POSTDA|Rasmiy kanal

Жиззахда “Уч авлод” маслаҳат кенгашининг IV республика конференцияси бўлиб ўтди Юртимиз ҳудудларидаги ички ишлар органлари фахрийлар кенгашлари аъзолари ҳамда ёш ходимлар иштирокида ўтган анжуманнинг биринчи куни фахрийлар вилоятнинг барча шаҳар ва туманларидаги таълим муассасалари ўқувчилари,  илм-фан, санъат, спорт, ҳунармандчилик, тадбиркорлик соҳаларида юқори натижаларга эришаётганлар ҳамда ИИОга бириктирилган ёшлар билан мулоқот ўтказишди. Ёшлар билан тарбиявий ишларни амалга ошириш, ички ишлар органларида хизмат интизоми ва қонунийликни мустаҳкамлаш, ёш ходимларнинг билим ва тажрибаларини оширишга оид масалалар кўриб чиқилди. Конференцияда Ички ишлар вазирининг ўринбосари, генерал-майор Даврон Назармухамедов, Ички ишлар вазирининг маслаҳатчиси, истеъфодаги генерал-полковник Зокиржон Алматов, Жиззах вилояти ИИБ бошлиғи, генерал-майор Ғайрат Қодиров ва бошқалар сўзга чиқдилар. Анжуман тафсилотлари билан газетамизнинг навбатдаги сонида танишасиз. Алижон АБДУСАТТОРОВ, ўз мухбиримиз.

Колонияда янги кутубхона ИИВ ҳузуридаги ЖИЭД 4-минтақавий мувофиқлаштириш маркази 34-сон манзил колониясида шахсий таркибнинг маънавий билимларини мустаҳкамлаш, китобхонлик маданиятини ошириш борасида қатор ишлар амалга оширилмоқда. Айни шу мақсадда яқинда манзил колониясида ходимлар фойдаланиши учун кутубхона ташкил этилди. Кутубхонада етти юздан ортиқ ўзбек ва жаҳон адабиёти дурдона асарлари ҳамда ҳуқуқий китоблар жамланган. Умид АКРАМОВ, Манзил колонияси бошлиғининг маънавий-маърифий ишлар бўйича ўринбосари, майор.

YOSHLAR MUZEYDA Sergeli tumani IIOFMB HPB yoshlar masalalari boʻyicha inspektorlari tashabbusi bilan tumandagi 50 nafardan ortiq yoshlar hamda 278-oʻrta maktabning oʻquvchilari Toshkent shahar IIBB “Shon-sharaf” muzeyida boʻlishdi. Shuningdek, shu kuni Alisher Navoiy nomidagi Toshkent davlat oʻzbek tili va adabiyoti universiteti va “Renessans” taʼlim universiteti talabalari hamda Toshkent Stomatologiya instituti qoshidagi akademik litsey oʻquvchilari uchun ham muzeyga ekskursiya tashkil etildi. Oʻz muxbirimiz. Toshkent shahri.

HAYOTGA MOSLASHTIRISH UCHUN Buxoro viloyati IIB JXX Probatsiya xizmati hisobida turuvchi nazorat ostidagi shaxslarni ijtimoiy hayotga moslashtirish maqsadida mehnat yarmarkasi tashkil etildi. Bundan tashqari, tadbir qatnashchilari bilan psixologik trening o‘tkazilib, nazorat ostidagi shaxslarni ishda, dam olish vaqtlarida va oilalari davralarida o‘zlarini yaxshi his qilishlari to‘g‘risida tushunchalar berildi. Trening davomida nazorat ostidagi shaxslarni atrofdagi fuqarolar bilan muloqotga kirishishdagi muammolari, tushkunlik holatlaridan chiqib ketish va barcha muammoli vaziyatlarni bartaraf etish choralari xususida tavsiyalar berildi. Yarmarkada 6 nafar fuqaro ish bilan taʼminlandi. A.XOLIQOV, podpolkovnik. Buxoro viloyati.

Охири кўнгилсиз воқеа Арнасой туманининг “Чўлқувар” маҳалласида яшовчи Х.Қ. ички ишлар органларига мурожаат қилиб, Дўстлик туманининг “Бунёдкор” маҳалласида истиқомат қилувчи А.А. ҳамда Б.С. товламачилик қилаётганлигини билдирган. Ушбу шахслар Фориш туманининг «Эгизбулоқ» маҳалласи ҳудудига кирувчи Айдар-Арнасой кўллар тизими бўйида қўй отарини боқиш учун аризачидан 10 миллион сўм талаб қилишган. Пулни бермайдиган бўлса, қўйларни йўқ қилиб юбориш билан қўрқитганлар. Воқеа жабрланувчидан 600 АҚШ доллари олган гумонланувчиларнинг қўлга олиниши билан ниҳояланди. Алижон АБДУСАТТОРОВ, ўз мухбиримиз. Жиззах вилояти.

