Muslimaat.uz

Ассалому алайкум ва роҳматуллоҳи ва барокатуҳ Бугун пайшанба — 27 август 2026 — 14 рабиул аввал 1448  🌒Бомдод намозини вақтида ўқийдиганлар муваффаққиятга эришган, юзлари порлоқ, пешоналари ярқираган, вақтлари баракотли кишилардир. 📚 "Саодатга етакловчи ҳикматлар" китобидан. 🤲 Аллоҳим, бизни бомдод намозини ўз вақтида, хушуъ ва ҳузуъ билан адо этувчи бандаларингдан қилгин. 😀@Muslimaatuz

Баъзан ғалаба медаллар билан эмас, юракдаги матонат билан ўлчанади. «Ҳиммат» 🌸🌸🌸🌸🌸🌸 📺Тўлиғи: https://youtu.be/lSrOqSgOBnI?si=gzilYtsYjQ1uf8kC 😀@Muslimaatuz

❓Соғлиқни сақлашнинг муҳим омиллари 1500 йил аввал Пайғамбаримиз соллаллоҳу алайҳи васаллам томонидан умматларига ўргатилганини биласизми? 😀@Muslimaatuz

Ассалому алайкум ва роҳматуллоҳи ва барокатуҳ Бугун чоршанба — 26 август 2026 — 13 рабиул аввал 1448 📝 Руҳий изтироб (депрессия) икки хил нарсага сабаб бўлади: ё сизни барбод қилади, ё енгилмас, кучли шахсга айлантиради. Қай бирини танлаш ўзингизга ҳавола. 🤲 Аллоҳим, қалбларимизни Ўзингнинг раҳматинг ва хотиржамлигинг билан мустаҳкам қилгин. 😀@Muslimaatuz

Эрталаб совуқ сув ичиш — фойдами ёки зарар? Ёш ўтган сари танангиз нега “совийди”? 🎙Гулбаҳор Саттарова,  превентив ва интегратив шифокор, илмий табобат мутахассиси, педиатр 😀@Muslimaatuz

Мавлид ойи билан табриклаш жоизми? ❓Пайғамбаримиз алайҳиссаломнинг таваллуд ойлари билан муборакбод этиш мумкинми? 💬 ЖАВОБ: Бисмиллаҳир Роҳманир Роҳим. Пайғамбаримиз Муҳаммад соллаллоҳу алайҳи васалламнинг таваллуд ойлари билан табриклаш шаръан жоиздир. Чунки табриклаш одатда бирор қувонарли ҳолатни ифодалаш саналади. Сарвари олам Пайғамбаримиз алайҳиссаломнинг таваллудлари – ҳидоят манбаининг дунёга келиши саналади. Ушбу муборак ойда ўзаро хурсандчиликни ифода этиш – марғуб амалларнинг энг афзали ҳисобланади. Зеро, Аллоҳ таоло шундай марҳамат қилади: “Айтинг: “Аллоҳнинг фазли ва раҳмати билан, бас (албатта), шулар сабабли (мўминлар) шодлансинлар! У тўплаган нарса (бойлик)ларидан яхшироқдир” (Юнус сураси, 58-оят). Расули акрам алайҳиссалом мусулмон умматига Аллоҳ таолонинг энг буюк фазли ва раҳмати ҳисобланадилар. Ушбу улуғ неъматдан хурсанд бўлиш ва ушбу хурсандчиликни табрик ила ўзаро изҳор этиш ушбу оятга амал қилиш саналади. Бошқа ояти каримада Аллоҳ таоло шундай марҳамат қилади: “...ва уларга Аллоҳнинг кунларини (ўтмиш воқеаларини ёки неъматларини) эслатгин!” (Иброҳим сураси, 5-оят). Ушбу оят бугунги кун мусулмонлар ҳаётида катта аҳамиятга эга бўлган кунларни эслаб қолишнинг мустаҳаб амал эканини қўллаб-қувватлайди. Зеро, Сарвари оламнинг таваллуд кунлари нишонлаш ва мусулмонлар бир-бирларини ўзаро табриклашга лойиқ кунлардан биридир. Имом Жазарий раҳимаҳуллоҳ Расулуллоҳ соллаллоҳу алайҳи васалламнинг мавлидлари билан хурсандчилик қилишга Имом Бухорий ва бошқа муҳаддислар Урва ибн Зубайрдан ривоят қилган қуйидаги ҳадисни далил қилиб келтирадилар: “Сувайба Абу Лаҳабнинг озод қилган чўриси эди. Абу Лаҳаб уни озод қилганида Набий соллаллоҳу алайҳи васалламни эмизган. Абу Лаҳабнинг оиласидан бир киши – бошқа ривоятда Аббос розияллоҳу анҳу экани айтилади – тушида ёмон ҳолатда кўрди. Унга: “Нималарга дучор бўлдинг?” деб сўради. Шунда: “Сизлардан ажрагандан кейин (яхшилик кўрмадим), лекин мана булар билан Сувайбани озод қилганим сабабли суғориламан” деди” (Имом Бухорий ривояти). Суҳайлийнинг ривоятида, азоб ҳар душанба куни енгиллатилиши айтилади. Ушбу ривоятдан маълум бўладики, Пайғамбаримиз алайҳиссаломнинг таваллудларидан хурсандчилигини изҳор қилиб, чўрисини озод қилгани сабабли ҳатто кофирга азоб енгил бўлса, мусулмон киши ушбу кун сабабидан хурсанд бўлса ва уни бошқаларга изҳор этса, савобга эришишга янада ҳақли бўлади. Шу билан бирга, ушбу муборак ойда Пайғамбаримиз соллаллоҳу алайҳи васалламга салавотларни кўпайтириш, у зотнинг ҳаётларини чуқурроқ ўрганиб, суннатларига янада кўпроқ амал қилиш мақсадга мувофиқдир. Валлоҳу аълам. 🌐Ўзбекистон мусулмонлари идораси Фатво маркази 😀@Muslimaatuz

