شوية ضو

كاين وحد الكلمات في القاموس الجزائري لازم الناس يحبسوا ما يستعملوهم، كيما كلمة « باير(ة) » ولا « عاقر(ة) ». هاذ الكلمات لي في نظر البعض، غير وصف للحالة الاجتماعية ولا الإنجابية، بصح في الحقيقة وراها نوع من التقليل والإهانة، وكأنو هذاك الشخص توقفت حياتو عند هاذ النقطة. ونفس الشي مع كلمة « كهل »، لي هي في الأصل مجرد وصف لمرحلة عمرية راح يمر عليها الإنسان كي يكبر، وما فيها حتى عيب، بصح المشكل كي ولات تستعمل كأنها معايرة، ويقولوها على أي شخص كانت أفكارو ما توافقش أفكارهم ولا أسلوب حياتو ما يعجبهمش. وما نقدروش ننكروا بلي كاين ناس ولاو يستعملوا هاذ الكلمات باش ينتقصوا من الشخص لي قدامهم، ويمارسوا عليه الضغط، خاصة وأنو المواضيع هاذي حساسة بزاف في مجتمعنا. بصح هذا كامل ما يعطيناش الحق نطلقو تسميات دخيلة، ومقرفة أحيانا، على إنسان مكانش بيدو أنو يختار حالتو لي عايشها. لازم نتعلموا ننتقوا كلماتنا، بلاك كلمة تقولها بقصد أو حتى من غير قصد، تكون عادية بالنسبة ليك، لكن في باطنها سكين تجرح لي قدامك. لأنو الإنسان أكبر من إننا نحكمو عليه ولا نختزلو حياتو على أساس رقمو الإجتماعي أو حالتو الاجتماعية. #وَهج

الفقــر والله صعيـــيب... الفقر أسـوء وأبشع حـاجة يقدر يفوت عليها الإنسان، هو ماش حكاية جيب ونقص فالدراهم، الفقر يخلي فيك ضغط وتعب نفسي كبير... توصل بيك وين ما تعرفش روحك شكون أنت، وواش تحب فالدنيا هذي... هنا تقدر تسقسي روحك: شي لي راني ندير فيه من هوايات هو شي لي راني باغيه.. ولا شي لي راني قادر عليه؟؟ مكانش فينا لي ماهوش باغي يسافر ويحوس في هاذ العالم.. مكانش فينا لي ماهوش باغي يسوق سيارة آخر طراز... وبزاف من الصوالح لي راهم في خاطرنا، بصح الوضع المادي عندو رأي آخر ويوقف بينا وبين الرغبات والطموحات لي رسمناهم... ولي زاد على هاذ شي هو المظاهر، مثلا برا وكيما رانا نشوفو تلقى الإنسان الغني يقَّدروه ويحسبولو حساب ويحضروه في كل المناسبات، أما الفقير تلقاه مهمشينو وحاڨرينو بالعين... هذا مثال بسيط برك وكاين ناس الله يهديها، يقلك «أنا بابا ما دارليش، وكون دارلي ما رانيش هكا» خويا... باباك دار شي لي عليه وأكثر باش تعيش حياة محترمة والباقي راهو عليك، ما تبقاش مطبق يديك وتتفرج... وكاين لي يكذب ويسرق ولا يتاجر بالمخدرات... منبعد يدير الفقر سبة الفقر عمرو كان سبة، كاين ناس دايرة الفقر كَـحافز باش يحطمو الجدار لي بينهم وبين الطموحات تاعهم، ويوصلو وين راهم حابـين... الفقر ماهوش نهاية الطريق، بفضل الله وبالإرادة تاعك راح يكون بداية التغيير، خدَّم عقلك برك... شحال من غني ضيَّع ثروة بجهله، وشحال من فقير بنى إمبراطورية بطموحه... خويا... اخدم، ساكريفي، اتعلم حرفة، اكتسب مهارة جديدة، ما تدريش الرزق وين راح يكون... والله يفرج على كل فقيــر فالدنيا. #أســـامة

