រដ្ឋបាលខេត្តកំពង់ចាម

មន្ត្រីជំនាញជលផលកំពង់ចាម រុះរើ និងបំផ្លាញចោលនូវឧបករណ៍ខុសច្បាប់ ក្នុងឱកាសចុះបង្រ្កាបបទល្មើស ១ករណី នៅភូមិសាស្ត្រស្រុកកងមាស មន្ត្រីជំនាញាខណ្ឌរដ្ឋបាល ជលផល ខេត្តកំពង់ចាម ចុះប្រតិបត្តិការត្រួតពិនិត្យ និងបង្រ្កាបបទល្មើសជលផល នៅចំណុចបឹងវាលលេង ឃុំសូរគង ស្រុកកងមាស ខេត្តកំពង់ចាម។ នៅថ្ងៃទី២២ ខែមិថុនា ឆ្នាំ២០២៦ នេះ ខណ្ឌរដ្ឋបាល ជលផលកំពង់ចាម សហការជាមួយ អធិការដ្ឋានរដ្ឋបាលជលផលមេគង្គ អាជ្ញាធរស្រុកកងមាស កងរាជអាវុធហត្ថស្រុកកងមាស និងអធិការដ្ឋាននគរបាលស្រុកកងមាស ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល ០១ករណី នៅចំណុចបឹងវាលលេង ឃុំសូរគង ស្រុកកងមាស ខេត្តកំពង់ចាម។ បើតាមមន្ត្រីជំនាញជលផល ឲ្យដឹងថា ការចុះត្រួតពិនិត្យ និងបង្រ្កាបបទល្មើស នៅក្នុងភូមិសាស្រ្តខាងលើ ក្រុមការងារជំនាញ បានរុះរើ និងបំផ្លាញចោលនូវឧបករណ៍ខុសច្បាប់ នៅនឹងកន្លែងផ្ទាល់ រួមមាន៖ ឧបករណ៍លូស្បៃមុងចំនួន ១២មាត់ របាំងស្បៃមុងប្រវែង ១៧០ម៉ែត្រ បង្គោលចំនួន ១១០ដើម និងបានចាក់លែងកូនត្រីចម្រុះទម្ងន់ ០៤គីឡូក្រាម ចូលក្នុងបឹងធម្មជាតិវិញ ផងដែរ ៕

អភិបាលខេត្តកំពង់ចាម ណែនាំឱ្យបន្តយុទ្ធនាការបោសសម្អាតបទល្មើស អនឡាញស្គែម និងពង្រឹងការគ្រប់គ្រងអាជីវកម្មសាច់បង្កកនាំចូល កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានណែនាំ ដល់មន្ត្រីពាក់ព័ន្ធ ឱ្យបន្តយុទ្ធនាការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (អនឡាញស្គែម) និងពង្រឹងការគ្រប់គ្រងអាជីវកម្មសាច់បង្កកនាំចូលដោយខុសច្បាប់ ថ្លែងបែបនេះក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពង់ចាម នាព្រឹកថ្ងៃទី២២ ខែមិថុនា ឆ្នាំ២០២៦។ ថ្លែងក្នុងកិច្ចប្រជុំនោះដែរ ឯកឧត្តមអភិបាលខេត្ត បានណែនាំដល់រដ្ឋបាលក្រុង-ស្រុក ទាំងអស់ ត្រូវពង្រឹងការគ្រប់គ្រងអាជីវកម្មសាច់បង្កកនាំចូលដោយខុសច្បាប់ និងទំនិញ ក្លែងក្លាយ ពោលគឺត្រូវមានកិច្ចសហការយ៉ាងជិតស្និទ្ធ ពីសមត្ថកិច្ចពាក់ព័ន្ធ វិស័យឯកជន និងប្រជាពលរដ្ឋ ដើម្បីទប់ស្កាត់បទល្មើស និងការពារសុខុមាលភាពសាធារណៈ។ ឯកឧត្តម អ៊ុន ចាន់ដា បានណែនាំដល់រដ្ឋបាលក្រុង-ស្រុក ត្រូវបង្កើតបណ្តាញនៅតាមមូលដ្ឋាន ដើម្បីធ្វើការបោសសម្អាតបទល្មើសនានា ជាពិសេសបទល្មើសឆបោកតាម ប្រព័ន្ធបច្ចេកវិទ្យា (អនឡាញស្គែម) ឱ្យមានប្រសិទ្ធភាព ពោលគឺត្រូវបង្កើតបណ្តាញ ស៊ើបការណ៍សម្ងាត់នៅតាមមូលដ្ឋាន ដោយសហការជាមួយមេភូមិ ម្ចាស់ផ្ទះជួល ឬ ប្រជាពលរដ្ឋ ដើម្បីរាយការណ៍ជាបន្ទាន់នូវរាល់ទីតាំងសង្ស័យ​។ ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានសង្កត់ធ្ងន់ថា គ្រប់ ព័ត៌មានពាក់ព័ន្ធនឹងបទល្មើសទាំងអស់​ ដែលទទួលបានពីបណ្តាញរាយការណ៍ គឺត្រូវចុះធ្វើការបង្ក្រាបភ្លាមៗ ប៉ុន្តែត្រូវកំណត់គោលដៅឱ្យបានច្បាស់លាស់ មុនពេលចុះប្រតិបត្តិការ ចៀសវាងការ ប៉ះពាល់ និងការរំខានដល់សុខុមាលភាព ឬសិទ្ធិរបស់ប្រជាពលរដ្ឋផងដែរ៕

