Arraata Biyyolessa Oromiyaa

Deenmaark yeroo Tiraamp Giriinlaand dhuunfachuuf doorsisaa jirutti loltoota lafoo bobbaafte ONM-ABO Amajjii 15,2026 Deenmaark yaaddoo nageenya biyyaalessaa Ameerikaa kaasuun humna lafoo gara odola Arktiik Giriinlaandiitti bobbaasuun ishee gabaafameera. Prezidaantiin Yunaayitid Isteets Doonaald Traamp tiwiitara isaaniin akka jedhanitti, Ameerikaan nageenya biyyaalessaafi ittisa misaa’elaaf Giriinlaand to’achuu qabdi. Tiraamp NATOn US odola kana akka salphaatti akka argattu gochuu qaba jechuun, ''yoo hin arganne Raashiyaan ykn Chaayinaan ni fudhatti'' jedhan. Kana hordofuun miseensi NATO Deenmaark humna lafoo xiqqaafi meeshaalee waraanaa gara odola kanaatti erguun, argama waraanaa guddaa ta’eef qophii taasifteetti. Muummichi ministeeraa Giriinlaand Jeens-Frederik Nielsen gaaffii Tiraamp kana kuffisuudhaan, ''filannoon keenya Deenmaark yoo ta'u, odola kanas Ameerikaan hin bulfamtu'' jedhan. Ministirri Muummee Deenmaark Mette Frederiksen tattaaffiin Ameerikaa kun gamtaa NATO diiguu akka danda’u akeekkachiisaniiru. Haa ta’u malee, Tiraamp NATO waliin nageenya Arktiik irratti mari’achuuf fedhii qabaachuu isaanii ibsaniiru. Giriinlaandiin odola addunyaa guddittii fi iddoo tarsiimoodhaan barbaachisaa ta’uu ishee gabaasaleen bahan ni addeessu.

Haaluma wal fakkaatuun, ogeessi halkanii dabaree guutuu hojjete boqonnaa bakka bu’uun yoo hin kennamne kaffaltii sa’aa 15 argachuu qabaachuu yaadachiisuun, bakka hedduutti sa’aati 7 qofa kaffalamaa jiraachuun sirna seeraa faallessuu isaas ibsaniiru. Ogeeyyiin Fayyaa kan biraan maddeen haasofsiisan, haalli kaffaltii kun sirrachuu dhabuun jiruu ogeessotaa qofa utuu hin taane hawaasas kan miidhu jechuun himanii mootummaan sirreeffama barbaachisu dafee akka taasisus akeekkachiisaniiru. Murni Biltsiginnaa kanaan duras barsiisotaaf sirreeffama miindaa taasifame dhorkachuun rakkoo hawaasummaaf saaxilaa turuun niyaadatama.

