رواياتي 📚الوسام 2️⃣

جهاد: كلامي قلتو وما بغيرو. ياسر: امي حصل انا زعلتك يوم ولا كسرت ليك كلمة؟ جهاد: ما حصل. ياسر: عدم عفوك في الموضوع ده ما باخد عليو ذنب، لكن انا ما عايز اعمل حاجة من غير رضاك، وأنا غير صابرين ما عايز يا اما اعرسها ولا بقعد كده لمن اموت، الموضوع اعتبرو اتلغى والحاجات هدية ليها، مع السلامة. الطلعة الياها نحن يومين ما شفنا ياسر ولا عارفين عنو حاجة، تلفونو مقفول وفي الورشة زول عارفو مشى وين ماف، امي دي ما فضل ليها الا تجن، وابوي يلوم فيها كلو منك طفشتي الولد، ومالك ومال الداير يعرسها ان شاء الله يجيبها بتلاته عيون ما شغلتك فيها، غايتو ندمت أشد الندم وأنا في قلبي قلت بركة العمل كده لانو امي دي صعبة ماف زول بقدر عليها غير ياسر. اها انور اتصل لي انو جايبين الشيلة، والبيت متوتر وقروش ماف نجهز ليهم الضيافة والغداء بشنو، قربت اقول ليو خلي يأجلوها، لكن شفتها ما ظريفة اتحجج بشنو وخلاص العرس ما فضل ليه شيء، مشيت وريت ابوي وامي وهم زاتم اتمحنو معاي يعملو شنو، فجأة الباب دقة مشيت فتحت طلع ياسر، والله تقول لي سنين ما شفتو بكيت جنس بكاء، وامي دي تسكلب سااي تقول جاي من حرب ولا جهاد، دخل وكان شايل ومحمل أكياس كتيرة، قالو انو انور وراو بالشيلة عشان كده جه وبعد يجيبوها ما بجي البيت تاني الا للعرس، امي دي قعدت حنستو وراضتو وقالت هي موافقة وما عندها اي اعتراض المهم ولدها ما يزح من قدام عينها. في ليلنا داك بدينا الخبيز وخالتو سعاد ما قصرت جات لي امي اشتغلت معاها، أظن لي انا اول عروس تندرش كده عشان شيلتها، يااخ اشتغلت شغل تقول بكهربة، اقوم من ده واقع في ده لمن ميزت البيت. العشاء كده انور اتصل لي وقالو انو واقف برا اجيه، لفحت توبي وطلعت كان جاي بعربية خاله، ركبت قدام وسلمت عليه، - سبب الزيارة المفاجئة دي شنو؟ = كدي قولي مشتاقين، فاقدة طلتك قولي حاجة... - السبب؟ = بكرة جايبين الشيلة وغالبا اهلي البجو كتار. - حبابم مليون. = انتي ما متخيلة كتار البقول عليها دي، ما هظار بالجد كتار. - ما مشكلة يا انور يتفضلو طوالي لو ما شالهم البيت نختهم في عيونا. = تسلم عيونك وما بتقصري، لكن دي حاجات بسيطة وان شاء الله ناس بيتكم ما يفهموني غلط، الغرض منها المساعدة بس وما قصدي شيء تاني. لمن نزل لي الأكياس بقيت بعاين لي نظام انت جادي دي مساعدة ولا عزومة؟ هو قبيلتو كلها جاية ولا شنو؟ كلمت امي جات شكرته ما خلت ليها كلمة حلوة ما قالتها فيو، والحمدلله ابوي وياسر ماف والا كان رجعو بحاجاتو، سرعة مع امي وخالتو سعاد دخلنام جوا، سعاد: ما شاء الله خطيب يقين عندو زوق وما بقصر. جهاد: يايمه ان شاء الله ود السرور، من جانا غير الخير ما شفنا منه شيء. انا برضو امبسطة من اللفته حقته، هو ما كان مجبور يعمل كده لكن حركة لذيذة منه. "صباحاً" ما شاء الله نسوان الحلة كلهن جوا البيت، وأي امي ما قاعدة تقصر اي وحده عندها مناسبة بتقيف معاها، وهن حقيقي ما قصرن ربنا يجازيهن كل خير. انا طلعوني من البيت قالو خلاص ما محتاجين لي، اشوف لي مكان اقعد فيه لمن الضيوف يجو، مشيت لي هنادي وقعدت معاها، بقت توصي فيني عشان ماشه على حبس زيها ونصحتني اجيب شنو، لي وشي وجسمي وروتين الترطيب والشعر، والله عملت لي جدول عديل لو وازبطت عليه اطلع نجفة زي ما قالت. رجعت المغرب وانا الشمار حارقني، اها الحصل شنو والشمارات والفاتني كلو، سعاد: يابتي نسابتك ما نصاح، معقولة يجو حافلة وكريس وعربيتين صغار في شيلة؟ قالو ليهم سيرة هي ولا شنو؟ والعجب الشفع ما خلو شافع حايم ما جابو من البرضع لحدي الفتوات والصبيان، قايلين العرس الليلة؟ جهاد: عملو شين واشتر والله نحن محل نختم وين ما عرفنا، الضيفنا من الما ضيفنا ما فرزتو، الخالة والعمة والحبوبة ومرت الخال والجارة والقرتو في المدرسة، ديل شنو ديل، شفتي الاكل الكتير الشلت هم اختو وين والله حلة فضل فيها فتفوتة ماف، الله سترنا بس معاهم وماف زول طلع ما متغدي. سعاد: انا قلت كان يعقدو سااي وقت شيلة جو فيها قدر كده في العرس أظن الحلة والبلد كلها بتجي هنا، وبعد ده لو شفتي الطباقة الجو بيها يطوطحو، شن الشيلة هي منكبين فيها حلة وقوم، حبة كريمات ومكياجات، وتلاته تياب وعباية، ملابس البيت اتنين جلباب وبجامة، هسي ما بخجلو جايين مية نفر في الشيلة دي؟ والله دي شيلة حال ما شيلة. "موقف يليه آخر وأدركت حجم الحفرة التي وقعت بها" 💜ابقوا عافية💜

- ما عارفه يا أمي لو شفتي سلمت علي بطريقة بايخة خلاص...مدت لي طرف اصابعها وقالت دي ياها يقين زي الانا ما زول. + اجي يالكدي من هسي دايرة تعمل ليك شغل الحموات؟ طوالي تضربي لي خطيبك توري اختو عملت شنو عشان يوقفها في حدها، متين انتي دخلت لمن دايرة تسوي ليك مشاكل. وعملت زي ما قالت امي طلعت تلفوني واتصلت على انور، حكيت ليه الحصل من البداية وكل الكلام القالتو اختو، وتعاملها البايخ معاي، ردت فعلو كانت عادية زي الكان متوقع اتصالي، = معليش ولا تزعلي نفسك، أي حاجة عايزاها ولا نفسك فيها تحضر، المهم انتي تكوني مبسوطة. - وبالنسبة لي تعامل اختك. = دي منفسنة ما تشتغلي بيها كتير...يلا لي بعدين عشان مشغول هسي. حسيت انو في حاجة غلط، يارب اخته بتعمل كده قاصدة، هي ما حبتني ولا يمكن عشان اخوها واحد ما متقبلة فكرة تشاركو مع غيرها؟ طيب ما انا برضو اخوي واحد ما عندي غيرو، ومبسوطه دايرة اطير من الفرح عشان لقى بت حلال وعايز يكمل باقي حياته معاها، حقيقي شكلها منفسنة زي ما قال. المساء جاء ياسر اداني كل القروش المعاه حاليا عشان اشتري ليه الشيلة، طبعا لو اداها لي امي تجيب توبين وتشيل باقي القروش، لكن وثق في اختو حبيبتو، وأنا ان شاء الله اطلع قدر الثقة. صباح اليوم التاني مرقت، على اساس ماشة السوق اجيب حاجات لي، لانو امي لو عرفت بتقول الا تمش وده ضغط كبير ما بقدر عليه، مشيت نفس المحل الأمس واخترت تياب زابطة والله زي البشتري لنفسي، حاولت ازبط ليها الشيلة وتطلع حلوة، لانو في النهاية لو حلوة بقولو اخوي عزا مرتو، ولو شينة بقولو اختو الحربوية اكلت القروش. الركشة وقفتني قدام الباب ونزلت بالاكياس، امي استلمتني انتي جبتي شيلة جديدة ولا شنو، بعد دخلت حاجاتي وقعدت في السرير شربت موية قلت ليها دي شيلة ياسر، طبعا نبذتني لي جدي التاسع، وأنا بت متين لمن اشتري شيلة، وأنا العرفني بالتياب شنو، وأنا الفعلتك وأنا التركتك، اصلي ما رديت ولا قلت شيء سكت سااي، لمن راقت حبة فرجتها على الجبتو. جهاد: اتاريك ما هينة بتعرفي تشتري. - معقولة بت جهاد ملكة الأناقة واكون هينة ما بتجي دي، بالله شوفي التطقيم ده كيف عليك الله ما رهيب. + النصيحة لي الله ما شاء الله كلهم سمحات، لكن كان توري امك يا جزمة. - امي انتي جنك كسور وبواقي لو مشيت معاك لهسي ما بكون جيت، روحك طويلة في السوق. + أي الا احوم واشوف السمح بعدين اشتري، يعني اشيل اول توب اشوفو ولا شنو. - فضل الريحة بس جيبيها ويكون ما فضل لينا شيء. + كان تشتريها برضو. - للاسف ما عندي خبرة، ده موضوع عايز ليه خبيرة زيك. غايتو بعد تعب رضت وأنا دخلت ارتاح بعد المشوار المٌهلك ده. "بعد يومين" أجرنا الهايس وامي كلمت خالتو سعاد وكم جارة ومرا من أهلنا ومشينا، ما شاء الله لمن العربية وقفت قدام البيت انبهرنا، البت شكلها بت عز ومقدرة. دخلنا جوا بعد طلعو غنو لينا وزغردو، استقبلونا احسن استقبال والله، الموية الباردة والعصير وصواني الضيافة دي تطاقش، لا خلو ناعم ولا بتي فور ولا غُريبة، حرفيا أي نوع ضيافة في، للبسكويت بالعجوة. اها طبعا امي دي من الفرحة تقول تطير، عاد ما ولدها عزل نسابة زي النسابة، ناس يخلوها تفتري في نسوان الحلة شهرين تلاتة. وعشان ما بنعرف العروس قالو بعد الغداء بتجي طالعة، رصو لينا الصواني الما خمج، الاكل الا بالبزار وما شاء الله طاعم جنس طعم مبالغة عديل، أنا غايتو اكلت لمن اتكيفت، وبعدين وزعو عصير تاني وبارد وضيافة، ياريت لو عندي بطن تانية كان شلت فيها ههه. جن كمية من البنات ما عرفنا العروس ياتا، لمن امي سألت منها اشرو لينا عليها، حسيت انو ملامح وشها اتغيرت لكن ما قالت شيء قدام النسوان، قامت سلمت عليها بالحضن وباركت ليها وياهو ربنا يتم ليكم على خير، لكن باقي القعدة بالا نهائي ما هنا لحدي ما رجعنا البيت. انتظرت للمساء لمن ياسر جا حتى اتكلمت، ياسر: حمدلله على السلامة أن شاء الله اليوم عدى على خير. - والله كان شفت جنس استقبال هو وجنس عزة هي، اريتم نسابة السرور، والله نهائي ما قصروا معانا العروس زاتها حلاته عسولة وظاهر رايقة. جهاد: ياولدي المرا دي عمرها كم سنة؟ ياسر: فرقت في شنو؟ جهاد: فرقت يا ولدي فرقت، ظاهر كبيرة واكبر منك زاتو، الجابرك على ده شنو، البنات الصغار انتهو لمن داير تعرس لي الخالة دي. ياسر: صابرين ما كبيرة بينا سنتين بس، وأنا ما شايف ده عايق ولا سبب يمنع ارتباطي بيها، انسانة واعية ومثقفة ولقيت نفسي مرتاح معاها. جهاد: الراجل ما زي المرا يا ولدي، بكرة مع أول ولادة تكبر وتنبهل وتتشاف جمبك عجوز، شوف ليك وحده صغيرة عشان لمن تلدي تكون مناسبة معاك. ياسر: خلاصة الموضوع انا غير صابرين ما عايز وياريت السيرة دي تتقفل هنا. جهاد: ما عافية ليك كان عرستها. - امي دي شنو الحركات البتعملي فيها دي، هسي لو جات خالتو ولا عمتو وقالت انا اكبر من انور بترضي فيني الكلام ده، لي بتعملي في بت الناس الما بترضي لبتك؟