#شوية_عبرة خرافة تقول أنو ثعلب تقطع ذيلو، شافو ثعلب آخر سقساه علاش قطعت ذيلك؟ قالو: جرب تشوف! راح تحس روحك خفيف كي شغل طاير في الهواء! هداك الثعلب صدّقو وقطع ذيلو، وحس بألم كبير مافيه حتى متعة. قالو: علاه كذبت عليا؟ قالو: إذا قلت للثعالب الأخرى بلي راهو يوجع، واحد ما راح يقطع ذيلو وراح يولو يضحكوا علينا. ومن تما، صار كل واحد فيهم يزيّن للآخر نفس الغلط، حتى صارو أغلب الثعالب بلا ذيل وكي يشوفو ثعلب عندو ذيل، يضحكو عليه ويعتبروه غريب! ومنا نأخذ العبرة كي يعمّ الفساد، الفاسد لا يستحي من فساده، بل يبدأ يحارب الصالح لأنه يذكّرو بالحق. وكل ما كثر الفساد، تولي الاستقامة عند البعض تخلّف، والحياء عقدة نفسية، والتمسّك بالمبادئ تشدد. ماشي لأن الحق تغير.. إنما صار للباطل جمهور. #طيف

شحال مرة شفت لحاجة أنها خسارة ليك ولكن كان وراها خير كبير؟ مثلا متخيلين أنو صلح الحديبية لي كان في ظاهره شديد على المسلمين، وفيه إجحافٌ بحقهم، حتى كان من شروطه أن يُرَدَّ من جاء إلى المسلمين مسلمًا من قريش، بصح إذا كفر واحد مسلم ما يرجعوهش.. ومع ذلك كان هذا الصلح نفسه كان باب لفتح عظيم، فأسلم بعده من الناس أضعاف من أسلم خلال سنوات الدعوة التي سبقت الصلح... يعني في سنتين أسلم أضعاف وش أسلم في 19 سنة!! ومن بين هذو لي أسلموا كانت أم كلثوم بنت عقبة رضي الله عنها، هاجرت إلى رسول الله ﷺ وحدها، خائفةً من أهلها المشركين، فلما وصلت إلى المدينة جاو أهلها يطالبون بردّها، وكان مقتضى الصلح أن لازم ترجع. لكن الله سبحانه ووعالى أنزل ٱية ﴿فَلَا تَرْجِعُوهُنَّ إِلَى الْكُفَّارِ﴾.. فتغير كلش شيء ولم ترجع إلى أهلها، ثم عوّضها الله خيرًا فتزوجت عبد الرحمن بن عوف رضي الله عنه كان من أغنى الصحابة. وهكذا هي الدنيا.. كل ما خلينا حاجة لربي سبحانه: بنادم نحبوه، ولا منصب مشبوه، ولا حاجة تاع حرام، ولا تعطلت بزاف حوايج سعينا ليها.. ممكن الوقت هذاك نحسوا بضيق.. لأنو ما راناش نشوفوا لبعيد.. بصح لي يعرف ربي صح، راه عارف بلي حا يعوضه بخير من وش خلا على جاله، وإذا ابتلاه بحاجة راهي لحكمة معينة ربي سبحانو أعلم بها. لذلك إذا آمن العبد بهذه الآية ﴿يُؤْتِكُمْ خَيْرًا مِمَّا أُخِذَ مِنكُمْ وَيَغْفِرْ لَكُمْ﴾ حق الإيمان، اطمأن قلبه عند الفقد، وقرّت عينه حتى في مواطن الألم؛ لأنو علبالو أن أمر المؤمن كله خير.. يكفيه أنو يخلي ربي يشوف منه خير ورضا. #نور

