Obsaa Abdiisaa

Hojiileen misoomaa Bulchinsa Magaalaa Shaggar ogeeyyii miidiyaatiin daawwatameera. Bulchinsi magaalaa Shaggar kutaalee magaalaa 12fi aanaalee 36n Onkololeessa, 2022 A.L.A kan hundeeffamte yoo ta'u, bal'ina lafaa heektaara Kuma 160 ol irratti bu'uuramte. Magaalittiin erga hundeeffamtee waggoota sadii qofa ta'us, hojiileen amma dura hojjataman waan waggoota soddoma keessatti hojjatamuu maludha! Akkaatuma kanaan hojiileen hojjatamanis roga rogaan: 1. Qonna: Adeemsa qonna magaalaatiin qonnaan bultoota kanaan dura qe'ee isaanirraa buqqa'aa turan deebisanii dhaabuun qonna babal'isuun danda'ameera. Kanas akkaataa oomishaafi oomishtummaa dabaluun danda'amurratti qonnaan bultoota leenjisuun hojii boonsaan hojjatameera. 2. Misooma magaalaafi gabaa: Qonnaan bultoonni kanaan dura oomisha isaanii gabaatti dhiyeessuuf rakkataafi dallaalota seeraan alaatiin saamamaa turan giddugaloota gabaa 8 ol ta'an kutaalee magaalaarratti ijaarsisuun hojiif banaa taasifameera. 3. Fayyaa: Hundeeffama Shaggariin dura hospitaalli tokkollee kan hin turin yoo ta'u, waggoota sadan darban keessatti qofa hospitaalonni sadii ijaaramuun meeshalee wal'aansaa guuttachuun tajaajila eegalaniiru. Kana malees giddugaloonni wal'aansa baqaqsanii yaaluu sadii banamuun rakkoo karaa tajaajilichaa ture hiikaa kan jiran yoo ta'u hospitaalli rifaraalaa tokko ijaarsi isaa xumuramaa jira. 4. Barnoota: Bulchinsi magaalaa Shaggar waliin gahinsa barnootaa dabaluuf manneen barnootaa sadarkaa 1ffaafi 2ffaa kutaalee maggaalaafi aanaalee hunda sadarkaa jedhamuun danda'amutti ijaaruun barattoota simachuun barsiisaa jira. Kanumaan wal qabatee sagantaa nyaataa barattootaa qixa sirriin adeemsisaa jira. 5. Teeknolojii: Magaalaan Shaggar magaalaa Ismaartiifi ammayyooftuu ta'uu kan ittiin mirkaneessaa jirtu keessaa inni tokko sosochii teeknolojiitiini. Kanas Inistiyuutii Teeknolojii guddaa magaalaa Koyyee Facceetti hundeessuun muummeewwan barnootaa akka addunyaatti gurguddoofi murteessoo ta'an barsiisuuf barattoota simataa jira. Inistiyuutiin kunis sirna barnoota ofii isaa kan hayyoota giddugaloota teeknolojii akka NASAfi kkf keessa hojjataniin bocame kan qabudha. Kana malees sosochii tajaajila waraqaarraa bilisa ta'eefi harkifannaa kenna tajaajilaa hambisuu milkeessuuf wiirtuu kenna tajaajila iddoo tokkoo "MESOB-Shaggar" eegalchiiseera. Giddugalli kunis seektaroota 32n kan eegale yoo ta'u, gosoota tajaajilaa 159 ta'an kennaa jira. 6. Carraa hojii uumuu: Shaggar magaalaa jireenyaaf mijattuu taate gochuuf lammileef carraa hojii uumuun murteessaadha. Kanuma bu'uura godhachuun pirojeektii "hojii gara Shaggar fiduu" jedhu bocuun seektara hundumaanuu carraa hojii bal'aa uumuuf hojjatamaa jira. Kana malees inisheetivoota adda addaan kutaalee magaalaa hundattuu industiriiwwan godoo hedduun ijaaramuun dorgaggootaaf carraan hojii uumamuu danda'eera! 7. Mana jireenyaafi bulchinsa lafaa: Hundeeffama Magaalaa Shaggariin dura ijaarsota seeraan alaafi saamicha lafaa ture gara baankii lafaatti deebisuun jiraattota qabiyyee seera qabeessa qabaniif mirkaneessuun danda'ameera. Kanaanis karaa misooma real state fi ijaarsa manneen waliiniitiin rakkoo mana jireenyaa jiru furuuf kutannoon hojjatamaa jira. 8. Sassaabbii galii: Hundeeffama magaalattiin dura waggaatti galiin qarshii Biliyoona shan (5B) qofti sassaabamaa kan ture yoo ta'u, hundeeffamaan booda ammoo walumaagalatti galii qarshii Biliyoona afurtama (40B) sassaabuun danda'ameera. 9. Tajaajila lammummaafi tola ooltummaa: Magaalli Shaggar hojii tajaajila lammummaafi tola ooltummaatiin harka qalleeyiifi namoota humna hin qabne 4000 ol ta'aniif manneen jireenyaa 400 ta'an ijaaramuun kennamaniiru. Walumaagalatti Shaggar, magaala haala magaalummaa addunyaa giddugaleeffatte kan taateefi jireenyaaf mijattuu taatedha. Kanaanis Maastar Pilaanii mataa ishee kan qabdu, zoonii manneen jireenyaa, industirii, daldalaafi kkf kan of keessatti hammattu yoo ta'u, waggoota dhiyoo as aanan keessatti magaalaa addunyaa miidhagduufi beekamtuu taasisuuf kan hojjatamaa jirudha. https://www.facebook.com/share/p/1H8jh9yxd6/?mibextid=wwXIfr