانا حیدربابا،‌ سنون اۆزون آغ اوْلسون دؤرت بیر یانون بولاغ، باغ اوْلسون بیزدن سوْرا سنون باشون ساغ اوْلسون دۆنیا قضو – قدر، اؤلۆم – ایتیمدى دۆنیا بوْیو اوْغولسوزدى، یئتیمدى حیدربابا، یوْلوم سننن کج اوْلدى عؤمرۆم گئچدى، گلممه‌دیم، گئج اوْلدى هئچ بیلمه‌دیم گؤزللرۆن نئج اوْلدى بیلمزیدیم دؤنگه‌لر وار،‌ دؤنۆم وار ایتگین‌لیک وار، آیریلیق وار، اؤلۆم وار حیدربابا، ایگیت اَمَک ایتیرمز عؤمۆر گئچر، افسوس بَره بیتیرمز نامرد اوْلان عؤمرى باشا یئتیرمز بیزده واللاه، اونوتماریق سیزلرى گؤرنمه‌سک حلال ائدون بیزلرى حیدربابا، میر اژدر سسله‌ننده کند ایچینه سسدن – کۆیدن دۆشنده عاشیق رستم، سازین دیللندیرنده یادوندادى نه هؤلَسَک قاچاردیم قوشلار تکین قاناد آچیب اوچاردیم شنگیل آوا یوردى، عاشیق آلماسى گاهدان گئدوب، اوْردا قوْناق قالماسى داش آتماسى، آلما،‌ هیوا سالماسى قالیب شیرین یوخى کیمین یادیمدا اثر قوْیوب روحومدا، هر زادیمدا حیدربابا، قورى گؤلۆن قازلارى گدیک‌لرین سازاخ چالان سازلارى کَت کؤیشنین پاییزلارى، یازلارى بیر سینما پرده‌سى‌دیر گؤزۆمده تک اوْتوروب، سئیر ائده‌رم اؤزۆمده   (۲۰ شهریور ۱۴۰۵ – اردبیل شهری) *****   🟣 آیلا جان! من ده سنی مونجوقدا اوْلان هر کس آدێـنا سلاملییرام. ادبیاتـێـمیزا وئردیڲـین اؤنم و امک اۆچون ساغ اوْل. شعر اوْخوماق، اۆسته‌لیک اوْنو ازبرلمڲه چالێشماغین نئچه فایداسی وار انسانا؛   بیرینجیسی شعر اوْخویان آدامێن ذهنی داها چوْخ آیێـق و چالێـشقان اوْلار. علمی آراشدێـرمالارا دایاناراق دئمک اوْلار، یئنی یئتمه و گنج‌لیک چاغلارێـندا بیر زادلاری اؤڲـره‌نیب، ازبرلمڲـه اوغراشان انسانلارێـن ذهنی او بیری انسانلارا نیسبت داها گئج قوْجالار، یا اصلاً ایشدن دۆشمز یا دا، داها گئج ایشدن دۆشر.   سیزه داها راحات بیر اؤرنک گتیرسم دئیه‌رم بیر پیچاغی نظرده توتون، نئجه پیچاغی ایشلتدیکجه، پیچاق داها کسگین اوْلار، ذهن ده ائله‌دیر، ایشلتدیکجه داها چوْخ گۆجلنر. شعر اوْخویوب، ازبرلمڲـین باشقا بیر فایداسی دا، بیزیم سؤز داغارجێغیمیزین داها زنگین و داها دوْلقون ائتمه‌سی‌دیر. یعنی بیز هر شعری اؤڲـره‌شدیکجه بیر چوْخ سؤز و کلمه، باشاردێـغیمیز سؤزلره آرتێـرماقدا اوْلوروق.   