Police Academy of Cambodia-PAC

ឯកឧត្តមបណ្ឌិត ទូច វិសាលសុខ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីក្នុងពិធីបិទវគ្គបណ្តុះ បណ្តាលស្តីពី «ការស៊ើបអង្កេតនិងការបង្ការការឆបោកសម្រាប់មន្រ្តីនគរបាល​ជាតិកម្ពុជា» នៅបណ្ឌិត្យសភានគរបាលកម្ពុជា ...................................... នៅរសៀលថ្ងៃសុក្រ ទី១០ ខែកក្កដា ឆ្នាំ២០២៦ ឯកឧត្តមបណ្ឌិត ទូច វិសាលសុខ រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពី «ការស៊ើបអង្កេតនិងការបង្ការការឆបោកសម្រាប់មន្រ្តីនគរបាល​ជាតិកម្ពុជា» នៅបណ្ឌិត្យសភានគរបាលកម្ពុជា ដោយមានការអញ្ជើញចូលរួមពី ឯកឧត្តមនាយឧត្តមសេនីយ៍ សាស្រ្តាចារ្យ ឯក មនោសែន ប្រធានបណ្ឌិត្យសភា លោក សូង ប៊ែសង់ (Mr. SONG BAE SEONG) តំណាងគ្រូឧទ្ទេសនៃអគ្គស្នងការ​ដ្ឋាននគរបាលជាតិកូរ៉េ ថ្នាក់ដឹកនាំ សាស្រ្តាចារ្យ គ្រូនគរបាលជាតិ និងមន្រ្តីនគរបាលជាតិជាច្រើននាក់ ព្រមទាំងសិក្ខាកាម ចំនួន៨០នាក់។ ជាកិច្ចដំបូង ឯកឧត្តមនាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យនគរបាលកម្ពុជា បានថ្លែងសុន្ទរកថាស្វាគមន៍និងរបាយការណ៍សង្ខេបជូន ឯកឧត្តមបណ្ឌិត ប្រធានគណៈអធិបតីនិងអង្គពិធី ជ្រាបថា តាមរយៈកិច្ចសហប្រតិបត្តិកានិងការរគាំទ្រពីអគ្គស្នងការដ្ឋាននគរបាលជាតិកូរ៉េ ក៏ដូចជាស្ថានទូតកូរ៉េប្រចាំកម្ពុជា ជាពិសេស ដោយមានការសម្របសម្រួល ចង្អុលបង្ហាញ និងតម្រង់ទិសពី ឯកឧត្តមបណ្ឌិត ទូច វិសាលសុខ រដ្ឋលេខាធិការទទួលបន្ទុក បណ្ឌិត្យសភាបានសហការរៀបចំបើកវគ្គបណ្តុះបណ្តាលស្តីពី «ការស៊ើបអង្កេតនិងការបង្ការការឆបោកសម្រាប់មន្រ្តីនគរបាល​ជាតិកម្ពុជា» ដែលសិក្សារយៈពេល៥ថ្ងៃ ពីថ្ងៃទី៦-១០ ខែកក្កដា ដើម្បី​ពង្រឹងសមត្ថភាពគ្រូនិងមន្រ្តីនគរបាលជាតិលើជំនាញ រួមមាន ការឆបោកតាមអ៊ីនធើណេត ការក្លែងបន្លំតាមអ៊ីនធើណេត បច្ចេកទេស ស៊ើបអង្កេតនិងការវិភាគស៊ើបការណ៍សម្ងាត់ ការប្រមូលនិងរក្សា​ភស្តុតាងឌីជីថល ការប្រឆាំងនឹងបណ្តាញឆបោកឆ្លងដែន ក្នុងការបង្ការ ទប់ស្កាត់ បង្ក្រាប និងបោស​សម្អាតបទល្មើសឆបោកតាមប្រព័ន្ធបច្ចេកវិទ្យា ដែលបាននិងកំពុងបង្កផលប៉ះពាល់ដល់សន្តិសុខជាតិ សណ្តាប់ធ្នាប់សាធារណៈ និងសេដ្ឋកិច្ចសង្គម។ នានៅថ្ងៃនេះ បណ្ឌិត្យសភាបានសហការរៀបចំពិធីបិទវគ្គបណ្តុះបណ្ដាលដ៏មានសារៈសំខាន់នេះ ក្រោមអធិបតីភាព ឯកឧត្តមបណ្ឌិត ទូច វិសាលសុខ រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ ជាកិច្ចបន្ត ក្នុងនាម ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្នុងនាមឯកឧត្តមបណ្ឌិតផ្ទាល់ ឯកឧត្តមបានថ្លែងអំណរគុណយ៉ាងជ្រាលជ្រៅចំពោះអគ្គស្នងការដ្ឋាននគរបាលជាតិ កូរ៉េ (KNPA) ដែលបានផ្តល់កិច្ចសហប្រតិបត្តិការយ៉ាងជិតស្និទ្ធ ជាមួយបណ្ឌិត្យសភានគរបាលកម្ពុជា ក្នុងការគាំទ្រ ឧបត្ថម្ភ និងរៀបចំវគ្គបណ្តុះបណ្តាលដ៏មានសារៈសំខាន់នេះឡើង និងសូមកោតសរសើរ និងចូលរួមអបអរសាទរចំពោះលទ្ធផលនៃកិច្ចខិតខំប្រឹងប្រែងយ៉ាងសកម្មរបស់ថ្នាក់ដឹកនាំ សាស្ត្រាចារ្យ គ្រូនគរ​បាល​ និងមន្រ្តីនគរបាលជាតិនៃបណ្ឌិត្យសភានគរបាលកម្ពុជា ដែលបានរួមគ្នាបំពេញការងារប្រកប​ដោយស្មារតីទទួលខុសត្រូវ ឆន្ទៈមោះមុត និងការប្ដេជ្ញាចិត្តខ្ពស់ ក្នុងការអប់រំបណ្ដុះបណ្ដាលកងកម្លាំងនគរបាលជាតិ។ ឯកឧត្តមបណ្ឌិត ប្រធានគណៈអធិបតី បានគូសបញ្ជាក់បន្ថែមថា វគ្គបណ្តុះបណ្តាលស្តីពី «ការស៊ើបអង្កេតនិងការបង្ការការឆបោកសម្រាប់មន្ត្រីនគរបាលជាតិកម្ពុជា» នេះ ពិតជាបានផ្តល់នូវចំណេះដឹងនិងជំនាញជាក់ស្តែងបន្ថែមទៀតដល់សិក្ខាកាម លើការស៊ើបអង្កេត​បទល្មើសតាមប្រព័ន្ធបច្ចេកវិទ្យា ការប្រមូល ការដកហូត ការរក្សាទុក និងការវិភាគភស្តុតាងឌីជីថល ការស៊ើបអង្កេតហិរញ្ញវត្ថុ និងការតាមដានប្រតិបត្តិការរូបិយប័ណ្ណគ្រីបតូ ដែលអាចយកទៅអនុវត្តបានក្នុងការស៊ើបអង្កេតឧក្រិដ្ឋកម្មអនឡាញ ដើម្បីឆ្លើយតបទៅនឹងការវិវត្តយ៉ាងឆាប់រហ័សនៃបទល្មើសបច្ចេកវិទ្យា។ លើសពីនេះ វគ្គបណ្តុះបណ្តាលនេះនឹងចូលរួមចំណែកដោះស្រាយបញ្ហាមួយចំនួន ដែលកំពុងប្រឈមក្នុងយុទ្ធនាការបង្ក្រាប ដូចជា ការកំណត់អត្តសញ្ញាណជនល្មើសក្នុងពិភពឌីជីថល ការធ្វើកោសល្យវិច័យឌីជីថល ការស្រាវជ្រាវនិងស៊ើបអង្កេតលើការសម្អាតប្រាក់ ការស្វែងរកនិងដកហូតទ្រព្យសម្បត្តិពាក់ព័ន្ធនឹងបទល្មើស និងការកសាងសំណុំរឿងទៅតុលាការ។ ជាចុងក្រោយ ឯកឧត្តមបណ្ឌិត ប្រធានគណៈអធិបតី ក៏បានប្រគល់លិខិតថ្លែងអំណរគុណនិងវត្ថុអនុស្សាវរីយ៍ដល់គ្រូកូរ៉េ និងប្រគល់វិញ្ញាបនបត្រសិក្សាដល់សិក្ខាកាមផងដែរ៕