Minber News - ሚንበር ኸበር

ኔታንያሁ በምስጢር ወደ ኤሚሬትስ የተጓዙት ለምንድን ነው? ከእስልምና ቅዱሣን ሥፍራዎች አንደኛው በሆነው መስጂደል አቅሷ እንዲሁም ሰፊውን የፍልስጤም ግዛት በወረራ በመያዝ በንጹሐን ላይ ግድያ እና በርካታ ስቅይት በመፈጸም በዓለም አቀፍ የወንጀል ፍርድ ቤት የእስር መያዣ የተቆረጠባቸው የእስራኤል ጠቅላይ ሚኒስትር ቤንያሚን ኔታንያሁ፤ ባለፈው እሑድ በምስጢር ወደ ተባበሩት ዐረብ ኤምሬትስ አቡ ዳቢ ተጉዘው ከሀገሪቱ ፕሬዝዳንት ሙሐመድ ቢን ዛይድ አል ናሕያን ጋር ውይይት አድርገዋል፡፡ ስለ ጠቅላይ ሚኒስትሩ ጉዞ የእስራኤል መገናኛ ብዙኃን ስለ ጉዳዩ አስቀድመው መረጃ ቢያወጡም፣ የተባበሩት ዐረብ ኤሚሬትስ መንግሥታዊ የዜና ወኪል ማረጋገጫ የሰጠው ውሎ አድሮ ሰኞ ምሽት ነበር፡፡ የዜና ወኪሉ ቢን ዛይድ ከኔታንያሁ ጋር ተገናኝተው “የሁለቱን ሀገራት ግንኙነት ማጠናከር በሚቻልባቸው መንገዶች ላይ ውይይት አካሄደዋል” ብሏል፡፡ ይሁን እንጂ ዝርዝር ጉዳዮችን ይፋ አላደረገም፡፡ አሶሼትድ ፕረስ ይዞት እንዳወጣው ዘገባ ከሆነ ግን ከአንድ ወር በኋላ ሥልጣናቸው ስለሚያበቃ ሌላ ዙር የምርጫ ፉክክር ከተቀናቃኞቻቸው ጋር የሚጠብቃቸው የእስራኤል ጠቅላይ ሚኒስትር፤ ወደ አቡ ዳቢ በምስጢር ያቀኑት የተባበሩት ዐረብ ኤምሬትስ ፕሬዝዳንትን ውለታ ለመጠየቅ ነው፡፡ ይህ ውለታ መስከረም 26/2016 (እ.አ.አ ኦክቶበር 7/2023) ሐማስ ድንገተኛውን ኦፕሬሽን ከማድረጉ አስቀድሞ ቢን ዛይድ ለኔታንያሁ ማስጠንቀቂያ መስጠታቸውን “በአደባባይ ክደው እንዲመሰክሩላቸው” ለመጠየቅ ነው፡፡ ፕሬዝዳንት ሙሐመድ ቢን ዛይድ በወቅቱ ለኔታንያሁ ስለ ጉዳዩ አስቀድመው ማሳወቃቸውን የዘገበው ሀአሬትዝ የተባለው የእስራኤል ጋዜጣ ነበር፡፡ እንደ ዘገባው ከሆነ፤ ቢን ዛይድ ማስጠንቀቂያውን የሰጡት ከኦፕሬሽኑ ከዐስር ቀን በፊት ነው፡፡ ለ45 ደቂቃ በቆየው የስልክ ንግግር ቢንዛይድ ለኔታንያሁ ኦፕሬሽኑ የተቀነባበረው በጥቅምት 2017 ሐማስ “ሰማዕት ሆነዋል” ባላቸው ያህያ ሲንዋር አማካኝነት መሆኑን ነግረዋቸዋል፡፡ ኦፕሬሽኑ ከተፈጸመ ቀጣናውን እንደሚያምሰው ቢን ዛይድ አክለው አስጠንቅቀዋል፡፡ ነገር ግን በወቅቱ የኔታንያሁ ጽሕፈት ቤት የሀአሬትዝን ዘገባ በማስተባበል ዜናውን “ሐሰተኛ” ሲል ፈርጆት ነበር፡፡ በዚህ ሳይገታ ዜናው “ፖለቲካዊ መነሻ” ያለው መሆኑን በመጥቀስ ክስ እንደሚመሠርት አስታውቋል፡፡ ያን ጊዜ መረጃውን ያጋለጠው ጋዜጣው አሁንም ቢን ዛይድ እና ኔንታንያሁ በአውሮፕላን ማረፊያ ተገናኝተው ስለዚህ ጉዳይ መነጋገራቸውን አረጋግጧል፡፡ ከእስራኤሉ ጋዜጣ በተጨማሪ በወቅቱ ዎልስትሪት ጆርናል እና ዘ አትላንቲክ የግብጽ የሥለላ መሥሪያ ቤት በተመሳሳይ ስለ ሐማስ ኦፕሬሽን ከሦስት ቀን አስቀድሞ ለእስራኤል መረጃ መስጠቱን ዘግበው ነበር፡፡ ለጠቅላይ ሚኒስትሩ መረጃውን ያጋሩት የቀድሞው የግብጽ የሥለላ መሥሪያ ቤት ኃላፊ ዓባስ ካሚል ናቸው፡፡ ሆኖም የእስራኤል ጠቅላይ ሚኒስትር በተለይ የሀአሬትዝን መረጃ ምንጭ ከፈትሕ እና ሐማስ ጋር ጠበኛ የሆኑት የፍልስጤሙ ፖለቲከኛ ሙሐመድ ደሕላን ናቸው በሚል አጣጥለውታል፡፡ ደሕላን ለተባበሩት ዐረብ ኤሚሬትስ ባላቸው ቅርበት የሚታወቁ ሰው ናቸው፡፡ በተባበሩት ዐረብ ኤሚሬትስ እና እስራኤል መካከል ያለውን ግንኙነት መደበኛ ያደረገው እ.አ.አ በ2020 በአሜሪካ ፕሬዝዳንት አግባቢነት ከተፈረመው “የአብርሃም ስምምነት” በኋላ ነው፡፡ በእስራኤለ የአሜሪካ አምባሳደር ማይክ ሃካቢ ባለፈው ዓመት ግንቦት ወር እንደተናገሩት፤ እስራኤል ሊሰነዘሩ የሚችሉ የኢራን ጥቃቶችን ለመከላከል በራዳር የሚመራውን እጅግ ዘመናዊውን የአየር መከላከያ “አይረን ዶም” ለተባበሩት ዐረብ ኤሚሬቶች ልካለች፡፡ የኔታንያሁ ድንገተኛ የተባበሩት ዐረብ ኤምሬትስ ጉዞ በተሄደበት በዚህ ሰዓት በእስራኤል አንድ ወር ለቀረው ምርጫ በጠቅላይ ሚኒስትሩ እና በተቀናቃኞቻቸው መካከል በአደባባይ የጦፈ ክርክር እየተደረገ ይገኛል፡፡ የእስራኤል አምስት ተቃዋሚ ፓርቲ መሪዎች ኔታንያሁን ከሥልጣን የማውረድ ዕድላቸውን ከፍ ለማድረግ በጋራ ለመሥራት ተስማምተዋል፡፡ የእስራኤል ባለሥልጣናት በምርጫው ትኩረታቸው ቢወሰድም በፍልስጤማውያን ላይ ጥብቅ ርምጃዎች መወሰዳቸውን ቀጥለዋል፡፡ የእስራኤል ሰፋሪዎች በጽንፈኛ ፖለቲከኞችና በፖሊስ ታግዘው በመስጂደል አቅሷ ላይ የሚፈጽሙትን ወረራም እንዲሁ ቀጥለውታል፡፡ (ሚንበር ቲቪ)