Ogeeyyiin fayyaa Oromiyaa, kaffaltiin idileen-alaa haaromsa miindaa ammaatiin kaffalamuu dhabuu komatan ONM-ABO Amajjii 15,2026 Oromiyaa keessatti oggeeyyii fayyaatiif, kaffaltiin shallaggii sa’aatii idileen-alaa (duty)n haaromsa miindaa ammaatiin kaffalamuufii dhabuu ogeeyyiin komatan. Ogeeyyiin fayyaa Oromiyaa maddeeniif yaada kennan, mootummaan Federaalaa hojmaata kaffaltii kana labsiin utuu fooyyessee jiruu, Oromiyaan garuu raawwii kaffaltii kana raawwachuu dideera” jechuun himatan. Ogeessi fayyaa rakkoo nageenyaa isaaniif jecha maqaan isaa akka hin eeramne gaafatan tokko, “kaffaltiin ogeessa fayyaaf kaffalamaa jiru gadi bu’aa ta’uun maatii ofii ittiin jiraachisuufuu gahaa miti” jedhan. “kaffaltiin ogeessa fayyaaf heeraan Mootummaa Federaalaa irraa bahe sirnaan wal-qixa diriirfamuu dhabuun ammoo rakkoo biraatis” jechuun dabalataan dubbataniiru. Ogeessi biraa kan ammas sodaa nageenyaaf jecha maqaan isaanii akka eeramu hin feene, rakkoo kaffaltii hojii idileen alaa kun komii guddaa ta’uu dubbatu. Ogeessi fayyaa kun, “amma yeroo amma miindaan hojjettootaa fooyya’eera, kaffaltiin tajaajila idileen alaa kunis silaa miindaa haarawa kanaan utuu shallagamuu qabuu, bulchiinsi Oromiyaa hojmaatuma duraan itti fufeera” jedhu. Waldaan Ogeessota Fayyaa Oromiyaas kaffaltiin idileen alaa ogeeyyii fayyaa kan Oromiyaa sadarkaa miindaa duraan akka kaffalamaa akka jiru mirkaneesse. Hogganaan Waldaa Ogeessota Fayyaa Oromiyaa, Doktar Balaayinee Lataa, Addis Standard’tti akka himanitti, koreen hojiraawwachiistuu waldaa isaanii komii ogeessota fayyaa irraa ka’e bal’inaan qoratee, hojimaatni amma jiru qajeelfama seeraan ba’e waliin kan wal hin simne ta’uu mirkaneessuun xalayaa komii, Biiroo Fayyaa Oromiyaatti erguu himan. Doktar Balayineen, qajeelfamni Mana Maree Ministiroota Federaalaatiin ba’ee, Ministeera Fayyaa Federaalaatiin gara naannooleetti darbee, Mana Maree Bulchiinsa Mootummaa Oromiyaatiin mirkanaa’ee hojii irra jiru, kaffaltiin sa’aa hojii idileetiin-alaa mindaa hojjetaatiin shallagamee guyyaa 30’tti qooduun herreegamuu akka qabu ifatti tumamee jira jedhan. Haa ta’u malee, Biiroo Fayyaa Oromiyaatiin, kaffaltiin amma raawwatamaa jiru miindaa ogeessi yeroo ammaa argatu irratti kan hundaa’e akka hin taanes eeran. Bu’uuruma kanaan, waldichi xalayaa banaa Biiroo Fayyaa Oromiyaatiif ergeen “ajajni afaanii hooggansa Biiroo Fayyaatiin gara dhaabbilee fayyaatti darbe bu’uura seeraa kan hin qabneefi, daangaa aangoo kan hin kabajneefi mirga ogeessota fayyaa kan sarbedha” jechuun ibseera. Ajajni kun rakkoo bulchiinsa gaarii uumaa jiraachuu himuun, tajaajila hawaasaa irratti dhiibbaa osoo hin uumin dura akka sirreeffamus waldichi gaafateera. Dabalataanis, qajeelfamni mootummaa federaalaa garaagarummaa kaffaltii naannoolee gidduu jiru dhabamsiisuuf kan ba’e ta’us, faallaa kanaan “ kaffaltiin bulchiinsa Magaalaa Finfinneetti kaffalamaa jiruufi Oromiyaatti kaffalamaa jiru garaa-garummaa qaba” jechuun murteen kun dogoggora ta’uufi wal madaaluu akka qabu Waldaan Ogeessota Oromiyaa akeekeera. Hoogganaan Waldaan Ogeessota Fayyaa Oromiyaa, Dokter Balaayine Lataa, kaffaltiin hanga ammaatti hin raawwatamin ture ogeeyyiirratti dhiibbaa cimaa uumuu eeruun, haalduree tokko malee sirreeffamni kaffaltii akka raawwatamu gaafataniiru. Dokter Balaayine Lataa Addis Standard’ tti akka himanitti Waldichi, Xalayaa komii Biiroo Fayyaa Oromiyaatif ergeen, ammatti duub-deebii akka hin arganne eeran. Gama biraatiin, Ministeerri Fayyaa Federaalaa shallaggii sa’aa hojii dabalataa akka fooyya’u, qajeelfama Komishinii Sivil Sarvisii Federaalaa lakk. 921/2014 ‘tiin akka raawwatamu Biiroo Fayyaa Oromiyaaf beeksisuu yaadachiisuun, haalli kun Bulchiinsa Magaalaa Finfinneetti hojiirra ooluu isaas ibsaniiru. Akkasumas, sa’aatiin hojii dhaabbata irraa dhaabbatatti garaagarummaa qabaachuu kaasuun, dhaabbilee wal-fakkaatan hunda keessatti sa’aatiin guyyaa tokko ogeessaaf qabamu wal-fakkaataa akka ta’us gaafachuu eeraniiru.

