المُلْتَقَىٰ الجَنَّة 🤍✨

حاولت كتير اقرأ وأحب القراءة والكتب والموضوع فشل جربت كل النصايح وبردو مفيش رغم حبي للكتب واقتناءها انصحني يمكن في أمل ج/ قبل ما أقولك نصيحتي فأنا أنا إن محدِّش قالك النصيحة دي ودمجها بالقراءة، ولما تقرأ الإجابة يمكن هتحسّها غريبة شوية، ويمكن تقول: إيه علاقة ده بها؟ بس صدَّقني دي النصيحة اللي لو طبّقتها هتشوف فرق حقيقي في حياتك مش بس مع القراءة. عايز تبدأ تقرأ وتستقر في القراءة؟ توقّف عن الريلز، وخفّف سوشيال ميديا. بكلمك بجد، الموضوع بالبساطة دي، وبالصعوبة دي في نفس الوقت، ليه بقا؟ ١-لأن القراءة بطيئة، والسوشيال ميديا سريعة جدًا.. القراءة بتعيطك سعادة ودوبامين على المدى البعيد، يعني لازم تصبر نصف ساعة على الأقل عشان تندمج، ولازم تخلص كتاب كامل أو رواية كاملة عشان في النهاية تطلع بالإفادة أو بالسعادة بتاعة النهاية والشعور بالإنجاز، وده غالبا هياخد منك على الأقل أسبوع مثلا! يعني السعادة هتوصل لك بعد أيام. طيب السوشيال ميديا والريلز؟٣٠ ثانية بس وضغط على الشاشة والدوبامين يشتغل! فطبيعي عقلك يرفض القراءة، ويختار المتعة الأسهل والأسرع.. ٢-دماغك اتعوَّدت على التنوّع والانتقال السريع فيديو ضحك، بعده مقطع ديني، بعده مقلب، بعده كورة أو أي حاجة من اهتماماتك أو ترشيح الموقع ليك، وفي دقيقتين بس هتلاقي نفسك عقلك شاف ٦ مواضيع و٦ مشاعر مختلفة عن بعض! على عكس القراءة هتلاقي نفسك بتقرأ في نفس الموضوع لنفس الكاتب، مفيش تغيير كل ٥ يواني، فهتحس بملل كبير جدا، وهتعمل حاجة من الاتنين: يا إما هتقفل الكتاب ومش هتقرأ، يا إما هتقرأ صفحة وتمسك الموبايل شوية، تقرأ صفحة كمان وتمسك الموبايل، هتيجي تبص في نص ساعة محصلتك في القراءة ٥ صفحات ده لو كمّلت. بص، في النهاية عشان مطوّلش عليك لأن الموضوع ده يطول جدا ولو عايز تتوسع فيه اقرأ عن (تعفُّن الدماغ) المهم، المشكلة مش في الكتب ولا في القراءة، المشكلة إن دماغنا اتبرمجت بشكل غلط، بشكل سريع، الريلز خلّت دماغنا وأعصابنا وعادتنا غريبة ومختلفة شوية، وأصبح الواحد منا عجول ومعندوش صبر.. فأنت محتاج فِطام، إنك توقف وتفطم عقلك من السرعة والتنوّع السريع ده، وده بالمناسبة مش سهل وهياخد منك وقت ومجهود، ومحتاج خطة مُحكمة وكبيرة، بس والله هتحس بتغيّر في أغلب أمور حياتك، قراءة، عبادة، حفظ قرآن، مذاكرة، تعامل مع الناس، تركيز، شغل، نوم كويس…كل حاجة وأخيرا، أحيانا القراءة بتحتاج لبيئة، بيئة مهيأة للقراء، وقت، تركيز، هدوء، مكان، عدم تشتت، تعمل لنفسك جو وبيئة للقراءة هتلاقي نفسك بتقرأ. طيب في أمل؟ أيوه أكيد، بس الأمل مش إنك تحب القراءة فجأة، الأمل الحقيقي إنك “تفطّم نفسك” من البديل اللي دمَّر تركيزك: السوشيال ميديا السريعة، عايزك تركّز على دي الأول بعد كدا شوف موضوع القراءة، وخد وقتك ولا تتعجّل. أسأل الله أن يوفقك، وأن يقينا وإياك شر الهواتف ومواقع التواصل، ونسأل الله خيرَها وخير ما صُنعت له، ونعوذ به من شرّها وشر ما صُنعت له. أبو مسلم #إجابات