Ассалому алайкум ва роҳматуллоҳи ва барокатуҳ Бугун сешанба — 25 август 2026 — 12 рабиул аввал 1448

Ҳар қандай идишга бир нарса солсанг, тораяди. Лекин илм идишига қанча нарса солмагин, кенгайиб бораверади.

✍ Али ибн Абу Толиб 🤲 Аллоҳим, қалбларимизни илм нури билан кенг қилгин, бизга фойдали илм ато этгин ва ўрганганларимизга амал қилишни насиб этгин. 😀@Muslimaatuz

Ал-Вакийл — барча ишларни Ўзига топширилган, бандаларининг ризқи ва ишларига кафил бўлган Зот. Инсон заиф қилиб яратилган. Бу — ожизлик эмас, балки Аллоҳга муҳтожлигини англаши ва Унга суяниши учун берилган неъмат. Қийинчилик ва ташвишлар инсонни Роббисига қайтариб, таваккал қилишни ўргатади. Сабабларни қиламиз, аммо натижани Аллоҳга топширамиз. «Ҳасбийаллоҳу ва ниъмал-вакил» «Менга Аллоҳнинг Ўзи кифоя. У қандай яхши Вакил!» Ҳақиқий хотиржамлик — барча ишни назорат қилишда эмас, барча ишни Аллоҳга ишониб топширишдадир. 😀@Muslimaatuz

Билармидингиз? Расулуллоҳ соллаллоҳу алайҳи васалламнинг Муҳаммад, Аҳмад, Моҳий, Ҳошир, Оқиб, Муқаффий, Набийюттавба ва Набийюрроҳма исмлари ҳақида билармидингиз? 🎥 Исмларнинг маъноларини билишни истасангиз, видеони охиригача томоша қилинг. 😀@Muslimaatuz

Сўранг, жавоб берамиз! Болага набийлар ва расулларнинг исмларидан қўйиш мумкинми? ❓Фарзандимизга «Иброҳим» деган исм қўйган эдик. Лекин, у негадир чақалоқлигиданоқ кўп касал бўлар, баъзида ҳушидан кетиб, ўзини йўқотиб қўяр эди. Бу ҳол 5 йил давом этди. Танишлардан бири: «Иброҳим, яъни Пайғамбарнинг исмини қўйиш мумкин эмас, бола кўтара олмайди. Шунинг учун, исмини ўзгартириш керак», деди. Унинг сўзларига кириб болага «Сайфуллоҳ» деган исм қўйганимиздан кейин ҳаммаси яхши бўлди. Бу боғлиқлик ҳақиқатга қанчалик яқин? 💬ЖАВОБ: Бисмиллаҳир Роҳманир Роҳийм Бизнинг диний китобларимизда, ҳадисларда, фарзанд тарбиясига оид асарларда мусулмонларда болаларга Набийлар ва Расулларнинг исмини қўйиб бўлмайди, деган гап йўқ, аксинча, қўйиш керак, деган кўрсатмалар бор. Маҳалла-куй, қавм-қариндош, эл-юрт орасида машҳур Набийлар ва Расулларнинг исмлари – «Иброҳим», «Исмоил», «Довуд», «Муҳаммад», «Яъқуб» каби исмлар ниҳоятда кўп. Мўмин-мусулмонлар болаларига мана шунақа исмларни қуйишни фахр деб биладилар. Бу исмлар ҳадисларда келган, ниҳоятда яхши исмлардир. Воқеъликни ўзи шуни кўрсатиб турибди. Агар ҳар бир ўғил болага Набий ва Расулларнинг исми қўйилганда касал бўлиб, ҳушидан кетиб қоладиган бўлса, халқнинг ичида бу исмлар оммалашмаган, ҳатто, мутлақо қўйилмайдиган бўлиб қоларди. Демак, миллионлаб Иброҳимдан биттаси шу хатда айтилаётган ҳолатга тушиб қолса, бу: барча Иброҳим исмлилар шундай бўлади, дегани эмас. Мана шу нарсани яхши англаб олиш керак. Энг муҳими, Набий ва Расулларнинг номларини болаларга қўйиш гўзал иш экани, хайр-барака эканлиги ҳадисларда, китобларда келган. Ана шу нарсани биз ўзимизга дастур қилиб олишимиз керак. Ёш бола бўлсин, катта одам бўлсин, унга етадиган дард, касал Аллоҳдан бўлади. Кимга, қачон, қандай касални беришни Аллоҳ таолонинг Ўзи билади. Бу нарса инсоннинг исмига ёки бошқа нарсасига ҳеч қачон боғлиқ бўлмайди. Хатдаги каби – исмни ўзгартиргандан кейин боланинг яхши бўлиб қолиши тасодиф бўлиши мумкин ёки исмни ўзгартириш билан бирга яна даволаш чораларини кўрган бўлишлари мумкин ёки Аллоҳ таолонинг иродаси шунга кетган бўлиши мумкин ёхуд бу фитна ҳам бўлиши мумкин. «Фитна» дегани «синов», «имтиҳон» дегани бўлиб, кишининг иймон-эътиқодига имтиҳон бўлади. Бунда бир нарсани нотўғри эътиқод билан қилса, ўшани татбиқ этса, одам адашиши мумкин, бундан Аллоҳ таолонинг Ўзи сақласин. Энг муҳими, динимизга зид бўлган нарсага эътиқод қилиб қўймайлик, нотўғри тушунчаларни ўзимизга диний ақийда қилиб кўтариб олмайлик, ҳақиқатини билайлик ва шунга қараб ҳаракат қилайлик. Валлоҳу аълам. ✍️Шайх Муҳаммад Содиқ Муҳаммад Юсуф раҳимаҳуллоҳ 📚"Зикр аҳлидан сўранг" китобининг 2-жузидан 😀@Muslimaatuz

Ассалому алайкум ва роҳматуллоҳи ва барокатуҳ Бугун душанба — 24 август 2026 — 11 рабиул аввал 1448

🔖«Лаа ҳавла ва лаа қуввата иллаа биллаҳи»ни кўп айтиш фақирликни даф қилади. ("Ҳадис ва ҳаёт", 35-жуз).

🤲Аллоҳим, Сендан дин, дунё ва охиратда афв ва офият сўраймиз. Динимизда, дунёимизда, аҳлимизда ва молимизда афв ва офият сўраймиз, берган неъматларингнинг нуқсонга учрашидан, баракасининг кетишидан, уларни йўқ бўлиб кетишидан паноҳ сўраймиз.

