سەکینەت - Sakinat

تکایە خەڵک ماندووە! کوردی بەستەزمان تەنها هیلاکی ناکۆکی و جیاوازیی سیاسی نییە، بەڵکو زۆریی مەزهەبو ڕەوت و گرووپی جیاجیا، خەڵکی تەواو ماندوو کردووە. دەپرسین: 🔹 ئایا هەست ناکەن جەماوەرەکانتان وەک سیاسییەکان هی یەکترن و لە بنەڕەتدا خۆتان نەتانهێناوە؟ ئیتر دڵ بە چ جەماوەرێک خۆش دەکەن کە بەهۆی شکاندنی فکریی بەرامبەرەکەتان دەستان کەوتووە؟! 🔹 ئایا بێزار نەبوون لەم هەموو ناوناتۆرەیەی لەیەکی دە نێن؟ زانستی زۆرم بۆ چییە لە «جوزئی عەممە»دا دەرنەچيت:﴿وَيْلٌ لِّكُلِّ هُمَزَةٍ لُُّمَزَةٍ﴾ 🔹 ئایا ناکرێت جار جاریش فیقهـ و تێگەیشتنت بگۆڕیت ومەبدئت جێگیر بێت؟ هێندە باز نەدەیت و چەقبەستووش نەبیت؛ واقیع بخەمڵێنیت تانەت نەجووڵێنێت، لەبری ووتە بۆ واقیع، واقیعی بدوێیت؟ 🔹 ئایا ناکرێت بە کلیمەی تەوحید، تەوحیدی کلیمە دروست بێت؟ بە دەم باسی زوهدەوە خۆشت تۆزێک زاهید بیت و هێندە لەسەر خۆت نە کەیتەوە؟ 🔹 ئایا ناکرێت لەگەڵ باسی «بەڕائ»دا «وەلائ»یش هەبێت، و لەگەڵ باسی «وەلائ»دا «بەڕائ»یش؟ بۆچی دین یان دەبێت سارد بێت یان گەرم؟ 🔹 ئایا ناکرێت لەبری فەتوا و کتێبی دەرەوە، جار جاران شتێک لەو خەڵکە بەساڵاچووانەی خۆمان فێر بين؟ کە ناوی پێغەمبەر (عَلَيْهِ الصَّلَاةُ وَالسَّلَامُ) دەبەیت دەست دەکات بە گریان؛ هەست ناکەیت زانستەکەت ئامرازێکە بۆ گەیشتن بەم ئەنجامەی ئەو؟ 🔹 بۆچی کاتێک تۆ هەڵە دەکەیت عوزر واجبە، چونکە مەبەستت شتێکی تر بووە و (كُلُّ بَنِي آدَمَ خَطَّاءٌ).....، بەڵام کاتێک بەرامبەرەکەت هەڵە دەکات، ئابڕوبردنی دەبێتە ئەرک و هەرگیز ڕاست ناکات و ئەگەریش ڕاستی کرد ئاساییە و شەیتانیش ڕاستی وتووە! 🔹 بۆچی تەنها بە فکر خەڵکی هەڵدەسەنگێنن، ئەی کردەوەش مەرج نییە؟ بۆچی تواضع تەنها بۆ شوێنکەوتووەکانە نەک ڕکابەرەکان؟ 🔹 بۆچی کاتێک کەسێک لە خۆت بەناوبانگتر قسەت پێ دەڵێت قیامەتت هەڵدەستێ و دێیتە خەت، بەڵام کاتێک تۆ بەناوبانگتربیت ئەوا وەڵامی نادەیتەوە تا بە حسابی خۆت نەناسرێت؟! ئەگەر کۆمەڵێکی زۆریش لێت تووڕە بن، وا دەزانیت وەک پێغەمبەران دوژمنت هەیە و تۆ کاروانەکەیت و خەڵکیش کلاب! 🔹 تا کەی هەڵەی جەماعەتەکانی خۆتان پێ باشترە لە چاکەی بێگانە؟! تا کەی پێتان وایە ڕۆشنبیر و خوێنەوار بریتییە لەو کەسەی وەک تۆ بیر دەکاتەوە و هاوبیرتە—با نەزانیش بێت—و نەزانیش بە پێچەوانەوە، با زاناش بێت؟! 💡 ئەم قسانە بۆ هەرکەسێکە خەمێکی تر پێش بخات بەسەر خەمی ئومەتدا، و وەلائو بەڕاء دروست بکات لەسەر کەسێک، گرووپێک، یان سەردەمێک (جگە لە کۆمەڵەی یارانی سەروەر)، و ڕێچکە و هێڵێکی تر جیا بکاتەوە کە پێی بناسرێتەوە، هاوکات دەچێتە ناو بازنەی تەفرەقە و لێکترازانی ئومەت کائنا من كان. ✍️ نووسینی: د. ئەحمەد ڕازی