أصعب سجن قادر يدخل ليه الإنسان في حياتو، هو نهار يربط " قيمتو النفسية " و " ضحكتو " بـ وجود شخص آخر. التعلّق المرضي هو " فخ عاطفي " تطيح فيه، وتلقى روحك في زنزانة مغلقة، وتبقى رهينة لتصرفات ومزاج غيرك! رح ترضى بالوضع هذا؟ رح تسمحلو أنو يخربلك حياتك؟ أكيد لا... رح تهاوش روحك، وتدخل في حرب استنزاف داخلية، بصح مرحش تقدر تبدل والو. تبعني تبعني نقلك علاش راك حاصل في هذ الدوامة... في علم النفس، الشخص لي يعاني من التعلّق المرضي يولي يشوف الطرف الآخر "مصدر الأكسجين الوحيد"، حتى لو كان نرجسي و يطفي فيه. غير يصرى مشكل صغير، يحكمك خوف وقلق مزمن، وتتنازل على حقوقك وكرامتك غير باش ما تخسرش هذاك الوجود المزيف، لي قاعد يتغذى على طاقتك، وينشط هو بيها وانت تولي عبارة على خردة. فيق لعمرك... راك تحرق في طموحك بيدك! إذا رضيت بوضعك الحالي، فمتكملش تقرا وخليك في سجنك، وإذا كنت حاب صح تخرج من هذ المهزلة، رح تحاول تبحث على حلول، وهنا لازم تعرف اولا بلي الساس تع التغيير يبدا نهار تفيق مع روحك و تفهم بلي قلبك ربي خلقو باه يتعلّق بيه هو سبحانو برك، البشر كامل عابرين، و إذا علّقت قلبك بـ بنادم راح يذلك ولا يطفيك. وين رايح؟ عاود اقرا اخر عبارة سبع مرات... بصح إذا علّقت قلبك بالخالق، راح يمدلك قوة و نيف و كرامة تخليك واقف في وجه أي ظالم. حط حد طاقي لتصرفات هذا الشخص، بقول ولا تصرف سواء كان جيد ولا غير جيد، ومتندمش عليه بعد مدة رح ينفعك، الشخص لي تعلقت بيه وين يتفكر هذاك الموقف، رح يفقد السيطرة عليك وتتحرر. الحقيقة، أنو قيمتك وغلاوتك راهم في داخلك أنت، ماشي في نظرة الناس ليك، تقدر تنجح، وتقدر تحفظ القرآن وتطور روحك حتى من قلب دارك وبتليفونك برك ، وبلا ما تفتح مشاكل مع حتى واحد .. عيش قوي على جال مستقبل أولادك وبناتك باش ما يطيحوش في نفس الفخ. الوعي هو أننا نكونوا منبع قوة وسند لنفوسنا ولعايلاتنا، وما نخلوش أي علاقة تسرق منا هيبتنا وصفاء عقلنا. إذا قررت اليوم تكسر زنزانة التعلّق وتسترجع حرية قلبك وعقلك... خلي كلمة هنا تبدا بيها حياتك الجديدة. بسم الله نبدأ... والسلام على قلوبكم حتى تهدأ. #الدرويش

الحاجة الوحيدة لي تقدر تصبر خاوتنا فهاذ الأزمة هي قصة سيدنا أيوب عليه السلام لي كان عنده رزق كبير من المال والعبيد والمواشي والأراضي لكن فجأة فقد كامل أملاكه و جميع أولاده ماشي ولد واحد بل كل أولاده ، ومبقالوش حتى واحد في الدنيا غير زوجته.و ابتلاه الله بالمرض وعن مجاهد رحمه الله قال كان أيوب أول من أصابه الجدري. وبسبب المرض مولاش يقدر يمشي، فداوه أهل القرية ورماوه برا في مزبلة خارج القرية، تخيل نبي الله يرموه أمام قمامة وهو ميقدرش يمشي والمرض نهش جسمه!! وفهاذ الكرب بقات معاه غير زوجته تعينه وتخدم الناس باش تطعمه. لدرجة وصلت تبيع شعرها من اجله! وشحال استمر مرضه؟ 18سنة، هاذ المدة كامل وهو صابر. وفهاذ الفترة كانو خاوته يروحوا يشوفوه وفي إحدى المرات مقدروش يقربوا ليه من ريحته، وقالو اكيد أيوب عليه السلام اذنب ذنب كبير لدرجة 18 سنة وربي مرحموش !! هنا أيوب عليه السلام متحملش هاذ الكلام تخيل تتهم نبي بالتقصير في دينه!! فسجد على الارض وقال: «وعزتك وجلالك لا ارفع رأسي حتى تكشف مابي، ربي اني مسني الضر وأنت ارحم الراحمين»فجاءه الفرج بعدها مباشرة وقام على رجليه وقال له عز وجل ﴿ارْكُضْ بِرِجْلِكَ﴾. يعني أضرب برجلك الارض فضرب أيوب عليه السلام الارض وخرج منه ماء نقي غسل به جسمه ورجع صحيح كأنو لم يمرض من قبل!!! وأخلف الله له أهله كما قال تعالى: ﴿وَآتَيْنَاهُ أَهْلَهُ وَمِثْلَهُمْ مَعَهُمْ﴾ وعوضه الله بمال وفير كما قال النبي ﷺ: «لما عافى الله أيوب عليه السلام أمطر عليه جرادًا من ذهب، فجعل يأخذ بيده ويجعله في ثوبه، فقيل له: يا أيوب، أما تشبع؟ قال: يا رب، ومن يشبع من رحمتك» وقصة أيوب عليه السلام هي تذكرة لمن اُبتلي في جسده ولا ماله ولا ولده، حيث أن أيوب عليه السلام أُمتُحن بما هو أعظم من ذلك فصبر واحتسب، حتى فرج الله عنه. فمهما كان البلاء اللي راكم تمروا بيه اليوم، تذكروا أيوب عليه السلام، لي فرج عليه ربي بعد كل هاذ المدة، قادر يفرج عليكم في لحظة. #وَهج

