Doctor's Mind 👩‍⚕️

​​Soat tungi 3.00. Kuchli bosh og’riqli va uyqusiz tun. Uxlayman desam miyam uyquga ketadigan darajada to’liq tormozlanish holatida emas, aqliy mehnat qilaman desam unga ham aktivligim yetarli darajadamas. Oxiri yengilroq, tez, bir kechada tugatsa bo’ladigan kitob o’qishga qaror qildim, chunki keyingi kunlar uchun rejalarim allaqachon tayyor. Bundan tashqari avvalroq boshlab qo’ygan "Taxtlar o’yini”ni bunday holatda o’qigim kelmadi. Uxlay olmay vaqtni o’tkazganimdan shunisi yaxshiroq deb bildim. Kitoblarimni qarab chiqishni boshladim. Ko’zim birdaniga Kolin Huverning “Majruh muhabbat” kitobiga tushdi. Bu kitobning darajasini, qanday o’qilishini bilganim uchun qo’limga oldimu o’qishni boshladim. Miyamdagi tormozlanish va qo’zg’alish jarayonlarining muvozanati buzilgan vaqtda bu kitobni o’qishim uchun chuqur o’ylovlar yoki qandaydir tahlillar kerak emas. Xullas, kitobni o’qishni boshladim. Doimgidek bosh qahramonlar bir yigit va bir qiz. Bir tekisda o’qishni davom ettirdim. Odatda Huver asarlaridagi qahramonlarning aksariyatini yoshlikdagi travmalari bezovta qiladi, ularning kelajakdagi baxtli hayoti uchun halaqit beradi. Bu asardagi bosh qahramon ham xuddi shunday. O’tmishdagi xotiralar sababli o’zini baxtli bo’lishga, yaxshi hayotga loyiq deb bilmaydi. Qilayotgan ishi yaqinlarini qiynayotganini tushunadi, lekin o’tmishni qo’yib yuborishni istamaydi. Shu tarzda umrining 6 yilini o’tkazadi. Voqealar kimlargadir real emasdek tuyilishi mumkin, yana kimlar uchundir qiziqarli bo’lishi mumkin. Kitob yuqorida aytganimdek, qattiq o’ylash yoki tahlillarsiz oson o’qiladi. Biror kun mendek holatga tushib qolsangiz( bunday holat kuzatilmasin)) hech bo’lmaganda uyqu rejimi o’zgarib qolganda) o’qib chiqishingiz mumkin. Ammo o’qimasdan o’tib ketsangiz ham hech nima yo’qotmaysiz. Ba’zan shunday kitoblarni atiylab sotib olaman, chunki oxirgi vaqtlarda badiiy kitoblardan dam olish, ishlarimdan chalg’ish, boshqa olamlarga qisqa vaqtga bo’lsa ham borish uchun foydalanyapman. @doctorsmind📖