ថ្ងៃអាទិត្យ ៧កើត ខែបឋមាសាឍ ឆ្នាំមមី ព.ស.២៥៧០ ត្រូវថ្ងៃទី២១ ខែមិថុនា ឆ្នាំ២០២៦ លោក ថេង ឆេងលីម ប្រធានក្រុមការងារចុះមូលដ្ឋានឃុំព្រែកកក បានដឹកនាំ សមាជិកា ក្រុមការងារថ្នាក់ខេត្តនិងក្រុមការងារថ្នាក់មូលដ្ឋាន ឃុំ,ភូមិ,យុវជនឃុំចុះជួបសំណេះសំណាលសាកសួរសុខទុក្ខសមាជិកគ្រួសារបក្សតាមខ្នងផ្ទះ ដែលជួបការលំបាកចំនួន១៥គ្រួសារ ស្ថិតនៅ ភូមិ៣៥ ចំនួន៥គ្រួសារ ,ភូមិ៥៦ ចំនួន៥គ្រួសារ,ភូមិ៧០ ចំនួន៥គ្រួសារ ហេីយបាននាំយកសម្ភារ:និងថវិកាដែលជាអំណោយរបស់ ឯកឧត្តម ហ៊ុន ម៉ានិត ប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកស្ទឹងត្រង់ និងលោកជំទាវ ចែកជូនដោយទទួលបាន : អំពូលសូឡា១០គ្រឿងឧបត្ថម្ភជូនដល់ភូមិ៧០សម្រាប់ដាក់បំភ្លឺតាមដងផ្លូវក្នុងភូមិចំណាយថវិកាចំនួន៦,០០០,០០០រៀលនិងបានឧបត្ថម្ភថវិកា១,១០០,០០០រៀលសម្រាប់ជួសជុលដាក់លូតាមផ្លូវនៅភូមិ៥៦។ -ចំណាយថវិកាសរុបទាំងអស់ចំនួន១០,៧៥០,០០០រៀល ក្នុងនោះថវិកាឯកឧត្តមហ៊ុន ម៉ានិតចំនួន៤,០០០,០០០រៀលនិងថវិការបស់ក្រុមការងារថ្នាក់ខេត្ចំនួន ៦,៧៥០,០០០រៀល។