الحوار هو مواجهة بالكلمات والحجج، بين ناس متحضرين، عندهم روح رياضية باش يتقبلو أفكار الآخرين، وبهذا يطوّرو النقاش ويغوصو مليح في القضايا اللي تهم الرأي العام. أما السجال، فهو لعب على الأعصاب، و«تشيار» بالجمل، وتهديد باليدين، ومقاطعة واستفزاز. المجادل ما يسمع غير روحو، عكس المحاور اللي يتفاعل مع الآخرين، ويقدر يبدّل رأيو كي يتطور النقاش وتبان قوة الحجج. خاطر الحوار يحتاج منك تكون نزيه في تفكيرك، وتحاول تفهم الآخر، كيفاش يفكر وواش هي أفكارو وقناعاتو. والديمقراطية في الأخير هي الحوار بين الناس اللي عندهم آراء مختلفة.. كي يولي السجال غالب على الحوار، اعرف بلي راك دخلت في نقاش ما فيه غير العياط والخصام والاستفزاز. #الدرويش

المرأة هادي من ولاية ورڨلة، في فيديو قصير وعفوي لخصت حجم الهبة التضامنية لي شفناها من كل ولايات الوطن. الحرائق لي صرات فالشرق، حتى لو كانت بفعل فاعل، تبقى في الأخير قضاء وقدر.. بصح الوعي الحقيقي هو أنو الشعب فهم بلي ماشي وقت التخمينات، وماشي وقت نقعدو نحوسو على السبب. هذا وقت التضامن، وقت كل واحد يمد يدو للآخر، وقت الولايات تتكاتف، وكل واحد يوقف مع خوّه لأنو القضية هي الجزائر.. رحم الله كل من فقدناهم وأسكنهم فسيح جناته، نسأل الله الشفاء العاجل لكل المصابين، وعوض الله كل من خسر بيته ولا رزقه ولا أرضه. حقيقة أثبتت أن الأزمات كيما كل مرة تزيدنا تماسك، توحّدنا ما تفرقناش.. وبإذن الله، وبهمة الرجال وتكاتف الجميع، غاباتنا ومدننا راح ترجع خضراء كيما كانت.. بل وأحسن مما كانت. #طيف

في قصة إسلام خالد بن الوليد، خلالو أخوه الوليد بن الوليد رضي الله عنهما رسالة، وبلّغه أن الرسول ﷺ سأل عنه وقال فيه كلام طيب.. هذا فحوى الرسالة: «بسم الله الرحمن الرحيم.. أما بعد، فإني لم أرَ أَعْجَبَ مِنْ ذَهَابِ رَأْيِكَ عَنِ الإِسْلَامِ وَعَقْلُكُ عَقْلُك، وَمِثْلُ الإِسْلَامِ يَجْهَلُهُ أَحَدٌ؟! وقد سألني عنك رسول الله ﷺ فقال: "أين خالد؟"، فقلت: يأتِي به الله. فقال رسول الله ﷺ: "مَا مِثْلُ خَالِدٍ جَهِلَ الإِسْلاَمَ، وَلَوْ كَانَ جَعَلَ نِكَاَيَتَهُ وَجِدَّهُ مَعَ الْمُشْرِكِينَ عَلَى الْمُشْرِكِينَ لَكَانَ خَيْرًا لَهُ، وَلَقَدَّمْنَاهُ عَلَى غيره". فَاسْتَدْرِكْ يَا أَخِي مَا فَاتَكَ، فَقَدْ فَاتَتْكَ مَوَاطِنُ صَالِحَةٌ». تخيّل خالد بن الوليد، الرجل لي حارب المسلمين سنوات، يسمع أن النبي ﷺ سأل عنه، وما ذكرش أخطاءه ولا حقد عليه، بل شاف فيه عقل وقوة ممكن تكون في نصرة الإسلام. كلمات وصلت لخالد بن الوليد وكان عندها أثر كبير في قلبه، حتى كانت من الأسباب لي شجعاته على القدوم إلى الإسلام. وحنا مرات كلمة تتقال في لحظة غضب، نروحو نقولوها لصاحبها بالحرف، ونكونو سبب في خصام بصح الكلمة الطيبة والمدح ولا حتى دعوة خير تقالت في غيابو ننساو نوصلوهالو ولا مانديرولهاش أهمية. وهنا الفكرة يمكن الكلمة الطيبة لي سمعتها على واحد وما وصلتهالوش، كان محتاج يسمعها أكثر مما تتخيل. #طيف

