مامۆستا عبدالخالق ڕۆناکی

🗞️ مەهێڵە شەیتان بە هۆی لووتبەرزی دڵەکان لێک دوور بخاتەوە.. 👈 تا ئەو نەیەت و داوای لێبوردن نەکات، پاشەکشە ناکەم..!! چەندە ئەم ڕستەیە بووەتە هۆی ئەوەی خۆشەویستان لە یەکتر داببڕێن، خێزانەکان بپچڕێن، هاوڕێیەتییەکان کۆتاییان پێ بێت و براکان لە یەکتر دوور بکەونەوە. شەیتان ئەمەی دەوێت؛ چونکە زانێت کاتێک دڵەکان لە یەکتر دوور دەکەونەوە، ڕق و کینە شوێنی خۆشەویستی دەگرێتەوە، بەڵام ئاشتەوایی و لێبوردن هێزی ئەوی تێکدەشکێنێت. لەبەر ئەوە پێغەمبەری خوای گەورە ﷺ هانی ئاشتەوایی دەدات و دەفەرموێت: «وَخَيْرُهُمَا الَّذِي يَبْدَأُ بِالسَّلَامِ». واتە/ باشترینی ئەو دوو کەسە ئەوەیە کە یەکەم جار بە سڵاو و ئاشتەوایی دەست پێ دەکات. ئەوە لاوازی نییە کە تۆ یەکەم هەنگاو بنێیت، بەڵکوو نیشانەی بەهێزی ئیمان و گەورەیی ئەخلاقە. 🗞️خوای گەورەش دەفەرموێت: ﴿فَمَنْ عَفَا وَأَصْلَحَ فَأَجْرُهُ عَلَى اللَّهِ﴾ واتە/ ئەوەی لێی خۆش بێت و ئاشتەوایی بکات، پاداشتەکەی لای خوایە. ئەگەر تۆ چاوەڕوانی ئەوە بیت کە هەمیشە خەڵکی تر یەکەم جار بێن، ڕەنگە زۆر پەیوەندی هەرگیز چارەسەر نەبن. بەڵام ئەگەر بۆ ڕەزامەندی خوای گەورە یەکەم هەنگاو بنێیت، دڵت ئاسوودە دەبێت و پاداشتەکەت لای خوایە. مەهێڵە شەیتان بە لووتبەرزی و نەفس، ساڵانێک خۆشەویستی و برایەتی لەنێوانتاندا بکاتە قوربانی. بۆیە دەستپێشخەری ئاشتەوایی بکە، لێبوردن هەڵبژێرە، چونکە ئەوەی لە پێناوی خوادا خۆی دادەبەزێنێت، خوای گەورە بەرزیدەکات. 🖊️م.عبدالخالق ڕۆناکی.