إستراحة نفسية 💭 ـ

ليه بنتذكر كل المصائب اللي عملناها مجرد ما نضع راسنا على المخدة آخر الليل؟ حاجة متعبة وغريبة صح! انك تكون منتج ومبسوط طول اليوم ، بس مجرد ماترقد على السرير عشان تنوم عقلك يفكرك بالحاجات اللي ماكملتها بس واللي ممكن تكون م خطيرة وبتستحمل التاجيل! وعشان نفهم شنو هي المشكلة, لازم نعرف كيف هي بتحصل؟ في عالمة روسية اسمها بلوما زيجارنيك كانت قاعده في مطعم زيها زي اي حد تاني منتظرة اكلها, وأثناء أنتظارها كانت بتلاحظ للجرسونات وهما شغالين, فلاحظت ان الواحد فيهم بيحفظ كمية كبيرة من الطلبات المعقده والطويلة من غير حتى يكتبها, بس حفظه ده كان بيستمر لغاية ما يسلم الطلب للعميل, وبعدها بينسى كل شيء. فحاولت تبحث عن الموضوع ده أكثر, عشان تعرف ليه ده بيحصل, وخلصت نتائج بحثها الى أن المخ: " بيتعامل مع المهمات والانشطة على حسب التسليم, بمعنى تاني لمن يحصل نشاط ويكون لابد من اكماله المخ بيفضل يفكر فيه لغاية مايتم, مجرد مايتم تسليم النشاط المخ بيـأرشفه, بس لمن النشاط يكون غير مكتمل المخ بيفضل في حالة توتر ذهني نشط, فبيفضل يدور ويدور لغاية مانكمل النشاط أو المهمة" فعشان كده لمن تضع راسك على المخده, مخك بيحاول يفكرك بكل الحاجات اللي مش عملتها, وبيتجاهل كل الحاجات اللي انت عملتها واتممتها, وهو بيعمل ده عشان ماتنساها. اذا, كيف نقدر نتعامل مع ده, وهل في طريقة بنقر من خلالها نضحك على مخنا عشان نقدر ننوم مرتاحين؟ تصدق لو قلت ليك الحل بسيط شديد, ومش محتاج اي مجهود: " انت مش محتاج تنجز كل شيء هسي, انت محتاج تفكر دماغك انك مسيطر". وعشان تقدر تعمل ده لابد من الاتي: - جيب ورقة وقلم او افتح ملاحظات التلفون, واكتب كل حاجة بتفكر فيها حاليا ومانعاك تنوم, كل على حدا في جملة واحده, مثلا لو بتفكر في انك كان مفترض تتكلم مع فلان فاكتب: " بكرة الساعة ١١ ان شاء الله حاكلم فلان باسمه". الخطوة دي بتفهم دماغك ان المهمة دي تمت جدولتها لبكرة في الساعة المحددة, فمش محتاج تكون قلق وتفضل تذكرني بيها اكتر. ولو عندك هدف كبير مثلا, شايل همه سواء كان مشروع او مقابلة بعد كذا يوم, او امتحانات .. الخ, حاول ابدا الخطوة الاولى حتى لو تخطط للموضوع, او تحدد حاتعمل شنو, واضعف الحاجات انك تسميه ان شاء الله في النوته, الحاجة دي حاتقلل من التوتر الناتج من التسويف, وحاتخلي دماغك يهدا شوية, بس اهم حاجة ماتستعمل الحاجة دي عشان تكذب على نفسك وتضيعها! ولو عجبك المحتوى اعمل ❤️ استراحة_نفسية.