#طائر_العنقاء7 #ريان_عبدالقادر "يا شوارع فيها منك ذِكرى حِلوة وإبتسامة" المشوار كان حلو، انور اكل معاي منقا وبامبي بالشطة، ما اتوقعت يوافق لانو اغلب اولاد ادم بقولو ده اكل بنات، لكن هو بالعكس من كده اكل وقرب يخطف حقي زاتو الا قلعتو، كمان اكلنا ايسكريم واتمشينا مسافة ونحن بنحكي قصص، هو ظريف دمو خفيف وبضحك، حافظ نكت مساطيل كتيرة وكل وحده احلى من التانية، رجعت البيت وانا ما نفسي ارجع والله، ياريت لو الطلعة تطول وافضل معاو اكتر♡ جهاد: يابت انتي جنيتي ولا دايرة اخوك يكسر رقبتك، لحدي هسي برا البيت؟ - كنت مع خطيبي... + الخوخة التقوم فوق راسك الكبير ده...كمان بتقول لي خطيبي من غير خجل ولا اختشاء. - ابوي عارف تاني في شنو. + فتحي عينك واحترمي نفسك ده خطيبك ما راجلك لمن تتحاومي لي معاو. - بعد شهر حيكون راجلي... + ده كلام شنو كمان؟ - اديك الصدمة... انور اتكلم مع ابوي وقال العرس بعد شهر من يون الليلة. + بعد شهر كيف يعني عان البيت ده عامل كيف زي الخرابة...الضيوف البجو اختهم وين...ولا اسوي شنو واخلي شنو...ابوك ده بقطع من راسو من غير ما يرجع لي؟ جاطت شديد وانا دخلت جوا رقدت في السرير وفضلت اعاين في صورنا، طبعا اتصورنا صور كتيرة كتيرة، في اغلبها انور ماسك التلفون وانا مستحية شديد، اول مرة في حياتي امشي في الشارع مع راجل غير اخوي، ولا اكون معاه في مكان ونتونس ونتمشى ونعمل ذكريات حلوة♡. المساء لمن ابوي وياسر جو من الشغل امي اتكلمت معاهم انو يأجلو العرس لمن نزبط البيت، لكن طبعا زول اشتغل بيها ماف وقالو العرس قايم من غير تأجيل، والصدمة الكبيرة ياسر عريس معاي، لقى بت الحلال وحنعمل عرسنا سوا، يمكن انا فرحت ليه اكتر ما فرحت لنفسي، جهاد: عرس شنو ليك انت عندك شنو لمن تعرس، لا بيت ولا يحزنون، بت الناس دي داير تختها فوق راسي؟ محي الدين: البيت واسع يبني ليو صالة قدام الغرفة في الحوش الورا ويفصل الحيطة. جهاد: يعني عشان هو داير يعرس يضيق على بيتي، هو وينو البيت الببنو فيو صالة تاني؟ ياسر بنفاذ صبر: يا امي لو ما دايراني اقعد معاكم انا بطلع وبأجر برا، من غير نقاشات ولا داير كلام كتير ونقة. محي الدين: ما تأجر ولا شيء البيت بشيلنا، واصلا اختك بتعرس وتمشي بيتها امك دي تقعد براها مع منو، مرتك تونسها وتراعيها. انا فهمت انو ابوي ما عايز ياسر يأجر عشان شايل منو كتير من مصاريف البيت، وامي برضو اقتنعت عشان لو مشى برا ما بتلقى قروش الملاح كل يوم، البتصبن منها شوية قريشات بالجمبة، ولو على ابوي ناكل عدس من الاحد للسبت، ههه كل زول بشوف مصلحتو الا اخوي المسكين ده. "بعد يومين" انور اتصل لي عشان امشي سوق ليبيا، هناك بلاقي اخته ومرت خاله، طبعا ما كان في زول يمشي معاي، لانو بت عمي عندها امتحانات وما عندي غيرها، وكمان ما ظريفة اسوق امي وخالتو سعاد ولا فكرت فيها. المهم مشيت واتصلت في الرقم الاداني ليه، المكالمة الأولى التانية ماف زول رد علي في التالتة حتى ردت، ما عرفت وصف المكان كويس عشان اول مرة اجي هنا، يمكن عشرة دقايق لافة بسأل من زول للتاني حتى لقيتهن، حنان: يا حليلك تعالي يابتي الشمس كملتك، مدت لي قارورة موية وخلتني اقيف في الضل، وأنا والله من الحر فضل اسيح بس شمس مبالغة. فطين: دي ياها يقين؟ سلمت عليها بحرارة وحاولت احضنها مدت لي يدها بس، كان الموقف بايخ ومحرج لكن حاولت ما اتحسس...أو ما ابين اني متحسسة. منها بقينا لافين عشان نشوف محل تيابه حلوة نشتري منه، وكل ما نخش دكان فطين تقول ما حلو ارح، حرفيا دخلنا عشرة ولا اكتر، في النهاية لفتني توب من بعيد ومشيت دخلت وهن جو وراي، أشرت للبياع عشان ينزله لي واشوفه من قريب، فطين: اوعى تكوني عايزة العولاق ده؟ التوب من زمن الانجليز عايزة بيو شنو ارح نشوف مكان تاني. حنان: وقت عجبها خليها تشتريو، وبعدين الشيلة حقتها هي ما انتي. حسيت انو وقت الادب انتهى وكان لازم اتصرف، لانو لو مشيت ورا كلامها اليوم بنتهي من غير ما اعمل شيء، قعدت في الكرسي واشرت على كم توب عشان ينزلهم لي، كانت بطنطن لكن ما رديت عليها خالص، اخترت أربعة تياب طقمتهم وشلت فستان وعباية، يمكن نص ساعة بتتشاكل مع بتاع المحل عشان الحاجات غالية وهي ما بتدفع القروش دي كلها في هديمات، خجلتني خجل تقول لي اخليم في محلم وامشي، دفعت بعد طلاع روح حتى طلعنا نشوف ملابس البيت، اخترت تلاته جلبابات وبجامة طويل واتنين قصار، قالت كتار ده كلو لي اشيل جلبابين وبجامة بس كفاية، وقميص نوم واحد ماف داعي للبزار، قلت ليها خلاص شوفي المناسب اعملي، خليت ليها الاكياس ورجعت البيت. من الغبينة النفس كان غالبني، دخلت وانا وشي ده ما بتفسر من الزعل، جهاد: اها يابت اشتريتي شنو صورتي؟ - ما اشتريت حاجة، اختو وقفت لي في حلقي أي شيء اقول عايزة تقول شين وما حلو وغالي. + الخوخة التطلع عينها ومالا معاك، هي مشت تساعدك ولا تحميك الشرا.

وقفت في الصف الاول وسمعنا المقدمة المملة وقلبي ده زي دلوكة انصاف بدق وبرجف، ولي حظي استاذة خالدة هي البتذيع نتيجة اولى، قالت مقدمتها المملة برضو وانو في عشرة طالبات بس نسبهم فوق ال90، وهن بس البتذاعو ام البقية في الفصل، وانا في قلبي بقول يارب يا حنان يا منان اكرمني يارب، بت ورا التانية وانا الامل بنقص جواي، لحد ما وصلت للطالبة الاخير لما قالت يقين محي الدين مخي ما استوعب، انا سمعت اسمي ومتأكدة ده هو لكن جسمي ما ادى ردت فعل، ما قدرت اتحرك من مكاني الا الجمبي ادتني دفرة، مشيت بخطوات متثاقلة لما وقفت قصادها، ملامح وشها ما كانت بتتفسر هي ما مصدقة، وانا لمن استوعبت طوالي رسمت ملامح الفخر على وشي، بقيت بعاين ليها نظام شفتي انا لو عايزة بجي اولى المدرسة عديل، شلت النتيجة من يدها ولا سلمت عليها، رفعتها فوق وبقيت برقص، كل خلية في جسمي كانت بترقص براها من الفرح. ولمن طلعت من المدرسة وانا لسه مخلوعة من نفسي، بعاين للنتيجة وبقول يقين محمد 91.7% متأكدة يابت دي نتيجتك؟ الابتسامة حدها الضرس السابع. انور: ان شاء الله دايما مبسوطة. اتخلعت لمن سمعت صوته لاني جيت ماشه بجمبه وما انتبهت ليه، - بسم الله انت الجابك شنو؟ = الواحد بسلم بقول كيف الحال...عموما جيت عشان اشوف خطيبتي عملت شنو. مديت ليه النتيجة وكلي فخر بنفسي. = برافو عليك والله اتفوقتي على نفسك وتستاهلي هدية معتبرة. - اللي هيا؟ = استأذنت من ناس البيت وطالعين مشوار. - وين؟ = ارح بس انتي. مشيت معاه على محطة المواصلات وركبنا العربي، خلاني اركب جمب الشباك وهو جمبي نظام ماف زول يقعد جمبي، لقيت نفسي ببتسم لانها حركات ياسر اخوي لمن نمرق سوا. نزلنا قبل المحطة الاخيرة قريب لفندق كورنثيا، قلت ياربي داير يوديني هناك ولا شنو؟ لكن احلامي اتلاشت لما فتنا الفندق وركبنا واحده من العبارات بتاعت توتي، الجو كان مغيم الشمس ما ظاهرة عشان كده قعدنا فوق، انور: الماء والخضرة والوجه الحسن... - ما فهمت؟ = قلت ليك البحر هدا والاشجار والخضار ووشك السمح. - اممم. = ساكته لي؟ - اقول شنو؟ = اسألي عني اتعرفي علي...ما عندك اي فضول تجاهي؟ - طيب...عندي فضول ممكن تحكي لي عن نفسك! = جدا...اسمي انور محمد...خريج كلية محاسبة جامعة النيلين..حاليا شغال في سوبر ماركت...ما شغال هو حقنا...انا البكر وعندي اخت اصغر مني.. الوالد اتوفى من فترة وبقيت المسؤول من البيت.. كنت بفكر اغترب واسافر دول اوربا...لكن في الوقت الحالي لغيت الفكرة...لانو امي واختي ما عندهم غيري...ولما شفتك يومها قررت انو لازم افضل هنا واكمل حياتي معاك...انتي احكي لي عن نفسك. - انا يقين محي الدين...ماشه تانية ثانوي...اخر العنقود...عندي اخوي ياسر الكبير وامي وابوي...بس = حلو...جميل...احكي لي عن احلامك وطموحاتك.. عايزة تبقي شنو او تصلي وين؟ - ما عارفه...ما قررت لسه. = علمي ولا ادبي؟ - مممم...ما عارفه. = طيب ما مشكلة نقرر بعدين قدامنا زمن طويل للتفكير...حبيت اقول ليك المشوار ده كان هدفه نتعرف على بعض ونتونس، وعشان اوريك انو العرس بعد شهر على الأكتر، يومين واختي بتجيك البيت تشترو الشيلة. "بجواره للنجاح طعم آخر بجواره كل التفاصيل تختلف" 💜ابقوا عافية💜