ኔታንያሁ በምስጢር ወደ ኤሚሬትስ የተጓዙት ለምንድን ነው? በድረ ገጽ ተጨማሪ ያንብቡ፡ https://minbertv.com/?p=11860

የመዲናዋ አስተዳደር ያለ አግባብ ወደ መሬት ባንክ ገብተዋል የተባሉ ይዞታዎችን ቅሬታ ሊመረምር ነው ዕለተ ሰኞ መስከረም 18 – 2019 / ረቢዑል ሣኒ 17 – 1448 የአዲስ አበባ ከተማ አስተዳደር በ2015 በባዶ ቦታ ልየታ ወቅት ያለ አግባብ ወደ መሬት ባንክ ገብተዋል ተብለው ቅሬታ የቀረበባቸውን ይዞታዎች በአጭር ጊዜ ውስጥ መርምሮ ምላሽ ለመስጠት የሚያስችል የአሰራር ስርዓት መዘርጋቱን አስታውቋል፡፡ የአሠራር ሥርዓቱን አስመልክቶ ገለፃ ያደረጉት የመሬት ባንክና ጥበቃ ቡድን መሪ አቶ ክብሮም አሰፋ፤ በወቅቱ በተከናወነው የባዶ ቦታ ልየታ 3 ሺሕ 744 ሄክታር ወይም 10 ሺሕ 97 ፕሎቶችን ከሕገ ወጦች መዳፍ በመፈልቀቅ ወደ መሬት ባንክ እንዲገቡ አድርገናል ብለዋል፡፡ ሥራው በአጠረ ጊዜ በዘመቻ የተከናወነ በመሆኑ ከ250 በላይ የሚሆኑ የቅሬታ ማመልከቻዎች ቀርበዋል ያሉት አቶ ክብሮም፤ ይህንን ችግር ለመቅረፍ ቢሮው ባስቀመጠው አቅጣጫ መሠረት ከሁሉም ክፍለ ከተሞች አጣሪ ኮሚቴ ተቋቁሞ የቀረቡት ቅሬታዎች እንደየይዞታው ሁኔታ ተጣርቶ የመጨረሻ ውሳኔ እንደሚሰጠው ገልፀዋል ተብሏል። የውይይት መድረኩን የመሩት የመሬት ዝግጅትና ማስተላለፍ ዘርፍ ምክትል ቢሮ ኃላፊ አቶ ፌኑስ ገላና በበኩላቸው ውስን የሆነውን የመንግሥትና ህዝብ የመሬት ሐብት ከሕገ ወጥ ወረራ በመጠበቅ ሂደት ውስጥ፣ ሕጋዊ ባለቤቶች የሆኑ አካላት ፍትህ እንዲያገኙና የመልካም አስተዳደር ችግሮች እንዲፈቱ የማስተካከያ ስራው በተያዘው የጊዜ ገደብ እንዲጠናቀቅና በቁርጠኝነት እንዲተገበር ሁሉም ባለድርሻ አካል ርብርብ እንዲያደርጉ ጥሪ አቅርበዋል። (ሚንበር ቲቪ)

