Olii Xaafaa, Oli the Great

"Dhaloota beekumsa tuffatu, oomishuun haa dhaabbatu!" Sirni barnootaa keenya foyya'uu, cimuu fi yeroo kan giddu galeeffatee ta'uu qaba. Kun akka ta'uuf dhiibbaa gochuun gaariidha. Kanarra, ijoolleen afaan dhaloota ishee sirnaan qubeessuu hin dandeenye barnoonni gatii akka hin qabnetti yaaduun dogoggora. Dargaggoonni keenya hedduun bizinesii hojjetanii miliyeenaroota ta'uu barbaadu akkasittis amanu. Kun ta'uuf, garuu ulaagaawwan lama yoo xiqqaatan guutamuu qabu: 1. Sirni dinagdee fi dhaabbileen miliyeenaroota sana baachuu danda'an ijaaramuu fi jiraachuu qabu. Namoonni beekumsa barbaachisu qabaatanii, cimaniidhumayyuu hojjetanii sirnii fi dhaabbilee kanaaf haala mijeessan hin jiran taanaan ni daanga'u. Hub: Sirnii fi dhaabbilee kun immoo namoota baratan, warra beekumsa qaban, warra naamusa qabaniin ijaarama. Jarri ofii sooressoota ta'uu dhiisuu danda'u. Garuu, sirna kana beekumsaa fi qabeenya biyya isaanii qindeessuun ijaaru. Kanaaf, fakkeenyi Addunyaa Dhihaati. Addunyaa Dhihaa hedduu keessatti sirnii fi dhaabbilee akkasii waggootaaf aarsaan itti kanfalamee ijaaramaniiru. Sirni lammileen isaanii cimanii, beekumsaan hojjennaan keessatti badhaadhan namoota baratan kanaan ijaarameera. Kanaaf, achitti dargaggoonni barumsaa idilee irraa qollifatanii hojjechuu filachuun sababa qabeessa. Amma fakkeenyaaf, magaala ani jiraadhu keessatti namoonni 50' waggoota shanan dhufan kana keessa qabeenya hedduu, miliyeenotaan lakkaa'amu horachuu danda'uu?" osoon jedhee hin danda'an. Sababni, sirnii fi dhaabbileen kana baachuu danda'an hin jiran. Galii namoonni magaalitti argatan dabalatee, haalonni dinagdee biroo kana eeyyamu hin jiru. Hub: Sirni kun ammas dhaloota beekumsa gonfateen hin ijaaramu taanaan, hundi kee mana buskuttii fi mana suuqii bantee keessa dhaabbachaa oolta malee akka ati yaaddu sana waanuma bizinesii hojjetteef qabeenyi kuufamu hin jiru. Haala akkasii kana hunda cabsanii qabeenya kan horatan namoota muraasa qofa ta'u. Isaanuu waggoota hedduuf itti fufinsaa fi tarsiimoo qara ta'een kan hojjetan, beekumsaa fi naamusa haalota kanarra isaan aansu warra qaban. Jarri kun magaala tokko keessa nama tokko ykn lamatu jira. Yookiin immoo hin jiranis ta'a. Kanaaf, gabaabaatti ijoolleen kee umurii ijoollummaa isheetti akka barattu, akka xiinxaltu godhi malee bizinesii hojjetta jettee gurra hin cobsiin. Booda isaanuu beekumsaa fi fedha isaaniin waan hojjetan filachuu danda'u. Yoo ofiikee barsiisuu dandeesse manattu barsiifadhu. Kanarra, inumaayyuu daree barnootaa ishee keessaa 1ffaa bahuu akka qabdutti gorsi. Garuu, nama cimaa ta'uurratti malee barataa cimaa ta'uu qofarratti akka daanga'an hin godhiin. 2. Addunyaa ammyyaa fi miidiyaa hawaasaa kana keessatti sirnaa fi dhaabbilee magaala keen yookiin immoo biyya keessa jiraattuun osoo hin daanga'iin qabeenya horachuu yoo barbaadde immoo, sadarkaa addunyaatti nama waa gurguruu danda'u ta'uu qabda. Kun beekumsa qofa osoo hin taane, kuufama dandeettii hedduu kan barbaadudha. Inni kun immoo caalaatti naamusa fi tarsiimoo ol'aanaa kan barbaadudha. Kunis, namoota hedduuf abjuu bira hin gahamnedha. Kanaaf, ergaa koo yoon xumuru. Sirni barumsaa keenya dadhaabaadha. Jijjiiramuu qaba. Sirni barnootaa dadhabaa ta'uun dhaloota balaaf saaxileera jechuun garuu barnoonni, beekumsi hin barbaachisu jechuu miti. Rakkoon Afrikaa inni bu'uuraa, Afrikaan gootota, gootummaa isaanii immoo beekumsaa fi tarsiimoon deeggaran dhabuu isheeti. Akka amma beekumsa tuffannu kanatti beekumsa tuffachuu itti fufnaan, dhiironni keenya mana qumaaraa fi puuliitti galuu ta'a. Dubartoonni keenya immoo hamma biyyoonni Arabaa rohobootii hojii isaanii hedduu isaaniif hojjetan tolfatanitti achitti godaanu jechuudha. Kun immoo boodatti rakkoo isa ammaa caalaa walxaa fi paartiin siyaasaa ati jaallattu sun furuu hin dandeenye dhala. "Dhaloota beekumsa tuffatu, oomishuun haa dhaabbatu!" Hub: Barreeffamni armaan olii gaaffii walfakkaataa namoota 15'f dhihaate irraa cuunfamee kan barreeffamedha. Namoonni kun namoota akkuma tasaa bakkee addaa addaatti gaafatamanidha.