الركن

هتقول له إيه؟! قلنا في البوست اللي فات إن كل واحد فينا هيتسئل ٧ أسئلة إجبارية لا مفر منهم ودول اللي هيحددوا مصيرك .. وذكرناهم سريعاً كدة .. تعالوا بقى نشوف الأسئلة دي بالتفصيل .. من ربك؟ يا ترى لو اتسألت السؤال ده هتقول إيه ؟ يا ترى تعرف تتكلم عن ربنا ٥ دقايق بس؟ للأسف ولا حتى دقيقتين! ولو إتكلمت تلاقي الكلام ضعيف ومتلصم! ولو حاولت تزود في الكلام هتلاقيك بدأت تغلط ! هل ده لأنك مبتعرفش تتكلم؟ لا ، أبداً ؛ بدليل إنك ممكن تتكلم عن الموبايلات بالساعة ، والعربيات بالساعتين ، ومع البنات على الشات بالثلاث والأربع ساعات ..!! طيب لما صاحبتك ترن عليك علشان تقابلها، وفي نفس الوقت لما المؤذن يقول حي على الصلاة علشان تقابل ربك .. بتستجيب لمين؟ ليه بتستحمل إنك تقف مع حبيبتك ساعة واتنين ومش بتستحمل إنك تقف قدام ربك في الصلاة عشر دقايق؟ عرفت دلوقتي المشكلة فيييييين؟ المشكلة في عدم تعمق معرفة الله عز وجل في قلب كل واحد مننا .. ودي مشكلة خطيرة جداً و علشان كده شوف أول ما بتقع في مشكلة، بتلجأ لله ولا بتقعد شايل الهم وتستعين بكل الناس وتنسى ربك؟ شوفي لما خطيبك بيأمرك بشئ وينهاكي عن شئ، درجة استجابتك له زي درجة استجابتك لأوامر الله؟ شوفي لما حد بيعملك معروف بتشيله له العمر كله ، وربك نعمه مغرقاكي وإنتي ولا في بالك تشكريه!! شوف أكتر حاجات شاغلة بالك، وآخر حاجات بتفكر فيها قبل ما تنام، وأول حاجات بتفكر فيها أول ما تصحى من النوم، هل رضا ربنا موجود فيها أصلاً؟ إحنا للأسف بنقول بلساننا فقط إننا بنعبد ربنا، ولكن كثير مننا قلبه مشغول بحاجات تانية كتير!! أما لو عبدنا ربنا صح؛ كنا هنشتاق إننا نناجيه ونسمع عنه ونقرأ كتابه اللي أنزله ونحاول نفهم كلامه ورسايله لينا، وبالتأكيد وقتها هنعرف نتكلم عنه .. يا ترى عرفت دلوقتي من ربك؟؟ ما دينك؟ للأسف الشديد ، دين كثير مننا هو الدين اللي على مزاجه!! دين على كيفه وهواه !! دين بالتقسيط المريح!! تلاقي شاب ياخد الصلاة والصوم ولكن يقولك الربا والأغاني والكليبات شغالين والدين يسر ومتعقدوهاش .. وتلاقي بنت تاخد الصدقة والأذكار ولكن تقولك الحجاب والاستايل والنمص والوشم ومصاحبة الشباب والاختلاط شغالين والدين يسر ومتعقدوهاش!! يعني كل واحد بياخد من الدين اللي يحبه ويسيب اللي مش على مزاجه .. وهو ده يبقى دين ساعتها؟! المفروض