የመዲናዋ አስተዳደር ያለ አግባብ ወደ መሬት ባንክ ገብተዋል የተባሉ ይዞታዎችን ቅሬታ ሊመረምር ነው

#ኸበር፡ ጠቅላይ ሚኒስትር ዐቢይ አሕመድ ከመስከረም 18/2019 ጀምሮ ወ/ሮ ጫልቱ ሣኒን የፌዴራል ቤቶች ኮርፖሬሽን ዋና ሥራ አስፈጻሚ አድርገው ሾመዋል። ወይዘሮጫልቱ ሣኒ የከተማ እና መሠረተ ልማት ሚኒስትር በመሆን ሲያገለግሉ መቆየታቸው ይታወቃል። (ሚንበር ቲቪ)

የሚኒስትሮች ምክር ቤት የፌዴራል ገቢ ግብር ማሻሻያ ደንብን በሙሉ ድምጽ አጸደቀ ዕለተ ሰኞ መስከረም 18 – 2019 / ረቢዑል ሣኒ 17 – 1448 የሚኒስትሮች ምክር ቤት ዛሬ ሰኞ መስከረም 18/2019 ባካሄደው 59ኛ መደበኛ ስብሰባ በተለያዩ ጉዳዮች ላይ ተወያይቶ ውሳኔ አሳልፏል፡፡ ከእነዚህም መካከል የፌዴራል ገቢ ግብር ማሻሻያ ደንብ ላይ “በሰፊው ከተወያየ በኋላ ግብአቶችን በማከል” በፌዴራል ነጋሪት ጋዜጣ ታትሞ ከወጣበት ቀን ጀምሮ በሥራ ላይ እንዲውል በሙሉ ድምጽ ወስኗል፡፡ ምክር ቤቱ ባሰራጨው መረጃ እንዳመለከተው፤ ደንቡ የፌዴራል የገቢ ግብር ግልጽነትንና አስተዳደራዊ ቅልጥፍናን ለማረጋገጥ እና ከተሻሻለው የፌዴራል ገቢ ግብር አዋጅ ቁጥር 979/2008 ጋር የተጣጣመ እንዲሆን ለማድረግ እንዲቻል የቀረበ ነው፡፡ ምክር ቤቱ ከዚህ በተጨማሪም የአስፈጻሚ አካላትን አደረጃጀት፣ ሥልጣንና ተግባር ለመወሰን በቀረበ ረቂቅ አዋጅ ላይ ውይይት አካሄዷል፡፡ በኢ.ፌ.ዴ.ሪ ሕገ መንግሥት እና ምርጫ ሕግ በየአምስት ዓመቱ የሚደረገውን ሀገራዊ ምርጫ ተከትሎ በህገ መንግስቱ አንቀጽ 56 መሰረት አዲስ የአስፈጻሚ አካላት ስልጣንና ተግባር ማደራጀት የሚጠበቅ በመሆኑ፣ በ2018 ዓ.ም በተደረገው ሀገራዊ ምርጫ ተከትሎ የፌዴራል አስፈጻሚ አካላትን በአዲስ መልክ ለማቋቋም እንዲያስችል ረቂቁ ተዘጋጅቶ ለምክር ቤቱ ቀርቧል፡፡ ምክር ቤቱም በረቂቅ አዋጁ ላይ በሰፊው ከተወያየበት በኋላ ግብአቶችን በማከል ወደ ሕዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡ ምክር ቤቱ የተወያየበት ሌላኛው ጉዳይ በብሔራዊ የዳታ አስተዳደር ረቂቅ አዋጅ ላይ ነው፡፡ በረቂቁ ላይ በሰፊው ከተወያየበት በኋላ ግብአቶችን በማከል ወደ ህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡ እንዲሁም ከዓለም አቀፍ የልማት ማህበር ጋር በተፈረመው ለኃይል ሴክተር ሪፎርም፣ ኢንቨስትመንትና ዝመና ምዕራፍ አንድ ፕሮጀክት ማስፈጸሚያ የሚውል የአንድ መቶ አርባ አምስት ሚሊዮን ስምንት መቶ ሺ ኤስ.ዲ.አር ብድር ስምምነት ማጽደቂያ ረቂቅ አዋጅ ተወያይቷል፡፡ ምክር ቤቱም ስምምነቱ ከሀገራችን የብድር ፖሊሲ ጋር የሚጣጣም መሆኑን በማጋገጥ ረቂቅ አዋጁ ለህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡ በመጨረሻም ምክር ቤቱ የተወያየው የመከላከያ ሠራዊት አዋጅን ለማሻሻል የቀረበ ረቂቅ አዋጅ ላይ ነው፡፡ ተቋሙ በኢ.ፌ.ዴ.ሪ ህገ መንግስት አንቀጽ 87 ድንጋጌዎች መሰረት የተሰጡትን ሃገራዊ ተልዕኮዎች በህግ አግባብ ለመፈፀም እንዲችል የመከላከያ ሠራዊት አዋጅ ቁጥር 1286/2015 ማሻሻል አስፈላጊ ሆኖ በመገኘቱ ረቂቁ ተዘጋጅቶ ለምክር ቤቱ ቀርቧል፡፡ ምክር ቤቱም በጉዳዩ ላይ በሰፊው ከተወያየበት በኋላ ግብአቶችን በማከል ወደ ህዝብ ተወካዮች ምክር ቤት እንዲተላለፍ በሙሉ ድምጽ ውሳኔ ማሳለፉን የጥዕቅላይ ሚኒስትር ጽሕፈት ቤት አስታውቋል፡፡ (ሚንበር ቲቪ)