😀@Muslimaatuz

Мавлид қилиш бидъатми? ❓ Баъзилар мавлид қилиш бидъат, дейишмоқда. Бу ҳақда Ислом уламолари нима дейишган? 💬 ЖАВОБ: Бисмиллаҳир Роҳманир Роҳим. Мавлид ойи Пайғамбаримиз алайҳиссаломнинг ҳаётларини, муборак сийратлари ва суннати санийяларини янада чуқурроқ ўрганиш ойидир. Бу ойда ҳам, бундан кейин ҳам биз, мўмин-мусулмонлар, ҳар бир ишда, ҳар бир амалда У зотнинг суннатларига мувофиқ йўлда юришимиз, У зотга эргашишимиз зарур. Аслида Пайғамбаримиз алайҳиссаломнинг мавлидларини биринчи бўлиб нишонлаган зот – Расулуллоҳ алайҳиссаломнинг Ўзларидир. Имом Муслим Абу Қатода разияллоҳу анҳудан ривоят қилган ҳадиси шарифда айтадилар: “Набий алайҳиссаломдан душанба куни рўза тутиш ҳақида сўрашди. Шунда У Зот: “Ўша кунда мен туғилганман ва шу кунда менга (ваҳий, пайғамбарлик) нозил бўлган”, дедилар. Ушбу ҳадиси шариф Пайғамбаримиз алайҳиссалом душанба куни туғилганликлари ва шу кунда пайғамбарлик ато қилингани муносабати билан рўза тутганликларига далолат қилади. Расулуллоҳ саллаллоҳу алайҳи васалламнинг таваллудларини нишонлаш ва бунда хурсандчилик қилишни ўзига яраша шаръий далиллари, асослари ҳамда манфаатлари бор. Мусулмон уммати тақрибан минг йилдан буён уни нишонлаб келмоқда. Ислом умматининг таянчи бўлган бир қатор уламолар уни яхши амал санашган. 👉 Уламоларимиз: “Абдуллоҳ ибн Масъуд разияллоҳу анҳунинг “Мусулмонлар яхши санаган нарса Аллоҳ наздида ҳам яхшидир”, деган сўзлари айнан мавлидга мос тушади”, дейдилар. Биз кўпчилик уламоларнинг, шу жумладан, юртимиз уламоларининг фикрларини ушлашимиз ва ихтилофга ўрин бермаслигимиз лозим бўлади. Зеро, мавлиддан кўзланган мақсадларга эришишга мусулмонлар бугун ҳар доимгидан кўра кўпроқ муҳтождирлар. 👉 Ал-Ҳофиз Абдурраҳим ал-Ироқий айтадилар: “Зиёфат ташкил этиш ва муҳтожларга таом улашиш ҳар вақтда ҳам яхши саналган амаллардандир. Айниқса, бу муборак ойда унга Расулуллоҳ алайҳиссаломнинг нурлари зоҳир бўлганлиги туфайли шоду ҳуррамлик улашилса қандай ҳам яхшидир. Унинг бидъат эканлиги макруҳ бўлишига сабаб бўлолмайди. Зеро, қанчадан қанча яхши бидъатлар борки, уларга амал қилиш вожиб даражасига чиққандир” (“Шарҳу мавоҳибул-ладунийя” китоби). 👉 Ҳофиз Суютий раҳматуллоҳи алайҳ айтадилар: “Менинг наздимда аслида мавлид амалида одамларнинг тўпланиши, Қуръони каримдан қироат қилиш, Пайғамбаримиз алайҳиссаломнинг таваллуд топганларида рўй берган мўжизалар ҳақида ворид бўлган хабарларни ривоят қилиш, кейин дастурхон ёзилиб, таомлардан тановул қилингач тарқалиб кетиш, буларнинг ҳаммаси бидъат ҳасана ишлардан саналиб, уни ташкил этганларга савоб бор. Чунки, бунда Пайғамбаримиз алайҳиссаломни улуғлаш, таваллуд топганлари учун хурсандчилик ва шодликни изҳор этиш бор” (“Ҳуснул мақсид фи амалил мавлид” китоби). 👉 Асрининг ҳофизи бўлмиш Шайхул Ислом Абул Фазл Аҳмад ибн Ҳажар Асқалонийдан мавлид ҳақида сўралганда қуйидаги жавобни берганлар: “Мавлиднинг асли бидъат бўлиб, у ҳақида аввалги уч асрдаги салафи солиҳлардан ҳеч нарса нақл қилинмаган. Лекин, шу билан бирга, бу иш яхшиликларни ва унга зид бўлган нарсаларни ўз ичига олгандир. Бас, ким яхшиликларини олиб, ёмонликларидан четда бўлса, бидъати ҳасана бўлади. Ким ёмонликларидан четланмаса, яхши бўлмайди” (“Ҳуснул мақсид фи амалил мавлид” китоби). 👉 Ибн Обидин айтадилар: “Билингки, Набий алайҳиссалом таваллуд топган ойда мавлиди шариф ўтказиш яхши бидъатлардандир” (“Шарҳу ибн Обидийн ала мавлиди ибн Ҳажар” китоби). ✅ Хулоса қилиб айтганда, Набий алайҳиссаломнинг таваллудларини нишонлашнинг жоиз эканига Ислом олами забардаст уламоларининг кўплаб ижобий фикрларини келтириш мумкин. Айниқса, дунёнинг баъзи жойларида Ҳабибимиз алайҳиссаломнинг муборак шаъниларига нисбатан қасддан одобсизликлар амалга оширилаётган бир пайтда, У зотнинг сийратларини, суннатларини, гўзал шамоиллари ва юксак ахлоқларини қунт билан ўрганишимиз ва ёш авлодларга ўргатишимиз зиммамиздаги олий бурчимиздир. Валлоҳу аълам. 🌸Ўзбекистон мусулмонлари идораси Фатво ҳайъати 😀@Muslimaatuz