كل جمعة نقرأو سورة الكهف، ونحرصوا على فضلها. لكن هل سبق أنو سألنا علاش نزلت السورة هذه؟ وش علاقتها بدلالات النبوة؟ قريش، أرادوا اختبار النبي ﷺ، رجعوا إلى أهل الكتاب وسقساوهم عن أمور ما يعرفوهاش العرب، وقالوا لهم: اسألوه عنها؛ فإن أجابكم فهو نبي، وإن عجز عنها فهو متقوّل. - سألوه عن فتيةٍ مضوا في الزمن الأول، ما قصتهم؟ - وسألوه عن رجلٍ طوّاف بلغ مشارق الأرض ومغاربها، من هو وما خبره؟ - وسألوه عن الروح، ما حقيقتها؟ أسئلة تبدو وكأنها فرصة لإحراج النبي ﷺ.. لكن نزل القرآن على محمد ﷺ، فجاءت قصة أصحاب الكهف: ﴿أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَبًا﴾ ثم جاء الجواب عن ذي القرنين: ﴿وَيَسْأَلُونَكَ عَن ذِي الْقَرْنَيْنِ ۖ قُلْ سَأَتْلُو عَلَيْكُم مِّنْهُ ذِكْرًا﴾ ثم جاء الجواب عن الروح في سورة الإسراء: ﴿وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي وَمَا أُوتِيتُم مِّنَ الْعِلْمِ إِلَّا قَلِيلًا﴾ ثلاثة أسئلة حبوا بختبروا بيها محمد ﷺ، فجاءت الإجابة من عند رب محمد ﷺ.. فالسورة التي نقرؤها كل جمعة فيها تذكير بأن هذا القرآن الذي بين أيدينا وحيٌ من الله، وأن محمدًا ﷺ رسول الله حقًا. الواحد يسقسي روحه، إذا عرفوا الإجابة وبلي نبي صح علاش ما أسلموش؟ قريش كانت تعرف الرسول محمد ﷺ قبل البعثة بالصادق الأمين، لكن معرفة الحق شيء، والخضوع له شيء آخر. وحنا تان مرات بزاف نعرفوا بلي شيء هذاك الصح بصح ما نديروهش! - نعرفوا أن الصلاة فرض، ونبقاو نأجلوا فيها ومرات حتى نخرجوها على وقتها بسبة ماتش.. - نعرفوا أنو الحجاب فرض، بصح نصنا مش متحجبات ولا حجابنا محتاج لحجاب. - نعرفوا أن الهاتف يسرق عمرنا، ونبقاو لاهيين بيه، من منصة لمنصة. مشكلتنا أنو القلب يعرف الحق، ومبعد الهوى والشيطان يغلبوه. لهذا خاوتي كل ما نقرأو سورة الكهف.. نوقفوا معاها مليح.. ونسقسيو رواحنا وش الحق لي رانا عارفينوا بصح مش نتبعوه!! خليو كل مرة نقراوها فيها نحاسبوا أنفسنا قبل ما يحاسبنا ربي سبحانو.. وراهي ساعة إجابة ما ننساوش أنفسنا وخاوتنا من الدعاء. #نور

لما يشتدّ البلاء وتكثر عليك الضغوط، متنساش بلي كاين "كلمة أودع الله فيها سر الطمأنينة وقوة اليقين: "الله أكبر. ماشي مجرد تكبيرة ترددها في الصلاة، هي حقيقة كبرى تتجاوز حدود اللحظة الضيقة، باش تفتح ليك أفق السماء. الله أكبر من كل ما يربكك، من كل ما يخوفك، من كل ما يثقل روحك... كلما ضاق عليك صدرك، غمض عينيك ولا أرفع بصرك إلى الأعالي واستحضرها في قلبك قبل لسانك. الله أكبر من هذا الألم، الله أكبر من هذه الأزمة، الله أكبر من "كل شيء." قداه من خوف ذاب لما سكنت هذي الكلمة في قلبك، وقداه من حزن تراجع قدام نورها، لأنها ماشي مجرد لفظ، بل تجديد للتوحيد في لحظة ضعف، وتذكير بلي القوة المطلقة بيد من نقول عليه دايما :" أكبر" وكلما كبّرت، صغُر كل شيء سواها! #الدرويش

صلِّ على النبي ﷺ... حتى ينتهي الوقت.

فما يدريك؟ لعلَّ همًّا يُفرَّج، أو ذنبًا يُغفَر، أو كربةً تُكشف، أو أمرًا تنتظره يُقضى قبل أن تنتهي.

