Bugun.uz | Расмий канал

Ўзбекистонда ўқитувчилар, мактаблар ва олий таълим учун қатор янги имтиёз ва тартиблар жорий этилади Шавкат Мирзиёев Ўқитувчи ва мураббийлар куни арафасида «Янги Ўзбекистон» университетида педагоглар билан учрашиб, таълим тизимидаги қатор янги чора-тадбирларни эълон қилди. Асосий янгиликлар: — Синфда 25 нафардан ортиқ ўқувчи бўлса, математика, физика, кимё ва биология фанлари икки гуруҳга бўлиб ўқитилади. — Миллий сертификатга эга ушбу фанлар ўқитувчиларига 50 фоиз устама, ҳар бир туман ва шаҳардаги етакчи ўқитувчиларга эса 30 млн сўмдан мукофот берилади. Ҳар йили 1 минг ўқитувчи хорижда малака оширади. — Камида 15 йиллик стажга эга педагогларнинг фарзандларига ОТМ контракти учун фоизсиз кредит ажратилади. Миллий ва халқаро сертификат олиш учун имтиҳон харажатлари тўлиқ қопланади. — 2027 йилдан 4-синф ўқувчилари ўртасида олимпиадалар ўтказилади. Туман босқичи ғолиби компьютер, уни тайёрлаган ўқитувчи эса босқичга қараб 10 млндан 100 млн сўмгача мукофот олади. — Янги ўқув йилидан 100 та мактабнинг биттадан синфида математика, информатика ва табиий фанлар тўлиқ инглиз тилида ўқитилади. Лойиҳадаги педагогларга 100 фоиз устама тўланади. — Ўқитувчиларнинг малака ошириш учун пойтахт ёки вилоят марказида бир ойлик мажбурий курсда ўқиш талаби бекор қилинади. Ўрнига касбий ривожланиш ваучерлари берилиб, педагог курс ва ўқиш жойини ўзи танлайди. — Мактабларда «сифат индекси» жорий қилиниб, улар педагоглар салоҳияти ва ўқувчилар натижаларига қараб тоифаларга ажратилади. Илғор мактаб бошқа мактабни юқори тоифага олиб чиқса, унинг педагогларига 30 фоиз устама берилади. — Ўқувчи юкламаси юқори 52 та туманда хусусий мактаб очиш учун 7 йиллик 10 фоизли кредит ва харажатларнинг 15 фоизигача, аммо кўпи билан 1,5 млрд сўм субсидия ажратилади. Бўш давлат бинолари хусусий мактабларга 10 йилга бепул ижарага берилади. — Фарзанди хусусий мактабда ўқийдиган ота-оналар учун солиқ солинмайдиган даромад чегараси 3 млндан 6 млн сўмга оширилади. — 2027 йил 1 январдан 2–3 ёшли фарзандини оилавий боғчага берган ишловчи оналарнинг бадал пули бюджетдан қопланади. Келаси ўқув йилидан боғча тарбиячилари учун олий таълим муддати 4 йилдан 3 йилга қисқартирилади. — Келаси йилдан халқаро касб сертификатига эга техникум усталарига 50 фоиз устама берилади. Хусусий техникумларнинг устувор соҳаларда таҳсил олаётган ўқувчиларининг 50 фоизига давлат гранти ажратилади. — Давлат университетлари кузатув кенгашлари аъзоларининг учдан икки қисми хусусий сектор ва хорижий ОТМ вакилларидан шакллантирилади. — Президент олий таълимда дуал тизим бўйича қарор имзолади. 2027 йилдан 75 та ОТМда «корхона — олийгоҳ — мақсадли кадр» тизими ишлайди. Корхона буюртмаси асосида номзод тестсиз, суҳбат орқали қабул қилиниши, ишга олинган талабага тўланган маошнинг ярмини давлат қоплаши белгиланди. 2028 йилдан тизим барча ОТМларда жорий этилади. — Дунёнинг топ-300 университетлари филиалларини Ўзбекистонда очиш рағбатлантирилади. Бундай лойиҳаларда лаборатория, жиҳоз ва бренд учун харажатларнинг 50 фоизигача, кампус қуриш харажатларининг эса 30 фоизигача қисми қопланади. Шунингдек, Абдулла Авлоний номида алоҳида давлат мукофотини таъсис этиш таклиф қилинди. Унинг дастлабки соҳибларини келаси йил Ўқитувчи ва мураббийлар куни арафасида тақдирлаш режалаштирилмоқда.