Ассалому алайкум ва роҳматуллоҳи ва барокатуҳ Бугун якшанба — 23 август 2026 — 10 рабиул аввал 1448 📝 Оналаримизга ҳафта эслатмаси:

Она-бола ўртасида мустаҳкам алоқа, меҳр-шафқат бўлмаса, бундай болалар нафақат ёшлик даврларида, балки улғайгач ҳам ўз йўлини топа олмайди. Улар ишончсиз, бахтсиз, ҳаловатсиз, шиддаткорликка, жанжалга мойил инсон бўлиб етишади. Бундай инсонлар эса ҳаётий муаммоларнинг ечими сифатида кескинликни, тажовузкорликни, ур-йиқитни танлайдилар.

🧍🧍Ундай болаларнинг севги-муҳаббатларида ҳам тажовузкорлик, серзардалик мавжуд бўлиб, бу ҳар бир

ҳаракатида намоён бўлади. Оила қурса, фарзандини уриб суяди. Ҳазил-ҳузул қилиб бошига шапатилайди, тепади, кураш тушади, камситувчи ҳазиллар килиб севади. Улар меҳр-муҳаббатга муҳтож, аммо ўзлари ўша севгини, меҳрни бера олиш қобилиятига эга эмас.

📚"Ёш бола деманг уларни..." китобидан

🤲Аллоҳим, оилаларимиздан меҳр-оқибат, ҳурмат ва баракани аритмагин. Фарзандларимизни биз учун садақаи жория бўладиган солиҳ авлодлардан қилгин. 😀@Muslimaatuz