الساعة تسعة الضيوف كلهم مشو وبقينا في البيت برانا، اخيرا طلعت الفستان واخدت نفسي، نص ساعة بطلع في بنسات الشعر وفكيت التسريحة، جهاد: عاد الليلة الشاف لي نسوان الحلة منو، ماتو وانكو بالغيظ، عاد خطوبة بتي ما خطوبة السرور، عاد منو من بناتم الجابو ليها خطوبة زي دي، شاطرة وشديدة زي امك مشيتي خميتي الدنيا وجبتيها لنفسك. - بررري والله يا امي انا جبت فستان وعباية ومجموعة شعر وجسم بس، تاني ولا شيء ما جبتو. + نان ده كلو جه من وين؟ - بررري. وفعلا الحاجات الاخترتها كلها في وكمان فستان وعباية تانيات، وجموعة جسم اضافية وزيوت شعر واسبورتين ابيض واسود، وطقم بتاع فضة غير قولة الخير، والاهم تلفون ده نهائي ما فكرت فيو ولا اتوقعتو الحقيقة نسيته زاتو. عاينت ليهم وقلت في نفسي سبحان مغير الاحوال، امبارح القريبة دي غير جرسلين اتمسح بيه ما عندي، عباية واحدة وعلى العليها مبشتنة، وشنطتي حدث ولا حرج، الليلة المرطبات والكريمات مالية الوطى، وجزمتين وشبطتين وشنط وميكب، زي النزلت علي ليلة القدر، الحمدلله. "نايلة" سعاد: مالك يابت ما جيتي؟ - اجي لشنو..قاعدة اقرا ما فاضية ليها. + الجيران كلهم سألو منك وقالو ما جيتي عشان غيرانه منها. - انا نايلة اغير...ومن منو... يقين هي يقين دي زول خلي اغير منها...غايتو ده الفضل لو جابت ليها خطيب عديل نقول معليش لو ما بتاع دكان مقطع. + بتاع الدكان المقطع ده جاب خطوبة يغني عليها الكابلي، عابيتين وفستانين كل واحد بطقمو من شنطة وجزمة ولا شبط، كريمات الترطيب والشعر ما تديك الدرب والريحة والعطور، والشكولاته الا ماكنتوش وبكتات البارد، وفوق ده كلو جايب ليها طقم فضة ودبلة دهب وتلفون وقولة خير مبلغ وقدره، امها الليلة ما بتنوم من الفرح، عمرها ما شافت حاجات زي دي، كمان جات لي بتها خطوبة زي دي، تاني محل ما نقعد تونسنا بها وتعمل لينا وجع راس. - اعذريهم مخلوعين ومستجدين نعمة اول مرة يشوفو الحاجات دي، وبعدين دي خطوبة تخلع الما شافت ملابس ولا بتعرفها، انا بابا كل شهر برسل لي شنطة فيها عبايات وفساتين وكريمات تفتح بوتيك، يعني خطوبتها دي كلها ولا في عيني، تمشي تفرح بيها بعيد مني. + يابتي خطوبة شنو وعرس شنو ديل ناس جاهلة، البت بدل ما تفكر في القراية ومستقبلها جارية ورا العرس، اوعك تركزي لي معاها خليك في قرايتك وكتبك بكرة تبقي لي دكتورة قدر الدنيا، وهي تباري الطبيخ والغسيل والمكوة. - اصلا دي نهايتها تصحى كل يوم شايلة هم الغدا شنو، وانا اكون دكتورة قدر الدنيا من مريض لي مريض. + بتي الدكتورة الرافعة راسي. "يقين" تطبيقا للتعليمات بتاعت ياسر انو ماف تلفون الا نهاية الاسبوع، لا عايز مكالمات ولا دخلات وطلعات، ولو عايز يشوفني يجي البيت قدامهم نقعد، قلت ليه سمعا وطاعة يا فندم وبقيت بضحك. وفعلا ما اتكلمت معاه ولا مكالمة ولا طلعنا اي مكان، وعشان الامتحانات قربت بقيت مشغولة بالقراية، وعايزة اقرا عشان كلامه قدام استاذة خالدة، وعشان اسكت اي بت قالت علي اني اصلا ما شاطرة، وبعد الخطوبة ما اظن اركز زاتو، كلهن حيبلعو كلامهن ده وبشوفن. في قاب امتحان الفيزياء مشيت لي ناجي يشرح لي، من زمان هو استاذنا لانو ما شاء الله عليه شاطر شديد وخريج هندسة معمار، اي شيء يستعصي علينا كلنا بنمشي ليه، فتحت لي خالتو سعاد ولقيتم في الحوش بشرح لي نايلة، اضايقت شوية لانو في العادة هو بنتظرني لما اجي حتى يبدا يشرح، لكن قلت عادي ما مشكلة، المهم قعدت بعد سلمت عليهم ونايلة ما ردت علي، كان بشرح ليها وهي بتلخص، وفي حاجة ما فهمتها لما سألته، قالت لي لو انتي اصلا غبية ومسألة بسيطة زي دي ما فهمتها متعبة نفسك بالقراية لي عرسي احسن ليك، العبرة وقفت لي في حلقي والله النفس ده غلبني، لما رجع يشرحها لي شلت كراسي وقمت، وقدر ما ناداني ابيت ارد عليه ولا ارجع، طوالي طلعت تلفوني نشطت وفتحت اليوتيوب، اي درس غلبني حضرت شرحه لما ياسر جه لقاني ماسكة التلفون، اول افتكرني بلعب لكن لما شافني بقرا ما سألني، وقال اي استفيدي منه في قرايتك بدل الفارغة. خلصت امتحانات وانا حرفيا اول مرة في حياتي اقرا بالطريقة دي، اجتهدت اجتهاد تقول ممتحنة شهادة تالت ما اولى ثانوي، ودعيت ربنا كتير ينصرني وتكون نسبتي حلوة، ما يشمت فيني الاعداء واي زول قال ما بنجح اخت ليه نتيجتي جوا عيونه. "بعد اسبوعين" يوم النتيجة لبست واحدة من عباياتي الجديدة مع الطقم بتاعها، عملت ماسكرا ولاينا وروج خفيف، خليت شعري ضنب حصان الحقيقة ضنيب ما ضنب كامل عشان وينو الشعر هو ما علينا، اتعطرت وشلت تلفوني في يدي، الليلة ام النصر والا الشهادة. دخلت المدرسة وسلمت على الكل بطرف يدي، افتراء زي الافتراء ان شاء الله النتيجة تكون حلوة عشان ما اندم واسف التراب على حركاتي دي.

#طائر_العنقاء6 #ريان_عبدالقادر "جادت علي الحياة بصدفة كأنها نبع من الأحلام" ما كنت عارفه اوصف شعوري او الحاسه بيه وقتها، كل شيء كأنه حلم بالنسبة لي، من كذبة عشان اطلع بيها من موضوع المدرسة، لي حقيقة على أرض الواقع والكل بعيشها معاي، لما رجعت البيت ورقدت في السرير بتذكر اني من شوية كنت بشتري دبلتي، دبلة حقيقية..يعني دهب لي واحد بعد يومين حيتحسب خطيبي، والواحد ده قبل اقل من يومين ما كان اكتر من بتاع الدكان البشتري منه الاندومي، سبحان الله ما اتوقعتها ولا خطرت في بالي، لكن زي ما بقولو المكتوب في الجبين لازم تشوفه العين. يوم الجمعة الصباح مشيت لي نايلة، عشان امي طلبت مني وسمعت كلامها، سعاد: صباح الخير ياعروس. - صباح النور ياخالتو، نايلة صحت؟ سعاد: صاحية من بدري...امشي ليها. - طيب...امي قالت ليك منتظراك. سعاد: اي انزل فطور الجمعة ده من الغاز وماشه عليها. دقيت باب غرفتها حتى دخلت كانت بتقرا، ما رفعت عينها عاينت لي ولا سألت عايزة منها شنو، رغم ده قلت ليها: لو فاضية ارح معاي الكوفير. عاينت لي بطرف عينها وقالت: قاعدة اقرا زي ما شايفة عندي امتحان يوم الاحد. - طيب...بعدين الخطوبة لو لقيتي وقت تعالي. + ما جاية...عزومة المراكبية دي ما بتنفع معاي. - ما عزومة مراكبية انتي عارفه من اول، امك ورتك انو الخطوبة يوم الجمعة. + الخطوبة ما حقت امي عشان هي توريني، انتي ست الشيء ما قلتي لي. - عشان انتي مركبة لي وش، ما عارفه زعلانه من شنو ولا مضايقة كده مالك، في حين انو انا المفروض ازعل منك بعد حركات الوسخة العملتيها لي قدام بتاع الدكان والاستاذة. + بتاع دكان...طيب دايرة تتخطبي ليو لي اذا ما عاجبك؟ - انا بتكلم عن الموقف حقك وليس الناس، كان عندك قروش لكن خليتيني انحرج قدامه، وطلعتيني كذابة قدام الاستاذة. + انا الطلعتك كذابة شوفي بتاع الدكان اتقدم ليك وعايز يخطبك اكتر من كده عايزة شنو؟ - ولا اي حاجة وغلطانه انا الجيتك. طوالي طلعت من بيتهم وقلت تاني امي لو قالت بتضبحني عديل ما بمشي ليها، رجعت لقيت اخت صحبتي هنادي الصغيرة منتظراني، وقالت امشي معاها البيت عشان تجهزني للخطوبة، اصلا هنادي شغالة في كوفير بتعمل ميكب، كلمت امي ومشيت معاها. لما وصلت وسلمت عليهم اعتذرت مني عشان ما عزمتني شيلتها، وقالت ده كلو من خالتها ملت راس امها وقالت ليها ما تعزم زول عشان ما تتحسد والموضوع يتم، وهي كلمتهم انو الكاتبها ربنا تتم لو العالمين جت حسودك فيها بتم لكن ما سمعوا منها، قلت ليها ما عليك عتب اصلا ما زعلت، في النهاية دي حرية شخصية العايز يعزم والما عايز مخير. كلمت وحده من زميلاتها وجات رسمت لي في يديني، وغسلت لي شعري وكوته لي، وعملت ماسك لي وشيء، اتدلعت دلع تقول عروس عديل ما بس خطوبة. قريب للمغرب انا كنت جاهزة من كله، تسريحة وفستان وميكب، وقفت قدام المرايا بعاين لي ما عرفتني، سمحة سمحة مبالغة والله اظن امي ما تعرفني، واشيل واضحك زي المسطولة. وهنادي حلفت ما بتشيل مني قرش بعد تعبها ده كلو، قدر ما حنستها رفضت وقالت نحن صحبات وبنات حلة وحده ما بيناتنا، قلت ليها طيب ما مشكلة وختيت في بالي اشتري ليها هدية معتبرة في عرسها، على الاقل كده بتقبلها وتكون لفتة حلوة لما تشوفها تتذكرني. لبست العباية وغطيت وشي وراسي بطرحة كبيرة ومشيت البيت، كان مليان ومستف ناس الحالة قال امي ما عزمت، فضل بس ناس الخلا الما جو، الضيوف يقعدو وين مع الجماعة الطيبين ديل. سمعنا صوت البوري برا وقلبي بقى يدق معاه، بحاول اهدي نفسي واقول ابردي يابت شوفي نفسك حلوة كيف، اهم شيء تعايني ماشه وين عشان ما تقعي بالكعب ده، وما تضحكي زي الطيرة عشان ما يقولو ما صدقت لقت ليها خطيب. بعد مسافة جات بت عمي ساقتني معاها عشان اسلم على الضيوف، امه وجاراتها تلاته ومرت خاله السر، قعدت معاهن وانا عيني في الارض، وطبعا شكرو جمالي وطلتي البهية وقالو سمحة ماف كلام، جاملوني والله ما قصرو، شوية وطلعنا في الحوش عشان تلبيس الدبل، كنت حاسه ياسر ممكن يعترض لكن سكت وما قال حاجة، قعدت جمبه من غير ما اعاين ليه، صفر بصوت واطي وقال: يا أرض احفظي ما عليكي، سماحتك حدها وين؟ طبعا ما رديت وعملت فيها طرشة، مرت خاله قدمت لينا الدبل لبسني ولبسته وزغردو لينا. شغلو الجهاز وبقوا كلم برقصو بت عمي قومتني وانا اصلا شترا، لا بعرف ارقص ولا حاجة بتهوزز سااي، اريتها لو خلتني قاعدة في مكاني بدل العواسة العستها دي، لمن حسيت روحي ما قادرة خلاص وممكن اقع وتبقى فضيحة ما انساها لمن اموت طوالي قعدت، وهو كمان قعد وكان بضحك، لاول مرة عاينت لي وفي ملامح وشي استفهام، انت بتضحك لي يعني؟ = شترا والله العظيم شترا. - عارفه...رقاص انت اقيف انقطك. = ههه لا ماف داعي كفاية انا بعرف ما ضروري الاتنين نكون بنعرف. ما عارفه لي لكن اتغظت من ضحكتو غيظ وصريت ليه وشي.

