અલ્વી ગુજરાતી હદીસ ટેલીગ્રામ ચેનલ

*મુનાજાતે શાકીન* હઝરત ઈમામ ઝૈનુલ આબેદીન અલય્હિસ્સલામ ફરમાવે છે અલ્લાહના નામથી જે ખૂબ મહેરબાન અને માફ કરનાર છે. અય મારા મઅબૂદ! હું તારી સામે મારા નફ્સની ફરિયાદ કરું છું, જે મને બુરાઈનો હુકમ કરે છે અને ગુનાહની તરફ ઝડપથી લઈ જાય છે. જે તારી નાફરમાનીમાં રસ ધરાવે છે અને તારી નારાજગી વહોરી લે છે. તે મને બરબાદીના રસ્તાઓ પર લઈ જાય છે. અને મને તારી નજરમાં સૌથી વધુ હલકો અને બરબાદ બનાવે છે. તે અનેક બહાનાં બનાવે છે અને લાંબી લાંબી આશાઓ રાખે છે. જો તેને કોઈ તકલીફ પહોંચે તો તે ગભરાઈ જાય છે. અને જો તેને સુખ-સગવડ મળે તો તે બીજાને આપવાથી રોકે છે. તે રમત-ગમત અને દુનિયાની મોજમસ્તી તરફ વધારે ઝુકે છે. અને ગફલત તથા ભૂલચૂકથી ભરેલું છે. તે મને ગુનાહ તરફ ઝડપથી લઈ જાય છે અને તૌબા કરવામાં મોડું કરાવે છે. અય મારા માઅબૂદ! હું તારી સામે એવા દુશ્મનની ફરિયાદ કરું છું જે મને ગેરમાર્ગે દોરે છે અને એવા શૈતાનની ફરિયાદ કરું છું જે મને બહકાવે છે. તેણે મારા સીનાને વસવસાથી ભરી દીધું છે. અને તેના ખરાબ વિચારો મારા દિલને ઘેરી રાખ્યાં છે. તે મારી ખરાબ ઇચ્છાઓને મદદ કરે છે અને દુનિયાની મોહબ્બતને મારા માટે સારી બનાવીને બતાવે છે. અને મારા તથા અલ્લાહની ઇતાઅત અને તેની નજીક પહોંચવા વચ્ચે અડચણ બને છે. અય મારા માઅબૂદ! હું તારી સામે એવા દિલની ફરિયાદ કરું છું જે સખત થઈ ગયું છે અને વસવસાથી વારંવાર બદલાતું રહે છે. અને જે ગફલત અને દિલની કાળાશથી ઢંકાઈ ગયું છે. અને એવી આંખની ફરિયાદ કરું છું જે તારા ડરથી રડતી નથી. અને જે વસ્તુ તેને ગમે છે તેની તરફ લલચાય છે. અય મારા માઅબૂદ! તારી કુદરત સિવાય મારી પાસે કોઈ તાકાત અને શક્તિ નથી. અને તારી હિફાઝત સિવાય હું દુનિયાની મુસીબતો અને બુરાઈઓથી બચી શકતો નથી. પછી હું તારી ઊંડી હિકમત અને તારી પૂરી થતી મરજીના વાસ્તે તારી પાસે માગું છું, કે તારી રહમત અને અતા સિવાય મને બીજા કોઈ તરફ હાથ ફેલાવનાર ન બનાવ. અને મને ફિતનાઓનું નિશાન ન બનાવ. અને દુશ્મનો સામે મારી મદદ કર. અને મારા ઐબો તથા રુસવાઈઓ પર પડદો નાખ. મને બલાઓથી બચાવ અને ગુનાહોથી દૂર રાખ. તારી મહેરબાની અને રહમતના વાસ્તાથી એ સૌથી વધારે રહમ કરનાર.