أُترك أثر ♥️✨️"دفعة شيماء السيد "

كل مريض ربنا بيبعتهولك هو أمانة بين إيديك. يمكن ربنا حطك في المكان ده علشان تكون سبب في تخفيف ألم إنسان، وهتتسأل: هل عملت مع الحالة كل اللي تقدر عليه؟ هل استخدمت علمك وضميرك؟ ولا كنت مستعجل تخلص يومك وساعات شغلك وخلاص؟ ولو قابلتك حاجة جديدة هل دورت عليها واتعلمتها علشان تساعد المريض؟ ولا فضلت واقف مكانك؟ افتكر إنك متعرفش المريض ده تعب قد إيه علشان يوصل لك... ممكن يكون دفع آخر فلوس معاه، أو سافر مسافات طويلة، أو عاش شهور وسنين بيتألم ومستني حد يساعده. علشان كده... اشتغل لله قبل أي حد، وراعي ربنا في كل حالة تقابلك. ومتقولش: "المرتب قليل." أو "إحنا في الامتياز ومبناخدش فلوس في المستشفى مثلا أو "مش فارقة." لأن اللي هيتحاسب عليه في الآخر هو ضميرك وإخلاصك في شغلك، مش قيمة مرتبك. ولو حاسس إنك مش هتدي المريض حقه، يبقى الأفضل تسيب الحالة لحد يقدر يقوم بالأمانة دي. المهنة دي مش مجرد وظيفة... دي رسالة، وأمانة، ورحمة قبل أي شيء. ربنا يجعلنا جميعًا سببًا في شفاء الناس، ويعيننا على أداء الأمانة كما يحب ويرضى. 🤍 #Dr_Amr_mousa

مساء الخير يا رِفاق.. حابب أشارككم إنجاز بسيط كدة🥰 من فترة م. أحمد عامر كان طلب ديزاينرز متطوعين لعمل Thumbnails (صور مصغرة) لفيديوهات اليوتيوب والسلاسل بتاعته... احنا تطوعنا في سلسلة " السيرة النبوية " والسلسلة اتعدلت من يومين تلاتة وال Thumbnails الجديدة اللي احنا عملناها نزلت، فا ادخلوا شوفوها بقا🥰❤ 🔻وبمناسبة سلسلة السيرة النبوية لـ م. أحمد عامر.. • فا خليني استغل الكلام عنها وأنصح أي حد مسمعهاش إنه يسمعها بجد... • حتي لو سمعت السيرة من أي حد تاني... اسمعها من أحمد عامر.. ولو سمعتها منه قبل كدة ارجع اسمعها تاني.. • محتاجين كل حرف وكل إسقاط وكل تطبيق عملي اتقال في السلسلة دي إننا نرجع نفتكره من تاني❤ 🔻لينك السلسلة: https://youtube.com/playlist?list=PLSSxr3Rf2_X2oKwiy4UhzIdj4ACzB6dee&si=c7zJnV8M-zuYTsIG

📌 نظام ال Score في هذا الموسم " أســرار": -  هيكون فيه تقييم واحتساب نقاط أو Score (البوست القادم) - ع أساس ال Score ده هيتم اختيار 3 فائزين والتواصل معاهم لإرسال هدايا مع نهاية الموسم.. والتقييم ده هيتم من خلال المداومة والمشاركة في الأنشطة اللي هتنزل ◽ المركز الأول: • كتابين "زوايا وخرائط" للشيخ محمد السيد ماضي • الإشتراك في دورة مجالس التدبّر في "أول شبر" لـ م. أحمد عامر (أو أي دورة من "أول شبر" يختارها الفائز) ◽ المركز الثاني: كتاب " تدبّـرات السّعدي " ◽ المركز الثالث: كتاب " المختصر في التفسير " 🔸المركز الاستثنائي • مبلغ 500 جنيه • لوحة " وأن ليس للإنسان إلا ما سعى " وده اللي هيحفظ معانا ترتيب السور بأرقام ترتيبها بعدد آياتها وهيجيب أعلي Score في الاختبار الخاص بيها وهنقولكم هنحفظهم ازاي على مدار المسار ده♥ هنبدأ احتساب ال Score بدايةً من الأسبوع الثاني عشان تكون الناس التزمت وعشان يبقي فيه فرصة إن حد يشترك معانا تاني في الفترة دي متنساش بس تدعيلنا وتصلي علي النبي، ومتنساش تشارك أصحابك لينك القناة وتخليهم يبدأوا معانا في تدبر القرآن جعلنا الله وإياكم من أهل القرآن وحَمَلته دُمتم بخير❤️

