Min Thayt - Official

၂၀၁၈ လောက်တုန်းက ဖြစ်မယ် ထင်ပါတယ်။ မိတ်ဆွေတစ်ဦးဖြစ်တဲ့၊ ထွေအုပ်အငြိမ်းစား လူကြီးတစ်ယောက်က ကျနော် စာရေးတာနဲ့ပတ်သက်ပြီး လူကိုတွေ့တိုင်း အမြဲတမ်းလိုလို ပြောတဲ့ စကားတစ်ခုရှိတယ်။ “Sharing is caring” ဆိုတဲ့ စကားလေးပါ။ ဒါကို သူက ကျနော်နဲ့ တွေ့တိုင်း အမြဲတမ်း ပြောလေ့ရှိတယ်။ “Sharing is caring” ဗျ… “Sharing is caring” ဗျ… သူ ပြောတဲ့စကားလေးကို မကြာခဏ အမှတ်ရနေပါတယ်။ စာတွေရေးတယ်ဆိုတာ ကိုယ့်ဘာသာရေးပြီး၊ သိမ်းထားလို့ ရတာပဲ။ ဒါပေမယ့် သိမ်းမထားဘူး။ စာတွေဆိုတာ သိမ်းထားဖို့ မဟုတ်ဘူး။ မျှဝေဖို့။ သိပ်မကြာခင်က ဒဲရစ်မယ်လာကို လူငယ်လေးတစ်ဦးက အင်တာဗျူးတယ်။ ဒဲရစ်မယ်လာက ပြောတယ်။ “သီချင်းဆိုတာ သိမ်းထားဖို့ မဟုတ်ဘူး” တဲ့။ အနုပညာသမားတွေဆိုတာ ကိုယ့်အတွက်ဆိုတာထက် ကိုယ့်မှာ ရှိတာကို မျှဝေဖို့၊ ကိုယ့်မှာ ဖြစ်တည်တာကို မျှဝေဖို့၊ ကိုယ်ဖန်တီးထုတ်လုပ်ထားတာကို မျှဝေဖို့ ကြိုးစားလေ့ရှိတာပဲ။ စာတွေဆိုတာကလည်း ဖန်တီးခြင်းသဘော သက်ဝင်တာမို့၊ ဒါဟာ အနုပညာအလုပ်တစ်ခုလို့ ပြောရင် ရနိုင်ပါတယ်။ စာတွေဆိုတာ သိမ်းထားဖို့ မဟုတ်ဘူး။ မျှဝေဖို့။ မျှဝေတယ်ဆိုတာ ဂရုစိုက်တာပဲ။ ကိုယ့်ရဲ့ ကရုဏာစိတ်ကို ပြတာ။ ဒီလူ့အဖွဲ့အစည်းအတွက်၊ ဒီအသိုင်းအဝန်းအတွက် ဒီလိုစိတ်စေတနာမျိုးရှိတယ်ဆိုတာကို ပြတာ။ မျှဝေဖို့အတွက်ဆိုရင်၊ အားထုတ်ရတယ်။ အားစိုက်ရတယ်။ ကြောင့်ကြစိုက်ရတယ်။ စိတ်အားထည့်ပြီး ဖန်တီးရတယ်။ မျှဝေလိုက်ခြင်းအားဖြင့် ကိုယ်ကိုယ်တိုင်နဲ့ လူ့အသိုင်းအဝိုင်းကြားမှာလည်း ဆက်ဆံရေးတစ်ခု ရှိသွားတယ်။ တစ်ယောက်နဲ့ တစ်ယောက် အသွားအလာရှိသွားတယ်။ တစ်ယောက်နဲ့ တစ်ယောက် အပေးအယူရှိသွားတယ်။ လူမှုသိပ္ပံနယ်မှာ reciprocity ဆိုတာ ရှိတယ်။ အပေး - လက်ခံသဘောတွေပါပဲ။ လူ့အသိုင်းအဝိုင်းကြားမှာ တစ်ယောက်နဲ့ တစ်ယောက် နားလည်မှုတည်ဆောက်ဖို့၊ တစ်ယောက်နဲ့ တစ်ယောက် အစေးကပ်ဖို့၊ တစ်ယောက်နဲ့ တစ်ယောက် ပူးပေါင်းဆောင်ရွက်ဖို့ ဆိုတာတွေက ဒီလို အပေး-အယူသဘောတွေကနေ စတင်တာပါ။ တစ်စုံတစ်ခုကို အများကြားအောင် ပြောတယ်ဆိုတာက ပေးတဲ့သဘောပါ။ တစ်စုံတစ်ယောက် ပြောတာကို နားစွင့်လိုက်ခြင်းကလည်း ဂရုစိုက်ခြင်းတစ်မျိုးပါ။ မျှဝေတဲ့သူနဲ့ လက်ခံတဲ့သူကြားမှာ ဂရုစိုက်မှုဆိုတာ ရှိနေတာပါ။ မျှဝေဖို့အတွက် ဂရုတစိုက် ပြင်ဆင်ရတယ်။ ပေးတာကို ခံယူဖို့အတွက် ဂရုတစိုက်ရှိရတယ်။ နှစ်ဖက်စလုံးမှာက လေးနက်ခြင်းနဲ့ တစ်ယောက်ကို တစ်ယောက် ဂရုတစိုက်ရှိခြင်းတွေ ပါလာရတာမျိုးပါ။ စာတွေ ရေးတာ ရပ်လိုက်ရင်၊ လူ့အသိုင်းအဝိုင်းအပေါ်မှာ ဂရုတစိုက်ရှိတာကို တန့်လိုက်တယ်လို့ ခံစားရတယ်။ တကယ်တော့ ခဏတစ်ဖြုတ် စောင့်ဆိုင်းခြင်းဆိုတာနဲ့ တစ်စုံတစ်ခုအတွက် ပြင်ဆင်ခြင်းအတွက် အချိန်ယူတာပါ။ စာတွေရေးတာ ရပ်လိုက်တာတော့ မဟုတ်ပါဘူး။ ဆက်လက်မျှဝေဖို့အတွက် ပြင်ဆင်ခြင်း၊ ဆိုင်းပြင်းခြင်းနဲ့ အချိန်အခါကောင်းကို စောင့်ဆိုင်း၍ ထိရောက်တဲ့ နည်းလမ်းတွေကို ရှာဖွေနေချိန်ပါ။