📜 Be different _ تالته ثانوي 2027

السلام عليكم.. 🤍 حاسس بيك والله، وشايفك وأنت تايه في أحلام اليقظة. مرة تتخيل الوزير بيرن عليك، ومرة تتخيل ابن خالتك بيصحيك على أسوأ مجموع في تنسيق العيلة. 😅 الحقيقة إن أي كلام هتسمعه دلوقتي، سواء مني أو من غيري، مش هيطمنك لو من جواك مش عندك يقين إن ربنا هيختارلك الخير. اسأل نفسك... أنت عايز إيه من الدنيا؟ عايز مجموع معين، وكلية معينة، وفرحة لحظية؟ ولا عايز حياة تناسبك، وأرزاقك تكون متوزعة بالطريقة اللي تبعد عنك الفتن، وتقربك من ربنا، وفي الآخر توصلك للجنة؟ متخليش تفكيرك يبقى سطحي، ومتخليش المجتمع يقنعك إن الخير له شكل واحد. الخير مش دايمًا بيكون في الكلية اللي نفسك فيها، ولا في الطريق اللي أنت رسمته لنفسك. ادعي ربنا يختارلك الخير أينما كان، ومتشترطش عليه طريق معين. لأنك ببساطة ما تعرفش الخير فين. أنت تعبت، وحطيت قلبك ومجهودك في السنة دي، وربنا شايف تعبك كله، ومفيش لحظة صدق ولا تعب ضاعت عنده. بس افتكر إن ممكن تكون مستني رزق معين، أو شايف إن الكلية دي هي الخير كله ليك، بينما ربنا يعلم إنها لو جات دلوقتي هتبقى أمانة أكبر من طاقتك، أو مسؤولية لسه مش مستعد لها، أو حتى فتنة ليك وأنت مش شايفها. وربنا سبحانه قال: ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لَا تَعْلَمُونَ﴾. الآية دي كأنها بتقولك: أنت شايف اللحظة... وربنا شايف عمرك كله. ولو النتيجة جت زي ما كنت بتتمنى، احمد ربنا. ولو جت على غير اللي نفسك فيه، برضه احمد ربنا. النبي ﷺ قال: "عجبًا لأمر المؤمن، إن أمره كله له خير." يعني حتى الحاجة اللي أنت شايفها دلوقتي صعبة، ربنا قادر يجعلها بداية خير كبير جدًا في حياتك. ومتبصش لحد، ومتبررش لحد. لا تشغل نفسك بفلان جاب كام، ولا فلان غش، ولا فلان ظروفه كانت أسهل. أنت أدرى برحلتكةوظروفها اتعود تكتفي بالله وإنه عالم ورحيم وحكيم مش لازم تثبت للناس حاجة علشان تبقى نجحت قدام نفسك أول ما النتيجة تظهر، افتكر حديث النبي ﷺ: "إنما الصبر عند الصدمة الأولى." أول دقيقة هي أصعب دقيقة، فابدأها بـ "الحمد لله." صلي ركعتين، وسلم أمرك لربنا، وقوله: "اللهم اختر لي ولا تخيرني، ودبر لي فإني لا أحسن التدبير." ومتنساش تدعي لزمايلك كمان. متحقدش على حد، واتمنَّ الخير لكل الناس. القلب السليم رزق، ويمكن يكون أعظم من أي مجموع. وأخيرًا... بلاش تقضي الليلة دي كلها في تعذيب نفسك باحتمالات ملهاش آخر. نام وقلبك مطمن، لأن ربك اسمه الحكيم، واسمه الرحيم، واسمه اللطيف. واللطيف هو اللي بيدبر لك الخير من حيث لا تحتسب، حتى لو أنت مش شايفه دلوقتي. ربنا يكتب لكل واحد فيكم الخير، ويرضي قلبه بما اختاره له، ويجعل النتيجة بداية لأيام كلها بركة ورزق ورضا. آمين. 🤍