جهاد: عاد ان شاء الله يا يمة عريس الهنا والمنى، داير يشتري ليك دبلة عديل، عاد الدهب الامك ما شافتو، عاد ان شاء الله يملاك دهب من فوق لي تحت تكشكشي وتدي امك تكشكش. سنين طويلة ما شفت امي فرحانه بالشكل ده، والله لو عليها تفتح مسجل وتقعد ترقص، كل يوم مطلعة موضوع شكل... تغسل الستاير وتضاير في الحوش، مرقت الكرور كلو وجيهت البيت تقول عرس ديل ما خطوبة بس. يوم الاربع العصر انور جا البيت حسب ما استأذن من ابوي عشان نمشي نشتري الدبل، كان سايق عربية وطلعت حقت خالو شالها عشان ما نتشلهت بالمواصلات، دخل امي قدمت ليه الموية والعصير مسافة ما جهزت، كنت مترددة عبايتي ما حلوة شديد ولا تنفع لي مشوار زي ده لكن ما عندي غيرها، كوزت طرحتي وعملت لي قلوس وكحل. اتحرك وانا بعاين لي ضفوري، خالص ما رفعت عيني تجاهه لابس قميص لونه شنو ما عارفه، = اتكلمي قولي حاجة. - اقول شنو؟ = ناوية تسكتي لمتين، ماف سؤال في بالك عايزة تعرفي اجابتو؟ ما عندك فضول تعرفي انا منو؟ - قلت لي بتعرف عليك بمرور الزمن. = ما هو الزمن بدا يمر نحن حاليا في مرور الزمن زاتو. - ههه. = ايوا كده خليني اشوف الضحكة الحلوة دي. اتونسنا شوية لحد ما وصلنا محل الدهب، كان في تشكيلات كتيرة وحلوة ضعت ما عرفت اختار شنو، - اختار انت انا ما بعرف. = الناوي يلبسهم منو انا ولا انتي؟ - انا... = يبقى اختاري. في النهاية شلت تشكيلة حسيتها مختلفة وحلوة، دفع القروش وطلع مشينا تاني محل ملابس، مع اني قلت لي خلي باقي الحاجات يجيبوهم اهلك، لكن اصر طالما انا بلبسهم معناها اختارهم براي، شلت فستان وعباية بالطقم بتاعهم، ومجموعة شعر وجسم وميكب. - خلينا نرجع البيت الوقت اتأخر. = نمشي ناكل الاول عايزة اهلك يقولو علي شنو طلعتك من قبيل وترجعي جيعانه. - اهلي ما حيقولو حاجة، لكن لو اتأخرت بتسمع الما برضيك. = ما تشيلي هم لو في شكلة باخدها بدالك. مشينا مطعم وحلفت ما بنزل، اقعد وين انا بعبايتي المبشتنة دي نص البنات السمحات والراقيات ديل، قال بجيب لينا الاكل في العربية حتى وافقت، بس ما قدرت اكل عديل مع انو والله جيعانه، لكن خجلة سااي بقيت اكل حته حته عشان ما يقول البت فجعانه، خليت باقي السندوتش وشربت العصير. لما وصلت البيت وعايزة انزل مسك يدي، مدى لي كيس تاني وقال ما تخشي بيتكم يدك فاضية، - ما كان في داعي. = لا في...وامسكي دي. - قروش لشنو؟ = اذا احتجتي حاجة، بتلبسي فستان وتعملي مكياج وامور البنات دي. - لا شكرا ما عايزة. = انا ما طلبت رأيك لكن، شيلي معناها شيلي. دخل القروش في الكيس ونزلت اتحرك بالعربية من غير ما يديني فرصة اقول حاجة، دخلت القروش في صدري عشان امي لو شافتها ما بتخلي لي جنيه، احسن اشتري فستان ولا ااجر بس؟ واطلع حق الحنة والميكب والباقي بدي ليها..هي زاتها قاعدة تجازفها عشاني...ربنا يحفظها لي. "يقول أنني فاتنة ضحكتي آسرة عيناي ساحرتان كل تفصيل يخصني يملئه الجمال" 💜ابقوا عافية💜

- ما فهمت قصدك؟ = ما مهم، مشى وخلاني واقفة في مكاني. "يوم الأحد" الساعة 6ص لقتني في الشارع ماشه على المدرسة، ناجي ونايلة جو ماشين جمبي بالعربية ما وقفوا لي، اتوقعت تكون نايلة الطلبت منو لكن معقولة ناجي يسمع كلامها؟ غايتو اتصدمت من التصرف ونهائي ما اتوقعتها منه. واتصدمت مرة تانية لما وصلت الدكان ولقيته مقفول، انور ده مشى وين الواطة اتشقت وبلعته؟ وصلت المدرسة ومن دخلت بنات الفصل استلموني اسألة، صحي خطبوك؟ خطبك بتاع الدكان؟ الشين المقطع داك؟ وااااي ما استخرتي عايزة بيو شنو؟ السنة كلها بقميصو عبد الواحد ده، لا مهذب ولا مرتب... ختيت يدي في نصي وقلت ليهن: في وحده فيكن عندها معاي حاجة؟ بتاع دكان ولا طبلية يخصكن في شنو؟ عاجبني وساري بالي واحلى منو عيني ما شافت، بالله كل وحده تلزم حدها وما عايزة تدخلات في حياتي، يلا كل وحده تشوف شغلتا. قعدت في كنبتي زي الملكة تاني الا البحبوني بجد ودايرين لي الخير باركو لي. وطبعا نايلة بتتعامل معاي وكأنها ما شايفاني، وانا نهائي ما سألتها ولا قلت ليها السعر بكم، زي ما عاملة رايحة مني انا كمان رحت منها...الفاضي للتاني منو كمان. لما طلعت المساء لقيت انور بداية الشارع، اشر لي بيده انو اجيه، وقفت وانا بعاين للارض، = السلام سنة. - السلام عليكم. = وعليك السلام...احسن ما نقيف هناك ممكن نقعد في مكان نتكلم؟ - مكان وين؟ = ارح معاي. ونحن ماشين جو كم بت من فصلنا وبقو يشاغلو فينا، اي عصافير الحب وما اتعرفنا عليكم، بقى فيها انتظار بعد المدرسة حظك والله، الله يدينا خطيب برضو يسوي لينا، والله من غير ما اشعر بقت اضحك وما قادرة امشي...شو زي الشو. ركبنا المواصلات ولحسن حظي الليلة لبست العباية، المهم نزلنا في مكان ما بعيد شديد من بيتنا لكن غالبا لا ابوي ولا اخوي ممكن يجو فيه، = انا جبتك هنا عشان في كلام عايز اقولو ليك. - قبل ما تقول كلامك انت عملت كده لي؟ خفت ناس البيت يعرفو؟ على فكرة اهلي ما سفاحين ما بكتلوني عشان كضبت، ما كان في داعي تكبر الموضوع قدر ده. = طيب اول شيء انا ما اتقدمت ليك عشان خايف من حاجة، كانت رغبتي قبل كل شيء والموضوع ده اعتبرتو اشارة. - رغبتك؟ = ايوا انا بعرفك من فترة معقولة وشايف انك الزولة المناسبة لي. - انا زولة؟ = طيب البت... الفتاة.. الزوجة.. المهم انك المناسبة. - وحضرة سيادتك جبت القناعة دي من وين؟ انا معرفتي بيك كلها جيب الشبس وهاك دي قروش الاندومي، متين عرفتني لمن قررت اني مناسبة معاك؟ = انتي تقريبا ليك خمسة شهور من اتحولتي المدرسة دي، بتذكر اول يوم لما جيتي الدكان شلتي لبان شكلت ملون وكمارا، كنتي مسرحة شعرك ضفيرتين ولابسة ساعة وردية، كلامي غلط؟ - اااااااا = غالبا في الصباح مزاجك حاد ما بتتكلمي كتير ولا بتضحكي، لكن اخر اليوم بتكوني فرفوشة، يا بتغني ولا مبتسمة، بتحبي الاندومي الاخضر ودوريتوس الازرق والشكلت الملون، بتشربي الكولا بس ولو ما لقيتيها ما بتشيل غيرها، بتكرهي الفيزياء والاستاذة بتاعتها يوم تكون الحصة معاها مزاجك ما بكون رايق ولا بتدندني غنيتك المعتادة، لكن بتحبي الرياضيات ومودك بكون لذيذ يومها، اكمل ولا كفاية عليك كده؟ بعدم فهم ولا استيعاب للحاصل: طيب...طيب...انت بكلامك ده عايز تصل لوين؟ = عايز فرصة تتعرفي علي من جوا وبرا، وتاخدي وقتك الكامل واذا ما اتأكدت انك بتحبيني ما بعرسك. - والقال ليك انا داير اعرسك منو؟ = اهلي امبارح جو يهظرو في بيتكم؟ - نحن لسه ما ردينا ليكم جواب ويمكن نرفض طلبكم. = واثق من الموافقة. - نصيحة مني ما تكون واثق...عادي ابوي يرفضك. في اللحظة دي تلفونو اتصل، رده وختاه على الاسبيكر، السر: ياولدي. = ازيك يالخال كيف حالك ان شاء الله طيب. السر: الحمدلله بخير وعافية، داير اقول ليك ألف مبروك اتكلمت قبل شوية مع ابو البت وقال الفيها الخير ربنا يسويها، بعد كده ربطة خشمك والراجل بمسكو من لسانو، شد حيلك وربنا يسهل عليك لو وقف ليك اي شيء خالك قاعد. = تسلم يا خال والله ما بتقصر وقفتك عندي بالدنيا الله يخليك تاج فوق راسي. السر: يديك العافية يا ولدي الله يسلمك الله يبارك فيك. قفل منو وبقى يعاين لي وهو رافع حاجبو، نظام شفتي كلامي ما وقع الارض وطلع صاح، = فاضية متين نمشي نشتري الدبل؟ - اااا... = على كلا انا بجي البيت بستأذن من ابوك ونمشي، يلا عشان اوصلك. - لا ما توصلني بمشي براي، اصلا هو البيت قريب خطوتين وبصل. = ماف كلام زي ده، كيف انا الجبتك واخليك تصلي براك. ما خلاني الا وقفت قدام الباب وبعد تحانيس حتى مشى وانا دخلت. المساء لمن ابوي جه كلم امي انو ضرب ليهم وادام الموافقة، طبعا هي زغردت قدرتها عشان تسمع الجيران، وطلع انو اتصل عليه كمان بارك ليه وقال انو ما قصر عشان وافق وان شاء الله ما بندم، واذا في طريقة يسمح لي نمشي نشتري الدبل،

