Usmonip

#nazm Doim nimadir qoralasam birinchi boʻlib koʻrsatadigan ikkita doʻstim, tanqidchim, ijodiy yelkadoshim bor. Bular ​​— Nurmuhammad Abduzoirov hamda Kamoliddin Azzamov. Shu kunlarda oz boʻlsa ham ijodiy kayfiyat, ilhom degan narsa bor. Kam-kam yozishga ishtiyoq kelib turibdi. Ora-orada bir nimalar qoralab qoʻyyapman. Lekin hammasini ham eʼlon qilib boʻlmaydi. Bir tomondan yaxshi. Odam nimadir yozsa, avvalo, oʻzi huzurlanadi. Keyin kimdir oʻqib fikrini aytsa, yana bir karra mamnuniyat tuyadi. Xoʻsh, sizda ham qilgan ishingiz yoki ijod mahsulingizni birinchilardan boʻlib koʻrsatadigan, fikr almashadigan doʻstlaringiz bormi? @usmonosphere

T I L X A T Kamin, Shohrux Usmonov, shuni maʼlum qilamanki, qachondir shunaqa sheʼr yozsam, oʻylab-netib oʻtirmay peshonamdan miltiq bilan otinglar. Bu tilxatni oʻz ixtiyorim bilan yozdim. Sana. Imzo. Muhr. @usmonosphere

Kecha ishdan qaytayotganimda uyimiz yonidagi korxona qorovuli chaqirdi. Aytishicha, kimdir korxona ostonasiga chiroyligina mushuk bolasini qoldirib ketganmish. Amaki azbaroyi rahmi kelganidan, mushukchaga sut, yemish va hokazolarini olib, saqlab turibdi ekan. Lekin korxonada boqishga ruxsat berishmaydi, kerak boʻlsa opketa qol, dedi. Ertalabgacha kimgadir berib yuborishim kerak, dedi. Oʻshanda darrov xayolimga obunachilarimga aytib koʻrsam-chi, degan fikr keldi. Ammo sizlarga aytib ulgurmasimdan xonadoshim oʻzi boqib oladigan boʻldi. Hozircha “onalik”ni yaxshi eplayapti. Masʼuliyatli, sutini vaqtida beradigan, bagʻriga bosib yotadigan “ona” chiqarkan. Mabodoyi karim, xonadoshim eplolmasa, boshqa ona topishimizga toʻgʻri keladi. Ungacha mushukchamizning shirinligiga mahliyo boʻlib turinglar. @usmonosphere

​#luqma Tarmoqlarda “Nega oʻzgardim” loyihasi rahbarining xurmacha qiliqlari haqida postlar chiqyapti. Men aytmasam ham koʻrgan, bilgan, eshitgan chiqarsiz. Loyiha muallifi shaxsiyatiga turli ayblovlar (avvalo, rostmi- yoli yolgʻonligini muhokama qilmoqchi emasma, shunchaki shamol boʻlmasa, daraxtning uchi qimirlamaydi deganlaridek...) yogʻilyapti. Loyihani tanqid qilish avj olyapti. Keling, biz bu keysga boshqa tomondan yondashamiz. Yaʼni, xulosa chiqarishga urinamiz. 1. Kitobxonlik va shaxsiy rivojlanishni asosiy planga koʻtargan har qaysi loyiha ham insonlar manfaati uchun emas, aksincha, koʻp hollarda shu orqali uch-toʻrt soʻm “soqqa qilish” uchun boʻladi. Rivojlanish uchun oʻzi rivojlanmagan odamdan kurs sotib olmang :) 2. Loyiha muallifi ishtirokchi qizlarga ola koʻz bilan qaraganlikda ayblanyapti. Skrinshotlar, isbot-dalillar uyum-uyum. Kitobdan gapirib, harakatiga goʻyoki diniy tus beradigan yortiboylarga ishonmang. Ular siz qadrlagan tushunchalarni shunchaki maqsadi yoʻlida vosita qilishi mumkin. 3. Har qanday holatda savol bilan yuzlaning. Hayotda juda shubhakor boʻling, demayman, lekin kerakli pallada tanqidiy fikrlash ziyon qilmaydi. 4. Oʻzi bosib “turkcha” va “tuzsiz” kitoblarni oʻqiydigan, salmogʻi yoʻq sariq adabiyotga yopishib, ana men sizni kitobxon qilaman deydigan odamning ortidan chopmang. Chopganingiz bekor ketadi xolos. 5. Sizni hech kimning kursi, oniy turtkisi (yaʼni, motivatsiyasi), allambalo loyihasi komil inson qilib qoʻymaydi. Toʻgʻri, kerakli loyihalar maʼlul darajada yordam berishi mumkin. Ammo najot faqat oʻzingizda. Xullas, shunaqa gaplar. Bu mavzuda qogʻoz qoralashni umuman istamasdim-u, lekin hech boʻlmasa keyingi safar shu postni oʻqigan kimdir qaysidir bitta soxta rahnamoning illyuziyasiga uchmasin, deyman xolos. Kuningiz xayrli oʻtsin, oʻqing, izlaning va oʻzingizni oʻzingiz isloh qiling. @usmonosphere

Menimcha, obunachilarim orasida qizlar va umuman moda olamiga qiziqadiganlar talaygina topiladi. Sizlar kuzatmasangiz boʻlmaydigan oʻta goʻzal sahifa bor. Adashmasam, oʻzbekcha Telegramda hali moda haqida blog yoʻq edi. Boʻlsayam bu umuman boshqa darajada. Mayli, kuzatib boringlar, mazza qilinglar, rahmat demasangizam roziman. 👉🏿 @oyimchablog P.S: blog nomiga nechchi baho qoʻyasizlar?