Шавкат Мирзиёев шахмат олимпиадаси чемпионларини тақдирлади Президент Шавкат Мирзиёев Самарқандда ўтказилган 46-Бутунжаҳон шахмат олимпиадасида чемпион бўлган Ўзбекистон эркаклар терма жамоаси аъзоларини давлат мукофотлари билан тақдирлади. Хусусан, Муҳиддин Мадаминовга «Ўзбекистон ифтихори», Нодирбек Абдусатторов, Шамсиддин Воҳидов ва Нодирбек Ёқуббоевга «Ўзбекистон Республикасида хизмат кўрсатган спортчи» фахрий унвони берилди. Жавоҳир Синдоров «Фидокорона хизматлари учун», Жаҳонгир Воҳидов «Мардлик» ордени, Абдималик Абдисалимов эса «Келажак бунёдкори» медали билан тақдирланди. Бош мураббий Рустам Қосимжоновга «Ўзбекистон Республикасида хизмат кўрсатган спорт устози» фахрий унвони берилди. Олимпиада чемпионларига белгиланган тартибга кўра, ҳар бирига 200 минг АҚШ долларидан пул мукофоти берилади. Бу миқдор 21 сентябрда қабул қилинган президент қарори билан белгиланган. Шавкат Мирзиёев айни вақтда шахмат олимпиадаси чемпионларини тақдирламоқда. Чемпионларнинг ҳар бирига Президент совғаси сифатида Volkswagen автомобили ва коттеж, шунингдек, 200 минг доллар пул мукофоти берилмоқда.

Ўзбекистоннинг 9 та вилоятида сел-сув тошқини хавфи эълон қилинди Ўзгидромет маълумотига кўра, 30 сентябрь — 2 октябрь кунлари кутилаётган ёмғирлар сабаб Қашқадарё, Сурхондарё, Самарқанд, Навоий, Жиззах, Тошкент, Наманган, Фарғона ва Андижон вилоятларининг тоғолди ва тоғли ҳудудларида сел-сув тошқинлари юз бериши мумкин. Шунингдек, республика айрим ҳудудларида ёмғир сувлари тўпланиб, ҳудудларни сув босиши эҳтимоли бор. Ўзгидромет тоғолди ва тоғли ҳудудларда яшовчилар, дам олувчилар ҳамда ҳайдовчиларни эҳтиёт чораларини кўришга чақирди.

Ўзбекистонда пенсия тайинлаш ва тўлаш тартиби босқичма-босқич ўзгаради Президентнинг 28 сентябрдаги қарори билан пенсия таъминоти хизматларини рақамлаштириш ва 2027 йил 1 январгача уларни тўлиқ интерактив ҳамда проактив шаклга ўтказиш белгиланди. 2026 йил 1 ноябрдан бошқа ишлар ҳажми қисқариши ёки корхона тугатилиши муносабати билан ишсиз деб эътироф этилган шахсларга белгиланган пенсия ёшидан икки йил олдин ёшга доир пенсия, 2027 йил 1 январдан эса боқувчисини йўқотганлик пенсияси фуқаронинг алоҳида мурожаатисиз тайинланади. 2027 йил 1 январдан Пенсия жамғармасининг фуқаролардан қоғоз шаклидаги ҳужжат ва маълумотларни қабул қилиш амалиёти бекор қилинади. Шу санадан «Менинг пенсиям» онлайн хизмати ишга туширилиб, унда пенсия ҳисоблашда инобатга олинадиган иш стажи ҳақида маълумот олиш, пенсия миқдорини аниқлаш ва пенсия ёши яқинлашаётгани ҳақида олдиндан хабар олиш мумкин бўлади. Шунингдек, 2026 йил 1 ноябрдан пенсионерларга банк картасини очиш билан боғлиқ хизматларни Face-ID орқали амалга ошириш тартиби жорий этилади.