Oromiyaatti labsiin haarawaan hojjettoonni mootummaa uffannaa milishootaa uffachuu qabu jedhu bakkeewwan tokko tokkotti hojiirra ooluuf deema jira jechuun jiraattonni yaaddoo qaban Arraata Biyyoolessa Oromiyaatti himan ONM-ABO Amajjii 14,2026 Murni Bilxiginnaa guutuu Oromiyaatti hojjettoonni mootummaa seekteroota cufa irra jiran uffannaa milishoota uffatanii bobba'uu qabu jechuun labsii haarawaa baasanii dhoksaan gadi diriirsaa jiraachuun ibsameera. Bifuma kanaanis godina Qellem Wallaggaa aanaa Daallee Waabaraatti hojjettoonni mootummaa walitti qabamuun akka of-qopheessaniif gaafa Amajjii 11,2026 waltajjiin akka tures dubbatu. Mootummaan faashistii Bilxiginnaa hojjettoonni mootummaa hundi — barsiisota, ogeessota fayyaa, hojjettoota waajjiraa fi kanneen biroo dabalatee — uffannaa milishoota uffachuu qabu jedhee labsuun kun akeeka uffannaa jijjiiruu osoo hin taane, hiika siyaasaa, hawaasummaa fi nageenyaa hamaa akka qabus hojjettoonni mootummaa hedduun komii agarsiisaa jiraachuun ibsameera. Miidhaam nageenyaa fi lubbuu hojjettoota irra ga’un daran hammaatas kan jedhan hojjetaan mootummaa uffannaa milishaa uffachuun, namoota waraana keessatti hirmaatan fakkeessa kanaaf gochi kun gareewwan mormitootaa biratti akka diina waraanaatti ilaalamu danda’a jechuun sodaa isaanis dubbatu. Gaheen barsiisaa barnoota kennuu, ogeessi fayyaa lubbuu baraaruu, hojjetaan tajaajila hawaasaa kennuu qaba malee gochi mootummaan faashistii PP gochaa jiru kun hundumaa balaa ajjeechaa, hidhaa fi doorsisaa keessa akka seenu taasisas kan jedhan, namoonni nageenya isaanii dhabanii hojii isaanii gad dhiisuuf dirqamus jechuun komii qaban ibsachaa jiru. Bilxiginnaan tajaajila hawaasaa caccabsuun isaa kun barsiisaan, ogeessi fayyaa fi hojjettotni biroo of eeggannoo keessa seenuun mana barumsaa cufuu, hospitaalli fi buufanni fayyaa ni hanqatu, tajaajilli mootummaa uummataaf kennamu ni laaffata, uummanni miidhamuu jalqaba, mootummaa irraa daranuu amantii dhabas jechuun dabaluun ibsaniiru.

Baha Wallaggaa Aanaa Gobbuu Sayyoottii uummanni loltoota murna Bilxiginnaan hidhamuun dhaga'ame ONM-ABO Amajjii 14,2026 Godina Baha Wallaggaa aanaa Gobbuu Sayyoo ganda Gambeela Tarree keessatti waraanni faashistii PP fi kaabinoonni faashistii Bilxiginnaa maqaa sulula baasuu diddan rakkoo ilaalchaa qabdu jedhuun hawaasa nagaa qabuun hidhanii gidirsaa jiraachuun ibsameera. Bifuma kanaanis namoonni hidhaman kanneen maqaan isaanii; Badhaasaa Mitikkuu, Eliyaas Mitikkuu, Fayisaa Dhugaasaa, Abdii Alamuu, Mallasee Asaffaa fi namoota maqaan isaanii ammaaf adda hin baane hedduu akka ta'aan dabaluun ibsaniiru. Namoonni kunneen gaafa Amajjii 8,2026 qabamuun waajjira gandaa keessatti hidhamanii turuun gaafa Amajji 11,2026 ammoo gara waajjira poolisii aanaatti dabarsanii jiraachuus kan himan, yeroo ammaa doorsisaa fi gidiraan jabaan irra gahaa jiraachuun addeeffameera. Kana malees gochaan wal fakkaataan sabboontota ilmaan Oromoo quuqama sabaa qabanii fi miidhaa uummata irra ga’u morman dabalatee dhaloota ol-adeemoo danuu bulchiinsa magaalaa aanichaatti hidhuun qarshii guddaa gaafatanii baasuu, mooraa hidhaa irraa baasuun gara leenjii loltummaatti erguu fi gariin ammoo baasuun dhoksaan ajjeechaas irratti raawwachaa akka jiran jiraattonni Arraata Biyyoolessa Oromiyaatti himaniiru.