#ajabtovur Mayli, savolning javobini oʻzim ayta qolaman. Suratdagi mening qiyofam. Faqat mendan koʻra koʻproq Eldor Asanov va Shahriyor Shavkatga oʻxshagan. Hammasi sunʼiy intellekt degan goʻrsoʻxtaning sharofati bilan. Lekin asl qiyofamga oʻxshaganlari ham bor. Quyida sunʼiy intellekt yordamida yasagan stikerlarimni toʻpladim. Mana stikerpak: https://t.me/addstickers/UsmonovAI P.S: maʼlumot oʻrnida, suratlarni remaker.ai sayti qayta ishlab berdi) @usmonosphere

#ajabtovur Ziyrak insonlarga savol: Suratdagi inson kim? Eldor Asanovmi, Shahriyor Shavkatmi yoki Shohrux Usmonovmi? Yo uchalasining qorishmasimi? @usmonosphere

​#taqriz BU YERDA HAMMA NARSA TUGAGAN (“Sustxotin” namoyishi haqida ikki ogʻiz soʻz) Kecha Moc Hub'da “Sustxotin” filmining norasmiy namoyishi oʻtkazilgandi. Bir guruh kinosevarlar, sanʼat muhiblari, kinoning ichida va atrofida yurganlar hamda film ijodkorlari ishtirokida moʻjazgina davra boʻldi. Avvaliga asar ijodkorlari haqida toʻxtalib oʻtsam. Film afishasida eng koʻp oʻziga tortgan jihat jodiy jamoa boʻldi. Rejissyor ​​— Husnora Roʻzmatova, ssenariy mualliflari ​​— Nazar Eshonqul (rejissyor bilan hammualliflikda), bastakor ​​— Toir Asqarov, rassom ​​— Jamshid Valiyev. Aktyorlar jamoasi ​​— Karim Mirhodiyev, Dilorom Karimova, Munisa Magamed va boshqalar. (Qolaversa, eshitishimcha, subtitrlarni inglizchaga Faxriyor tarjima qilgan). Bu qadar nomdor jamoaning birga ishlashi menga oʻxshagan tomoshabinni oʻziga jalb qilmay qoʻymaydi. Endi bevosita filmning oʻzi haqida gaplashsak. Asarda bir nechta ogʻriqli mavzu oʻz ifodasini topgan. Eng asosiy ikkitasi ​​— qurgʻoqchilik va ayollar huquqi toptalishi. Menimcha, buni kino nomidan ham sezgan boʻlsangiz kerak. Ammo namoyishdan keyingi suhbatda rejissyor oʻzi taʼkidlaganidek, filmda hech qanday yangi gap, yangi muammo yoʻq. Mavjud muammolar, mavjud qarashlar, faqat boshqacha yondashuv. Ramzlar, goʻzal kadrlar, odamni oʻylantiradigan, tugun tashlab ketadigan epizodlar bor. Devona obrazi esa kompozitsiyani yana-da toʻldirgan, ammo kutilgandek ochilmagan obraz. Filmning oʻrtalarida qahramonlardan biri gap orasida “suvga qoʻshilib, bizdan vijdon, insof degan narsalar ham yuz oʻgirdi, qalblarimiz qaqrab yotibdi” qabilida xitob qiladi. Menimcha, film haqida xulosani tomoshabin shu yerning oʻzida juda oson olib boʻladi. Juda kinoshunos emasman-ku, lekin filmdagi deputatning mashinada aylanib yurishlari-yu, xarakteri xuddi Abbos Kiarostamining “Olcha taʼmi” asarini eslatdi. Shaxsiy xulosalarimni aytadigan boʻlsak, film baxtsizlar haqida ekan. Bironta baxti toʻkis, hayotidan mamnun odam yoʻq. Koʻzi kulib turgan obraz yoʻq. Hamma narsa tugagan. Deputat va jurnalistning doʻstligi ham, qishloq ahlining farovon kunlari ham, adolat ham. Qizning eng oxirgi tomchi umidi ham havoga sovuriladi. Yana bir umumiyroq fikrni qistirib oʻtsam degandim. Negadir kinolarimizda qahramonlar nutqi oʻta badiiy, inson kundalik hayoti davomida qulogʻi oʻrganmagan, notabiiy jumlalarga toʻla boʻladi. Menimcha, sheva elementlari, kundalik hayotda keng qoʻllanadigan, reallikka yaqin gaplardan foydalanish autentifikatsiyani taʼminlagan boʻlardi. Qisqasi shuki, mayda kamchiliklarni va subyektiv yondashuvni hisobga olmaganda, yaxshi kinolar yana bittaga koʻpayganidan xursandman. @usmonosphere