اللهم صلِّ وسلم وبارك على نبينا محمد، عدد ما ذكره الذاكرون، وغفل عن ذكره الغافلون. #نور

علابالك علاش الشيطان يحب يشوفك مدپرس؟ يحاول يضيق عليك، تخاف من حاجة ما صراتش، ويرجعك لحاجة صرات، ويخليك تعيش ألف احتمال سيّئ قبل ما يجي وقته بسك الحزن كي يتمكّن من القلب يضعفه، تولي أبسط الأمور تثقل عليه، وتولي همته ناقصة، ونظرته للحياة متشائمة، وحتى عبادته تتأثر ﴿إِنَّمَا النَّجْوَىٰ مِنَ الشَّيْطَانِ لِيَحْزُنَ الَّذِينَ آمَنُوا﴾. القرآن كشفلنا مقصد الشيطان ليحزن الذين آمنوا، يخليك تستهين بالنعم اللي عندك وما تشوفهاش ولا حتى يخليك خايف من زوالها وتولي عايش في قلق دائم على حاجة ما عندكش يد فيها. لهذا، النبي ﷺ كان يستعيذ من الهم والحزن «اللهم إني أعوذ بك من الهم والحزن، والعجز والكسل» ..الهم هو الخوف من أمر مازال ما وقعش، والحزن هو أنك تتألم على أمر فات وراح، وفي زوج إذا خلاهم يسيطروا عليه الماضي يحزن عليه، والمستقبل يخاف منه، هكدا الحاضر راح يضيع منه. ربي ما قالكش ما تحزنش الإنسان يحزن، يتألم، يبكي، ويتعب وهذا هو الطبيعي حتى الأنبياء مرّوا بالحزن، الفرق هو أنك ما تخليش حزنك يتحول إلى يأس وألم يفسد يقينك بالله. الشيطان يوهمك بالخسارة والفشل وزوال النعم وربي يقول: ﴿وَاللَّهُ يَعِدُكُم مَّغْفِرَةً مِّنْهُ وَفَضْلًا﴾خلي في قلبك مساحة للفرح، للابتسامة، للكلمة الطيبة، ولحسن الظن بالله.. الشيطان يحب يشوفك حزين لأنو الحزن إذا استولى على القلب أضعفه، والله يحبك أن تكون راجيًا، مستبشرًا بفضله، حامدًا لنعمته، ومتوكّلًا عليه سبحانه. #طيف

لا حول ولاقوة إلا بالله الجزائر اليوم وحنا نشوفوا الحرائق في ولايات الجزائر، نشوفوا أماكن من شدة جمالها كانت تشبه الجنة لكن للأسف غطاها السواد اليوم، والجزائر كاملة راهي حزينة على واش أصاب إخوتنا. هاذ الحريق راح ضحيتو عائلات وأطفال وشيوخ وحيوانات، وراه رجال ضحوا بأنفسهم باش ينقذوا الناس ويوقفوا النار. حنا اللي بعاد على الحادثة، يمكن ما نقدروش نعاونوا بزاف بصح نقدروا نعاونوا بالدعاء واللي يقدر يتبرع أو يساهم، يروح لأقرب جمعية موثوقة ليه ويساهم باللي يقدر عليه. وزيد ما تنساوش بلي حنا ثاني مسؤولين على الحفاظ على هاذ الطبيعة، من خلال انك ما ترميش الدخان، وما تخليش النار شاعلة، وكي تروح لبلاصة ما تخليش القمامة وراك، خاصة الحاجات اللي تقدر تسبب الاشتعال. هاذ التصرفات اللي نشوفوها بسيطة ونقولو وش راح دير، تقدر تكون عواقبها أكبر بآلاف المرات من واش نتخيلو. اللهم ارحم من فقدوا أرواحهم، واشفِ المصابين واجعلها بردا وسلامًا على أهلنا، وألطف بنا فيما جرت به المقادير وأطفئ عن بلادنا نارها، ورد عليها أمنها وخيرها. #وَهج