بوردا ذهنیمه گلن اۆچونجو فایدا، باشاردێـغیمیز شعرلری چئشیدلی مجلس‌لر و مناسیبتلرده هر کسله پایلاشدێـغیمیز اوْلا بیلر. عئینی آیلا جان، سنین کیمی کی، گئچن ایل یوردوموزون افتخاری، «اوستاد شهریارێن» عزیزلمه گۆنو اوْنون «خان ننه» شعرینی بیزه اوْخودون، بو ایل ده همان گۆنده اوْنون «حیدر بابایا سلام» شعریندن بیر نئچه بندی بیزیمله پایلاشدین.   اۆمود ائدیرم مونجوغون بۆتون اوْخویوب – ایزله‌ینلری سنین کیمی اردملی قێزیمنان اؤڲـره‌شیب، آنا دیلیمزده اوْلان گؤزل شعرلری ازبرلییب، بیزیمله پایلاشسێنلار. سیزی چوْخ سئون، #گۆنش_امانی.   @MuncuqAz https://t.me/Sancaq_media/8446

💢💢💢 🔷 #مهر_آیی_نین_بیری 🔶 آنا دیلینده تحصیلین ضــرورتی و آذربایجان اوشاقلارینین دورومو آنا دیلی، اینسانین دۆشونجه، دویغو و کیملیک قورولوشونون تملی‌دیر. بیلیم و پداقوژی ساحه‌سینده آپاریلان آراشدیرمالار گؤستریر کی اوشاقلار تحصیلی اؤز آنا دیللرینده باشلادیقدا، قاوراما گۆجلری یوکسک اولور، اؤزگۆونلری آرتیر و یئنی دیللری اؤیرنمکده داها اوغورلو نتیجه‌لر الده ائدیرلر. بیر اوشاغی اؤیرندییی و دانیشدیغی ایلک دیلدن اوزاقلاشدیرماق، اونون درک ائتمه سوره‌جینه آغیر ضربه وورور و اؤیرنمه هوسینی آزالدیر. مهر آیی‌نین گلیشی و یئنی درس ایلینین باشلانماسی ایله بیرلیکده، اؤلکه‌ده میلیونلارلا آذربایجانلی اوشاق یئنه ده اؤز آنا دیللرینده یعنی تورکجه‌ده رسمی تحصیل آلماق ایمکانیندان محروم قالیرلار. بو اوشاقلار مکتبه آددیم آتدیقدا، اؤز ایلک و ان طبیعی دانیشیق دیللری اولان تورکجه‌دن فرقلی اولان بیر دیلله (فارسجا) قارشیلاشیرلار. بو وضعیت، اوشاغین تحصیلی ایلک گۆندن اؤیرنمه‌دن چوخ، دیل چتینلیگی ایله موباریزه‌یه چئوریلیر. آنا دیلینده تحصیل ساده‌جه بیر دیل اؤیرنمه مسئله‌سی دئییل، بلکه اینسان حوقوقلاری و مدنی کیملیک حوقوقودور. اوشاقلارین اؤز دیللرینده علمی آنلاییشلاری، ادبیاتی و تاریخی دَیَرلری اؤیرنمه‌لری، اونلارین فیکری اینکیشافی اوچون ان واجیب فاکتوردور. آنا دیلیندن محرومیت، تکجه دیلین اونودولماسینا دئییل، عینی زاماندا اوشاغین روحی و روانی ساغلاملیغینا، اؤز کؤکلرینه اولان باغلیلیغینا و اجتماعی بیرلشمه‌سینه منفی تأثیر گؤستریر. نتیجه اولاراق، گلنک‌سل و پداقوژیک باخیشدان، آنا دیلینده تحصیل اوشاغین ان طبیعی حوقوقو ساییلیر. آذربایجانلی اوشاقلارین دا دونیانین دیگر یئرلرینده اولدوغو کیمی، اؤز آنا دیللرینده تحصیل آلماسی، اونلارین پتانسیل‌لرینی ان یوکسک سویه‌ده اوزه چیخارماسی و گلجه‌یه داها گۆونلی باخماسی اوچون قاچیلماز بیر ضرورتدیر. بو حوقوقون تانینماسی و حیاتا کئچیریلمه‌سی، تکجه دیلین قورونماسی دئییل، عینی زاماندا عدالت و برابرلیک ایسته‌یینین ان پارلاق گؤستریجیسیدیر. ✍ #ایلقار_موذن‌زاده ۱۴۰۵/۰۶/۲۹ @toplumedebiyatpisxoloji #ایمگه‌لر_کانالی ✔️✔️✔️ 👇👇👇 https://telegram.me/imgalar