የሚኒስትሮች ምክር ቤት የፌዴራል ገቢ ግብር ማሻሻያ ደንብን በሙሉ ድምጽ አጸደቀ

በአዲስ አበባ ከተማ በሚገኘው አወሊያ ሁለተኛ ደረጃ ትምህርት ቤት ውስጥ በሚያካሄደው የስፖርት እንቅስቃሴ የሚታወቀው አወሊያ የዳዕዋ እና ስፖርት ክለብ፤ የምሥረታውን አርባኛ ዓመት ዛሬ እሑድ መስከረም 17፣ 2019 የስፖርት ማኅበሩ አባላትና ጥሪ የተደረገላቸው እንግዶች በተገኙበት አክብሯል፡፡ በክብረ በዓሉ ላይ የስፖርት ማኅበሩ ባለፉት አርባ ዓመታት ወጣቶችን በስፖርት እና በሥነ ምግባር በማነጽ እንዲሁም ያበረከተውን ማኅበራዊ ፋይዳ በተመለከተ ውይይት ተደርጓል፡፡ በዚህም የስፖርት ማኅበሩ የሥራ አፈጻጸም ሪፖርት፣ የፓናል ውይይት እና የገቢ ማሰባሰቢያ መርሐ ግብር ተከናውኗል፡፡ ስለ ስፖርት ማኅበሩ የተጻፉ መረጃዎች እንደሚያመለክቱት፤ ለአወሊያ ስፖርት እና ዳዕዋ ክለብ ምሥረታ መነሻ የሆነው በ1970ዎቹ አጋማሽ በአዲስ አበባ ኳስ ሜዳ አካባቢ በሚገኘው “መርከዝ” ጓሮ ላይ በሚገኝ በጠባብ ሜዳ ላይ “የመርከዝ ቤተኞች” የነበሩት አቡበከር ዓብዱረሕማን፣ ናስር ማሕሙድ፣ በድሪ ሙሐመድና ሐጅ ሙሐመድ ይማም እንዲሁም ሌሎችም በመሆን ያስጀመሩት የእግር ኳስ ጨዋታና የሰውነት ማጎልመሻ እንቅስቃሴ ነው፡፡ በዚህ እንቅስቃሴ ላይ የሚሳተፉ ወጣቶች ቁጥር በመበራከቱ “በሜዳ ጥበት” ሳቢያ ከመርከዝ ብዙም የማይርቅ ቦታ ሲፈልጉ ወደ አወሊያ ሁለተኛ ደረጃ ትምህርት ቤት ተዛውረው እስካሁንም ድረስ የስፖርት እንቅስቃሴውን ሊቀጥል ችሏል፡፡ ይህን ሜዳ ለመጠቀም ለትምህርት ቤቱ አስተዳደር ጥያቄውን ያቀረቡት ሐጂ ሙሐመድ ይማምና ዓብዱረሕማን ሐጂ ሙሐመድ አሕመድ ናቸው፡፡ በስሩ በርካታ ወጣቶችን ያቀፈው የስፖርት ክለቡ፤ በተለያየ ጊዜ በኢትዮጵያ ቡድን በመጫወት ያሳለፉ ተጫዋቾችን ማፍራት ችሏል፡፡ ከእነዚህም መካከል የቀድሞዎቹ የኢትዮጵያ ቡና ተጫዋቾች ዓሊ ረዲ፣ ሳዳት ከማል፣ ሙሐመድ ኪንግ፣ ኻሊድ ሙሐመድ፣ ዑመር ዓብደላ፣ ኢብራሂም ሑሴን ይጠቀሳሉ፡፡ የቀድሞው የቅዱስ ጊዮርጊስ አማካይ ሐይደር መንሱር፣ የቀድሞው የመድን ተጨዋች ዓብዱልፈታህ ናስር እንዲሁም የመብራት ኃይሎቹ አንዋር ያሲን እና አንዋር ሲራጅም በዚሁ ክለብ አልፈዋል፡፡ አወሊያ የዳዕዋ እና ስፖርት ክለብን ለረዥም ዓመታት በመምራት ረገድ በአሁኑ ሰዓት በሕይወት የሌለውና ለሕንጻ ኮንስትራክሽን የተጫወተው እስማኤል አሕመድ እና በታላቁ አንዋር መስጂድ ለበርካታ ዓመታት ዳዕዋ በማድረግ የሚታወቁት ሸይኽ ያሲን ሰልማን በግንባር ቀደምነት ተጠቃሽ ናቸው፡፡ (ሚንበር ቲቪ) (ለዚህ ዘገባ የቢላል መጽሔት 2ኛ ዓመት ቁጥር 1 መስከረም 1986 ዕትም ጥቅም ላይ ውሏል) የፎቶ ምንጭ፡ ሀሩን ሚዲያ እና SM