لا حول ولاقوة إلا بالله الجزائر اليوم وحنا نشوفوا الحرائق في ولايات الجزائر، نشوفوا أماكن من شدة جمالها كانت تشبه الجنة لكن للأسف غطاها السواد اليوم، والجزائر كاملة راهي حزينة على واش أصاب إخوتنا. هاذ الحريق راح ضحيتو عائلات وأطفال وشيوخ وحيوانات، وراه رجال ضحوا بأنفسهم باش ينقذوا الناس ويوقفوا النار. حنا اللي بعاد على الحادثة، يمكن ما نقدروش نعاونوا بزاف بصح نقدروا نعاونوا بالدعاء واللي يقدر يتبرع أو يساهم، يروح لأقرب جمعية موثوقة ليه ويساهم باللي يقدر عليه. وزيد ما تنساوش بلي حنا ثاني مسؤولين على الحفاظ على هاذ الطبيعة، من خلال انك ما ترميش الدخان، وما تخليش النار شاعلة، وكي تروح لبلاصة ما تخليش القمامة وراك، خاصة الحاجات اللي تقدر تسبب الاشتعال. هاذ التصرفات اللي نشوفوها بسيطة ونقولو وش راح دير، تقدر تكون عواقبها أكبر بآلاف المرات من واش نتخيلو. اللهم ارحم من فقدوا أرواحهم، واشفِ المصابين واجعلها بردا وسلامًا على أهلنا، وألطف بنا فيما جرت به المقادير وأطفئ عن بلادنا نارها، ورد عليها أمنها وخيرها. #وَهج

الساكت عن الحق شيطان أخرس.. التبليغ شيء والوشاية شيء ثاني، والخلط بيناتهم هو اللي مغلط بزاف ناس و مخليهم ساكتين على المنكر. لهذا لازم نصححوا المفاهيم الوشاية هي أنك تنقل كلام ولا معلومات بقصد الإضرار بإنسان ولا الإيقاع بيه، والتبليغ أنك توصل معلومة عن جريمة ولا خطر للجهات المختصة، باش يتوقف الضرر والمظلوم يدي حقو . بصح في مجتمعنا العكس اللي يبلغ على تجاوز يقولوا عليه خاين، واللي ساكت على الحق يقولوا عليه راجل وما يدخلش روحو كأنو الرجولة أنك تشوف الظلم وتسكت عليه. كي تشوف واحد يتحرش بالبنات ضميرك كيفاش يخليك ساكت ولا كي راك ساكت على لي يبيع المخدرات والسموم في حومتك ولا كي تشوف واحد يتسرق ويطلب في مساعدة وتقول لا أنا واش دخلني المهم تخطي راسي! في هاد الحالات سكوتك يخلي المجرم يتمادى والجريمة تولي حاجة عادية والنبي ﷺ: «مَن رأى منكم مُنكرًا فليُغيّره بيده، فإن لم يستطع فبلسانه فإن لم يستطع فبقلبه وذلك أضعف الإيمان». بصح كاين نقطة، التبليغ ما يعنيش أنك تخرج تشهر بالناس في مواقع التواصل الاجتماعي ولا تفضحهم في القهاوي، ولا تروح تواجه المجرم وحدك، إذا شفت أي تجاوز بلغ الجهات المختصة الشرطة القضاء ولا أي جهة مسؤولة حسب الحالة، وخلي نيتك حسنة بلا تشهير ولا تصفية حسابات. هكدا يبدا التغيير ماشي بالقوانين وحدها، بعقلية كل واحد فينا، لازم نفهموا أنو التبليغ عن الجريمة حماية واللي راك ساكت عليه اليوم، يقدر غدوة يلحق لدارك .. اشكي بلّغ أوقف مع الحق.. المؤمن لازم كي يشوف المنكر ما يسكتش عليه. #طيف

وَجَاءَ مِنْ أَقْصَى الْمَدِينَةِ رَجُلٌ يَسْعَىٰ قَالَ يَا قَوْمِ اتَّبِعُوا الْمُرْسَلِينَ (20) يس هاد القصة تع شخص من اقصى المدينة جا يهدر مع ابناء المدينة ينهاهم على وش رح يدير، كانو حابين يقتلو الرسل لي جاو ليهم، كامل الناس سكتو من خوفهم، إلا هذا البنادم ماخافش يدافع على الحق، قالولو نقتلوك لوكان تبقى دافع عليهم، قالهم ماعنديش مشكل، لما مات قيل له ادخل الجنة قال ياليت قومي يعلمون القوم تاعو بعقلية المجتمع تعنا دوك وش يقولو، يقولو اك تشوف جا يدخل روحو قتلوه، مزية مادخلناش روحنا حنا، صح ولا لا ؟ السيد هذا مصيره مذكور في القرآن بأنه دخل الجنة، كي شاف البلاصة لي راه فيها قال ليتهم يعلمون، بلي لي يدافع على الحق، حتى ويتعرض لأذى ويم.وت، راه جزاء كبير يستنا فيه، هادو الناس لي يحبو يمو.تو من اجل الحق، ولحق الايمان تعهم لدرجة التضحية بالنفس، بسك عارفين الصح وين، عارفين بلي الدنيا هادي تشبه للماء لي يشمخ اصبعك، من محييط كبير الدنيا ماتسوا والو، حرفيا، مقارنة مع وش واعدنا ربي، بصح ولينا متشبثين بيها كثر من كلش، كثر من الآخرة تعنا كثر ملي نحبو الجنة والنعيم، ليتنا نولو لهديك القوة، لي مانخافو والو مقابل الجنة، ليتنا نعود لزمن، يبكي فيه الرجل لأنه أشتغل باله بأمر من أمور الدنيا. القرآن معمر قصص، وآيات لي نورمالمو تخلي الواحد يفطن شوية، بصح معلباليش علاه رانا بعاد بزاف لدرجة لا توصف، مانتأثروش، مانتفكروش في كلام الله، بينما يحكيلنا على حال الناس لي قبلنا وكيفه كانت النهاية تعهم، ويمدلنا الطريق لي لازم نمشو عليها، بصح حنا والو، للأسف. #يـــعقوب