Godina Walloo Aanaa Dawwee Harawaatti hattoota murni Bilxiginnaa gurmeessee bobbaaseen loon maatii qabsaa'otaa saamamaa jiraachuun dhaga'ame ONM-ABO Amajjii 14,2026 Godina Walloo aanaa Dawwee Harawaatti caasaaleen Bilxiginnaa gantoota qabsoo Bilisummaa Oromoo ganuun PP'tti harka laattatanii fi jaleewwan isaanii gurmeessuun hattoota ijaaranii guutummaa onichaa keessatti bobbaasanii kan jiran yoo ta'u, hattootni kunis Amajjii 9,2026 halkan keessaa gara bariitti qe'ee hawaasaa ganda Uranee jedhamutti seenuun uummata irratti dhukaasa bananii hirriiba irraa dammaqsuun balbala namootaa cabsanii loon maatii qabsaa'otaa jaarsa biyyaa Obbo Yaasin Umaree jedhamuu kan lakkoofsaan 8 ol ta'an mooraa keessaa saamuun ooffatanii deemuun barameera. Hattootni murna badii Bilxiginnaan ijaaramuun galgala galgala hawaasa nagaa irratti dhukaasa banuun jeequmsa uumaa jiranii fi qabeenya maatii qabsa'otaa mancaasaa, akkasumas loon jalaa ooffachaa jiran kunis kan maqaan isaanii nu ga'e lukkee sirnichaa kan ta'e - Huseen Barbaree, -Huseen Adam Abdallaa, -Huseen Ahimediyyoo, -Bashiir Jaarraa fi gantoota PP'tti harka laatan Falmaa fi Galaanaa kanneen jedhaman dabalatee kan maqaan ammaaf nun ga'in danuun jiraachuunis ifoomeera. Gareen hattootaa caasaalee murna faashistii Abiy Ahimediin ijaaraman kan maqaan isaanii muraasni olitti eerame kun loon maanguddoo biyyaa Obbo Yaasin Umaree kana maqaa ilma keetu bosona jiraan erga saamanii deemanii booda, buufata isaanii ganda Dirree jedhamutti galfachuun kaanis irraa qalatanii nyaachaa jiraachuu fi loon isaan hafan ammoo Amajjii 13, gabaa Sanqallee Waataa buufannee gurguranna jechuun wal mari'achaa turuu isaanii odeessi moorichaa miliqee ONM dhaqqabe ni addeessa. Shiftoonnii fi hattoonni murna gabroomfataa Bilxiginnaan ijaaramanii bobbaafaman kun aanichatti loon maatii qabsa'otaa saamuu fi hawaasa irriba irra jiru dhukaasa irratti bananii dammaqsuu fi naannoo jeequun isaanii haaraa ta'uu baatus, kan tibbanaa ammoo adduma, maatii qabsaa'otaa loon qaban loon isaanii saamanii deemu, kan loon hin qabne yoo argan ammoo namootuma ukkaamsu shakkii jedhuun yaaddoo qaban irraa ka'uun jiraattotni onichaa qe'eef qabeenyaa isaanii dhiisanii baqachaa jiraachuu itti dabaluun dubbataniiru.

Godina Lixa Wallaggaa Aanaa Gimbii keessatti waraanni faashistii PP dargaggoota lama rasaasaan rukutanii 1 ajjeesuu fi kan biraa tokko madeessuun dhaga'ame ‎ ONM-ABO Amajjii 14,2026 Godina Lixa Wallaggaa aanaa Gimbii ganda Boonayyaa Assaabii bakka adda Waldaa Kaatoolikii jedhamu keessatti gaafa Amajjii 13,2026 waraanni weerartuu Bilxiginnaa ol-adeemaa Oromoo kichuutti kutuu hojii idilee isaa godhate maqaa hidhata WBO qabduu fi odeessa kennituuf jedhuun dargaggoota lama rasaasaan rukutuu jiraattonni himan. Akka jiraattonni gandichaa nuuf ibsanitti dargaggoonni rasaasaan rukataman kunneen Kinfuu Ifaa fi Ifaa Shuumaa kan jedhaman ta'uu ibsuun, dargaggoonni kunneenis barattoota ta'uun alatti hirmaannaa siyaasaa keessaas qooda akka hin fudhanne itti dabaluun addeessaniiru. Dargaggoo Kinfuu Ifaa battaluma sanatti lubbuun isaa akka darbitee fi Ifaa Shuumaa ammoo madoo ulfaataa morma keessa rukutamuun gara hospitaala Adiveentistii magaalaa Gimbiitti geeffamuun yaalamaa jiraachuu ibsuun, maatii isaa abbaa fi haadha isaa irraas shiftoonni waraana PP bilbiloota harkaa fuudhuun ibsameera. Bilxiginnaan lubbuu qulqullootaan tirgaa siyaasaa taphachaa kan jirtu, dhiiga lammiilee nagaa gatii malee baasuun daranuu jeequmsaa fi wal-gaarreffannaan akka jabaatuuf guyyuu uummata nagaa ajjeesuun daranuu uummanni akka haaloo kufatu taasisaa jiras jechuun jiraattonni dubbatu.

