حدوتة شفا

سارة أسامة : أصعب الأوقات اللي بتكون فيها محتار بين قرارين الإتنين أصعب من بعض، لا عارف تكمل على الوضع اللي انت فيه ولا عارف تنسحب منه.. متلخبط، مش عارف لو كملت فإنت كده سلبي ومتهاون في حق نفسك ولو قررت تنسحب هل هتكون مجرد بدلت وجع بوجع غيره ؟! الحيرة منطقية جداً.. بس حلها إننا نرجع للفكرة الأساسية وراء الإختيار.. نختار بناءً على إيه وليه ؟! ربنا سبحانه أوجدلنا وسائل كتير في الحياة تعينا عليها، بمعنى : ربنا حلل الزواج وفي نفس الوقت حلل الطلاق .. أباح القصاص وفي نفس الوقت خصص أجر كبير للعفو .. أوجدلنا مخرج الهجر الجميل وفي نفس الوقت فتحلنا أبواب الصبر الجميل.. كلها اختيارات مباحة، الحكمة منها : (إن ربنا ييسرلك المناخ اللي يكون في حدود طاقتك وقدراتك فتقدر تتعايش وانت محافظ على سواءك النفسي، فتعرف تكمل في رسالتك في الحياة) يعني الخلاصة انت بتختار الوضع اللي تعرف و تقدر تصبر عليه، مش شرط أبداً يكون اختيار بين (أسوأ وضع) و(أفضل وضع) . مقولة للصحابي عمرو بن العاص رضي الله عنه بيقول : (ليس العاقل مَن عرف الخير مِن الشر، وإنما مَن عرف خير الشرين) فالمقياس هو سؤال تسأله لنفسك بعد سردك للسلبيات والإيجابيات لكل قرار : هقدر أصبر على أنهي سلبيات فيهم ؟ كده كده فيه مجاهدة وفيه كَبَد وفيه صبر لكن من لطف ربنا إن كل ده يكون في حدود وسعك.. (لَا يُكَلِّفُ اللَّهُ نَفْسًا إِلَّا وُسْعَهَا) البداية إنك تتعرف على حدود وِسعَك في المرحلة دي، وِسعَك اللي بيه تقدر تكمل مسيرتك في الحياة، تنفذ مهامك المطلوبة منك وانت قادر تصبر صبر جميل مش ضغط ولا قهر. لكن ما تسيبش نفسك في مكان بتضيع فيه وبتموت بالبطيء و كل طاقتك وروحك بتُستنزَف، اسعى انك تلحق نفسك من الوضع ده، وهتتوجدلك المخارج. (وَمَنْ يَتَّقِ اللَّهَ يَجْعَلْ لَهُ مَخْرَجًا . وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا)