مصلح/ د.عمرو الزواوي

لسه مخلص الشغل الخاص من ساعة تقريبا، مع نوم ٤ ساعات.. دا اصبح العادي بتاع اليوم.. الشغل دا عشان ربنا يكرمني وأقدر أعيش أنا وأسرتي.. بفتكر وانا في آخر سنة جامعية، روحت لشيخ اللهم بارك في الدعوة، سألته أدي أد إيه للدعوة؟ قالي إذا توافر لديك ساعتان يوميا فهذه نعمة! فأنا بقى ما اقتنعتش، أصل من واحد طول يومه بيتحرك بالدعوة لساعتين بس إزاي؟ - تدور الأيام، واكتشف إن كلام الشيخ كان صح، وإن بمرور الزمن المسئوليات بتزيد، والواجبات حرفيا بتتضاعف، والأوقات ما عدتش مكفية تحقيق التوازن! طب أنا كاتب الكلام دا ليه؟ أولا، عشان نفتكر إن السعي للإنفاق على الأهل دي عبادة، فنخلي النية لله، كدا كدا الدنيا ساحلاك، وأنت بتقاوم السحلة، فخلي المجاهدة دي لله.. والسعي لله. ثانيا، عشان ما تضيعش وقتك، صدقني أنا ندمان على كل دقيقة ضيعتها أيام الجامعة ومش لاقي زيها دلوقتي! انسى الموبايل وركز في دينك ودعوتك وحياتك ومستقبلك. انسى الانغماس في المحتوى الترفيهي والانغماس في اللهو عشان صدقني هتندم! ثالثا: حاول تقطع أشواط كبيرة فترة الجامعة، الأشواط دي في علاقتك بالله، علاقتك بالقرآن فهما وعملا وحفظا وتدبرا، في علاقتك مع نفسك في الصحة النفسية، في علاقتك مع الآخرين في إدارة العلاقات، في علاقتك مع المجال الحياتي اللي هتتخصص فيه! رابعا: تعلم إدارة مالية، تعلم إدارة مالية، تعلم إدارة مالية، هتفرق معاك جدا بجد، الدعوة والتدين محتاجة استقرار وجزء من الاستقرار هو الاستقرار المالي. خامسا، ادع لي وليك إن ربنا يكرمك بالبركة في الوقت والتوفيق في استغلاله لما فيه الصلاح. "والعصر" "إن الإنسان لفي خسر" "إلا الذين آمنوا وعملوا الصالحات وتواصوا بالحق وتواصوا بالصبر" #مصلح د. عمرو طه الزواوي