Ғузорда 22 нафар мактаб ўқувчисида заҳарланди 23 сентябрь куни Ғузор туманидаги 51-мактаб ўқувчилари кўнгил айниши ва бош оғриғи каби аломатлар билан тиббиёт муассасасига олиб борилган. Дастлабки маълумотларга кўра, ўша куни мактаб атрофидаги пахта майдонларига пахтанинг эрта етилишини таъминлаш мақсадида «Агро Аугрон» препарати сепилган. Шундан сўнг 10–11-синфларнинг 22 нафар ўқувчисида ҳаво орқали заҳарланиш аломатлари кузатилган. Ҳозирда 7 нафар ўқувчи стационарда даволанмоқда, 15 нафари аҳволи яхшилангач уйига жавоб берилган. Ҳолат юзасидан Жиноят кодексининг 201-моддаси 1-қисми билан жиноят иши қўзғатилган. Экспертизалар тайинланиб, дастлабки тергов олиб борилмоқда.

❗️Кўп квартирали уйни рухсатномасиз қурганлик учун 5 йилгача озодликдан маҳрум қилиш жазоси белгиланди Янги қонун билан кўп квартирали уйларни рухсатномасиз қуриш учун жавобгарлик кучайтирилди. Унга кўра, қурилиш-монтаж ишларини бошлаш учун қурилиш ва уй-жой коммунал хўжалиги соҳасидаги ҳудудий назорат инспекцияларидан рухсатнома олиш талаб этилади. Кўп квартирали уйни рухсатномасиз қуриш, агар бундай ҳаракат учун аввал маъмурий жазо қўлланилган бўлса, 3 йилдан 5 йилгача озодликдан маҳрум қилиш билан жазоланади. Шунингдек, шаҳарсозлик тўғрисидаги қонунчиликни бузиш одам ўлими ёки бошқа оғир оқибатларга сабаб бўлса, 5 йилдан 7 йилгача озодликдан маҳрум қилиш жазоси белгиланган. Қонун расмий эълон қилинганидан уч ой ўтгач кучга киради.

АҚШ давлат котиби Марко Рубио ва 100 дан ортиқ компания вакиллари Самарқандга келади АҚШ давлат котиби Марко Рубио октябрь ойи ўрталарида Самарқандга ташриф буюриши кутилмоқда. У билан бирга 100 дан ортиқ Америка компанияларининг вакилларидан иборат ишбилармонлар делегацияси ҳам келиши режалаштирилган. Ташриф доирасида Самарқандда Марказий Осиёнинг беш давлати ва АҚШ ташқи ишлар вазирлари иштирокида C5+1 форматида учрашув ўтказилиши кутилмоқда. Маълумот учун, C5+1 формати 2015 йилда айнан Самарқандда Марказий Осиё давлатлари ва АҚШ ташқи ишлар вазирларининг учрашувида йўлга қўйилган.

Шавкат Мирзиёев Қозоғистонда ҳарбий хизматчиларнинг ҳалок бўлиши муносабати билан ҳамдардлик билдирди Президент Шавкат Мирзиёев Каспий денгизидаги ҳарбий машғулотлар вақтида ҳарбий хизматчилар ҳалок бўлиши муносабати билан Қозоғистон президенти Қосим-Жомарт Тоқаев ва Қозоғистон халқига ҳамдардлик билдирди. 24 сентябрь куни Манғистау вилоятида Қозоғистон Ҳарбий-денгиз кучлари машғулоти пайтида об-ҳаво кескин ёмонлашиб, кучли шамол ҳарбий хизматчиларни денгизга олиб кетган. Сўнгги маълумотларга кўра, сувга 17 нафар ҳарбий тушиб кетган, уч нафари қутқарилган. Дастлаб 12 нафар ҳарбий ҳалок бўлгани, яна икки нафари қидирилаётгани хабар қилинган. 25 сентябрь куни эрталаб яна икки ҳарбийнинг жасади топилиб, қурбонлар сони 14 нафарга етган. Фожиа муносабати билан Қозоғистонда 25 сентябрь умуммиллий мотам куни деб эълон қилинган. Шавкат Мирзиёев ҳалок бўлганларнинг оила аъзолари ва яқинларига сабр-тоқат ва бардамлик тилади.