Одоб – яхшиликка чақирув 🎙Ҳазратимиздан эслатмалар 😀@Muslimaatuz

Набий ва Расулларнинг маъсумлигини қандай тушуниш керак? «Пайғамбарларнинг олдингию кейинги гуноҳлари кечирилган» деган жумлаларни қандай тушуниш керак? «Улар гуноҳ қиладилару, лекин Аллоҳ уларни кечириб юборади» дебми ёки «Улардан содир бўлган амаллар гуноҳ эмас, умматларига бир ибрат» дебми? Қуръони Каримда зикр этилган Пайғамбар алайҳимуссаломга хитобан ҳам «гуноҳларга тавба қилиш» маъносида бир неча оятлар бор экан. Илтимос, устоз, шу ҳақда тушунтириб берсангиз, Аҳли сунна ва жамоа эътиқодимизда пайғамбар алайҳимуссаломни гуноҳсиз деб биламиз-ку?! ЖАВОБ: Бисмиллаҳир Роҳманир Роҳийм Набий ва Расул алайҳиссаломларнинг оддий кишилардан ажратиб турадиган бирдан-бир сифатлари маъсумликларидир. Яъни, маъсият қилиш, шаҳватларга берилиш, мурувватга – одамгарчиликка путур етказадиган ва инсонлик қадрини кетказадиган нарсалардан четда бўлишларидир. Набий ва Расул алайҳиссаломлар одамларнинг энг гўзал ахлоқлилари, энг пок амал қиладиганлари, энг юраги тозалари ва тасарруфотлари энг тўғриларидир. Набий ва Расул алайҳиссаломларнинг маъсумликлари «исмат» тушунчаси асосидадир. «Исмат» сўзи луғатда «манъ қилиш», «сақлаш» маъносини англатади. «Исмат»нинг шаръий маъноси эса «Аллоҳ таолонинг Ўз Расул ва Набийларини гуноҳ ва маъсият ҳамда мункар ва ҳаром ишларни қилишдан сақлашидир. Шунингдек, Аллоҳ таоло Ўз Набий ва Расулларини хулқий ва жасадий айблардан ҳамда нафрат қилинадиган касалликлардан ҳам асрагандир. Чунки Аллоҳ таоло одамларни у зотларга эргашишга, иқтидо қилишга ва уларнинг йўлидан юришга амр қилган. Набий ва Расул алайҳиссаломлар барча башарга яхши ўрнакдирлар. Агар улардан маъсият ва мункар ишлар содир бўлиши жоиз бўлса ёки мазкур нуқсонлардан бирортаси мавжуд бўлса, у нарсалар шариатда бор нарсаларга айланиб қолади. Бу эса, мутлақо мумкин эмас. Шунинг учун ҳам Аллоҳ таоло Ўз Набий ва Расулларини маъсум қилган. Аллоҳ таоло барча набий ва Расулларини Ўзининг доимий инояти ила ўраган. Аммо Қуръони Каримдаги баъзи оятларда уларга «гуноҳ қилиш», «гуноҳга мағфират сўраш» «тавба қилиш» маъноларининг нисбат берилиши бу тушунчага зид эмас. Набий ва Расуллар алайҳимуссаломга нисбат берилган «гуноҳ»дан мурод Аллоҳ таолонинг шариатларида қайтарилган ишлар эмаслиги аниқ, балки унда бошқа нарсалар назарда тутилган бўлади, дейдилар уламоларимиз. Мисол учун, Набийлик ва Расуллик мақомида айб саналган ишларни уларга нисбатан «гуноҳ» дейилган бўлиши мумкин. «Аброрларнинг яхши амаллари муқарраблар учун гуноҳ саналади» деган гап айни шу маънони ифода этади. Шунингдек, икки жоиз ишнинг афзалини танлашда нуқсонга йўл қўйиш; ҳақни излаб ижтиҳод қилиб, хато қилиш; ўз ихтиёрисиз, яхшилик қилмоқчи бўлиб, янглишиб қолиш каби ишларни назарда тутилган бўлиши ҳам мумкин. Мисол учун, Нуҳ алайҳиссалом ўз ўғилларининг сувда ғарқ бўлганини кўрганда, оталик меҳрлари жўшиб, Аллоҳ таолога ўғлининг ўз аҳлидан эканини ва аҳлига нажот ваъда қилинганини айтиб нидо қиладилар. Шунда Аллоҳ таоло у кишининг ўғли солиҳ инсон бўлмаганини айтиб, илми етмаган нарсаси ҳақида Аллоҳга илтижо қилишдан огоҳлантиради. Камчилигини тушуниб етган Нуҳ алайҳиссалом дарҳол Аллоҳга илтижо қиладилар: «Роббим, мен ўзимнинг илмим бўлмаган нарсани Сендан сўрамоқдан паноҳ тиларман. Агар мени мағфират қилмасанг ва менга раҳим қилмасанг, зиён кўрувчилардан бўламан» («Ҳуд» сураси, 47-оят). Шайх Муҳаммад Содиқ Муҳаммад Юсуф раҳимаҳуллоҳ 📚 "Зикр аҳлидан сўранг" китобининг 2-жузидан. 😀@Muslimaatuz

Ассалому алайкум ва роҳматуллоҳи ва барокатуҳ Бугун шанба — 22 август 2026 — 9 рабиул аввал 1448

🕯Суайр ибн Химсдан сўрадилар:

— Бунчаям очиқ юзлисиз?