ماش ملاحظين ناس كامل ولات تشبه لبعضاها؟ نفس الأسلوب نفس الكلام حتى نفس طريقة اللباس، ولي يحب يكون مختلف ويكون عندو أسلوب خاص فيه ميخلولوش الفرصة وينبذوه قبل كنا نقدروا نميزوا العباد من طريقة كلامهم، لبستهم وحتى طريقة عيشتهم كل واحد كانت عندو حاجة تميزو على غيرو. بصح دوك حتى هاذي وراحت ولينا نتشابهو مجرد نسخة مكررة من واش فرضت علينا مواقع التواصل وواش فرض علينا الترند وهذا لي خلا كلشي باهت ومكرر ومافيهش حياة وخالي من الإبداع . والمشكل أنو هاذ الظاهرة ما حبستش هنا بالعكس انتقلت حتى للبيوت، تلقا واحد يصمم دارو على حساب واش راه ترند، ماشي على حساب واش يحب هو، يشوف ديكور منتشر في مواقع التواصل ديراكت يديرو في عوض مايبني بيت يشبهو و يشبه شخصيتو. وفي الأخير ماشي لازم تكون تشبه للناس في كلشي باش تحس بالانتماء لانو حتى لو لقيت الانتماء لي تحوس عليه راح تفقد نفسك وسط كامل هاذ التشابه. #وَهج

علبالكم؟ كل ما نقرأ في سير الصحابة والتابعين، يغيضني حالنا أكثر والله.. ! كل ما نقرأ على شباب قدنا ولا أقل منا، نقول: هما وين.. وحنا وين؟! أسامة بن زيد رضي الله عنه، الصحابي لي كان النبي ﷺ يحبه حبًا شديدًا، حتى كان يُلقّب بـ «الحِبّ ابن الحِبّ». كان صغير في السن، بصح كبير في الهمة.. يحب الجـ.هاد، وكل مرة يطلب من النبي ﷺ أنو يخرج مع المسلمين، وكان يُرفض لأنو صغير. تخيلوا؟ في غـ.زوة الخندق، أُجيز له القت.ال وهو ابن خمس عشرة سنة. وفي حنين، كان من هذوك لي ثبتوا مع النبي ﷺ كي اضطربت الصفوف في بداية المعـ.ركة. وبعد سنوات قليلة برك، بلغ حوالي ثماني عشرة سنة. وش صرا؟ ؟ النبي ﷺ جهّز جـ.يشًا عظيمًا متوجهًا إلى الروم، وعيّن أسامة بن زيد قائدًا عليه. والجيـ.ش هذا كان فيه كبار الصحابة، ومنهم أبو بكر وعمر رضي الله عنهما، لكن النبي اختاره هو!! شاب في الثامنة عشرة.. يقود رجالًا أكبر منه سنًا وتجربة، يقود رجال مكانش لي ما يعرفهمش بأعمالهم. علبالكم وش يغيض أكثر.. أننا اليوم كي يوصل واحد ل 18 سنة، ما زلنا نقولو: «خليه راه صغير.» و«مازال مراهق.». طبعًا كل واحد وظروفه، ومش المطلوب من كل شاب يكون قائد جيش. بصح في 18 سنة تقدر تكون حافظ كتاب الله، كيما تقدر تكون طالب علم، كيما تقدر تتحمل للمسؤولية وتنفع لوالديك. ولا تبدأ مشروعك، وتكون صاحب أثر. ساو، أوقف مع روحك و سقسيها: هما وين؟ وحنا وين؟ وأنت وين تحب تكون؟ #نور