អភិបាលខេត្តកំពង់ចាម អញ្ជើញចូលរួមកម្មវិធីបុណ្យខួបគម្រប់ ៣ឆ្នាំ និង ១៣ឆ្នាំ របស់ប្រជាពលរដ្ឋ នៅឃុំល្វេ ស្រុកកោះសូទិន សុខទុក្ខរបស់ប្រជាពលរដ្ឋ គឺជាសុខទុក្ខរបស់ថ្នាក់ដឹកនាំ និងមន្ត្រីគ្រប់រូប! សារបែបនេះ ត្រូវបាន ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម តែងតែតាស់តឿនក្រើនរំលឹកជារឿយៗ ជូនទៅដល់មន្ត្រីក្រោមឱវាទ ឱ្យខិតខំយកចិត្តទុកបម្រើប្រជាពលរដ្ឋឱ្យបានល្អប្រសើរ។ ជាក់ស្តែង នៅរសៀលថ្ងៃអាទិត្យ ទី២១ ខែមិថុនា ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម រួមដំណើរដោយ អភិបាលរងខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ បានអញ្ជើញចូលរួមក្នុងកម្មវិធីបុណ្យទក្ខិណានុប្បទានខួបគម្រប់ ៣ឆ្នាំ និង ១៣ឆ្នាំ ដើម្បីឧទ្ទិសកុសលផលបុណ្យ ជូនដួងវិញ្ញាណក្ខន្ធបាសក ទ្រី វន់ ឧបាសិកា ហ៊ាន ស៊ីលាភ និងទាយក ទ្រី ស៊ីមហ៊ុន ដែលជាប្រជាពលរដ្ឋ នៅភូមិព្រែកគល់ ឃុំល្វេ ស្រុកកោះសូទិន។ នាឱកាសនោះ ឯកឧត្តមអភិបាលខេត្ត និងសហការី បានអញ្ជើញចូលចាប់មគ្គផលប្រកបសទ្ធាជ្រះថ្លា បង្កប់នូវមនោសញ្ចេតនាដ៏ជ្រាលជ្រៅ និងកក់ក្តៅ ជូនចំពោះម្ចាស់កម្មវិធីបុណ្យ និងបានឧទ្ទិសបួងសួងសូមឲ្យវិញ្ញាណក្ខន្ធអ្នកទាំង៣ ខាងលើ បានទៅសោយសុខក្នុងសុគតិភពកុំបីឃ្លៀងឃ្លាតឡើយ។ 🙏🙏🙏