Тошкентда ёмғир ёғиши мумкин Ўзгидромет маълумотига кўра, 25 сентябрь куни Ўзбекистоннинг катта қисмида ёғингарчилик кутилмайди. Фарғона водийси ва куннинг иккинчи ярмида Тошкент вилоятининг айрим жойларида қисқа муддатли ёмғир ёғиб, момақалдироқ бўлиши мумкин. Ҳаво ҳарорати республика бўйича +25…+30 даража атрофида бўлади. Тошкент шаҳрида ҳам куннинг иккинчи ярмида қисқа муддатли ёмғир ва момақалдироқ эҳтимоли бор. Ҳарорат +26…+28 даражани ташкил этади. Тоғолди ва тоғли ҳудудларда ёмғир ва момақалдироқ, баланд тоғларда эса қор ёғиши мумкин.

Лавозимидан озод этилиб, сўнг қамоққа олинган Бекмурод Абдуллаев Чилонзор тумани ИИО ФМБ бошлиғи этиб тайинланди Кеча, 24 сентябрь куни генерал-майор Бекмурод Абдуллаев Чилонзор тумани ИИО ФМБ бошлиғи этиб тайинлангани маълум бўлди. Сўнгги бир йил ичида Бекмурод Абдуллаев билан боғлиқ воқеалар қуйидагича ривожланган: ▪️2025 йилнинг 3 ноябрида Абдуллаев ички ишлар вазири ўринбосари — Жамоат хавфсизлиги департаменти бошлиғи лавозимидан озод этилди. ▪️2026 йилнинг январь ойида унга нисбатан жиноят иши қўзғатилиб, эҳтиёт чораси сифатида Абдуллаев қамоққа олинди. ▪️27 январда Шавкат Мирзиёев иштирокидаги видеоселекторда ИИВ тизимидаги давлат харидларида 186 млрд сўм бюджет маблағи ўзлаштирилгани аниқлангани, ҳолат юзасидан Бекмурод Абдуллаев ва Жазони ижро этиш департаменти собиқ раҳбари Рустам Турсуновга нисбатан жиноят иши қўзғатилгани маълум қилинди. ▪️Kun.uz маълумотига кўра, апрель ойида Абдуллаев етказилган 200 млрд сўмдан ортиқ зарарни нақд пулда тўлаб берганидан сўнг, унга нисбатан қамоқ эҳтиёт чораси гаровга ўзгартирилиб, у озодликка чиқарилди. ▪️Июль ойида иш судга оширилди. Абдуллаевга Жиноят кодексининг ўзлаштириш ёки растрата йўли билан талон-торож қилишга оид моддалари бўйича айблов эълон қилинди. Ушбу жиноят ишида Абдуллаев билан бирга жами 30 нафар шахсга айб қўйилди. ▪️29 июлда Тошкент шаҳар судлари иш ёпиқ суд мажлисида кўрилишини, жараён якунлари бўйича қўшимча ахборот берилишини маълум қилганди. ▪️ Сентябрь ойида ижтимоий тармоқларда Абдуллаевнинг суд ҳукми билан тўлиқ оқлангани, айбловлар бекор қилиниб, аввал махсус ҳисоб-рақамга киритилган 200 млрд сўмни қайтариш белгилангани ҳақида хабарлар тарқалди. Бироқ, Platforma маълумотига кўра, бу хабарлар «ёлғон» деган иддао билан ўчиртирилган. Маълумот учун, очиқ манбаларда суднинг якуний ҳукми хали ҳам эълон қилинмаган. 24 сентябрда Абдуллаев яна ИИВ тизимида раҳбарлик лавозимига қайтиб, Чилонзор тумани ИИО ФМБ бошлиғи этиб тайинланди. Яъни, бир йилга етмаган вақт ичида Абдуллаев лавозимдан озод этилиб, қамоққа олинди, 200 млрд сўмдан ортиқ пул тўланганидан кейин озодликка чиқарилиб, иши ёпиқ судда кўриб чиқилиб, яна ички ишлар тизимида раҳбарлик лавозимига қайтди.