JUMBOQ Yengil yoki og'ir bo'lishi mumkin, lekin vaznga ega emas. Tez va asta bo'lishi mumkin, lekin yugurishga, uchishga, suzishga qodir emas. Bu nima? Bugungi berilgan savolga Elnora Inoyatova yagona to‘g‘ri javobni yo‘lladi. Qolgan o‘quvchilarimiz ham mantiqan yaqin javobni aytishgan. Barcha bilimdonlarimizga omad tilaymiz. Javob: musiqa 👉 @postdarasmiy telegram kanalimizga a’zo bo‘ling.

ХОРАЗМГА САЁҲАТ Қашқадарё вилояти ИИБ раҳбарияти ҳамда касаба уюшма қўмитаси ташаббуси билан соҳавий хизматларнинг бир гуруҳ ёш ходимлари ва фахрийлар Хоразмга саёҳат уюштиришди. Дастлаб ходимлар элликдан ортиқ тарихий-маданий ёдгорликларни ўз ичига олган мажмуа – Хивадаги “Ичан қалъа” музей-қўриқхонасида бўлишди. Мозийда ўзига хос тамаддун, илм-фан ва маданият маркази бўлган Хоразмшоҳлар пойтахти – Хива шаҳрининг юзага келиш тарихи ва асослари билан танишдилар. – Аждодларимизнинг ақлу закоси ила бунёд этилган муҳташам меъморий ёдгорликлар мустақиллик туфайли яна сайқалланибди, – дейди вилоят ИИБ Бирлашган касаба уюшма қўмитаси раиси, подполковник Қиёмхон Омонов. – Мажмуанинг айрим қисмлари мустақиллик йилларида қайта таъмирланиб, чиройли манзара кашф этган. Иккинчи куни Урганч шаҳрининг диққатга сазовор жойлари, маъданий-марифий марказлари билан танишган саёҳатчилар шаҳар истироҳат боғидаги “Жалолиддин Мангуберди”, “Авесто ёдгорлиги” мажмуалари билан яқиндан танишдилар. С.РАҲИМОВ, ўз мухбиримиз.

ОЧИҚ ЭШИКЛАР КУНИ ИИВ Қоровул қўшинларига қарашли Қарши шаҳрида жойлашган 7533-ҳарбий қисмда “Очиқ эшиклар куни” тадбири ўтказилди. Тадбирга ИИВ Қашқадарё академик лицейи ўқувчилари ва шаҳарда жойлашган 4-, 47-сонли умумтаълим мактаблари ўқувчилари иштирок этди. Тадбир давомида жанговар техникалар ва қуроллар ҳамда бошқа воситалар кўргазмаси ташкил этилиб, ёшларнинг саволларига атрофлича жавоб берилди. Ўз мухбиримиз. Қашқадарё вилояти.

ЯРОҚСИЗ ГЎШТ УШЛАБ ҚОЛИНДИ Гулистон шаҳар ИИБ ҳамда Ветеринария ва чорвачиликни ривожлантириш бўлими ҳамкорлигида 250 кг. яроқсиз гўшт маҳсулоти ушлаб қолинди. Фуқаро И.У. бошқарувидаги «Damas» русумли автотранспорт воситасида санитария-гигиена талабларига жавоб бермайдиган мол гўштини ўтказиш мақсадида олиб кетаётганлиги аниқланиб, ашёвий далил сифатида олинган. Ҳолат юзасидан жиноят иши қўзғатилиб, тергов ҳаракатлари олиб борилмоқда. Ўз мухбиримиз. Сирдарё вилояти.

ЯНА БИР ИМКОНИЯТ Кармана тумани “Талқоқ” маҳалласида бўлиб ўтган сайёр судда пробация назоратидаги бир гуруҳ шахсларнинг иши қайта кўриб чиқилди. Қилмишидан чин кўнгилдан пушаймон бўлганлиги ҳамда жазони ўташ давридаги намунали хулқи боис 4 нафар маҳкумга яна бир имконият берилди. Мазкур шахсларга нисбатан инсонпарварлик далолатномалари қўлланилиб, улар муддатидан илгари жазо ўташдан шартли озод этилди. Аксинча, хатоларини англаб етмаган, суд белгилаб берган меъёрий талабларни бажаришдан бўйин товлаган ҳамда қайта жиноят содир этишга уринган 2 нафар шахснинг жазоси эса озодликдан маҳрум қилиш жазосига алмаштирилди. Шунингдек, жазо муддатини ўтаб қайтганлар такроран жиноятга қўл урганлик учун жавобгарлик бундан-да оғирроқ бўлиши ҳақида огоҳлантирилди. Маҳлиё ХОЛОВА, ўз мухбиримиз. Навоий вилояти.