إن الدين - سمعاً وطاعة يارب يعني أركن شهواتي وهوايا على جنب، وأصبر علشان أرضي ربي حبيبي وأنفذ أوامره كما أمر وأفوز بجنته ونعيمها .. فمينفعش أبداً يا شباب ناخد من الدين اللي على مزاجنا ونسيب اللي مش عايزينه، لازم ناخد الدين كله زي ما ربنا أمرنا ومنمشيش ورا الشيطان في التفريط في الدين حاجة ورا التانية بالتدريج!! تخيل كده إنك بتشتغل عند مدير في شغل معين، هل هتنفذ اللي المدير عايزه ولا اللي انت عايزه؟ طبعاً اللي هو عايزه؛ وإلا لو عملت اللي إنت عايزه هيرمي شغلك في وشك ويطردك من الشغل!! ولله المثل الأعلى .. شوف معاملتك الله سبحانه وتعالى شكلها إيه؟ ومع ذلك ؛ ربنا بيعاملك بحلمه ورحمته وفضله ويستر عليك وينعم عليك، وإنت برده لسه مصمم تمشي على مزاجك!! يا ترى عرفت دلوقتي ما دينك؟ من نبيك؟ وقبل ما تجاوب .. فاكر يوم ما النبي ﷺ حبيبي وحبيبك اتشتم قدام العالم كله ، عملت إيه يومها؟ هل كان ردك إنك التزمت بالدين اللي النبي ﷺ ضحي بعمره علشان يوصله لك؟ ولا كبرت دماغك وبدل ما ترد عليهم، دخلت في نفس اليوم لمواقعهم الإباحية وحملت أفلامهم وأغانيهم وعشت عبد ليهم؟!! يا ترى مين قدوتك في الدنيا؟! الممثل الفلاني؟! المغني الفلاني؟! اللاعب الفلاني؟! امتى كان رسول الله ﷺ قدوتك في حياتك؟! إمتى اقتديت به واتبعت سنته؟ إمتى إتشبهت به؟ وإنتي .. إمتى كانت أمهات المؤمنين - زوجات النبي ﷺ - قدوتك في حياتك وإتشبهتي بهن؟ يا ترى لو شافك النبي ﷺ وإنت مسقط البنطلون ولابس الحظاظة والسلسلة وعامل دوجلاس هيعرفك؟ هيقول ده من أمتي؟ ده حفيد أبو بكر وعمر وعثمان؟ يا ترى لو شافك النبي ﷺ وإنتي لابسه البدي والجينز والفيست هيعرفك؟ هيقول دي من أمتي؟ هما دول شباب أمتي اللي تأذيت واترميت بالحجارة وجاهدت وضحيت علشان أوصلهم الدين علشان أكون سبب في نجاتهم من عذاب جهنم .. هما دول؟! حياتك بالمنظر المؤسف ده وفاكر إنك هتجاوب بكل سهولة وتقول إن نبيك هو محمد ﷺ؟! الدين مش بالكلام .. مش اللي بيحب النبي ﷺ يصقف واللي بيحب النبي ﷺ يكتب "حبيبي يا رسول الله" على الفيس بوك !! الحب لازم يترجم لاتباع واقتداء ومستحيل هيتساوى اللي عاش وأهم قضية في حياته خدمة دين الله ونصرة النبي ﷺ والدفاع عنه، وغيره اللي عاش الشهواته ونزواته والتفاهات ! يا ترى عرفت دلوقتي من نبيك؟ وللحديث بقية ... #للكبار_فقط

