ПУРИНЧЕН МАЛТАН. ÇЫВӐРСА ЮЛМАСАН.

❗️ Элӗк округӗнче Сурӑм юхан шывӗ урлӑ выртакан кӗперӗн сулахай енне юсанӑ. Халӗ унта автотранспорт ҫӳреет. Кӗперӗн сылтӑм енче юсав ӗҫӗсем малалла пыраҫҫӗ. Ӗҫсем графикпе килӗшӳллӗн пурнӑҫланаҫҫӗ, кӑҫалхи чӳк уйӑхӗнче вӗҫлеме палӑртнӑ.

❗️ Африкӑри Чад Раҫҫей ҫыннисене визӑсӑрах ҫӗршыва кӗме ирӗк парӗ. Улшӑнусем 2024 ҫул вӗҫӗнче вӑя кӗме пултарӗҫ. Ҫакӑн пирки ТАСС информаци агентствине Африка ҫӗршывӗн Мускаври элчи Адам Бешир Махамуд пӗлтернӗ. ❓Эсир Африкӑра пулса курнӑ-и?

❗ПОЭЗИ ТӖНЧИ Хӗвел уявӗн кунӗ-ҫке Питрав! Хӗвел уявӗн кунӗ-ҫке Питрав, Епле вылять ирех вӑл - курӑр, ав! Куккук пырне урпа пучахӗ ларӗ-ҫке, Текех сассийӗ савӑнтармӗ-ҫке. Кун кӗр енне каять-мӗн ҫаврӑнса, Ҫакна эпир тӑратпӑр чухласа. Хӗрсем яваҫҫӗ пуҫ кӑшӑлӗсем Уявчченех. Ӗлккен тумтирӗсем. Вӑййа тухать яш-кӗрӗм лапама, Хавас сасси хускатмӗ-ши кама? Асамлӑ ҫепӗҫ ҫемӗ янӑрать, Уяв карти чуна савӑнтарать. Епле хитре чӑваш пикийӗсем, Кӗрнеклӗ те маттур каччийӗсем. Ӗнер каҫран паян ирччен ҫапла Юхаҫҫӗ юрӑсем чӑн чӑвашла. Текех вара вӑййа пачах тухман, Ӗҫ-пуҫ пуҫланнӑ. Вӑхӑт та пулман. Паян уяв! Уяв пек пулмалла! Утти те типнӗ. Халӗ - канмалла. Чӑвашӑн хатӗр милӗк паяна, Хӑвармӗ ҫак ӗҫе вӑл ырана. Епле хӑмла сӑрисӗр вӑл уяв? Кӑпӑклӑскер, ытла та техӗм ҫав. Кил-ҫурт тасалнӑ. Ҫап-ҫутах урам, Хӑна-вӗрлесӗр те юлмасть никам. Така шӳрпийӗ ыррӑн кӑтӑклать, Ҫырла кукли кӗҫех пиҫсе тухать. Кил-ҫурт туллийӗ кӗреке шавлать, Чӑн-чӑн Питрав уявӗ пуҫланать. Мая Салампи

❗️Салам, юратнӑ Чӑваш Ен! ✅️ Паян республикӑра улшӑнса тӑракан пӗлӗтлӗ ҫанталӑк пулать. Сывлӑш температури +19 градусран пуҫласа +24 градус таран пулать. Ҫил ҫурҫӗртен ҫеккунтра 2-7 метр хӑвӑртлӑхпа вӗрет. Атмосфера пусӑмӗ: 749 мм. Сывлӑшри нӳрӗк: 38 процент.

🤣Шӳтлеҫҫӗ.

❗️Шупашкарти кӗмӗл волонтерсем "Буратино" юмах тӑрӑх мюзикл хатӗрленӗ. Шупашкарта пурӑнакансене социаллӑ пулӑшу кӳрекен комплекс центрӗнчи "Ретрогварди" театр студийӗ "Демографи" наци проекчӗпе килӗшӳллӗн ӗҫлет. Унта ҫӳрекенсем пукане тата драма спектаклӗсем лартаҫҫӗ. Артистсем вӑтамран 70 ҫулта. Луиза Илугина Базилио кушак аҫин сӑнарне ӑнӑҫлӑ калӑпланӑ, Ольга Усманова – Тилӗ.

❗️ Чӗрӗ ӳсен-тӑранлӑ ҫи-пуҫ шухӑшласа кӑларнӑ. Хӑйне евӗрлӗ коллекци авторӗ – Томск патшалӑх университечӗн искусствӑпа культура институтӗнчен вӗренсе тухнӑ Егор Хайбулин. Ӳсен-тӑран пусмаран шӑтса тухать, ҫавӑнпа ҫи-пуҫӑн пӗрмаях нӳрӗ пулмалла. Ҫывӑх вӑхӑтрах Хайбулин ҫӗнӗ коллекци хатӗрлеме палӑртнӑ – тум ҫинче чечекленекен ӳсен-тӑран ҫитӗнӗ. ❓Сире ҫакӑн пек тум килӗшрӗ-и? Ӑна ӑҫта тӑхӑнса кайнӑ пулӑттӑр?

❗️Парӑс спорчӗ пулӑшнипе сывлӑха ҫирӗплетеҫҫӗ. Ку ҫулла республикӑра "Ҫил терапийӗ. Мари Эл - Чӑваш Ен" проект (Президент гранчӗсен фончӗн ҫӗнтерӳҫи) пурнӑҫланать. Вӑл хавшак сывлӑхлӑ тата сусӑр ачасене инклюзивлӑ парӑс спорчӗ тата туризм пулӑшнипе реабилитаци тухма май парать. Проектпа килӗшӳллӗн, Раҫҫейре кӑларнӑ "Яркат" вӗрсе хӑпартмалли парӑс катамаранпа ҫӳреме вӗрентмешкӗн ӑсталӑх класӗсем иртеҫҫӗ. ✔️Спорт министрӗ Василий Петров палӑртнӑ тӑрӑх, паянхи кун проекта ятарлӑ ҫар операцийӗнчен таврӑнса реабилитаци тухакансем те хутшӑнаҫҫӗ.