قرأت لك

📌 في أي علاقة ارتباط (المفروض في إطار شرعي) متقبليش بأقل من اللي تستحقيه. بلاش تنزلي منزلة انتي أعلى منها من باب الجدعنة ولا التعاطف ولا الشفقة ولا أي شعور إنساني هيكون سبب معاناتك قدام. في العموم أي إنسان لما يلاقي حاجة مناسبة له و مبهرة هيستموت عشان يملكها لأنها بالنسبة له حلم بعيد.. ولكن مجرد ما يتمكن منها هيزهد فيها لأنه ألفها و ضمنها وده طبع دنيئ بيحتاج تزكية. يعني إيه؟ يعني من فضلك اختاري اللي هتكلميهم من الأول. اختاري ناس سوية أول حاجة عندها دين خلوقة قادرين تفهموا بعض و تتكلموا مع بعض بأريحية واللي بعد كده بيتداوي متقلقيش مادام الأساس متين. ( متسمحيش لناس كانت أقصى طموحاتهم تبتسمي لهم من بعيد يضمنوكي لدرجة يصغروكي مع نفسك و قصاد نفسك و تعاني عشان ترجعي تاني نسختك المألوف.) 📌 حاولي يكون لك مصدر دخل. الشخص اللي له دخله الخاص قوي و مستقل و مستقر نفسيًا. عشان ميكونش مصيرك مرهون بإشارة ممولك إحتياجاتك.. ولا تكوني تحت رحمه حد.. و أهو على الأقل تقدري تحققي أحلامك المؤجلة لحين ما ييجي اللي يمول تحقيقها. 📌 اتعلمي تحبي نفسك. اللي مش بتعرف تحب نفسها تعيسة و بائسة. لأن محدش هيقدر يوهبها إحساس مصدره مش ذاتها، بالعكس هتفضل عمرها كله تجري في سباق رغبتها في العثور على نظرة رضا في عيون الآخرين لمجرد إن مرايتها ضبابية مشوَّهة! اتعلمي تتقبلي جمالك الفريد. جسمك مليان؟ إسم الله على البطة الحلوة جسمك رفيع؟ يا جمال العود الفرنساوي عندك ترهلات حمل و ولادة و خسسان وتخن؟ اسم الله على جسم المحارب الناجي اللي دخل معارك صعبة وبإذن الله يرجع لأمجاده مرة تانية. اتعلمي تشوفي نفسك بعين المحب الداعم.. اللي كل حاجة عنده لها أساس، اللي عاوز يساعد نفسه مش يجلدها.. ومتنسيش؛ اللي مش بيعرف يحب نفسه الناس بتستكر عليه تحبه. 📌 آخر وأهم نصيحة ليا قبل ما تكون ليكم : ( علاقتنا بالله. ) الدنيا وسيلة الغاية منها العبادة عشان ننجو من النار وندخل الجنة.. فـ أوعي تنشغلي في الوسيلة و تنسي الغاية لـ تتوهي.. خلي في باب مفتوح بينك وبين ربنا ترجعي منه مهما بعدتي.. و متيأسيش من نفسك و أعرفي أن محدش فينا هيوصل لنهاية الطريق.. ولكن الموت على الطريق نجاة. الله يعلمنا ما ينفعنا و ينفعنا بما علمنا و يزيدنا علما يارب #أنا_أستحق #ست_بخيرها #لسه_بخيرها #إعمليها_صح #بصيرة_وخفة #أم_أنس #Aya_M_Gamal #copy 🍃قناة قرأت لك http://goo.gl/ghqnf9