صباح الخير يا شباب..☀️ لو فاكر إن وجعك مالوش آخر،افتكر صاحب أشد ابتلاء في التاريخ .. سيدنا أيوب عليه السلام عاش في الابتلاء سنين طويلة من التعب والصبر، يُقال إنها 18 عامًا، لكن في لحظة واحدة كل ده انتهى بدعوة صادقة من قلب واثق:

أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ .

مهما كان ابتلاؤك، مش هيبقى أصعب من اللي مر بيه سيدنا أيوب، ومع ذلك كشف الله عنه الضر في لمح البصر. السر كله يا صديقي في اليقين ، أوقات بنشوف في حجم الوجع وننسى حجم القدرة الإلهية. ارفع إيدك وقول يا رب بقلب مطمئن، وربنا هيستجيب لك ، مش لأنك مثالي أو معصوم، لكن لأنه الرحيم الرزاق . أنت بس محتاج تقبل عليه بقلب صادق كله يقين وتقول يارب عمرك ما هتخسر .🤍

• قَال الإمَام ابن القَيّم رَحمُه الله : - ‏« أعظم الذنوب عند الله إساءةُ الظنّ به، فإن المسيء به الظنَّ قد ظنّ به خلافَ كماله المقدّس، وظنّ به ما يناقض أسماءه وصفاته، ولهذا توعّد الله سبحانه الظانّين به ظنّ السوء بما لم يتوعّد به غيرَهم ». - الداء والدواء ـ قيام الليل ياكرام

هتقول له إيه؟! لما الدكتور في الكلية بيقول أنا هعمل محاضرة هقولكم فيها على شوية أسئلة هيجي منها في الإمتحان، الطلبة بتبقى هتموت من الفرحة، وكلهم بيحضروا ويكتبوا الأسئلة دي ويذاكروها صم .. ليه؟ أصلها أكيد جاي منها في الامتحان، لازم تذاكرها .. اللي مش هيذاكرها وهو متأكد إنها جاية في الإمتحان هيبقى غبي، ده حتى كلمة غبي كويسة في حقه .. وتخيلوا مثلاً لو جبنا طلبة ثانوية عامة، وما أدراكم ما الثانوية العامة، وقولنالهم إن الإمتحان إتسرب والأسئلة دي جاية بكرة مليون في المية في الإمتحان .. تخيلوا هيتصرفوا إزاي ؟؟ هيباتوا ليلتها صاحيين يحفظوا إجابات الأسئلة دي، أصلها ثانوية عامة، مش لعبة .. واللي يعرف أسئلة ثانوية جاية في الإمتحان وميذاكرهاش يبقى .... !! طيب .. بعد الحكم الشنيع اللي حكمتم به بنفسكم على ((الطلبة المجانين رسمياً)) في الأمثلة اللي فاتت دي، لو قولتلكم إن ربنا أخبرنا بالاسئلة اللي هنمتحن فيها ونتسألها في إمتحان الأخرة، ومع ذلك ماذا كرناش، ولا حتى حطينا في بالنا أن أي حد فينا ممكن ميعاد امتحان الآخرة بتاعه يكون في أي لحظة!! أصل فيه شاب عايش حياته ومقضيها بيقول: أنا إمتحاني لما أبقى فوق الـ ٦٠ .. مش النبي ﷺ هو اللي قال إن أعمار أمته ما بين ٦٠ و ٧٠ سنة ؟؟ أبقى ساعتها بقي أدخل الجامع وأبات فيه كمان!! وميعرفش المسكين إن النبي ﷺ برده أخبر عن موت الفجأة وإنتشاره وقال إنه من علامات الساعة، يعني ممكن في أي لحظة تموت من غير أي مرض أو إنذار، من غير ما تلحق تتوب!! كام شاب تعرفه مات فجأة في زماننا ده ؟؟ كتييير جداً صح .. مش كنت ممكن تكون واحد منهم؟! امتحان الآخرة يا شباب!! إمتحان الآخرة اللي كل واحد فينا مُعرّض إنه يدخله في أي لحظة، جهزناله إزاي؟ استعدينا له بإيه؟ ربنا - أخبرنا بالأسئلة كاملة، فالمجنون اللي ملهوش عقل فقط هو اللي هيعرف أسئلة الإمتحان المصيري في حياته وميجهز لهاش إجابة!! ده مش إمتحان ثانوية عامة .. ده مش إمتحان في كلية ده مش إمتحان ماجستير أو دكتوراة .. كل ده هين .. ده امتحان تحديد المصير؛ يا جنة يا نار!! كل واحد فينا هيتسئل في ٧ أسئلة إجبارية، لازم هتتسئل فيهم يعني هتتسئل فيهم، مفيش مفر، مصيرك مش هيتحدد غير لما تجاوب على الأسئلة دي .. أسئلة في القبر: من ربك ؟ وما دينك؟ ومن نبيك؟ أسئلة في أرض المحشر: عمرك فيما أفنيته؟ شبابك فيما أبليته؟ مالك من أين اكتسبته وفيما أنفقته؟ وعلمك ماذا عملت به؟ في البوست الجاي من السلسلة إن شاء الله نعرف الأسئلة دي بالتفصيل أكتر .. #للكبار_فقط