🔴 طيب نحفظ الترتيب ده بسهولة ازاي؟؟؟ عندنا ألف طريقة وطريقة... منهم مثلًا ◽طريقة الخمسات إنك تقسمهم مجموعات صغيرة ​احفظ كل 5 سور مع بعض (مثلاً: الفاتحة، البقرة، آل عمران، النساء، المائدة) وهكذا، بحيث بعد كدة لما توصل المائدة تبقي عارف انك خلصت أول مجموعة وداخل ع الأنعام ◽تحدي السورة التالية ​دي لعبة تعملها مع نفسك أو مع حد صاحبك: ​حد يقولك اسم سورة، وأنت تقول اللي بعدها فوراً ​لو اتلخبطت، افتح المصحف وشوف الصح، الحركة دي بتخلي المعلومة تثبت ​◽التسميع الصامت ​دي طريقة ممتازة للناس اللي مش بتحب تقعد قدام المصحف كتير. ​وأنت ماشي في البيت أو رايح مشوار، حاول تسمّع في سرك ترتيب السور ​لما توصل لسورة وتنسى اللي بعدها، افتح الموبايل أو المصحف وراجعها فوراً. الحركة دي بتخلي الذاكرة تصحصح وتثبت المعلومة أكتر ◽المشاركة الجماعية ​لو ليك صاحب أو جروب بتحفظوا سوا، اعملوا حلقة وصل ​كل واحد يقول اسم سورة، واللي عليه الدور يقول السورة اللي بعدها فوراً. ​الحماس والمنافسة بيخلوا المعلومة تثبت أسرع بكتير من الحفظ لوحدك. عايزين كلنا نحفظ ترتيب السور🥰♥♥♥♥ لا تنسونا من صالح دعائكم، وصلوا على النبي💗 دُمتم بخير❤

🔴 ليه نحفظ ترتيب سور القرآن الكريم؟؟؟ ١. خريطة لذهنك.. لما تكون عارف ترتيب السور، عقلك بيبقى زي اللي حافظ خريطة للمصحف، فمش هتتوه وأنت بتقرأ أو بتسمع، وكل سورة بتسلمك للي بعدها من غير مجهود. ٢. السور مترتبة بحكمة ربانية، لما تحفظهم بالترتيب، هتبدأ تلاحظ الخيوط اللي بتربط السور ببعضها، وهتفهم ليه السورة دي جات بعد السورة دي، وده بيخلي تدبرك للقرآن أقوى بكتير. ٣. الصحابة رضي الله عنهم نقلوا لينا المصحف بالترتيب ده، فأنك تحفظه زيهم، ده في حد ذاته توقير وإكرام لكلام ربنا، وفيه اتباع لسنة النبي ﷺ. باختصار.. الترتيب ده بيخلي المصحف محفور في ذاكرتك، فبيبقى استرجاعه سهل جداً ومنظم، زي كتاب أنت عارف صفحاته بالظبط ماشية إزاي.

"لأن عندي أعظم تجارة مع ربّي 🤍"

وإحنا كمان نفسنا نفوز بالتجارة دي... وعشان كده جايين لكم بموسم جديد بعنوان "أسـرار" ✨ رحلة مختلفة عن كل المواسم السابقة.. المرة دي مش هنقف مع سورة أو اتنين، لكن هناخد رحلة سريعة وخفيفة في القرآن كله، نتعرف فيها على مقاصد السور ومعانيها من خلال بودكاست "أسرار القرآن". رحلة تساعدنا نقرب أكتر من كتاب ربنا، ونبص للقرآن بصورة أشمل وأوضح، ونكتشف معاني كتير ممكن تكون فاتتنا. 📅 البداية: 13 / 6 🏁 النهاية: 28 / 8 مع اختبار نهائي في الأسبوع الأول من سبتمبر.. وكمان الموسم ده هيكون بنظام الـ Score للمتابعة، مع جوائز للمتميزين ( ال TOP 3) 🎁 وقريب جدًا هنعلن كل التفاصيل... لا تنسونا من صالح دعائكم، وصلّوا على النبي ﷺ دُمتم بخير❤️

دعواتكم لزميلتنا د. هناء شعبان في العناية المركزة إثر حادث أليم.. يارب، أنت الكريم وأنت الشافي، وبحق هذا المعروف الذي كانت تفعله ابتغاء مرضاتك، وبحق دعوات كل محتاج وأم طفل شفت حالته.. اشفِ هناء شعبان وعافها والطف بجسدها اللهم اجعل هذا العمل الصالح شفيعاً لها وطهوراً لجسدها من كل ألم ونزيف. ادعولها يا جماعة في هذه الأيام المباركة 🤲🏻