Muddama Iraanii fi US jidduutti hamma'ate hordofee US humnoota ishee Qaataar jiran muraasni akka bahan ajajje ONM-ABO Amajjii 14,2026 Donaald Tiraampi Iraanirratti haleellaa waraanaa gaggeessuu danda'a sodaan jedhu jabaataa dhufeera. Iraan gama isheetiin US haleellaa gaggeessiti taanaan, buufataalee waraanaa US Baha Jiddu Galaa keessa jiran irratti haleellaa waraanaa gaggeessuun haaloo bahuu akka dandeessu ifa gooteetti. Kanarraa ka'uun, US humnoota ishee buufata waraanaa Qaataar jiran muraasni hanga har'aatti akka bahan ajajuu dippilomaatota US waabeffachuun Rooyitars gabaaseera. Mormii Iraanitti mudate hordofee Iraan mormitootarratti tarkaanfii humnaa fudhatte jechuun Tiraamp tarkaanfii humnaa fudhachuu akka malan akeekkachiisaniiru. Iraanis Tiraamp tarkaanfii waraanaa fudhata taanaan, of ittisuuf qophii ta'uu beeksiftee turte. Qaataar gama isheetiin sababa muddama Ameerikaa fi Iraaniin jidduutti dhalateen naannichatti jeequmsi akka hin kaaneef akeekkachiisteetti. Ganna darbe Israa'el irra goruun US yeroo haleellaa Iraanirratti gaggeessitu, Iraan ammoo buufata humna qilleensaa US guddaa Qaataar keessatti argamu haleeluun haaloo bahuun ishee kan yaadatamudha. Odumaa walfakkaatuun, Ameerikaan hojjattoonni ishee Sa’ud Arabiyaa jiran “of eeggannoo cimaa” akka godhan akeekkachiisteetti. Imbaasiin Ameerikaa Sa’uudii Arabiyaa jiru, hojjattoonni isaa biyyattii keessatti argaman “of eeggannoo cimaa” akka taasisan dhaameera. Kunis Ameerikaan Iraan haleeluuf doorsisuu ishee hordofee, Iraanis gamasheen doorsisa Ameerikaa kanaaf deebii kennuuf doorsisuu ishee hordofeeti. Imbaasichi ibsa baaseen, hojjettoonni isaa of eeggannoodhaan akka socho’aniifi naannawaa dhaabbilee waraanaa irraa fagaachuu akka qaban hubachiiseera. "Waldhibdee naannoo itti fufee jiru ilaalcha keessa galchuun, ergamni/dippilomaatonni Ameerikaa gara Sa'ud Arabiyaatti deemaniifi hojjettoonni ishee of eeggannoo dabalataa akka godhaniifi imala barbaachisaa hin taane gara bakkoota dhaabbilee waraanaa naannicha keessa jiran kamittuu akka gochuu irraa akka of daangessan gorseera. Lammiileen Ameerikaa Mootummaa kana Sa'ud Arabiyaa keessa jiranis akkasuma akka godhan gorsina," jechuun imbaasichi ibsa marsariitii isaa irratti baaseen ibseera.

Godina Jimmaa Aanaa Sokorruu keessatti caasaaleen murna Bilxiginnaa walii isaanii qooduun gandummaan wal dararaa jiraachuun himame ONM-ABO Amajjii 14,2026 Godina Jimmaa aanaa Sokorruu keessatti gaafa Amajjii 11,2026 caasaaleen murna Bilxiginnaa walii isaanii qooduun gandummaan dhiibbaa garaagaraa uumaa jiraachuu fi hojii keessaa wal ari'aa kan jiran ta'uu maddeen amanamoo keessoo PP Arraata Biyyooleessa Oromiyaaf eeranii jiru. Akka maddeen keessoo PP Arraata Biyyooleessa Oromiyaaf eeranitti , aanicha keessatti barsiisota, ogeessota fayyaa, hojjettoota misoomaa, fi kanneen biroo godinaalee Oromiyaa biroo irraa gara sanatti ramadamuun hojjetan aanaa irraa qabee hanga gandaatti jiran dhiibbaan gandummaan irra gahaa jiraachuuf hojii irraa ari'amaa jiraachuu dubbatu. Gareen murna Bilxiginnaa sadarkaa aanaatii hanga gandaatti adda durummaan hojii kana raawwataa jiru bulchaa aanicha nama maqaan isaa Maammad-amiin Sheek Sharafuu jedhamu ta'uun barameera. Godinicha keessatti waliigalaan caasaaleen murna Bilxiginnaa kunneen ilaalcha dabaa qaban namoota nagaa hojii dhuunfaaf jiruuf jireenya isaanii fooyyeefachuuf gara sanatti imalan illee nageenya biyya keenya booreessuuf dhuftan jechuun qabanii hidhuu fi kanneen daldala qaban uggura irra kaa'uuf saamicha irratti geeggeessaa jiraachuus maddeen dabalataan ifoomsaniiru.