💢💢💢 🔷بو آنانین نیه یوْخدور، اؤز یۇردوندا مدرسه‌سی سنین آنان، منیم آنام هر ایکیسی آنادیلار سؤیله گؤرۆم اوْ آنانین بو آناینان، نه فرقی وار؟ اوْ آنانین TVلردن سسی گلیر، اوْردا - بۇردا وجدانیندان سوْروش بۇنو بو آنانین، سسی هاردا؟ اوْ آنانین دانشگاهدان مدرسه‌دن گلیر سسی بو آنانین نیه یوخدور؟ اؤز یۇردوندا مدرسه‌سی اوْ آنانین دیلی هر گۆن قاناد آچیر بو هاوادا بو آنانین حقّی یوْخدور پنجره‌دن باخماغا دا بو سئچگینلیک، بو تبعیضی کیم گتیردی آرامیزا کیم بیزلری، یارالادی کیم دۇز سپدی یارامیزا؟ ایکی انسان آراسیندا بو قدَر ده، فرق اوْلارمیش انسانلاردیر، فرقی قوْیان سؤیلَمه کی روزگارمیش بسله‌ییبدیر، رۇحۇموزو آنادیلی، آنا سسی هر انسانا خاطره‌دیر آناسی‌نین، زمزمه‌سی اموالیمیز شریک دئیه یاشاییریق قارداش کیمی بیری باخا، بیری یئیه نئیلَمه‌لی بو سیستمی من بو دردی اۇتانمارام من بو درددن، گئچنمه‌رم ایکی آنا، قارشیمدا وار بۇنو اوْندان، سئچنمه‌رم ✍#علی‌محمد_بیانی #ایمگه‌لر_کانالی ✔️✔️✔️ 👇👇👇 @imgalar

💢💢💢 گؤزللیگین اوْن پارا ائتمز بو منده کی سئوگی اوْلماسایدی... ✍#عاشیق_وئیصل #ایمگه‌لر_کانالی ✔️✔️✔️ 👇👇👇 @imgalar

💢💢💢 🔷 نییه چیخدیق یولا بیز؟! ✍ #سحر_خیاوی گئدیردیک قاسیرغالی هاوادا داغ- دره‌لی، اوچوروملو یوللاردا تؤکولوردو باشیمیزا خزللر بئینیمیزده پوسکورن وولقان اوره‌ییمیزده دلی‌سوْو دنیز گئدیردیک توزاناقدا باشی هاوالی- سرسَم چؤر- چؤپ گؤزلریمیزده آیاقلاریمیز قابار- قابار آچارکَن گؤزلریمیزی چیخیلماز کوچه‌لر ایدی آچارسیز قاپیلار هر یئر دووار- دووار... بیزیدیک پئشمان آیاقلار حوزونلو باخیردیق آرخامیزا گلدیگیمیز قانلی- قادالی یوللارا آخیتدیغیمیز قان- تَره قارانلیغا آخیشان سونوجلارا گئجه‌نین دریسی داها قاتیلاشمیشدی زاواللی اللریمیز قیسیر کال آرزولاریمیزین بویو اَل چاتماز ایندی قورتارماز گئجه‌لرده سیوریلمیش حولقوملاریلا "گونَش" باغیریریق "سحر" چیغیریریق گؤره‌سن گونَش بیرده قوناق گله‌جک‌می نَمیش دوستاقیمیزا؟! #ایمگه‌لر_کانالی ✔️✔️✔️ 👇👇👇 https://telegram.me/imgalar