دروس مهمة مهمة مهمة ليوم عرفة

لقاء عرفة الدكتور احمد العربي والشيخ نبيل العوضي https://youtu.be/PYOw_Exj2Bk?si=HsNg7TEYS7WCWOzF الدعاء رابح رابح للشيخ محمد خيري https://youtu.be/fDlLRLenXGs?si=Lo9J-TBGeYaUx4ZM هندسة الدعاء للشيخ محمد خيري https://youtu.be/o4r6lldJ0e4?si=Bswb_4lGv6QGIKuY إذا نكثر للشيخ محمد خيري https://youtu.be/APNsmKsMIKo?si=yfi_A0bcd_9dfssB

🔻في يوم عرفة.. ما تختصروش الدعاء! في يوم عرفة ما تخلوش دعاءكم محصور بس في الحاجات اللي نفسكم فيها.. لأ، اتعمقوا أكتر لحد ما توصلوا للشخصية اللي بتطمحوا تكونوا عليها، وللطريقة اللي بتتمنوا تعيشوا بيها حياتكم. أنا عارف إن الجواز والوظيفة وغيرها من الأمور المصيرية في حياتنا مهمة جدًا ولازم ندعي عشانها، بس ما تنسوش تدعوا إن ربنا يقويكم، ويبعد عنكم الرياء والتسويف في شغلكم.. انتوا عارفين الدعاء ده ممكن يغير حياتكم إزاي؟ مش هتبقوا مستنيين إعجاب من حد، ولا هتأجلوا أعمالكم سواء كانت الحاجة دي للدنيا أو للآخرة! • ادعوا إن تركيزكم يزيد بالطريقة اللي تنفعكم، وإن ربنا يبعد عنكم الغل والحسد. • ادعوا إنكم تكونوا من سواعد الخير في الدنيا، وتكونوا دايمًا على طريق الحق، وتنصروا المظلوم عشان ربنا ينصركم. • ادعوا إن مخاوفكم تختفي وإن ربنا يرزقكم قلب شجاع. • ادعوه بالستر.. ادعوا إن ربنا يستركم فوق الأرض، وتحت الأرض، ويوم العرض عليه.. يستركم في دنياكم ووقت مماتكم وعند قبركم، ويستركم يوم ما تقفوا بين إيديه! • ادعووووا إن ربنا يحبكم ويرضى عنكم.. انتوا لو حبيتوا حد ما بتقصروش معاه، ولو بإيدكم تدوا له عنيكم بتدوها له، فما بالكم بقى بربنا لو أحبكم ورضي عنكم؟ • ادعوه بالجنة. • ادعوه بحسن الخاتمة. • ادعوه بتيسير الحساب. • ادعوا إن قبوركم تكون روضة من رياض الجنة. • ادعوه إنه يفقهكم في الدين ويفتح عليكم فتوح العارفين. • ولما تيجوا تدعوا بالوظيفة.. ادعوا إنها تكون وظيفة تزود شغفكم مش تطفيه، بيئة تكبر حبكم للعمل مش تنقصه، بيئة تتحمسوا إنكم تروحوها كل يوم عشان تنجزوا وتفيدوا غيركم. • ولما تيجوا تدعوا بالزوج الصالح.. ادعوا معاه بـ عيلة زوج صالحة، ادعوه ببيت مليان هدوء وسكينة، ادعوه إن ذريتكم تكون صالحة وبارة ومطيعة وهادية، لا تتعبكم ولا تفتنكم. • وادعوه بسعة الرزق، وادعوه لو رزقكم إنه يرزقكم فلوس متتعبكمش ولا تخليكم تتكبروا.. فلوس تعينكم على دخول الجنة، وادعوا إن فلوسكم دي يكون للفقراء والمساكين نصيب منها. • ادعوه إنه يرزقكم الحكمة والفطنة والنباهة، كل الحاجات دي بإذن الله هتخليكم تعيشوا حياة هنية وسعيدة. • ادعوه إنه يبارك لكم في أهلكم ويوسع أرزاقهم، لأنكم جزء منهم. • ادعوا إنكم تكونوا بارين بوالديكم وسند لإخواتكم وإخواتكم سند لكم، وقدوة حسنة لكل اللي حواليكم. • ادعووووا إن ربنا يسخر لكم ملائكة السماء وجنود الأرض وكل من تولى أمركم.. أنتوا عارفين الدعاء ده عظيم قد إيه؟ عارفين يعني إيه كل حاجة تتسخر لكم! • ادعوووا بالصحبة الصالحة والمحيط الصالح، وإن ربنا يحاوطكم بناس طيبين يعينوكم على طاعته وعلى الرفعة في الدنيا والآخرة. • ادعوا بالعزة.. إنكم تكونوا عزيزين في الأرض دي. • ادعوا إن ربنا يسخركم لخدمة عباده، عشان يوم ما تقابلوه تقولوا: "يا رب قضينا حياتنا في مساعدة عبادك فارحمنا". • ادعوا بالسمعة الطيبة سواء وأنتوا عايشين أو بعد مماتكم، عشان سيرتكم ما تنقطعش، وكل اللي يفتكركم يترحم عليكم ويتمنى إنكم تكونوا في جنات ربنا بتتنعموا بنعيمه. • ادعوووا إن ربنا يثبتكم عند السؤال وعلى الصراط. • ادعوا إن ربنا يعينكم وينصركم ويهديكم وييسر لكم أموركم، وادعوا إنكم تكونوا شاكرين ذاكرين عابدين. • ادعوا إن ربنا يكفيكم شر كل مرض، وكل إنسان عايز بيكم ضر، وكل عادة سيئة في حياتكم. • ادعوووا إنكم تكونوا من العتقاء من النار. • ادعوا إن ربنا يعينكم على أداء الطاعات، وإن ربنا يعلق قلوبكم بيه. • ادعوووا إنكم تحفظوا القرآن. • ادعوا حتى إن ربنا يظهر قدامكم الفيديوهات المفيدة والكتب المهمة عشان حياتكم تتحسن! 🔴 يوم عرفة يوم عظيم، وربنا رحيم.. ادّانا يوم نتمنى فيه كل حاجة عايزينها، وبإذنه هتحقق. اطلبوا كل حاجة.. كل حاجة! صغير الأمور وكبيرها، ادعوه بحياة هنية طيبة، ورزق سهل ويسير، وبإذن الله هيتحقق. 🔸 النبي ﷺ بيقول:

"لِيَسْأَلْ أَحَدُكُمْ رَبَّهُ حَاجَتَهُ كُلَّهَا، حَتَّى يَسْأَلَ شِسْعَ نَعْلِهِ إِذَا انْقَطَعَ."

- عارفين إيه هو الشسع؟ = هو السير أو الرابط اللي بيكون في الجزمة -أعزكم الله-. شايفين قد ايه الحاجة دي بسيطة وصغيرة جدًا !  ومع كدة النبي ﷺ بيقول اسألوا ربنا إنه يديها لكم، فما بالكم بقى بحياتكم الكبيرة؟ ترى الدعاء بإذن الله هو اللي هيغير حياتكم ويخليكم تعيشوا الحياة اللي بتتمنوها. ربنا يعيننا ويعينكم على قيام يوم عرفة بالشكل اللي يرضي وجهه الكريم.. ثم يرضينا❤

حد أخد الكورس الاونلاين ال stroke لدكتور عمر ناجي ؟ هل هو فيه أفاده على المستوى العملي و هل مستواه العلمي نفس داتا الكليه ولا فيه زيادات كويسه ؟ هل اللي خده لو رجع بيه الزمن هياخده تاني ولا فاكس⁉️

🔴 من أهم الحاجات اللي مهم نعملها في العشر الأواخر هي الإكثار من النوافل.. وأعظم النوافل في هذه الأيام الذكر، وأعظم الذكر كلام الله (القرآن)❤ أقل حاجة وأضعف الإيمان تختم ختمة، يعني قراءة 3 أجزاء كل يوم، لو حابب تختم أكتر من مرة جميل، لكن أقل من ختمة مينفعش، والإكثار من مطلق الذكر، التكبير والتهليل وخصوصًا يوم عرفة. وعشان كدة عملنا جروب لختم القرآن في العشر الأواخر.. جروب يشجعنا ويخلينا نحس بالإنجاز اللي هنعمله وعشان كمان يفكرنا إننا منتكاسلش.. هنتابع مع بعض من خلال تطبيق "حُفَّاظ القرآن" 🔻وده بوست عن التطبيق: https://t.me/aawnnnQuran/623 🔻🔻كيفية استخدامه: https://t.me/aawnnnQuran/642?single 🔻🔻🔻وأخيرًا ده لينك الجروب اللي هنتابع من خلاله الختمة " وليالٍ عشر - عَوْن " : https://huffazulquran.com/resolve?group=KIMTQDmVDV لا تنسونا من صالح دعائكم، وصلوا على النبي💗 دُمتم بخير❤️