#طائر_العنقاء5 #ريان_عبدالقادر كما الحُلم بدأ كل شيء، كيف تحول لكابوسٍ مُخيف؟ الحصل يا اعزاء كالتالي انور حقيقي اتقدم لي، جاب معاه خالو واصحابه اتنين لان ابوه متوفي، قعد مع ابوي وياسر حكى ليهم عن نفسه وشغله، وانو جاي بيتنا وعايزني ليه زوجة، ما عنده اعتراض على قرايتي، ومستعد يدعمني لحد ما اتخرج من الجامعة، كلمهم انو شافني صدفة وسأل عني، لكن لا بعرفني قبل كده ولا حصل اتكلم معاي، حاول يكون مقنع قدر الإمكان، وهم مشو بعد ما ابوي قال ليهم خير نحن نسأل منك واشاور اخواني ونرد ليكم خبر. انا بس كنت بعاين لي نايلة، عايزاها تتكلم ولا تقول حاحة عشان ابلعها كلامها، السواطة القوالة جايه جارية عشان تحكي ليهم اني كضبت اها الكضبة بقت حقيقة، طوالي شالت كرعينها ومشت بيتم من غير ما تتكلم. جهاد: يا منافقة انتي عارفه الضيوف جايين عشان كده نضفتي البيت خليتي بلمع. - والله العظيم يا امي ما عارفه. + علي انا؟ يابت انا امك يعني عاجناك وخابزاك، وتشيل وتغمز لي. - حلفت ليك بي الله اكتر من كده شنو. + سمح اصلو ما غلط بركة الجو لقونا نضيفين، ومالا صحبتك قال لا مبروك ولا يتم ليك على خير، حاسدة زي امها. - مصدومة بتكون. + هسي توري امها وديك تاخد الصدمة الكبيرة. بعده ابوي جا اتكلم مع امي ومعاهم ياسر، وواضح انو ابوي اصلا موافق وقال ليهم عندي شورة عشان ما يقولو ما صدقو جام عريس لي بتم، محي الدين: انا سمعت قبل كده بالسر ده، صاحب واحد معرفتنا تاجر اسبيرات في السوق وعندو كذه محل. جهاد: يوم الهنا ويوم المنا وصحي المناي لقاي، ان شاء الله يكونو ناس جلابة يعزو بتنا ويعزونا معاها. ياسر: البت دي لسه صغيرة عرس شنو وكلام فاضي شنو، تقرا قرايتها وبعدين نشوف موضوع العرس ده. جهاد: صغيرة شنو بكرة لو عرسوها تلدي، ماف بت صغيرة للعرس، وقت جاها ود الحلال واقف في وشها لشنو؟ خليها تمشي بيت راجلها تقعد متهنية ومبسوطة، على الاقل ترتاح من الفقر وتعيش الدنيا حبة. تقريبا الموضوع اتحسم انو يوافقو على انور لكن بعد يومين تلاته، انا رقدت في السرير وبقيت بسترجع في اليوم ده والحصل فيه من الصباح لحدي هسي، ده يوم ولا في مسلسل هندي، معقولة الحاجات دي بتحصل في الواقع ولا انا من الصدمة مغمى علي وألفت ده كلو؟ "في اليوم التالي" وبما انها الجمعة ولسة في سبت حتى الاحد امشي المدرسة ما كنت قادرة اقعد، الشمار حارقني انور عمل كده لي؟ مستحيل يكون خايف ناس المدرسة يسألوا ناس البيت، لانو لو عملها عشان كده يكون جنى بس ما اكتر، ولا عشان نايلة ممكن توري ناس امي، عايزين يعملو لي شنو يعني لو دقوني خلاص تاني ماف حاجة، لكن السبب شنو؟ خالتو سعاد جات داخلة وصارة وشها، واضح انها عرفت بالحصل امبارح، سلمت عليها وجبت ليها موية مسافة ما امي جات، جهاد: ازيك يا سعودة كيف قيلتو؟ سعاد بصرة وش: ما كويسة والله...معقولة لكن جارتك بالحيطة ما تكون عارفه بتك جاها عريس. - هههه والله ياصحبتي انا زاتي ما كنت عارفه، جو فجأة. + هو في عريس بجي فجأة في الزمن ده، تكون من زمان مزبطة امورها معاو، نايلة قالت لي بتاع دكان، مالك قال رامية بتك الرمية دي، صغيرة وجاهلة وحلاتها بكرو يجيها سيد سيدو. - والله هو صاحب بقالة وعندو سوبر ماركت برضو، وما رميتها ولا حاجة الود جه بالباب وقال عايز بتكم بالحلال نقول ليو شنو ما بنديك...اصلا السمحات سعدهن بجي بدري ولا بتأخر. لوت خشمها: بتك دي صغيرة لكن ما قدر العرس ولا مسؤوليتو، واحدة لحدي هسي ملابسها ما بتغسلا براها، دايرة تمسك ليها مسؤولية بتاعت راجل عايز ياكل ويشرب ويلبس ويواجب الناس. - والله بتي ان شاء الله بت السرور والخاطر المجبور، من بدري علمتها الشغل ماف حاجة بتغلبها، لا غسيل ولا مكوة ولا طبيخ، بمشي بخلي ليها البيت ده يقلب ويعدل بجي بلقاو يلمع لو دقو ليو يرقص، اصلي ما خايفة عليها المشكلة في البيضة ما بتعرف تقالها دي، وطبعا امي كانت قاصدة نايلة عشان ما بتعرف تعمل اي شيء في البيت. + وقت قلتي كدي ماف حاجة اقولها ليك، الف مبروك ليها وربنا يتمم ليها على الف خير. - يباركو ليك السمح وعقبال بتك يارب. بعد مشت امي دي دايرة تقع من الفرح، اخيرا حصلت ليها حاجة قبل سعاد وبتقدر تتبوبر عليها، ده كلو ما هماني قدر الهم الشلته من كلامها ومسؤولية العرس القالتها دي. قريب للمغرب طلعت عشان اجيب عيش للغداء، لاقيت ناجي في الشارع ووقفني، = سمعت من ناس البيت انو جاك عريس، صحي الكلام ده؟ - اي والله. = وانتي موافقة. - ما بقول شيء ابوي لو وافق خلاص...الرأي رايو. = كيف ما تقولي شيء رجل كرسي انتي ولا طربيزة، ما عندك رأي؟ - البت مننا ما عندها كلمة فوق لي كلمة ابوها، قال موافق خلاص ولو رفض ما بكسر رقبتي واقول ليو الا يوافق. = انتي دايرة لو ما موافقة ما بترضي وبتعملي اي شيء عشان الموضوع يفشل. - والله ما عايزة ولا بعرفه من الاساس، لكن يمكن تكون دي القسمة. = القسمة قدام عينك براك الرفضتيها.