— Ахир бу қиммат нарса эмас-ку?!

🕯Аҳмад ибн Ҳанбалдан ҳусни хулқ ҳақида сўрашди:

"ОДАМЛАРДАН келган нарсаларга ТОҚАТ қилмоқ ҳусни хулқдир", дедилар у зот.

🤲Аллоҳим, бизларни ҳам чиройли хулқли бандаларингдан бўлишни насиб этгин. Одамлардан келадиган озорларга сабр-тоқат қилишни, ғазабимизни жиловлашни ўргатгин. 😀@Muslimaatuz

Қалбни умид билан тўлдириб, ҳар қандай синовда Аллоҳнинг раҳматига суянишга ундайдиган дуо бугунги зикр гулдастамиздан жой олган. Ҳаргиз ўлимни орзу қилманг! Анас розияллоҳу анҳудан ривоят қилинади: Набий соллаллоҳу алайҳи васаллам: «Сизлардан бирортангизга зарар етса, ҳаргиз ўлимни орзу қилмасин. Агар иложи бўлмаса:   اللهُمَّ أحْيِنِي مَا كَانَتِ الحَيَاةُ خَيْرًا لِي وَتَوَفَّنِي إِذَا كَانَتِ الوَفَاةُ خَيْرًا لِي     «Аллоҳумма аҳйиний маа канатил ҳайату хойрон лий ва таваффаний изаа канатил вафату хойрон лий», деб айтсин», дедилар. Имом Бухорий ва Муслим ривоятлари. (Маъноси: Аллоҳим, агар ҳаётда яшашим яхши бўлса, мени тирик қолдир. Агар вафотим яхши бўлса, мени вафот эттир.) 😀@Muslimaatuz

🎓 678 минг абитуриентдан қанчаси талаба бўлганини биласизми?

Бу йил олий таълимга кириш учун қарийб 678 минг нафар абитуриент рўйхатдан ўтди. Якунда эса 209,1 минг нафари талабаликка тавсия этилди.

Энг кўп қайси йўналишлар танланди? Давлат гранти асосида қанча абитуриент талаба бўлди?

📹 Қизиқарли рақамлар ҳақида батафсил — «Билармидингиз?»да. 😀@Muslimaatuz

Ассалому алайкум ва роҳматуллоҳи ва барокатуҳ Бугун ЖУМА🌷 — 21 август 2026 — 8 рабиул аввал 1448

"Тарихда яшаб ўтган энг нуфузли кишиларнинг энг афзали сифатида Муҳаммад алайҳиссаломни танлашим баъзиларни ҳайратга солиши, бошқаларда эса турли саволлар уйғотиши мумкин. Аммо у зот тарихда ҳам дин, ҳам дунё ишларида ниҳоятда муваффақиятли фаолият кўрсатган ягона кишидирлар".

✍️Майкл Х.Харт

"Тарихда яшаб ўтган энг нуфузли 100 киши" китоби муаллифи

У зотга салоту саломлар бўлсин!

     «اللَّهُــمَّ صَلِّ وَسَـــلِّمْ على نَبِيِّنَـــا مُحمَّد».

«Аллоҳумма, солли ва саллим ъала набийина Муҳаммад».

🤲 Аллоҳим, Пайғамбаримиз Муҳаммад соллаллоҳу алайҳи васалламга муҳаббатимизни қалбларимизда зиёда қилгин. У зотнинг суннатларига эргашишни, ахлоқларидан ибрат олишни ва шафоатларига муносиб уммат бўлишни барчамизга насиб этгин. 😀@Muslimaatuz