𝑵𝑶𝑽𝑴𝑩𝑬𝑹 •

الخوف النفسي من الموت هو بسبب ظن الإنسان إنه هيقابل الموت ويشوفه وهو حي، وبيعامله كأنه شيء ضمن خبرات وحالات الحياة ودا مش هيحصل، كل اللي هتقابله وانت حي هي حاجات أحياء مقدور عليها ولو مش مقدور عليها هتموتك وهنرجع للتقسيم الأول انا معنديش مشكلة مع الموت، أنا بس خايف من إني معشتش كفاية واعتقد دي الحاجة الوحيدة اللي اسوأ من الموت، والمفروض نعمل حسابها فعلًا إن ميعادك يجي وأنت لسه معشتش حياتك بشكل كافي حتي الاحتضار داخل في الحسبة هو شيء تبع الحياة مش الموت، ف مفيش داعي لمقاومة شيء مش هتشوفه.

مبيصعبش عليا قد الناس اللي مش عارفين يعدوا اي حاجه فاتت، صدقني اللي فات فات علشان مش عاوزك ولا عمره شافك غير مرحله وهتعدي اللي شاف من البدايه جواك عمره ما هيبعد ويسيبك، علشان كده لازم تبص جوه قبل ما تبص علي اي منظر خارجي وتعرف الشخص ده من جواه عايزك انت ولا حطك في زون مرحله.

فستان فرح في ليالي أحزاني.

انت لو بس تؤمن بعبثية الحياة هترتاح وتعيش بشكل أفضل وتبطل تجلد نفسك على حاجات حصلت خارجة عن إرادتك، مفيش بإيديك غير انك تحاول وتجرب لحد ما توصل للي عايزه او تموت.

عندي امتحان كمان ساعة وقاعد علي القهوة اكتب كلام عبيط هنا، قمة الإستهتار والله

اول مره أحب في حياتي كنت في خامسة ابتدائي وكتبتلها جواب لسا فاكر كتبت ايه لحد انهارده بحبك يا فلانه اكتر من حبي للحكم والسلطة، كان نفسي ابقى رئيس جمهورية المهم بعد ما كتبته قولت دي عبيطه ومش هتفهم عمق حبي دا فرميته علي المكتب وصحيت تاني يوم لقيت امي قايله للبيت كله والحاج كان كل ما نقعد على الاكل يقولي مش هتاخد موكب الرئاسة وتروح للجماعه.

مش لازم كل حاجة تبقي بتاعتك ولا شرط كل حاجة تحصلك يبقالها معنى يرضيك، الحياة مش دايما برمجة خطية ورضاك من عدمه مش موجود غير ف المعادلة بتاعتك انت بس، مش شرط عشان عملت كل اللي عليك إنك توصل، وكتير هتبقى حسبت كل حاجة صح وبرضو الدومنة هتقفل منك.. ليه؟ عشان هي كدة، والحجر اللي كعبلك ف طريقك كان موجود عشان هو كان موجود لا عشان تِرجم حد بيه ولا عشان تنصب منه مقام يخلّد حزنك وهزايمك، اركنه علي جنب، متضيعش عمرك، وكمّل.

إبراهيم بيحب جديد.

انت لحد دلوقتي مش قادر تقتنع ان المعرفه حظ، يعني لو صادفك حد جاهل بمعلومه انت عارفها ده مش معناه ان انت خارق وان هو موضع سخريه اصل انت متولدتش بالمعلومة دي، كل الفكره ان انت حظك كان احسن من حظه في انك تعرف المعلومه ممكن بنسبه كبيره بيبقا اجتهاد شخصي منك، ‏بس بنسبه اكبر ظروف اللي قدامك مكانتش معاه ومخدش فرصته انه يثبت نفسه، فربنا يسترها عليك متتنططش علي حد بكلمتين عندك وعارفهم يا تقولهم عشان تفيد اللي قدامك يا إما متعملش ناصح.

‏الواحد كل يوم بيكبر فكريًا، التجارب والتعامل بيشقلب الإنسان خالص، لما تلاقي حد غير قناعة أو سلوك أو طبيعة كانت فيه فده مش تناقض، وارد جدًا يكون دخل تجربة خرج منها مغير جلده كله، أو حتى شخصه القديم مات فيها واتولد واحد جديد لازم يتأقلم عالوضع الجديد.