طول الطريق وانا بفكر اشرح الموقف لي امي كيف، احسن اقول ليها فصلوني من المدرسة عشان بليدة واتحول مدرسة تانية، لانو لو عرفت بالكضب الانا كضبتو بتعلقتي في المروحة. لما وصلت لقيتها ماف، تقريبا مشت ليها جبنة ولا حوامة جديدة احسن زاتو، نضفت البيت ده كلو، غسلت عدة الفطور وفرشت ملايات جديدة، يمكن لمن تجي تلقاني نضفت شوية قلبها يلين، وكان في بطاطس طوالي شديت ليها الملاح تجي تلقى الغداء جاهز. جهاد: هي ما شاء الله البيت بلمع جايين ضيوف ولا شنو؟ - برري والله قلت امي الحلوة دي بتكون تعبانه انضف ليها. + وانتي من متين عندك دم وبتحسي، ما كل يوم بتجي تلقي البيت وسخان بتخلي زي ما هو وتنومي. - ما بتك كبرت وعقلت وعرفت انو الكلام ده غلط، عشان كده قلت من يوم الليلة انا بساعدك واشيل معاك كتف. + قلبي ما مطمن ليك عملتي شنو من وراي؟ لو عاملة مصيبة قولي قبل ما ابوك يجي. - برري ماف اي حاجة...ماشه لي نايلة. جريت توبها من الكرسي وطلعت، مع اني قلت ما عايزة اشوف وشها ولا ادوس عتبت بابهم لكن مجبورة، لقيتها بتتغدا مع ناس بيتهم قالو لي اتفضلي قلت ليهم شبعانه ومشيت غرفتها، قعدت منتظرة حضرة سيادتها تلت ساعة حتى جات، - دايرة تسمني ولا شنو ليك ساعة بتاكلي. + اي قلت اسمن لي عرسك، زي ما اتخطبتي فجأة يمكن بكرة تعرسي احسن اجهز من بدري. - وطي صوتك ما يسمعوك. + اوعى تكوني جاية تحنسيني عشان ما اوري امك؟ - لو انتي صحبة صحي موضوع زي ده ما مفروض يطلع من بيناتنا. + عشان انا صحبتك وخايفة عليك لازم اوري امك، لانو بقيتي فظيعة واحد ما بتعرفي قرعة ابو من وين تقولي خطيبك؟ وتكذبي على الاستاذة بكل عين قوية؟ احسن اوريها عشان تعرف تتعامل معاك. - ماشه توصلي القوالة يعني؟ + لو كضب كان نقول قوالة لكن دي الحقيقة الشفتها وسمعتها. - امشي اعملي الدايرة لكن اعرفي من يوم الليلة لا بيني ولا بينك وشي بلمنا ماف. + راحتك. طلعت من بيتهم وانا برجف من الخوف، الليلة اعمل شنو؟ دخلت الحمام طوالي وحبست نفسي جوا، عملت فيها بستحمى لمن سمعت صوت الباب ونايلة جات لي امي، سألتها مني قالت ليها في الحمام، بدت تحكي ليها اني عملت مشكلة في المدرسة، ابوي وياسر جو وانا هبطت زيادة ونفسي كتم، قررت اطلع من الحمام خليتها توريم البحصل يحصل... كمان عايزة تهددني في بيتنا... مشيت وقفت جمبها بقيت بعاين ليها وكلي غبينة من تصرفها، دي صحبة دي، جهاد: اها يابتي مالا يقين عملت مشكلة شنو تاني؟ قبل ما ترد الباب دقة قلت ليها اهلك بنادوك قومي امشي، قالت ما ماشه وقعدت اتمنيت من كل قلبي يكون ده ناجي ويسوقها معاه، لما فتحت الباب كان انور ومعاه راجل كبير واتنين شباب، اتصمغت في مكاني وما عرفت اتصرف، انور: ماف اتفضلو؟ بعد مسافة سمعت صوتو وزحيت من الباب، سلمو على ناس امي وقعدو وانا لسه واقفة في مكاني، جهاد: تعالي يابت جيبي موية. وعيت على نفسي ودخلت المطبخ، شلت الكبابي عبيتها موية وجيت قدمت ليهم. السر: اول حاجة بنعتذر عن الزيارة المفاجئة كان لازم نوريكم الاول لكن الود اصر ونحن ما كسرنا خاطرو، انا السر محمد خال انور جاني وقال لقى بت الحلال وعايز يتقدم ليها، ونحن ماف حاجة عندنا احسن من الراجل البقول بالدغري عايز يعرس، وجينا طالبين يد بتكم على سنة الله ورسوله لي ولدنا... 💜ابقوا عافية💜

= تمام كده كويس شديد، هسي تمشي المدرسة عادي واذا سألوك ولي امرك وين تقولي جاي، انا عندي شغلة كده بقضيها وبجيك، اتكلم مع المديرة واقول انتي غلطانه وتعتذري من الاستاذة والموضوع يتقفل. - اعتذر منها لي هي ما برضو غلطت في حقي. = تعتذري لانها استاذك اول ومرا كبيرة وما صاح القلتي ده. - ما بعتذر ما بعتذر عشرة مرات ما بعتذر. = خلاص انا ما بمشي معاك وخليم يتصلو بأمك وتجي هي تتصرف. - كده يعني؟ = اي كده. مشيت وانا بنبذ فيه جوا قلبي، وقت اصلا بتغشني لي عشمتني من البداية، غلطانة انا السمعت كلامك وصدقتك...عواليق سااي وانا عواليق اكتر منك... غنماية انا الصدقتك. لما دخلت المدرسة لقيت استاذة خالدة واقفة لي جمب الباب تقول كانت منتظراني، + اقيفي يا طالبة... وين ولي امرك؟ بكل استفزاز رديت ليها: جاي. + متين؟ - ما عارفه عندو شغل بعد يخلصو بجي. + معناها تفضلي خارج الفصل لما يجي. حلفت كانت تخليني احضر حصة وحده لغاية ما فسحة الفطور جات، وانا قلبي ده واقف هسي لو اتصلت لي امي اعمل شنو؟ مع انو حظرت رقم المديرة من تلفون ابوي، ولو عايزة امي الا تتصل لي خالتو سعاد تديها التلفون، مية فكرة بقت تجي في عقلي، ولو عرفوني ما وريتم اساسا الليلة كُرررعلي، شررر دموعي جات جارية، القاها من وين ولا من وين، قلت احسن شيء امشي للمديرة اعترف ليها انو اهلي ما عارفين واعتذر من الاستاذة والموضوع يتقفل على كده...لو دقتني زاتو ما مشكلة اخير من امي تعرف وتوريني الطفى النور منو. دقيت الباب لما شافتني قالت لي اتفضلي، قعدت في الكرسي بفرك في يديني من التوتر، ما عارفه ارفع عيني من الارض، المديرة: ولي امرك وين؟ - ان...انا...انا... انور: السلام عليكم. في مشهد كله درامية فجأة جه خاشي وكأنه بطل فلم أكشن هندي، لابس قميص ابيض مع بنطلون جينز وساعة جلد، حالق وريحت عطره عبت المكان، كنت بعاين ليه مصدومة على اساس انك ما جاي وكده؟ وقت بتجي لي الدراما دي وتخليني ساعتين ببكي سااي؟ انور: بعتذر عن التأخير لكن مع ظروف الشغل وكده. المديرة: سبب زيارتك شنو؟ انور: بكون ولي امر التلميذة يقين محي الدين، الاصح نائب ولي امرها لغايبو في الوقت الحالي.. حصلت لينا حالة وفاة وكل الأسرة مشت البلد. + انت مش بتاع الدكان البجيب لينا البارد والموية؟ = ايوا انا. + وصلة قرابتك بيها شنو؟ = بتكون بت عمتي. + وانت عارف بت عمتك عملت شنو؟ وسبب الاستدعاء؟ = عرفت التفاصيل منها وما بنكر انها غلطت وما يصح كلام زي ده يطلع من طالبة مؤدبة ومحترمة، وهي ندمت اشد الندم على كلامها ومستعدة تعتذر من الاستاذة. بقيت بعاين ليه من فوق لي تحت انا متين قلت ليه مستعدة اعتذر؟ وتقول دي سخرية القدر استاذة خالدة جات داخلة والمديرة ورتها انو ده ولي امري، قمت على حيلي واعتذرت منها وانها غلطت وما بتتكرر. خالدة: امك وين ولا ابوك جايبة ود خالك؟ انور: كلمت المديرة انو حاصل لينا ظرف وفاة اضطرت الاسرة تسافر الجزيرة. خالدة: ايوا وفاة قلت لي خليكم هنا انا جاية. نبرة صوتها خالص ما طمنتني زي العايزة تعمل حاجة ولا اصلا شاكة فينا وما صدقتنا. شوية جات داخلة ومعاها نايلة، وقتها حيلي برد عديل لمن قعدت في الكرسي، خالدة: بعرف انك بت جيرانهم وبتعرفيها من بدري حصل شفتي ود خالها ده ولا جاهم في البيت؟ نايلة: يقين ما عندها خال اصلا لمن يكون عندو ولد. صبت فيني مطرة عاد الليلة دي اطلع منها كيف؟ لا بحلني الكضب ولا الحقيقة، اقول ليهم كضبت والفت ده كلو من راسي وناس بيتنا ما عارفين، عاد وووبعلي وكُرررعلي. انور: ممكن اقدم توضيح بسيط، انا الطلبت منها تقول اني ود خالها لانو لو قلت ليكم اني خطيبها ما اظن تتفهموا الموقف، جات حكت لي بالحصل وما كنا عايزين ناس البيت يعرفو والا بتحصل ليها مشكلة كبيرة نحن في غنى عنها، فعشان كده وريتها اني بتصرف وتعتمد علي، وبكرر اعتذاري منكم ما كان مفترض ادس الحقيقة، وخطيبتي غلطانه ولازم تعتذر. زي الممشية بالكهربة قمت على طول اعتذرت من الاستاذة والمديرة. انور: لكن بطلب من حضرتك كمان تعتذري منها لانك احرجتيها وسط زميلاتها في الفصل، وياريت لمن تجي تحفزيها على القراية مرة تانية تختاري الفاظ لطيفة من غير ما تقللي منها ولا تضحكي البقية عليها، خطيبتي شاطرة هي بس مرات ما بتركز لكن اوعدكم من يوم الليلة بتخلي بالها من قرايتها، وانتظرو منها نتيجة مشرفة نهاية السنة. هو مشى وانا رجعت الفصل لكن من غير عقل، ما قادرة استوعب ده شنو الحصل، والخلا الموضوع يكبر للدرجة دي، خطيب وخطيبة؟ بقى علي مثل جات تكحلها عمتها. ما صدقت الدوام خلص جري طلعت على الدكان، لقيته مقفول وانور ماف، عاد الليلة كُرررعلي، انا اتصرف كيف ولا اعمل شنو، نايلة مستحيل تسكت واول حاجة بتعملا لمن نرجع البيت تمشي لي امي وتحكي ليها بالحصل، ده لو ما مشت لي ابوي ولا اخوي.