ሁለቱን “አንዋሮች” ጨምሮ ዓሊ ረዲና ሌሎችንም እውቅ እግር ኳስ ተጫዋቾች ለኢትዮጵያ ብሔራዊ ቡድን ያበረከተው አወሊያ የዳዕዋ እና ስፖርት ክለብ አርባኛ ዓመቱን አከበረ

አብርሃም በላይ (ዶ/ር) ሳንዶካን ደበበን በመተካት የኢትዮጵያ ኒውክለው ኃይል ኮሚሽነር ተደርገው ተሾሙ አብርሃም በላይ (ዶ/ር) ሳንዶካን ደበበን በመተካት የኢትዮጵያ ኒውክለው ኃይል ኮሚሽን ኮሚሽነር ተደርገው እንደተሾሙ የጠቅላይ ሚኒስትር ጽሕፈት ቤት አስታውቋል። ተሰናባቹ ሰንዶካን ኮሚሽኑን የመሩት ለ11 ወራት ብቻ ነው። አዲሱ ተሿሚ አብርሃም በላይ (ዶ/ር) የቴክኖሎጂና ኢኖቬሽን ሚኒስትር፣ የትግራይ ክልል አስተዳደር ዋና ሥራ አስፈጻሚ እና የመከላከያ ሚኒስትር በመሆን አገልግለዋል። (ሚንበር ቲቪ)

#ኸበር፡ በዘንድሮ ዓመት የሐጅ ሥነ ሥርዐት የ344 የጋና ምዕመናን ወጪ በተባበሩት ዐረብ ኤሚሬትስ ሊሸፈን ነው የተባበሩት ዐረብ ኤሚሬትስ በዘንድሮ የ1448 ዓ.ሂ የሐጅ ወቅት ለ344 የጋና ሑጃጅ ወጪን ልትሸፍን መሆኑ ተገልጿል። በሥጦታው ርክክብ ወቅት የተባበሩት ዐረብ ኤሚሬትስ አምባሳደር፣ የአካባቢ የመንግሥት ኃላፊዎች እና የሃይማኖት ጉዳዮች ሚኒስትር እንዲሁም የጋና የሐጅ ቦርድ ሊቀመንበር ተገኝተዋል። በጋና የተባበሩት ዐረብ ኤሚሬትስ አምባሳደር ዶክተር ዓብደላ አልማንደስ እና የተልዕኮ ጉዳዮች ምክትል ኃላፊ ኸሊፋ አልሜህርዚ የቀረበውን የሐጅ ሥጦታ ለጋና የውጭ ጉዳይ ሚኒስትር ሳሙኤል ኦኩዴቶ አብላክዋ አስረክበዋል። (ሚንበር ቲቪ)