Godina Lixa Wallaggaa Aanaa Mana Sibuu leessatti waraanni maafiyaa PP hawaasa nagaa saamuu fi ukkaamsaa jiraachuun ifoome ONM-ABO Amajjii 14,2026 Godina Lixa Wallaggaa aanaa Mana Sibuu ganda Ari'aa Dambii keessatti Amajjii 12,2026 waraanni weerartuun Bilxiginnaa saamicha hawaasa nagaa gartuu siyaasaa kamiin keessaa hin qabne irratti raawwatan itti fufuun buna hawaasaa jumlaan fe'achuu jiraattonni gandichaa Arraata Biyyoolessa Oromiyaatti himaniiru. ‎ Akka jiraattonni bakkichaa nuuf ibsanitti waraanni faashistii PP kun maqaa sakkattaa WBO jedhuun bobba'uun buna hawaasaa konkolaataa waraanaa daandii gubbaaa dhaabuun gaafa Amajjii 12,2026 fe'achaa akka turan kan himu oggaa ta'u, maatiin qabeenyaan jalaa fe'ames maatii qabsa'otaa ta'uus dabaluun himaniiru. Maatiin qabeenyi isaanii jalaa fe'ame maqaan isaanii ‎~ Obbo Habtaamuu Teessoo jalaa buna ardaba 5 ‎~ Obbo Adam Ayyaanaa jalaa buna ardaba 5, ‎~ Obbo Beekamaa Sobbooqaa jalaa buna ardaba 2 fi ‎Obbo Badhaasaa Oljirraa jalaa loon hameessa tokko ooffattanii deemuu dabaluun ibsaniiru. Addatti immoo Obbo Badhaasaa Oljirraa qabeenya isaanii erga saamanii booda maanguddoo kanaa fi ilma isaanii dargaggoo Bultii Badhaasaa jedhamu ukkaamsuun fuudhanii deemuun hanga yeroo odeessi kun qindaa'eetti bakki isaan geessan hin baramne jechuun jiraattonni gandichaa himaniiru. Murni Bilxiginnaa kufaatii dinagdee hamaa isa mudatee jiruuf saamicha hawaasa nagaa irratti raawwachuu akka tarsiimootti baafachuun uummata ofiifuu qaala'insi jireenyaa dararaa jiru kana qabeenya xiqqaa inni qabu hidhattoota isaa irratti bobbaasuun saamaa akka jiru irra deddeebiin gabaasa turuun keenya kan yaadatamudha.

Godina Iluu Abbaa Booraa Aanaa Daarimuu keessatti waraanni maafiyaa PP hidhaa fi saamicha daangaa darbe uummata irraan ga'aa jiraachuun dhaga'ame ONM-ABO Amajjii 14,2026 Godina Iluu Abbaa Booraa aanaa Daarimuu ganda Meexxii Guddaa jedhamuun beekamu keessatti waraanni murna maafiyaa PP gaafa Amajjii 12,2026 maqaa garaagaraa da'oo godhachuun uummata saamaa turuu fi gariin ammoo mana dararaa isaaniitti guuraa turuu jiraattonni bakkichaa Arraata Biyyoolessa Oromiyaatti himan. Akka jiraattonni aanichaa jedhanitti, hidhattoonni kunneen bobbaafamuun, qabeenya namoota nagaa saamuu, manneen jireenyaa caccabsuu, namoota reebuu fi mana hidhaatti guuraa turan jechuun taatee raawwate ibsaniiru. Kana malees nama maqaan isaa Taarikuu Habtaamuu jedhamu jalaa dukkaana caccabsuun saamanii deemuu fi hanga yeroo odeessi kun qindaa'eetti waraana kanneeniin butamee jiraachuu isaallee dabaluun ibsanii jiru. Dabalataan immoo waraanni sirna-dhab-leeyyiin kunneen gandichuma keessatti gaafa Amajjii 9 nama maqaan isaa Habtaamuu Taammanee jedhamu jalaas mana isaa cabsanii seenuun afaan qawwee isaaniitti dhimma ba'anii mana isaa keessa sakatta'uun qarshii kuma dhibba lama 200,000 jalaa saamanii deemuu jiraattonni gandichaa dabaluun eeranii jiru. Godina kana dabalatee Oromiyaa cufa keessatti ergamtoonni murna maafiyaa PP hawaasa jireenya dhuunfaa isaa geggeeffatu, barnoota amantii fi barnoota idilee kan baratan akkasumas namoota hojii garaagaraa hojjechuun jireenya isaanii geggeeffatan siyaasa isaan harka keessaa hin qabne itti maxxansuun ajjeessuu, hidhuu, reebuu fi manneen jireenyaa ibidda itti shiduun barbadeessuu dabalatee gudeeddaa daa'immaan irraa kaasee hanga maanguddootaatti raawwachaa akka jiranis isiniif gabaasaa turuun keenya ni yaadatama.

Godina Arsii Bahaa Aanaa Muneessaa keessatti loltoota Bilxiginnaan namni nagaan tokko ajjeefamuun dhaga'ame ONM-ABO Amajjii 14,2026 Godina Arsii Bahaa aanaa Muneessaa ganda Heeban Dhubboo iddoo addaa Allamannaa jedhamu keessatti dhalatee kan guddate namni maqaan isaa Obbo Dannaboo Duuchiisoo Urgeessaa jedhamu gaafa Amajjii 12,2026 aanichuma ganda Heeban Laaqichaa magaalaa Laaqichaa keessatti loltoota impaayera Itoophiyaan ajjeefamuu jiraattonni ibsanii jiru. Namni kun abbaa ilma tokkoo akka ta'ee fi magaalaa kana kan deemeef hoolaa gurguruun maatii isaatiif meeshaa bituuf akka ta'e jiraattotni himuun, loltootni kunneen magaalicha keessatti itti dhufuun hoolicha harkaa fudhatanii achumatti ajjeesanii deemuu dabalataan himaniiru. Akka jiraattotni jedhanitti, namni kun yakka dalage kan hin qabne, qonnaan bulaa nagaa hawaasa keessattis nama kamiin iyyuu walitti bu'iinsa kan hin qabne, nama namni hundi jaallatu badii isaa malee loltootni kunneen rasaasaan ajjeesanii deemuun baay'ee nu gaddisiiseera jechuun yaada isaanii Arraata Biyyoolessa Oromiyaatti himanii jiru.