#طائر_العنقاء4 #ريان_عبدالقادر "أحيانًا تكون النجاة بأن تفوتك الأشياء" ركبت العربية جمب ناجي وانا بالي مشغول بفكر في الخطة واذا بتنجح، ناجي: واقفة في الدكان ليك ساعة لي؟ وبتتكلمي مع البياع في شنو ده كلو؟ اتوترت للحظة، ورديت بسرعة: لا ماف حاجة...كان الصباح نسيت قروشي وقال لي اجيبم بكرة. = لي ما شلتي من نايلة ليها كم يوم عاملة جوطة في البيت الا ازيد ليها المصروف وما رضت الا شالت الضعف. - سألتها وقالت لي ما عندها. كان واضح الاستغراب على وشه: البت دي ما عارف بخيلة كده طالعة على منو...والله ماف زول في بيتنا بخيل ولا جبار، الا هي حقها ده لو تموت ما بتدي زول، ما تزعلي منها انا اخوها بتتعامل معاي كده. حسيت بغصة في قلبي، يعني هي كان معاها قروش، وكانت بتقدر تنقذني من الموقف البايخ ده، لكن ابت وخلتني انحرج مع بتاع الدكان، لما ناجي حسى اني زعلت بجد وعيوني اتملت دموع نزل الدكان ومشى اشترى لي كيس مليان اندومي وشبس وشوكلاتات. = خلاص ما تزعلي نفسك كلو يهون فدا ضحكتك. - شكرا بس ما عايزة حاجة. = عايزاني ازعل منك يايقين؟ - لا. = طيب اسمعي الكلام وشيلي. ختيته جمبي من غير ما اهبش حاجة فيه، دور رجعنا المدرسة عشان نسوق نايلة، فتحت الباب قعدت ورا ولما لقتني قدام بقت تعاين لي كيف كيف، اصلا كنت شاماها ولا فتحت خشمي معاها، شافت الكيس وعايزة تشيله ناجي قال ليها ما حقك مش كفاية القروش الشلتيها الصباح، وبكده عرفت اني عارفه بحركتها البايخة. وصلنا ونزلت من غير ما اقول ليهم حاجة وطوالي دخلت بيتنا، خليت ليم الكيس في العربية اصلي لا جيعانه ولا فاضية ليم، كانت امي بتلبس في توبها قالت ماشه تشرب الجبنة، استحميت اول وشلت باقي الفطور اكلته. "نايلة" ناجي: ممكن اعرف لشنو التصرفات دي؟ بتعاملي صحبتك بالطريقة دي لي؟ - اها شكت ليك السنيورة عملت ليها شنو تاني، ما عارفه انت اخوي انا ولا اخوها هي في اي شيء تدافع ليها وما بتشوفها غلطانه. = ما شكت لي ولا قالت حاجة عرفت بالصدفة انها اتدينت من بتاع الدكان عشان نست قروشها، ومع انو عندك مصروف لكن ما اديتيها. - انا مسؤولة منها؟ البت دي اختي ونسيتها؟ لي انا دايما مجبورة اساعدها، هدومي القديمة اديها ليها لعباتي واي حاجة؟ يااخ بابا لمن يجيب لي شيء من برا بقول الا اديها معاي، هل انا مجبورة اشاركها كل حاجة حقتي؟ وقت ما عندها ما تقتنع بالعدم وترضى الا تعاين لي حق الناس؟ = انتي ما مجبورة لكن من باب الاحسان وانك تحسني زي ما ربنا احسن ليك، عندك ملابس كتيرة وفايضة عن حاجتك، دولابك ما بتقفل من الملابس غير المالية الشنط، ديل كلهم عايزة تسوي بيهم شنو؟ ما فيها شيء لو اديتي صحبتك لبسة حلوة تطلع بيها، والعابك كمان كمية رغم انك زول كبيرة وفتي مرحلة اللعب، انا ما عايزك تحسسيها بالنقص، لانو الرزق ده بتاع ربنا زي ما فتحها علينا عادي بين لينا وضحاها تتقفل في وشنا وما يبقى عندنا شيء، فالعايز اوصلو ليك ما تتمسكي بمادة وتخلي وحده بتحبك لانو المادة بتمشي وبتجي، لكن الصاحب الصاح ما بتلقي بسهولة...اعقلي وختي الكلام ده حلقة في اضانك. "يقين" صحيت قريب للمغرب، صليت العصر وشلت شنطتي خيطها بما انو ماف لي شنطة جديدة في الوقت الحالي، جات امي داخلة من السرعة اتعترت وقربت تقع، جهاد: عاد لو شفتي صحبتك جابو شيلتها. - صحبتي منو؟ + هنادي، طلعنا من هنا عشان نشرب الجبنة مع جارتهم الا نسمع ليك صوت البوري والعربات، اتاريها ساكته ما ورت زول الا سعاد، لمن دخلنا لقيناها جوا معاهم، أي ما بتكلم الا الجلابية عارفه مصلحتها وين، عايزة بينا شنو نحن المساكين الما عندنا شيء، خليك منها لكن عاد جنس شيلة التياب دي ولا الفساتين والعبايات، كلهم ستة ستة، للدهب ده جابو ليها، الرجال ساعة ينزلو في الحاجات، قالو راجل مرا لكن مروق روقة ما روقة صحي عريس هايش وكباب داريش، يختي العرس عاملو ليها في الصالة. - كويس والله ما شاء الله ربنا يتم ليها على خير. + عقبال ما انتي برضو تجيبي لي رجل ليو شنة ورنة. - ما عايزة اعرس. + كيف يعني ما عايزة تعرسي يعني لا فالحة في قراية وكمان بتقعدي لي في البيت؟ هوووي يابت فتحي عينك كفاية الفقر الاستحملتو من ابوكم عشانكم، انتي تعرسي وتغوري من وشي واخوك يشتغل يجيب لي القروش. ما رديت لاني ما حمل اسمع محاضرة كل مرة وقدر كيف هي ضحت عشانا، وهي اتخلت عن اي حاجة وفضلت مع ابوي رغم معاملتو الما حلوة وفقرو وحالتو الصعبة عشان ما تحرمنا من الجو الاسري الرهيب ده، اريتها لو حرمتنا. "صباحاً" على غير العادة قمت بدري جهزت ومشيت محطة المواصلات، ما عايزة امشي مع نايلة ولا اشوف وشها زاتو، كان لازم اتفق مع انور على الكلام البنقوله قدامهم عشان ما نطلع كضابين. انور: صباح الخير يابت عمتي. - صباح النور من هسي عشت الدور؟ = لازم. - اها حنقول ليم شنو؟ = اعرف معلومات عنك عشان لو اتسألت اعرف ارد، ساكنة وين ناس بيتكم وكده. - وريته بكل شيء...

وبحكم اني من أقصر البنات في الفصل قاعدة قدام، يعني اول ما تجي داخلة عينها بتقع علي، دخلت سلمت ولا رديت ليها السلام عملت فيها مشغولة مع القلم الببرا فيو، اول ما قعدنا قومتني عشان اقول القانون الاخدناه الحصة الفاتت، وأنا طبعا ولا حافظة ولا متذكرة قالت شنو زاتو. خالدة: سؤالي واضح نحن الحصة الفاتت اخدنا قانون قومي اكتبي في اللوح عشان زميلاتك يشوفو. - ما حفظته. + والسبب؟ - انا.... + أكتر طالبة مهملة، لا بتكتبي ولا بتصححي، لا بتقري ولا عارفة حاجة، بقرة بس يسألوها ماشة وين تقول المدرسة جاية من وين تقول المدرسة، وهي اخدت شنو ما عارفه، اهلك مقرنك خسارة سااي قروشهم دي لو استفادو منها في نفسهم كان اخير بدل مضيعنها فيك. - قارية بقروشك انا؟ انتي بتصرفي علي؟ مالك حارقة جازك كده براحة على اعصابك ما يطق ليك عرق، الوحده عشان ما عندها عيال تجي تطلع عقدها النفسية فينا. ما حسيت الا بالكف نازل على وشي، شدة ما وجعني اضاني لمن بقت ما بتسمع، جرتني من يدي على مكتب المديرة. خالدة: طالبة قليلة ادب وما محترمة ولا عندها ذرة اخلاق واذا ما اتخذتو ضدها إجراء حاسم ما بتحضر لي حصة لغاية نهاية السنة. المديرة مسحت بي الواطة وماف كلمة ما سمعتها واخدت استدعاء ولي أمر، وطبعا ما دخلتني الحصة مشيت قعدت في الطوب قدلم المصلى، بكيت بكاء لمن حسيت قلبي داير يقيف. سيد الدكان: مالك بتبكي؟ رفعت راسي مخلوعة لمن شفته، شكله جا يجيب البارد لبتاع الكافتيريا، - ماف حاجة. = مالك قلت ليك؟ - المديرة شاكلتني ويمكن تفصلني من المدرسة. = عملتي شنو؟ - قلت للاستاذة يا عاقر. كتم الضحكة يا الله وانا دموعي لسه ما نشفت. = قالو ليك تجيبي اهلك صاح؟ - أي ولو امي جات بتقطع رقبتي. = بعد تطلعي تعالي لي...ما تنسي تعالي فهمتي؟ - طيب... فعلا اول ما خلص الدوام المدرسي مشيت ليه الدكان، لما شافني بقى يضحك وقال: لسانك طويل ومروتك حبة، وقت ما قدرو بتقولي لي؟ - الزفت ديك براها البدت انا ما سألتها بقت تشاكلني قدام البنات وتقول انا مهملة وبليدة. = عندك اخو كبير؟ - أي عندي ياسر وده اخير منو امي بجي بكسر الكنب فوق راسي. = حصل قبل كده شافو اخوك؟ - لا...الاساتذة لا لكن في صحباتي بعرفو. = طيب انا بجي وبقول اني اخوك ود خالتك او عمتك ولي ظروف خاصة بينا ماف زول من اهلك بجي. - انت مجنون ناس المدرسة جت عارفنك بتاع الدكان كيف تقول انك ود خالتي؟ = العارف انك ما قريبتي منو؟ ولا زول صاح يبقى ماف زول بشك وانتي اصلا بتجي دكاني كل يوم يعني حاجة عادية اكون من اهلك وانتي ما قلتي عشان ما عايزة شوشرة. - صااح...صااح...والله فكرة حلوة وكده ولا زول من ناس بيتنا بعرف ولا حاجة...لكن انت بتعمل ده كلو لي؟ قبل ما يرد ناجي ضرب لي بوري العربية ولما شفته اتخلعت، شلت شنطتي بسرعة ومشيت بعدها اتذكرت وسألته صحي اسمك منو؟ = انور....اسمي انور... "شريكً في الجرائم، والمكائد ثم الحياة" 💜ابقوا عافية💜