Сирдарёдаги янги ИЭСда авария юз бериб, айрим ҳудудларда электр таъминоти узилди Бугун, 25 сентябрь, соат 05:05 да Сирдарё вилоятидаги янги иссиқлик электр станциясида 1600 МВт қувватга эга энергоблоклар фавқулодда ўчди. Бунинг оқибатида фавқулодда ҳолатлардан ҳимоялаш тизими ишлаб, республиканинг айрим ҳудудларида электр таъминоти вақтинча узилди. Узилишлар асосан аҳолига ва қишлоқ хўжалигидаги сув насосларига таъсир қилган. Айни пайтда янги станцияда созлаш ва текшириш ишлари олиб борилмоқда. Энергетика вазирлигига кўра, ҳозирда электр таъминотидан узилган барча истеъмолчилар тармоққа қайта уланган. Таъминотни тиклаш учун электр станциялари ва энергия сақлаш тизимларидаги захира ишга туширилган.

Сирдарёдаги янги ИЭСда авария юз бериб, айрим ҳудудларда электр таъминоти узилди Бугун, 25 сентябрь, соат 05:05 да Сирдарё вилоятидаги янги иссиқлик электр станциясида 1600 МВт қувват фавқулодда ўчди. Бунинг оқибатида фавқулодда ҳолатлардан ҳимоялаш тизими ишлаб, республиканинг айрим ҳудудларида электр таъминоти вақтинча узилди. Узилишлар асосан аҳолига ва қишлоқ хўжалигидаги сув насосларига таъсир қилган. Айни пайтда янги станцияда созлаш ва текшириш ишлари олиб борилмоқда. Энергетика вазирлигига кўра, ҳозирда электр таъминотидан узилган барча истеъмолчилар тармоққа қайта уланган. Таъминотни тиклаш учун электр станциялари ва энергия сақлаш тизимларидаги захира қувватлар ишга туширилган.

Саида Мирзиёева BlackRock раҳбарияти билан Тошкент халқаро молия марказини ишга туширишни муҳокама қилди Президент Администрацияси раҳбари ва Тошкент халқаро молия маркази бошқарувчиси Саида Мирзиёева Нью-Йоркда BlackRock раҳбарияти билан учрашди. Учрашувда 2027 йилда Тошкент халқаро молия марказини ишга тушириш масаласи муҳокама қилинган. Мирзиёевага кўра, BlackRock марказнинг концепцияси ва тузилмасини ишлаб чиқишда кўмаклашмоқда. Шунингдек, АҚШ ишбилармон доиралари вакиллари иштирокидаги давра суҳбатида Ўзбекистон ва Марказий Осиёнинг келгуси ўн йилликлардаги ривожланиш истиқболлари муҳокама қилинган. Маълумот учун, Тошкент халқаро молия марказини 2027 йилда ишга тушириш режалаштирилган. Марказ махсус ҳуқуқий режим асосида фаолият юритади. BlackRock билан ҳамкорлик аввал ҳам бир қатор йўналишларда муҳокама қилинган. Июль ойида президент Шавкат Мирзиёев компания билан хусусийлаштириш, молия бозорини ривожлантириш, нефть-кимё ва сунъий интеллектга инвестициялар масалаларини кўриб чиққан эди.

Тошкентда TAF!26 реклама ва маркетинг фестивали бўлиб ўтади 10 октябрь куни Hyatt Regency Tashkent меҳмонхонасида TAF!26 — Тошкент реклама фестивали бўлиб ўтади. Тадбир дастуридан маркетинг, реклама ва креатив соҳалари бўйича 60 дан ортиқ эксперт иштирокида 7 та секция, амалий кейслар ва профессионал муҳокамалар ўрин олган. Фестиваль учун чипталарни 30 сентябргача TAF30 промокоди билан 30 фоиз чегирмада — 420 минг сўмга харид қилиш мумкин. 👉 Спикерлар ва дастур билан фестиваль сайтида танишиш мумкин — taf26.marketing.uz/uz/