មានផ្លូវមានក្តីសង្ឃឹម

ឯកឧត្តម អ៊ុន ចាន់ដា អញ្ជើញចូលរួមកម្មវិធីចម្រើនព្រះបរិត្ត បង្សុកូល ឧទ្ទិសមគ្គផល ជូនដល់វីរៈយុទ្ធជនស្នេហាជាតិ នៅតំបន់យោធាប្រវត្តិសាស្ត្រតេជោកោះថ្មX16 (កោះថ្មX16) នៅព្រឹកថ្ងៃអាទិត្យ ទី២១ ខែមិថុនា ឆ្នាំ២០២៦ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាសមាជិកគណៈអចិន្ត្រៃយ៍ស ស.យ.ក ថ្នាក់កណ្ដាល បានអញ្ជើញចូលរួមក្នុងកម្មវិធីចម្រើនព្រះបរិត្ត បង្សុកូល ឧទ្ទិសមគ្គផល ជូនដល់វីរៈយុទ្ធជនស្នេហាជាតិ នៅតំបន់យោធាប្រវត្តិសាស្ត្រតេជោកោះថ្មX16 ក្នុងពិធីយុទ្ធដំណើរដោយថ្មើរជើង10Km មកកាន់តំបន់យោធាប្រវត្តិសាស្តតេជោកោះថ្ម X16 ដើម្បីអបអរសាទរ ខួបលើកទី៤៩ ទិវានៃការចងចាំដំណើរឆ្ពោះទៅការផ្ដួលរំលំរបបប្រល័យពូជសាសន៍ ប៉ុល ពត “២០ មិថុនា ១៩៧៧-២០ មិថុនា ២០២៦” ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា។ គួររំលឹកថា ការប្រារព្ធទិវានេះឡើង គឺក្នុងស្មារតី បញ្ជាក់ពីការចងចាំជានិច្ចនូវគុណូបការៈដ៏ឧត្តុង្គឧត្តម ចំពោះវីរភាពដ៏អង់អាចក្លាហានរបស់សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ព្រមទាំងវីរកម្មាភិបាល វីរយុទ្ធជន យុទ្ធនារី ប្រជាជន និងអ្នកស្នេហាជាតិដែលបានធ្វើមហាពលីកម្មបូជាសាច់ស្រស់ ឈាមស្រស់ ក្នុងសមរភូមិ ដើម្បីរំដោះមាតុភូមិពីកណ្ដាប់ដៃនៃរបបប៉ុល ពត និងបានជួយសង្គ្រោះជីវិតបងប្អូនប្រជាជន និងសង្គមជាតិឱ្យរស់ឡើងវិញ និងរីកចម្រើនរហូតដល់សព្វថ្ងៃនេះ។ ក្នុងឱកាសនោះដែរ ឯកឧត្តមអភិបាលខេត្ត សូមរំលឹកនឹកគុណចំពោះវិញ្ញាណក្ខន្ធវីរយុទ្ធជន វីរយុទ្ធនារីកម្ពុជា អ្នកស្នេហាជាតិគ្រប់រូប គ្រប់ជំនាន់ដែលបានបូជាជីវិត ដើម្បីបុព្វហេតុជាតិមាតុភូមិ និងបុព្វហេតុនៃការរស់រានមានជីវិតឡើងវិញរបស់ប្រទេសជាតិ និងប្រជាជនកម្ពុជា តាមរយៈចលនាតស៊ូទាំងអស់ និងការបំពេញភារកិច្ចគ្រប់បែបយ៉ាង ឆ្លងកាត់គ្រប់ដំណាក់កាលជាប្រវត្តិសាស្ត្រ រហូតសម្រេចបាននូវសមិទ្ធផលធំៗជាច្រើនជូនប្រទេសជាតិ និងបានចូលរួមខឿនការពារជាតិ ថែរក្សាសុខសន្តិភាព បូរណភាពទឹកដី អធិបតេយ្យ ឯករាជ្យជាតិ និងការអភិវឌ្ឍលើគ្រប់វិស័យ និងសូមឱ្យវិញ្ញាណក្ខន្ធអស់លោកបានទៅសោយសុខក្នុងឋានសុគតិភព កុំបីឃ្លៀងងឃ្លាតឡើយ៕

នារាត្រីថ្ងៃទី២០ ខែមិថុនា ឆ្នាំ២០២៦ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាសមាជិកគណៈអចិន្ត្រៃយ៍ស.ស.យ.ក ថ្នាក់កណ្ដាល បានអញ្ជើញចូលរួមក្នុងពិធីបោះជំរុំ និងទស្សនាកម្រងឯកសារប្រវត្តិសាស្ត្រប្រវត្តនៃការតស៊ូរំដោះជាតិមាតុភូមិរបស់សម្តេចអគ្គមហាសេនាបតីតេជោ ហ៊ុន សែន និងយុទ្ធមិត្តក្នុងបុព្វហេតុរំដោះជាតិមាតុភូមិ ចេញពីរបបប្រល័យពូជសាសន៍ ប៉ុល ពត ២០ មិថុនា ឆ្នាំ១៩៧៧ នៅតំបន់យោធាប្រវត្តិសាស្ត្រ តេជោ-កោះថ្មX16 ក្រោមវត្តមាន ឯកឧត្តម ឧបនាយករដ្ឋមន្ត្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា។

លោក ហេង វុទ្ធី អញ្ជើញចុះពិនិត្យដោយផ្ទាល់ដល់មូលដ្ឋាន ហើយបានជួយឧបត្ថម្ភ និងដោះស្រាយ រាល់សំណូមពរជាច្រើន ជូនបងប្អូនប្រជាពលរដ្ឋដែលជួបទុក្ខលំបាក