​​✍️Asli Sanjar 📖”Haram” “Qachonki donolik ishqni muvozanatlasa, o’shanda na boshqalarni ranjitamiz, na boshqalar bizni ranjitishlariga ruxsat beramiz, bu yerda ham adolat hukm suradi”. Qadim-qadim zamonlardan beri sharq xalqlariga tegishli bo’lgan haram barcha millatlarni o’ziga sirliligi bilan jalb qilib keladi. Kimlardir unga qo’rquv bilan qaragan bo’lsa, yana kimlardir unga ijobiy tarafdan qaragan. Albatta xaram so’zi nafaqat sultonga tegishli bo’lgan, qizlar tarbiya qilinadigan joyni ifodalaydi, menimcha, avvallari oddiy odamlarning ichki hovlilariga nisbatan ham ishlatilgan. “Haram” asarida ham mana shunday ikki xil muhitda katta bo’lgan qizlarning kesishgan hayoti ochib beriladi. Asardagi qahramonlardan biri Didanur saroyga o’g’irlab kelingan oddiy cherkes qizi, Jamila esa ota-onasining bag’rida katta bo’lgan qiz. Ular uchun umumiy xususiyat shuki, ikkisi ham bir-birining hayotiga kirib kelgunicha ko’plab qiyinchilik va sinovlarni boshdan kechirishgan, hayotiy saboqlar olishgan. Asardagi bir jihat e’tiborimni tortdi. Ko’p filmlar va kitoblar orqali bilishimcha, sulton saroyiga o’g’irlab kelingan qizlar dastlab har sohadan ta’lim oladi, keyin bir umr saroyda xizmat qiladi, agar sultonga yoqib qolsa, hech qanday sabablarsiz joriyaga aylanadi. Ushbu kitobda esa saroydagi qizlarning istak-xohishlariga e’tibor beriladi. Tanlov asosida qizlar o’zlari xohlagan yo’ldan yuradilar. Saroy ular uchun har tomonlama maktab vazifasini bajaradi. Umuman olganda, asarda sulton harami haqida ko’p ham to’xtalib o’tirilmaydi. Voqealar rivoji ham bir tekisda rivojlanadi. Qandaydir intrigaga sabab bo’luvchi holatlar ham deyarli yo’q, lekin shunga qaramasdan yozuvchi asarning oxirida kerakli xulosani kitobxonga berib o’tgan. Fikrlarimnimg boshida keltirgan iqtibosimning ma’nosi to’liq ochib berilgan va o’quvchiga xulosa sifatida berilgan. Inson biror narsaga to’liq berilib ketishi, hayotining asosiy ma’nosini faqat bir narsaga bog’lashi noto’g’ri ekanligi, hayot doimiy bir maromda ketmasligi, tuyg’ular, xislar o’zgarishi mumkinligi, hayotda hamma narsani muvozanatda ushlash kerak ekanligi ya’ni oltin o’rtani topa olish kerakligi chiroyli ifodalab berilgan. Kitobning tarjimasi va muharrir ishi menga yoqdi. O’qib chiqishga arziydi. @doctorsmind📖

Telegram`da foydali va qiziqarli kanallar tobora ko'payib bormoqda. Bugun biz sizning e'tiboringizga adabiyot va kitobxonlikni targ‘ib qiluvchi eng sara kanallarni havola etamiz. Barcha kanallarga a'zo bo‘lish uchun havolani BOSING!

​​Bugun Bookuz kitoblar do'konida Kitobxonlar davrasining navbatdagi uchrashuvini o'tkazdik. O'ziga xos tanishtiruvlar, Qiziqarli o'tgan tanlovlar, hazillarga boy suhbatlar, Bookuz arenadagi muhokama, xullas esda qolarli kun darrov nihoyasiga yetdi. Oxirida barcha bookblogerlar rasmgayam tushdik)) @timur_books

​​Rasmda kecha man bilan kelgan yangi kitoblar. 1.Viktor Gyugo - “Parij Bibi Maryam ibodatxonasi”. Bu kitob haqida deyarli ma’lumotga ega emasman, lekin yaxshi asar ekanligini ko’nglim sezdi. 2.Asli Sanjar - “Haram”. Anchadan buyon qadimiy turk malikalari hayoti va tarixiga qiziqaman, shuning uchun ham bu kitobni xarid qildim. Ilhom Salimovning yana bir tarjima asarlariga birgalikda baho berib ko’ramiz. 3.Yeji Koshinskiy - “Rangin qushcha”. Ushbu kitob @quyoshtaraflarda’dan sovg’a. 4.Jeyms Xedli Cheyz - “Seyfdagi pullar”. Detektiv asarlar ishqibozi bo’lganim uchun Cheyz asarlari manga yoqadi. Bu kitob 2011- yilda chiqqan nashr. @dildora_bookaholic’dan sovg’a. 5.Jorj R.R. Martin - “Taxtlar o’yini”. Ajoyib sifatdagi, uzoq kutilgan @zabarjadmedia nashriyotining navbatdagi ijod namunasi. 6.Baxtiyor Abdug’afur - “Uzbechka”. Bu kitob birinchi marta nashr qilinganda unchalik qiziqmagandim, lekin yaqinda kinosini ko’rganimdan keyin kitobini ham o’qib ko’rishga xohish paydo bo’lib qoldi. Yangi kitoblar xarid qilgan vaqtdagi kayfiyat har doimgidek ajoyib😍 @doctorsmind📖