صباح الخير يا شباب..☀️ كتير مننا بيضحك ع نفسه وكل ما تيجي في دماغه حاجه يقولك بكرة هعملها يلا نبدأ نصلي يقولك هبدأ من بكرة ، طب نعمل طاعة ،طب مذاكرة بكرة ! طب تضمن منين إن بكرة صحتك هتكون موجودة ،أو ان الفرصة هتيجي تاني ، أو إن بكرة هيجي أصلا وأنت موجود في الدنيا ؟! ربنا فاتح لك أبواب خير دلوقتي سواء (صلاة، صدقة، خدمة ناس، طلب علم)، والأبواب دي مش دايمًا بتفضل مفتوحة يبقى تستغلها . أستخدم الامانة اللي ربنا رزقك بيها في طاعته قال النبي ﷺ:

اغتنم خمسًا قبل خمس: شبابك قبل هرمك، وصحتك قبل سقمك، وغناك قبل فقرك، وفراغك قبل شغلك، وحياتك قبل موتك .

متسمحش للتسويف يعطلك او ينهي حياتك وانت عايش واستغل كل لحظة وكل نفس وابدأ من النهارده وخد خطوة انت تقدر . وفقكم الله لما يحب ويرضى.🤍

لا تنسوا صيام الاثنين ♥️

آخر آيتين فىِ سورة البقره لهم فضل عظيم جداً .. قال رسول الله ﷺ :

من قرأ الآيتين من آخر سورة البقرة في ليلة كفتاه.

-متفق عليه. كفتاه أي: أجزأتا عنه من قيام الليل، وقيل: كفتاه كل سوء، وقيل: كفتاه شر الشيطان، وكل ما ذكر صحيح

صباح الخير يا شباب 🌤 الحسن البصري كان بيقول:

يابن آدم، إنما أنت أيام ، كلما ذهب يوم، ذهب بعضك.

فالأيام هي راس مالك في الدنيا دي، واللي بمرور الوقت بينقص، فالحل إنك تستثمره صح وتحوله لحسنات في ميزان الآخرة. كل يوم فرصة للاستمرار، فرصة لإنقاذ ما يمكن انقاذه، وفرصة للبعيد إنه يقرب، وللعابد الزاهد إنه ينافس ويجتهد أكتر. فخلي اليوم ده وكل يوم يشهد ليك يوم القيامة بدل من إنه يكون حجة عليك أمام رب العباد. اشتغل على عباداتك إنها تكون أفضل على أخلاقك وتعاملاتك، وعلى أعمالك الدنيوية إنك تخرجها بأحسن شكل ممكن. ربنا يجعل صباحكم كله خير وسعادة🌷

ماشي يا شوية كذابين 😅😝

انا مش حاسس أنا مش مقتنع بموضوع الخوف ده؟؟ إحنا نخاف من ربنا ليه؟ إحنا المفروض نحب ربنا وبس لو سألتك دلوقتي إحنا بنعبد ربنا ليه؟ هترد وتقول: علشان هو خلقنا لكده؛ خلقنا للعبادة .. تمام .. ولما نعبده صح هيحصلنا إيه؟أكيد ربنا هيرضى عننا .. ولما يرضى عننا هيعملنا إيه؟ هيدخلنا الجنة ومش هيدخلنا النار .. بس.. إنت كده جبت المفيد يبقى الخلاصة: إننا بنعبد ربنا طمعاً في ثوابه، وخوفاً من عذابه .. وده مش كلامي .. ده كلام ربنا سبحانه وتعالى:

وَادْعُوهُ خَوْفًا وَطَمَعًا

وقال تعالى:

تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنْفِقُونَ

إزاي بقى حد يقول إنه مينفعش نخاف؟! الإمام ابن القيم رحم الله بيقول كلام جميل جداً:

الإنسان في طريقه إلى الله مثل الطير، له جناحان ورأس، الجناحان هما الخوف من الله والرجاء في رحمته، ورأسه هي محبة الله