Godina Booranaa Aanaa Yaaballootti maqaa ijaarsa gandaan qarshii uummata irraa guuruu fi jumlaan namoota hidhaa jiraachuun ibsame ONM-ABO Amajjii 14,2026 Godina Booranaa aanaa Yaaballoo gandoota akka Chorkaasaa, Dhaddiimii fi kanneen hafan biroo keessaa waraanni garboomfataa PP caasaalee Bilxiginnaa walin tahuun uummata ijaarsa mana gandaa jechuun marsaa lamaffaaf qarshiii 4000 tokkoo tokkoo abbootii warraa irraa dirqamsiisuun fuudhaa jiraachuun ibsameera. Akka jiraattonni jedhanitti maatii harka qalleeyyii dhiyeessuu hin dandeenye ammoo ilaalcha siyaasaa itti maxxansuu loltoonni abbaa irree Bilxiginnaa hidhaa akka jiranis dabaluun jiraattonni addeessaniiru. Oromiyaatti qarshii maqaa ijaarsa addaa addaa mana barnootaa, suphiinsa daandii, nageenyaa kkf jedhamuun uummata Oromoo irra deddeebiin gaafachuun yaaddoo hedduu uumaa kan jiru oggaa ta'u, uummanni baay’een galii xiqqaa qaba, qarshii irra deddeebiin kennuuf dirqamuun jireenya guyyaa guyyaa irratti rakkoo uumuun, hanqina hedduus itti fidaa jiraachuu himatu Bilxiginnaan qarshii uummata gama tokkoon fedhii jechaa gama biraan ammoo dirqiin irraa fuudhaa jiraachuu hordofees uummanni baay’een jalaa dhokachaa fi hidhaaf saaxilamaaa jiru.

Godina Baha Wallaggaa magaalaa Naqamtee keesatti waraanni sirna Bilxiginnaa dargaggoota irratti reebicha ulfaataa raawwachuun ibsame ONM-ABO Amajjii 14,2026 Godina Baha Wallaggaa magaalaa Naqamtee bakka Qassoo jedhamuun waamamtu keessatti ergamtoonni ergama jal'inaa leenjifamanii bobbaafaman Amajjii 11, 2026 dargaggoota yakka tokko hin qabne irratti maqaa "Waraana Bilisummaa Oromoo deggartu"jedhuun reebicha akkaan jabaa ta'e raawwachuu jiraattonni himan. Dargaggoota waraana kanneeniin reebichi ulfaataan irra ga'e keessaa muraasni maqaan nu qaqqabe, - Abdii Lammaa - Mararaa Girmaa - Saamu'eel Habtaamuu fi kanneen ammaaf maqaan isaanii nun qaqqabiin jiru hedduunillee akka jiran jiraattonni dubbatu. Akka jiraattonni jedhanitti dargagoonni waraana koloneel Abiy Ahimadiin bobbaafamaniin miidhaa ulfaataan irratti geggeeffame kunneen hawaasa naannoo isaanii biratti ilaalcha gaarii fi naamusa qabeeyyii kan ta'an ta'uu himuun, yakka tokko malee garaan lafarra ciibsanii qaama isaanii shiboon ciruun dararaa turuu addeessanii jiru. Bakkicha keessatti keessumaa galgala sa'aa 12:30 booda namni kam lama ta'ee waliin haasawaa geggeessinaan dhoksaan waa mari'ataa jirtu jechuun uummata yeroo mara gidirsaa akka jiran itti dabaluun kan dubbatan jiraattonni bakkichaa, murna nageenya biyyaa eegna jedhanii nageenya biyyaa booressaa oolan, ajaja qaama isaanii olii irraa fudhachuun ergamtoonni sirna dadhabaa utubuuf fiigan bakkoota bobbaafaman maratti ilmaan Oromoo irraan miidhaa hammaataa ga'aa jiru jechuunis jiraattonni miira gaddaa fi aariin guuteen Arraata Biyyoolessa Oromiyaatti himanii jiru.