ممكن لايك ع الكومنت ده هنا فضلاا https://www.facebook.com/share/1Cbyphyrog/ Don’t skip please 🥺

السلام عليكم و رحمة الله و بركاته ازيكم يا دكاتره فيه حاله محتاجه مساعدتنا. متشخصه صدفيه و محتاجه ٣ حقن غاليين ... هي خدت واحده منهم و دلوقتي محتاجه تدبر فلوس الاتنين الباقيين فلو حد يقدر يساعد بأبسط مبلغ أكيد هيكون كبير في ميزان ربنا و افتكروا ان الصدقة تطفئ غضب الرب، وتكفر الذنوب، وتزيد الرزق وتببارك المال، كما تقي من المصائب وتظل صاحبها يوم القيامة دا رقم التبرع لأنستا باي| 01140582586 جزاكم الله خيرا كثيرا🤍

كيف يمكن أن أغير حياتي؟

نخوض معًا رحلة جديدة مع القرآن للإرتواء به والاستزادة من نوره، ونستعين بخطة من الشيخ أحمد النفيس مع وضع بعض التعديلات وزيادة مدة الخطة حتي تكون مناسبة لأغلبنا مسار نتدبر فيه سور ق، يوسف، والفرقان .. ثم نُنهي هذا المسار بختم القرآن الكريم بإذن الله♥ ▫وكمان بودكاست كل يوم جمعة عن القرآن حتي نجدد علاقتنا به🤍 📆 البداية: ٦ / ٥ 🏁 النهاية: ٢٨ / ٥ لا تنسونا من صالح دعائكم، وصلوا على النبي ﷺ 💗 دُمتم بخير❤

أوقات الروح هي اللي بتحتاج لـ "إِرْتِـــــوَاء" خطوات بسيطة، محطات مركزة، وهدف واحد: "حياة تانية خالص" ​جاهزين لـ إرتواء؟ ​قريبًا.. 🤍

السلام عليكم ممكن لو حد عارف ازاي نجهز اللاب لامتحان المزاوله؟ يعني هيتحمل عليه ابليكيشن او حاجه و الكاميرا هل بتتفعل تلقائي اثناء الامتحان ؟ لو حد عند معلومه او سأل حد أكبر ممكن يقولنا

سبحان الله الجو مكانش يوحي أبدًا إن هيبقى فيه المطر ولا البرق ده كله النهارده! عارفين الآية اللي بتقول:

{ وَمَا أَمْرُنَا إِلَّا وَاحِدَةٌ كَلَمْحٍ بِالْبَصَرِ }

تغيير الجو في لحظة ده أبسط مثال ليها.. ربنا قادر على كل شيء ممكن تتخيله وتغيير حالك للأفضل في طرفة عين! في لحظة هتلاقي مكالمة لشغل، وأنت أصلًا قاعد مهموم عمال تحسبلها وتفكر ومش عارف تعمل ايه في لحظة هتقوم من النوم تلاقي حاجة غيّرت حياتك خالص، ومش هتبقى فاهم حصلت ازاي وامتى في لحظة كنت هتبدأ تفقد الأمل وتيأس، وبعدين تيجي حاجة من السما تحسسك إن لسه فيه أيام حلوة جاية في لحظة ربنا يرفع عنك البلاء، ويرزقك بأكتر من اللي بتتمناه، وينزّل عليك سعادة وجبر خاطر مالوش مثيل فلا تستبعد فرجًا، ولا تستبطئ خيرًا فما يأذنُ الله به لا يمنعه مانع، ولا يردّه رادّ ♥️

كالغَيْث.. أََخَذَ من هذا الضِّيــــاء💗

فاللهم اجعل القرآن ربيع قلوبنا ونور صدورنا وجلاء أحزاننا وذهاب همومنا اللهم اجعلنا من أهل القرآن الذين هم أهلك وخاصتك، واحفظ به قلوبنا من التشتت ونفوسنا من الضياع اللهم ارزقنا تلاوته آناء الليل وأطراف النهار، واحفظنا به من كل سوء وارزقنا به السكينة والطمأنينة والعفو والعافية اللهم يسّر لنا حفظه وافتح علينا فتوح العارفين، وعلّمنا منه ما جهلنا وذكّرنا به ما نُسينا، واجعله لنا في الدنيا دليلًا وإمامًا وفي القبر مؤنسًا ويوم القيامة شفيعًا وعلى الصراط نورًا وإلي الجنّة رفيقًا وإمامًا وعن النار سترًا وحجابًا اللهم آمين يارب العالمين