ባለስልጣኑ የሕክምና ስህተትና የሥነ መግባር ግድፈት ፈጸመዋል ባላቸው ጤና ባለሞያዎች ላይ ከአንድ ወር እስከ አንድ ዓመት ከሁለት ወር የሚደርስ የሞያ ፈቃድ እገዳ ጣለ ዕለተ ጁመዐ መስከረም 15 – 2019 / ረቢዑል ሣኒ 14 – 1448 የአዲስ አበባ ምግብና መድኃኒት ባለሥልጣን በ2018 በጀት ዓመት ከተለያየ ጤና ተቋማት በሕክምና ስህተት እና የሥነ ምግባር ጉድለት የቀረቡ 42 አቤቱታ መዝገቦችን መርምሮ ውሳኔ እና ርምጃ አስተላልፏል፡፡ ባለሥልጣኑ ዜጎች በተለያዩ መንግሥታዊና የግል ጤና ባለሞያዎች በሕክምና ሂደት የሕክምና ስህተት ወይም የሥነ ምግባር ጥሰት ተፈፅሞብናል ብለው ያቀረቧቸው አቤቱታዎችን በመመርመር ከቀላል እስከ ከባድ የጥፋተኝነት ውሳኔ አስተላልፏል፡፡ ጉዳዩን ማጣራት የሚችለው በባለስልጣኑ የተቋቋሙ ከተለያየ የጤና ማኅበራት የተወከሉ የጤና ባለሞያዎች፣ ከአዲስ አበባ ምክር ቤት፣ ከፍትህ አካላት እና የባለሥልጣኑ ባለሞያዎች ያካተተ የጤና ሥነ ምግባር ኮሚቴዎች ናቸው፡፡ ባለsስለጤና ባለሞያዎች ብቃት በማረጋገጥ ሰፊ የቁጥጥር እና ግንዛቤ የማስጨበጥ ሥራዎችን ከመሥራት ባሻገር የሕክምና ስህተት እና የሥነ ምግባር ግድፈትን አስመልክቶ ተጠያቂ ከማድረግ አንጻር የቀረቡለትን አቤቱታዎች በአግባቡ በማጣራት የውሳኔ ሀሳቦችን ይሰጣል፡፡ በተጠናቀቀው በጀት ዓመት ብቻ 42 በዚህ ሒደት አቤቱታዎችን መርምሮ የውሳኔ ሀሳቦችን መስጠቱን አስታውቋል፡፡ በዚህ ሂደት ከቀረቡት 42 አቤቱታዎች ውስጥ አስፈላጊው ማጣራት ተደርጎ ጥፋተኛ የተባሉትን 3 ሚድዋይፈሪ፣ 9 ዶክተሮች፣ 14 ነርስ፣ 3 ጤና መኮንን፣ 1 አንስቴቲስት፣ 1 የድንገተኛ ቀዶ ጥገና ባለሙያ በድምሩ 31 ጤና ባለሞያዎች ላይ የጥፋተኝነት ውሳኔ ተላልፎባቸዋል፡፡ ከእነዚህ ውስጥ 30 ባለሞያዎች ከአንድ ወር እስከ አንድ ዓመት ከሁለት ወር የሚደርስ የሞያ ፈቃድ እገዳ የተጣለባቸው ሲሆን አንድ ባለሞያ ላይ ደግሞ የጽሑፍ ማስጠንቀቂያ ርምጃ ተወስዷል። የአዲስ አበባ ምግብና መድኃኒት ባለስልጣን በጤና ተቋማት የሚገጥማቸው የህክምና ስህተት እና የሥነ ምግባር ግድፈት ያለባቸውን አቤቱታዎች ማቅረብ የሚፈልጉ ማንኛውም የህብረተሰብ ክፍል ወደ ባለስልጣን መ/ቤቱ በአካል በመገኘት ማመልከት እንደሚችሉ ጥሪ አስተላልፏል። (ሚንበር ቲቪ)

ባለስልጣኑ የሕክምና ስህተትና የሥነ መግባር ግድፈት ፈጸመዋል ባላቸው ጤና ባለሞያዎች ላይ ከአንድ ወር እስከ አንድ ዓመት ከሁለት ወር የሚደርስ የሞያ ፈቃድ እገዳ ጣለ

በመዲናዋ ሞተር ብስክሌት ማሽከርከር ላልተወሰነ ጊዜ ተከለከለ ዕለተ ጁመዐ መስከረም 15 – 2019 / ረቢዑል ሣኒ 14 – 1448 የአዲስ አበባ ፖሊስ ከዛሬ ጁመዐ መስከረም 15/2019 ጀምሮ ባለሁለት እግር ሞተር ብስክሌት በመዲናዋ ማሽከርከር እንደተከለከለ ገልጿል፡፡ ፖሊስ ይህን በገለጸበት ወቅት፤ አንዳንድ ወንጀል ፈጻሚዎች ሞተር ብስክሌትን በመጠቀም የቅሚያ እና የስርቆት ወንጀል ሲፈጽሙ ተይዘው ምርመራ እየተጣራባቸውም ይገኛል ብሏል፡፡ ወንጀል ፈጻሚዎች ከቦታ ቦታ ለመዘዋወር እና የተሰረቁ እቃዎችን ለማጓጓዝ ሞተር ብስክሌትን በብዛት እንደሚጠቀሙም አስታውቋል። ቁጥራቸው ቀላል የማይባል የሞተር ብስክሌት አሽከርካሪዎች የትራፊክ ደንቡን እንደማያከብሩ ያሳወቀው ፖሊስ፤ በተለይ ቀይ መብራትን መጣስ፣ ሌሎች ተሽከርካሪዎችን በመግጨት ማምለጥ፣ ሄልሜት ሳያደርጉ ማሽከርከር፣ የተፋፋቀ እና ለእይታ አስቸጋሪ የሆኑ የሠሌዳ ቁጥሮችን መጠቀም በአሽከርካሪዎቹ በስፋት የሚስተዋሉ የደንብ ጥሰቶች መሆናቸውን ጠቅሷል፡፡ ወንጀልን ለመከላከል እና በሞተር ብስክሌት አሽከርካሪዎች የሚፈጸምን የደንብ ጥሰት ለመቆጣጠር ከዛሬ ከመስከረም 15/2019 ጀምሮ ከኮድ 4 እና ከፖሊስ ሞተር ብስክሌት ውጭ በአዲስ አበባ ከተማ ባለ ሁለት እግር ሞተር ብስክሌት ማሽከርከር መከልከሉን የአዲስ አበባ ፖሊስ ዋና ጠቅላይ መምሪያ አስታውቋል። የሞተር ብስክሌት አሽከርካሪዎች እና ባለ ንብረቶች አስፈላጊውን እንዲፈጽሙ ያሳሰበው ፖሊስ፤ ይህን ማሳሳቢያ በሚተላለፉ ላይ ህጋዊ ርምጃ እንደሚወስድም አስታውቋል። (ሚንበር ቲቪ)