Godina Kibba Lixa Shaggar aanaa Qarsaa Maallimaa keessatti waraanni Bilxiginnaa namoota nagaa jalaa horii fi midhaan saamuun ibsame ONM-ABO Amajjii 14,2026 Godina Kibba Lixa Shaggar aanaa Qarsaa Maallimaa ganda Gooroo Gabreelii iddoo addaa Haroo Carii jedhamutti Amajjii 12,2026 waraanni Bilxiginnaa maqaa sakatta'iinsa WBO jedhuun magaalaa Adaadii irraa gara gandichaatti bobba'uun sangaa tokko fi midhaan qamadii kuntaala 6 fudhachuun garaa mooraa waraanaa magaalaa Adaadii keessatti argamutti geeffachuu jiraattonni ifoomsaniiru. Namoota saamichi irratti raawwatame keessaa kan maqaa arganne, haadha ilmaanii nama maqaan ishee Aadde Geexee Bojaa jedhamtu jalaa sangaa intalli isaanii biyya ormaa keessa teessee hojjettee maallaqa maatiif ergiteen bitatan kan tilmaamaan qarshii kuma torbaatamaa ol bituu danda'u gara jalaa saamaniiru. Nama maqaan isaa Obbo Dirribaa Badhaadhaa jedhamu jalaa immoo gosa midhaan qamadii kuntaala 6 saamuun beekameera. Obbo Dirribaan maanguddoo ganna 70 olii nama gaaddisaa araaraa jala ooluun namoota wal dhaban araarsuun beekaman jaalala uummatni naannichaa qabuuf irraan kan ka'e uummata mufachiisuu fi dantaa dhuunfaa isaaniitif jecha akka saaman jiraattonni gandichaa Arraata Biyyoolessa Oromiyaatti himaniiru. Akka jiraattonni gandichaa addeessanitti namoonni saamicha qabeenyaa kanaaf saaxilaman hundi isaanii kanneen hirmaannaa dhaaba siyaasaa kamuu keessatti hin argamneedha jechuun jiraattonni dabalataan ibsaniiru. Waraanni goolessaan murna Bilxiginnaa hammeenya uummata nagaa irratti raawwatan malee uummata kabajaa fi jaalalli maluuf waan gaarii hojjechuu fi leenjii mooraa waraanaa keessatti akkaataa uummata ittiin jiilchuun danda'amu kan akka reebichaa, hidhaa , saamichaa hanga tooftaa ajjeechaa lubbuu ilmaan namaa leenjifamuun turtii angoo abbaa irree ittiin dheeressan barsiifamuun bobbaafaman uummata irratti raawwachuu gabaasni guyyaa guyyaan Arrata Biyyooleessa Oromiyaa dhaqqabu ni ifoomsa.

Godina Baha Wallaggaa aanaa Waamaa Hagaloo keessatti waraanni shiftaa PP dargaggoo tokko ajjeesanii namoota nagaa hidhaatti guuruun dhaga'ame ONM-ABO Amajjii 14,2026 Godina Baha Wallaggaa aanaa Waamaa Hagaloo ganda Buttujjii Qarsoo jedhamu keessatti gaafa Amajjii 11,2026 waraanni shiftaa PP nama maqaan isaa Shallamaa Ayyaanaa jedhamu badii tokko malee deggeraa WBO'ti jechuun rasaasa itti roobsanii haala suukkanneessaa ta'een ajjeesanii gatuu jiraattotni himan. Akka jiraattotni himanitti, waraanni shiftaa PP dargaggoo Shallamaan nama tuttuqqaa siyaasa kamiyyuu hin qabne deggaraa WBOti jechuun ajjeesanii, namoota maqaan isaanii Misgaanaa Addunyaa fi Nagaash Lammeessaa jedhaman ammoo reebicha ulfaataa irratti raawwachuun waajjira poolisii aanichaatti hidhanii jiraachuu jiraattonni dabaluun Arraata Biyyoolessa Oromiyaatti himanii jiru. Murni Bilxiginnaa dhiiga qulqullootaa dhangalaasuu aadeeffachuun golee Oromiyaa cufa keessatti ilmaan Oromoo badii tokko malee afaan qawween ukkaamsuun ajjechaa suukkanneessaa irratti raawwatee duguuggaa sanyii raawwachaa jiraachuun ni beekama.

Oduu Galgala ONM-ABO Amajjii 13-2026 itti dhiyaadhaa! Arraata Biyyoolessa Oromiyaa:- Facebook:- https://www.facebook.com/profile.php?id=61574067972541 Twitter:- https://twitter.com/ArraataO Telegram:- https://t.me/onm_AbO11 YouTube:- https://www.youtube.com/live/8RFSrlF488M?is=be3YnkwraS3SKKX5 Rumble:- https://rumble.com/c/ONM Yaada, gaaffii fi qeeqa yoo qabaattan teessoo keenya Whatsapp: +447570361431 Tel : +447570361431 Email: bariibilisummaa103@gmail.com nu argachuu dandeessu! Sagalee Cunqurfamtootaa! Yaadaa fi qalbii guutuun hordofaa❗️