وطبعاً علشان أي طائر يطير ؛ لازم يطير بالجناحين مع بعض .. مينفعش يطير بجناح واحد .. وهو ده للأسف اللي الناس بتعمل عكسه دلوقتي!! طايرين بجناح واحد، جناح الرجاء وده مينفعش طبعاً !! وكل ما تيجي تكلم حد يقولك يا عم ربنا غفور رحيم! ربنا رحمته وسعت كل شئ، هو أنا بعمل إيه؟ بشرب سجاير، بكلم بنات، مش بصلي، وإيه يعني؟ ده ربنا غفر للي قتل ۱۰۰ واحد ؛ مش هيغفرلي؟!! ودي مشكلة كبيرة .. هو ميعرفش إن اللي قتل ۱۰۰ نفس ربنا غفر له علشان تاب إليه وكان رايح يبدأ حياة جديدة .. إنما صاحبنا اللي ماشي بالمبدأ ده لو مات وملحقش يتوب يا عالم هيكون مصيره إيه؟! لازم نتكلم عن الخوف ولازم الإنسان يخاف علشان يبطل معصية .. ده كلام ربنا مش كلامي ! قال تعالى:

فَذَكَرْ بِالْقُرْآنِ مَنْ يَخَافُ وَعِيدِ

يعنى اللي هيتذكر بالقرآن ويتعظ بيه هو المؤمن اللي خايف فعلاً من عذاب ربنا إزاي منتكلمش عن النار وربنا بيحذرنا ويخوفنا وبيقول:

لَهُم مِّن فَوْقِهِمْ ظُلَلٌ مِّنَ النَّارِ وَ مِن تَحْتِهِمْ ظُلَلٌ.ذَلِكَ يُخَوِّفُ اللَّهُ بِهِ عِبَادَهُ يَا عِبَادِ فَاتَّقُونِ

كل الآيات دي وغيرها كتير بتدفعنا إن الواحد لازم يخاف من ربنا وعقابه .. لأن الإنسان لو عرف مدى إنتقام الله، ماكنش هيتجرأ على الله بالسهولة دي ده المفروض في زمن الفتن إن الإنسان يخاف أكثر!! إنما الواقع زى ما الكل شايف .. الناس ولا في دماغها!! ده الواحد يوم ما بيكون عليه إمتحان بيبقى في قمة الرعب وتلاقيه قاعد يذاكر غصب عنه .. ولو مديره في الشغل هيعدي عليه في يوم ، تلاقيه مظبط الشغل ومفيش فيه غلطة ، لييييييه ؟ علشان طبعاً خايف على وظيفته ..!! طيب فيه حد عاقل يخاف على وظيفته في الدنيا الفانية، وميخافش على مكانه في الجنة الأبدية؟! محتاجين شوية تفكير في آخرتنا يا شباب ربنا يرزقنا الخوف والحياء منه .. اللهم آمين تعالوا نشوف بقى ايه هي المشكلة التانية: انا مش حاسس بطعم العبادة! تلاقي الشاب يقولك: الواحد مش بيلاقي لذة في العبادة ولا إنشراح في الصدر ولا الحاجات اللي بنسمع عنها دي كلها! بل بالعكس، الواحد بيلاقي الصلاة صعبة وتقيلة على قلبه، تفسر بايه الكلام ده؟ والإجابة هتكون: علشان نفس السبب اللي فات! قلبك من كتر المعاصى بقى عليه طبقة صدأ رهييييبة .. فالإيمان مش هيعرف يدخل قلبك من أول مرة ولا تاني مرة.. الموضوع هياخد وقت في الأول على ما الطبقات دي تتشال.. وبعد كده هتحس فعلاً بلذة الطاعة والعبادات .. ده غير إنك لسه في أول الطريق وقلبك فيه شوية رواسب وحنين للماضي ومعاصيه .. واوعى الشيطان يدخلك من المدخل ده ويخليك تسيب العبادات ويقولك إنها ملهاش لازمة وربنا مش هيقبلها طالما مفيهاش خشوع والقلب مش حاسس ليها بطعم! إوعى تسمع لكلام الشياطين ده ! قال الإمام ابن القيم رحم الله في مدارج السالكين:

السالك في أول الأمر يجد تعب التكاليف ومشقة العمل لعدم أنس قلبه بمعبوده، فإذا حصل للقلب روح الأنس زالت عنه تلك التكاليف والمشاق، فصارت قرة عين له وقوة ولذة، فتصير الصلاة قرة عينه بعد أن كانت عملاً شاقاً عليه، ويستريح بها بعد أن كان يطلب الراحة منها

يعني من الآخر ما تستعجلش .. لازم هتتعب في الطاعة في الأول لحد ما طبقة الصدأ اللي على القلب تزول وتنتهي؛ وبعدين هتلاقي نفسك مستمتع بجد وعايش أحلى حياة في طاعة الله #للكبار_فقط

من الآية ١٢ في سورة الفرقان إلى الآية ٢٠ #ورد_التدبر

عن جابر بن عبد الله رضي الله عنهما قال: قال رسول الله ﷺ:

يوم الجمعة اثنتا عشرة ساعة ، لايوجد فيها عبد مسلم يسأل الله عز و جل شيئا إلا آتاه إياه ، فالتمسوها آخر ساعة بعد صلاة العصر

فادعوا الله وانتم موقنون بالإجابة .. ولا تنسونا من دعائكم ❤️ ومتنساش تصلي على النبي ﷺ .. اللهم صل وسلم وبارك على نبينا محمد ﷺ ❤️

اللهم صل وسلم وبارك على نبينا محمد ﷺ ❤️

من الآية ٣ إلى الآية ١١ في سورة الفرقان #ورد_التدبر

إنَّ يَوْم الْجُمُعَة يَوْم دُعَاء وَذِكْرٍ وَعِبَادَةٍ: مِنْ الْغسل وَالتَّبْكِير إِلَى الصَّلاة وَانْتِظَارهَا وَاسْتِمَاع الْخُطْبَة وَإِكْثَار الذِّكْر بَعْدَهَا وغيرها من العبادات؛ لِقَوْلِ اللَّه تَعَالَى: (فَإِذَا قُضِيَتْ الصَّلاةُ فَانْتَشَرُوا فِي الأَرْضِ وَابْتَغُوا مِنْ فَضْلِ اللَّهِ وَاذْكُرُوا اللَّهَ كَثِيرًا) جمعة مباركة ❤️✨

صباح الخير يا شباب..☀️ انا عايزك تتخيل معايا كده تكون قاعد مع النبي ﷺ في الجنة وتقابل أبو بكر وعمر رضي اللَّه عنهم وأرضاهم ، ومش بس كدة لا وتتكلم معاهم وتشوفهم بعينك . أكيد مجرد التخيل دلوقتي فرحك جدا وكأنك بتحلم ..عايز أقولك إن دا مش حلم دي الجنة. الجنة إللي هتشوف فيها الأنبياء والصالحين وتقعد معاهم اللي النبي ﷺ قال عنها:

قالَ اللَّهُ تَبارَكَ وتَعالَى: أعْدَدْتُ لِعِبادِي الصَّالِحِينَ،ما لا عَيْنٌ رَأَتْ، ولا أُذُنٌ سَمِعَتْ، ولا خَطَرَ علَى قَلْبِ بَشَرٍ .

أتعب.. أتعب بجد في الدنيا علشان الجنة تستاهل وشربة واحدة من إيد رسولنا الكريم ﷺ كفيلة تنسيك كل التعب كفاية لذة النظر لله سبحانه وتعالى . أكثروا من الصلاة على النبي ﷺ وأدعوا كتير لنفسكم ولأهلكم وللمسلمين جميعاً لعل الله يستجيب جمعتكم مباركة .🤍

اللهم صل وسلم وبارك على نبينا محمد ﷺ ❤️

يا دمع أم في مشربية الانتظار لسة النهار موفاشي ورد أحبابها من عتمة الغيبة