SunanTV | Fazliddin Shahobiddin

#ТАЪЗИЯ Раббимқул домлани Аллоҳ раҳматига олсин. Вафот этганларини эшитиб бироз маҳзун бўлган бўлсам, Мадинада вафот топганларини эшитиб, тўғриси, ҳавасим келди. У кишини бир одатлари бор эди: намоздан кейин бирор ҳадисни айтиб, уни шарҳлаб берар эдилар. Росулуллоҳ саллоллоҳу алайҳи васалламга ва У Зотнинг ҳадисларига бўлган муҳаббат у кишини шундей гўзал хотималарга эришишига сабаб бўлган бўлса ажаб эмас. Домлани анчадан буён танийман, масжидларига бориб турардим. Дуо орасида ҳадис айтиб беришларини ҳам домладан ўзлаштириб, ўзим ноиб имом бўлиб ишлаб турган (халқ тилида штаб дейилади) масжидда жорий ҳам қилган эдим. 2018 йил сентябр ойидаги Президентга мурожаат қилиб чиқиш воқеасидан кейин ҳеч қанча ўтмасдан ҳуфтон намозига Себзорга бориб қолдим. Раббимқул домла мени кўриб қолиб, олдига чақирдилар. Қўярда қўймай, олдиларига келмагунимча намозни ҳам бошламай турдилар. Саф оралаб ўтиб, орқаларида намозга турдим. Намоздан кейин Қуръон тиловат қилишга микрофон тутқизди. “Домла, ундай қилманг, ҳозир ўрни эмас-микин” десам ҳам, тиловат қилиб беришимни талаб қилиб туриб олдилар. Ўша вақтлар бизни олдинги сафга ўтказиш тугул, микрофон бериб тиловат қилдириш тугул, биз билан сўрашишни кўпчилик ўзига жиноят деб биларди. Домла намоздан кейин хоналарига таклиф қилдилар. “Домла, шунчалик қилдиз, раҳмат. Шунча эътибор… Сизга зиёни тегиб қолишидан қўрқаман”, десам, домла: “Майли, зиёни тегса ҳам, шуни ҳам қила олмайликми энди?” деган эдилар. Мени зарур ишларим бор узр деб хоналарига киришдан бош тортдим. Ўшанда домланинг таваккулига, тақдирга бўлган ишончига, бир мўмин дўстига керакли пайтда қандай далда бера олишига қойил қолганман. Шундан кейин домлани қайтиб кўрмадим, фақат саломларимизни танишлардан юбориб турдик. Бир сўз билан айтганда, домла мард инсон эди. Мўминда топилиши керак бўлган аксарият фазилатлар мужассам эди. Ҳозир домланинг вафотларини эшитиб, тўғриси, яқинларига шундай инсонни йўқотиш қанчалар оғир бўлишини тасаввур қилиб кўряпман. Бизга керакли пайтда кўрсатилган илтифот ва далдадан қанча хурсанд бўлиб эслаб юрарканман, энди бу инсоннинг яқинлари у кишининг қанча яхши фазилатларидан баҳраманд бўлганлари учун бу жудолик уларга осон бўлмаслигини кўз олдимга келтираман. Аллоҳ яқинларига сабр берсин, сабрларига ажр берсин. 🪶 Fazliddin Shahobiddin 🎞 YouTube: SunanTVrasmiy 🌐 Telegram: @Sunan_TV 🌐 Facebook: fb.com/SunanTV