Фуқароларга ҳокимликларнинг норматив ҳужжатлари устидан судга шикоят қилиш ҳуқуқи берилиши мумкин Президент Шавкат Мирзиёев маъмурий одил судловни ислоҳ қилиш бўйича таклифлар билан танишди. Таклифга кўра, фуқаролар маҳаллий ҳокимликларнинг норматив-ҳуқуқий ҳужжатлари уларнинг ҳуқуқларини бузган тақдирда, бевосита маъмурий судга шикоят қилиши мумкин бўлади. Амалда бундай имконият мавжуд эмас. Шунингдек, давлат органи қонунбузилишга йўл қўйганини тан олиш талаби билан судга муддатсиз мурожаат қилиш имкониятини яратиш таклиф этилди. Ҳозир маъмурий судга мурожаат қилиш учун умумий олти ойлик муддат белгиланган. Суд қарорини бажармаган мансабдор жаримага тортилганидан кейин ҳам қарорни такроран бажармаса, суд қонуний чора кўриш учун прокурорга хабар бериши назарда тутилмоқда. Президент таклифларни қўллаб-қувватлади.

Мудофаа вазирига икки нафар ўринбосар тайинланди Қаҳрамонжон Зоидов мудофаа вазирининг қуролланиш ва қуроллантириш бўйича ўринбосари этиб тайинланди. Адлия полковниги Жаҳонгир Муратов эса мудофаа вазирининг комплаенс ва коррупцияга қарши ички назорат бўйича ўринбосари лавозимига тайинланди.

Шавкат Мирзиёев Сердар Бердимуҳамедовни туғилган куни билан табриклади Президент Шавкат Мирзиёев 22 сентябрь куни Туркманистон президенти Сердар Бердимуҳамедов билан телефон орқали мулоқот қилди. Давлат раҳбари Сердар Бердимуҳамедовни туғилган куни билан табриклади. Суҳбатда Ўзбекистон ва Туркманистон ўртасидаги савдо, энергетика ва транспорт соҳаларидаги ҳамкорлик, шунингдек, «Шовот — Тошҳовуз» қўшма савдо зонаси фаолияти муҳокама қилинди. Томонлар Марказий Осиё ва Озарбайжон давлат раҳбарларининг навбатдаги Маслаҳат учрашуви ҳамда Туркманистонда ўтказиладиган МДҲ саммитига тайёргарлик масалалари юзасидан ҳам фикр алмашди.

Ўзбекистондаги Ислом цивилизацияси маркази Испанияда олтин мукофот олди Ўзбекистондаги Ислом цивилизацияси марказининг Бен Кингсли иштирокидаги «Маърифат акс-садоси» фильми Испанияда ўтказилган Terres Travel Festival 2026 фестивалида олтин мукофотга сазовор бўлди. 40 дан ортиқ мамлакат лойиҳалари қатнашган фестивалда фильм «Туристик хизмат» номинациясида ғолиб бўлган. «Маърифат акс-садоси» 2026 йилда New York Festivals ва Канн корпоратив медиа ва телевидение фестивали финалига ҳам чиққан, Белграддаги SILKFEST 26 фестивалида эътироф этилган. Фильмда «Оскар» совриндори Бен Кингсли Ўзбекистон олим ва мутафаккирлари ҳамда ислом цивилизациясининг илм-фан ва маданият ривожига қўшган ҳиссаси ҳақида ҳикоя қилади.

Ўзбекистонда маҳаллаларнинг «яшил рейтинги» жорий этилиши мумкин Президент Шавкат Мирзиёев «Яшил макон» лойиҳасини янги босқичга олиб чиқиш бўйича таклифлар билан танишди. Энди кўчат экиш натижасини уларнинг 1, 3 ва 5 йилдан кейинги ҳолатига қараб баҳолаш таклиф қилинмоқда. Шунингдек, маҳаллалар учун «яшил рейтинг» жорий этиш кўриб чиқилди. Унда яшил майдонлар улуши, аҳоли сонига нисбатан дарахтлар сони, янги кўчатларнинг қанчаси тутиб кетгани ва аҳоли иштироки ҳисобга олинади. Юқори натижа кўрсатган маҳаллаларга қўшимча маблағ ва микро-грантлар ажратилиши мумкин. Ҳар бир маҳалла учун кўчат тури, экиладиган жой ва суғориш тизими кўрсатилган «яшил харита» ҳам ишлаб чиқилади. Кўчатларни камида уч йил парваришлаш тизимини йўлга қўйиш режалаштирилган.