- العريس الطايرين بيو السماء ده عايز خدامة لي ضيوفو ما مرا، وحده تربي ليو اولادو وتشيل الهم بدول وهو يكون مرتاح يجي راجع زول نوم وراحة، أنا اتعب مع اولادو الأربعة وبتي الما عندي غيرها في الدنيا اخليها بعيدة مني عشان حضرة سيادتو، والله مش يلبسني دهب لو لبسني الماس ما عايزاو، وطالما مسؤوليتي بقت تقيلة عليكم واي سجم رماد يدق بابكم عايزني تعرسوني ليو انا بقدر ليها، لقيت شغل وما بكرة دي نازلة وتاني لا بتعبكم معاي ولا بقول عايزة شيء. دخلت جوا بعد سقت بتي وضربت الباب بواري بطريقة درامية، زي ما بقولو رب ضارة نافعة كنت شايلة هم افتح ليهم موضوع الشغل كيف وما يرفضو جاتني الطريقة لحدي عندي الحمدلله يارب. زيزا: ماما يعني خلاص عمو داك مشى وما بتعرسي؟ - ايوا عشان حبيبتي ونور عيوني قالت لا فأنا برضو ما موافقة. + ماما هو بابا شرير؟ - لا يا عيوني...منو القال ليك كده؟ + ماف زول...طيب لي ما عايزة ترجعي ليو، جاب لينا عربية حلوة وعندنا بيت كبير واشترى لينا دهب، مش كده معناها هو كويس وبحبنا. - بابا زول كويس وطبعا بحبنا لكن...نحن حصلت بيناتنا مواقف ما حلوة، أنا ما قدرت انساها وما عايزاك تزعلي لو اتكررت تاني. + انا نفسي نكون كلنا سوا في بيتنا زي باقي صحباتي... كلامها ده وجع قلبي وما حسيت الا بدموعي جارية، رغم كل محاولاتي عشان تعيش زي البقية الا انها حاسة بالنقص، بقيت بمشي يدي على شعرها وما عرفت ارد، سرحت بخيالي بعيد واتذكرت الحصل... "فلاش باك" "قبل عدة سنوات" سمراء طولها متوسط عيونها واسعة ورموشها طويلة، نحيفة نوعا ما أو الاصح نقول قوامها انجليزي، صوتها رنان وفيه بحة من الجمال، عندها فرط حركة وما بتعرف تقعد سااي. جهاد: سجم الرماد يقين قومي اتأخرتي على المدرسة. - ما عايزة امشي. زحت الملايا من وشها وقالت: ما على كيفك تمشي ولا غصب عن عينك، أنا ما قعدت شهر بحنس ابوك ينقلك مدرسة خاصة زي نايلة عشان تنومي لي. - اصلا ما قلت ليكم عايزة مدرسة خاصة ولا قلت عايزة اقرأ زاتو. + تقري وتجيبي نتيجة سمحة وتفوتي نايلة فاهمة ولا ما فاهمة. قمت استحميت وانا بدعي المدرسة دي تنحرق ولا تتهدم ولا يقع فيها نيزك يريحني منها، شربت الشاي وشلت الشنطة لقيت يدها مقطوعة، - ما خيطتها لي. + تعبت من الخياطة انا وابوك الفقر ده مية مرة قلت ليو يجيب ليك شنطة ما جابها، تقول قلت ليو جيب دهب. شلت شنطتها السوداء وظاهرة حقت امهات ييع. دقيت الباب لي خالتو سعاد عشان بمشي مع نايلة اخوها ناجي بسوقنا، سعاد: تعالي يابتي اشربي الشاي. - شكرا يا خالتو شربتو. + عارفاك شربتي لكن ما بي كيك زي حقي تعالي الكيكة دي ما تفوتك. شلت قطعة ومشيت غرفة نايلة كانت لسه بتسرح في شعرها. - نحن اتأخرنا. + عادي ناجي بودينا بالعربية عشرة دقايق ونصل. - نفسي اعرف كل يوم بتقيفي ساعة قدام المرايا لي؟ + انو الوحده تهتم بنفسها ده من الأنوثة، ما كل الناس جعفر زيك بتطلع من البيت وشها ما غسلتو، بالله شوفي جزمتك دي وسخانه كيف ولا شنطة الأمهات الفي يدك دي، نفسي اعرف متين بتبطلي بهدلة وتبقي بت زي باقي البنات. - عاجبني جعفر ابقي بت انتي يا مادموزيل. سعاد: هاك القروش دي ناجي طلع بدري قال عندو شغل امشو بالمواصلات. نايلة: انا اركب مواصلات؟ - ارح يابت ما وقت تنقعطك. شالت القروش من امها والشارع كلو تنق الا تكلم ابوها يعمل ليها ترحيل، كيف هي نايلة تركب مواصلات عشان تمشي المدرسة. نزلنا في بداية الشارع ومشينا مشوار بعيد شوية، في العادة ما كنا بنحس بيه لانو ناجي بوقفنا قصاد البقالة وبمشي، المهم دخلنا الدكان شلت الاندومي والشبس، الحاجات البشتريها كل يوم وفتحتم بقيت باكل، فايته فيني جوعة من الصباح، لما دخلت يدي في الشنطة عشان اطلع القروش ما لقيت حاجة، فتشتها فوق وتحت تعريفة ما فيها، وياداب اتذكرت اني غيرت الشنطة من غير ما اشيل المصروف، ضربت جبهتي بيدي وحسيت الارض دي لافة بي، وكمان لي عوارتي فتحت الأكياس كان ممكن ارجعم من غير إحراج. مسكت نايلة من يدها وقلت ليها براحة عندك قروش لانو انا نسيتها وما معاي، + ما عندي والله وزاتو عشان دفعت ليك في المواصلات ما فضل لي ولا شيء غير حقت الفطور. من صوتها العالي سيد الدكان انتبه لينا، عيوني اتملت دموع وانا بمد ليه في الأكياس، - معليش انا نسيت قروشي في البيت، فتحتم لكن خليم معاك وانا بكرة بدفع ليك حقم. = عادي ما فيها شيء انتي زبونة دايمة ما بتجري بحقي صاح؟ شيلي اكياسك وبكرة جيبي القروش. - شكرا...شكرا...بكرة من الصباح بجيبها. = لو ما عندك حق المواصلات بعد تطلعي من المدرسة تعالي شيلي دين. - طيب...شكرا شديد. قلبي لمن برد شدة ما كنت خايفة من الإحراج ما اتوقعت الموقف يمر بالسهولة دي، منها وعلى المدرسة وبكرهه يوم الاربع ده عشان عندنا دبل فيزياء في البداية، والاستاذة كريهة ما بحبها ولا بتحبني، مشاعرنا تجاه بعض متبادلة.

#طائر_العنقاء3 #ريان_عبدالقادر "في كُل مَرة أظن فيها أنني هُزمت تخرج مني فتاة قَوية بعزيمة جديدة تُعيدني إلى السَاحة قمراً مُضيئاً يَبدو أنهُ لا يُليق بي الإنطفاء" "فطين" على آخر الزمن انا انضرب كف من اخوي الما بطلع من شورتي ولا بسمع كلام زول غيري عشان العواليق ديك؟ واريتو لو غلطانه ما كنت بزعل، لكن يضربني عشان قلت ليها الحقيقة في وشها، ما هي فقر وكراعها نحس، من عرسها هو واقع في المشاكل، يطلع من حفرة يقع في دحديرة، شوم من فوق لي تحت ما خربت حياتو بس لكن كمان كانت السبب في خراب حياتي معاو، لكن عهداً علي الكف ده اطلعو من عيونها. "يقين" لما رجعت البيت كان في ضيف قاعد مع ابوي في الحوش، قلت السلام عليكم ومشيت على الصالة، امي قاعدة معاها صبا وزيزا، - منو البرا ده؟ زيزا: عريس شين قال داير يعرسك، اوعك تعرسي والله ازعل منك وما اتكلم معاك تاني. - حبيبتي اهدي وروقي...عيونها كانت مليانه دموع وبتتكلم ونفسها مقطوع من الخوف، واضح انها بكت اول وصبا حاولت تسكتها ما عرفت، اخدتها في حضني وقلت ليها: انا اصلا ما عايزة اعرس وطالما قلتي هو شين وما عجبك يبقى انا ما عايزة طيب؟ ممكن نمسح الدموع دي ونهدا؟ جهاد: أي اقعدي باري لي بتك دي لمن تموتي براك، بكرة تكبر وتعرس وتشوف بيتها وحياتها وانتي البخدمك منو والله هي زاتها ما بتفضى ليك. - ممكن اعرف ده منو؟ صابرين: بتعرفي جارتكم الفي بداية الشارع ديك هي جابتو ليك، ملتنا فقر بالكلام الكتير، جبت ليها عريس ما بتفوت، هااايش وكباب دارييش، القروش عندو بالكوم والردوم، ما عندو مشكلة انها معرسه قبل كده هو زاتو ارمل، يعني بتفقوا، المرة دي تخت عقلها في رأسها وتوافق زي الراجل ده ما بتلقى، هي ما صغيرة وماشه تكبر وبتبقى ما مرغوبة، اخير ليها ترضى وقت قطر العرس لسه ما فاتها. - نفسي اعرف الناس دي شايلة هم عرسي كده لي؟ هو انا قاعدة فوق راس زول ولا واحد فيهم صارف علي؟ ابوي نده علي عشان اجيهم برا، قعدت جمبه في السرير وهو قام قال اسمعي كلامو ونشوف رايك. بقيت بعاين لي متفحصة ده شنو البنطلون المكرفس ده، كمان مطبقه من تحت يعني ولا قدرو زاتو، حتى القميص اكمامه وسخانه، من هنا شامه ريحته واااي مبالغة، والعجب صلعة النص ما بتتجازف نهائي، غايتو المظهر الخارجي ياخد 2/10 كدي ما اظلمه لما اشوف المضمون، يمكن يكون زول تفكيره منفتح، واعي وفاهم. عريس الغفلة: اسمي الفاتح مشهور بالجلابي، في قبيلتنا نحن ناس حارة واصلو ما بنقصر، ما عايزك تشيلي هم حاجة نجوم السما دي لو عايزاها انزلها ليك، لكن داير منك السمع الطاعة، انا زول ضيفان ودايما بيتي مليان وعمران، ناس البلد والعيان والبقرا، أي زول بجي الخرطوم بنزل عندي وحبابم مليون، ما عايز زول يطلع منك زعلان واي زول يشكرك مرت الفاتح ما بتقصر وبتقوم بالواجب. - اممم يعني انت هسي عايزة زوجة ولا خدامة لي ضيوفك؟ = خدامة كيف يعني الضيف ده ما زي الرسول بنحترمو وما بنقصر معاو. - حق الضيافة تلاته يوم ما اكتر، وده زاتو لو جاي من سفر، لكن جنس ضيوفك البقعدو بالشهور ديل ما بنفعو معاي. = انتي زولة بخيلة وما بتتلقي في الحارة. - والله خليت الحارات زماان بقيت زولة باردات بس ومرات سفن اب وميرندا. = خلينا من الضيوف انا عندي أربعة اولاد، أكبر واحد فيم عمر 11 سنة والصغير 5 والفي النص 9 و7. - ما شاء الله ربنا يحفظهم ليك. = عايزك تختيم في عيونك وتعامليم كأنك امهم، بعدين لمن يكبرو ياهم البراعوك وبخدموك. - أربعة يعني مع بتي خمسة... = انتي ناوية تسوقي بتك معاك ما بتخليها لي حبوبتها؟ حاولت اتمالك نفسي واعصابي وقلت: يعني انا اربي ليك أولادك الاربعة من اكل وشراب وغسيل ومكوة وفي مرضم وصحتم وبتي الواحده اخليها لي امي؟ = خلاص تجيك كل سبت لانو الجمعة ده يوم راحتي وما عايز زول يضايقني فيو...اكون قاعد معاك وتدلعيني. - يا سلام. = ومن هسي تعرفي انا ما عندي مرا بتشيل سكريتا وتباري الجبنات والونسات، أي حاجة عندك في بيتك سوي جبنتك واشربي، مروق من غير داعي ما بنفع معاي ما أي واجب تقولي ماشه، لا جزارة لا دكان ولا فرن انا بجيب أي شيء، والسوق ممنوع منعا باتا لأي سبب ما بتمشي، جاية ناس امك انا بوديك وبرجعك مرقة براك ماف. - النفس كيف؟ اتنفس ولا إلا لو سمحت لي؟ قوم من هنا امشي شوفك ليك مجنونة عرسها، والله ده الفضل المشكلة جايب الثقة دي كلها من وين وكمان بتتشرط وتتأمر، الدرب الجابك يرجعك واوعى اشوف وشك هنا تاني ما عندنا بنات للعرس، طردتو وقفلت الباب. جو طالعين لمن سمعو الصوت وما شافو عريس الغفلة وين، محي الدين: الراجل مشى وين من غير ما يتكلم ولا يقول حاجة؟ - غير رايو بعد شافني ما عجبتو قال ماشي يشوف قدام. جهاد: كضابة دي انتي الطفشتي، راجل ما شاء الله ما عليو أي كلمة، عندو بيت حدادي مدادي وعربية ودكاكين في السوق، تقعدي معززة مكرمة للدهب ده يلبسك ليو، لكن انت فقر تحبي المرمطة والشقاء.