#ኸበር፡ ከደቂቃዎች በፊት በተባበሩት መንግሥታት ድርጅት ጠቅላላ ጉባዔ ፊት ለንግግር የወጡት የእስራኤል ጠቅላይ ሚኒስትር ቤንያሚን ኔታንያሁ ከፍተኛ ተቃውሞ አስተናግደዋል። ዓለም አቀፍ መገናኛ ብዙኃን ካሠራጯቸው ተንቀሳቃሽ ምስሎች ላይ መመልከት እንደሚቻለው፣ የበርካታ ሀገራት ተወካዮች ኔታንያሁ ሲናገሩ አዳራሹን ጥለው ወጥተዋል። (ሚንበር ቲቪ)

ቢላል ኢስላሚክ ፋውንዴሽን ቁጥር ሁለትን መልሶ ለማቋቋም ድጋፍ እንዲደረግ ጥሪ ቀረበ ከአንድ ሣምንት በፊት እሳት ቃጠሎ ደርሶበት የወደመውን የቢላል ኢስላሚክ ፋውንዴሽን ቁጥር ሁለት የዑለሞች እና ዱዓቶች ማዕከል በቃጠሎ መውደሙን ተከትሎ መልሶ ለማቋቋም መላው ማኅበረሰብ ድጋፍ እንዲያደርግ ጥሪ ቀርቧል። ይህ ጥሪ የቀረበው የመልሶ ግንባታ ሂደቱን ለማስተባበር የተቋቋመው ኮሚቴ ዛሬ ሀሙስ መስከረም 14/2019 በኢትዮጵያ እስልምና ጉዳዮች ጠቅላይ ምክር ቤት የመሰብሰቢያ አደራሽ በሰጠው መግለጫ ነው። ዘጠኝ አባላት አሉት የተባለው ጊዜያዊ ኮሚቴ የተቋቋመው ኮሚቴ የሚመራው በሸይኽ ሙሐመድ ዘይን ዘህረዲንን በዋና ሰብሳቢነት መሆኑ ተገልጿል። መንስኤው እስካሁንም በውል አልታወቀም በተባለው አደጋ በማዕከሉ ውስጥ ትምህርት ሲከታተሉ የነበሩ 80 ተማሪዎች የግል ንብረትን ጨምሮ በማዕከሉ ላይ ከፍተኛ ውድመት እንደደረሰም ኮሚቴው አስታውቋል። ከወደሙ ንብረቶች መካከል የመማሪያ ክፍሎች፣ ለተማሪዎች አገልግሎት የሚሰጡ አልባሳት እና ቁሳቁሶች፣ ቤተ መጽሐፍት ሙሉ በሙሉ ወድመዋል ተብሏል። በቢላል ኢስላሚክ ፋውንዴሽን ቁጥር 2 የደረሰውን ውድመት መልሶ ለማቋቋም እና የመማር ማስተማር ሥራውን ለማስቀጠል ሁሉም የበኩሉን ድጋፍ እንዲያደርግ ኮሚቴው ጥሪ አቅርቧል። የደረሰው ውድመት ከ15 ሚሊየን ብር በላይ ይደርሳል ተብሎ ተገምቷል። ቢላል ኢስላሚክ ፋውንዴሽን ቁጥር ሀለት የዑለሞች እና የዱዓቶች የትምህርት ኮሌጅ የሚገኘው በደቡብ ወሎ ዞን ከላላ ወረዳ ነው። (ሚንበር ቲቪ)

#ኸበር፡ ጠቅላይ ሚኒስትር ዐቢይ አሕመድ ዛሬ ሐሙስ መከረም 14/2019 ወደ ጅቡቲ በማቅናት ለኢትዮጵያ ጅቡቲ የነዳጅ ምርቶች ማስተላለፊያ ቱቦ ግንባታ የመሠረት ድንጋይ የማስቀመጥ ሥነ ሥርዓት ላይ መታደማቸውን ጽሕፈት ቤታቸው አስታውቋል፡፡ በዛሬው እለት በተመሳሳይ በጅቡቲ ዳመርጆግን ከኢትዮጵያ ደወሌ የሚያገናኝ እና ታላቅ ስትራቴጂካዊ ኢንቨስትመንት የሆነውን አዲስ የተጣራ ነዳጅ ማስተላለፊያ ቧንቧ መስመር ዝርጋታ ዛሬ ይፋ ሆኗል።ጠቅላይ ሚኒስትሩ በጅቡቲ የነበራቸውን ጉብኝት አጠናቀው ወደ አዲስ አበባ ተመልሰዋል። (ሚንበር ቲቪ)

በሊቱዌኒያ ቅዱስ ቁርኣን መቃጠሉን ተከትሎ ፖሊስ ምርመራ ጀመረ በሊቱዌኒያ ዋና ከተማ ቪልኒየስ ቅዱስ ቁርኣን መቃጠል በቪዲዮ ከተሠራጨ በኋላ ፖሊስ ምርመራ መጀመሩን አስታውቋል። እንደ ፖሊስ መረጃ ከሆነ፤ በቪልኒየስ ቅዱስ ቁርኣን ሲቃጠል የሚያሳይ ቪዲዮ በማኅበራዊ ትስስር መድረኮች ላይ ተሠራጭቷል። በካውናስ ከተማ በሚገኝ ታሪካዊ መስጊድ ደጃፍ ላይ የሞተርሳይክል አሽከርካሪዎች የምዕመናን ሶላት ላይ በነበሩበት ወቅትም የአሳማ ራስ በመስጂዱ ደጃፍ ላይ በማስቀመጥ፣ በመጮህና በመዝፈን በሙስሊሙ ማኅበረሰብ ላይ ዛቻና ማስፈራሪያ አድርሰዋል ተብሏል። ይህን ተከትሎም ድርጊቱ በሀገሪቱ የፖለቲካ መድረክ ላይ በስደት ፖሊሲ እና በሃይማኖታዊ መቻቻል ዙሪያ የጋለ ክርክር አስነስቷል። የሊቱዌኒያ ሙፍቲ አሌክሳንድራስ ቤጋንስካስ እንደገለጹት፤ መስጂዱን ለማቃጠል እና በእሳቸው እና በቤተሰባቸው ላይ ጉዳት ለማድረስ የዛቻ መልእክቶች ደርሷቸዋል። አናዶሉ እንደዘገበው፤ የፓርላማ አባል ቶማስ ቶሚሊናስ ድርጊቱን “ሕዝብን እርስ በርሱ ለማጋጨት የተደረገ ሴራ ነው” ሲሉ ኮንነዋል። በሌላ በኩል የተቃዋሚው 'ሆምላንድ ዩኒየን' ፓርቲ መሪ ላውሪናስ ካስቺዩናስ ውደ ሀገሪቱ የሚገቡ የውጭ ሀገር ሠራተኞችን ዓመታዊ ኮታ በከፍተኛ ደረጃ እንዲቀነስ ጥሪ አቅርበዋል። የውጭ ሠራተኞች አመታዊ ኮታ አሁን ካለበት 25 ሺሕ ወደ 10 ሺሕ ዝቅ እንዲል እና ቅጥርም ከሊቱዌኒያ ባህል ጋር ቅርበት ካላቸው ሀገራት ብቻ እንዲሆን አሳስበዋል። የሀገሪቱ የውስጥ ጉዳይ ሚኒስትሩ ማርቲናስ ካቴሊናስ እንዳሉት አዲስ የስደት ፖሊሲ እያዘጋጁ እንደሆነ ነው። (ሚንበር ቲቪ)

በዘንድሮ ዓመት የሐጅ ኮታ ድልድል ከፍተኛ ቁጥር ያገኙ ዐስር ሀገራት ይፋ ተደረጉ በዘንድሮ ዓመት የሐጅ ኮታ ድልድል ኢንዶኔዥያ፣ ፓኪስታን እና ሕንድ ከፍተኛውን የሑጃጅ ቁጥር ኮታ በመውሰድ ቀዳሚዎቹ ደረጃዎች ላይ መቀመጣቸው ይፋ ተደርጓል፡፡ በመጀመርያ ደረጃ ላይ የተቀመጠችው ኢንዶኔዥያ 221 ሺሕ ምዕመናንን የምትመዘግብ ሲሆን፣ ፓኪስታን 179 ሺሕ 210 እንዲሁም ሕንድ የ175 ሺሕ 25 ምዕመናን ኮታ አግኝታለች፡፡ በቀዳሚዎቹ ዐስር ዝርዝር ውስጥ ኢትዮጵያ 43 ሺሕ ምዕመናንን ኮታ ትወስዳለች ተብሎ የተካካተች ቢሆንም ቁጥሩ ማረጋገጫ አለማግኘቱን ኢስላሚክ ኢንፎርሜሽን ዘግቧል፡፡ ኢራን፣ ቱርክ፣ ባንግላዴሽ፣ ናይጄሪያ፣ አልጄሪያ እና ግብጽ እስከ ዐስረኛ ደረጃ ተቀምጠዋል፡፡ ከሀገራቱ መካከል የፓኪስታን፣ ሕንድ፣ ባንግላዴሽ እና ናይጄሪያ ኮታ ማረጋገጫ አግኝቷል፡፡ ኢትዮጵያን ጨምሮ የቀሪዎቹ ሀገራት ኮታ “ጊዜያዊ” በሚል የተመዘገበ ነው፡፡ የሳዑዲ አጠቃላይ የስታቲስቲክስ ባለሥልጣን ይፋ ባደረገው ይፋዊ መረጃ መሠረት፣ ባለፈው ዓመት በሐጅ ሥነ ሥርዐት ላይ የተሳተፉ ምዕመናን ቁጥር 1 ሚሊዮን 707 ሺሕ 301 ነበር፡፡ ከዚህ አሐዝ ከኢትዮጵያ የተጓዙ ምዕመናን ቁጥር 5 ሺሕ 613 ነበር፡፡ ኢትዮጵያ በ2017 ለሥነ ሥርዐቱ የላከቻቸው ምዕመናን ቁጥር 6 ሺሕ ነበር፡፡ (ሚንበር ቲቪ)

ኸበር ደርሷል! https://youtu.be/Mxzw9VFb2rs